Category: SPORT

Mbrojtësi i Liverpoolit, Virgil van Dijk, është pranë një tjetër arritjeje të rëndësishme me fanellën e Kombëtares së Holandës, teksa aktualisht numëron 96 paraqitje me “Tulipanët”.

Sipas raportimeve të mediave holandeze, Van Dijk ka zhvilluar një bisedë me trajnerin e ri të përfaqësueses, Xavi, gjatë javës së kaluar në Angli.

Edhe pse deri më tani nuk ka pasur një konfirmim zyrtar nga palët, raportimet bëjnë të ditur se takimi ka qenë pozitiv dhe se ekziston gatishmëri për të vazhduar bashkëpunimin.

Van Dijk synon të arrijë kuotën e 100 paraqitjeve me Holandën, një tjetër moment i veçantë në karrierën e tij ndërkombëtare.

Holanda do të zhvillojë katër ndeshje ndërkombëtare në javët e ardhshme dhe, nëse aktivizohet në të gjitha, mbrojtësi i Liverpoolit mund ta regjistrojë paraqitjen e tij të 100-të që në fillim të muajit tetor.

Sulmuesi i Augsburgut, Arijon Ibrahimovic, ka vendosur të vazhdojë të përfaqësojë Gjermaninë, duke iu bashkuar përfaqësueses U21.

Futbollisti me prejardhje nga Prizreni ishte përmendur kohët e fundit si një nga emrat që mund t’i bashkohej Kosovës në të ardhmen. Megjithatë, Ibrahimovic ka zgjedhur që për momentin të vazhdojë rrugëtimin me grupmoshat e Gjermanisë.

Ibrahimovic është ftuar nga Gjermania U21 për ndeshjet e radhës dhe do të jetë pjesë e skuadrës në kuadër të angazhimeve të saj ndërkombëtare.

Gjermania U21 pritet të zhvillojë tri përballje gjatë këtij muaji dhe në tetor, ndaj Letonisë, Maltës dhe Gjeorgjisë.

Vendimi i Ibrahimovicit bën që mundësia për ta parë atë me fanellën e Kosovës të mbetet e hapur për të ardhmen, por jo në një të ardhme të afërt.

Harry Kane ka rrëfyer se gjatë karrierës së tij janë zhvilluar biseda për një transferim të mundshëm në Spanjë, ndërsa sulmuesi anglez ka theksuar se aktualisht është shumë i lumtur te Bayern Munichu.

Në një intervistë për gazetën spanjolle “Marca”, Kane ka folur për mundësinë që në të kaluarën të transferohej në La Liga. Sulmuesi i Bayern Munichut ka sqaruar se nuk bëhej fjalë për oferta konkrete, por për kontakte dhe diskutime rreth një kalimi të mundshëm në futbollin spanjoll.

“Ka pasur raste kur një gjë e tillë mund të ndodhte. Nuk mund të them se bëhej fjalë për mundësi konkrete, por më herët janë zhvilluar disa biseda”, ka deklaruar Kane.

Kapiteni i Anglisë ka shprehur gjithashtu respekt të madh për futbollin spanjoll dhe klubet më të mëdha të La Ligës, duke përmendur Real Madridin, Barcelonën dhe Atletico Madridin.

“La Liga gëzon respektin tim të madh. Barcelona, Real Madridi dhe Atletico Madridi janë klube ndër më të mëdhatë në botë. Jam rritur duke ndjekur Ronaldon dhe Messin. Kam një respekt të jashtëzakonshëm për këto skuadra”, u shpreh ai.

Megjithatë, Kane nuk e ka mbyllur derën për një aventurë të ardhshme në Spanjë, duke lënë të hapur çdo mundësi për të ardhmen.

“Në futboll, siç e dimë të gjithë, gjithçka është e mundur. Nuk përjashtoj asnjë alternativë. Megjithatë, për momentin jam jashtëzakonisht i lumtur në Gjermani, siç e kam thënë edhe më parë”, deklaroi anglezi.

