Category: TEKNOLOGJI

Kompania Google ka prezantuar Pixel 10a, smartfonin e ri të serisë “A”, i cili kombinon performancë të lartë, inteligjencë artificiale dhe qëndrueshmëri ndaj mjedisit, me një çmim prej 499 dollarë.

Ky model i ri përfshin çipin Google Tensor G4 dhe asistentin AI Gemini, duke mundësuar përmirësime inteligjente në foto dhe video, si dhe optimizim të performancës së telefonit. Kamerat e tij – 48 MP kryesore dhe 13 MP ultra e gjerë – ofrojnë cilësi të lartë, që sipas Google janë më të mirat në klasën e telefonave nën 500 dollarë.

Pixel 10a shquhet gjithashtu për materialet e ricikluara të përdorura në ndërtimin e tij, duke përfshirë kobalt, bakër, ar dhe volfram, si dhe për funksionin Satellite SOS, i disponueshëm në 34 vende.

Ekrani 6.3-inch Actua është 11 për qind më i ndritshëm se ai i Pixel 9a, ndërsa bateria ofron përdorim deri në 30 orë në kushte normale dhe deri në 120 orë në modalitetin e kursimit të energjisë.

Ekspertët e teknologjisë e konsiderojnë Pixel 10a një smartfon të balancuar, që sjell teknologji të avancuar dhe respekt për mjedisin, duke u vendosur si një alternativë konkurruese në tregun e telefonave inteligjentë me çmim mesatar.

Ndërsa kompanitë e Inteligjencës Artificiale po bëhen më të vlerësuara, ekziston një debat i vazhdueshëm rreth mënyrës se si Al po zëvendëson njerëzit në vende të ndryshme pune.

Studimet sugjerojnë se rolet ku Al mund të automatizojë shumicën e detyrave do të ndikohen, megjithëse disa analistë besojnë se Al mund të krijojë edhe vende pune.

David Shim, CEO i kompanisë Read AI, tha se edhe me rritjen e mjeteve të Al, në fund të fundit do të jenë njerëzit ata që vendosin për rrjedhën e veprimit dhe puna e tyre do të jetë e rëndësishme.

“Mendoj se gjithmonë do të ketë një njeri në mes”, tha Shim.

“Mendoj se puna do të bëhet më e lehtë me kalimin e kohës. Por një shembull i mirë do të ishte si të ngasësh një veturë. Kur filluam për herë të parë, kishe një hartë. Dhe nxirrje hartën. Dhe shkoje brenda dhe thoje në rregull, po ngas veturën. Unë po vendos çfarë ndodh. Tani të gjithë përdorin Waze ose Google Maps, dhe harta të tregon se ku të shkosh. Dhe ti thjesht po ndjek atë rend. Por ti je njeriu në mes që mund të vendosësh çfarë ndodh”, shtoi ai.

Shim pranoi se Al do të ndikonte në vendet e punës, duke vënë në dukje se agjencitë e reklamave mund të humbasin role njerëzore në favor të mjeteve të automatizuara.

Megjithatë, ai vuri në dukje se platformat teknologjike do të kishin nevojë për vende pune për të mbikëqyrur procesin e automatizimit.

Abdullah Asiri, themeluesi i startup-it të mjeteve të mbështetjes së konsumatorëve të mundësuar nga Al, Lucidya , tha se beson që Al do të zëvendësojë detyrat, por jo rolet.

Ai tha se kur klientët e kompanisë së tij përdorin Lucidya, agjentët e mbështetjes së klientëve shpesh marrin role dhe përgjegjësi të ndryshme.

Ai vuri në dukje se disa bëhen mbikëqyrës që udhëzojnë njerëzit e tjerë dhe Al, ndërsa disa marrin përsipër përgjegjësi për ndërtimin e marrëdhënieve dhe zhvillimin e biznesit duke përdorur kohën që kursejnë.

Ndërsa kompanitë teknologjike si Read AI dhe Lucidya po përdorin gjithnjë e më shumë mjete të Al, ato duan të kenë një numër të vogël të punëtorëve.

Aktualisht, ekipi i shërbimit ndaj klientit i Read AI përbëhet nga vetëm pesë persona, të cilët u shërbejnë miliona përdoruesve mujorë.

