Category: SPORT

Drita e Gjilanit ka bërë një lëvizje të rëndësishme në pankinë, duke rikthyer Ardian Nuhiun në krye të skuadrës bardhekaltër.

Trajneri nga Shkupi rikthehet në një ambient që e njeh shumë mirë, ndërsa merr drejtimin pas largimit të Zekirija Ramadanit.

Për Nuhiun, kjo nuk është thjesht një tjetër aventurë në karrierë. Ai ka një histori të veçantë me Dritën, pasi ishte pikërisht në krye të skuadrës kur gjilanasit arritën një prej sukseseve më të rëndësishme të viteve të fundit.

Nuhiu mori drejtimin e Dritës në shkurt të vitit 2019 dhe vetëm një sezon më vonë e udhëhoqi ekipin drejt titullit të kampionit të Kosovës.

Në korrik të vitit 2020, Drita e siguroi matematikisht titullin, duke u shpallur kampione për herë të tretë në historinë e klubit.

Tash, disa vite pas atij suksesi, Nuhiu rikthehet në Gjilan me një mision të ri.

Ai do të ketë për detyrë të rikthejë skuadrën në rrugën e rezultateve dhe të përmbushë objektivat e klubit për sezonin e ri.

Rikthimi i tij ka ngjallur menjëherë reagime pozitive te tifozët e Dritës, të cilët e kujtojnë shumë mirë periudhën kur Nuhiu i udhëhoqi drejt titullit.

Tani mbetet të shihet nëse trajneri do të arrijë ta përsërisë suksesin e kaluar dhe t’i japë Dritës një tjetër kapitull të artë.

Transferimi i Fisnik Asllanit te RB Leipzig ka dështuar në momentin e fundit, edhe pse gjithçka dukej e përfunduar.

Sulmuesi kosovar kishte arritur marrëveshje me klubin gjerman dhe Leipzig kishte qenë gati të paguante 25 milionë euro, ndërsa me bonuse shuma mund të arrinte deri në 30 milionë.

Madje, Asllani kishte rënë dakord edhe për një kontratë afatgjatë deri në vitin 2031. Por në futboll, asgjë nuk quhet e mbyllur pa u kryer të gjitha procedurat.

Gjatë kontrolleve mjekësore u evidentuan disa probleme dhe kjo bëri që Leipzig të tërhiqej nga marrëveshja. Deri tani nuk janë bërë të ditura detajet e sakta të shqetësimit shëndetësor, ndaj mbetet e paqartë se sa serioze është situata.

Ky zhvillim ka rikthyer menjëherë në skenë dy emra të mëdhenj: Barcelonën dhe Borussia Dortmundin.

Barcelona e ka monitoruar prej kohësh 23-vjeçarin, ndërsa interesi i Dortmundit gjithashtu ka qenë i pranishëm gjatë kësaj vere.

Asllani vjen pas një sezoni shumë pozitiv me Hoffenheimin, ku në 35 paraqitje shënoi 11 gola dhe dhuroi 8 asistime, duke tërhequr vëmendjen e disa klubeve të mëdha.

Tani ai mbetet te Hoffenheimi, por situata mund të ndryshojë shumë shpejt.

Dortmundi mund të rikthehet në garë, ndërsa Barcelona mund ta shohë dështimin e transferimit te Leipzig si mundësinë perfekte për të bërë lëvizjen e saj.

Pra, ajo që dukej si një transferim i mbyllur për 25 milionë euro, tashmë është kthyer në një tjetër betejë për të ardhmen e Fisnik Asllanit.

E ardhmja e Romelu Lukakut te Napoli po bëhet gjithnjë e më e paqartë, ndërsa sulmuesi belg mund të jetë duke iu afruar një largimi nga Italia.

Në garë për shërbimet e tij është Fenerbahçe, që tashmë ka bërë ofertën e parë zyrtare për 33-vjeçarin. Megjithatë, propozimi i klubit turk nuk ka bindur drejtuesit e Napolit.

Sipas raportimeve nga Italia, Fenerbahçe kishte ofruar rreth 5 milionë euro për kartonin e Lukakut, por Napoli e ka konsideruar këtë shumë të pamjaftueshme dhe e ka refuzuar menjëherë.

Klubi italian vlerëson sulmuesin belg rreth 10 milionë euro dhe dëshiron të arrijë sa më afër kësaj shifre në rast të një shitjeje gjatë kësaj vere.

Por transferimi nuk varet vetëm nga marrëveshja mes dy klubeve. Edhe kërkesat financiare të vetë Lukakut mund të paraqesin një tjetër pengesë.

Sulmuesi raportohet se kërkon një pagë prej rreth 10 milionë eurosh në sezon, një shifër që Fenerbahçe duhet ta marrë seriozisht parasysh nëse dëshiron ta bindë belgut të transferohet në Turqi.

