Këngëtarja e njohur, Kida ka lansuar projektin e saj më të ri muzikor.
“Inati x Taka” është titulli dhe është sjellur edhe me një videoklip veror.
Për tekstin e pjesës “Inati” është përkujdesur Rron Kai, Kida dhe Liro, ndërsa për pjesën “Taka” vetëm Rron Kai.
Britney Spears ka qenë në qendër të vëmendjes që prej përfundimit të kujdestarisë ligjore ndaj saj, por raportimet e fundit sugjerojnë se këngëtarja vazhdon të përballet me sfida personale dhe një jetë gjithnjë e më të izoluar.
Sipas burimeve të cituara nga “The Sun”, persona pranë yllit të muzikës pop shprehen të shqetësuar për gjendjen e saj emocionale dhe sociale, duke pretenduar se 44-vjeçarja kalon pjesën më të madhe të kohës e vetmuar dhe është larguar nga rrethi i ngushtë i miqve.
Britney Spears u bë fenomen botëror në fund të viteve ’90 me hitin “…Baby One More Time”, ndërsa në vitin 2021 fitoi lirinë pas përfundimit të kujdestarisë 14-vjeçare të ushtruar nga babai i saj, Jamie Spears, pas një fushate të gjerë publike të njohur si “Free Britney”.
Megjithatë, sipas raportimeve mediatike, jeta e saj pas përfundimit të kujdestarisë nuk ka qenë aq e qetë sa pritej. Burime pranë këngëtares pretendojnë se divorci me ish-bashkëshortin Sam Asghari në vitin 2023 dhe marrëdhëniet e vështira me dy djemtë e saj, Sean Preston dhe Jaden James, kanë ndikuar në gjendjen e saj emocionale.
Në muajt e fundit, Spears është bërë objekt diskutimesh në media dhe rrjetet sociale për disa incidente dhe sjellje që kanë ngjallur reagime, ndërsa postimet e saj publike vazhdojnë të komentohen gjerësisht nga fansat dhe opinionistët.
Burimet e cituara nga “The Sun” shprehen se njerëzit më të afërt me këngëtaren dëshirojnë ta shohin atë të gjejë stabilitet dhe qetësi, por kanë frikë se ajo vazhdon të përballet me ndjenja vetmie dhe izolimi.
Edhe pse mbetet një nga artistet më të suksesshme në historinë e muzikës pop, Britney Spears ka deklaruar më parë se mund të mos rikthehet më në skenë, duke lënë të kuptohet se plagët e së kaluarës vazhdojnë të ndikojnë në jetën dhe karrierën e saj. Megjithatë, shumë prej pretendimeve për gjendjen e saj aktuale bazohen në burime anonime dhe nuk janë konfirmuar publikisht nga vetë këngëtarja.
Këngëtarja kolumbiane me famë botërore, Shakira, ka surprizuar fansat duke zbuluar se do të dëshironte të bashkëpunonte me yllin shqiptaro-britanik Dua Lipa.
Gjatë një interviste në Podcastin me Lele Pons, Shakira u pyet për artistët me të cilët do të donte të realizonte bashkëpunime në të ardhmen.
Pa hezitim, ajo përmendi Dua Lipën si një nga zgjedhjet e saj të preferuara.
“Do të më pëlqente të bashkëpunoja me Dua Lipën. Dua Lipa, a po më dëgjon? A e dini që ajo flet spanjisht?”, u shpreh Shakira me entuziazëm gjatë bisedës.
Ndërkohë, Lele Pons e vlerësoi Dua Lipën duke e quajtur “të mrekullueshme”, ndërsa Shakira shtoi me admirim: “Ajo është e jashtëzakonshme”.
Deklaratat e Shakirës kanë ngjallur interes tek fansat, të cilët tashmë po shpresojnë për një bashkëpunim të mundshëm mes dy artisteve me famë botërore.
