Blog

Kryetari i komunës së Mitrovicës, Faton Peci ka bërë të ditur se shtëpia e Latif Berishës do të shndërrohet në muze dhe do të shërbejë si pikë referuese e historisë.

Peci në një postim në Facebook shkruan se kjo shtëpi do të qëndrojë si kujtesë në memorien tonë kolektive si pasuri e trashëgimisë kulturore.

“Shtëpia e Latif Berishës, Shtëpi Muze!

Kjo shtëpi e dijes, që dëshmon të kaluarën e lavdishme, do të qëndrojë si kujtesë në memorien tonë kolektive si pasuri e trashëgimisë kulturore.

Falënderoj Kryeministrin Kurti për mbështetjen në iniciativën tonë që kjo shtëpi të shndërrohet në muze, ku do të shërbejë si pikë referuese e historisë sonë të vonshme”, shkruan Peci.

Gjashtë persona kanë mbetur të plagosur në Tel Aviv pas një sulmi të ri me raketa të lëshuara nga Iran në orët e para të mëngjesit.

Sipas shërbimit të emergjencës Magen David Adom, incidenti ndodhi pak pas orës 7:00 (ora lokale), ndërsa ekipet mjekësore ndërhynë menjëherë për të trajtuar të plagosurit dhe për t’i transportuar në spital.

Shërbimet e emergjencës izraelite konfirmuan se kanë dërguar ekipe shpëtimi në disa zona të ndryshme ku janë regjistruar dëme.

Sipas zyrtarëve izraelitë, vlerësohet se vetëm një raketë është lëshuar drejt Tel Avivit këtë mëngjes, por dyshohet se ajo mund të ketë qenë një variant i ri i një rakete balistike me rreze të mesme veprimi ose e pajisur me një kokë luftarake me shpërndarje.

Burimet sugjerojnë se raketa mund të ketë përmbajtur 3 deri në 4 bomba të mëdha, secila me peshë rreth 100 kilogramë, të cilat janë shpërndarë dhe kanë rënë në zona të ndryshme, duke shkaktuar dëme dhe panik te banorët.

Air raid sirens sounded across Tel Aviv and other areas as Iran launched a fresh retaliatory missile barrage, with smoke seen in the city after reported impacts and falling shrapnel ⤵️ pic.twitter.com/VXAD48KIAD

— Anadolu English (@anadoluagency) March 24, 2026

Kryetarja e Kuvendit, Albulena Haxhiu, ka bërë homazhe në Gllogjan të Deçanit, në 28-vjetorin e Epopesë së Dukagjinit.

Ajo tha se në vitin 1998, rrethimi i Gllogjanit synonte të shuante rezistencën, por sipas saj, ndodhi e kundërta. Haxhiu theksoi se familja Haradinaj dhe luftëtarët e tjerë e thyen rrethimin dhe dëshmuan se përpjekja për liri nuk ndalet.

Ajo përkujtoi dëshmorët Him Haradinaj, Gazmend dhe Agron Mehmetaj, si dhe sakrificën e familjeve të tyre.

Beteja e Gllogjanit u zhvillua më 24 mars të vitit 1998, mes Ushtrisë Çlirimtare të Kosovës dhe forcave serbe. Kjo ngjarje përkujtohet çdo vit si pjesë e rezistencës për çlirimin e vendit.

Referendumi i fundit në Itali ka treguar një mobilizim të jashtëzakonshëm të të rinjve.

Italianët votuan nëse duhej ndryshuar Kushtetuta për të reformuar sistemin gjyqësor — dhe shumica vendosi ta refuzojë reformën.

Ndërsa pjesëmarrja totale arriti në 58,9%, tek të rinjtë 18–28 vjeç, Gjenerata Z, pjesëmarrja ishte 67%, dhe shumica votuan ‘Jo’ me 58,5%.

Rezultatet tregojnë se qytetarët më të arsimuar dhe të diplomuar ishin më të vendosur për të refuzuar ndryshimet, ndërsa punonjësit e zakonshëm u ndanë dhe mbështetja për “Po” ishte më e lartë mes amviseve. Në qendër të spektrit politik, mbështetja për ligjin arriti vetëm 31%.

