Kryekuvendarja Albulena Haxhiu ka hapur punimet e seancës së jashtëzakonshme të thirrur për çmimin e rrymës.
“Çmimi dhe faturimi i energjisë elektrike për konsumatorët”, është pika e vetme e seancës.
42 deputetë kanë parashtruar kërkesë për mbajtjen e saj.
Kryetari i Aleancës për Ardhmërinë e Kosovës, Ramush Haradinaj, duke folur para seancës së Kuvendit për çështjen e presidentit, tha se kryeministri Albin Kurti ka vendosur të shkojë në zgjedhje kur e ka bërë Qeverinë pa krijuar një koalicion edhe për zgjedhjen e Presidentit.
Ai tha se ofertat e bëra nga ai kanë qenë në shërbim të shfrytëzimit të kohës së mbetur.
“Nuk besoj që është ofertë së pari dhe nuk është qëllimi të oferta sa është vetëm te shfrytëzimi i kësaj kohe që ka mbetur për ta harxhuar pa kryer punën që i takon me krye. Pra, Kurti ka vendosur të shkojë në zgjedhje në kohën kur e ka bërë Qeverinë pa krijuar një koalicion edhe për presidentin ose në kohën kur e ka votuar buxhetin pa bërë marrëveshje me subjektet opozitare për ndonjë projekt, për ndonjë temë të caktuar dhe këto janë një lloj kamuflazhe e tij. Për fat të keq ai po tallet me të gjithë ne, me gjithë Kosovën, po shkon drejt zgjedhjeve, veç e ka përgatit një pako financiare që synon me e shkepë para zgjedhjeve disa ditë me një pension plus dhe disa shtesa të tjera. Ai e ka gjetur formulën mos me punu katër vjet, mos me zhvillu vendin, mos me i rrit pagat ”, ka thënë ai, siç raportoi EO.
Kuvendi i Kosovës po mban një seancë të jashtëzakonshme për çmimin dhe faturimin e energjisë elektrike për konsumatorët.
Instituti i Kosovës për Drejtësi (IKD) reagon ndaj vendimit të Qeverisë së Republikës së Kosovës për ndryshimin e përbërjes së Komisionit për Dhënien e Provimit të Jurisprudencës. Ky vendim është arsyetuar me nevojën për adresimin e një numri të madh të ankesave të evidentuara gjatë mandatit të komisionit paraprak, të cilat, sipas deklarimeve publike, kanë ndikuar në besueshmërinë e procesit të provimit.
Megjithatë, IKD vlerëson se ky vendim është haptazi në kundërshtim me ligjin. Anëtarët aktualë të Komisionit për Dhënien e Provimit të Jurisprudencës kanë mandat aktiv deri në dhjetor të këtij viti, mandat ky i përcaktuar me vendimet përkatëse, të cilat janë shfuqizuar nga Qeveria pa asnjë bazë ligjore. Ligji Nr. 08/L-033 për Provimin e Jurisprudencës, në asnjë dispozitë të tij, nuk i jep autorizim Qeverisë që të ndryshojë përbërjen e këtij Komisioni gjatë kohëzgjatjes së mandatit të anëtarëve të tij. Për rrjedhojë, ndërprerja e mandatit në këtë mënyrë, mbi bazën e arsyetimeve të përgjithshme dhe abstrakte, paraqet veprim arbitrar, duke cenuar parimin e ligjshmërisë dhe sigurisë juridike.
Mënyra se si tentohet të ndryshohet përbërja e këtij Komisioni krijon dyshime serioze për ndërhyrje në punën e tij. Këto dyshime shtohen edhe më tej kur kihet parasysh se Ministria e Drejtësisë, në kundërshtim me ligjin, nuk ka shpallur afatet për dhënien e Provimit të Jurisprudencës që nga afati i prillit 2025. Në këto rrethana, ndryshimi i përbërjes së Komisionit nuk mund të shihet i ndarë nga mënyra se si është administruar ky proces nga Ministria e Drejtësisë.
Për këto arsye, IKD vlerëson se ky është një vendim i kundërligjshëm dhe i bën thirrje Kuvendit të Republikës së Kosovës që të mos e votojë të njëjtin. Kuvendi nuk duhet të legjitimojë një vendim që është marrë pa bazë ligjore dhe që cenon besueshmërinë, sigurinë juridike dhe pavarësinë e funksionimit të këtij Komisioni.