Reperi i njohur Kleviol Ahmeti, i njohur ndryshe si “Cllevio”, ka dëshmuar sërish në procesin gjyqësor ndaj anëtarëve të grupit të Laert Haxhiut, në Gjykatën e Posaçme AntiKorrupsion (GJKKO).
Sipas dëshmisë që ka publikuar Klan News, ai ka sqaruar se “nuk ka asnjë lidhje me të pandehurit”. Ka veçuar Haxhiun, njëjtë si më herët, duke thënë se e ka pasur shok që fëmijë.
“Jetoj në Lushnje dhe Laerti është jo më larg se 150 metra nga shtëpia ime. Jemi rritur bashkë, njihemi familjarisht. Në vitin 2007 kemi luajtur futboll. Kam qenë në Amerikë dhe kur kthehesha, rrija në Lushnje. Kur e kam njohur Laertin ka qenë pa punë. Vitet e fundit unë nuk e kam takuar fare. Kam ardhur nga SHBA në vitin 2013 dhe në vitin 2014 rashë në burg. Kam dalë në vitin 2020 dhe nuk jam takuar më me të. Burgun e kam vuajtur në 313, 302, Fier dhe Durrës. As telefonatë dhe asnjë lloj kontakti nuk kam pasur me Laertin”, ka thënë Cllevio para hetuesve.
Ndërsa për këngëtarin e famshëm Rigels Rajku, ose siç e njohim të gjithë Noizy, ka deklaruar se “ky i fundit ka nisur me sharjet, jo vetëm ndaj tij, por edhe ndaj një reperi tjetër”. Kështu, edhe për të marrë famë, ka argumentuar se i ka bërë diss-e.
“Ky Rigels Rajku, për të marrë famë, shante Viktor Palokën, i njohur si Unikkatil. Ne, kur na shante Noizy, ishim në Amerikë. Pas 15-20 vitesh ia ktheva edhe unë me muzikë, duke e sharë Noizy-n. Unë jam shkrimtar, shkruaj tekste muzike. Kur dola në vitin 2020 doja të bëhesha i famshëm dhe fillova ta ngacmoja në mënyrë artistike, që quhet diss. Kur bëra këngën, u bëra i famshëm dhe kjo po më pëlqente.”
Por pavarësisht përplasjeve mes tyre virtuale dhe jo vetëm, ka rrëfyer se në një moment i ka kërkuar falje. Akt, që siç tregon Cllevio, përfundoi në mënyrën më të keqe të mundshme për të.
“Një ditë i thashë vetes: boll me diss dhe shkova t’i kërkoja falje. Atë ditë ishte i shoqëruar në Durrës. Kur shkova te lokali “Zins” në Currila, parkova dhe u thashë shokëve të mos dilnin nga makina. Kur vajta aty, doli Rigels Rajku, djali i Bashkimit, dhe rreth 12 veta të tjerë. Aty më rrahën, më shkelën kokën me këmbë. Pata mpiksje gjaku në kokë. Shkova në spital, u mjekova dhe më pas u arrestova, sepse isha në arrest shtëpie dhe përfundova në burg.”
“Unë e kisha njoftuar se po i shkoja te lokali dhe kisha hapur Instagramin live, ku thoja se po shkoja në Durrës te Noizy. Kur hyra te lokali, ishte një roje. I thashë: “Ma thirr Noizyn”. Ai erdhi për rreth 24 sekonda dhe erdhi bashkë me bandën e tij OTR. Nuk i njoh personat që e shoqëronin Noizy-n. Kur erdhi Noizy, unë hoqa syzet për ta respektuar dhe në atë moment më goditi me grusht. Më pas më goditën edhe 6-8 veta të tjerë. Në sherr u përfshinë edhe dy shokët e mi, ku njërit iu thyen dhëmbët. Unë kam pasur dëmtime në kokë dhe në brinjë. Për këtë ngjarje kam dhënë deklarim kur kam qenë në IEVP Fier. Nënën e kisha në Shqipëri, ndërsa pjesa tjetër e familjes ishte në Amerikë. Ngjarja është dokumentuar me pamje filmike dhe aty shihet se më godasin. Nuk kam menduar të hakmerrem ndaj Noizy-t”, ka shtuar reperi.