Ndërkohë, Bayern Munichu po punon për të siguruar vazhdimësinë e Kane, pasi klubi gjerman dëshiron ta mbajë sulmuesin si një nga figurat kryesore të skuadrës edhe në vitet e ardhshme.

Pavarësisht interesimit të mundshëm nga Spanja, Kane ka bërë të qartë se aktualisht ndihet mirë në Mynih, duke lënë të kuptohet se një largim nga Bayern Munichu nuk është në planin e tij të menjëhershëm.

Sezoni i ri i basketbollit kosovar nis me përballje interesante, ndërsa në dy ditët e fundjavës do të zhvillohen katër ndeshje të xhiros së pare ku skuadrat do të synojnë që të nisin mbarë këtë edicion të ri të garave në basketbollin vendor.

Të shtunën, më 19 shtator, në program janë tri përballje. Në orën 17:00, në Pallatin e Rinisë dhe Sporteve në Prishtinë, përballen Prishtina dhe Peja, në një duel që pritet të sjellë interesim të madh që në start të sezonit.

Dy orë më vonë, në Palestrën “Mizahir Isma”, Rahoveci 029 do të përballet me kampionin aktual Trepçën , ndërsa në orën 20:00, në Pallatin e Rinisë dhe Sporteve, zhvillohet ndeshja mes Boras dhe Vëllaznimit.

Xhiroja e parë përmbyllet të dielën, më 20 shtator, me duelin mes Bashkimit dhe Yllit, i cili zhvillohet në orën 17:00 në Palestrën “Sezai Surroi” në Prizren.

Kanë dalë në shitje biletat për ndeshjen mes Kosovës dhe Irlandës, e cila zhvillohet më 24 shtator 2026, në stadiumin “Fadil Vokrri” në Prishtinë.

Takimi, në kuadër të Ligës së Kombeve, nis në ora 20:45, ndërsa tifozët tashmë mund t’i blejnë biletat online.

Çmimet janë të ndara sipas sektorëve të stadiumit: Veriu dhe Jugu kushtojnë 20 euro, Lindja 30 euro, ndërsa Perëndimi 50 euro. Për sektorin VIP, bileta kushton 150 euro.

Biletat mund të blihen online në platformën zyrtare të shitjes së biletave.

Biletat kanë çmime më të larta se në ndeshjet e kaluara. Në tribunat e veriut dhe të jugut, biletat tani kushtojnë 20 euro, ndërsa më herët kishin çmimin prej 10 eurosh.

Në tribunën e lindjes, bileta më herët kushtonte 20 euro, ndërsa tani çmimi është 30 euro. Ndërkaq, në tribunën e perëndimit, bileta do të kushtojë 50 euro, krahasuar me 30 euro sa kushtonte më parë.

Biletat VIP kanë çmimin prej 150 eurosh, që është 50 euro më shumë se në ndeshjet e kaluara.

Kosova i luan dy ndeshje në shtëpi dhe dy si mysafir në shtator dhe janar.

Përfaqësuesja e Izraelit ka bërë publike listën e futbollistëve të grumbulluar për katër ndeshjet e radhës në Ligën e Kombeve, ku njëra prej sfidave më të rëndësishme do të jetë ajo ndaj Kosovës.

Përzgjedhësi Ran Ben Shimon ka përfshirë 27 futbollistë në listën e tij, me Kosovën që do ta ketë përballë më 1 tetor në Debrecen të Hungarisë.

Izraeli do ta hapë këtë seri ndeshjesh më 24 shtator, me duelin ndaj Austrisë në Linz. Më 27 shtator, izraelitët do të përballen me Irlandën në Debrecen, ndërsa katër ditë më vonë, po në qytetin hungarez, do të jetë radha e përballjes me Kosovën. Serinë e ndeshjeve do ta mbyllin më 4 tetor, sërish ndaj Irlandës, por këtë herë në Baçka Topola të Serbisë.

Në listën e Ben Shimonit janë përfshirë emrat kryesorë të futbollit izraelit. Mes tyre spikasin portierët Daniel Peretz dhe Omri Glazer, mbrojtësi Eli Dasa, si dhe futbollistët Oscar Gloukh, Gabi Kanikovski, Dor Peretz, Manor Solomon, Dor Turgeman, Tai Baribo, Yarden Shua dhe Liel Abada.

