Category: Lajme

Policia ka arrestuar një person në Fushë Kosovë, i dyshuar për një seri vjedhjesh që kanë prekur disa biznese dhe kanë shkaktuar dëme të konsiderueshme financiare.

Sipas të dhënave fillestare, i arrestuari është A.H., 29 vjeç, i cili dyshohet se lidhet me dhjetë raste të raportuara.

Sipas hetimeve, ngjarja e parë është raportuar më 24 janar në rrugën “Meshari”, ku është depërtuar me forcë në një biznes dhe janë marrë kabllo e materiale të tjera.

Më tej, hetuesit kanë identifikuar edhe nëntë raste të tjera, prej tyre shtatë vjedhje të rënda.

Pas analizimit të provave dhe incizimeve të kamerave të sigurisë, Policia ka arritur ta lokalizojë dhe arrestojë të dyshuarin.

Pas intervistimit në prani të avokatit, raportohet se ai ka pranuar veprat, ndërsa me vendim të prokurorit është ndaluar për 48 orë.

Janë larguar nga sheshi kryesor i Prishtinës tabelat që përmbanin informacione të pasakta mbi masakrat që ndodhën në Kosovë gjatë luftës.

Komuna e Prishtinës, një ditë pas pezullimit të lejes për ekspozitën, ka ndërmarrë veprimin për të hequr tabelat në mëngjes, duke ndjekur reagimet publike dhe vlerësimin për pasaktësitë që ishin evidentuar.

Ekspozita, me autor Shkëlzen Gashi, kishte nxitur reagime të shumta pasi u identifikuan gabime të konsiderueshme në përmbajtjen e saj.

Shtetet e Bashkuara presin që ta përmbyllin operacionin e tyre ushtarak në Iran “brenda javësh, jo muajsh”, tha sekretari amerikan i Shtetit, Marco Rubio, pasi u takua me ministrat e Jashtëm të Grupit të Shtatë shteteve më të industrializuara (G7) në Francë në kohën kur lufta SHBA-Izrael kundër Iranit po i afrohet javës së pestë.

Duke folur para se të nisej drejt SHBA-së më 27 mars, Rubio po ashtu tha se Uashingtoni mund t’i arrijë qëllimet e tij në Iran pa trupa tokësore dhe se Irani mund të synojë të vendosë një sistem pagese për kalimin përmes Ngushticës së Hormuzit.

“Jemi para afatit të planifikuar… presim që ta përmbyllim… është çështje javësh, jo muajsh”, tha ai për fushatën ushtarake.

“Ne do ta shkatërrojmë marinën e tyre… forcën ajrore… aftësinë e tyre për të prodhuar raketa dhe dronë… dhe do t’i zvogëlojmë ndjeshëm lëshuesit e raketave”, tha Rubio, duke shtuar: “Ne mund t’i arrijmë të gjitha objektivat tona pa asnjë ushtar në terren… ky nuk do të jetë një konflikt i zgjatur”.

Duke iu referuar trupave amerikane të dislokuara në rajon, ai tha se dislokimet kanë për qëllim “t’i japin presidentit fleksibilitet maksimal dhe mundësi maksimale për të përshtatur skenarët e mundshëm, nëse ato shfaqen”.

Komentet e Rubios vijnë në kohën kur Irani paralajmëroi për sulme të reja në të gjithë Lindjen e Mesme dhe u bëri thirrje civilëve të shmangin zonat pranë forcave amerikane, një ditë pasi presidenti amerikan, Donald Trump, zgjati afatin për Teheranin për të hapur Ngushticën e Hormuzit, një rrugë kyç për transportin e naftës dhe gazit nga Gjiri Persik drejt tregjeve globale, deri më 6 prill.

Në një deklaratë, ministrat e Jashtëm të G7-ës dhe përfaqësuesja e lartë Bashkimit Evropian kërkuan ndalimin e menjëhershëm të sulmeve ndaj infrastrukturës civile në luftën SHBA-Izrael kundër Iranit.

