Blog

Java e parë e luftës kundër Iranit i kushtoi Shteteve të Bashkuara më shumë se 11.3 miliardë dollarë, u tha ligjvënësve në një konferencë për shtyp të Pentagonit, sipas një raporti të New York Times.

Gazeta, duke cituar burime të paidentifikuara, të njohura me konferencën informative me dyer të mbyllura të së martës, thotë se anëtarëve të Kongresit iu tha se shifra përjashton shumë kosto të lidhura me përgatitjet për sulmet, duke sugjeruar se numri përfundimtar për javën e parë mund të rritet ndjeshëm.

Zyrtarët e mbrojtjes i kishin thënë më parë Kongresit se municione me vlerë afërsisht 5.6 miliardë dollarë u shpenzuan vetëm në dy ditët e para të luftimeve, sipas mediave amerikane – një shkallë djegieje shumë më e lartë se vlerësimet e mëparshme publike.

Grupi i pavarur i ekspertëve në Qendrën për Studime Strategjike dhe Ndërkombëtare (CSIS) në Uashington vlerësoi se 100 orët e para të Operacionit Epic Fury kushtuan 3.7 miliardë dollarë – ose më shumë se 891 milionë dollarë në ditë.

Presidenti amerikan, Donald Trump ka pretenduar se Shtetet e Bashkuara e kanë “fituar” luftën kundër Iranit, por që forcat ushtarake amerikane do t’i vazhdojnë sulmet derisa të përfundojë e gjithë puna.

Ndërkohë, Teherani vazhdon të godasë anije në rajon dhe zotohet për sulme tjera.

Izraeli e ka bërë të qartë se nuk është gati t’i japë fund fushatës ushtarake, përfshirë sulmet në Liban kundër forcave të Hezbollahut – aleatë të Iranit – duke thënë se “një mori shënjestrash” vazhdojnë të ekzistojnë.

Kuvendi i Shqipërisë ka rrëzuar me 82 vota kundër kërkesën e SPAK-ut për heqjen e imunitetit të Belinda Ballukut.

Sipas raportimeve të A2CNN, 128 deputetë ishin prezentë në sallë, ku 47 prej tyre votuan pro, e 82 kundër.

Asnjëri nga deputetët nuk abstenoi.

Qendra Klinike Universitare e Kosovës (QKUK) se ka shënuar një avancim të rëndësishëm në fushën e urologjisë, duke realizuar për herë të parë në Kosovë intervenimin kirurgjik minimal invaziv Nephrolitotomia Perkutane (PCNL – Percutaneous Nephrolithotomy) për trajtimin e gurëve të mëdhenj në veshka.

ShSKUK njofton se deri më tani, pacientët me këtë patologji kanë qenë të detyruar të kërkojnë trajtim jashtë institucioneve publike shëndetësore.

“Fillimi i aplikimit të kësaj procedure në QKUK përbën një hap të rëndësishëm në avancimin e shërbimeve urologjike dhe në ofrimin e trajtimeve moderne brenda sistemit publik shëndetësor në Kosovë. Procedura është realizuar nga ekipi i Klinikës së Urologjisë në bashkëpunim me Klinikën e Anesteziologjisë, duke përdorur teknologjinë bashkëkohore të laser-it holmium, e cila mundëson thyerjen dhe largimin e gurëve në veshka përmes një qasjeje minimale invazive”, thuhet në njoftim.

“Metoda PCNL përdoret për trajtimin e gurëve të mëdhenj në veshka dhe realizohet përmes një prerjeje shumë të vogël në lëkurë, duke mundësuar qasje direkte në veshkë. Kjo teknikë redukton traumën kirurgjike, kohën e qëndrimit në spital dhe periudhën e rikuperimit të pacientit. Pacienti me inicialet N.M., i lindur në vitin 1967, është rasti i parë që i’u nënshtrua me sukses këtij intervenimi dhe është liruar për në shtëpi në gjendje të mirë shëndetësore”, thuhet në njoftim.

Drejtoria e Inspekcionit në Komunën e Prishtinë ka filluar një aksion për largimin e reklamave të vendosura pa leje në hapësirat publike, duke përfshirë sipërfaqet e gjelbëruara, trotuaret dhe shtyllat elektrike.

Sipas njoftimit të komunës, qëllimi i këtij aksioni është të lirohen hapësirat publike dhe të sigurohet lëvizje më e lirë dhe më e sigurt për këmbësorët.

“Qëllimi i këtij aksioni është largimi i reklamave ilegale dhe lirimi i hapësirave publike, veçanërisht trotuareve, për të siguruar lëvizje më të lirë dhe më të sigurt për qytetarët”, thuhet në njoftim.

Komuna ka bërë thirrje për qytetarët dhe bizneset që të respektojnë rregullat dhe të mos vendosin reklama pa leje në hapësirat publike.

“Aksioni do të vazhdojë deri në largimin e të gjitha reklamave, ndërsa për të gjithë ata që rivendosin reklama pa leje do të shqiptohen gjoba”, shtohet në njoftim.

Ky aksion synon të përmirësojë pamjen e qytetit dhe të garantojë një mjedis më të sigurt dhe të organizuar për të gjithë qytetarët.

Njësitet Antikontrabandë të Doganës së Kosovës, pas marrjes së autorizimit për ndërmarrjen e veprimeve nga Prokuroria Themelore në Prishtinë, kanë realizuar sot një kontroll në garazhin e një shtëpie në Prishtinë.

