Category: Sport

Përgatiti: Kastriot Tahiri

Të vetmen hapësirë për të mbajtur orën e edukatës fizike, nxënësit e shkollës fillore “Lismiri”, në fshatin Lismir të komunës së Fushë-Kosovës, e kanë këtë fushë sportive, por edhe atë ua mbuloi bora.

Kështu në mungesë të një salle sportive, orën e edukatës fizike nxënësit nuk e mbajnë sa herë që bien temperaturat.

Ndonëse në vitin 2021, komuna e Fushë Kosovës kishte ndarë 70 mijë euro për rinovimin e kësaj salle, punimet nuk nisën asnjëherë.

Për këtë arsye, opozita po e akuzon udhëheqjen e Komunës për keqpërdorime.

“Janë duke e keqpërdorë paranë publike, të jeni të bindur që prapë do të hapin tender për çështjen e njëjtë. Më herët kanë intervenuar në një dritare vetëm sa për të thënë se po intervenojnë, por ajo është e pashfrytëzueshme…”, tha Dardane Sogojeva, këshilltare komunale e PDK-së.

Por këtë akuzë e ka mohuar Drejtoria e kulturës, rinisë dhe sportit në këtë komunë. Ali Topalli drejtor në këtë drejtori tha se kanë kontraktuar operatorin ekonomik dhe se punimet pritet të fillojnë shpejt.

“Paratë nga e kaluara me vendim të drejtorisë janë bartë për këtë vit. Por tashmë kemi kontraktu një operator ekonomik, i cili pos që do ta rregullojnë sallën e sportit në Lismir do të intervenojë edhe në sallën e sportit në miradi e në “Selman Riza”, krejt ky projekt do të kushtojë 150 mijë euro, dhe punimet do të fillojnë shpejt”, tha drejtori i Kulturës, Rinisë dhe Sportit, Ali Topalli.

Ndërkaq, Salla e sportit në shkollën fillore “Selman Riza”, pa kaluar një vit prej kur ishte ndërtuar, ishte demoluar tërësisht nga disa persona, dhe rastin tani po e hetojnë institucionet kompetente.

Për herë të parë Federata e Motoçiklizmit e Kosovës dhe Federata e Motoçiklizmit e Shqipërisë, organizuan në Tiranë garën “Kupa e Kombit” në disiplinën enduro, në të cilën morën pjesë mbi 100 motoçiklistë.

Garën nga afër e ndoqi edhe nënpresidenti i KOK-ut, Milaim Kelmendi, i cili krahas ndarjes së Kupës së Kombit, përgëzoi të dy federatat për bashkëpunimin në organizimin e këtij aktiviteti.

Garuesit tanë shfaqën cilësi të larta, duke fituar të gjitha vendet kryesore.

Fituesit e kategorive

E2:

1st – Arbenit Beqiraj

2nd – Blerim Aliu

3rd – Kastriot Muqa

E1:

1st – Eurolind Morina

2nd – Ardian Aliu

3rd – Fidan Arifi

E3:

1st – Agron Kelmendi

2nd – Valmir Tahiri

3rd – Endrit Kastrati

Overall:

1st – Arbenit Beqiraj

2nd – Blerim Aliu

3rd – Kastriot Muqa

Prishtina e ka fituar derbin e xhiros së 15-të të Superligës së futbollit.

Kryeqytetasit e fituan derbin Bardhekaltër pasi e mposhtën Dritën me rezultat minimal 1:0.

Golin e fitores për Prishtinën e shënoi Jalen Blesa në pjesën e dytë nga penalltia.

Gjilanasit nga ana e tyre nuk arritën të shënonin përkundër rasteve të krijuara në ndeshjen e zhvilluar në Kampin Nacional në Hajvali. Kjo humbje e lë Dritën në vendin e tretë në tabelë, kurse Prishtina ngritet në pozitën e katërt pas këtij trepikëshi.

Ndeshja ishte paraparë të zhvillohej në fundjavë, por ishte shtyrë shkaku i reshjeve të borës.

Ndërkohë, Feronikeli 74’ e “fundosi” edhe më shumë Lirinë, të cilën e mposhti me rezultat 2:1.

Shillova dhe Hajdari në fund i shënuan golat për skuadrën nga Drenasi, kurse golin e pamjaftueshëm për prizrenasit e realizoi Topallaj, i cili e barazoi përkohësisht rezultatin.

Kjo humbje e lë Lirinë në vendin e fundit në tabelë, kurse “Nikli” ngritet në pozitën e shtatë falë kësaj fitoreje.

