Katër tifozë shqiptarë, u arrestuan të marten në territorin e Serbisë nën dyshimet se kishin shpalosur bluza me motive kombëtare.
Ata akuzohen për nxitjen e urrejtjes dhe intolerancës kombëtare, racore dhe fetare.
Tifozët e arrestuar pritet që nesër të dalin para Gjykatës.
Lajmin e dha deputeti i Partisë Socialiste, Taulant Balla.
“Kam ndjekur dhe jam informuar nga Ambasada jonë në Beograd mbi katër djemtë tanë të ndaluar atje dhe procesin gjyqësor nesër. Më shumë informacion nesër”, tha Balla.
Duke u fokusuar tek negociatat për të vënë një fund të mundshëm të konfliktit, zëdhënësja e Shtëpisë së Bardhë, Karoline Leavitt nuk ka lënë vend për dyshime.
Ajo thekson se Donald Trump dëshiron paqe, por paralajmëron se nëse Irani refuzon të pranojë se është mundur, presidenti amerikan nuk do të ngurrojë të përdorë të gjithë fuqinë e tij.
“Presidenti Trump nuk bën kurrë blof. Ai është i përgatitur të shpërndajë ferrin”, tha Leavitt.
“ Irani nuk duhet të bëjë sërish gabime. Pas gabimit të tyre të fundit, ata humbën udhëheqjen e lartë, marinën, forcën ajrore dhe sistemin e mbrojtjes ajrore. Ky është një paralajmërim i qartë se çdo veprim i mëtejshëm agresiv do të ketë pasoja të rënda”, shtoi ajo.
Leavitt gjithashtu nënvizoi se çdo dhunë shtesë do të jetë rezultat i refuzimit të regjimit iranian për të kuptuar seriozitetin e situatës “çdo veprim i tyre që tejkalon kufijtë aktualë nuk do të jetë rastësi. Ai do të jetë pasojë e mospranimit të realitetit dhe e vendosmërisë sonë për të mbrojtur interesat dhe sigurinë globale”.
Mes paralajmërimeve të forta, Leavitt përsëriti mesazhin kryesor – Trump është i vendosur për paqe, por për ata që nuk respektojnë rregullat, pasojat mund të jenë më të rënda se kurrë më parë.
Irani ka reaguar ndaj planit me 15 pika të propozuar nga presidenti amerikan, Donald Trump, duke e cilësuar atë si “të tepruar”.
Zyrtarët iranianë theksuan se vendi i tyre do të vendosë vetë se kur dhe si do të përfundojë lufta, duke mos pranuar që SHBA të diktojë kohën e armëpushimit, shkruan skynews.
Sipas autoriteteve iraniane, për të përfunduar konfliktin, vendi ka vendosur pesë kushte kryesore:
Ndërprerja e agresionit dhe vrasjeve të synuara;
Vendosja e mekanizmave konkretë që garantojnë se Irani nuk do të sulmohet më;
Kompensimi i dëmeve të luftës dhe pagesa e reparacioneve;
Përfundimi i luftimeve në të gjitha frontet dhe për të gjitha grupet e përfshira në rajon;
Njohja ndërkombëtare dhe garanci për autoritetin e Iranit mbi Ngushtica e Hormuzit.
Ndërkohë, Trump ka deklaruar se SHBA janë në negociata me Iranin për një armëpushim, duke pretenduar se po komunikojnë me “njerëzit e duhur” dhe se pala iraniane është e interesuar për një marrëveshje.
Gjatë ditës së nesërme në Gjykatën Themelore të Prishtinës pritet të vazhdojë seanca gjyqësore ndaj Naim Murselit, Kushtrim Kokallës dhe Granit Plavës të akuzuar për vrasjen e Liridona Ademajt.
Në seancën e fundit Naim Murseli kishte kërkuar të komunikojë me djalin e tij, e po ashtu edhe me Behgjet Pacollin.
Kryetarja e trupit gjykues, Fatime Dermaku, tha se kërkesa për komunikim me Pacollin i refuzohet ngase është kategori e personave që nuk e lejon ligji.
“Keni parashtru kërkesë me komuniku me djalin. Kam kontaktu me autoritetet suedeze, jam në pritje të përgjigjes së tyre. Ndërsa, për kërkesën që e ke ba me komuniku me Behgjet Pacollin, me numër të telefonit të Zvicrës dhe me dhëndrin e juaj- ajo është kërkesë që nuk lejohet, sepse këtë kategori të personave nuk e lejon ligji”, ishte shprehur Dermaku.
Ndërkaq, sa i përket kërkesës për komunikim me fëmijët, tha se po presin përgjigje nga autoritetet suedeze.
Seanca e nesërme nis nga ora 09:30.
