Category: Lajme

Gazetari amerikan Tucker Carlson ka publikuar një video të procesit hetimor ndaj kryeministrit izraelit Beniamin Netanyahu, me akuzën e korrupsionit, i cili ka nisur në vitin 2016.

Carlson, një kundërshtar publik i përdorimit të forcës ushtarake amerikane për llogari të Izraelit, cilëson se kjo video do e çojë në burg Netanyahun, i cili sipas atyre që prononcohen aty, ka bërë çdo gjë që të shmangë arrestin.

Mbi kryeministrin izraelit ka një seri akuzash se ka manipuluar edhe administratën aktuale amerikane për ndërhyrjen në Irak.

Kryetari i Sindikatës së Pavarur të Sektorit Privat të Kosovës (SPSPK), Jusuf Azemi, e ka cilësuar këtë vendim si diskriminues dhe ka kërkuar korrigjimin e tij për të përfshirë edhe këta punëtorë.

Azemi në një intervistë për Ekonomia Online sqaroi se pse i është bërë diskriminim punëtorëve.

“Në rend të parë, ne i gëzohemi faktit që Qeveria e Kosovës po ndan pagën e 13-të për punëtorët e sektorit publik, por në anën tjetër, me këtë vendim ka bërë një diskriminim të punëtorëve në nivel të Kosovës. Pasi që ne kemi thënë se ne jemi diku mbi 200 mijë që ndajmë mjete për buxhetin e Kosovës dhe ne jemi ata që prodhojnë dhe atë që pjesën dërmuese të buxhetit të Kosovës e mbulojmë me paratë tona dhe në anën tjetër, nëse ti ndan mjete shumë më shumë sesa sektori publik, është një diskriminim i llojit të tillë me çka këtë mund ta bëjë vetëm një qeveri po them në Kosovë, se diku tjetër nuk mund ta bëjnë në vend që punëtorët e sektorit privat për momentin janë me paga shumë më të ulëta edhe me një gjendje sociale shumë më të rëndë”, tha ai.

Ai tha se punëtorët do të duhej të ishin prioritet nga qeveria mirëpo sipas tij janë trajtuar në mënyrë të kundërt.

“Në vend që këta të jenë prioritet, ky e ka bërë të kundërtën sepse po e them, ne jemi ata punëtorë të cilët prodhojmë, përderisa punëtorët e sektorit publik janë ata të cilët shpenzojnë. Dhe mos të kemi ironi: ne i gëzohemi pagës së 13-të për këta punëtorë, por jashtëzakonisht kemi presione të mëdha nga punëtorët e sektorit privat: ‘pse ata marrin dhe ne jo?’, domethënë çka na dallon neve prej punëtorëve të sektorit publik?”, u shpreh ai.

Azemi e cilëson diskriminim mospërfshirjen e punëtorëve dhe thotë se ky nuk është diskriminimi i parë që po i bëhet punëtorëve.

“Dhe nuk është diskriminimi i parë që u ka bërë këtyre punëtorëve. Po e përsëris, diskriminim njerëzor dhe diskriminim po e themi kështu në kategorizimin e punëtorëve. Sepse nëse dikush u dashtë që të parët ta kenë këtë rrogë, është me pas punëtorët se sado që ndoshta ata mund të thonë që le t’ua paguajnë pronarët e kompanive, faktikisht edhe pronarët e kompanive janë në një gjendje në çfarë jemi ne sot, shumë të rëndë. Dhe unë mendoj që është bërë një gabim shumë i madh, ndoshta do të korrigjohet që edhe këtyre punëtorëve duhet t’u ndahen mjete”, potencoi Azemi.

Ai thekson se komunikimi me Qeverinë Kurti është i pamundur derisa iu drejtua edhe punëtorëve që nuk janë të përfshirë në pagën e 13-të.

“Me thënë të drejtën, nga e kaluara gjithherë kemi përfituar vetëm atëherë kur kemi bërë presione jashtëzakonisht shumë të mëdha. Unë e di që me këta njerëz nuk komunikojnë, me këta njerëz nuk të kuptojnë dhe qëndrimet e veta i kanë qëndrime fikse. Çka po themi, duhet t’u themi shkurt punëtorëve të sektorit privat të Kosovës: juve ju takon paga e 13-të, nuk po jua jep Kryeministri dhe Ministri i Financave. Ai nuk po e sheh të arsyeshme derisa ne e shohim të kundërtën, këta nuk e shohin këtë orientim çfarë ne po e shohim”, thotë ai.

