Category: SPORT

Neymar mund të largohet nga Santosi në fund të vitit dhe të transferohet në Major League Soccer, ku pritet të ribashkohet me dy ish-shokët e tij të Barcelonës, Lionel Messin dhe Luis Suárezin.

Ish-përfaqësuesi brazilian Felipe Melo ka bërë një deklaratë të bujshme, duke pretenduar se Neymar do të jetë pjesë e Inter Miamit nga janari i vitit të ardhshëm.

Kontrata e Neymarit me Santosin skadon në dhjetor, ndërsa e ardhmja e tij mbetet ende e paqartë. Vetë sulmuesi brazilian kishte lënë të hapur edhe mundësinë e pensionimit nga futbolli i luajtur, por deklarata e Melos ka rikthyer fuqishëm skenarin e një transferimi në Shtetet e Bashkuara.

Duke folur në kanalin e tij në YouTube, Melo tha se kishte marrë informacion nga një mik i tij dhe se Neymar do të transferohet në Miami në janar.

“Një mik më ka zbuluar se Neymar do të shkojë të luajë në Miami në janar. Nëse kjo ndodh, do të kem qenë i pari që e ka dhënë këtë lajm”, u shpreh ish-mesfushori brazilian.

Një transferim i tillë do të kishte edhe një dimension të veçantë, pasi Neymar do të ribashkohej me Lionel Messin dhe Luis Suárezin. Të tre formuan treshen e famshme “MSN” te Barcelona, duke shënuar plot 363 gola së bashku gjatë tri sezoneve në Camp Nou.

Vetëm në sezonin e parë të tyre si treshe, Neymar, Messi dhe Suárez realizuan 122 gola dhe e udhëhoqën Barcelonën drejt triumfit në Ligën e Kampionëve.

Nëse marrëveshja realizohet, rikthimi i “MSN”-së në një skuadër do të ishte padyshim një nga historitë më të mëdha të futbollit në vitet e fundit.

Megjithatë, për momentin bëhet fjalë për një deklaratë të Felipe Melos dhe jo për një konfirmim zyrtar nga Neymar, Santos apo Inter Miami.

“Red Bull Arena” në Salzburg do të jetë sonte skena e duelit mes Paris Saint-Germainit dhe Aston Villës, në një përballje që hap zyrtarisht sezonin e ri evropian.

Kampionia e Evropës, PSG-ja, vjen në këtë sfidë me synimin për të shtuar një tjetër trofe në vitrinën e saj, pasi triumfoi në Ligën e Kampionëve për herë të dytë radhazi. Francezët mposhtën Arsenalin në finale pas ekzekutimit të penalltive.

Përballë tyre do të jetë Aston Villa, e cila siguroi biletën për Superkupë pas triumfit në Europa League. Anglezët dominuan finalen ndaj Freiburgut, duke fituar me rezultat 3-0.

Megjithatë, një dilemë interesante që mund të lindë gjatë ndeshjes lidhet me atë se çfarë ndodh nëse rezultati mbetet i barabartë pas 90 minutave.

UEFA ka përcaktuar se në Superkupën e Evropës nuk do të ketë vazhdime.

Nëse PSG-ja dhe Aston Villa nuk arrijnë ta ndajnë fituesin brenda kohës së rregullt, skuadra triumfuese do të përcaktohet menjëherë përmes goditjeve nga pika e bardhë.

Pra, ndryshe nga ndeshjet e fazave eliminatore të Ligës së Kampionëve apo Europa League-s, ku barazimi pas 90 minutave pasohet nga 30 minuta shtesë, në Superkupë gjithçka mund të vendoset direkt nga penalltitë.

Ky rregull ishte në fuqi edhe në edicionin e kaluar, kur PSG-ja triumfoi ndaj Tottenhamit pikërisht pas penalltive. Skuadra franceze kishte qenë në disavantazh 2-0, por arriti të rikthehej në fund të ndeshjes dhe ta barazonte rezultatin, përpara se të siguronte trofeun nga pika e bardhë.

Edhe këtë vit rregullorja mbetet e pandryshuar. Kështu, nëse 90 minutat nuk prodhojnë fitues, trofeu i Superkupës së UEFA-s do të vendoset direkt përmes penalltive.

Roberto Martinez është shfaqur si një nga kandidatët kryesorë për të marrë drejtimin e Kombëtares së Holandës pas përfundimit të epokës së Ronald Koeman.

Pas përfundimit të Kampionatit Botëror 2026, Koeman dhe Federata Holandeze e Futbollit i dhanë fund bashkëpunimit, duke lënë “Tulipanët” në kërkim të trajnerit të ri.

Sipas raportimeve të “De Telegraaf”, drejtuesit e KNVB-së kanë zhvilluar kontaktet e para me Martinez, i cili më herët ka drejtuar Kombëtaren e Portugalisë dhe atë të Belgjikës.