Ish-trajneri i Kombëtares Shqiptare, Gianni De Biasi, ka dhënë një intervistë ekskluzive për Euronews Albania, ku foli në lidhje me kalimin e Kombëtares shqiptare në kampionatin europian të Gjermanisë.

Gjatë intervistës, ai u ndal te kombëtarja e Kosovës duke thënë se lojtarët janë shumë të mirë dhe se kanë vlera e cilësi.

Sipas tij, Kosova ka shumë lojtarë që luajnë nëpër Evropë.

“Përfaqësuesja e Kosovës është një skuadër që ka vlera, cilësi, ka shumë lojtarë që luajnë nëpër Europë dhe besoj se janë kushtet për të punuar mirë. Pastaj çdo gjë varet nga ngritja e një grupi kompakt lojtarësh që mendojnë se arritja e objektivave në jetë është e mundur”-tha ai.

I pyetur se a është i gatshëm që të bëjë një bashkëpunim me Kosovën dhe të jetë trajner i skuadrës së saj, De Biasi theksoi: “Për momentin jo nuk jam kontaktuar”.

Atleti kosovar Erzen Zyberaj do të vrapojë nga Prishtina deri në Tiranë për nder të festës së flamurit.

Ai do ta vrapojë në një distancë pre 260 kilometrave për festën e 28 Nëntorit.

Kryetari i Prishtinës Përparim Rama dhe drejtori i sportit Granit Rugova i uruan atij rrugëtim të mbarë.

“I urova rrugëtim të mbarë atletit të pasionuar Erzen Zyberaj, i cili do të vrapojë nga Prishtina në Tiranë, duke përshkuar një distancë prej 260 km, për të nderuar Festën e Flamurit Kombëtar. Ky vrapim është një shprehje e vërtetë e dashurisë dhe respektit ndaj flamurit kombëtar. Atleti ynë po bënë një udhëtim të shkëlqyer për të sjellë bashkë me vete frymën e pavarësisë dhe lavdisë që flamuri simbolizon.”, ka shkruar Rama në Facebook.

Drejtori i drejtorisë së Sportit në Komunën e Prishtinës, Granit Rugova është i bindur se secila lagje dhe secili fshat në komunë e Prishtinës do të bëhet me infrastrukturë të nevojshme sportive dhe se në këtë plan po punohet me përkushtim maksimal.

Në një intervistë për KosovaPress, Rugova ka thënë se brenda këtij viti është punuar në shumë renovime të terreneve sportive dhe se me të njëjtin ritëm do të punohet edhe vitin e ardhshëm.

“Pjesa e infrastrukturës, zgjerimi i fushave të jashtme sportive besoj që ka shkuar shumë mirë. Jemi munduar me atë kapacitet, më atë kontratë të cilën e kemi pasur që ta zgjerojmë sportin në të gjitha lagjet, në të gjitha fshatrat edhe besoj që i kemi prekur shumë lagje të Prishtinës, shumë fshatra, mirëpo prapë nuk është e mjaftueshme gjithë kjo por po presim kontratën e vitit të ardhshëm që të prekim të gjitha lagjet edhe të gjitha fushat e Prishtinës.”, tha Rugova.

Në kuadër të këtij angazhimi, shumë stadiume po bëhen me tribuna të reja, gjë të cilën do ta përfitojë edhe klubi i futbollit “Rilindja”.

“Është tribuna e “2 Korrikut” që vetëm sa ka përfunduar pjesa e vrazhdë, është tribuna e “Ramiz Sadikut”, edhe ajo gati ka përfunduar pjesa e vrazhdë, “Flamurtari” ka përfunduar gjysma, “Fc Mati”, kështu që besoj se të gjitha këto janë projekte të cilat vazhdojnë edhe vitin e ardhshëm, do të shohim që të gjejmë buxhet që edhe klubin e “Rilindjës” t’i bëjmë me tribunë sepse sporti përveç sportive, duhet t’i ketë edhe tribunat dhe zhveshtoret edhe ata prind, ata dashamirë kur shkojnë që ta përcjellin një klub apo një fëmijë të kenë ku të ulen dhe ta shijojnë një trajnim apo një ndeshje futbolli.”, theksoi Rugova.

Tutje, Rugova ka bërë të ditur se së shpejti do të nis edhe ndërtimi i stadiumin të ri në Hajvali.