Azemi bëri të ditur se punëtorë të shumtë janë ankuar për mospëfshirjen në pagën e 13-të duke përmendur ata në Qendrën Klinike Universitare të Kosovës dhe të Universitetit të Prishtinës.

“Realisht po, e në veçanti punëtorët për shembull që ne kryejmë shërbime për institucionet shtetërore. Punëtorët e sigurimit, punëtorët teknikë, për shembull ta marrim në QKUK dhe në Universitetin e Prishtinës, domethënë ne paguhemi nga buxheti i shtetit. Këta punëtorë paguhen nga buxheti i shtetit dhe këta punëtorë nuk po paguhen, në fakt kemi një presion jashtëzakonisht shumë të madh. Por megjithatë, domethënë punëtorët normal që duhet të organizohen dhe duhet ta dimë derën se ku duhet bërë presion që të mos ndodhin këto gjëra. Edhe pse po them në të kaluarën jo që gjithherë kemi dalë fitimtarë karshi këtyre udhëheqësve sepse nuk e kanë dertin e punëtorëve të sektorit privat të Kosovës”, shtoi ai.

Ministri i Financave, Hekuran Murati, sot në mbledhjen e Qeverisë ka bërë të ditur se ky vendim vlen për të gjithë zyrtarët publikë që kanë përmbushur kriteret e përcaktuara.

“Po e miratojmë pagën e 13 për të gjithë punonjësit në sektorin publik që marrin pagë nga buxheti i Republikës së Kosovës. Pra bëhet fjalë për zyrtarët publik. Sa i përket pagës së 13 kanë qenë disa raste pra kur është shikuar se si të zbatohet në mënyrën më të mirë të mundshme, është rasti i të gjithë atyre personave që tashmë kanë 12 muaj të plotë. Pra në sektorin publik dhe marrin pagën e 13 të plotë e cila është e barabartë pra kur të llogaritet, është e barabartë me ë vlerën e koeficientit të shumëzuar me njësinë e koeficientëve që ka pozita përkatëse për personin i cili është në listën e pagave në muajin mars, pra në këtë muaj”, tha ai./EkonomiaOnline

Ka filluar mbledhja e Kryesisë së Kuvendit, ku pritet të caktohet seanca e radhës plenare, raporton KosovaPress.

Në rend të ditës për shqyrtim janë një sërë pikash, mes tyre edhe miratimi i disa marrëveshjeve ndërkombëtare në vlerë mbi 100 milionë euro.

Krahas kësaj pritet të diskutohet edhe për formimin e disa komisioneve at-hoc për përzgjedhjen e kandidatëve për bordin e RTK-së.

Ky është rendi i ditës:

1. Miratimi i procesverbali të mbledhjes së mëparshme të Kryesisë së Kuvendit,

2. Propozimi i rendit të ditës për Seancën plenare të radhës:

1. Miratimi i procesverbaleve nga seancat e mëparshme,

2. Deklarimet jashtë rendit të ditës,

3. Pyetjet parlamentare,

4. Shqyrtimi i Projektligjit nr.10/L-008 për Ratifikimin e Marrëveshjes për qasje në Arsimin e Lartë dhe pranim për studime në Ballkanin Perëndimor,

5. Shqyrtimi i Projektligjit nr.10/L-009 për Ratifikimin e Amendamentit “nr.3 të Marrëveshjes Financiare ndërmjet Republikës së Kosovës dhe Bashkimit Evropian, për Programin IPA 2018“,

6. Shqyrtimi i Projektligjit nr.10/L-010 për Ratifikimin e “Amendamentit nr. 2 të Marrëveshjes Financiare ndërmjet Republikës së Kosovës dhe Bashkimit Evropian, për Programin IPA 2017“,