Sipas njoftimit të Doganës, gjatë kontrollit janë gjetur dhe sekuestruar 44 pako cigare pa banderola, të cilat dyshohet se janë kontrabanduar në Kosovë.

Tutje, në njoftim thuhet se vlera e përgjithshme e këtyre cigareve vlerësohet të jetë rreth 15,000 euro, ndërsa shmangiet nga pagesa e taksave dhe detyrimeve doganore llogariten të jenë mbi 30,000 euro.

“Me urdhër të Prokurorit Kujdestar, personi i dyshuar – njëkohësisht pronar i mallit – është intervistuar lidhur me rrethanat e rastit, ndërsa malli i gjetur është konfiskuar”.

Kryetari i Prizrenit, Shaqir Totaj, ka thënë se komunat ende nuk e kanë në dispozicion buxhetin për shfrytëzim që u miratua muajin e kaluar.

“Përkundër faktit se buxheti i vitit 2026 është aprovuar nga Qeveria dhe dekretuar nga Presidenca, edhe pse jemi në mes të muajit mars, komunat akoma nuk e kanë në dispozicion për shfrytëzim!”, ka thënë Totaj.

Totaj gjithashtu tha se dyshohet se Ministria e Financave “i ka të ndara në pritje për ekzekutim të pagesave përmbarimore nga buxheti i komunave një vlerë të përafërt rreth 100 milion euro!”.

Ai tha se kjo mënyrë e të vepruarit nga ana e Ministrisë do të ketë për pasojë çrregullimin e funksionimit të buxheteve komunale.

Kuvendi i Kosovës e kishte miratuar në shkurt ligjin për buxhetin shtetëror në vlerë rreth 4 miliardë euro për vitin 2026.

Analisti kosovar, Ilir Deda, ka reaguar lidhur me përplasjen që ka nisur në mes të kampit të Albin Kurtit dhe presidentes Vjosa Osmani pas moskandidimit të kësaj të fundit edhe për një mandat si presidente.

Deda i ka konsideruar si jonormale akuzat që po i bëhen presidentes Vjosa Osmani për puç dhe për linçimet në adresë të saj.

Ai ka thënë se me Osmanin mund të kesh mospajtime sa i përket politikës së brendshme, por sa i përket politikës së jashtme, sipas Dedës, Osmani ka qenë e vetmja që ka sjellur rezultate.

Reagimi i plotë:

Politika e linçimit, përçarjes dhe konspiracioneve e gërryen të tashmen dhe po e vjedh të ardhmen e këtij vendi. A me të vërtetë besoni që gruaja në krye të shtetit ka dashtë të bëjë puç?

A jeni normal?

Me presideten Vjosa Osmani mund të ketë mospajtime çdo njeri për mënyrën si e ka vepruar në politikën e brendshme. Por, në politikë të jashtme ajo ka qenë e vetmja adresë që ka sjellë rezultate për Kosovën, dhe ka qenë garanca e marrëdhënieve të Kosovës me botë.

Gjenerimi i krizave dhe përcjellja me këto lloj fushatash të rreme e linçuese duhet të bëjnë çdo njeri të pyes vetën në çfarë ambienti po jetojmë dhe sa gjatë do të tolerojmë këtë.

Kosovës ama bash hiç nuk ju ka dashtë kjo krizë, të cilën nuk e shkaktoi askush jashtë Kosovës, as partitë në opozitë, e as ndonjë armik i shpikur, por dëshira për pushtet absolut. E pushteti absolut i një partie s’ka lidhje me demokraci, liri e zhvillim.

Policia e Kosovës ka publikuar statistikat e përgjithshme të trafikut brenda 24-orëve të fundit në vend.

Sipas policisë, gjatë kësaj periudhe janë regjistruar 22 aksidente trafiku me të lënduar, ndërsa 39 aksidente të tjera kanë përfunduar vetëm me dëme materiale.

Po ashtu, njësitë e trafikut kanë shqiptuar 2.712 tiketa trafiku për shkelje të ndryshme të rregullave në komunikacion.

Policia e Kosovës vazhdon të apelojë tek drejtuesit e automjeteve që të respektojnë rregullat e trafikut dhe të kenë kujdes të shtuar gjatë qarkullimit, me qëllim të parandalimit të aksidenteve.

Parlamenti do të votojë sot lidhur me kërkesën e SPAK për arrestimin e ish-zv.kryeministres Belinda Balluku.

Mazhoranca ka konfirmuar qëndrimin e saj për të votuar kundër kësaj kërkese gjatë mbledhjes së grupit parlamentar në fillim të kësaj jave, raporton Tch.

Në seancën që ka nisur në orën 10:00, bie në sy mungesa e ish ministres së Jashtme, Elisa Spiropali, e shkarkuar nga kjo detyrë javën e kaluar së bashku me Belinda Ballukun.

Kryetari I Kuvendit, Niko Peleshi njoftoi se Spiropali, pas largimit nga detyra e ministres, tani si deputete do të jetë pjesë e grupeve parlamentare të miqësisë me SHBA-në dhe Izraelin.

Në nisje të seancës nuk janë të pranishëm gjithashtu edhe Fatmir Xhafaj dhe vetë Belinda Balluku.

Burimet nga grupi parlamentar i PS-së i thanë gazetarit të Top Channel, Muhamed Veliu se Fatmir Xhafaj ndodhet jashtë vendit prej disa ditësh në një vizitë të planifikuar shumë kohë më parë.