Category: Sport

Ministria për Kulturë, Rini e Sport do të lansojë sot programin “Super Sportistët”, në të cilin do të investojë katër milionë euro për katër vitet e ardhshme për sportistët e rinj të sporteve olimpike.

Qëllimi i programit është rritja e numrit të normave olimpike për Lojërat Olimpike Los Angjelos 2028. Programi, i përpiluar nga profesionistë të fushës, nga KOK-u, MKRS dhe gazetaria sportive, udhëhiqet nga kryemjeshtri i normave dhe medaljeve të arta olimpike, Driton Kuka.

Me rastin e prezantimi të këtij programi sot do të zhvillohet një konferencë për media ku do të flasin: Zëvendësministrja Daulina Osmani, presidenti i KOK-ut, Ismet Krasniqi, kampionia olimpike Rio 2016, Majlinda Kelmendi, ndërsa prezantimin e programit do ta bëjë kryesuesi i komisionit, Driton Kuka.

Pas dy netëve spektakolare që dhuroi Liga e Kampionëve në futboll, sonte dy të tilla do t’i sjellë edhe kompetecioni i dytë evropian i klubeve, Liga e Evropës. Në gjysmëfinalet e kësaj gare do të ballafaqohen Roma me Bayer Leverkusenin dhe Marsej me Atalantën.

Vëmendja kryesore pa dyshim se do të jetë në stadiumin “Olimpico” në Itali, aty ku Roma e Daniele Derossit në top formë do të ballafaqohet me Leverkusenin që tashmë është kampion i gjermanisë, ndërkohë që nuk di për humbje në këtë edicion, raporton KosovaPress.

Po aq interesant do të jetë edhe ballafaqimi tjetër ndërmjet Marsejës dhe Atalantës, dy skuadra me futboll cilësor dhe që po synojnë të bëjnë befasi duke shkuar deri në fund të kësaj gare.

Të dy ndeshjet zhvillohen me fillim nga ora 21:00.

Të gjithë në mbështetje të Edon Zhegrovës, ja si të votoni yllin e “Dardanë” për të fituar çmimin lojtari i vitit në Francë.

Në elitën e futbollit francez, një emër është duke shkëlqyer në këtë sezon, e ai është Edon Zhegrova.

Me paraqitjet e tij të shkëlqyer në fushë, lojtari nga Kosova po konkurron për titullin e ‘Lojtarit të Vitit’ në Francë, duke garuar drejtpërdrejt me yjet e njohura si: Mbappé, Dembele dhe Aubameyang, shkruan atvlive.tv.

Zhegrova, i cili aktualisht luan për ekipin e famshëm francez Lille, ka treguar një formë të jashtëzakonshme në këtë sezon. Performancat e tij të mrekullueshme në fushë kanë bërë që shumë klube të mëdha botërore të shfaqin interesim për reprezentuesin e Kosovës.

Për të votuar Zhegrovën klikoni në këtë LINK dhe pasi ta hapet e klikoni fotografinë ku shihet ylli ‘Dardan’.

Kujtojmë që nëse Edon Zhegrova e fiton këtë çmim do të ishte çmimi më i rëndësishëm që e ka fituar një lojtar nga Kosova në Francë.

Thomas Tuchel do të largohet nga Bayern Munich në fund të këtij edicioni.

Ky vendim mes trajnerit dhe klubit ka ardhur para pak kohe. E tash kanë nisur të spekulohet se kush mund ta marr drejtimin e “Bavarezëve”.

Gjatë ditës së sotme kanë dal lajmet se gjasat më të mëdha për ta marr drejtimin e Bayernit është Ralf Rangnick, gjatë kësaj vere që po vjen.

Ekipi gjerman po diskuton detajet përfundimtare me Rangnick në mënyrë që të përfundojë marrëveshjen shumë shpejt, por kanë mbetur edhe disa gjëra për t’i qartësuar.

“Bayerni është “në bisedime shumë të mira” me Rangnickun”, ka thënë presidenti i klubit bavarez Herbert Hainer pas barazimit 2:2 me Real Madridin në gjysmëfinale të Ligës së Kampionëve.

Madje, edhe Ralf ka deklaruar se dëshira e tij e madhe është ta drejtoj gjigantin gjerman.

Deri tash janë diskutuar pjesa kryesore e pikave rreth projektit, ndikimit të menaxherit për nënshkrimet/largimet, me palët që pothuajse kanë përputhje të plotë.

