Category: Lajme

Pesë shqiptarë burgosen çdo ditë në Mbretërinë e Bashkuar, sipas një investigimi të tabloidit britanik “Sun on Sunday”.

Shifrat e Ministrisë britanike të Drejtësisë tregojnë se 1,865 persona nga ky vend ballkanik u dërguan në burg nga janari deri në shtator të vitit të kaluar.

Në total, ishin 75,289 persona të të gjitha kombësive, përfshirë të të paraburgosurit dhe kriminelë të dënuar, u futën në qeli deri në shtator 2025 sipas statistikave të Ministrisë së Drejtësisë.

Shtetasit shqiptarë përbëjnë vazhdimisht përqindjen më të lartë të shtetasve të huaj në burgjet e Mbretërisë së Bashkuar – rreth 9% të të gjithë kriminelëve të huaj të burgosur.

Një analizë e “The Sun on Sunday” tregon se në 3 muajt e parë të këtij viti, 58 shqiptarëve u janë dhënë dënime me të paktën 1 vit burg për krime që variojnë nga veprat penale të drogës deri te kontrabanda e njerëzve.

Shkelësit e ligjit me shtetësi të huaj që marrin dënime prej 12 muajsh ose më shumë u dorëzohen automatikisht urdhra dëbimi pasi burgosen.

Ligjet e reja që do të miratohen nga Partia Laburiste do të bëjnë që disa të burgosur të deportohen që pasi të kenë kaluar një të tretën e dënimit të tyre, nga gjysma e dënimit që është aktualisht.

Që nga zgjedhjet e vitit 2024, Partia Laburiste thotë se më shumë se 58,500 migrantë të paligjshëm dhe kriminelë të huaj janë larguar ose deportuar nga vendi.

Mbretëria e Bashkuar ka një marrëveshje transferimi të të burgosurve me Shqipërinë, që do të thotë se çdo shqiptar i dënuar me 4 vjet ose më shumë dënim nga një gjykatë e Mbretërisë së Bashkuar do të dërgohet përsëri në vendin e tij të origjinës për të vuajtur dënimin.

Një zëdhënës i Ministrisë së Drejtësisë u shpreh: “Kjo qeveri ka rritur deportimin e shkelësve të huaj me më shumë se 8,700 të larguar që nga korriku 2024 – një rritje prej 32% krahasuar me 19 muajt e mëparshëm. Për më tepër, ne po ndryshojmë ligjin në mënyrë që të burgosurit e huaj të mund të deportohen më herët se kurrë më parë.”

Kryeministri i Kosovës, Albin Kurti, ka përkujtuar Masakrën e Rezallës, duke theksuar se dëshmitë e gjenocidit të kryer nga Serbia mbeten ende të freskëta në gjithë vendin.

Ai në një postim në Facebook, rikujtoi se më 5 prill 1999 u vranë 98 burra dhe djem në këtë masakër, ndërsa trupat e tyre u zhdukën nga forcat serbe në përpjekje për të fshehur krimin.

Një pjesë e tyre është gjetur më vonë në varreza masive në Serbi, përfshirë Rudnicën dhe Kizhevakun.

Kurti theksoi se Serbia ende fsheh informacione për varreza të tjera masive dhe bëri thirrje për angazhim ndërkombëtar në zbardhjen e fatit të personave të zhdukur.

Postimi i tij i plotë:

Dëshmitë e gjenocidit të Serbisë janë të freskëta gjithandej në Kosovë. Të njoma janë plagët e familjarëve të të vrarëve në Masakrën e Rezallës, ku më 5 prill 1999 u vranë 98 burra dhe djem.

Pas ekzekutimit mizor, në përpjekje për të fshehur krimin, forcat e armatosura të Serbisë ua rrëmbyen kufomat. 29 prej tyre janë gjetur në varrezën masive në Rudnicë të Rashkës, në Serbi. Nga Kizhevaku, në vitin 2021 u kthyen në tokën e Kosovës eshtrat e shtatë prej të vrarëve, mes tyre edhe raste të ribashkimit të eshtrave të zhvarrosura vite më parë në Rudnicë.

Ende Serbia fle mbi varreza masive nga gjenocidi i kryer në Kosovë. Mbi 950 civilë të paarmatosur u masakruan në Kosovë, ua rrëmbyen kufomat dhe i futën në varreza masive në Serbi, përfshirë këtu kamionë frigoriferë që dolën nga fundi i liqeneve atje. Ende Serbia i mbanë të fshehura informacionet për vendndodhjen e të paktën 11 varrezave masive brenda territorit të saj.

