Category: Lajme

Policia gjermane ka dalë me detaje shtesë lidhur me incidentin e rëndë në Schramberg të Gjermanisë, ku 29-vjeçarja nga Kosova dhe djali i saj trevjeçar, vdiqën pasi u goditën nga një kamion.

Viktimat dyshohet se ishin duke ecur ne trotuar në momentin e aksidentit, derisa sipas mediave, nëna ishte duke e çuar të birin në kopsht

Autoritetet gjermane, për Klankosova konfirmuan kombësinë e viktimave, teksa shtuan se një burrë 53-vjeçar po drejtonte një kamion në “Oberndorfer Straße” drejt Autostradës Federale 462 rreth orës 9:00 të mëngjesit.

Sipas policisë, shoferi ka humbur kontrollin e kamionit si pasojë e një problemi shëndetësor.

“Kamioni u përplas me tre makina të parkuara dhe më pas u përplas në murin e një shtëpie. Një grua 29-vjeçare dhe djali i saj 3-vjeçar u goditën më pas në trotuar. Pavarësisht përpjekjeve të menjëhershme për t’i shpëtuar, të dy vdiqën në vendngjarje nga plagët e rënda”, thuhet në konfirmim.

Shoferi i kamionit pësoi lëndime të lehta dhe i njëjti është transportuar për në spital.

Me kërkesë të prokurorisë publike të Rottweil, është ngarkuar një ekspert për të përcaktuar shkakun e saktë të aksidentit.

Hetimi i aksidentit në vendngjarje është ende duke vazhduar.

Është ndarë nga jeta Bilall Ukëhaxhaj, babai i dëshmorit Besim Ukëhaxhaj.

Këtë e ka bërë të ditur kryetari i AAK-së, Ramush Haradinaj, i cili u shpreh i prekur nga ky lajm i trishtë.

“Në memorien tonë, Baca Bilall dhe çlirimtarët, ndër breza do ta kenë gjithmonë vendin e veçantë dhe respektin për sakrificën sublime, për Kosovën shtet. Ngushëllime të sinqerta për familjen dhe miqtë!”, ka shkruar Haradinaj.

Arritën 17 mjetet e para të lehta të blinduara të quajtura “Stryker”, ndërsa deri në mes të verës pritet të arrijnë gjithsej 42, të cilat janë pjesë e furnizimit të mjeteve ushtarake nga Shtetet e Bashkuara të Amerikës. Bëhet fjalë për mjete që ofrojnë mobilitet të jashtëzakonshëm duke pasur parasysh se mund të transportojnë një njësi prej 11 ushtarësh dhe të zhvillojnë një shpejtësi maksimale deri në 100 kilometra në orë. Ministri i Mbrojtjes, VlLado Misajllovski, tha se furnizimi me “Stryker” është investimi më i madh dhe se vendi po bën gjithçka që është e nevojshme për të pasur një ushtri moderne me shumë pajisje.

“Ajo që kërkon NATO nga ne është të investojmë mbi 20% në modernizim, ne e bëjmë këtë edhe më shumë, mbi 32% e buxhetit tonë shkon drejtpërdrejt për modernizim. Pasojnë edhe shumë projekte të tjera, sepse në periudhën e kaluar, së bashku me miqtë tanë nga SHBA, kemi bërë disa marrëveshje Qeveri me Qeveri. Pjesa më e madhe kanë kaluar në Kuvend, ndërsa në periudhën në vijim presim armatime shtesë, pajisje shtesë, dronë, pajisje për njësitë speciale dhe shumë projekte të tjera”, tha Vllado Misajllovski – ministër i Mbrojtjes.

Nikoll Varns, zëvendësshefe e misionit të Ambasadës së SHBA-së në vend, tha se Maqedonia e Veriut si aleate e NATO-s po bën gjithçka për modernizimin e Ushtrisë.

“ Maqedonia e Veriut po bën një hap të vërtetë dhe të dukshëm përpara në modernizimin e forcave të saj të armatosura dhe forcimin e vendit të saj në aleancën e NATO-s. Këta “Stryker” janë më shumë se thjesht mjete të reja në inventarin tuaj, ata janë një shenjë konkrete e partneritetit tonë dhe një shprehje e qartë e përkushtimit tonë të përbashkët për të mbrojtur vendet tona, aleancën tonë dhe vlerat për të cilat angazhohemi”, dekalroi Nikoll Varns – zëvendësshefe e Misionit të Ambasadës së SHBA-së.

Përveç furnizimit me “Stryker”, paralelisht është në zhvillim edhe një projekt tjetër që realizohet me SHBA-të i quajtur “Klisa”, me të cilin do të restaurohen mjetet e vjetra dhe të dëmtuara që kanë qenë të ruajtura në depo. Deri tani janë siguruar pjesë rezervë dhe pajisje për të bërë funksionale edhe këto mjete.