Shim vuri në dukje se kompania po përdor mjete të Al për ta bërë një ekip të vogël më produktiv dhe për t’u dhënë atyre më shumë kontekst për t’i ndihmuar ata ta bëjnë punën e tyre më shpejt.

Kompanitë thuhet se po korrin rritje në produktivitet.

Read AI njoftoi se mjeti i saj i shitjeve ndihmon në parashikimin e gjendjes së një marrëveshjeje duke përdorur të dhëna nga sistemet CRM si HubSpot dhe Salesforce.

Startup-i tha se ka parë marrëveshje me vlerë 200 milionë dollarë të miratuara përmes atij sistemi. /Telegrafi/

Fragmente xhami të modifikuar me rreze lazer mund të jenë “hard disqet” e së ardhmes për arkivimin e të dhënave. Ruajtja e informacioneve në sasi të mëdha dhe siguria e tyre është e garantuar për të paktën 10 mijë vite, ndryshe nga pajisjet aktuale që degradohen pas disa vitesh apo dhjetëvjeçarësh.

Teknika ka rezultuar mjaft efikase gjatë eksperimenteve, ku protagonist është xhami, mbi të cilin është përdorur një lazer për kodifikimin në brendësi të materialit të pikselave tredimensionale, njësi të quajtura “voxel”.

Çdo voxel mund të memorizojë 1 bit të dhënash dhe sistemi ka kapacitet të shkruajë 65.9 milionë bit informacione në sekondë, ndërsa çdo mm³ xham mund të magazinojë 1.59 miliardë bit. Pra, një aftësi arkivimi e barabartë me rreth 2 milionë libra të shtypur ose 5 mijë filma me definicion të lartë.

Sistemi është rezistent ndaj ujit dhe lagështirës, ndaj luhatjeve të temperaturave dhe ndërhyrjeve elektromagnetike.

Eksperimentet janë zhvilluar edhe për të vlerësuar kohëzgjatjen e këtij sistemi, i cili është quajtur “Silica”, dhe rezulton se të dhënat qëndrojnë të lexueshme deri në 10 mijë vite.

Studimi është kryer nga një bashkëpunim i Microsoft Research Cambridge në Britaninë e Madhe dhe është publikuar në revistën shkencore prestigjioze “Nature”.

Klan News

Meta Platforms, pronare e Facebook dhe Instagram, planifikon të lançojë orën e saj të parë inteligjente në vitin 2026.

Pajisja, e cila po zhvillohet si pjesë e programit “Malibu 2”, do të integrojë asistentin e inteligjencës artificiale Meta AI dhe do të ofrojë funksione monitorimi të shëndetit të përdoruesit.

Ideja nuk është e re. Meta e konsideroi lançimin e një telefoni inteligjent pesë vjet më parë, por e anuloi këtë përpjekje në vitin 2022 për shkak të shkurtimeve në Reality Labs, laboratorin e zhvillimit të metaverse të kompanisë.

Zhvillimi shënon një ndryshim nga kompanitë e teknologjisë drejt pajisjeve të inteligjencës artificiale që vishen, shumë prej të cilave janë projektuar posaçërisht për aplikime shëndetësore dhe fitnesi.

E gjitha filloi me syzet inteligjente me inteligjencë artificiale të zhvilluara nga Meta në bashkëpunim me Ray-Ban , një kompani optike që i përket grupit EssilorLuxottica. Shitjet janë rritur këtë vit në gati 6 milionë njësi, sipas të dhënave nga kompania Smart Analytics Global.

Meta po zhvillon tani katër modele të tjera të syzeve me IA, duke vënë në dukje se kompania po planifikon me kujdes kohën në mënyrë që publikimi i modeleve të shumta të mos përkojë në të njëjtën periudhë.

Në dhjetor, punonjësit e Reality Labs u informuan se lançimi i syzeve të realitetit të përzier Phoenix do shtyhej për në vitin 2027.

Muajin e kaluar, Meta njoftoi se po pezullonte lançimin e syzeve të saj Display në tregjet e reja për shkak të kërkesës së lartë në SHBA.

Gemini i Google tani mund të krijojë këngë 30-sekondëshe bazuar në kërkesa të përdoruesve.

Për ta mundësuar këtë funksion, po përdoret Lyria 3, modeli më i fundit i muzikës gjeneruese nga Google DeepMind.