“Së fundi kemi nënshkruar edhe dy kontrata, vazhdon pjesa e dytë e “2 Korrikut”, fillon nga java e ardhshme fillon edhe stadiumi i ri i Hajvalisë, do të thotë edhe klubet e Hajvalisë do ta kenë stadiumin e tyre, ka filluar renovimi i fushës së jashtme sportive te shkolla “Shkëndija” në Hajvali. Këto janë projektet e fundit në të cilat është duke u intervenuar, me shpresë së do t’i kemi disa ditë të mira, pa shi, që të vazhdojnë punimet deri në fund të vitit dhe atëherë ta presim vitin e ardhshëm dhe të vazhdojmë më këto projekte.”, bëri të ditur Rugova.

Sfida e madhe që po e pret kryeqytetin e Kosovës janë edhe Lojërat Mesdhetare 2030, gjë për të cilën Rugova thotë se deri më tani ende nuk është nisur ndonjë punë konkrete në këtë drejtim.

“Ende pritet të bëhet një komision, komitet organizativ dhe pasi të bëhet komiteti organizativ, atëherë bëhet një analizë e fizibilitetit, vendoset se ku dhe çfarë do të investohet. Po besoj që nga fillimi i vitit të ardhshëm do të fillojnë hapat e parë. Edhe pse 2030-ta duket se është larg mirëpo është shumë afër sepse do të ketë investime të mëdha, përgatitje të mëdha dhe me shpresë që sa më herët të fillojmë do ta kemi më lehtë në fund. Kështu që them në këtë vit nëse arrijmë ta marrim titullin “Prishtina qytet evropian i sportit” edhe Prishtina do të jenë nikoqire e Lojërave Mesdhetare “Prishtina 2030”, besoj që do të jetë një prej viteve më të suksesshme të sportit në Komunën e Prishtinës, mirëpo edhe në të gjithë Kosovën.”, tha Rugova.

Rugova gjithashtu bëri të ditur se është duke u punuar intenzivisht që në Prishtinë vitin e ardhshëm të nis ndërtimi i një kampusi sportiv ku përfshihet pishina olimpike dhe një stadium i ri për kryeqytetin.

Granit Xhaka është bërë shumë shpejtë figura kryesore e Bayer Leverkusen në Gjermani, skuadër kjo e cila nuk di për humbje në Bundesligë me 11 fitore dhe një barazim pas 12 ndeshjeve.

Skuadra e cila drejtohet nga trajneri Xabi Alonso është liderë e tabelës me 34 pikë, dy më shumë sse Bayern Munihu, raporton KosovaPress.

Duke folur për formën e skuadrës së tij, Xhaka ka thënë se po kalojnë nëpër një moment shumë të rëndësishëm, por që ka kërkuar të mos ketë eufori brenda grupit.

“Ne kemi një ekip të madh, një trajner të madh dhe një mentalitet të fortë. Nuk kemi fituar ende asgjë dhe duhet të vazhdojmë të punojmë. Le të shohim se ku do të përfundojmë.”, tha kapiteni i Zvicrës për “SKy”.

Ai më pas ka thurrur elozhe për trajnerin e tij, spanjollin Xabi Alonso nga i cili ka thënë se po mëson shumë.

““Unë mësoj prej tij çdo ditë. Është shumë argëtuese. Ka qenë një lojtar i klasit botëror. Është si një ëndërr për mua të luaj nën drejtimin e tij”.

Karateisti me prejardhje nga Kosova Lorian Musa, është një nga fituesit në kampionatin nacional të Zvicrës.

Musa i cili vjen nga qyteti i Mitrovicës, garoj në kategorinë U14 deri në 39 kilogramë dhe u rendit i dyti.

Ai është i lindur dhe rritur në Zvicër, ku jeton dhe vepron bashkë me familjen e tij, në kantonin e Valais-it.

Loriani është aktiv në sportin e karatesë që nga mosha pesëvjeçare.

Që atëherë e deri më sot, djaloshi nga Kosova trajnohet nga trajneri i njohur zviceran Olivier Knupfet, i cili është kampion dhe ka 33 çmime ndërkombëtare.

Djaloshi trajnohet po ashtu nga trajnerja Italiane Iliana Bartolotta, e cila ka një bagazh të ndritur në karate.

Ishte fillimi i këtij viti 2023, saktësisht më 2 janar kur të gjithë mësuam emrin e ri e trajnerit tonë të kombëtares, një brazilian Silvio Menedez Kampos Junior, një emër që nuk thoshte asgjë thuajse për askënd, as për futbolldashësit dhe ndjekësit e rregullt të këtij sporti, jo më për njerëzit më indiferent.