Kisha Katolike nuk ka kundërshtime për përdorimin e kafshëve si burim organesh, indesh ose qelizave për transplantim te qeniet njerëzore dhe bën thirrje për të njëjtat standarde bioetike që zbatohen për të gjitha ndërhyrjet mjekësore.

Ndërsa procedurat mjekësore që përfshijnë kafshët përparojnë dhe bëhen më të përhapura, Vatikani prezantoi të martën, më 24 mars, një dokument të ri nga Akademia Papnore për Jetën që përshkruan konsideratat mjekësore dhe etike të këtyre procedurave.

“Teologjia katolike nuk ka përjashtime, mbi baza fetare apo rituale, në përdorimin e ndonjë kafshe si burim organesh, indesh apo qelizave për transplantim te qeniet njerëzore”, thuhet në dokument.

Vatikani shtoi se pyetjet etike në lidhje me ksentransplantimin, transplantimin e organeve, indeve ose qelizave nga një specie në tjetrën, nuk mund të përgjigjen pa reflektuar mbi personin njerëzor dhe kafshët që bëjnë transplantin.

Udhëzimet, të hartuara me kontributin e ekspertëve nga Austria, Italia, Holanda dhe Shtetet e Bashkuara, u nxitën nga zhvillimi i bioteknologjisë gjatë dekadave të fundit, duke i afruar risitë me qëndrueshmërinë klinike.

Ndërsa transplantimi i organeve përdoret gjithnjë e më shumë si trajtim mjekësor, numri i procedurave është i kufizuar nga mungesa e organeve, indeve dhe qelizave njerëzore, vuri në dukje Vatikani.

Hulumtimet kanë zbuluar se vëllimi i transplanteve të organeve përbën ndërmjet pesë dhe 10 për qind të kërkesës globale.

Ksenotransplantimi do të ofronte një furnizim të pakufizuar të organeve, indeve dhe qelizave për transplantim, duke lehtësuar mungesën “kronike” të donatorëve njerëzorë, thuhet në dokument.

Megjithatë, në përdorimin e kafshëve, Vatikani nënvizoi disa kushte: procedurat duhet të kryhen vetëm kur është e nevojshme dhe e arsyeshme, modifikimet gjenetike që mund të ndryshojnë biodiversitetin duhet të shmangen dhe vuajtjet e panevojshme të kafshëve duhet të parandalohen.

Ksenotransplantet duhet të minimizojnë çdo shans që gjenomi i marrësit të ndryshohet ose të ndikohet qëllimisht, thuhet në dokument.

“Për shembull, është me rëndësi të madhe të refuzohet ksentransplantimi i atyre qelizave të trurit që lidhen me njohjen nga kafshët në trurin e njerëzve nëse identiteti personal i pacientit nuk mund të mbrohet”, shkruajnë autorët.

Nga ana tjetër, trajtimet e qelizave në tru që synojnë korrigjimin e defekteve fiziologjike, të tilla si sëmundja e Parkinsonit, me injektim të qelizave mbiveshkore të derrit, nuk kanë gjasa të përbëjnë një kërcënim të tillë dhe mund të konsiderohen të justifikueshme nga ana etike nga Kisha Katolike.

Shtetet e Bashkuara kanë finalizuar rregulla të reja për Programin e Vizave të emigrantëve të Diversitetit, e njohur ndryshe si Lotaria Amerikane, duke futur kërkesa më të rrepta për verifikimin e identitetit për aplikantët.

Departamenti i Shtetit i SHBA-së publikoi rregulloren përfundimtare në Regjistrin Federal nën titullin “Vizat: Përmirësimi i Verifikimit dhe Luftimi i Mashtrimit në Programin e Vizave të emigrantëve të Diversitetit”.

Sipas njoftimit zyrtar ky rregull do të hyjë në fuqi më 10 prill 2026 dhe sipas rregullores së përditësuar, individët që hyjnë në programin e Lotarisë duhet të japin informacion më të detajuara.

Nis që me një pasaportë të vlefshme dhe e paskaduar si pjesë të formularit të tyre elektronik të regjistrimit.

Aplikantët gjithashtu do të duhet të ngarkojnë një skanim të faqes/faqeve biografike dhe të nënshkrimit të pasaportës kur dorëzojnë regjistrimin e tyre.

Zyrtarët thonë se ndryshimi është hartuar për të forcuar verifikimin e identitetit dhe për të zvogëluar hyrjet përmes mashtrimeve në program.

Çdo vit, deri në 55,000 viza emigrantësh vihen në dispozicion përmes një procesi të kompjuterizuar përzgjedhjeje të rastësishme.

Megjithatë, autoritetet thonë se programi është përballur prej kohësh me sfida që lidhen me regjistrime mashtruese, aplikime të dyfishta dhe dorëzime të bëra nga palë të treta pa dijeninë e individëve të përfshirë.