Krijimi i muzikës po lansohet në versionin beta në aplikacionin Gemini në gjuhët anglisht, gjermanisht, spanjisht, frëngjisht, hindisht, japonisht, koreanisht dhe portugalisht.

Qasje kanë të gjithë përdoruesit mbi 18 vjeç, ndërsa abonentët e Google AI Plus, Pro dhe Ultra do të kenë kufizime më të larta përdorimi krahasuar me ata që nuk paguajnë.

Për ta përdorur funksionin, mjafton të përshkruani një ide ose të ngarkoni një foto apo video, në mënyrë që t’i kërkoni Gemini të frymëzohet prej saj. Arti i kopertinës gjenerohet automatikisht nga Nano Banana.

Google thekson se “qëllimi i këtyre këngëve nuk është të krijojë një kryevepër muzikore, por t’ju japë një mënyrë argëtuese dhe unike për të shprehur veten” dhe për të ndarë krijimet me miqtë.

Përdoruesit mund të përshkruajnë një zhanër, humor, shaka të brendshme apo një kujtim specifik për të krijuar këngë me tekst ose audio instrumentale që “i përshtatet atmosferës suaj”.

Sa i përket teksteve, ato gjenerohen automatikisht dhe nuk ka nevojë që përdoruesi t’i shkruajë vetë. Këngët e krijuara nga Gemini janë të integruara me SynthID, vegla e padukshme e Google për identifikimin e përmbajtjes së gjeneruar nga inteligjenca artificiale e kompanisë.

Google sqaron se gjenerimi i muzikës është projektuar për shprehje origjinale dhe jo për të imituar artistë ekzistues. Nëse në kërkesë përmendet emri i një artisti, Gemini do ta marrë si frymëzim të gjerë krijues dhe do të krijojë një këngë me stil ose humor të ngjashëm.

Kompania shton se ka vendosur filtra për të kontrolluar rezultatet kundrejt përmbajtjes ekzistuese, ndërsa përdoruesit mund të raportojnë çdo përmbajtje që mund të shkelë të drejtat e tyre ose të të tjerëve.

Lojtarët e besuar të Sony mund të duhet të presin më gjatë se sa ishte planifikuar për PlayStation 6.

Raportimet e fundit tregojnë se gjiganti japonez po shqyrton mundësinë e shtyrjes së prezantimit deri në vitin 2028 ose 2029.

Arsyeja kryesore lidhet me mungesën globale të çipeve të memories, e përkeqësuar nga investimet e mëdha të kompanive si Google, Amazon dhe Microsoft në qendra të të dhënave për inteligjencë artificiale.

Kjo ka bërë që prodhuesit e çipeve të fokusohen më shumë në AI sesa në pajisje për konsumatorët, duke reduktuar sasinë e memorieve të disponueshme për konsolat e video-lojërave.

Në planin fillestar, PlayStation 6 ishte parashikuar të dilte në vitin 2027, por tani mund të ketë një vonesë deri në dy vjet.

Kjo do të zgjaste ciklin e jetës së PlayStation 5 dhe mund të ndikojë në strategjinë e Sony-t për lojëra ekskluzive.

Sony ende nuk ka komentuar zyrtarisht raportet mbi këtë shtyrje.

Është zyrtare, të paktën sipas disa mjeteve të inteligjencës artificiale. ChatGPT dhe Google kanë pohuar se unë ha më shumë hot dog se çdo gazetar teknologjie në botë. Në realitet, kjo është një gënjeshtër e fabrikuar për të provuar një problem shumë më serioz: sa lehtë mund të manipulohen sistemet moderne të AI-së.

Prej kohësh dihet se chatbot-ët ndonjëherë “shpiknin” informacione. Por tani po shfaqet një problem i ri, më pak i njohur, që mund të ketë pasoja serioze për mënyrën si njerëzit gjejnë informacion të saktë madje edhe për sigurinë e tyre. Një numër në rritje individësh kanë zbuluar një mënyrë për t’i shtyrë mjetet e AI-së të japin pothuajse çdo përgjigje që ata dëshirojnë. Dhe kjo mund të bëhet me lehtësi.

Sipas ekspertëve, kjo praktikë po ndikon tashmë në përgjigjet që inteligjenca artificiale jep për çështje serioze si shëndeti apo financat personale. Informacioni i njëanshëm ose i rremë mund t’i shtyjë njerëzit të marrin vendime të gabuara nga zgjedhjet politike, te përzgjedhja e një shërbimi profesional, apo çështje mjekësore.