Pjesëmarrja e lartë, sidomos mes të rinjve, vjen si pasojë e politizimit të referendumit. Tema teknike e reformës nuk duket se ka tërhequr interesin kryesor të votuesve; vendimi i shumicës u bazua më shumë mbi pasojat politike sesa mbi përmbajtjen specifike të reformës. Një pjesë e votuesve që nuk kishin marrë pjesë në zgjedhjet e 2022-ës dhe në ato europiane të 2024-ës u mobilizuan dhe votuan “Jo”, duke rritur ndikimin e rezultateve.

Analiza sipas moshës dhe statusit shoqëror tregon se pjesëmarrja më e lartë është mes studentëve dhe të rinjve, ndërsa më e ulëta tek të moshuarit dhe të pakënaqurit ekonomikisht. Për Gjeneratën Y (29–44 vjeç) u regjistrua abstensioni më i lartë, me 47,5% të mosvotuesve, gjithmonë me një përparësi për “Jo” prej 54,8%.

Nga pikëpamja politike, mobilizimi ishte i dukshëm tek partitë e majta dhe të djathta, ndërsa më pak aktivizim u pa tek qendra dhe qendror-djathtas. Vetëm në Partinë Demokratike u regjistrua një diskurs i vogël pro-“Po” (rreth 9%), ndërsa te Mbështetësit e M5S rreth 17% votuan “Po”, megjithëse udhëheqësi i tyre mbështeste “Jo”. Në qendër-djathtas, disa zhvendosje u panë mes votuesve të Lega dhe Forza Italia, respektivisht me 12% dhe 10% pro-“Jo”.

Analiza sipas të ardhurave dhe statusit social tregon se vota “Jo” dominon tek grupet më të arsimuara dhe ekonomisht të privilegjuara, ndërsa “Po” është më e popullarizuar tek amviset dhe ata me nivel më të ulët arsimor.

Dështimi i qeverisë dhe veçanërisht i kryetares së Këshillit, Giorgia Meloni, është i qartë sipas Corriere. Pozicioni i saj në muajt e fundit ka reflektuar sfida të shumta, përfshirë kushtet e vështira ekonomike, rritjen e kostove jetësore dhe tensionet ndërkombëtare./TCh/

Zhvillimet e orëve të fundit në Lindjen e Mesme po japin sinjale të kujdesshme optimizmi për një zbutje të konfliktit, ndërsa mediat izraelite raportojnë për një afat të mundshëm për përfundimin e luftës dhe për lëvizje drejt negociatave mes United States dhe Iran. Sipas gazetës Yedioth Ahronoth dhe faqes Ynetnews, pas vendimit të presidentit Donald Trump për të “ngrirë” sulmet ndaj objekteve energjetike iraniane për pesë ditë, një zyrtar izraelit ka bërë të ditur se Uashingtoni ka vendosur 9 prillin si datë të synuar për përfundimin e konfliktit.

Ky afat krijon një dritare prej rreth 20 ditësh për vazhdimin e luftimeve dhe përpjekjeve diplomatike. Sipas të njëjtit burim, bisedimet mes palëve pritet të zhvillohen në Pakistan, megjithëse Izraeli nuk është informuar për kontaktet e drejtpërdrejta me kryetarin e parlamentit iranian, Mohammad Bagher Ghalibaf.

Raportimet shkojnë edhe më tej, duke sugjeruar se ministri i Jashtëm iranian, Abbas Araqchi, i ka komunikuar në mënyrë jozyrtare të dërguarit amerikan Steve Witkoff se udhëheqësi i ri suprem, Mojtaba Khamenei, ka pranuar të hyjë në negociata për një marrëveshje me SHBA-në dhe për përfundimin e shpejtë të luftës. Vetë Trump deklaroi në një intervistë për Fox News se një marrëveshje mund të arrihet “brenda pesë ditësh ose më pak”, duke shtuar se “gjërat po shkojnë shumë mirë”.