U bëjmë thirrje partnerëve ndërkombëtarë që nga Serbia, si përgjegjëse për vrasjen dhe zhdukjen e qytetarëve tanë, të kërkojnë zbardhjen e plotë të fatit të të zhdukurve. Institucionet e drejtësisë të Republikës së Kosovës duhet të veprojnë pa vonesë, që urdhërdhënësit dhe ekzekutorët të dalin para drejtësisë.

Nuk mund të lejojmë që harresa të mbulojë mizoritë e luftës në Kosovë, siç nuk mund të mbulojë dheu i varrezave masive të vërtetën për krimet e kryera nga Serbia.

Duke nderuar të kaluarën dhe duke kërkuar drejtësi për viktimat, angazhohemi për të ardhmen e Republikës sonë, ku brezat e rinj rriten të lirë dhe të sigurt.

Në këtë datë që është dëshmi e dhimbjes dhe qëndresës së popullit tonë, nderojmë të vrarët në Rezallë. I përjetshëm qoftë kujtimi i martirëve dhe dëshmorëve të kombit!

Pjesëtari i familjes Jashari, Bekim Jashari, ka përkujtuar 27-vjetorin e Masakrës së Rezallës.

Ai ka bërë homazhe në vendin ku 27 vjet më pare kriminelët serbë kanë ekzekutuar 98 civilë nga Rezalla dhe fshatrat përreth.

“Sot me nder e krenari kujtojmë e nderojmë sakrificën e tyre për vendin dhe Lirinë që sot po e gëzojmë. Masakra e Rezallës bashkë me masakrat tjera janë dëshmi e krimeve dhe gjenocidit që Serbia bëri në Kosovë, duke mos kursyer askënd që fliste shqip e që mbronte pragun e shtëpisë. Këto masakra dhe këto komplekse memoriale janë arkivat që argumentojnë vazhdimisht dhe në çdo kohë se kush ishin kriminelët dhe vrasësit, në këtë luftë të pabarabartë dhe të imponuar.”, ka shkruar Jashari.

Ai ka thënë se të gjithë të rënët u bënë themeli i lirisë.

“Sot Kosova jonë, fëmijët dhe të rinjtë jetojnë të lirë, ëndërrojnë e punojnë falë gjakut të derdhur të dëshmorëve e martirëve të Lirisë, të cilët i dolën zot atdheut dhe me gjakun e tyre u bënë themel i lirisë dhe Pavarësisë që sot e gëzojmë.”, ka shkruar turje, Jashari.

Presidenti i Shteteve të Bashkuara të Amerikës, Donald Trump, ka kërcënuar rëndë regjimin në Iran.

Në një postim në Truth Social të dielën, Trump ka përdorur gjuhë të ashpër për t’i bërë thirrje Iranit që të lejojë anijet të kalojnë Ngushticën e Hormuzit.

Në postim, ai po ashtu ka kërcënuar të sulmojë më tej infrastrukturën energjetike dhe të transportit iranian.

Për këtë, ai thotë se e ka caktuar ditën e martë.

“E marta do të jetë Dita e Termocentralit dhe Dita e Urës, të përfshira në një, në Iran. Nuk do të ketë asgjë të ngjashme!!! Hapni Ngushticën e mallkuar, ju kopilë të çmendur, ose do të jetoni në Ferr – Vetëm shikoni! Falënderimi i takon Allahut”, ka shkruar Trump.

Avokati Arianit Koci ka njoftuar se, bazuar në rezultatet e hetimeve zyrtare, vdekja e Festim Isufi është e natyrës personale dhe nuk lidhet me Rina Maloku.

Sipas tij, Maloku është vendosur padrejtësisht në qendër të dyshimeve në një pjesë të opinionit publik.

Ai ka kërkuar nga opinioni publik që ta trajtojë rastin me kujdes dhe përgjegjësi.

Njoftimi i plotë:

Rina Maloku u vendos padrejtësisht në qendër të dyshimeve në një pjesë të opinionit publik pas vdekjes tragjike së bashkëshortit të saj, Festim Isufi.

Nga rezultatet e hetimeve zyrtare del se rrethanat e kësaj vdekjeje janë të natyrës personale dhe nuk e lidhin znj. Rina Maloku me këtë rast në asnjë formë.

Pas një humbjeje të rëndë personale, znj. Rina Maloku është përballur edhe me një barrë të padrejtë publike.

Kërkoj nga opinioni që të ketë parasysh plagët e rënda shpirtërore që ky rast tragjik i ka lënë, dhe të tregojë kujdes e përgjegjësi në mënyrën se si trajtohet kjo çështje.
Arianit Koci
Avokat i znj. Rina Maloku

Ish-Zotëria i Parë i Kosovës, Prindon Sadriu, ka publikuar një mesazh emocional për ish-Presidenten dhe bashkëshorten e tij, Vjosa Osmani pas përfundimit të mandatit të saj të parë, duke e cilësuar atë si një figurë që ka lënë gjurmë në historinë moderne të vendit.

