Category: Lajme

Partia Demokratike e Kosovës ka kërkuar sqarime publike dhe përgjegjësi institucionale lidhur me financimin dhe promovimin e ekspozitës “Masakrat në Kosovë 1998–1999”, duke e konsideruar atë të pasaktë dhe skandaloze.

Partia kërkon hetim për keqpërdorim të detyrës zyrtare, shpërdorim të parasë publike dhe cenim të interesit publik, si dhe kërkimfalje publike ndaj familjeve të viktimave dhe qytetarëve.

“Çdo përpjekje për t’i relativizuar krimet e kryera në Kosovë, për t’i manipuluar faktet apo për ta deformuar të vërtetën, është jo vetëm e papranueshme, por edhe e rrezikshme për kujtesën kolektive dhe drejtësinë historike. Përderisa nga jashtë, veçanërisht në Hagë, po tentohet të rishkruhet historia jonë e lavdishme, nga brenda rishkrimi i saj po financohet me para të shtetit dhe po promovohet nga përfaqësuesit shtetërorë”.

“Kjo ngre dyshime serioze për përgjegjësinë institucionale dhe për standardet e verifikimit të përmbajtjeve që prekin çështje kaq të ndjeshme kombëtare”, thuhet në reagim.

Papa Leoni ka zhvilluar një vizitë historike njëditore në Monako, duke u bërë Papa i parë që shkel në këtë shtet pas gati pesë shekujsh.

Gjatë qëndrimit, ai u takua me Princi Albert dhe u bëri thirrje qytetarëve që të ndajnë pasurinë me ata në nevojë.

Papa theksoi se vendet e vogla mund të kenë ndikim të madh global, ndërsa vizita u shoqërua edhe me mesazhe të forta për solidaritet dhe ndihmë ndaj më pak të privilegjuarve.

Kancelari gjerman, Friedrich Merz, ka shprehur dyshime të forta mbi qëllimet e luftës kundër Iranit, duke theksuar se ndryshimi i regjimit në vend duket një objektiv jashtë mundësive reale.

Deklaratat e tij vijnë në një periudhë tensioni të lartë ndërkombëtar, ndërsa disa vende perëndimore po shqyrtojnë opsione diplomatike dhe ushtarake për të frenuar ndikimin e Teheranit në rajon.

“A është me të vërtetë ndryshimi i regjimit në Iran qëllimi i kësaj lufte? Nëse po, unë nuk besoj se do ta arrijnë atë,” tha Merz gjatë një interviste të fundit për mediat gjermane.

Ai nënvizoi se përvoja e ndërhyrjes së NATO-s në Afganistan është një paralajmërim i qartë.

“Në Afganistan mori 20 vjet që të ndodhte ndryshimi i regjimit, dhe në fund u kalua nga një regjim mullahësh te një tjetër, pa sjellë stabilitet real,” shtoi ai.

Merz theksoi gjithashtu se sulmet ushtarake dhe presioni ndërkombëtar nuk garantojnë domosdoshmërisht sukses në ndryshimin e regjimeve, duke paralajmëruar se rezultatet mund të jenë të paparashikueshme dhe të kushtueshme për vendet perëndimore që ndërhyjnë.

Katari dhe Ukraina kanë nënshkruar një marrëveshje mbrojtjeje, e cila do t’u mundësojë të dyja vendeve të ndajnë ekspertizën për të përballuar kërcënimet nga raketat dhe dronët.

Kjo është pjesë e një serie marrëveshjesh dhe diskutimesh që Presidenti ukrainas, Volodymyr Zelensky, ka zhvilluar gjatë vizitës së tij të shpejtë në Gjirin këtë javë.

Sipas një deklarate nga Ministria e Mbrojtjes e Katarit, të dyja palët diskutuan për zhvillimet e sigurisë në rajon dhe fushat ku mund të bashkëpunojnë. Marrëveshja u nënshkrua nga Shefi i Shtabit të Forcave të Armatosura të Ukrainës, Andriy Hnatov, dhe Shefi i Shtabit të Forcave të Armatosura të Katarit, Jassim bin Mohammed Al-Mannai.

