Category: Lajme

Gjykata Themelore në Prishtinë edhe në rigjykim e ka shpallur fajtor dhe e ka dënuar me 10 vjet burgim të akuzuarin Shaqir Lutvija, lidhur me akuzën për krime lufte në Prizren.

Aktgjykimi u shpall të martën nga kryetari i trupit gjykues, Kujtim Krasniqi, dhe anëtarët Violeta Namani-Hajra dhe Rrahman Beqiri, raporton “Betimi për Drejtësi”.

Gjykatësi Krasniqi tha se në dënimin me burgim, të akuzuarit i llogaritet edhe koha e kaluar në paraburgim. Kjo masë i vazhdohet deri në plotfuqishmëri të aktgjykimit, por jo më shumë sesa dënimi i shqiptuar.

I akuzuari obligohet të paguajë edhe shpenzimet e procedurës penale- 400 euro për paushallin gjyqësor dhe 100 euro për Fondin për Kompensimin e Viktimave të Krimit.

Të dëmtuarit, për realizimin e kërkesës pasurore- juridike udhëzohen në kontest të rregullt juridiko-civil.

Kundër këtij aktgjykimi, palët kanë të drejtë ankese brenda 30 ditësh përmes kësaj Gjykate në Gjykatën e Apelit.

Prezent në sallë qenë prokurori Armend Zenelaj dhe i akuzuari Shaqir Lutvija me mbrojtësen e tij, avokaten Jovana Filipoviq.

Themelorja më 11 nëntor 2025 kishte shpallur aktgjykim dënues ndaj të akuzuarit Lutvija, duke e dënuar me 10 vjet burgim. Por, Gjykata e Apelit me vendimin e 23 qershorit 2026 e ktheu lëndën në rigjykim.

Në seancën fillestare të mbajtur më 17 shtator 2024, Lutvija u deklarua i pafajshëm për akuzën që i vihet në barrë.

Prokuroria Speciale e Republikës së Kosovës më 4 shtator 2024 ka ngritur aktakuzë kundër Shaqir Lutvijës, i cili akuzohej se në cilësinë e inspektorit dhe policit në Stacionin Policor në Prizren, individualisht dhe në bashkëkryerje me persona të tjerë të forcave policore serbe, gjatë periudhës kohore 1998-1999, në Prizren, gjatë kohës së luftës në Kosovë, ka ushtruar masat represive të vrasjes, arrestimit, rrahjes, maltretimit dhe trajtimit çnjerëzor.

Aktakuza thotë se sipas dëshmisë së dëshmitarëve: Murat Kabashi, Elmi Gashi, Sefer Ejupi, Vehbi Velija, Qemajl Kollari, Ukë Kolgeci, Haxhi Gashi, Safet Gashi, Hasan Shala dhe Arsim Zyba, i akuzuari Lutvija nga 28 shtatori 1998 deri më 7 tetor 1998, në bashkëkryerje me pjesëtarët e tjerë të forcave policore, kanë ndërmarr një fushatë për arrestimi e tyre në burgun e Prizrenit, në cilësinë e popullatës civile të nacionalitetit shqiptar, në mesin e të cilëve ishin: R.J., dhe të lartcekurit.

Gjithnjë sipas aktakuzës, forcat serbe pas arrestimit i dërguan në Stacionin Policor në Prizren, me ç’rast i akuzuari Lutvija së bashku me të pandehurit e tjerë, në cilësinë e inspektorit të këtij stacioni, i morën në pyetje të dëmtuarit dhe gjatë procesit të marrjes në pyetje i kanë rrahur me boksa e shqelma, me mjete të tjera të forta dhe metoda të tjera të trajtimit çnjerëzor.

Në aktakuzë thuhet se Lutvija dhe të pandehurit tjerë, kanë përdorë mjete të rrymës elektrike, të cilat ua vendosnin në pjesën e duarve dhe në organe gjenitale, me ç‘rast si pasojë e kësaj R.J., kishte vdekur, kurse Murat Kabashi, Elmi Gashi, Sefer Ejupi, Vehbi Velija, Qemajl Kollari, Ukë Kolgeci, Haxhi Gashi, Safet Gashi, Hasan Shala dhe Arsim Zyba pësuan lëndime serioze trupore.