Interesimi për spanjollin vjen pasi Holanda nuk arriti të bindë dy emrat që fillimisht konsideroheshin si opsionet e preferuara për stolin, Peter Bosz dhe Arne Slot.

Martinez tashmë shihet si një alternativë serioze dhe mund të jetë zgjedhja e federatës për të nisur një cikël të ri me Kombëtaren holandeze.

Nëse emërohet, 52-vjeçari do të shkruante historinë duke u bërë trajneri i parë i huaj që drejton Holandën që nga Ernst Happel. Austriaku ishte në krye të “Tulipanëve” gjatë viteve 1977-1978.

Kampioni i Kosovës, Drita, ka bërë lëvizjen e radhës në merkato, duke zyrtarizuar transferimin e mesfushorit shqiptar, Eduart Rroca.

Klubi nga Gjilani, pas emërimit të Ardian Nuhiut në krye të skuadrës, ka vijuar punën për përforcimin e ekipit dhe këtë herë ka siguruar shërbimet e një futbollisti me përvojë të madhe.

Drita e ka konfirmuar transferimin përmes një njoftimi në rrjetet sociale, ku shkurtimisht ka prezantuar 33-vjeçarin me mesazhin: “Mirë se vjen, Eduart Rroca”.

Rroca vjen në Gjilan pas një eksperience të gjatë në futbollin turk, ku ka mbrojtur ngjyrat e Istanbulspor, Manisa FK dhe Ankara Keçiörengücü.

Mesfushori shqiptar ka një karrierë të pasur edhe në futbollin vendas. Para aventurës në Turqi, ai ka luajtur për disa klube të njohura shqiptare, përfshirë Luftëtarin, Egnatian, Tërbunin dhe Kukësin.

Me ardhjen e Rrocës, Drita shton në organikë një lojtar me eksperiencë dhe cilësi në repartin e mesfushës, teksa synimi i kampionëve të Kosovës është të ndërtojnë një skuadër sa më konkurruese për sezonin e ri.

Tashmë, mbetet të shihet nëse Rroca do të arrijë të bëhet një prej pikave kyçe të ekipit të Ardian Nuhiut në objektivat e sezonit të ardhshëm.

Arsenal po kërkon të përforcojë edhe më shumë skuadrën pas një sezoni të suksesshëm dhe tashmë ka kthyer vëmendjen nga Barcelona.

Sipas Diario Sport, londinezët janë të interesuar për mbrojtësin francez, Jules Koundé, i cili mund të luajë si qendërmbrojtës, por edhe në krahun e djathtë të mbrojtjes.

E ardhmja e Koundé-s në Camp Nou është bërë një nga temat e merkatos së kësaj vere. Francezi nuk konsiderohet më i paprekshëm nga trajneri Hansi Flick, ndërsa në krahun e djathtë tekniku gjerman mund të mbështetet te Eric García dhe Xavi Espart.

Flick pritet të zhvillojë së shpejti një bisedë me Koundé-n, ku mund të qartësohet edhe më shumë e ardhmja e tij.

Nga ana tjetër, Barcelona po shqyrton shitjen e disa lojtarëve të rëndësishëm për të krijuar hapësirë financiare dhe në listën e pagave. Klubi katalanas synon të financojë objektivat e tij të merkatos, mes tyre Rodri, Julián Álvarez dhe João Cancelo.

Koundé ka kontratë me Barcelonën deri në vitin 2031 dhe aktualisht dëshiron të vazhdojë në Camp Nou.

Megjithatë, situata mund të ndryshojë nëse Barcelona vendos ta shesë dhe Hansi Flick nuk e sheh më si pjesë të planeve të tij kryesore.

Në këtë situatë, Arsenal po e monitoron nga afër mbrojtësin francez dhe mund të tentojë transferimin e tij nëse Barcelona vendos të hapë derën për një largim.

Tani mbetet të shihet nëse Jules Koundé do të vazhdojë në Barcelonë, apo do të nisë një kapitull të ri në Premier League me fanellën e Arsenalit.

Paris Saint-Germain ka përpara një objektiv të jashtëzakonshëm në sezonin 2026/27. Kampionët në fuqi të Evropës synojnë të shkruajnë historinë duke fituar për të tretën herë radhazi trofeun e Ligës së Kampionëve, një arritje që deri më tani e ka realizuar vetëm Real Madrid.

Trajneri i PSG-së, Luis Enrique, e di mirë madhështinë e sfidës që e pret skuadrën e tij, por beson se pikërisht ky objektiv mund t’i japë ekipit motivimin maksimal.