Pavarësisht refuzimit të ofertës së parë, negociatat nuk janë mbyllur. Fenerbahçe pritet të rikthehet me një propozim të përmirësuar, ndërsa të dyja palët vazhdojnë të jenë në kontakt.

Napoli është i gatshëm të dëgjojë oferta, sidomos duke pasur parasysh se kontrata e Lukakut skadon në verën e vitit 2027.

Pra, marrëveshja nuk duket ende afër, por as e pamundur. Tashmë topi është në fushën e Fenerbahçes, nëse klubi turk rrit ofertën dhe arrin marrëveshje me Lukakun për pagën, transferimi mund të marrë një kthesë të madhe në ditët e ardhshme.

Ferran Torres mund të jetë pranë një kapitulli të ri në karrierën e tij, pasi e ardhmja e sulmuesit spanjoll te Barcelona po bëhet gjithnjë e më e pasigurt.

Sipas “Diario Sport”, drejtuesit e klubit katalunas janë të gatshëm të nisin negociatat me Paris Saint-Germainin për një transferim të mundshëm dhe madje kanë përcaktuar edhe shumën që kërkojnë për kartonin e tij.

Barcelona synon të përfitojë të paktën 65 milionë euro nga shitja e Torresit, një shifër që klubi e konsideron të arsyeshme duke marrë parasysh formën e tij dhe paraqitjet e mira me kombëtaren e Spanjës në Kupën e Botës 2026.

Situata bëhet edhe më interesante për shkak se Torres raportohet se tashmë ka gjetur gjuhën e përbashkët me PSG-në për kushtet personale. Kjo ka bërë që Barcelona ta shohë largimin e tij si një mundësi reale.

Por ekziston një problem, PSG nuk dëshiron të paguajë menjëherë 65 milionë euro.

Klubi francez pritet të nisë negociatat me një ofertë fillestare prej rreth 55 milionë eurosh, së bashku me bonuse. Ideja e parisienëve është që përmes bisedimeve të arrijnë një marrëveshje me Barcelonën dhe ta ulin diferencën prej 10 milionë eurosh.

Nga ana tjetër, Barcelona ka edhe një arsye për të mos e shtyrë shumë shitjen. Kontrata e Torresit skadon në qershor të vitit 2027 dhe katalunasit duan të përfitojnë financiarisht përpara se vlera e tij të mund të bjerë.

Torresi vjen pas një sezoni pozitiv, me 20 gola në të gjitha garat, duke dëshmuar se mbetet një opsion i rëndësishëm në sulm.

Tashmë gjithçka mbetet në duart e Barcelonës dhe PSG-së, 65 milionë të kërkuara nga katalunasit, 55 milionë plus bonuse nga francezët. Negociatat pritet të tregojnë nëse Ferran Torres do ta vazhdojë karrierën në Paris.

Futbollistët shqiptarë vazhdojnë të lënë gjurmë në elitën e futbollit zviceran, teksa plot tre prej tyre janë përfshirë në formacionin më të mirë të xhiros së fundit.

Njëri prej tyre është Donat Rrudhani, i cili po kalon një formë fantastike me Sionin. Mesfushori shqiptar ishte sërish protagonist, këtë herë me një gol spektakolar në stilin vollej, duke realizuar një goditje që la pa mundësi reagimi portierin e Vaduzit.

Por edhe nga ana tjetër pati një shqiptar që shkëlqeu. Qendërmbrojtësi Liridon Berisha zhvilloi një paraqitje të sigurt dhe shumë të rëndësishme për Vaduzin, duke ndihmuar skuadrën e tij të marrë një pikë të vlefshme në transfertën ndaj Sionit.

Ndërkohë, një tjetër paraqitje e jashtëzakonshme erdhi nga Simon Simoni. Portieri shqiptar i Luzernit ishte një prej lojtarëve më të dalluar të javës, pasi me disa pritje vendimtare i mohoi St. Gallenit mundësinë për të marrë fitoren.

Performanca e Simonit u vlerësua maksimalisht edhe nga SofaScore, që i dha atij notën fantastike 9.1.

Kështu, Rrudhani, Berisha dhe Simoni janë tre shqiptarët që këtë javë kanë siguruar një vend në formacionin ideal të elitës së futbollit zviceran, duke dëshmuar edhe një herë se futbollistët shqiptarë po luajnë një rol gjithnjë e më të rëndësishëm në kampionatin zviceran.

Harry Kane vazhdon të shkëlqejë në futbollin evropian. Sulmuesi anglez është shpallur fitues i Këpucës së Artë të Evropës për sezonin 2025/26, pasi e mbylli kampionatin si golashënuesi më i mirë në kontinent.