Për të demonstruar problemin, autori i eksperimentit publikoi në faqen e tij personale një artikull të titulluar “Gazetarët më të mirë të teknologjisë në ngrënien e hot dog-ëve”, i mbushur me pretendime tërësisht të pavërteta, përfshirë edhe një kampionat imagjinar ndërkombëtar në Dakotën e Jugut. Brenda 24 orëve, disa nga chatbot-ët më të njohur në botë, përfshirë ChatGPT, Gemini dhe përmbledhjet me AI në krye të kërkimeve të Google e riprodhuan informacionin si fakt.

Ekspertët e optimizimit për motorët e kërkimit (SEO) paralajmërojnë se kjo metodë mund të përdoret lehtësisht për promovim biznesesh apo përhapje dezinformimi. “Është shumë më e lehtë të mashtrosh chatbot-ët sesa ishte të mashtroje Google-in dy ose tre vite më parë”, thotë Lily Ray nga agjencia e marketingut Amsive. Sipas saj, kompanitë e AI-së po ecin më shpejt në zhvillimin e produkteve sesa në garantimin e saktësisë së tyre.

Një zëdhënës i Google deklaroi se sistemet e renditjes që përdoren në kërkim mbajnë rezultatet “99% pa spam” dhe se kompania është e vetëdijshme për përpjekjet për manipulim. Edhe OpenAI thekson se merr masa për të identifikuar dhe parandaluar ndikimet e fshehta në mjetet e saj. Megjithatë, të dyja kompanitë paralajmërojnë se mjetet e tyre “mund të bëjnë gabime”.

Sipas kritikëve, problemi nuk është zgjidhur ende. Cooper Quintin nga organizata për të drejtat digjitale Electronic Frontier Foundation paralajmëron se këto dobësi mund të përdoren për mashtrime, dëmtim reputacioni apo edhe për t’i shtyrë njerëzit drejt rrezikut fizik.

Chatbot-ët funksionojnë mbi modele të mëdha gjuhësore, të trajnuara me sasi të mëdha të dhënash. Por kur përballen me pyetje specifike, ato shpesh kërkojnë informacion në internet – një proces që i bën më të ndjeshme ndaj manipulimit.

Ekspertët theksojnë se, ndryshe nga kërkimi tradicional ku përdoruesit vizitonin burime të ndryshme dhe ushtronin mendim kritik, përgjigjet e përmbledhura nga AI shpesh perceptohen si autoritative dhe të drejtpërdrejta nga kompania teknologjike. Studime të fundit sugjerojnë se përdoruesit kanë 58% më pak gjasa të klikojnë në një lidhje kur në krye të kërkimit shfaqet një përmbledhje me AI.

Problemi nuk kufizohet te shembuj humoristikë. Janë dokumentuar raste ku chatbot-ët kanë riprodhuar pretendime të pabazuara për produkte shëndetësore apo investime financiare, bazuar në njoftime për shtyp ose përmbajtje të sponsorizuara.

Google pranon se kërkimet e pazakonta ose shumë specifike, të cilat përbëjnë rreth 15% të kërkimeve të përditshme mund të krijojnë “zbrazëti të dhënash” (data voids), duke çuar në rezultate me cilësi të ulët. Kompania thotë se po punon për të kufizuar shfaqjen e përmbledhjeve me AI në raste të tilla.

Ekspertët propozojnë disa masa parandaluese. Një prej tyre është vendosja e paralajmërimeve më të dukshme për përdoruesit. Gjithashtu, chatbot-ët mund të jenë më transparentë për burimet e informacionit dhe të sqarojnë kur një pretendim mbështetet vetëm në një burim të vetëm ose në një material promocional.

Përdoruesit këshillohen të tregojnë kujdes, veçanërisht për çështje që lidhen me shëndetin, ligjin, financat apo bizneset lokale. Inteligjenca artificiale mund të jetë e dobishme për pyetje të përgjithshme, por për tema me pasoja reale rekomandohet verifikimi i informacionit përmes burimeve të shumta dhe të besueshme.

Në një garë për inovacion dhe fitim, paralajmërojnë ekspertët, siguria e përdoruesve nuk duhet të mbetet pas.