Në reagimin e tij, Sadriu vlerëson lart rolin dhe kontributin e saj në krye të shtetit.

“Ti nuk e mbajte thjesht postin më të lartë të shtetit, atë të Kreut të Shtetit. Ti e mbushe atë me plot kuptim. E transformove rrënjësisht atë. Hyre si lidere dhe po del si frymëzim”, ka shkruar ai.

Ai thekson se përballja me sfidat është bërë me vendosmëri dhe pa tërheqje.

“Çdo sfidë që të është vënë përpara, dhe kanë qenë të shumta, e përballove jo me hezitim, por me atë zjarr të qetë e të pathyeshëm që të ka përkufizuar gjithmonë… Nuk u përkule kurrë. Nuk u tërhoqe kurrë. Thjesht vazhdove përpara, sepse Kosova kishte shumë nevojë për ty”, thuhet në mesazh.

Sadriu vlerëson gjithashtu paraqitjen e saj në arenën ndërkombëtare, duke përmendur fjalimet dhe përfaqësimin në institucionet më të rëndësishme botërore.

“ Të kam parë teksa qëndroje në foltoren e Parlamentit Evropian. Të kemi parë në Këshillin e Sigurimit të Kombeve të Bashkuar dhe ti bëre që bota të ndalet e të dëgjojë,” ka shkruar ai.

Sipas tij, ish-Presidentja Osmani ka arritur ta shndërrojë emrin e saj në një simbol ndërkombëtar.

“Vjosë, emri yt nuk është thjesht më një emër. Është një markë dhe një brend i njohur në të gjitha kontinentet. Është një simbol që politikanët e kërkojnë me vetëdije”, thekson Sadriu.

Ai shton se gjatë mandatit të saj, Kosova ka fituar një imazh më dinjitoz dhe më të fuqishëm në botë.

“Ti i dhe Kosovës një pamje që nuk e kishte pasur kurrë më parë; dinjitoze, sovrane dhe krenare me vetveten”, shkruan ai.

Në mesazh nuk mungon as dimensioni personal, ku Sadriu e falënderon për rolin si nënë dhe bashkëshorte.

“Ti mbete gruaja dhe nëna më e mrekullueshme, më e përkushtuar dhe më e dashur për mua dhe për dy vajzat tona,” shprehet ai.

Në fund, ai thekson se ky nuk është fundi i rrugëtimit të saj politik.

“Prandaj, ky nuk është fundi, por fillimi i një kapitulli të ri në rrugëtimin tënd publik mbi 20-vjeçar”, përfundon Sadriu.

A është dërguar me të vërtetë Donald Trump në Qendrën Ushtarake Mjekësore Kombëtare Walter Reed?

Shëndeti i presidentit amerikan është një çështje kyçe në mandatin e tij të dytë, pasi ai është ndër banorët më jetëgjatë të Shtëpisë së Bardhë.

Fjalët rreth vizitës së tij te ”Walter Reed” qarkulluan në rrjete sociale pasi Shtëpia e Bardhë njoftoi dje se presidenti nuk do të bënte asnjë paraqitje publike për pjesën tjetër të ditës.

Thashethemet se ai u shtrua në spital u hodhën poshtë nga Drejtori i Komunikimit i Shtëpisë së Bardhë, Steven Cheung, i cili ndau një postim në X që ofroi një shpjegim të ndryshëm për vendndodhjen e Trumpit.

“Nuk ka pasur kurrë një president që ka punuar më shumë për popullin amerikan sesa presidenti Trump,” shkroi Cheung.

“Në këtë fundjavë të Pashkëve, ai ka punuar pa ndërprerje në Shtëpinë e Bardhë dhe Zyrën Ovale”, shtoi ai.

Llogaria në X e Shtëpisë së Bardhë e rishpërndau postimin.

Trump ka qenë gjithashtu aktiv në rrjetin e tij Truth Social, me paralajmërime për Iranin.

Pra, sigurisht që nuk duket sikur ai është shtruar në spital.

Propozimi për vendosjen e një takse prej 10 euro për automjetet që hyjnë në Prishtinë nga komunat tjera ka nxitur reagime të shumta. Kjo madje po shihet si kufizim i të drejtave të qytetarëve të Kosovës, i cili mund të krijojë kaos duke i nxitur komunat tjera vendosjen e tarifave për qytetarët e Prishtinës.

Vendosja e kësaj tarife parashihet sipas nenit 14 të rregullores për tarifat, ngarkesat dhe gjobat komunale, rregullore kjo e cila tanimë Komuna e Prishtinës e vendosur në dëgjim publik por që ka marrë kundërshtime të shumta si në Kuvendin komunal, ashtu edhe nga komunat tjera.