Kane realizoi plot 36 gola në Bundesliga me Bayern Munichun, një shifër që i mjaftoi për të lënë pas të gjithë rivalët dhe për të siguruar këtë trofe prestigjioz.

Për 33-vjeçarin, ky është triumfi i dytë në karrierë me Këpucën e Artë të Evropës, pas suksesit të parë në sezonin 2023/24. Me këtë arritje, ai hyn në një grup shumë të veçantë, ku vetëm Lionel Messi dhe Cristiano Ronaldo kanë fituar këtë çmim më shumë herë.

Në Bayern Munich janë të bindur se Kane nuk është thjesht një golashënues i jashtëzakonshëm.

Presidenti Herbert Hainer e ka vlerësuar anglezin si një vazhdimësi të traditës së madhe të sulmuesve të klubit, duke e krahasuar ndikimin e tij me legjenda si Gerd Muller dhe Karl-Heinz Rummenigge. Ai gjithashtu theksoi se Kane është një lider i rëndësishëm dhe se karakteri i tij ka bërë që të fitojë respekt të madh brenda klubit.

Edhe drejtori Jan-Christian Dreesen ka folur me superlativa për sulmuesin. Ai ka nënvizuar se Kane ka ngritur nivelin e Bayern Munichut dhe të Bundesligës, duke veçuar faktin se anglezi vendos gjithmonë interesin e ekipit përpara suksesit personal.

Sipas Dreesen, kombinimi i golave, inteligjencës, karakterit dhe lidershipit e bën Kane një prej sulmuesve më të kompletuar të gjeneratës së tij.

Trofeu i Këpucës së Artë do t’i dorëzohet zyrtarisht Kane më 19 gusht, në Muzeun e Bayern Munichut.

Darwin Nunez ka bërë një lëvizje të papritur, duke zbuluar transferimin e Ronald Araujos te Liverpooli, madje përpara se vetë klubi anglez ta konfirmonte zyrtarisht.

Sulmuesi uruguaian, i cili verën e kaluar u largua nga Liverpooli për t’iu bashkuar Al-Hilalit, publikoi në rrjetet sociale një fotografi me Araujon dhe i uroi mirëseardhjen te ish-klubi i tij.

Sipas raportimeve, Liverpooli ka arritur marrëveshje me Barcelonën për huazimin e mbrojtësit për një sezon. Në marrëveshje përfshihet edhe opsioni që klubi anglez ta blejë përfundimisht Araujon verën e ardhshme, për një shumë që raportohet të jetë rreth 47 milionë funte.

Por ndërsa Liverpooli ende nuk kishte bërë asnjë njoftim zyrtar, Nunez duket se vendosi të mos priste më.

“Mirë se erdhe në këtë klub të madh, mik. Jam shumë i lumtur që do ta përjetosh dashurinë dhe mbështetjen e tifozëve të Liverpoolit. Ata janë të veçantë. Tani edhe ti je një Red. VAMO ARRIBA!”, shkroi Nunez.

Postimi shkaktoi menjëherë reagime të shumta nga tifozët, të cilët me humor vunë re se uruguaiani e kishte “njoftuar” transferimin përpara klubit.

Araujo pritet të jetë një përforcim i rëndësishëm për mbrojtjen e Liverpoolit, veçanërisht pas largimit të Ibrahima Konates drejt Real Madridit.

27-vjeçari ka kaluar tetë vite te Barcelona, ku ka zhvilluar 213 ndeshje dhe ka fituar tre tituj të La Ligës, së bashku me pesë trofe të kupave vendore.

Mesfushori i Kosovës, Donat Rrudhani, po e rigjen gradualisht formën e dikurshme, duke lënë sërish gjurmë te Sioni në Superligën e Zvicrës.

Për të dytën ndeshje radhazi, ylli kosovar ka arritur të gjejë rrjetën në elitën e futbollit zviceran. Këtë herë, Rrudhani realizoi një eurogol spektakolar nga distanca, me një vollej të fuqishëm që la portierin kundërshtar plotësisht të shtangur.

Forma e tij e fundit është një sinjal i mirë edhe për Kombëtaren e Kosovës. Nëse Rrudhani vazhdon me këtë ritëm dhe paraqitje, ai mund të rikthehet shumë shpejt në planet e trajnerit Franco Foda, sidomos duke pasur parasysh se së fundmi emri i tij ishte parë vetëm në listën e gjerë.

Rikthimi i Rrudhanit në formën e tij më të mirë do të ishte një lajm i rëndësishëm për Kosovën, pasi mesfushori tashmë po tregon se mund të jetë sërish një prej opsioneve interesante në repartin ofensiv.

Një skenë e pazakontë ka ndodhur gjatë ndeshjes së kampionatit brazilian mes Coritibas dhe Chapecoenses, ku protagonisti kryesor ishte futbollisti i skuadrës vendase, Jacy.