Në anën tjetër, dilema serioze ngrihen edhe në raport me përbërjen e re të propozuar të Komisionit. Kryetar i këtij Komisioni është propozuar z. Arian Gashi, i cili aktualisht ushtron funksionin e Kryesuesit të Këshillit Prokurorial të Kosovës. Sipas nenit 18.5 të Ligjit Nr. 06/L-056 për Këshillin Prokurorial të Kosovës, “Kryesuesi, zëvendëskryesuesi dhe anëtarët prokurorë të Këshillit nuk kanë të drejtë të ushtrojnë ndonjë detyrë tjetër publike apo profesionale për të cilën shpërblehen me pagesë, përveç mësimdhënies në institucionet e arsimit të lartë, Akademisë së Drejtësisë apo rasteve të parapara me ligj”.
Po ashtu, mbajtja e dy pozitave drejtuese ngre dilema edhe në raport me Ligjin Nr. 06/L-011 për Parandalimin e Konfliktit të Interesit në Ushtrimin e Funksionit Publik. Neni 13.2 i këtij ligji përcakton se zyrtari i lartë nuk mund të jetë anëtar i më shumë se një organi drejtues të ndërmarrjes në pronësi publike, shoqërisë aksionare me pronë publike si dhe organeve të institucioneve të tjera publike, përveç nëse parashihet ndryshe shprehimisht me ligj. Sipas të njëjtit nen, zyrtari i lartë, në cilësinë e anëtarit të organeve të përmendura, nuk ka të drejtë shpërblimi me pagesë, përveç të drejtës në kompensimin e shpenzimeve të udhëtimit dhe shpenzimeve të tjera të lidhura me të. Përballë këtyre dilemave për ekzistimin e konfliktit të interesit, IKD vlerëson se i mbetet Agjencisë për Parandalimin e Korrupsionit që ta shqyrtojë ekzistimin eventual të konfliktit të interesit në rastin konkret.
Kryetarja e Kuvendit të Kosovës, Albulena Haxhiu, ka bërë thirrje që grupet parlamentare të sigurojnë pjesëmarrjen e deputetëve në sallë për fillimin e seancës së jashtëzakonshme.
Haxhiu u shpreh se, me rastin e pranimit të kërkesës për këtë seancë ka anuluar të gjitha aktivitetet e saj për të respektuar procesin parlamentar dhe rëndësinë e mbajtjes së seancës.
“Është e rëndësishme që deputetët të jenë këtu dhe të vazhdojmë me seancën,” tha ajo.
Ajo shtoi se seanca nuk mund të nisë pa praninë e thirrësit të saj, përveç nëse përfaqësues të opozitës, përfshirë Vlora Çitaku ose Ganimete Musliu, apo ndonjë deputet tjetër i opozitës, marrin përsipër të flasin për çështjen në fjalë.
Haxhiu theksoi rëndësinë e funksionimit të Kuvendit dhe vijimit të punës institucionale pa vonesa.
Kryetari i AAK-së, Ramush Haradinaj ka bërë të ditur se në zgjedhjet e reja kjo parti garon e vetme, derisa shtoi se kandidat për kryeministër do të jetë Ardian Gjini, aktualisht kryetar i Gjakovës.
Ai tha se Gjini ka çka i ofron vendit, ndërsa theksoi ofertën serioze të këtij subjekti politik.
“Mandatar i AAK-së është kryetari i Gjakovës, por edhe kandidat për kryetar të partisë. Do të jem pjesë e listës. Ardiani ka çka i ofron Kosovës, është një ofertë serioze e Aleancës”, deklaroi Haradinaj para fillimit të seancës së sotme të Kuvendit.
“Shkojmë vetëm në zgjedhje”.
Kreu i Aleancës pati edhe një përgjigje për zërat që thonë se kjo parti nuk do të arrijë ta kalojë pragun nëse Kosova shkon drejt zgjedhjeve të reja.
“Të gjitha partitë politike janë të gatshme për zgjedhje, edhe ne jemi. Kemi ofertë serioze, një mandatar që ka dëshmuar që është i aftë në qeverisje. Është shkollë e politikës në Kosovë. Falënderoj të gjithë ata që na e mbajnë dertin neve, ne ia mbajmë dertin Kosovës, nuk do të ketë shqetësim për pragun, e kalojmë me siguri”, theksoi ai.
Republika e Kosovës është bërë shteti i parë nga Ballkani dhe i shtati në botë që i janë pranuar angazhimet apo kërkesat në Kartën Globale për Reformën e Kujdesit për Fëmijët.
Kështu ka njoftuar Ministria për Punë, Familje dhe Vlerat e Luftës Çlirimtare.
Ministria, përmes një komunikate për media ka njoftuar se kërkesat e saja mbi pesë angazhime kombëtare (2026–2028) të ndërtuara mbi legjislacionin ekzistues për Mbrojtjen e Familjes dhe Fëmijëve, drejtuar Qeverisë së Mbretërisë se Bashkuar, janë pranuar në tërësi.