“Unë përqendrohem në rikthimin e dëshirës për të fituar përsëri. Është e vështirë të vazhdosh të fitosh. Tani kemi një sfidë unike, diçka praktikisht të papërsëritshme në historinë e futbollit evropian: të barazohemi me Real Madridin, nëse arrijmë të fitojmë Ligën e Kampionëve për herë të tretë radhazi”, deklaroi Enrique.

Trajneri spanjoll, i cili tashmë ka tri trofe të Ligës së Kampionëve në karrierën e tij si trajner, e pranon se PSG-ja tashmë shihet ndryshe në Evropë.

“Askush në histori nuk ka fituar tri herë radhazi, përveç Real Madridit. Ne mund ta barazojmë këtë arritje. Por nuk mendoj se ka ndonjë skuadër në Evropë më të motivuar se ne”, shtoi ai.

Sipas Enrique, ndryshimi i statusit të PSG-së është një tjetër dëshmi e progresit të klubit në vitet e fundit. Nga një skuadër që dikur shihej larg favoritëve kryesorë, Parisi tashmë konsiderohet ndër ekipet që synojnë trofeun më të madh evropian.

“Askush nuk e përjashton më Paris Saint-Germain. Dy vite më parë, ishte e vështirë të na vendosnin mes favoritëve. Tani, askush nuk do të thoshte se Paris Saint-Germain nuk është favorit”, theksoi trajneri.

Megjithatë, Enrique e di se të qëndrosh në majë është shumë më e vështirë sesa të arrish atje.

“Ky është një pozicion që e kemi merituar, por nëse duam ta ruajmë, duhet të punojmë edhe më shumë”, përfundoi Luis Enrique.

Tashmë, PSG-së i mbetet të tregojë në fushë nëse mund ta shkruajë emrin e saj përkrah Real Madridit dhe të realizojë një prej arritjeve më të rralla në historinë e Ligës së Kampionëve.

Kombëtarja e Greqisë do të zhvillojë dy ndeshje vendimtare në fund të gushtit në kuadër të kualifikimeve për Kupën e Botës, por në këto përballje nuk do të ketë në dispozicion yllin e saj kryesor, Giannis Antetokounmpo.

Sipas raportimeve, Miami Heat nuk i ka dhënë leje Antetokounmpo-s për t’iu bashkuar kombëtares greke gjatë dritares së ardhshme kualifikuese. Klubi nga Florida druhet se angazhimi i tij me përfaqësuesen mund të rrisë rrezikun e një dëmtimi.

Kjo përbën një goditje të rëndësishme për Greqinë, e cila po përgatitet për dy sfida shumë të vështira në garën për kualifikimin në Kupën e Botës.

Antetokounmpo iu bashkua Miami Heat këtë verë, duke i dhënë fund aventurës së tij 13-vjeçare me Milwaukee Bucks. Transferimi i tij te skuadra nga Florida e ka bërë atë një prej figurave kryesore të projektit të ri të klubit.

Greqia, e drejtuar nga Vassilis Spanoulis, e ka mbyllur raundin e parë të kualifikimeve me bilanc 3-3. Në fund të gushtit, grekët do të përballen fillimisht me Ukrainën në transfertë, më 28 gusht, ndërsa tri ditë më vonë do të presin Spanjën në shtëpi.

Ukraina aktualisht ka bilanc 4-2, ndërsa Spanja kryeson me një rekord prej 5-1. Në grup janë gjithashtu Mali i Zi me 4-2, si dhe Georgia dhe Portugal, të cilat kanë nga 3-3.

Në mungesë të Antetokounmpos, Greqia do të duhet të gjejë zgjidhje të tjera për të përballuar dy sfida të një rëndësie të madhe në rrugëtimin drejt Kupës së Botës.

Lionel Messi po kalon një nga momentet më të vështira të jetës së tij. Ylli argjentinas pritet të shkëputet përkohësisht nga aktivitetet me Inter Miamin, pas ndarjes nga jeta të babait të tij, Jorge Messi.

Jorge Messi ndërroi jetë në moshën 68-vjeçare, pas një sëmundjeje të gjatë. Humbja ka prekur thellë kapitenin argjentinas, i cili kishte një marrëdhënie tepër të veçantë me babanë e tij, një prej njerëzve më të rëndësishëm në rrugëtimin e tij personal dhe profesional.

Në këto rrethana të vështira, Messi ka vendosur të qëndrojë pranë familjes së tij në Argjentinë, duke marrë një pushim të përkohshëm nga futbolli.

Sipas raportimeve të Doble Amarilla, 39-vjeçari do të qëndrojë në Argjentinë gjatë ditëve në vijim, ndërsa ende nuk ka një datë të përcaktuar për rikthimin e tij në Shtetet e Bashkuara dhe paraqitjet me Inter Miamin.