Pas një krosimi në zonë, 29-vjeçari arriti ta dërgonte topin në rrjetë dhe menjëherë u nis drejt tifozëve të Coritibas për të festuar.

Kapiteni i skuadrës vendosi të kalonte me kërcim një tabelë reklamash, por nuk e kishte kuptuar se pas saj ndodhej tuneli për hyrjen e lojtarëve në brendësi të stadiumit.

Jacy përfundoi duke rënë shkallëve dhe për disa momente u zhduk nga pamja e kamerave. Bashkëlojtarët dhe pjesëtarët e sigurimit reaguan menjëherë, duke vrapuar drejt tij për t’i dhënë ndihmën e nevojshme.

Futbollisti brazilian u ngrit dhe fillimisht ishte në gjendje të vazhdonte ndeshjen. Megjithatë, ai pësoi një dëmtim në kyçin e këmbës dhe u zëvendësua vetëm dy minuta pas fillimit të pjesës së dytë.

Por për Jacy-n situata u bë edhe më zhgënjyese. Goli që ai festoi me aq entuziazëm nuk u regjistrua në tabelën e rezultatit.

Teksa futbollisti po merrte ndihmë mjekësore pas rënies, VAR-i analizoi aksionin dhe vendosi se Jacy ishte në pozicion jashtë loje. Për këtë arsye, goli u anulua.

Pavarësisht incidentit, Coritiba arriti të fitonte ndeshjen me rezultatin 2-1.

“Jam mirë”, deklaroi Jacy pas përfundimit të takimit të zhvilluar të dielën, duke qetësuar tifozët për gjendjen e tij.

Incidenti nuk është krejtësisht i panjohur në këtë stadium, pasi edhe në të kaluarën janë regjistruar raste të ngjashme gjatë festimeve të golave.

Barcelona vazhdon të insistojë për transferimin e Julian Alvarez nga Atletico Madrid, pavarësisht qëndrimit të prerë të Diego Simeones se klubi madrilen nuk dëshiron ta shesë sulmuesin argjentinas te një rival direkt.

Sipas raportimeve të Mundo Deportivo, trajneri i Atletico Madridit e ka përsëritur edhe një herë qëndrimin e klubit gjatë fazës përgatitore në Seul. Simeone ka nënvizuar rëndësinë e Alvarez për projektin e tij, duke theksuar se e ardhmja e sulmuesit duhet të vlerësohet edhe nga këndvështrimi sportiv.

Megjithatë, deklaratat e Simeones nuk kanë ndryshuar strategjinë e Barcelonës. Drejtori sportiv Deco dhe trajneri Hansi Flick vazhdojnë ta konsiderojnë Julian Alvarez si objektivin kryesor për pozicionin e qendërsulmuesit.

Java e ardhshme mund të jetë vendimtare për të ardhmen e 25-vjeçarit. Alvarez pritet të rikthehet nga pushimet dhe të zhvillojë një bisedë me drejtuesit e Atletico Madridit për situatën e tij.

Barcelona shpreson që sulmuesi të shprehë qartë dëshirën për t’u transferuar në “Camp Nou”, duke ushtruar kështu presion mbi Atletico Madridin për të hapur negociatat.

Nga ana tjetër, presidenti i Atletico Madridit, Miguel Ángel Gil Marín, ka përsëritur vazhdimisht se klubi nuk ka ndërmend ta shesë Alvarez te Barcelona. Megjithatë, katalanasit besojnë se situata mund të ndryshojë nëse vetë lojtari kërkon largimin.

Simeone ka lënë gjithashtu të kuptohet se e llogarit Alvarez në formacion për ndeshjen hapëse të La Ligës ndaj Malagës, një tjetër sinjal se Atletico dëshiron ta mbajë sulmuesin në skuadër.

Në të njëjtën kohë, situata bëhet edhe më urgjente për Barcelonën për shkak të largimit të mundshëm të Ferran Torres. Nëse ky transferim përfundon, Flick do të ketë nevojë për një tjetër alternativë në repartin ofensiv.

Për këtë arsye, Barcelona nuk dëshiron që saga e Alvarez të zvarritet pafundësisht. Klubi katalanas është i gatshëm të aktivizojë edhe “Planin B”, nëse Atletico Madrid vazhdon të refuzojë çdo mundësi për negociata.

Me fillimin e La Ligës që po afron, Flick kërkon ta ketë sa më shpejt të qartë përbërjen e skuadrës së tij. Për këtë arsye, java e ardhshme pritet të jetë veçanërisht e rëndësishme si për të ardhmen e Julian Alvarez, ashtu edhe për strategjinë e Barcelonës në këtë merkato.