Fushat prioritare do të fuqizohen:
-Parandalimi i ndarjes fëmijë-familje;
-Shërbime të integruara familjare dhe komunitare;
-Zgjerimi i kujdesit familjar alternativ;
-Dixhitalizimi i sistemit të të dhënave;
-Forcimi i kapaciteteve profesionale.
“Duke u mbështetur në praktikat më të mira globale për parandalimin e ndarjes familjare, po ndërtojmë një Kosovë ku çdo fëmijë rritet në një mjedis familjar të sigurt dhe të përkrahur. Në këtë drejtim, pranimi i angazhimeve dhe kërkesave nga Republika e Kosovës, që vjen edhe si rezultat i bashkëpunimit dhe përkrahjes nga UNICEF në Kosovë, shënon një momentum të rëndësishëm në forcimin e politikave dhe mekanizmave në mbrojtje të fëmijëve dhe familjeve”, thuhet në njoftim.
Përparim Gruda i Partisë Demokratike të Kosovës e ka cilësuar “anti-kushtetues” vendimin e qeverisë për shkarkimin e përbërjes së Komisionit për Dhënien e Provimit të Jurisprudencës.
Gruda, në një mbledhje të Komisionit për Legjislacion të martën, ka thënë se shkarkimi i kësaj trupe është anti-kushtetues. Ka thënë se për këtë çështje tashmë ekziston një precedent.
“Nëse i keni larguar ata prej detyre, është një vendim i Gjykatës Kushtetuese për rastin e Bordit të RTK-së kur ia ka kthyer kësaj shumice, a dini çfarë ka thënë? Vendimi duhet të përmbajë arsyet individuale për secilin për shkarkim. Nuk mund t’i shkarkosh kolektivisht sepse sot po flasim edhe dinjitetin e atyre veç e veç (anëtarëve të Komisionit)”, tha Gruda.
Ai e quajti të çuditshëm vendimin e Ministrisë së Drejtësisë për shkarkimin e përbërjes së kaluar të Komisionit për Provimin e Jurisprudencës dhe emërimin në krye të këtij komisioni të kryesuesit të Këshillit Prokurorial, Arian Gashi, të dyshuar për lidhje me Lëvizjen Vetëvendosje.
“Ndërrimi kaq i çuditshëm, më shumë lë shije që dikush s’ka kalu [provimin e jurisprudencës, v.j] sesa që s’u mbajt provimi”, tha deputeti i Partisë Demokratike. “Mos me shkru asnjë fjalë arsyetim, kjo veç në diktaturë në ndodhë. Vendim që afeton të drejtat e njeriut dhe nuk ka arsyetim, kjo vetëm në diktaturë ndodh. Çdo vendim që afekton të drejtat dhe liritë e njeriut duhet të arsyetohet saktë”.
Deputeti i Vetëvendosjes, anëtari i Komisionit për Legjislacion, Vigan Qorrolli tha se arsyeja e shkarkimit të komisionit është mosorganizimi i afateve të Provimit të Jurisprudencës.
“Komisioni ka dështuar të mbajë provimin e jurisprudencës për një vit rresht për arsye të mosbesimit të thellë të kandidatëve që i janë nënshtruar këtij provimi. Unë e kam dëgjuar ministren e Drejtësisë duke e arsyetuar këtë qëndrim dje dhe duke qenë se kredibiliteti i Komisionit në ikje është cenuar… edhe personat në shkuarje, edhe personat në ardhje, janë persona të cilët besohet se do ta rrisin kredibilitetin”, tha Qorrolli.
“Për një vit rresht ky komision nuk e ka mbajtur provimin dhe janë me mijëra kandidatë të cilët e kanë paraqitur provimin dhe nuk po arrijnë t’i nënshtrohen provimit”, sipas Qorrollit.
Komisioni për Provimin e Jurisprudencës, me në krye kryegjyqtarin e Gjykatës Supreme, Fejzullah Rexhepin u shkarkua rreth tetë muaj para skadimit të mandatit që i garantohet me Ligj.
Më shumë se 71 miliardë dollarë do të nevojiten gjatë 10 viteve të ardhshme për rimëkëmbje dhe rindërtim në Gaza pas luftës së Izraelit në këtë territor, thotë një raport i ri.
Në Vlerësimin e tyre të Shpejtë të Dëmeve dhe Nevojave në Gaza (RDNA), të publikuar të hënën, Bashkimi Evropian dhe Kombet e Bashkuara pohuan se konflikti ka pasur një “ndikim katastrofik në zhvillimin njerëzor” dhe e ka lënë enklavën në nevojë të madhe për shuma të mëdha parash në të ardhmen e afërt.