Sa i takon shpërthimit në lokalin e Noizy-t, ka thënë se e ka marrë vesh nga shokët e burgut.
“Unë i thashë se nuk e di kush ia ka vendosur tritolin, pasi isha në burg. E mendova me vete se kush mund ta kishte bërë dhe mendova se mund ta kishte bërë “Baba”. Nuk më ka ardhur asnjë fjalë që Laerti ta ketë bërë këtë gjë”, ka përfunduar ai.
Shkurte Fejza ka publikuar këngën e saj më të re, dedikim për të bijën, Agnesën, e cila u martua javën e kaluar.
“Oj e amla e shpisë” titullohet kënga ritmike, e cila është dedikim për të gjitha vajzat që martohen këtë vit.
Kënga shënon një moment unik nënë-bijë, që është një prej lidhjeve më të forta në botë.
“Fat dhe lumturi për vajzat që bëhen nuse. Uroj që t’iu pëlqejë” shkroi Fejza.
Detaje tronditës kanë dalë në dritë lidhur me vdekjen e parakohshme të aktores së njohur turke, Ece İrtem. 35-vjeçarja, e cila u nda nga jeta papritur, rezulton se kishte udhëtuar drejt Tajlandës vetëm një javë përpara se të vdiqte.
Gjatë këtij udhëtimi, aktorja kishte pësuar një incident ku ishte kafshuar nga një majmun, gjë që i kishte lënë tre shenja plagësh të dukshme në krahun e saj të majtë. Ky detaj ka ngritur alarme të mëdha te familjarët dhe ekspertët mjekësorë pas vdekjes së saj.
Nisur nga paralajmërimet e mjekëve se kafshimi i majmunit mund të shkaktojë sepsis (helmim të rëndë të gjakut), avokati i aktores, Uğur Gökkoyun, ka dorëzuar sot një kërkesë zyrtare në prokurori.
Përmes kësaj ujdi ligjore, mbrojtja ka kërkuar që të nisë një hetim i hollësishëm për të vërtetuar nëse ekziston një lidhje direkte shkak-pasojë midis infeksionit të marrë nga kafshimi i kafshës dhe humbjes së jetës së 35-vjeçares, raportojnë mediat në Turqi.
Oprah Winfrey zbulon se për vite me radhë kishte mbajtur të fshehtë një incident që përfshinte Whitney Houston.
Sipas saj, Houston kishte rënë nga skena ditën kur duhej të performonte në emisionin e saj dhe ajo u kishte kërkuar të pranishmëve të mos publikonin fotografitë, sepse mendonte se kjo do t’ia shkatërronte jetën këngëtares.
Winfrey tha se Houston kishte qenë e pastër nga droga gjatë një interviste të mëparshme, por pretendoi se më vonë ishte rikthyer te përdorimi dhe se në ditën e incidentit ishte nën ndikimin e drogës.
Pas këtyre deklaratave, përfaqësuesi i Houston reagoi për TMZ, duke sqaruar se këngëtarja kishte rënë gjatë provës së zërit, për shkak të errësirës dhe mosnjohjes së skenës, dhe mohoi kategorikisht se ajo ishte nën ndikimin e drogës.
Ai theksoi se nuk është e drejtë që çdo ngjarje në jetën e saj të lidhet me varësinë dhe kërkoi që historia e saj të trajtohet me të vërtetën.
Whitney ndërroi jetë në shkurt të vitit 2012, në moshën 48-vjeçare.
Shkaku kryesor i vdekjes ishte mbytja në vaskë, ndërsa si faktorë shtesë u përmendën sëmundja e zemrës dhe përdorimi i kokainës.