7. Shqyrtimi i Projektligjit nr.10/L-011 për ratifikimin e Marrëveshjes së Kredisë mes Republikës së Kosovës dhe Bankës Evropiane për Investime për Projektin Energjia Diellore Fotovoltaike në KEK – Porta Globale,

8. Shqyrtimi i Projektligjit nr.10/L-012 për ratifikimin e Marrëveshjes së Kredisë ndërmjet Republikës së Kosovës, e Përfaqësuar nga Ministria e Financave, Punës dhe Transfereve dhe Bankës Evropiane për Rindërtim dhe Zhvillim (BERZh) për Projektin e efiçencës së energjisë në ndërtesa publike,

9. Shqyrtimi i Projektligjit nr.10/L-013 për ratifikimin e Marrëveshjes së Kredisë “ Projekti i Rrugës me Shpejtësi të Lartë Prishtinë – Mitrovicë” (Kredi shtesë) ndërmjet Fondit Saudit për Zhvillim dhe Republikës së Kosovës,

10. Shqyrtimi i Projektligjit nr.10/L-014 për ratifikimin e Marrëveshjes së Kredisë ndërmjet Republikës së Kosovës dhe Bankës Evropiane për Rindërtim dhe Zhvillim për Projektin “Impianti për Trajtimin e Ujërave të Zeza në Podujevë”,

11. Formimi i Komisionit Ad-Hoc për përzgjedhjen e kandidatëve për një (1) anëtar të Komisionit të Pavarura të Mediave,

12. Formimi i Komisionit Ad-Hoc për përzgjedhjen e kandidatëve për tre (3) anëtarë nga radhët e komunitetit shqiptar dhe për dy (2) anëtarë jo shumicë në Komisionin e Pavarura të Mediave,

13. Formimi i Komisionit Ad-Hoc për përzgjedhjen e kandidatëve për gjashtë (6) anëtarë nga komuniteti shqiptar, një (1) anëtar nga komuniteti serb dhe një (1) antar nga komunitetet jo shumicë në Bordin e Radiotelevizionit të Kosovës,

14. Propozimi i GP të Listës Serbe për emërimin e deputetit Branislav Nikoliq në komisione parlamentare.

Ministrja e Mjedisit dhe Planifikimit Hapësinor, Fitore Pacolli, ka njoftuar se Qeveria e Kosovës ka miratuar projektligjin për banimin social dhe të përballueshëm, duke e cilësuar atë si një ndër zotimet kryesore të ekzekutivit.

Sipas saj, ky projektligj synon të krijojë mekanizma konkretë për sigurimin e banimit për qytetarët në nevojë, përmes programeve të strukturuara dhe kritereve të qarta për përfitim.

“Sapo miratuam në Qeveri projektligjin për banimin social dhe të përballueshëm, një nga zotimet tona kryesore për të garantuar banim të dinjitetshëm për qytetarët tanë”, ka shkruar Pacolli.

Ajo ka bërë të ditur se projektligji parasheh krijimin e programeve të banimit, duke përcaktuar rregullat dhe procedurat për zbatimin dhe shpërndarjen e banesave, si dhe kriteret për përfitimin e tyre nga familjet dhe individët në nevojë.

“Projektligji parasheh krijimin e programeve të banimit, përmes përcaktimit të rregullave dhe procedurave për zbatimin dhe shpërndarjen e banesave, si dhe përcaktimin e kritereve të përfitimit për familjet dhe individët në nevojë”, ka theksuar ajo.

Ministrja Pacolli ka shtuar se miratimi i këtij projektligji përbën përmbushje të një premtimi institucional në mbështetje të kategorive të ndryshme sociale, me theks të veçantë te çiftet e reja.

“Me realizimin e këtij projekti po e përmbushim edhe një zotim tonin në mbështetje për çiftet e reja dhe familjet në nevojë në vendin tonë”, ka deklaruar Pacolli.

Komuna e Prishtinës ka njoftuar për shtimin e frekuencës së qarkullimit në linjën 1A Aeroport – Prishtinë, në prag të zhvillimit të ndeshjes Kosovë – Turqi.

Sipas njoftimit, kjo masë është ndërmarrë në bashkëpunim me Trafikun Urban, për shkak të rritjes së kërkesës për transport gjatë datave 31 mars dhe 1 prill.