Raporti zbuloi se 26.3 miliardë dollarë do të kërkohen në 18 muajt e parë të rindërtimit të Gazës për të rivendosur shërbimet thelbësore, për të rindërtuar infrastrukturën kritike dhe për të mbështetur rimëkëmbjen e saj ekonomike.
“Dëmet fizike të infrastrukturës vlerësohen në 35.2 miliardë dollarë, me humbje ekonomike dhe sociale që arrijnë në 22.7 miliardë dollarë”, tha një deklaratë e përbashkët nga sponsorët e raportit, shkruan Al Jazeera, përcjell Telegrafi.
Gaza është nën një “armëpushim” të brishtë që u ra dakord në tetor.
Marrëveshja, për të cilën ushtria izraelite akuzohet se e ka shkelur vazhdimisht, pasoi dy vjet konflikti shkatërrues të shkaktuar nga sulmet e udhëhequra nga Hamasi më 7 tetor 2023 në Izraelin jugor.
Reagimi izraelit – i dënuar gjerësisht – ka vrarë më shumë se 72,500 njerëz, sipas Ministrisë së Shëndetësisë së Gazës.
Të paktën 777 njerëz janë vrarë që kur hyri në fuqi “armëpushimi”, sipas ministrisë, me 32 vrasje që kanë ndodhur vetëm që nga fillimi i prillit.
Zyra e Medias së Qeverisë së Gazës tha se Izraeli ka kryer 2,400 shkelje të “armëpushimit”. Këto përfshijnë vrasje, arrestime, bllokada dhe “politika urie”.
Zyra e Rregullatorit për Energji (ZRRE) ka bërë të ditur se është duke monitoruar situatën lidhur me shqetësimet e paraqitura nga konsumatorët për devijimin e mundshëm të orëve tarifore në faturimin e energjisë elektrike.
ZRRE në një reagim për media thotë se siguron të gjithë konsumatorët se, në bashkëpunim të ngushtë me të gjithë akterët relevantë, do të ndërmerren veprime konkrete me qëllim që të parandalohet çdo dëm i mundshëm ndaj konsumatorëve dhe të garantohet një proces i drejtë dhe transparent i matjes së energjisë elektrike.
“ZRRE informon publikun se në rastet e paraqitura nga konsumatorët lidhur me devijimin e mundshëm të orëve tarifore në faturimin e energjisë elektrike, ka ndërmarr të gjitha veprimet e saja konform legjislacionit në fuqi, duke kërkuar zëvendësimin e atyre njehsorëve elektrik, si dhe marrjen e masave konkrete për korrigjimin financiar në përputhje me vlerësimet e teknike.
Është e rëndësishme të theksohet se në shumicën e rasteve të dërguara për verifikim është konstatuar se matja e energjisë ka qenë e saktë, ndërsa pasaktësitë kanë qenë kryesisht të natyrës së devijimit të kohës tarifore. Megjithatë, në pjesën më të madhe të rasteve, korrigjimet financiare nuk kanë rezultuar në favor të konsumatorëve, por pavarësisht kësaj çdo rast do të trajtohet me seriozitet”, thuhet në njoftim.
ZRRE rithekson tutje se KEDS dhe KESCO janë ndërmarrje të rregulluara dhe operojnë në përputhje me kornizën ligjore dhe rregullative në fuqi dhe se të hyrat e tyre përcaktohen nga ZRRE, gjë që e kufizon mundësinë për të përfituar nga gabimet eventuale në matjen e energjisë elektrike.
“Gabimet eventuale nëse ndodhin mund të kenë efekt të përkohshëm deri në identifikimin dhe korrigjimin e tyre dhe çdo konsumator i prekur do të kompensohet plotësisht, në përputhje me dispozitat ligjore dhe rregullative në fuqi. Moszbatimi i këtyre detyrimeve nga operatorët do të trajtohet sipas kornizës përkatëse ligjore”, thuhet në njoftim.
Prokuroria Themelore në Pejë, ka bërë të ditur se përgjatë tre muajve të parë të 2026-ës, ka ndaluar gjithsej 107 persona për vepra të ndryshme penale.
Nga departamenti i krimeve të rënda, departamenti i përgjithshëm dhe për të mitur, prokurorët e shtetit, ka ndaluar gjithsej 107 persona në kohëzgjatje prej 48 orësh për lloje të ndryshme të veprave penale nga Kodi Penal i Republikës së Kosovës.
Sipas njoftimit zyrtar, mesatarja për muaj e ndalimit të personave për 48 orë është 36 persona të ndaluar për një muaj pune.
“Prokuroria Themelore në Pejë, mbetet e përkushtuar në luftimin e dukurive negative gjithë atyre personave që bien ndesh me ligjin komfor dispozitave ligjore”.