Megjithatë, nga ana tjetër, zyrtarët iranianë kanë mohuar publikisht ekzistencën e negociatave. Një përfaqësues ushtarak i cituar nga Tasnim News Agency paralajmëroi “surpriza” në ditët në vijim, ndërsa zëdhënësi parlamentar Ebrahim Rezaei deklaroi se “nuk ka logjikë për negociata në këto kushte”. Po ashtu, zëdhënësi i Ministrisë së Jashtme, Esmail Baghaei, konfirmoi se Irani ka marrë mesazhe për bisedime përmes vendeve të treta, por nuk ka dhënë ende përgjigje zyrtare. Ndërkohë, sipas Financial Times, zyrtarë në Pakistan po veprojnë si ndërmjetës, duke përcjellë mesazhe mes përfaqësuesve iranianë dhe emisarëve amerikanë, përfshirë Jared Kushner. Pavarësisht sinjaleve diplomatike, situata në terren mbetet e tensionuar. Ushtria izraelite ka njoftuar për sulme gjatë natës ndaj objektivave të lidhura me Forcën Quds dhe strukturat e Islamic Revolutionary Guard Corps në Teheran.

Ndërkohë, në Lebanon vazhdojnë goditjet ndaj pozicioneve të Hezbollah. Nga ana tjetër, Irani ka lëshuar një raketë drejt Tel Aviv, duke shkaktuar gjashtë të plagosur. Zhvillimet e fundit tregojnë një situatë të paqëndrueshme, ku diplomacia dhe përshkallëzimi ushtarak po ecin paralelisht, ndërsa mbetet e paqartë nëse palët do të arrijnë një marrëveshje brenda afateve të përfolura.

Mbrojtja e Hashim Thaçit e përfaqësuar nga avokati Luka Mishetiq, ka kërkuar nga trupi gjykues në rastin e ish-krerëve të UÇK-së, që të urdhëroje Prokurorinë të mos nxjerrë prova të tjera përveç se në rrethana të jashtëzakonshme.

Sipas aspektit procedural, siç paraqitet në parashtresën e mbrojtjes, më 18 shkurt 2026 trupi gjykues ka mbyllur çështjen në këtë rast gjyqësor dhe shprehimisht ka thënë se në përputhje me Rregullën 136, në këtë fazë nuk mund të paraqiten më ndaj tyre parashtresa ose prova të tjera përveçse në rrethana të jashtëzakonshme, raporton “Betimi për Drejtësi“.

Ndërsa, sipas mbrojtjes, më 4 mars, Prokuroria ka vendosur tre artikuj të rinj në qasje për panelin, me pretendimin se i nënshtrohen Rregullës 103.

Rregulla 103 sipas Rregullores së Procedurave dhe provave, ka të bëjë me provat shfajësuese, e cila parasheh se: “Në varësi të rregullës 107 dhe rregullës 108, Prokurori i Specializuar i vë menjëherë në dispozicion Mbrojtjes çdo informacion për të cilin ka arsye të besohet se sugjeron pafajësinë, apo lehtëson fajësinë e të akuzuarit, apo ndikon në besueshmërinë ose mbështetshmërinë e provave të Prokurorit të Specializuar, sapo një informacion i tillë të jetë nën ruajtjen, kontrollin apo dijeninë faktike të Prokurorit të Specializuar”.

Mbrojtja thotë se atë ditë kishte kërkuar sqarim nga Prokuroria nëse po ia bën me dije trupit gjykues për provat e tilla. Ndërsa, Prokuroria veprim të ngjashëm pretendohet se kishte bëre edhe më 10 mars duke i vendosur në Legal Workflow edhe dy artikuj të tjerë me pretendimin se i nënshtrohen rregullës së njëjtë.