Sipas Departamentit të Shtetit, kërkesa për dokumentacion pasaporte do të ndihmojë në sigurimin që pjesëmarrjet në Lotari të jenë të lidhura me individë të vërtetë dhe do ta bëjë më të vështirë për agjentët ose ndërmjetësit të paraqesin aplikime të shumëfishta duke përdorur informacionin e personave të tjerë. Zyrtarët kanë vënë në dukje më parë se skemat e organizuara në disa vende kanë përfshirë paraqitjen e një numri të madh aplikimesh në emër të individëve të pasigurt.

Sipas rregullit përfundimtar, aplikantët që hyjnë në programin e Vizave të Diversitetit duhet të përfshijnë të dhënat e pasaportës dhe të ngarkojnë një skanim dixhital të faqeve biografike dhe të nënshkrimit të pasaportës kur plotësojnë formularin e regjistrimit online.

Informacioni i kërkuar përfshin:

Numri i pasaportës

Vendi ose autoriteti që ka lëshuar pasaportën

Data e skadimit të pasaportës

Një kopje e skanuar e faqes biografike dhe të nënshkrimit të pasaportës

Regjistrimet që nuk përfshijnë dokumentacionin e kërkuar të pasaportës mund të skualifikohen.

Rregullorja gjithashtu parashikon përjashtime të kufizuara. Individët që janë pa shtetësi, që nuk janë në gjendje të marrin pasaportë për shkak të kufizimeve qeveritare ose që marrin përjashtime specifike nga autoritetet amerikane mund të përjashtohen nga kërkesa për pasaportë.

Rregulli gjithashtu prezanton disa përditësime teknike në udhëzimet e programit. Midis tyre, Departamenti i Shtetit do ta zëvendësojë termin “gjini” me “seks” dhe do ta zëvendësojë “moshën” me “datën e lindjes” në mënyrë që të pasqyrojë më mirë informacionin e mbledhur në sistemet e aplikimit për vizë.

Zyrtarët thonë se këto ndryshime kanë për qëllim përmirësimin e qëndrueshmërisë dhe saktësisë në mbledhjen e të dhënave të vizave.

Sipas Departamentit të Shtetit, kërkesat e reja do të zbatohen duke filluar me Lotarinë DV e vitit 2027.

Departamenti ka shtyrë nisjen e periudhës së regjistrimit për DV-2027 dhe ende nuk ka njoftuar datat kur do të hapen regjistrimet. Ky pezullim u bë në muajin janar për 75 vende, përfshirë Shqipërinë dhe Kosovën.

Me rregulloren e fundit të finalizuar, aplikantët do të duhet të sigurohen që ta kenë gati pasaportën gjatë plotësimit të aplikimit, pasi procesi i verifikimit të pasaportës ka të ngjarë të bëhet një pjesë e rëndësishme e procesit të aplikimit për Lotarinë Amerikane. /Tch/

Anëtari i kryesisë se Lidhjes Demokratike të Kosovës, Visar Azemi i pyetur se a do të jetë presidentja Vjosa Osmani bartëse e listës zgjedhore të kësaj partie në rast zgjedhjesh të reja, ai tha se LDK-ja është e hapur për të gjithë.

Këtë deklaratë Azemi e dha sot gjatë një konference për media në selinë e LDK-së.

“Pra nuk ka asnjë diskutim deri më tash për atë pjesë. Lidhja Demokratike e Kosovës është e të gjithë qytetarëve, prandaj të gjithë ata që duan të jenë në Lidhjen Demokratike të Kosovës i kanë dyert e hapura”, tha Azemi.

Një aksident i rëndë ka ndodhur në Gjermani, ku si pasojë një 29 vjeçare nga Kosova dhe djali i saj trevjeçar kanë humbur jetën.

Lidhur me vdekjen e tyre kanë raportuar edhe mediat gjermane, ndërsa kombësinë e viktimave e kanë bërë të ditur për Klan Kosova burime të afërta me familjen.

Bazuar në këto burime, nëna dhe djali i saj ishin nga Gjakova.

Ndërsa sipas raportimeve të mediave gjermane, ata u goditën nga një kamion në trotuar, teksa 29-vjeçarja po e çonte në kopsht të birin.

Ministria për Evropën dhe Punët e Jashtme se po ndjek me vëmendje të plotë rastin e ndalimit të katër shtetasve shqiptarë nga autoritetet serbe për shkak se mbanin simbole shqiptare në makinë.

MEPJ tha se republika e Shqipërisë pret që çdo veprim i autoriteteve serbe të zhvillohet në përputhje të plotë me shtetin e së drejtës, duke respektuar të drejtat themelore dhe garancitë procedurale për çdo qytetar.