Momentalisht, Rangnick po e drejton Austrinë dhe do të jetë në dispozicion pas Evropianit.

Trajneri gjerman më parë ka drejtuar Manchester Unitedin, RB Leipzigun, Schalken, Hoffenheimin, Hannoverin, Stuttgartin e disa skuadra të tjera gjermane.

Ekipin tash është duke e udhëhequr Thomas Tuchel, por nën drejtimin e tij baraverëz nuk kanë pasur rezultate të mira.

Janë eliminuar nga kupat shtetërore, e po ashtu kanë humbur titullin e kampionit në Bundesliga pas një kohe të gjatë.

Në krahun tjetër, janë në garë për trofeun e Ligës së Kampionëve. Kanë arritur deri në gjysmëfinale, aty kanë barazuar ndeshjen e parë ndaj Real Madridit.

Paris Saint-Germaini dhe Borussia Dortmund u desh të djersiteshin mirë për të kaluar në gjysmëfinale të Ligës së Kampionëve.

Gjiganti francez dhe ai gjerman në çerekfinale i eliminuan Barcelonën respektivisht Arsenalin për ta bërë një vend në mesin e katër më të mirëve të kësaj gare.

Të dy ekipet i kishin humbur ndeshjet e para çerekfinale, për t’i përmbysur më pas rezultatet në lojën e kthimit.

E tash, në “Parkun e Princave”, ekipi nga Parisi dhe ai nga Dortmundi synojnë ta sigurojnë një avantazh në lojën e parë, para asaj të kthimit, e cila do të zhvillohet në Gjermani pas një jave.

Këto dy skuadra ishin ballafaquar në këtë sezon mes vete, me ekipin gjerman që përfundoi i pari në grup.

Por, PSG-ja e kishte mposhtur ekipin Verdhezi në Paris, ndërsa në Gjermani skuadrat kishin barazuar.

Pra, parisienët kanë statistika më të mira se Dortmundi në përballjet mes tyre të këtij edicioni në Champions.

Kylian Mbappe me shokë konsiderohen si favoritë për ta prekur finalen duke u bazuar në forcën e ekipeve dhe në duelet paraprake.

Natyrisht, PSG-ja është edhe më në formë aktualisht, po ashtu.

Sidoqoftë, Dortmundi nuk do të shkojë në Paris me flamur të bardhë pasi do t’i kërkojë mundësitë e tij për ta siguruar biletën e finales.

Ndeshja mes PSG-së dhe Dortmundit do të luhet sonte duke filluar nga ora 21:00.

Argjentina shpreson të shohë Lionel Messin të bëhet “i përjetshëm”.Do të vijë një ditë kur tetë herë fituesi i Topit të Artë duhet të vari këpucët dhe ndoshta do të merret vendimi për t’u larguar nga arena ndërkombëtare përpara se të ndalet përfundimisht edhe në nivel klubesh. Messi do të mbushë 37 vjeç në qershor, që do të thotë se mund të mos i mbetet edhe shumë në nivelin më të lartë.

Messi është zotuar të përfaqësojë vendin e tij në Kupën e Amerikës të kësaj vere, pasi ata kërkojnë të mbrojnë atë kurorë dhe ka lënë të kuptohet se do të qëndrojë deri në Kupën e Botës 2026. Ai tashmë ka shënuar rekord prej 180 paraqitjesh dhe 106 gola për emrin e tij.

“Për momentin, le të mos flasim që Messi të mos vazhdojë. Nuk mund ta imagjinoni kurrë kombëtaren pa Messin. Të gjithë duam që ai të jetë i përjetshëm dhe të luajë gjithmonë me ne.”, ka thënë Palacios, i cili shijoi lavdinë e Kupës së Botës së bashku me Messin në Katar 2022.

Argjentina është e vendosur të hapë kërkimin e saj për kurorat kontinentale të njëpasnjëshme kur të përballet me Kanadanë më 20 qershor. Messi do të marrë një pushim në MLS me Inter Miami në mënyrë që të përfshihet në atë turne, gjë që nuk do t’i kërkojë atij të udhëtojë pasi pritet të vihet në skenë në Shtetet e Bashkuara.

Paragllajdisti kosovar, Fanol Shala, ka arritur rezultat mbresëlënës në Kupën e Botës (seria e dytë) disiplina paragllajding precizion, të mbajtur në Alania të Turqisë.

Shala u rendit i dyti nga 69 garues, me gjashtë pikë në total, por ajo që e veçoi më shumë ishte rekordi botëror, transmeton KosovaPress.