“Rregulla 136 është e qartë: kur procedurat u mbyllën më 18 shkurt 2026, nuk mund të bëhen më parashtresa të tjera ndaj Panelit dhe Paneli nuk mund të pranojë më parashtresa të tjera ose të dëgjojë prova, përveç nëse rrethana të jashtëzakonshme kërkojnë ndryshe. Vetë Paneli i Gjykimit i udhëzoi Palët më 18 shkurt 2026 se në këtë fazë nuk mund të bëhen më parashtresa ose prova të tjera, në përputhje me termat e qartë të Rregullës 136”, thuhet në parashtresën e mbrojtjes.

Ndonëse sipas mbrojtjes rregulla në fjalë nuk lejon që të bëhen parashtresa ose prova shtesë, Prokuroria vazhdon ta bëjë një gjë ë tillë pa treguar se ka rrethana të jashtëzakonshme.

Mbrojtja, gjithashtu thotë se nëse Prokuroria zbulon materiale shfajësuese që kërkojnë rihapjen e çështjes, atëherë i takon vetë mbrojtjes që të paraqes një mocion në përputhje me Rregullën 136 dhe të tregojë arsye të mjaftueshme dhe rrethana të jashtëzakonshme për të pranuar atë material shfajësues si provë.

Të ngjajshme
Specialja ia vazhdon paraburgimin Kadri Veselit

18 Mar, 2026, 19:00
Specialja ia heq kufizimet e vizitave tek Thaçi një personi,…

18 Mar, 2026, 12:28
Prokuroria mbyll çështjen e saj në rastin Thaçi dhe tjerët…

16 Mar, 2026, 9:49
“Për arsyet e lartpërmendura, Mbrojtja i kërkon me respekt Panelit të Gjykimit që të: URDHËROJË ZPS-në që të mos bëjë zbulime të provave shtesë ndaj Panelit të Gjykimit, qoftë përmes Legal Workflow apo ndryshe, përveç nëse mund të demonstrojë arsye të mjaftueshme dhe rrethana të jashtëzakonshme për ta bërë këtë”, thuhet në parashtresën e mbrojtjes.

Fjala përmbyllëse e Prokurorisë filloi të hënën e 9 shkurtit 2026, dhe përfundoi një ditë më pas, më 10 shkurt, ku kryeprokurorja e specializuar, Kimberly West, kërkoi dënim unik me nga 45 vjet burgim për secilin nga katër të akuzuarit. Po më 10 shkurt u dha fjala përfundimtare edhe nga mbrojtësi i viktimave, Simon Laws.

Ndërsa, më 11 shkurt 2026, dha fjalën e tij përfundimtare mbrojtja e Hashim Thaçit dhe e filloi mbrojtja e Veselit, e vazhdoi edhe më 12 shkurt. Po atë ditë e nisi fjalën përfundimtare mbrojtja e Selimit dhe e përfundoi me 13 shkurt, datë në të cilën më pas i nisi deklarimet mbrojtja e Krasniqit. Kjo e fundit përfundoi deklaratat përmbyllëse më 16 shkurt, seancë e cila vazhdoi me pyetjet e trupit gjykues dhe përgjigjet e mbrojtjes dhe Prokurorisë.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020. /BetimipërDrejtësi

Nesër, më 25 mars do të varroset ish-ushtari i UÇK-së, Samir Puza, i cili u gjet i vdekur më 1 mars të vitit 2024 në një pusetë në Parkun “Karagaq” Pejë.

Këtë e ka bërë të ditur familja e të ndjerit.

Ndërkohë, përfaqësuesi ligjor i familjes Puza, avokati Granit Cenaj deklaroi rasti i zhdukjes dhe i vdekjes së Samirit, është hetuar nga Prokuroria Themelore në Pejë dhe deri në këtë moment, sipas tij, nuk ka asnjë epilog të qartë se çfarë ka ndodhur me të ndjerin.

“Konkretisht se a është një vrasje pa autor apo është një vdekje natyrale e shkaktuar si pasojë e vdekjes së natyrshme”, ka thënë Cenaj.

Ai shton se në bazë të të gjeturave (kamerave të sigurisë, dëshmitarëve etj) Prokuroria nuk ka arritur që të ndërlidhë këtë rast me ndonjë autor apo ngjarje tjetër konkrete.