Marrëveshja do të mundësojë bashkëpunim në teknologji, si dhe investime në fushën e mbrojtjes.

Ukraina synon të ofrojë mbështetje për shtetet e Gjirit që kanë qenë nën sulme gjatë muajit të kaluar pas fillimit të luftës me Iranin (Ukraina njihet për ekspertizën e saj në dronë), por gjithashtu kërkon më shumë mbështetje nga aleatët që mund të ndihmojnë në luftën kundër Rusisë – aleatë me kapacitete financiare dhe teknike për të mbështetur Kievin, sidomos duke pasur parasysh se vëmendja e SHBA-së është e fokusuar diku tjetër në këtë moment.

Natën nga e shtuna në të diel, ora e verës fillon duke i zhvendosur akrepat e orës një orë përpara, nga ora 2 e mëngjesit në orën 3 të mëngjesi.

Ora e verës përfundon këtë vit më 25 tetor në orën 3 të mëngjesit, kështu që duke u zhvendosur një orë prapa, ora në orën 3 të mëngjesit llogaritet si 2.

Arsyeja është e thjeshtë dhe lidhet me një rregull të pandryshueshëm të Bashkimit Evropian: ora verore fillon gjithmonë të dielën e fundit të muajit mars, ndërsa ora dimërore rikthehet të dielën e fundit të tetorit.

Meqenëse ditët e javës bien në data të ndryshme çdo vit, ndryshon edhe data konkrete e së dielës së fundit të marsit. Në vitin 2026, e diela e fundit e muajit të tretë bie më 29 mars, prandaj edhe ndryshimi i orës do të ndodhë më herët se një vit më parë.

Në praktikë, në orën 02:00 pas mesnate, akrepat do të zhvendosen në 03:00, çka do të thotë se qytetarët do të humbasin një orë gjumë, por ditët do të zgjasin më shumë.

Prokuroria Speciale e Republikës së Kosovës, përmes Departamentit për Hetimin e Krimeve të Luftës, ka njoftuar se po ndjek me vëmendje zhvillimet rreth ekspozitës “Masakrat në Kosovë 1998-1999”, e vendosur në sheshin “Nënë Tereza” në kryeqytet.

Sipas njoftimit, Prokuroria do t’i nënshtrojë çështjen një vlerësimi të detajuar për të përcaktuar nëse ekspozita përmban elemente që mund të sjellin përgjegjësi penale, në përputhje me kompetencat ligjore dhe mandatin e Prokurorit të Shtetit.

Ky reagim vjen pas shqetësimeve të ngritura nga qytetarë dhe figura publike lidhur me përmbajtjen e ekspozitës dhe ndikimin e saj mbi kujtesën historike dhe ndjeshmërinë kolektive.

Prokuroria ka bërë të ditur se do të veprojë sipas ligjit dhe se çdo vendim për hapa të mëtejshëm do të njoftohet publikisht.

Nëse keni lexuar për tendencat e fundit të ushqimit të shëndetshëm, mund t’i keni lexuar dietat për detoksifikim.

Por nëse e keni konsideruar konsumimin më të lartë të lëngjeve, agjërimin ose pastrimin në një përpjekje për të humbur peshë ose për të përmirësuar mirëqenien tuaj, ndoshta jeni të vetëdijshëm se shkurtimi në mënyrë drastike i ushqimeve nuk është efektiv si një qasje afatgjatë e jetesës për ushqim të shëndetshëm.

Në fakt, detoksifikimi i rreptë mund të shkaktojë probleme duke përfshirë lodhjen, marramendjen dhe sheqerin e ulët të gjakut.

Por ka një lloj detoksifikimi të qëndrueshëm që ia vlen, sipas disa ekspertëve.

Zvogëlimi i sheqerit në dietën tuaj mund t’ju ndihmojë të hiqni kilet e tepërta, të përmirësoni shëndetin tuaj, madje edhe të keni lëkurë rrezatuese.

“Ajo që ne kemi zbuluar në dy vitet e fundit është se sheqeri na mban mbipeshë, është gjithashtu një shkak kryesor i sëmundjeve të zemrës, ndikon negativisht në lëkurë dhe çon në plakjen e parakohshme” , tha Brooke Alpert, eksperte shëndetësore për dieta.