Deputeti i Partisë Demokratike të Kosovës (PDK), Përparim Gruda ka komentuar vendimin e Gjykatës Kushtetuese për çështjen e presidentit.
Gruda ka thënë se aktgjykimi i Gjykatës Kushtetuese ka përcaktuar qartë tri çështje kryesore.
“Afati 30-ditor për zgjedhjen e Presidentit para përfundimit të mandatit të Presidentit aktual është obligues dhe detyrues”, ka shkruar Gruda duke shtuar se ky afat ka qenë gjithmonë pikë kyçe e diskutimeve.
Së dyti përcaktohet se në rast të shkeljes së afatit 30-ditor, Kuvendi shpërndahet automatikisht ex constitutione, pa pasur nevojë për ndonjë dekret presidencial.
“Gjykata ka parashikuar një afat shtesë prej 34 ditësh për rastin specifik që Kuvendi u konstituua më 11 shkurt dhe nuk kishte në dispozicion 60 ditë të plota për procedurën e zgjedhjes së Presidentit”, u shpreh Gruda në Debat plus.
Deputeti i PDK-së nënvizon se afati 30-ditor nuk është zhvleftësuar, por është marrë parasysh në kuadër të një situate të veçantë, duke reflektuar vonesën në konstituimin e Kuvendit.
Kryetari i LDK-së, Lumir Abdixhiku, duke komentuar aktgjykimin e Gjykatës Kushtetuese, tha se partia e tij “e respekton plotësisht këtë vendim dhe e konsideron atë udhërrëfyes për veprimet e mëtejshme politike”.
Ai thotë se për zgjedhjen e presidentit “përgjegjësia kryesore mbetet te shumica parlamentare”.
Në të njëjtën kohë, Abdixhiku deklaron se “LDK konsideron se veprimet e Presidentes së Republikës, përfshirë dekretin e saj, kanë qenë në funksion të ruajtjes së rendit kushtetues dhe të shmangies së një vakumi institucional, në një situatë të paqartë juridike. Aktgjykimi i Gjykatës Kushtetuese përveç se nuk konstaton ndonjë shkelje kushtetuese, ofron interpretimin përfundimtar rreth kësaj çështjeje, interpretim i cili duhet të respektohet nga të gjithë”.
Abdixhiku thekson se “LDK mbetet e gatshme të kontribuojë në çdo përpjekje serioze për zgjidhje, që garanton stabilitet dhe funksionim normal të institucioneve”.
Postimi i tij i plotë:
Të nderuar qytetarë,
Vendimi i Gjykatës Kushtetuese ka sjellë qartësi të nevojshme në një moment të rëndësishëm institucional për vendin. Lidhja Demokratike e Kosovës e respekton plotësisht këtë vendim dhe e konsideron atë udhërrëfyes për veprimet e mëtejshme politike.
Ky vendim nuk krijon epërsi për askënd. Ai e rikthen procesin në Kuvendin e Republikës dhe u jep deputetëve edhe një afat për të përmbushur detyrimin për zgjedhjen e Presidentit.
Në këtë fazë, siç kemi theksuar vazhdimisht, përgjegjësia kryesore mbetet te shumica parlamentare. Ajo ka pasur kohën dhe mundësinë për ta përmbyllur këtë proces dhe është detyrë e saj të ofrojë zgjidhje. Siç tashmë është e qartë, pa votat e shumicës, ky proces nuk mund të përmbyllet.
Lidhja Demokratike e Kosovës beson se çështje të tilla nuk zgjidhen me imponim, por me marrëveshje politike ndërmjet forcave përfaqësuese. Presidenti i Republikës duhet të jetë figurë bashkuese, që reflekton unitet, garanton balancë institucionale dhe nuk është zgjatim i shumicës.
Në këtë frymë, LDK mbetet e gatshme të kontribuojë në çdo përpjekje serioze për zgjidhje, që garanton stabilitet dhe funksionim normal të institucioneve. Por, njëkohësisht, nuk do të bëhet alibi e dështimeve të askujt.
Në të njëjtën kohë, LDK konsideron se veprimet e Presidentes së Republikës, përfshirë dekretin e saj, kanë qenë në funksion të ruajtjes së rendit kushtetues dhe të shmangies së një vakumi institucional, në një situatë të paqartë juridike. Aktgjykimi i Gjykatës Kushtetuese përveç se nuk konstaton ndonjë shkelje kushtetuese, ofron interpretimin përfundimtar rreth kësaj çështjeje, interpretim i cili duhet të respektohet nga të gjithë.
Republika ka rregullat e saj. Dhe ato kërkojnë përgjegjësi, maturi dhe vendimmarrje në përputhje me interesin e përgjithshëm.
