Blog

Presidenti amerikan, Donald Trump ka folur me gazetarët e pranishëm jashtë Shtëpisë së Bardhë.

I pyetur nëse ka një plan për Kharg Island të Iranit, ai pohoi se “mund të kem një plan, mund të mos kem, por si mund t’ia them këtë një gazetari. Sigurisht që është një vend për të cilin njerëzit po flasin”.

Lideri amerikan ka deklaruar se nuk dëshiron të ndalë luftën përkohësisht me iranianët “nuk dua të bëj armëpushim. Nuk bën armëpushim kur po e shkatërron plotësisht palën tjetër”, shkruan skynews.

Ai thotë për rihapjen e Ngushticës së Hormuzit për të lejuar transportet jetike të naftës dhe gazit “ne nuk e përdorim atë. Në një moment të caktuar, ajo do të hapet vetë”.

Ai shton se “do të ishte mirë” nëse vendet që e përdorin këtë ngushticë, si Kina, do të “përfshiheshin”.

Ndryshe, Izraeli dhe SHBA-ja kanë nisur sulmet ajrore tash e disa javë kundër Iranit, i cili dyshohet se është afër prodhimit të armës bërthamore.

Policia e Kosovës ka njoftuar se të dielën nga ora 09:00 deri në 11:00, rrugës nga Prishtina Mall – deri në Veternik dhe anasjelltas do të jetë e bllokuar për qarkullimin e automjeteve.

Kjo pasi Federata Atletike e Kosovës (FAK), do të organizojë garën ndërkombëtare të vrapimit rrugor “Kosova në Lëvizje”.

“Duke u bazuar në procedurat e parapara FAK-u ka marrë pëlqimin e Ministrisë së Infrastrukturës, që gara të zhvillohet në segmentin e rrugës nacionale N2 (Prishtina Mall – Veternik – QMI) nga ora 09:00 deri në 11:00. Policia e Kosovës duke asistuar FAK-un, do të bëjë bllokimin e rrugës nga Prishtina Mall – deri në Veternik dhe anasjelltas, nesër datë 22 mars 2026 nga ora 09:00 deri në 11:00. Andaj, Policia duke kërkuar mirëkuptim lut pjesëmarrësit në trafik, që në periudhën e lartcekur, të shmangin këtë segment rrugor dhe të përdorin rrugë alternative”, thuhet nga Policia e Kosovës.

Një grua në Gjakovë ka vdekur në spitalin e këtij qyteti pasi kishte rënë në ujë nga ura e “Ura e Moglicës”, në rrugën “Ymer Pula” në Gjakovë.

Ajo ishte nxjerrë nga uji nga ekipet e emergjencës, ku pas ndihmës së parë është dërguar për trajtim në spital.

Zëdhënësi i Policisë për rajonin e Gjakovës ka bërë të ditur se rreth orës 21:30 minuta të shtunën janë njoftuar nga spitali se gruaja kishte vdekur pas keqësimit të gjendjes shëndetësore

Rreth orës 19:55 jemi njoftuar se një grua në moshë madhore kishte rënë në ujë nga e ashtuquajtura “Ura e Moglicës”, në rrugën “Ymer Pula” në Gjakovë. Patrullat policore, së bashku me njësinë e zjarrfikësve dhe ekipin e emergjencës, kanë dalë menjëherë në vendin e ngjarjes, ku viktima ishte nxjerrë tashmë nga uji. Personeli mjekësor i ka ofruar ndihmën e parë dhe më pas ajo është dërguar për trajtim të mëtejshëm mjekësor. Rreth orës 21:30 jemi njoftuar nga spitali se gjendja shëndetësore e viktimës ishte përkeqësuar dhe ajo ka ndërruar jetë”, ka thënë Elezi.

Ai njoftoi se aktualisht, janë duke u ndërmarrë veprimet e nevojshme hetimore për zbardhjen e plotë të rrethanave të ngjarjes.

Me rritjen e çmimit të naftës, ka nga nesër do të fillojë edhe rritja e çmimeve për transportin ndërurban.

Kështu ka bërë të ditur një prej kompanive të udhëtimit – Mendi Tours.

Kompania në fjalë operon në destinacionet Prishtinë-Prizren dhe anasjelltas, dhe rritjen e çmimeve e arsyeton me zhvillimet në bursë.

“Të nderuar udhëtarë,

Ju njoftojmë se nga nesër (22.03.2026) hyjnë në fuqi çmimet e reja për linjat ndërurbane. Ky ndryshim vjen si pasojë e rritjes së çmimit të naftës dhe kostove të tjera të transportit.

Ju falënderojmë për mirëkuptimin dhe besimin tuaj” thuhet në njoftimin e kompanisë.

Deputeti Eman Rrahman, nga radhët e Partisë Demokratike të Kosovës, ka thënë se akciza dhe tvsh’ja për derivatet duhet të hiqet, duke kërkuar nga qeveria e udhëhequr nga Albin Kurti, që të marrë masa konkrete për të përballuar rritjen e çmimeve.

Rrahmani ka thënë edhe se, çmimet derivateve ka arritur nivele alarmante, ndërsa në të njëjtën kohë kemi rritje të çmimit të energjisë për qytetarët dhe një rritje shumëfish të kostos së energjisë për bizneset pas kalimit në treg të lirë.

