Category: Lajme

Kryeministri Edi Rama njoftoi sot hyrjen në fuqi të aktit normativ për uljen e akcizës së naftës. Sipas vendimit, akciza do të ulet me 20% sapo çmimi i naftës të kalojë 220 lekë për litër dhe ai i benzinës 200 lekë për litër.

Në podkastin e tij ‘Flasim’, Rama theksoi se masa synon të mbrojë qytetarët nga ndikimet e paqëndrueshme të tregjeve ndërkombëtare, pa rrezikuar stabilitetin e financave publike. Vendimi do të monitorohet nga Bordi i Transparencës, duke garantuar kontroll dhe zbatim të drejtë të masës.

“Këtë javë kemi miratuar edhe aktin e premtuar normativ për uljen e akcizës së naftës, në momentin kur nafta, si pasojë e impaktit të luftës mbi tregjet ndërkombëtare, të kalojë limitin e 220 lekëve. Pra, ulja e akcizës me 20% është një masë që hyn në fuqi menjëherë kur çmimi i naftës kalon 220 lekë për litër dhe ai i benzinës 200 lekë për litër.

Këto pragje janë paracaktuar për të garantuar një ndërhyrje të drejtë dhe të balancuar në raport me zhvillimet e tregut, të cilat janë zhvillime që ne nuk i kemi në dorë, nuk jemi shkaktarë të tyre dhe nuk kemi as fuqinë që t’i ndalojmë, përveçse kemi detyrimin që t’i trajtojmë në funksion të amortizimit të goditjes së menjëhershme mbi konsumatorët, pa cenuar, nga ana tjetër, stabilitetin e financave publike në një kohë kur pasiguria në tregjet ndërkombëtare mbetet e lartë dhe po aq edhe dinamike.

Drejtori i rrjetit të OJQ-ve AVONET, Kenan Gashi, ka njoftuar për ndarjen nga jeta të mësimdhënëses Suzana Arifi.

“Në këtë mëngjes morëm lajmin e hidhur për ndarjen nga jeta të mësueses Suzana Arifi”, ka shkruar ai.

Gashi ka kujtuar se mësuesja Suzana ishte mësuesja e Ajanit, i cili e kishte konsideruar gjithmonë si një anëtare të familjes, duke e përmendur edhe sot me shumë dashuri dhe respekt.

Ai e ka përshkruar të ndjerën si një mësuese të jashtëzakonshme, të përkushtuar, të dashur dhe shumë profesionale, e cila me energjinë dhe përkushtimin e saj kishte arritur ta shndërronte klasën në një vend të ngrohtë e frymëzues për nxënësit.

Sipas tij, edukata, qetësia dhe profesionalizmi i saj nuk ishin vetëm pjesë e disiplinës në klasë, por vlera që ajo ua kishte transmetuar nxënësve, duke ndikuar drejtpërdrejt në formimin e tyre si individë.

“Ajo ishte një model i vërtetë për fëmijët tanë dhe ka lënë gjurmë të pashlyeshme në jetën e tyre”, ka theksuar Gashi, duke shtuar se kontributi i saj në edukimin e brezave do të kujtohet gjithmonë me respekt dhe mirënjohje.

Në fund, ai ka shprehur falënderim dhe mirënjohje për kontributin e saj, si dhe ka ngushëlluar familjen, kolegët dhe të gjithë ata që patën fatin ta njohin.

“Allahu e pastë mëshiruar dhe familjes i dhëntë durim”, ka përfunduar ai. 🤲

Presidenti i Serbisë, Aleksandar Vuçiq, ka thënë të dielën se është gjetur një lëndë plasëse “me fuqi të madhe shkatërruese” gjatë një hetimi rreth kërcënimeve ndaj infrastrukturës së gazit në afërsi të kufirit me Hungarinë.

Vuçiq theksoi se e ka njoftuar për këtë kryeministrin hungarez, Viktor Orban, përmes një bisede telefonike.

“Ia paraqita atij rezultatet e para të hetimit nga autoritetet tona ushtarake dhe policore në lidhje me kërcënimin ndaj infrastrukturës kritike të gazit që lidh Serbinë dhe Hungarinë”, shkroi Vuçiq në Instagram të dielën.

Orban tregoi më vonë se ishte njoftuar nga Vuçiqi për këtë.

Kryeministri hungarez, i cili është aleat i Vuçiqit, tha në një postim në Facebook se “autoritetet serbe kanë gjetur eksplozivë shkatërrues dhe pajisjet e nevojshme për aktivizim në infrastrukturën kritike të gazit që lidh Serbinë dhe Hungarinë”.

Vuçiq shtoi se përveç eksplozivit, u gjetën edhe fitila për aktivizimin e tij.

Ai nënvizoi më pas në Beograd, gjatë një vizite në vendin e ndërtimit për ekspozitën Expo, se jo shumë larg vendbanimit Velebit në Vojvodinën veriore, disa qindra metra nga tubacioni i gazit Balkan Stream, u gjetën në dy çanta shpine dy pako të mëdha me eksplozivë me fitil.