Sipas ekspertimit mjekoligjor të datës 06.09.2024 rezulton se shkaku i vdekjes së Samir Puzës është i “pa përcaktuar” e gjithashtu edhe mënyra e vdekjes është e “pa përcaktuar”.

Ndryshe, i ndjeri do varroset me nderime ushtarake ne varrezat e veteranëve të Ushtrisë Çlirimtare të Kosovës në “Kompleksin Memorial në Koshare” nga ora 14:00.

Kryetari i PDK-së, Bedri Hamza ka kujtuar 27-vjetorin e ndërhyrjes ushtarake të NATO-s në Kosovë

Si çdo vit, edhe këtë herë, Hamza nderoi heronjtë, dëshmorët dhe martirët e luftës, dhe njëkohësisht i falënderoi të gjithë ata që qëndruan në anën e së vërtetës.

Përmes një postimi në Facebook, Hamza tha se bombardimet e NATO-s u koordinuan edhe me UÇK-në, me Hashim Thaçin, Kadri Veselin, Jakup Krasniqin, Rexhep Selimin dhe bashkëluftëtarët e tyre, aleatët tokësorë të NATO-s, “të cilët sot po gjykohen në Hagë dhe po trajtohen sikur të mos kishte ekzistuar arsyeja për ndërhyrjen e Aleancës Veriatlantike”.

Ai shtoi se mirënjohja e Kosovës për NATO-n është e përjetshme, sepse, sipas tij, ato ditë vendosën fatin e vendit dhe ishin vendimtare në rrugën drejt lirisë.

“Nga 24 marsi 1999 deri te sfidat e sotme, rruga jonë mbetet e njëjtë: në anën e së vërtetës. Ne nuk harrojmë. Ne nderojmë. Dhe mbi të gjitha, vazhdojmë ta mbrojmë lirinë që u fitua me shumë sakrificë! NATO, faleminderit përjetësisht!”, ka shkruar i pari i PDK-së.

Një ngjarje shqetësuese është raportuar në Missouri, ku një nënë zbuloi substancën e rrezikshme “Fentanyl” brenda paketimit të një kukulle Barbie, duke ngritur alarm për sigurinë e produkteve për fëmijë, shkruan Daily Mail.

Jade Adams kishte blerë kukullën nga një dyqan me çmime të ulëta, ndërsa ishte duke bërë pazar me bashkëshortin dhe vajzën e saj. Sipas saj, momenti i hapjes së paketimit ishte tronditës.

“Kur bashkëshorti im e hapi me thikë, një pluhur u përhap menjëherë në makinë. U habitëm dhe pyetëm veten se çfarë ishte,” tha Adams për mediat lokale.

Pas incidentit, ajo u kthye menjëherë në dyqan për të paralajmëruar stafin dhe për të kërkuar largimin e produkteve nga raftet.

Policia e qytetit bëri të ditur se ishte njoftuar për një substancë të dyshimtë dhe, pas analizave, konfirmoi se bëhej fjalë për fentanyl, një drogë shumë e rrezikshme.

Hetimet zbuluan se të paktën pesë njësi të tilla ishin shitur, por të gjitha janë identifikuar dhe rikuperuar nga autoritetet. Sipas policisë, vetë kukullat nuk ishin të manipuluara, por substanca ishte vendosur e ngjitur në pjesën e pasme të paketimit.

Adams u shpreh e frikësuar për pasojat që mund të kishte pasur ky incident, veçanërisht për fëmijët.

“Mund ta kishin shpërndarë atë pluhur nëpër trup apo në shtëpi. Kjo është vërtet e tmerrshme, sidomos kur mendon për fëmijët,” tha ajo.

Autoritetet theksuan se nuk ka prova që produktet e manipuluara janë shpërndarë në dyqane të tjera dhe fatmirësisht nuk janë raportuar të lënduar. Megjithatë, hetimet vijojnë.

Rasti ka shkaktuar reagime të shumta edhe në rrjetet sociale, ku përdoruesit kanë shprehur shqetësim dhe lehtësim që incidenti u zbulua në kohë