Më pas tentuan me emrin e tij të shkurtuar, Sylvinho, prapë asgjë thuajse për askënd, përjashto ndonjë matës statistikash apo ndonjë tifoz të thekur të Barcelonës, Arsenalit apo Manchester Cityt që mund të mbante mend emrin e një prej lojtarëve të skuadrës së tij të zemrës një dekadë më parë.

Edoardo Reja përpara tij njihej nga të gjithë, edhe pse ishte italian, edhe pse kishte drejtuar në Serinë A disa ekipe dhe jo pak po në mbi 1000 ndeshje e megjithatë edhe pse arritëm për një edicion në Ligën e Kombeve të renditeshim në vendin e parë në grup, pjesa tjetër e fundit, vendosi një rekord negative të 10 ndeshjeve pa fitore.

Një shije e keqe tek të gjithë edhe tek ai vetë padyshim, që u largua duke i shtrënguar dorën të gjithëve e parë në sy madje edhe të riut Sylvinho.

Një lëvizje ndoshta kundër ligjeve natyrale apo të etikës, një i moshuar të ngrihet nga ulësja për t’i lënë vendin një të riu, rreth 35 vite eksperiencë për t’i lënë vendin një eksperience më pak se një vjeçare, por futbolli nuk është një shkencë ekzakte dhe për këtë arsye shumë gjëra nuk janë standarte dhe kur nuk ka një shpjegim logjik, mjaftohen me shprehjen, kështu është futbolli.

Kështu nuk mund të shpjegohet edhe mungesa e suksesit të emrave të mëdhenj si Hans Peter Brigel, Ari Han apo Kristian Panuci, një mal me eksperiencë, historira finalesh Botëroresh e Champions League, që duhen net dimri si këto për t’i treguar, por ama si trajnerë, drejtuan Shqipërinë nuk arritën asgjë e më pas nuk dihet ku janë…të paktën jo më në nivele për të drejtuar ekipe kombëtare apo klube të mëdha.

Sylvinho edhe pse si lojtarë ka disa trofe si Kupë e Brazilit, të Anglisë apo dy Champions Leaguer, përpara kuqezinjve, kishte pasur një eksperiencë si ndihmës i Tites në kombëtaren braziliane, ndihmës i Mancinit tek Interi në Serinë A, më pas tek Lyon disa muaj, një sezon tek Corinthias në Brazil dhe kaq.

“Për mua është akoma një ëndërr, ndërkohë për Shqipërinë është hera e dytë që shkon në finalet e një europiani. Sa i përket trajnerëve, mund të them që edhe ata janë emra vërtet të mëdhenj. Sot është Silvio, Doriva dhe Zabaleta dhe ne besojmë shumë në punën tonë, por pa harruar punën që ka bërë Panuci apo Reja pasi janë pakashumë ata lojtarë, e njëjta gjeneratë me djem shumë të rinj. Ata dhe puna e tyre ka qenë shumë e rëndësishme për mua, në këtë moment. Për këtë arsye unë i përmend emrat e tyre por edhe trajnerit të U21-shit, Alban Bushin, pasi na kanë sjellë lojtarë të rëndësishëm. Unë besoj shumë në punën e të gjithëve. Ashtu kam bërë edhe unë edhe pse jam i ri në karrierën time si trajner, por kam lënë një shenjë ku kam qenë, me ndonjë lojtarë, apo ndonjë gjë tjetër në ekip, ashtu si lanë ata dhe ne në këto 10 muaj i zhvilluam futbollistët që na lanë dhe disa të tjerë. Nuk duhet të harrojmë se futbolli ashtu si edhe jeta ecin shumë shpejtë. Dua të falënderoj dhe e vlerësoj punën e trajnerëve përpara meje që lanë diçka për ne sot”– tha trajneri i kuqezinjve, Sylvio Mendes Campos Júnior.

Trajneri Hivzi Ahmeti në emisionin ‘A PLAY’ në ATV, e ka zbuluar emrin trajnerit italian i cili është në negociata me Federatën e futbollit të Kosovës.

Sipas Ahmetit, është Giovanni Colella, i cili ka qenë trajner i Patizanit me të cilin e kishte fituar titullin e Kampionit në Shqipëri.

‘Giovanni Colella është në bisedime me FFK-në, ai është pa klub,por ka interesim nga shumë klube për të, por Colella nëse ka ofertë nga Kosova, ai do t`i refuzonte të gjitha skuadrat tjera’.

Përndryshe kur jemi te pozita e selektorit të Kosova, deri me tani për këtë pozitë kanë shprehur interesim rreth 50 trajnerë.