Klubi amerikan tashmë duhet të menaxhojë mungesën e yllit argjentinas dhe të bëjë planet për ndeshjet e ardhshme, ndërsa Messi i kushton kohë familjes në këtë periudhë të dhimbshme.

Për momentin, futbolli mbetet në plan të dytë për tetë herë fituesin e “Topit të Artë”, i cili po përballet me një humbje të madhe personale.

Berat Gjimshiti i ka dhënë fund një kapitulli të rëndësishëm të karrierës së tij në Itali. Mbrojtësi dhe kapiteni i Kombëtares shqiptare është larguar zyrtarisht nga Atalanta, duke u transferuar te Al Diriyah në Arabinë Saudite.

Transferimi është mbyllur për shumën e 3 milionë eurove, me 31-vjeçarin që tashmë do të provojë një eksperiencë të re në futbollin saudit.

Gjimshiti ishte pjesë e Atalantës prej disa vitesh dhe gjatë aventurës së tij në Bergamo arriti të fitonte një rol të veçantë në klub. Shqiptari u shndërrua në një prej liderëve të skuadrës, duke mbajtur edhe shiritin e kapitenit dhe duke qenë pjesë e një prej periudhave më të suksesshme në historinë e klubit.

Në momentin e largimit, Gjimshiti i ka kushtuar një mesazh emocionues Atalantës dhe qytetit të Bergamos, duke shprehur mirënjohjen për vitet e kaluara aty.

“Mbërrita i ri në Bergamo, largohem me shumë krenari dhe me një shtëpi të dytë e familje. Faleminderit Atalanta dhe qyteti i Bergamos.”

Pas një periudhe të gjatë dhe të suksesshme në futbollin italian, Gjimshiti tashmë është gati për sfidën e radhës. Kapiteni i Shqipërisë do të veshë fanellën e Al Diriyah, duke nisur një aventurë të re dhe një kapitull krejtësisht ndryshe në karrierën e tij.

Tërmeti i fuqishëm me magnitudë 7.4 ballë të shkallës Rihter, që goditi Kolumbinë të hënën, ka shkaktuar shqetësim të madh edhe në botën e futbollit.

Një situatë veçanërisht dramatike vjen nga klubi i elitës kolumbiane Deportivo Pereira, ku trajneri Arturo Reyes ka konfirmuar se skuadra ka humbur kontaktin me një prej lojtarëve të saj pas tërmetit.

Në një intervistë për televizionin kolumbian WIN Sports, Reyes bëri të ditur se, bazuar në informacionet që klubi ka marrë deri më tani, familjet e lojtarëve janë të sigurta. Megjithatë, për shkak të dëmtimeve të rënda të ndërtesave të banimit, shumë futbollistë dhe familjet e tyre nuk kanë mundësi të kthehen në shtëpitë e tyre.

Megjithatë, shqetësimi më i madh për klubin aktualisht lidhet me situatën e 20-vjeçarit Miguel Palacios.

Siç tregoi Reyes, Palacios u kthye në lagjen e tij pas përfundimit të stërvitjes, por që nga ai moment klubi nuk ka mundur të vendosë më kontakt me të.

“Kemi një lojtar, Miguel Palacios, i cili u kthye në lagjen e tij pas stërvitjes dhe që atëherë nuk kemi marrë absolutisht asnjë lajm për të. Jemi të gjithë shumë të shqetësuar dhe po përpiqemi të zbulojmë se çfarë po ndodh”, deklaroi Reyes.

Deportivo Pereira nisi menjëherë kërkimet për futbollistin, ndërsa disa prej shokëve të tij të skuadrës, të cilët nuk kishin udhëtuar me ekipin, u përpoqën të shkonin në vendbanimin e tij për ta gjetur.

"No hemos sabido nada de él": Arturo Reyes confirmó que Pereira busca al jugador Miguel Palacios⬇️️https://t.co/aZpoRDh0BF

— ESPN Colombia (@ESPNColombia) August 10, 2026

“Kemi dërguar disa njerëz që ndodhen në Pereira, përfshirë edhe lojtarë që nuk udhëtuan, për ta kërkuar në banesën e tij, por deri më tani nuk kemi mundur të vendosim kontakt me të”, shtoi trajneri, dukshëm i shqetësuar.

Reyes bëri të ditur gjithashtu se e gjithë skuadra dëshiron të rikthehet në Pereira sa më shpejt të jetë e mundur, në mënyrë që futbollistët të jenë pranë familjeve të tyre, por edhe të ndihmojnë banorët e prekur nga kjo fatkeqësi natyrore.

“Shpresojmë të arrijmë sa më shpejt të jetë e mundur dhe të mblidhemi të gjithë për të parë se si mund t’u jemi të dobishëm njerëzve dhe si mund t’i ndihmojmë”, përfundoi trajneri i Deportivos.