Bill Gates u tërhoq nga samiti i IA Impact në Indi disa orë para fjalimit të tij kryesor të planifikuar të enjten, duke i dhënë një goditje tjetër një eventi të madh të njollosur tashmë nga mangësitë organizative, një mosmarrëveshje për robotët dhe ankesat për kaosin në trafik.

Mungesa e Gates, e cila erdhi pasi shefi i Nvidia-s, Jensen Huang, anuloi gjithashtu pjesëmarrjen e tij, e ndërlikoi më tej organizimin e samitit, i cili cilësohet si forumi i parë i madh mbi inteligjencën artificiale në jugun global, ku India po kërkon të pozicionohet si një zë kryesor për rregullimin e teknologjisë në botë.

Fondacioni Gates tha se miliarderi nuk do të mbante një fjalim “për t’u siguruar që fokusi të mbetet te prioritetet kryesore të samitit”. Vetëm disa ditë më parë, fondacioni kishte hedhur poshtë thashethemet për mungesën e tij të mundshme dhe kishte këmbëngulur që ai do të merrte pjesë.

Gates e anuloi vizitën e tij pasi Departamenti Amerikan i Drejtësisë publikoi email-e muajin e kaluar që përfshinin komunikime midis financierit të ndjerë dhe shkelësit të dënuar për vepra penale seksuale, Jeffrey Epstein, dhe punonjësve të Fondacionit Gates.

Gates tha se marrëdhënia e tyre lidhej vetëm me aktivitete filantropike dhe se takimet me Epstein ishin një gabim.

Kryeministri indian Narendra Modi bëri thirrje për mbrojtjen e sigurisë së fëmijëve në platformat e inteligjencës artificiale, ndërsa iu drejtua pjesëmarrësve në një aktivitet të enjten së bashku me Presidentin Francez Emmanuel Macron, Drejtorin Ekzekutiv të Google, Sundar Pichai, drejtorin e OpenAI, Sam Altman dhe Drejtorin Ekzekutiv të Anthropic, Dario Amodei.

Samiti i parë i madh i Indisë mbi inteligjencën artificiale është dëmtuar nga mangësi organizative që i tronditën pjesëmarrësit për shkak të asaj që ata e quajtën mungesë planifikimi nga qeveria indiane.

Në Shtetet e Bashkuara të Amerikës ka nisur një proces gjyqësor, që sipas ekspertëve, mund të ketë ndikim të gjerë në industrinë e teknologjisë.

Një 20-vjeçare ka paditur platformat online, të cilat i akuzon se i kanë projektuar shërbimet e tyre në mënyrë të qëllimshme për të krijuar varësi tek përdoruesit.

Në bankën e dëshmitarëve është ulur edhe vetë kreu i Meta-s, Mark Zuckerberg, i cili i doli në mbrojtje praktikave të kompanisë së tij. Themeluesi i Facebook insistoi se kompania nuk vendos më objektiva për kohën që përdoruesit kalojnë në aplikacionet e saj. Por sipas raportimeve nga salla e gjyqit, ai e pranoi gjithashtu se në të kaluarën ka pasur mangësi në verifikimin e moshës së përdoruesve.

Në mea culpa-n e tij pohohej se kompania ka qenë e ngadaltë në identifikimin e përdoruesve të mitur dhe se disa fëmijë nën moshën 13 vjeç kanë arritur të hapin llogari në platforma si Instagram, ndonëse kjo bie ndesh me kushtet e përdorimit. Sipas tij, llogaritë e tilla hiqen sapo zbulohen. Në padi, 20-vjeçarja pretendon se platformat janë ndërtuar me mekanizma që nxisin përdorimin e vazhdueshëm, si funksioni i “scroll”-it të pafund, që i lejon përdoruesit të kalojnë pa ndërprerje nga një postim në tjetrin. Ajo thotë se ka nisur t’i përdorë këto rrjete që në fëmijëri dhe i lidh problemet e saj me depresionin dhe ankthin me përdorimin e tyre afatgjatë.

Padia është ngritur kundër YouTube dhe Instagramit. Gjyqi konsiderohet se mund të krijojë një precedent të rëndësishëm mbi përgjegjësinë ligjore të kompanive të teknologjisë mbi ndikimin e produkteve të tyre në shëndetin mendor të përdoruesve.