Me këtë, Lutvija akuzohej se në bashkëkryerje ka kryer veprën penale “Krime lufte kundër popullatës civile” nga neni 142 lidhur me nenin 22 të Ligjit Penal të RSFJ-së.

Demokraci Plus (D+) ka publikuar analizën “Shfrytëzimi ilegal i rërës dhe zhavorrit nga lumenjtë dhe degradimi i ekosistemeve lumore”, e cila analizon sfidat në parandalimin dhe trajtimin e kësaj dukurie në Kosovë. Analiza tregon se sfida kryesore nuk qëndron te mungesa e legjislacionit, por te zbatimi i tij në praktikë.

Gjetjet identifikojnë tri probleme kryesore që kufizojnë reagimin institucional: kapacitetet e pamjaftueshme për inspektim dhe monitorim, koordinimin e dobët ndërinstitucional dhe sfidat në procedurat gjyqësore.

Sipas analizës, sipërfaqja e degraduar përgjatë lumenjve është rritur nga 1,762.71 hektarë në vitin 2018 në 2,059.96 hektarë në vitin 2024, ndërsa Drini i Bardhë mbetet lumi më i prekur. Në të njëjtën kohë, disa nga masat kryesore të parapara në Strategjinë Shtetërore për Ujëra ende nuk janë zbatuar, përfshirë hartimin e planit për menaxhimin e shfrytëzimit të lumenjve dhe përcaktimin e segmenteve ku mund të lejohet nxjerrja e rërës dhe zhavorrit.

Analiza evidenton gjithashtu se gjatë viteve 2023–2025, prokuroritë kanë regjistruar 184 kallëzime penale dhe kanë ngritur 137 aktakuza. Megjithatë, shqyrtimi i praktikës gjyqësore tregon se gjobat shpesh mbeten të ulëta në raport me dëmin e shkaktuar, konfiskimi i makinerive nuk zbatohet gjithmonë, ndërsa dëmi ekologjik nuk reflektohet në mënyrë të mjaftueshme gjatë caktimit të sanksioneve.

Analiza vlerëson se institucionet kanë treguar se mund të arrijnë rezultate konkrete kur bashkëpunojnë. Gjatë funksionimit të Task Forcës së Gjelbër u realizuan mbi 30 aksione të përbashkëta, u shqiptuan 24 gjoba administrative, u referuan 23 raste për procedim penal dhe u sekuestruan 30 mjete, me vlerë të përafërt prej rreth 2 milionë eurosh. Megjithatë, pas përfundimit të mandatit të saj nuk është krijuar një mekanizëm i përhershëm koordinues.

Bazuar në këto gjetje, D+ rekomandon forcimin e kapaciteteve inspektuese dhe hetimore, funksionalizimin e Këshillit Ndërministror për Ujëra, përmirësimin e koordinimit ndërinstitucional, klasifikimin e rasteve të shfrytëzimit ilegal të rërës dhe zhavorrit si kategori e veçantë në Sistemin për Menaxhimin Informativ të Lëndëve (SMIL), si dhe zbatim më konsistent të masës së konfiskimit dhe vlerësim më të plotë të dëmit ekologjik gjatë procedurave gjyqësore.

https://dplus.org/wp-content/uploads/2026/07/Analiza-rreth-shfrytezimit-ilegal-te-reres-dhe-zhavorrit-nga-lumenjte-23.07.2026.pdf

Gjykata Themelore ka liruar nga të gjitha pikat e aktakuzës Sami Lushtakun dhe shtatë të akuzuarit e tjerë në rastin e njohur si “Drenica 1”.

Vendimi është shpallur të martën, duke i dhënë fund procesit gjyqësor ndaj Sami Lushtakut, Rrustem Rrukollit, Ismet Haxhajt, Fatmir Mjakut, Rexhep Xhotës, Skender Tahirit, Sheremet Jasharit dhe Bajram Dibranit.

Ata akuzoheshin për vepra penale që lidhen me ndikimin ndaj dëshmitarëve, pengimin e procedurës penale dhe pjesëmarrjen në grup të organizuar kriminal.

Gjatë gjithë procesit gjyqësor, të akuzuarit kanë mohuar përgjegjësinë për veprat që u viheshin në barrë.

Me vendimin e Gjykatës Themelore, të gjithë të akuzuarit janë liruar nga të gjitha pikat e aktakuzës, duke u shpallur të pafajshëm në këtë rast.