“Ato mund të kishin rrezikuar një numër të madh njerëzish dhe të kishin shkaktuar dëme të mëdha në furnizimin me gaz të Serbisë dhe Hungarisë”, tha ai.

“Kemi të dhëna dhe një hetim është duke u zhvilluar. Sapo mbarova bisedën me Viktor Orbanin. Është e qartë se lojërat gjeopolitike nuk do të na lënë rehat”, tha Vuçiq.

Ai shtoi se agjencitë e inteligjencës së Serbisë “bënë një punë të mirë”.

“Mendojmë se e dimë se cilit grup i përkasin individët që supozohej të ndërmerrnin hapin e fundit në aktivizimin e eksplozivëve. Qëllimi ishte të dërgohej një mesazh politik. Do ta ndëshkojmë rëndë këdo që kapim”, tha Vuçiq.

Portali hungarez Index raportoi se Orban ka planifikuar një takim të Këshillit të Mbrojtjes për të dielën pasdite për shkak të eksplozivit të gjetur pranë një tubacioni gazi në Serbi.

Radio Televizioni i Serbisë (RTS) njoftoi më parë se policia dhe ushtria po kontrollonin zonën në veri të Serbisë në komunën e Kanjizhës, rreth pesëmbëdhjetë kilometra nga kufiri me Hungarinë.

Sipas RTS-së, kërkimi po kryhej nga toka, me kontroll dhe koordinim nga ajri, dhe se helikopterët po fluturonin mbi zonën. Janë përdorur dronë, qen nuhatës, pajisje për imazhe termike dhe pajisje të tjera, si dhe ekipe kundërsabotimi.

RTS deklaroi se kontrolli po kryhej me miratimin e Zyrës së Prokurorit të Lartë Publik në Suboticë.

Autoritetet kompetente ende nuk kanë publikuar informacione rreth veprimit të forcave të sigurisë në veri të Serbisë.

Më 19 mars, pjesëtarët e ushtrisë serbe filluan rritjen e sigurisë në stacionin e kompresorëve në Zhabar, në Serbinë lindore, në tubacionin e gazit Balkan Stream që transporton gazin rus nga Turqia në Hungari.

Kjo erdhi pasi Vuçiq njoftoi se objekti do të ruhej nga ushtria për arsye sigurie për shkak të situatës në Lindjen e Mesme. /REL

Ish-presidentja Vjosa Osmani i ka uruar besimtarët katolikë për Pashkët.

“Për shumë mot Pashkët, të dashur vëllezër e motra! 🐣💐”, shkroi ajo në një postim në Facebook.

Osmani publikoi gjithashtu një fotografi të saj duke mbajtur në dorë një shportë të vogël të mbushur me vezë të ngjyrosura, simbol tradicional i Pashkëve.

Kreu i Aleancës për Ardhmërinë e Kosovës, Ramush Haradinaj, ka përkujtuar të rënët e Ushtrisë Çlirimtare të Kosovës dhe viktimat e masakrave të datës 5 prill.

Në një postim në Facebook, Haradinaj tha se 5 prilli sjell kujtimin për bashkëluftëtarët e tij të rënë, duke përmendur Naser Brahimaj, Qazim Shala, Asllan Batusha dhe Arsim Rama.

Ai po ashtu kujtoi viktimat e masakrave në Rrezallë të Drenicës, Llovcë të Gjilanit dhe Llapqevë të Malishevës.

“Sot kujtojmë po ashtu, jetët e pafajshme që barbarët i rrëmbyen në Rrezallë të Drenicës, në Llovcë të Gjilanit dhe Llapqevë të Malishevës. Këto masakra, nga të cilat ende shumë të pagjetur, janë plagë e hapur e Kosovës dhe i japin zë, thirrjes sonë për drejtësi.Sot gjithashtu, u mbushën 7 vjet pa zërin e UÇK-së, bashkëluftëtaren time Fetnete Ramosaj. Përjetësisht përulemi para sakrificës së atyre që dhanë nga jeta e tyre për lirinë tonë! Respekti për ta forcon themelet e lirisë dhe shtetit të Kosovës!”, shkroi i pari i AAK-së.

Kryetari i Lidhjes Demokratike të Kosovës, Lumir Abdixhiku, ka uruar të gjithë besimtarët katolikë me rastin e festës së Pashkëve.

Në urimin e tij, përmes faqes zyrtare të LDK-së në Facebook, Abdixhiku theksoi se kjo festë shënon ngadhnjimin e jetës mbi vdekjen dhe rikthimin e besimit në vlerat më të larta njerëzore.

“Pashkët janë simbol i ringjalljes së shpresës, solidaritetit dhe dashurisë mes njerëzve. Në emrin tim dhe të Lidhjes Demokratike të Kosovës, ju uroj përzemërsisht festën e Pashkëve. Le të shërbejë kjo ditë si frymëzim për më shumë mirëkuptim, bashkim dhe përkushtim ndaj njëri-tjetrit, me besimin se së bashku do të ndërtojmë një të ardhme më të mirë për vendin tonë.Gëzuar Pashkët!”, thuhet në urim.