“Nuk mund të ketë asnjë justifikim për shënjestrimin e qëllimshëm të civilëve në situata të konfliktit të armatosur, si dhe për sulmet ndaj objekteve diplomatike”, thanë ministrat.

G7 përbëhet nga Shtetet e Bashkuara, Britania, Kanadaja, Franca, Gjermania, Italia dhe Japonia.

Irani nuk bëri asnjë lëvizje për të hapur Ngushticën e Hormuzit. Në një deklaratë më 27 mars, Garda Revolucionare Islamike tha se do ta mbajnë të mbyllur këtë rrugë ujore dhe se çdo përpjekje e mundshme për kalim që përfshin Shtetet e Bashkuara, Izraelin apo aleatët e tyre do të përballet me “masa të ashpra”.

Pas paralajmërimit të Gardës, mediat raportuan se më 27 mars tre anije të shteteve të ndryshme u kthyen mbrapsht nga Ngushtica e Hormuzit.

Ngushtica e Hormuzit përbën rreth një të pestën e dërgesave globale të naftës dhe mbyllja efektive e saj nga forcat iraniane është kthyer në çështjen qendrore të konfliktit, që nisi me sulmet e SHBA-së dhe Izraelit kundër Iranit më 28 shkurt.

Rubio tha se Irani mund të vendosë një sistem tarife për kalimin në këtë ngushticë, duke e quajtur këtë “të papranueshme” dhe duke theksuar se vendet evropiane dhe aziatike që përfitojnë nga tregtia përmes kësaj rruge ujore duhet të ndihmojnë për të siguruar kalimin e lirë pasi të përfundojë konflikti.

“Ne nuk po i kërkojmë askujt t’i bashkohet luftës”, tha Rubio, duke shtuar se “vendet që preken më së shumti [nga mbyllja e ngushticës]… duhet të jenë të gatshme të bëjnë diçka për këtë”.

Një ditë më herët, Trump për herë të dytë shtyu afatin për hapjen e Hormuzit, teksa ka paralajmëruar se do të kryejë sulme ndaj centraleve energjetike iraniane nëse Teherani nuk e hap këtë rrugë ujore. Ai vendosi që afati i ri për Teheranin të jetë deri më 6 prill.

Fundjavën e kaluar, Trump tha se Shtetet e Bashkuara do t’i “shkatërrojnë plotësisht” centralet energjetike të Iranit nëse Teherani vazhdon të bllokojë Ngushticën e Hormuzit pas 48 orësh. Ai më pas e zgjati afatin deri më 27 mars.

Më 26 mars, Trump deklaroi se bisedimet me Iranin “janë duke vazhduar” dhe “po shkojnë shumë mirë”.

Zyrtarë të lartë iranianë kanë mohuar se Teherani është në negociata me Uashingtonin, por Irani tha më 25 mars se po e shqyrton një propozim amerikan me 15 pika dhe paraqiti pesë kushte, që sipas tij, duhet plotësuar për të përfunduar konflikti.

Plani amerikan, sipas raportimeve, përsërit kërkesat e Uashingtonit që Irani të çmontojë objektet e tij bërthamore, të kufizojë kapacitetet e tij raketore dhe të ndalë mbështetjen për forcat aleate në rajon.

Rubio tha më 27 mars se SHBA-ja ende nuk ka marrë ndonjë përgjigje nga Irani dhe sugjeroi se kontaktet ishin të tërthorta.

“Kemi pasur një shkëmbim mesazhesh dhe sinjale nga sistemi iranian, çfarëdo që ka mbetur prej tij, për një gatishmëri për të biseduar për disa çështje”, u shpreh ai. “Po presim sqarime të mëtejshme për… me kë do të bisedojmë, për çfarë do të bisedojmë dhe kur do të bisedojmë”.