Dy persona janë arrestuar në Zubin Potok nën dyshimin për përfshirje në krime lufte kundër popullatës civile gjatë luftës në Kosovë.

Sipas raportit 24-orësh të Policisë së Kosovës, të dyshuarit, meshkuj kosovarë, dyshohet se gjatë muajit prill të vitit 1999 kanë kryer krime ndaj popullatës civile, ku si pasojë janë vrarë 23 civilë shqiptarë.

“Si rezultat i veprimeve policore, janë arrestuar dy të dyshuar meshkuj kosovarë, pasi që dyshohet se gjatë luftës në vitin 1999 kanë kryer krime ndaj popullatës civile, ku janë vrarë 23 civilë shqiptarë”, thuhet në njoftimin e Policisë.

Me vendim të prokurorit të rastit, të dyshuarit janë dërguar në mbajtje, ndërsa hetimet lidhur me rastin janë në vazhdim. /Telegrafi/

Një person ka mbetur i plagosur pas të shtënave me armë zjarri që ndodhën në orët e para të mëngjesit në rrugën “Xheladin Hana” në Prishtinë.

Rasti është konfirmuar nga Policia e Kosovës, e cila ka bërë të ditur se për incidentin dyshohen dy vëllezër, ndërsa hetimet për zbardhjen e plotë të ngjarjes janë ende në zhvillim.

Lidhur me gjendjen e të plagosurit, drejtori i Emergjencës, Naser Syla, tha se ai fillimisht ka marrë trajtim në Qendrën Emergjente, e më pas është transferuar në Klinikën e Ortopedisë për vazhdimin e trajtimit.

“Po, është trajtuar në Qendrën Emergjente dhe, pas trajtimit të marrë aty, është transferuar në Klinikën e Ortopedisë për vazhdim të tretmanit”, deklaroi Syla.

Ai shtoi se, pas ndërhyrjeve të para mjekësore, gjendja shëndetësore e pacientit është stabile.

Ndërkohë, Policia e Kosovës po vazhdon veprimet hetimore për të sqaruar rrethanat e plagosjes dhe për të ndërmarrë hapat e nevojshëm ligjorë ndaj të dyshuarve.

Ushtruesja e detyrës së Presidentes së Republikës së Kosovës, Albulena Haxhiu, ka pritur sot në takim përfaqësuesit e Shoqatës së Ish të Burgosurve Politikë të Kosovës.

Gjatë takimit u diskutua për veprimtarinë e shoqatës në ruajtjen e kujtesës historike, si dhe për rëndësinë e dokumentimit të dhunës dhe torturave që regjimi i Serbisë ushtroi ndaj mijëra të burgosurve shqiptarë gjatë dekadave të rezistencës për liri, thuhet në njoftim.

Në takim u bisedua edhe për sfidat me të cilat përballet shoqata, ndërsa ushtruesja e detyrës së Presidentes i siguroi përfaqësuesit e saj se, brenda kompetencave të Presidencës, do të jetë pranë nismave për dokumentimin dhe ruajtjen e kujtesës historike.

Me këtë rast, ushtruesja e detyrës së Presidentes, Albulena Haxhiu, shprehu vlerësimin e saj të thellë për kontributin e jashtëzakonshëm të ish të burgosurve politikë në rrugëtimin e Kosovës drejt lirisë dhe pavarësisë, thuhet në njoftim.

Një tërmet i fuqishëm me magnitudë paraprake 6.8 ballë të shkallës Rihter goditi sot (e marte) në mëngjes ishullin Kyushu në Japoni.

Sipas agjencisë Reuters, që citon Institutin Kombëtar për Kërkime mbi Shkencën e Tokës dhe Rezistencën ndaj Fatkeqësive (NIED), pas lëkundjeve autoritetet japoneze lëshuan një paralajmërim për cunami.

Transmetuesi publik NHK raportoi se pritet që valët e cunamit të arrijnë deri në një metër lartësi përgjatë zonave bregdetare të prekura.

Ndërsa Euro-Mediterranean Seismological Centre ka dhënë detaje lidhur me termetin.

Siç shihet në tabelen e tërmeteve, ky termet është pasuar edhe nga një sëri tërmetesh me magnitudë më të ulët.