Komuna e Skenderajt ka organizuar homazhe dhe tubim përkujtimor me rastin e 27-vjetorit të Masakrës së Rezallës.

Të pranishëm kanë qenë kryetari i kësaj komune, Sami Lushtaku, si dhe deputetë të Kuvendit të Kosovës e përfaqësues të shoqatave të dala nga lufta e Ushtrisë Çlirimtare të Kosovës.

Lushaku ka thënë se këta muaj janë më të vështirët për komunën që ai udhëheq, pasi sipas tij, ka shumë masakra, vrasje, dhunë, e shkatërrime të shtëpive.

“Masakra në Rezallë nuk ka ndodh rastësisht. Secila shtëpi ka qenë shtab i UÇK-së, kuzhinë e luftës së UÇK-së. Rezalla ka dhënë gjithçka që i është dashur UÇK-së. E di që kemi prit që institucionet të jenë sot këtu dhe dje në Izbicë, por që fatkeqësisht ata se dinë rëndësinë e gjakut dhe atyre që kanë dhënë më të dashurit e tyre. Është e dhimbshme dhe papranushme.”, ka thënë Lushtaku.

Ai ka folur edhe për gjuhën ndaj ushtarëve dhe familjeve të dëshmorëve, duke shtuar se nuk duhet lejuar që të fyhen vlerat e luftës.

“Kur në këto ditë përkujtojme kemi bashkëluftëtarët në Hagë. Dhe njerëzit nëpër institucione i fyejnë dhe ne nuk duhet të lejojmë që të shahen e fyhen ushtarë e familje të dëshmorëve.”, ka thënë Lushtaku.

Shtetet e Bashkuara kanë arritur të shpëtojnë anëtarin e fundit të zhdukur të ekuipazhit të avionit luftarak F-15, i cili u rrëzua të premten në jug të Iranit.

Lajmi u konfirmua nga presidenti Donald Trump, i cili tha se ushtria amerikane realizoi“një nga operacionet më të guximshme të kërkim-shpëtimit në historinë e saj”. Sipas tij, oficeri është tashmë “i sigurt dhe në gjendje të mirë”.

Në avion ndodheshin dy anëtarë ekuipazhi dhe të dy ishin hedhur me katapultë para rrëzimit. Njëri prej tyre ishte shpëtuar më herët. Nga ana e tij, Irani pretendon se avioni u rrëzua nga sistemi i tij i mbrojtjes ajrore.

Si u zhvillua operacioni?

Sipas raportimeve, SHBA dhe Irani hynë në një garë për të gjetur ushtarakun e zhdukur. Një burim i njohur me operacionin e përshkroi atë si një mision të madh kërkim-shpëtimi luftarak në jug të Iranit.

BBC raporton se gjatë operacionit ka pasur përplasje mes forcave amerikane dhe atyre iraniane, ndërsa ushtaraku mund të jetë plagosur që në momentin kur u hodh nga avioni.

Trump tha se vendndodhja e tij monitorohej vazhdimisht dhe se në operacion u përfshinë dhjetëra avionë amerikanë. Ai shtoi se nuk pati asnjë amerikan të vrarë apo të plagosur gjatë shpëtimit.

Nga ana tjetër, media iraniane raportoi se Garda Revolucionare rrëzoi një dron amerikan që po merrte pjesë në kërkimet për ushtarakun e zhdukur.

Ekspertët theksojnë se anëtarët e ekuipazheve të avionëve luftarakë janë të trajnuar posaçërisht për situata të tilla: të largohen shpejt nga vendi i rrëzimit, të fshihen dhe të mbijetojnë për sa më gjatë.

Ku u rrëzua avioni?

Vendndodhja e saktë nuk është konfirmuar plotësisht, por mediat iraniane përmendin provincat Kohgiluyeh dhe Boyer-Ahmadose Khuzestan në jug të Iranit.

Mediat amerikane raportojnë se edhe gjatë operacionit të parë të shpëtimit pati rrezik: një helikopter që po transportonte pilotin e shpëtuar u godit nga armë të lehta, duke plagosur disa pjesëtarë të ekuipazhit, por arriti të ulej i sigurt.

Ndërkohë, Garda Revolucionare thotë se fise nomade lokale qëlluan mbi dy helikopterë Black Hawk amerikanë.

Çfarë dihet për misionin e F-15?

F-15E është një avion i projektuar si për sulme ajrore, ashtu edhe për goditje ndaj objektivave tokësore. Në luftën me Iranin, ai besohet se po përdorej kryesisht për të goditur dronë dhe raketa iraniane, por edhe për sulme precize me armë të drejtuara me lazer ose GPS.

Avioni ka dy anëtarë ekuipazhi: pilotin dhe oficerin e sistemeve të armëve. Ende nuk dihet saktësisht se çfarë e rrëzoi avionin, por nëse është goditur nga iranianët, arsyeja më e mundshme mbetet një raketë tokë-ajër.