Shala pati gjashtë ulje radhazi me rezultat 1 cm (total 6 cm), duke thyer rekordin botëror, të konfirmuar pas garës edhe nga Federata Ndërkombëtare e Aeronautikës.

Vendin e parë e zuri kampioni botëror, kinezi Yang Chen.

Paraqitje të mirë patën edhe garuesit tjerë të Kosovës Veton Sylaj, Migjen Shala, Gezim Statovci dhe Avni Kuçi.

Futbollisti i Manchester United Antony thuhet se ka punësuar një fotograf personal gjatë gjithë sezonit për ta kapur atë në “aksion” gjatë ndeshjeve. Sulmuesi brazilian bëri bujë jo vetëm për paraqitjen e tij në fushë, por edhe për festën e tij unike gjatë ndeshjes së fundit të Premier Ligës kundër Burnley-t.

Pasi shënoi për herë të fundit në Premier Ligë në prill të vitit 2023 kundër Nottingham Forest, Antony siguroi që festimi i tij, pas golit të tij të parë të sezonit 2023-24, të kapej në mënyrën më të mirë të mundshme teksa u drejtua drejt kamerës dhe turmës së ekstazuar në “Old Trafford”, ndërsa simbolikisht fuste topin nën fanellën e tij.

Sipas “The Sun”, Antony ishte përgatitur për këtë moment për pothuajse të gjithë sezonin së bashku me fotografin që nga ndeshja e parë në shtëpi në Premier Ligë për këtë sezon, përcjellë KoosvaPress.

Sulmuesi 24-vjeçar më vonë zbuloi se festa i ishte kushtuar djalit të tij, i cili është një adhurues i personazhit Sonic, ndërsa futja e topit nën fanellën e tij ishte një nderim për të dashurën e tij shtatzënë.

Antony ka pasur një sezon katastrofik deri më tani me vetëm tre gola në 36 ndeshje në të gjitha garat. Dy golat e tij të tjerë erdhën në FA Cup këtë sezon kundër Neëport dhe Liverpoolit.

Futbollisti i Prishtinës, Kreshnik Uka është operuar me sukses dhe tashmë është liruar nga spitali ku do të vazhdojë me rikuperimin e tij, edhe pse ka fare pak shpresë që ai të luaj ndonjë ndeshje të mbetur të këtij sezoni.

Uka ka thënë për KosovaPress se ka thyer brinjët dhe ka dëmtuar mushkëritë dhe kjo do të bëjë që ai të jetë jashtë fushës për katër deri në pesë javë.

“Për momentin jam mirë, sot kam ardhur nga spitali, në QKUK jam trajtuar pas një lëndimi që pata në anën e majtë të brinjëve ku sipas analizave dhe rezonancave që i kam bërë në spitalin e Gjilanit më doli që i kam pasur një brinj të thyer dhe pak mushkëritë e dëmtuara. Ndërsa, menjëherë më kanë dërguar me ambulancë në Prishtinë dhe me kanë trajtuar duke e bërë një gjysmë operimi ku nga dita e mërkurë deri sot më kanë mbajtur aty, ndërsa sot më kanë liruar, kështu që për momentin jam mirë dhe po ndihem mirë. Sipas doktorëve dhe ekspertëve që kanë qenë në spital duku deri në katër apo pesë javë duhet pushim pastaj të fillojmë më stërvitje ”, tha Uka.

Uka ka shtuar se do të dëshironte që të ishte në fushë për t’i ndihmuar bashkëlojtarët, por shprehet i bindur se fitorja ndaj Dritës në gjysmëfinalen e Kupës së Kosovës i ka motivuar lojtarët për të qenë në formë të lartë në ndeshjet e fundit të kampionatit, e sidomos për finalen e kupës kundër Ballkani.

“Normalisht dëshiroj të jem në fushë për t’iu ndihmuar lojtarëve, mirëpo besoj që loja me Dritën, gjysmëfinalja që arritëm të shkojmë në finale na jep motiv shtesë për këto ndeshjet e fundit në kampionat, ndërsa në finale me Ballkani presim që të fitojmë dhe të shkojmë në Evropë”, theksoi Uka.

Ndryshe, Prishtina synon që të dal në garat evropiane vetëp përmes Kupës së Kosovës, pasi në kampionat ka pak gjasa. Bardhekaltërit kanë 43 pikë në vendin e pestë, nëntë më pak se Malisheva e vendit të katërt.