Dogana e Kosovës ka parandaluar një rast të dyshuar të kontrabandimit të mallrave në Pikën e Kalimit Kufitar në Vërmicë, gjatë kontrolleve të zakonshme ndaj automjeteve që hynin në territorin e Kosovës.

Sipas njoftimit zyrtar, një automjet me targa të huaja është përzgjedhur për kontroll të detajuar nga zyrtarët doganorë. Gjatë kontrollit të bagazhit është zbuluar një sasi malli që nuk ishte deklaruar pranë autoriteteve doganore.

Vlera e mallit të padeklaruar, sipas vlerësimit fillestar të Sektorit të Vlerësimit Doganor, arrin rreth 8 mijë euro.

Për shkak të mosdeklarimit të mallrave gjatë hyrjes në territorin doganor të Kosovës, ndaj shtetasit të huaj është iniciuar procedurë kundërvajtëse, në bazë të dispozitave të Kodit Doganor dhe të Akcizave.

Dogana ka bërë të ditur se kontrollet do të vazhdojnë me qëllim parandalimin e kontrabandës dhe shmangies së detyrimeve doganore, duke theksuar rëndësinë e deklarimit të rregullt të çdo malli që hyn apo del nga vendi.

Ushtruesja e detyrës së presidentes së Kosovës, Albulena Haxhiu, ka pritur në takim Admiralin George M. Wikoff, komandant i Komandës Aleate të Forcave të Përbashkëta në Napoli.

Haxhiu ka bërë të ditur se gjatë takimit është diskutuar për situatën e sigurisë në Kosovë dhe rajon, bashkëpunimin ndërmjet institucioneve të Kosovës dhe KFOR-it, si dhe për koordinimin me NATO-n.

“Sot pata kënaqësinë ta pres Admiralin George M. Wikoff, Komandant i Komandës Aleate të Forcave të Përbashkëta në Napoli. Biseduam për situatën e sigurisë në Kosovë dhe në rajon, për bashkëpunimin e institucioneve tona me KFOR-in dhe për rëndësinë e koordinimit të rregullt me NATO-n”, ka shkruar Haxhiu.

Ajo ka falënderuar admiralin Wikoff për angazhimin dhe shërbimin e KFOR-it në ruajtjen e sigurisë dhe lirisë së lëvizjes për qytetarët e Kosovës.

“E falënderova Admiralin Wikoff për angazhimin e tij, si dhe për shërbimin e KFOR-it në ruajtjen e sigurisë dhe të lirisë së lëvizjes për të gjithë qytetarët e Kosovës”, ka deklaruar ajo.

Sipas Haxhiut, orientimi euroatlantik i Kosovës mbetet i pakthyeshëm, ndërsa anëtarësimi në NATO vazhdon të jetë synim strategjik i vendit.

“Theksova se orientimi euroatlantik i Kosovës është i pakthyeshëm dhe se anëtarësimi në NATO mbetet synimi ynë strategjik”, ka shkruar ushtruesja e detyrës së presidentes.

Ajo ka shtuar se Kosova do të vazhdojë të forcojë bashkëpunimin me Aleancën dhe të kontribuojë në sigurinë e rajonit. /Telegrafi/

Një person ka mbetur i lënduar si pasojë e të shtënave me armë zjarri që kanë ndodhur gjatë natës në rrugën “Xheladin Hana” në Prishtinë.

Lajmin për Telegrafin e ka konfirmuar zëdhënësi i Policisë së Kosovës për Rajonin e Prishtinës, Enis Pllana, i cili bëri të ditur se rasti është raportuar rreth orës 02:00.

“Rreth orës 02:00, Policia ka pranuar informatën për të shtëna me armë zjarri në rrugën ‘Xheladin Hana’ në Prishtinë. Menjëherë në vendin e ngjarjes kanë dalë njësitet policore”, ka deklaruar Pllana.

Sipas tij, nga të dhënat fillestare dyshohet se një person është lënduar nga arma e zjarrit dhe është dërguar për trajtim mjekësor.

“Bazuar në të dhënat fillestare, në këtë rast është i lënduar një person, që dyshohet nga arma e zjarrit dhe i njëjti është dërguar për tretman mjekësor”, ka thënë ai.

Pllana ka bërë të ditur se njësitet relevante policore, në koordinim me Prokurorin e Shtetit, janë duke ndërmarrë veprimet e nevojshme hetimore për zbardhjen e rrethanave të rastit. /Telegrafi/