Gjatë këtyre dy ditëve, autobusët në këtë linjë do të qarkullojnë çdo një orë, duke filluar nga ora 06:00 deri në orën 24:00.

Nisjet do të realizohen nga Aeroporti Ndërkombëtar i Prishtinës “Adem Jashari” dhe nga Stacioni i Autobusëve në Prishtinë, në të dy drejtimet.

Autoritetet komunale kanë bërë të ditur se kjo rritje e frekuencës synon të lehtësojë qarkullimin e qytetarëve dhe të udhëtarëve gjatë periudhës së zhvillimit të ndeshjes.

Në Gjykatën e Apelit ka filluar seanca në rastin e Dibran Hoxhës (“Kobra”) për shqyrtimin e vendimit të shkallës së parë, me të cilin është dënuar me 24 vjet burgim për vrasje të rëndë.

Rasti i vrasjes kishte ndodhur në vitin 2023.

“Kobra” në seancë ka kërkuar që dëshmitar të jetë polici doganor i Shqipërisë.

Presidenti i SHBA-së, Donald Trump, deklaroi se Irani ka rënë dakord të lejojë kalimin e 20 anijeve cisternë të naftës nëpër Ngushtica e Hormuzit, duke e cilësuar këtë si një “dhuratë” në kuadër të negociatave mes palëve. Sipas deklaratave të tij për median ndërkombëtare, fillimisht Irani kishte lejuar një numër më të vogël anijesh, por më pas e rriti në 20, të cilat pritet të kalojnë duke nisur nga e hëna dhe në ditët në vijim.

Trump theksoi gjithashtu se ky vendim ishte miratuar nga Mohammad Bagher Ghalibaf, duke e paraqitur si një sinjal pozitiv për ecurinë e bisedimeve mes dy vendeve. Megjithatë, retorika nga pala iraniane mbetet e ashpër. Ghalibaf paralajmëroi se forcat iraniane janë të gatshme të përballen me çdo ndërhyrje tokësore amerikane, duke akuzuar SHBA-në për përgatitje të fshehta ushtarake.

Ndërkohë, tensionet në Lindjen e Mesme kanë ndikuar drejtpërdrejt në tregjet globale të energjisë. Çmimet e naftës janë rritur ndjeshëm, me naftën Brent që ka kaluar mbi 115 dollarë për fuçi, ndërsa konflikti ka hyrë në javën e pestë.

Situata është përkeqësuar edhe nga përfshirja e rebelëve Huthi në Jemen, të cilët kanë ndërmarrë sulme me raketa ndaj Izraelit, duke rritur frikën për ndërprerje të furnizimit global me energji.

Ngushtica e Hormuzit, një nga rrugët më të rëndësishme detare në botë për transportin e naftës, mbetet nën tension të lartë, pasi përmes saj kalon rreth 20% e furnizimit global me energji. Pavarësisht sinjaleve për lehtësim të pjesshëm, situata mbetet e paqëndrueshme. Trump deklaroi se një nga opsionet e tij kryesore është “marrja e naftës” iraniane, duke e krahasuar me ndërhyrje të mëparshme amerikane në vende të tjera prodhuese. Në të njëjtën kohë, raportimet flasin për sulme të vazhdueshme në rajon dhe për rrezik të shtuar për infrastrukturën energjetike, çka mund të çojë në një krizë edhe më të thellë globale. Autoritetet ndërkombëtare kanë bërë thirrje për ulje të tensioneve, ndërsa tregjet dhe vendet importuese të energjisë mbeten në alarm për zhvillimet e ardhshme.

Kryeministri i Kosovës, Albin Kurti, ka reaguar lidhur me ekspozitën për masakrat e luftës në Kosovë, duke theksuar nevojën që ajo të korrigjohet dhe të rikthehet në një formë më të saktë dhe gjithëpërfshirëse.

Ai bëri të ditur se ekspozita tashmë është larguar nga sheshi, ndërsa shtoi se, megjithëse përfshin disa raste të rëndësishme, ajo ka pasur mangësi dhe gabime në përmbajtje që duhet patjetër të përmirësohen.