Jozyrtarisht, Teherani i është përgjigjur ashpër planit me 15 pika të Uashingtonit, duke thënë se kushtet e SHBA-së janë të tepruara dhe se do t’i japë fund luftës kur të vendosë vetë dhe nëse plotësohen kushtet e tij, duke këmbëngulur se ka të drejtë të zhvillojë programin e tij të raketave balistike. /Radio Evropa e Lirë

Dogana e Kosovës ka zbuluar dhe sekuestruar një sasi të konsiderueshme të etanolit (alkool i koncentruar 96%) në rajonin e Prizrenit, në dy operacione të ndara, duke parandaluar një shmangie nga taksat doganore dhe akciza në vlerë rreth 6,260 euro.

Sipas njoftimit zyrtar të Doganës, gjatë kontrollit në terren, njësitet antikontrabandë ndaluan një automjet transportues ku u gjetën 500 litra etanol pa dokumentacion përkatës. “Personat e përfshirë nuk kanë poseduar dokumentacion që dëshmon origjinën e rregullt të mallit, importin legal apo pagesën e taksave doganore,” thuhet në njoftim.

Pas ndalimit të automjetit, u kryen kontrolle shtesë në lokacione të dyshuara, duke çuar në zbardhjen e një sasi tjetër prej 500 litrash etanol të fshehur në garazhin e një shtëpie në të njëjtin rajon. Sasia totale e sekuestruar arrin 1,000 litra etanol, e cila dyshohet se ka origjinë nga Serbia dhe nuk shoqërohej me asnjë dokumentacion ligjor.

Dogana thekson se kjo sasi përfaqëson shmangie nga pagesa e akcizës, taksave doganore dhe TVSH-së, duke shkaktuar dëm të drejtpërdrejtë në buxhetin e Republikës së Kosovës dhe krijuar konkurrencë të padrejtë në treg.

“Rasti është duke u trajtuar në procedurë të rregullt hetimore në koordinim me institucionet kompetente dhe do të ndërmerren të gjitha veprimet ligjore ndaj personave të përfshirë, në përputhje me legjislacionin në fuqi,” thuhet në njoftim.

Ushtria izraelite ka njoftuar se në dy ditët e fundit në jug të Libanit janë plagosur nëntë ushtarë.

Forcat e Mbrojtjes së Izraelit thanë se një oficer u plagos rëndë, ndërsa një tjetër u plagos pas sulmit me raketë anti-tank dje.

Gjatë natës, u raportua se një tjetër oficer u plagos rëndë dhe gjashtë ushtarë të tjerë u plagosën pas sulmeve me raketa.

Ushtarët janë evakuuar në spital dhe familjet e tyre janë njoftuar.

I mbijetuari i masakrës së Dubravës dhe deputeti i PDK-së, Nait Hasani, ka reaguar ashpër ndaj ekspozitës së vendosur në sheshin e Prishtinës për masakrat e ndodhura në Kosovës, ekspozitë e organizuar nga Shkëlzen Gashi dhe organizatat Admovere dhe Integra.

Hasani ka thënë se “për këtë krim të qëllimshëm nga autori i këtij shkrimi e ekspozite, kërkoj nga institucionet e drejtësisë gjykim e dënim për këtë krim monstruoz”.

“24 vjet kujtesë e dhembje nga ai krim që u bë mbi të burgosurit shqiptar në këtë burg nga gardianet, nga serbët e burgosur, nga policët serbë, nga ushtarët serbë, pra nga institucionet e shtetit të Serbisë. Dhe po sot në sheshin e Prishtinës ekspozita për krimet e luftës dhe fotoja masakra në burgun e Dubravës me tmerron me këto mashtrime, gënjeshtra dhe të pavërteta për këtë krim e gjenocid të shtetit të Serbisë kundër të burgosurve shqiptarë. Aty nuk tregohet e vërteta, aty tregohen rrenat e mashtrimet serbe dhe të agjenteve të Serbisë.

Reagimi i plotë:

Sot u bënë 24 vjet nga dalja nga burgu i kazamatave serbe dhe burgu i Dubravës.