Në rast të mungesës së një marrëveshjeje politike për 34 ditët e ardhshme, Lidhja Demokratike e Kosovës do të hyjë e bashkuar dhe e përgatitur në çdo proces të ri zgjedhor, me besimin për të ofruar zgjidhje të reja për vendin.
Presidenca e Kosovës ka reaguar në lidhje me aktgjykimin e Gjykatës Kushtetuese.
Në reagim thuhet se aktgykimi i konfirmon argumentet juridike të dorëzuara nga Presidenca në Gjykatën Kushtetuese rreth këtij rasti, si dhe konfirmon se Presidentja Osmani nuk ka bërë asnjë shkelje kushtetuese.
Reagimi vazhdon duke thënë se Gjykata, në asnjë paragraf të aktgjykimit të saj, nuk ka konstatuar shkelje të Kushtetutës nga ana e Presidentes.
Reagimi i plotë:
Presidentja e Republikës së Kosovës e mirëpret aktgjykimin e Gjykatës Kushtetuese në rastet nr. KO 72/26 dhe KO 74/26, i cili i konfirmon argumentet juridike të dorëzuara nga Presidenca në Gjykatën Kushtetuese rreth këtij rasti, si dhe konfirmon se Presidentja Osmani nuk ka bërë asnjë shkelje kushtetuese.
Në përputhje me komentet e dërguara nga Presidenca, edhe vetë Gjykata Kushtetuese e konfirmon në paragrafët 153, 155 dhe 190 se afati 60-ditor duhet të konsumohet para afatit 30-ditor të paraparë në nenin 86.2 të Kushtetutës, dhe se ky afat 30-ditor para përfundimit të mandatit të Presidentit aktual është përfundimtar dhe detyrues, si dhe nuk mund të relativizohet.
Gjykata, në asnjë paragraf të aktgjykimit të saj, nuk ka konstatuar shkelje të Kushtetutës nga ana e Presidentes. Përkundrazi, ka konfirmuar se nuk është dekreti ai që e çon vendin në zgjedhje të reja, por është dështimi i Kuvendit për zgjedhjen e Presidentit të ri ai që i shkakton këtë proces të zgjedhjeve.
Presidenca ka shprehur të njëjtin qëndrim në komentet e dërguara në Gjykatën Kushtetuese, duke potencuar se dekreti është thjesht formalizim i një situate ekzistuese dhe se nuk është dekreti, por është vetë dështimi i Kuvendit për zgjedhjen e Presidentit që e çon vendin në zgjedhje.
Rrjedhimisht, duke qenë se rrethana e moskonstituimit të Kuvendit me kohë nuk ka qenë e paraparë me Kushtetutën e Republikës së Kosovës, Gjykata ka interpretuar një rrethanë përjashtuese që vlen për këtë rast specifik, duke sqaruar se “në të gjitha rastet e zgjedhjes së Presidentit në të ardhmen, përkatësisht procedura për zgjedhjen e Presidentit të ri, e cila nuk mund të zgjasë më shumë se 60 ditë, duhet të fillojë përpara dhe të përfundojë jo më vonë se 30 ditë para përfundimit të mandatit të Presidentit aktual.” (paragrafi 191 i Aktgjykimit)
Presidentja e mirëpret afatin 34-ditor të dhënë deputetëve të Kuvendit të Kosovës nga ana e gjykatës dhe u bën atyre thirrje që urgjentisht ta kryejnë këtë detyrim kushtetues.
Dhënia e këtij afati shtesë nga ana e gjykatës kushtetuese asesi nuk ka qenë në kompetencën e Presidentes së Republikës. Por është pikërisht dekreti i Presidentes që e ka hapur rrugën për këtë sqarim të rëndësishëm nga ana e gjykatës si autoritet i vetëm dhe përfundimtar për të interpretuar Kushtetutën.
Deklaratat politike për kinse shkelje kushtetuese tregojnë edhe keqlexim të aktgjykimit, por edhe politizim të skajshëm të një situate tashmë të qartësuar nga Gjykata Kushtetuese: që dështimi për zgjedhjen e Presidentit të vendit është i deputetëve dhe si pasojë e mungesës së vullnetit politik për të arritur konsensus rreth zgjedhjes së Presidentit.
Në vend të deklarimeve të tilla të paqëndrueshme, ftojmë Kuvendin e Kosovës që qysh nesër ta caktojë datën e seancës së re për zgjedhjen e Presidentit të ri dhe ta kryejnë detyrimin për të cilin janë zgjedhur, duke i dhënë vendit stabilitet dhe siguri.
Eugen Cakolli ga KDI, ka thënë se aktgjykimi i Gjykatës Kushtetuese, ka thënë se arsyeja pse aktgjykimi dekretin e Vjosa Osmanit nuk e cilësoi si antikushtetues, por vetëm si vendim pa efekt juridik, sipas tij lidhet drejtpërdrejt me logjikën e afateve.