Marrëdhënia mes Soni Malajt dhe Flor Mumajesit ka qenë një nga temat më të diskutuara gjatë spektaklit Ferma VIP 3.
Në emisionin Post Ferma VIP, ish-fermerja u pyet nga moderatori Florian Agalliu nëse kishte pasur komunikim me këngëtarin pas përfundimit të reality shout.
Soni u përgjigj shkurt dhe me buzëqeshje: “Jo”.Kjo përgjigje u shoqërua menjëherë me batuta në studio.
Sara ndërhyri me humor duke e pyetur: “Jo po, apo jo jo?”, ndërsa Einxhel Shkira komentoi se ndoshta ata nuk kishin folur sepse ishin takuar.
Më tej, moderatori u shpreh se kishte kuptuar përgjigjen e vërtetë në momentin kur Sara bëri pyetjen dhe Soni nuk e kishte vëmendjen te kamera.
Gjatë bisedës u pyet edhe për eksperiencën në Ferma VIP, të cilën Soni e vlerësoi si shumë të veçantë dhe krejt ndryshe nga mënyra si perceptohet nga jashtë.
Kujtojmë se gjatë qëndrimit në spektakël, Flori e kishte surprizuar Soni Malajn me 300 dronë.
Moderatorja Roza Lati ka reaguar në rrjetet sociale lidhur me mungesën e një qëndrimi publik nga këngëtarja me famë botërore, Dua Lipa, për protestat që po zhvillohen në Shqipëri.
Në një postim të shpërndarë në Instagram, Roza publikoi një koment të një ndjekësi drejtuar artistes shqiptare, ku krahas urimeve për suksesin dhe jetën e saj personale, shprehej edhe zhgënjimi për heshtjen ndaj zhvillimeve të fundit në vend.
“Është e vështirë të pajtohesh me aktivizmin selektiv. Heshtja për atë që po ndodh në Shqipëri na lë të hutuar. Shpresojmë ta përdorësh zërin tënd të fuqishëm edhe për vendin”, thuhej në mesazh.
“Dhe ja ku jam unë që them: Asnjëherë s’e kam pas qejf këtë Lipën. As si këngëtare. S’di të kërcej fare. S’ka feminizëm”, u shpreh ajo.
“E tash…s’paska as shpirt”, theksoi mes tjerash.
Heshtja e Lipës ka sjellë diskutime në rrjetet sociale, ku nuk kanë munguar as thirrjet që artistja të përdorë platformën e saj për të adresuar zhvillimet që po shqetësojnë qytetarët shqiptarë.
Krijuesja e hitit “Levitating” ka qenë prej ditësh në Itali, për dasmën treditore që ka organizuar në Sicili.
Ashtu siç kishte paralajmëruar ditë më parë Selvija, bashkëshortja e këngëtarit të ndjerë Shpat Kasapi, tashmë është lansuar projekti i tij më i ri muzikor.
Kjo këngë vjen si pjesë e premtimit të saj për të sjellë në dritë krijimet që Shpati i la përgjysmë dhe nuk arriti t’i publikonte sa ishte gjallë.
“Nana” është publikuar zyrtarisht në kanalin YouTube.
Kënga ka prekur menjëherë zemrat e fansave, duke sjellë sërish zërin e artistit që u nda herët nga jeta.
Ajo që e bën akoma më emocionues këtë lançim është videoklipi i realizuar. Përmes përdorimit të Inteligjencës Artificiale, është mundësuar një video ku Shpati shfaqet me krahë engjëlli pranë nënës së tij, duke krijuar një imazh mjaft prekës, shkruan privebyls.
Ky projekt pritet të jetë vetëm një nga krijimet e shumta që Selvija ka planifikuar të ndajë me publikun, për të mbajtur gjallë trashëgiminë muzikore dhe kujtimin e artistit të dashur për publikun shqiptar.