Në grumbullim ka edhe risi. Një prej tyre është 18-vjeçari Noam Shteifman, mbrojtës i Maccabi Haifës, i cili për herë të parë është përfshirë në këtë grup të lojtarëve. Ndërkohë, në skuadër është rikthyer edhe Ilay Feingold.

Lista e plotë e Izraelit

Portierë: Daniel Peretz, Omri Glazer, Asaf Tzur.

Mbrojtës: Eli Dasa, Guy Mizrahi, Roy Revivo, Anan Khalaili, Idan Nachmias, Ilay Feingold, Raz Shlomo, Nikita Stoinov, Noam Shteifman.

Mesfushorë dhe sulmues: Yarin Levi, Eliel Peretz, Oscar Gloukh, Gabi Kanikovski, Dor Peretz, Omri Gandelman, Eitan Azoulay, Mohamed Abu Fani, Manor Solomon, Dor Turgeman, Idan Toklomati, Tai Baribo, Sa’id Abu Farhi, Yarden Shua, Liel Abada.

E ardhmja e Alexis Mac Allister te Liverpooli ka qenë në qendër të disa spekulimeve ditët e fundit, por babai i mesfushorit argjentinas ka dalë për t’i qartësuar gjërat.

Carlos Mac Allister ka bërë të ditur se familja e lojtarit nuk po ushtron asnjë presion ndaj klubit anglez për një kontratë të re. Mac Allister aktualisht ka marrëveshje me Liverpoolin deri në vitin 2028.

Sipas babait të tij, deri tani nuk ka pasur kontakte nga drejtuesit e klubit për një rinovim të kontratës.

“Askush nga drejtuesit e Liverpoolit nuk na ka kontaktuar ende për rinovimin. Ne kemi një kontratë që është ende në fuqi dhe jemi të përkushtuar ndaj saj me Liverpoolin.”

Carlos shtoi se Liverpooli është plotësisht në të drejtën e tij nëse vendos të mos i ofrojë menjëherë një marrëveshje të re djalit të tij.

“Nëse klubi nuk ofron rinovim të kontratës, kjo është e drejta e tyre.”

Ndërkohë, ai ka mohuar edhe një tjetër raportim që e lidhte Mac Allister me një transferim te Real Madridi.

“Askush nga Real Madridi nuk na ka kontaktuar në asnjë moment gjatë gjithë karrierës së Alexis”, deklaroi ai.

Në fushë, argjentinasi po kalon një moment pozitiv. Mesfushori ka realizuar dy gola në dy ndeshjet e fundit në të cilat ka qenë titullar.

Mac Allister pritet të jetë sërish në dispozicion për Liverpoolin në sfidën e radhës ndaj Bournemouthit në ‘Anfield’.

Për momentin, kontrata deri në vitin 2028 e mban të lidhur argjentinasin me Liverpoolin, ndërsa çdo vendim për të ardhmen e tij duket se do të merret në tavolinën e drejtuesve të klubit.

Superkupa e Spanjës për vitin 2027 do të zhvillohet në një tjetër destinacion spektakolar.

Stambolli i Turqisë është përzgjedhur si nikoqir i turneut, ndërsa katër skuadra të mëdha të futbollit spanjoll do të zbresin në fushë për trofeun.

Në edicionin e vitit 2027 do të marrin pjesë Barcelona, Real Madridi, Atletico Madridi dhe Real Sociedad.

Ndeshjet do të zhvillohen në stadiumin olimpik “Ataturk”, ndërsa turneu është planifikuar në fillim të muajit shkurt.

Gjysmëfinalja e parë do të luhet më 2 shkurt, ku Real Sociedad do të përballet me Real Madridin. Po atë ditë, në gjysmëfinalen tjetër, Barcelona do të sfidojë Atletico Madridin.

Finalja e madhe është programuar për 7 shkurt, ku dy fituesit do të përballen për trofeun e Superkupës.