Kurti theksoi se dokumentimi dhe prezantimi i saktë i krimeve të luftës është thelbësor, jo vetëm për opinionin ndërkombëtar, por edhe për vetë shoqërinë kosovare, veçanërisht për gjeneratat e reja që nuk e kanë përjetuar luftën.

Sipas tij, një pjesë e madhe e popullsisë ose kanë qenë fëmijë gjatë luftës, ose kanë lindur pas saj, prandaj është e domosdoshme që e vërteta historike të ruhet dhe të prezantohet në mënyrë të drejtë.

Ai vlerësoi se një ekspozitë e tillë ka rëndësi të veçantë për të ardhmen e vendit, pasi ndihmon në ruajtjen e kujtesës kolektive dhe në ndërgjegjësimin për çmimin e lartë të lirisë, duke theksuar se shumica e viktimave të luftës në Kosovë kanë qenë civilë.

“Kjo ekspozitë është shumë e rëndësishme për të ardhmen tonë jo vetëm për të kaluarën tonë. Ndërkaq, është e rëndësishme edhe për aspektin ndërkombëtar, sepse ne dëshirojmë që bota me të cilën kemi ndërveprim të dendur të mos harroj asnjëherë se çmimi i lirisë dhe i pavarësisë ishte shumë i lartë dhe në veçanti në popullsinë civile, sepse shumica dërrmuese e të vrarëve në Kosovë janë popullsi civile”, deklaroi ai.

Kryeministri u shpreh se një ekspozitë e rishikuar dhe e bazuar në fakte duhet të rikthehet sa më shpejt, duke sugjeruar muajin qershor, në përvjetorin e çlirimit të Kosovës, si një moment të përshtatshëm.

“Një ekspozitë e saktë e drejtë dhe e plotë mbi të gjitha e vërtetë për krimet e kryera të Serbisë në Kosovë, unë besoj që duhet të rikthehet sa më parë. Madje, një datë optimale do të ishte qershori, përkatësisht koha kur shënojmë përvjetorin e 27-të të çlirimit të Kosovës”, deklaroi ai në konferencë për media pas mbledhjes së Qeverisë.

Ai shtoi gjithashtu se një nismë e tillë nuk duhet të kufizohet vetëm në Prishtinë, por të shtrihet në të gjitha komunat e vendit, në mënyrë që të jetë sa më e qasshme për qytetarët.

Kryeministri i Kosovës, Albin Kurti ka thënë se çështja e presidentit është tejet e rëndësishme, dhe e njëjta duhet të trajtohet me seriozitetin më të madh institucional dhe politik.

Në konferencën për media pas mbledhjes së qeverisë, ai bëri të ditur se posa të zhvillojë konsultimet e brendshme, do të nisë dërgimin e ftesave për takim me kryetarët e partive opozitë.

“Kjo është çështje tejet e rëndësishme, zgjedhja e presidentit duhet të trajtohet me seriozitetin më të lartë institucional dhe politik. Sipas aktgjykimit të Gjykatës Kushtetuese, nëse nuk gaboj, kemi kohë deri më 28 prill, që do të thotë se i kemi 30 ditë, pra jo 3, por 30. Megjithatë, do të përpiqemi që sa më shpejt të kryejmë sa më shumë. Për këtë më nevojiten konsultimet e brendshme, dhe dihet se pas tyre menjëherë do të dërgojmë ftesa për takim me kryetarët e partive opozitare”, deklaroi shefi i qeverisë.

Ndër të tjera, Kurti theksoi se kjo çështje duhet trajtuar me urgjencë, por nuk duhet “të matemi me përpjekjet që bëjmë, por me suksesin që arrijmë”.

“Sa i përket rëndësisë, kjo duhet trajtuar me urgjencë. Nuk duhet të matemi me përpjekjet që bëjmë, por me suksesin që arrijmë. Në këtë kuptim, çështja është më e rëndësishme dhe urgjente, por Kushtetuesja na ka dhënë një periudhë kohe që na lejon jo vetëm të veprojmë shpejt, por edhe të shmangim gabimet në mënyrën se si arrijmë aty ku duhet”, përfundoi kryeministri.