Ai tha se Gjykata në thelb e pranon që afati 30-ditor është detyrues dhe që mosrespektimi i tij ka pasoja. Por ajo sqaron se kjo pasojë nuk aktivizohet drejtpërdrejt përmes këtij afati, por përmes nenit 82, pra përmes afatit 60-ditor dhe shpërndarjes ‘ex constitutione.
Tutje, ai tha se gjykata e mbyll përfundimisht “dilemën” mes 30 dhe 60 ditëve, duke shtuar se ato nuk janë dy afate që përdoren veçmas, por një mekanizëm i vetëm.
Po ashtu tha se Gjykata nuk e mohon logjikën që e përdori Presidentja, e korigjoi si e zbatoi.
Postimi i plotë në Facebook:
Aktgjykimi i sotëm i Gjykatës Kushtetuese rikonfirmoi disa parime për afatet kushtetuese, sidomos në raport me zgjedhjen e Presidentit. Jo pse ato nuk ishin të kuptueshme si të tilla edhe më herët, por sepse, edhe një herë tjetër, u tentua që dispozitat kushtetuese të keqpërdoren për arsyetime politike.
Së pari, çështja e dekretit. Besoj që arsyeja pse Gjykata nuk e cilësoi si akt antikushtetues, por vetëm si vendim pa efekt juridik, lidhet drejtpërdrejt me logjikën e afateve. Gjykata në thelb e pranon që afati 30-ditor është detyrues dhe që mosrespektimi i tij ka pasoja. Por ajo sqaron se kjo pasojë nuk aktivizohet drejtpërdrejt përmes këtij afati, por përmes nenit 82, pra përmes afatit 60-ditor dhe shpërndarjes ‘ex constitutione’. Pra, nuk kemi mohim të logjikës që përdori Presidentja Osmani, por korrigjim të mënyrës se si ajo është zbatuar.
Së dyti, dhe kjo është pika kryesore, Gjykata e mbyll përfundimisht “dilemën” mes 30 dhe 60 ditëve. Ato nuk janë dy afate që përdoren veçmas, por një mekanizëm i vetëm. Afati 60-ditor zhvillohet në funksion të afatit 30-ditor. Kjo nënkupton që procedura duhet të fillojë shumë më herët. Nuk mund të pritet dita e fundit e afatit 30-ditor, të thuhet se është nisur procedura dhe pastaj të kërkohen edhe 60 ditë të tjera. Thënë thjeshtë, totali është 60 ditë, ku 30 ditët e fundit janë zonë e mbyllur që nuk mund të tejkalohet.
Së treti, Gjykata vendos një standard të qartë. Koha kushtetuese nuk fillon kur Kuvendi vendos të veprojë, por kur ai është në gjendje të veprojë. Prandaj edhe në këtë rast nuk ka 60 ditë të reja, por vetëm kohë të mbetur nga një afat që ka filluar më herët, i cili ishte i kufizuar nga fakti që nuk kishte Kuvend të konstituar në një periudhë që do të mundësonte shfrytëzim të plotë të afatit kushtetues.
Në fund, ky është një vendim që njëkohësisht e balancon situatën dhe blen kohë për institucionet që ta përmbyllin procesin. Për më tepër, përgjegjësia mbetet te institucionet dhe partitë parlamentare që t’i zhvillojnë proceset kushtetuese në kohë, e jo t’i përshtatin ato sipas rrethanave politike.
Deputeti Nezir Kraki, duke komentuar aktgjykimin e Gjykatës Kushtetuese thotë se analiza e tij u konfirmua 100% duke iu rikthyer Kuvendit “34 ditët e munguara”.
Kraki duke komentuar anlizën e tij shprehet “më falni për mungesën e modestisë në këtë rast se nuk u durova”.
Ai i fton miqt e tij ta shikojnë videon e tij “me vëmendje”.
Video KËTU
Sekretarja e Përgjithshme e Partisë Demokratike të Kosovës, Vlora Çitaku, ka deklaruar se PDK-ja e respekton vendimin e sotëm të Gjykatës Kushtetuese.
“Ne e respektojmë vendimin e Gjykatës Kushtetuese si institucion kyç i rendit demokratik, ashtu siç kemi vepruar gjithmonë”, ka thënë shkurtimisht Çitaku, duke treguar se PDK-ja do t’i mbledhë nesër organet e saj drejtuese për të diskutuar për zhvillimet e reja dhe hapat e ardhshëm.
Partia Demokratike e Kosovës, pas vendimit të Gjykatës Kushtetuese, ka thirrur menjëherë për nesër në orën 14:00, mbledhje të përbashkët të Kryesisë dhe të Grupit Parlamentar.