Barcelona hyn në këtë garë me synimin për të vazhduar dominimin, pasi ka fituar dy edicionet e fundit.

Por përveç trofeut, në Stamboll do të jetë në lojë edhe një shumë e konsiderueshme parash.

Sipas raportimeve, katër klubet pjesëmarrëse do të ndajnë mes tyre 40 milionë euro, në bazë të marrëveshjes së turneut.

Stambolli u përzgjodh pasi Arabia Saudite, e cila ka organizuar edicionet e fundit, do të ketë një tjetër angazhim të madh sportiv në atë periudhë.

Superkupa pritet të transmetohet në më shumë se 150 vende të botës, duke e kthyer turneun në një spektakël të madh ndërkombëtar.

Katër skuadra, dy gjysmëfinale dhe vetëm një trofe. Stambolli po bëhet gati për Superkupën e Spanjës 2027!

Përzgjedhësi i Kosovës, Franco Foda, ka reaguar pas vendimit të kapitenit Amir Rrahmani për t’u tërhequr nga Kombëtarja, duke mohuar mundësinë që ky vendim të pasohet edhe nga futbollistë të tjerë.

Foda ka bërë të ditur se Rrahmani e ka njoftuar personalisht për vendimin e tij, i cili erdhi pas zhvillimeve të fundit në Federatën e Futbollit të Kosovës.

“Gjithçka është shumë emocionale në Kosovë. Fakti është se Amir Rrahmani ka dhënë dorëheqjen. Ai më informoi personalisht për këtë”, ka deklaruar Foda për CANAL+.

Megjithatë, tekniku gjerman insiston se pjesa tjetër e futbollistëve do t’i përgjigjet ftesës së Kombëtares.

“Të gjithë lojtarët që janë në formë dhe që do t’i ftoj, do të jenë të hënën aty dhe do të përgatiten me mua për ndeshjet”, ka shtuar ai.

Foda ka mohuar gjithashtu raportimet për një bojkot të mundshëm nga futbollistë të tjerë.

“Ka shumë dramë që po ekzagjerohet. Ideja se edhe më shumë lojtarë duan të bojkotojnë ekipin kombëtar nuk është e vërtetë”, ka theksuar përzgjedhësi i Kosovës.

Deklaratat e Fodës u raportuan të enjten nga mediumi austriak “Laola1”, ndërsa Kombëtarja e Kosovës pritet të nisë të hënën përgatitjet për ndeshjet e radhës.

Rrahmani, i cili ka 66 paraqitje dhe shtatë gola me Kosovën, e mbajti shiritin e kapitenit për rreth shtatë vjet, para se të njoftonte për tërheqjen e tij nga Kombëtarja.

Kombëtarja e Irlandës ka publikuar listën e futbollistëve të grumbulluar për ndeshjet e ardhshme në Ligën e Kombeve, ku është përfshirë edhe Rocco Vata, djali i ish-kapitenit të Kombëtares së Shqipërisë, Rudi Vata.

Irlanda do ta nisë këtë cikël pikërisht ndaj Kosovës. “Dardanët” do ta presin Kombëtaren irlandeze më 24 shtator, në ndeshjen hapëse të Grupit B3.

Vëmendja e tifozëve shqiptarë do të jetë te Rocco Vata, i cili është pjesë e listës së përzgjedhësit të Irlandës, Heimir Hallgrimsson.

Sulmuesi 20-vjeçar është djali i Rudi Vatës, ish-futbollistit dhe kapitenit të Kombëtares shqiptare.

Pas përballjes me Kosovën, Irlanda do të luajë ndaj Izraelit më 27 shtator, ndërsa më 1 tetor do të përballet me Austrinë. Cikli i parë i ndeshjeve do të mbyllet më 4 tetor, me një tjetër sfidë ndaj Izraelit.

Ndërkohë, Kosova pas ndeshjes me Irlandën do të përballet me Austrinë më 27 shtator, Izraelin më 1 tetor dhe sërish Austrinë më 4 tetor.