‘’Kjo situatë po krijon një presion të madh ekonomik dhe po ndikon drejtpërdrejt në rritjen e përgjithshme të çmimeve dhe në koston e jetesës’’, ka thënë mes tjerash ai.

Postimi:

Të hiqet akciza dhe TVSH-ja për derivatet.

Qeveria e Kosovës duhet urgjentisht të marrë masa konkrete për të përballuar rritjen e papërballueshme të çmimeve që po godet qytetarët dhe bizneset. Çmimi i derivateve ka arritur nivele alarmante, ndërsa në të njëjtën kohë kemi rritje të çmimit të energjisë për qytetarët dhe një rritje shumëfish të kostos së energjisë për bizneset pas kalimit në treg të lirë. Kjo situatë po krijon një presion të madh ekonomik dhe po ndikon drejtpërdrejt në rritjen e përgjithshme të çmimeve dhe në koston e jetesës.

Në këtë kontekst, është e domosdoshme që Qeveria të shqyrtojë menjëherë pezullimin e akcizës për derivatet dhe të analizojë mundësinë e heqjes së përkohshme të TVSH-së. Një vendim i tillë do të sillte ulje të menjëhershme të çmimit për rreth 60 cent për litër, duke lehtësuar barrën për qytetarët dhe duke i dhënë frymëmarrje bizneseve në këtë periudhë të vështirë.

Nëse nuk veprohet sot, nesër mund të jetë vonë. Pasojat do të jenë rritje e pakontrolluar e çmimeve, ulje e fuqisë blerëse dhe vështirësi serioze për funksionimin e bizneseve. Kosova ka nevojë për vendime të guximshme dhe të menjëhershme për të mbrojtur ekonominë dhe mirëqenien e qytetarëve.

Ish-deputetja e kuvendit, Arbëreshë Krasniqi, ka reaguar ndaj Sevdai Radogoshit, lidhur me disa deklarata nga ky i fundit për Malishevën.

Krasniqi, nga ka thënë se Malisheva ka emra të mëdhenj të artit dhe kulturës si Nexhmija Pagarusha, Salih e Feriz Krasniqi.

Ajo ka thënë edhe se Malisha nuk ka nevojë me dëshmu asgjë.

Postimi:

Malisheva ka emra të mëdhenj të artit dhe kulturës si Salih e Feriz Krasniqi, Nexhmije Pagarusha, Bijtë e Sef Mleqanit, Beqir Gashi, Avni Hoti, Zyle Krasniqi, Kumrije e Sheqerie Buqaj, Ismet Krasniqi e shumë të tjerë.

Prandaj, Malisheva nuk ka nevojë me dëshmu asgjë

Me dekada kulturë, art dhe sakrificë që nuk mund të mohohen.

Një ngjarje e rëndë ka ndodhur sot në Klinë, më saktësisht në fshatin Bokshiq, ku një person ka mbetur i vrarë nga të shtënat me armë zjarri. Viktima që mbeti i vdekur nga të shtënat është Faruk Isufi.

Lidhur me këtë ngjarje, ka reaguar kryetari i Aleancës për Ardhmërinë e Kosovës, Ramush Haradinaj, i cili ka thënë vdekjen e Isufi, e ka marrë si lajm të hidhur.

Haradinaj ka njoftuar edhe se viktima, kishte qenë ‘’aktivist i hershëm’’ i AAK’së, dhe se, është i rëndë fakti se pas gjithë sakrificës për liri, ai u nda nga jeta në rrethana të trishta.

Postimi:

I hidhur lajmi për ndarjen nga jeta të bashkëluftëtarit Faruk Isufi nga Klina. Edhe më i rëndë fakti se pas gjithë sakrificës për liri dhe angazhimit të tij në shtetndërtim, u nda nga jeta në rrethana të trishta.

Faruku ishte aktivist i hershëm i Aleancës, i përkushtuar dhe i respektuar nga të gjithë ata që patën rastin ta njohin nga afër.

Ngushëllime të sinqerta familjes, miqve, bashkëluftëtarëve dhe kolegëve në Aleancë.

Faruku u prehtë në paqe.

Faruk Isufi nga Klina ka ndërruar jetë pas të shtënave me armë zjarri në fshatin Bokshiq.

Për vrasjen dyshohet vëllai i tij, Jetmiri Isufi, ish-futbollist i KF Dukagjinit, pas një mosmarrëveshjeje verbale, raporton Sinjali

Tanimë, lidhur me rastin është deklaruar edhe Prokuroria Themelore në Pejë, nga ku është njoftuar se i dyshuari është arrestuar dhe se i njëjti me urdhër të prokurorit të shtetit është ndaluar për 48 orë.

‘’ Viktima është dërguar për në Spitalin Rajonal të Pejës për trajtim mjekësor, mirëpo si pasoje e plagëve të rënda viktima ka humbur jetën. Vdekjen e viktimës e ka konstatuar mjeku kujdestar nga Spitali Rajonal i Pejës’’, thuhet mes tjerash në njoftim.

Nga prokuroria bëhet e ditur edhe se, në vendngjarje kanë dalë të gjitha njësitet relevante policore, Prokurori i Shtetit nga Departamenti i Krimeve të Rënda, të cilët kanë sekuestruar armën e cila dyshohet që është përdorur në rast dhe prova të tjera relevante.