24 vjet kujtesë e dhembje nga ai krim që u bë mbi të burgosurit shqiptar në këtë burg nga gardianet, nga serbët e burgosur, nga policët serbë, nga ushtarët serbë, pra nga institucionet e shtetit të Serbisë. Dhe po sot në sheshin e Prishtinës ekspozita për krimet e luftës dhe fotoja masakra në burgun e Dubravës me tmerron me këto mashtrime, gënjeshtra dhe të pavërteta për këtë krim e gjenocid të shtetit të Serbisë kundër të burgosurve shqiptarë. Aty nuk tregohet e vërteta, aty tregohen rrenat e mashtrimet serbe dhe të agjenteve të Serbisë.

Aty nuk ka pasur të burgosur të armatosur, aty nuk ka pasur civilë shqiptarë, aty ka pasur të burgosur shqiptar dhe si shqiptarë janë vrarë 118 të burgosur dhe janë plagosur mbi 400 të tjerë.

Aty janë vrarë pleq mbi 60 vjeç dhe fëmijë nën 18 vjeç nga shteti serb.

Dhe kjo ekspozite e financuar nga Kuvendi i Kosovës me këso të pavërteta e mashtrime, ku në këtë Kuvend të Kosovës kemi mbajtur fjalime e nxjerrë rezolutë për Masakrën në Burgun e Dubravës, e të lejohet e financohet në emër të Kuvendit kjo ekspozitë është krim duke vrarë bashkë me autorin dhe njëherë të burgosurit e burgut të Dubravës dhe shkelur gjakun e të vrarëve në këtë burg nga institucionet e shtetit të Serbisë.

Për këtë krim të qëllimshëm nga autori i këtij shkrimi e ekspozite, kërkoj nga institucionet e drejtësisë gjykim e dënim për këtë krim monstruoz.

Raporti 24-orësh i Policia e Kosovës tregon për një numër të konsiderueshëm aksidentesh dhe shkeljesh në komunikacion gjatë ditës së fundit.

Sipas të dhënave zyrtare, janë regjistruar gjithsej 60 aksidente trafiku, prej të cilave 27 me persona të lënduar dhe 33 vetëm me dëme materiale, ndërsa fatmirësisht nuk është raportuar asnjë aksident me fatalitet.

Gjatë së njëjtës periudhë, policia ka shqiptuar 2132 tiketa trafiku për shkelje të rregullave në komunikacion, duke reflektuar një nivel të lartë të kundërvajtjeve nga drejtuesit e automjeteve.

Po ashtu, janë arrestuar 16 persona, ndërsa 11 prej tyre janë dërguar në mbajtje. Nuk është raportuar asnjë rast i ndalimit policor, ndërsa 3 persona janë evidentuar në vuajtje të dënimit.

Autoritetet vazhdojnë të bëjnë thirrje për respektim të rregullave të trafikut, me qëllim të rritjes së sigurisë në rrugë dhe parandalimit të aksidenteve.

Teherani u sulmua rëndë gjatë natës, synoheshin objektiva ushtarake dhe universitete.

Sipas raportimeve të mediave, kryeqyteti iranian, Teheran, u përball me bombardime intensive gjatë natës.

Informacionet paraprake tregojnë se ndër objektivat e sulmeve ishin kazermat ushtarake, objektet e shërbimeve detare dhe “Iran University of Science and Technology”, një nga institucionet më të njohura arsimore të vendit.

Deri më tani nuk ka raportime të detajuara mbi dëmet materiale ose viktimat, por autoritetet lokale janë në gatishmëri për të kontrolluar situatën dhe për të evakuuar zonat e prekura.

Ky sulm vjen ndërsa tensionet në rajon po thellohen dhe është pjesë e një serie incidentesh që kanë prekur qytete të ndryshme iraniane gjatë javëve të fundit.

Analistët e sigurisë paralajmërojnë se goditjet ndaj infrastrukturës ushtarake dhe akademike mund të kenë pasoja serioze për stabilitetin në rajon, duke rritur frikën për një përshkallëzim më të gjerë të konfliktit. /Telegrafi/

Një person është arrestuar në Podujevë nën dyshimin për dhunë në familje.