Andaj mundohuni ta ulin konsumimin e sheqerit në dietën tuaj.

Ish-kryeministri i Nepalit, KP Sharma Oli është arrestuar për vdekjen e dhjetëra njerëzve gjatë protestave të dhunshme në shtator, që rrëzuan qeverinë dhe sollën zgjedhje të reja.

Autoritetet vunë në pranga udhëheqësin e fuqishëm komunist në rezidencën e tij në periferi të kryeqytetit Katmandu. Ata arrestuan gjithashtu ish-ministrin e Brendshëm, i cili është akuzuar se ka urdhëruar autoritetet të qëllojnë mbi protestuesit. Për ish-kryeministrin e Nepalit kërkohet një dënim deri në 10 vite burg.

Në protestat e udhëhequra nga të rinjtë kundër korrupsionit dhe qeverisjes së dobët humbën jetën 76 persona dhe më shumë se 2,300 mbetën të plagosur.

Prokuroria Themelore në Prizren ka njoftuar se i dyshuari F.N., 46-vjeçar nga fshati Maqitevë i Komunës së Suharekës, i cili ishte në kërkim nga organet e rendit, është dorëzuar në Policinë e Kosovës.

Sipas njoftimit, rasti lidhet me një aksion të zhvilluar më 16 shtator 2025 nga Prokuroria në bashkëpunim me Policinë e Kosovës, gjatë të cilit në një objekt në fshatin Maqitevë është zbuluar dhe sekuestruar një sasi e madhe e substancës narkotike marihuanë (kanabis sativa), mbi 500 kilogramë, saktësisht 512 kilogramë, në faza të ndryshme të përpunimit dhe tharjes.

Gjatë aksionit janë sekuestruar edhe një granatëhedhës (mortajë), një raketë krahu, një pushkë gjuetie, fishekë, një traktor me rimorkio, pajisje dhe vegla pune për kultivim dhe përpunim, dy telefona celularë si dhe prova të tjera materiale.

Po ashtu, prokuroria ka bërë të ditur se është lëshuar urdhër i përkohshëm për sekuestrimin dhe ngrirjen e dy parcelave me sipërfaqe prej 1963 m² dhe 1438 m² në fshatin Maqitevë.

Sipas dyshimeve të ngritura, i pandehuri në një periudhë të pacaktuar kohore deri më 16 shtator 2025, në pjesën malore të këtij fshati, ka kultivuar pa autorizim bimën kanabis sativa me qëllim prodhimin dhe përgatitjen për shitje dhe shpërndarjen e saj në treg.

Me këto veprime, ai dyshohet për kryerjen e veprave penale “Kultivimi i bimës së hashashit, shkurres së kokainës ose bimëve të kanabisit”, “Blerja, posedimi, shpërndarja dhe shitja e paautorizuar e narkotikëve” si dhe “Mbajtja në pronësi, kontroll ose posedim të paautorizuar të armëve”, sipas Kodit Penal të Republikës së Kosovës.

I pandehuri aktualisht ndodhet në ndalim 48 orësh, ndërsa Prokuroria ka parashtruar kërkesë për caktimin e masës së paraburgimit ndaj tij.

Prokuroria Themelore në Prizren thekson se mbetet e përkushtuar në luftimin e kriminalitetit dhe forcimin e sundimit të ligjit.

Kryeministri i Kosovës dhe kryetari i LVV, Albin Kurti, ka shkruar për 21 vjetorin e masakrës së Podujevës ndaj familjeve Bogujevci, Duriqi e Llugaliu.

Kurti ka shkruar se kjo masakër është kryer nga njësiti famëkeq “Shkorpionët”, që ishin përfshirë edhe në masakra në Bosnje e Hercegovinë.

“Krimet e kryera nga Serbia gjatë luftës në Kosovë kanë dëshmi dhe dëshmitarë. Ato duhet të shndërrohen në aktakuza konkrete dhe dënime të merituara. Institucionet tona kanë për obligim që këto dëshmi të bëhen themel i drejtësisë së mohuar për dekada”, ka shkruar Kurti.