Sipas propozimit të asaj rregullore, çdo automjet i regjistruar jashtë territorit të kryeqytetit, që hyn në zonën e përcaktuar nga kryeqytetit, i nënshtrohet pagesës së taksës në shumën prej 10 euro për hyrje.

Drejtori i Këshillit për Mbrojtjen e të Drejtave dhe Lirive të Njeriut, Behxhet Shala ka kundërshtuar ashpër propozimin për vendosjen e një tarife prej 10 euro për automjetet që hyjnë në Prishtinë nga rajonet tjera, duke e cilësuar si kufizim i të drejtave të qytetarëve.

“Pikë së pari, nuk ka ndonjë bazë ligjore me të cilën Komuna e Prishtinës mund ta vendosë këtë tarifë. Ajo mund të jetë në rregullore, sikur që ka bërë edhe me “Prishtina Parking” që me rregullore një kohë mbledhi para, shqiptoi gjoba, po tash ato gjykata i rrëzoi. Jam shumë i sigurt që edhe këtë tarifë të cilën do ta vendosë eventualisht Komuna e Prishtinës, Gjykata Supreme do ta rrëzojë sepse kjo nuk mund të shkojë në kushtetuese, sepse nuk ka ligj për këtë rregullore. Prandaj është kompetencë e Gjykatës Supreme të marrë një vendim përfundimtar për këtë tarifë”, tha Shala.

Ai paralajmëroi se një vendim i tillë do të krijonte precedent për komunat tjera dhe do të sillte pasoja të shumta.

“Nëse krijohet një precedent dhe lejohet një tarifë ,andaj edhe çdo qytet do të ketë të drejtë të vendosë tarifë. Ku do të shkojmë ne nëse çdo qytet në Kosovë vendos tarifë për hyrje në atë qytet? Krijohet një kaos, kështu që kjo nuk është asnjë zgjidhje, është zgjidhje kundërligjshme, është një zgjidhje e pazbatueshme. Nuk mundet kryetari i Prishtinës ta marrë modelin e Londrës e ta vendosë në Prishtinë. Londra është tjetër, Prishtina është tjetër”, deklaroi Shala.

Sipas tij, problemet në trafik nuk zgjidhen me tarifa, por me investime në infrastrukturë dhe organizim më të mirë të qarkullimit.

Ai shtoi se nuk ka njohuri për praktika të tilla në vendet e rajonit dhe paralajmëroi pasoja reciproke mes qyteteve.

“Unë nuk e di ndonjë vend të rajonit i cili ka vendosur taksa për hyrje në qytet, sepse prapë kjo është shpatë me dy tehe. Në qoftë se ju e vendosni një taksë për qytetarët që vijnë nga jashtë në Prishtinë, edhe ata të tjerët mund ta vendosin taksën për veturat e Prishtinës që shkojnë atje”, tregoi Shala.

Propozimi për vendosjen e një takse prej 10 euro për automjetet që hyjnë në Prishtinë nga komunat tjera ka nxitur reagime të shumta nga përfaqësues institucionalë dhe politikë.

Asamblisti i Partisë Guxo në Kuvendin Komunal të Prishtinës, Jeton Mehmeti, ka theksuar se kjo masë cenon barazinë para ligjit.

Sipas tij, propozimi për taksën e kryeqytetit prej 10 euro për automjetet e regjistruara jashtë Prishtinës, në aspektin juridik, është shkelje e parimit të barazisë.

Po ashtu, Gëzim Sveçla nga Vetëvendosje ka ngritur shqetësime për ndikimin e kësaj takse dhe tarifave tjera të parapara.

Ndërkohë, drejtori i Shërbimeve Publike, Luftar Braha, ka theksuar nevojën për ndryshim të rregullores ekzistuese.

Së fundmi, kundërshtime ka pasur edhe nga kryetari i Fushë Kosovës, Valon Prebreza, i cili ka ironizuar me këtë propozim.

“Nëse kjo kalon në Komunën e Prishtinës, atëherë unë do të vendos një taksë ditore prej 20 eurosh për të gjithë banorët e Prishtinës (vetëm) që hyjnë në territorin e komunës së Fushë Kosovës, si dhe një taksë për hyrjen në rrugën e aeroportit në vlerë prej 10 euro, etj. (çka t’na bjen n’mend ndërkohë)”-thuhet në njoftimin e tij.

Kuvendi Komunal i Prishtinës më 31 mars e ka vendosur në dëgjim publik rregulloren për tarifa, ngarkesa dhe gjoba komunale, e cila daton nga viti 2011, ndërsa debati për këtë çështje pritet të vazhdojë.