Sipas njoftimit të Policia e Kosovës, rasti ka ndodhur të premten rreth orës 14:00, ku i dyshuari, mashkull kosovar, dyshohet se ka ushtruar dhunë fizike ndaj motrës së tij.

Policia njoftoi se viktima ka pranuar trajtim mjekësor, ndërsa i dyshuari, pas intervistimit, me vendim të prokurorit është dërguar në mbajtje.

Senatorët amerikanë Jeanne Shaheen, anëtarja e lartë e Komitetit të Senatit për Marrëdhënie me Jashtë, Chuck Grassley , Roger Wicker, Dick Durbin, Thom Tillis dhe Elizabeth Warren dhe përfaqësuesit Mike Turner dhe Ann Wagner i kanë dërguar një letër Sekretarit të Shtetit Marco Rubio dhe Sekretarit të Thesarit Scott Bessent duke i bërë thirrje Administratës të vendosë sanksione ndaj ish-Presidentit të Republika Srpska Milorad Dodik dhe bashkëpunëtorëve të tij, për shkak të veprimeve vazhdueshme për të kërcënuar integritetin territorial të Bosnjës dhe Hercegovinës.

Ligjvënësit amerikanë paralajmëruan se retorika e vazhdueshme separatiste e Millorad Dodik, koordinimi me aktorët e huaj dhe përpjekjet për të minuar Marrëveshjen e Paqes së Daytonit rrezikojnë të destabilizojnë Ballkanin Perëndimor në një moment kritik dhe i kërkuan Administratës të zbatojë sanksionet e reja të miratuara në Aktin e Autorizimit të Mbrojtjes Kombëtare për Vitin Fiskal 2026.

Ata gjithashtu kanë theksuar se vendimi i mëparshëm i Administratës për të hequr sanksionet ndaj Dodik ka inkurajuar sjelljen e tij dhe ka minuar besueshmërinë e SHBA-së në rajon.

“Ne shkruajmë me shqetësim në lidhje me veprimet, retorikën dhe operacionet e ndikimit të huaj të ish-presidentit të Republikës Srpska Milorad Dodik dhe bashkëpunëtorëve të tij, të cilat kanë implikime të konsiderueshme për integritetin territorial të Bosnjës dhe Hercegovinës”, shkruan ligjvënësit.

“Më 9 janar 2026, Dodik, së bashku me zyrtarë aktualë dhe ish-zyrtarë të qeverisë së Republikës Srpska, organizuan dhe morën pjesë në Ceremoninë Përkujtimore të Ditës së Republikës Srpska, pavarësisht vendimeve të Gjykatës Kushtetuese të Bosnjës dhe Hercegovinës në lidhje me respektimin e asaj Dite.”

“Është e qartë se veprimet e fundit të Dodik meritojnë një shqyrtim të vazhdueshëm dhe të kujdesshëm”, vazhduan ligjvënësit.

“Nga organizimi dhe pjesëmarrja në ngjarje të konsideruara jokushtetuese nga Gjykata Kushtetuese e Bosnjës dhe Hercegovinës deri te amplifikimi i retorikës përçarëse dhe avokimi për tërheqjen e Republikës Srpska nga korniza e Dejtonit, sjellja e tij kërcënon drejtpërdrejt stabilitetin rajonal. Angazhimi i tij me entitetet e huaja për të çuar përpara pavarësinë nënvizon më tej urgjencën e një përgjigjeje nga SHBA-të.”

“Veprimet e vazhdueshme të Dodik, konkretisht ato të ndërmarra përmes qeverisë së Republikës Srpska të cilat i drejtojnë lobistët të çojnë përpara pavarësinë, kualifikohen si aktivitete të sanksionueshme sipas Seksionit 8335 të NDAA-së, duke pasur parasysh se këto veprime ‘kërcënojnë paqen, sigurinë, stabilitetin ose integritetin territorial të çdo zone ose shteti në Ballkanin Perëndimor’”, përfunduan ligjvënësit.

“Prandaj, u bëjmë thirrje departamenteve tuaja përkatëse të marrin vendimet përkatëse për personat përkatës, në përputhje me ligjin.” /Express