“Ministria për Evropën dhe Punët e Jashtme, përmes Ambasadës së Republikës së Shqipërisë në Beograd po ndjek me vëmendje të plotë rastin e ndalimit të katër shtetasve shqiptarë nga autoritetet serbe.

Menjëherë pas marrjes së informacionit, Ambasada u është drejtuar zyrtarisht institucioneve përkatëse në Serbi dhe ka kërkuar informacion të plotë mbi rrethanat e ndalimit, si dhe për të garantuar respektimin e të drejtave të shtetasve shqiptarë, në përputhje me legjislacionin vendas dhe standardet ndërkombëtare.

Ambasada është në komunikim të vazhdueshëm me autoritetet kompetente, po ofron të gjithë asistencën e nevojshme konsullore, duke përfshirë edhe kontaktet me familjarët e të ndaluarve dhe mundësimin e kontakteve të tyre me avokatë.

Republika e Shqipërisë pret që çdo veprim i autoriteteve serbe të zhvillohet në përputhje të plotë me shtetin e së drejtës, duke respektuar të drejtat themelore dhe garancitë procedurale për çdo qytetar.

Situata po ndiqet nga afër dhe çdo zhvillim i mëtejshëm do të trajtohet me seriozitetin maksimal”, thuhet në reagimin e MEPJ për Euronews Albania.

Publikuan video me simbolet e Shqipërisë së Madhe, katër shqiptarë arrestohen në Serbi

Më 26 mars, në fshatin Pemishtë (ish-Padalishtë) të komunës së Skënderajt, do të shënohet përvjetori i rënies së dëshmorëve të kombit: Ajet Beqiri, Mustafë Qorraj, Shukri Qorri dhe Isuf Sadiku, si edhe i martirëve të familjes Imeri. Me këtë rast, do të bëhet edhe zbulimi i bustit të heroit të kombit, Mustafë Qorraj.

Ceremonia përkujtimore dhe nderimet në respekt të të rënëve për lirinë e Kosovës do të fillojnë nga ora 11:00 në fshatin Pemishtë.

Kështu ka bërë të ditur përmes një njoftimi ish-luftëtari i lirisë, Hektor Beqiri, i cili theksoi se pjesëmarrja në këtë përvjetor përbën një nderim të madh për veprën dhe sakrificën e dëshmorëve dhe martirëve të kombit.

Prokuroria Themelore në Prishtinë ka ngritur aktakuzë ndaj tetë personave, të cilët dyshohen për disa vepra penale, përfshirë ato të korrupsionit.

Në njoftimin e kësaj prokurorie, dy të pandehurit F.G. dhe M.G akuzohen për veprën penale “Pranimi i Ryshfetit në Sektorin Privat”.

Kurse, të pandehurit S.B., R.M., dhe H.N. akuzohen për falsifikim të dokumentit, derisa tre të tjerë, B.H., S.B., dhe B.G., ngarkohen me veprat penale “Keqpërdorimi i pozitës apo autoritetit zyrtar” dhe “Rastet e posaçme të falsifikimit të dokumentit”.

Në njoftim thuhet se i pandehuri F.G., në cilësinë e menaxherit në Poligonin “R….’’, me dashje dhe dijeni të plotë ka keqpërdorur detyrën e tij zyrtare duke pranuar përfitime të kundërligjshme.

“Gjatë zbatimit të masave të veçanta hetimore, i pandehuri në kundërshtim me detyrën e tij zyrtare ai ka pranuar shumën prej 600 euro, me qëllim që një kandidati t’i sigurojë çertifikatë për aftësim në përdorimin e armëve të zjarrit, pa iu nënshtruar trajnimit dhe provimit teorik dhe praktik. Ndërsa i pandehuri M.G., me dashje dhe dijeni të plotë në vazhdimësi ka ndihmuar në kryerjen e kësaj vepre penale, duke i mundësuar të pandehurit F.G., përfitimin e kundërligjshëm”, thuhet në njoftim.

Ndërkaq, sipas njoftimit, të pandehurit S.B., R.M., H.N., në cilësinë e instruktoreve/ ligjëruesve në Poligonin “D….”, në Prizren, me dashje dhe me qëllim të përfitimit të kundërligjshëm, kanë shënuar të dhëna të rreme në dokumente zyrtare, duke nënshkruar çertifikata për aftësimin në përdorimin e armëve të zjarrit, për persona që nuk i janë nënshtruar trajnimit teorik dhe praktik.

Kurse, e pandehura B.G., në cilësinë e administratores në Poligonin “D…..”, në mënyrë të kundërligjshme ka plotësuar “Kërkesën për provim profesional për armë” me të dhënat personale të kandidatit dhe më pas ka nënshkruar në emër të tij në dokumentin përkatës, pa qenë fare i pranishëm kandidati.