Në Bibliotekën Kombëtare të Kosovës po mbahet aktiviteti për themelimin e Gardës për Mbrojtjen e Natyrës.
Pjesëmarrës në këtë zhvillim është kryeministri Albin Kurti, ministri i Brendshëm, Xhelal Sveçla e ministrja e Mjedisit, Fitore Pacolli.
Pos tyre, në këtë aktivitet po marrin pjesë nxënës e qytetarë të Republikës së Kosovës.
Ushtruesja e detyrës së presidentes, njëkohësisht kryetarja e Kuvendit të Kosovës, Albulena Haxhiu ka thënë se e ka ofruar pozitën e kryeparlamentares që vendi të mos shkojë në zgjedhje.
Ajo, ka thënë se ka kërkuar vazhdimin e takimeve nga partitë për të gjetur një zgjidhje për çështjen presidentit.
“Prandaj besoj që gjatë këtyre ditëve do të duhej që të ketë sërish takime, sepse unë i pashë me shqetësim deklarimet e subjekteve opozitare që thoshin që kjo temë tashmë është e mbyllur. Si ka mundësi që të jetë tema e mbyllur për sa kohë ne kemi afat deri të hënën, përkatësisht me 27 prill?”, ka thënë Haxhiu.
Haxhiu, ka deklaruar se mendon se me këtë qasje të opozitës nuk po tregohet përkushtim dhe vullnet që vendit t’i jepet një president me mandat pesëvjeçar.
“Duke pasur parasysh që i kemi edhe disa ditë para vete, përkatësisht 5-6 ditë para vete, mendoj që është shumë e rëndësishme që të rikthehen takimet, që të shtohet vullneti, të dëshmohet po ashtu vullneti, sepse nuk mund të ketë marrëveshje pa takime, dhe nuk mund të ketë marrëveshje nëse mungon vullneti nga palët. Ne kemi bërë aq sa kemi mundur, aq sa kemi pasur si me thënë në dorë prej nesh. Ju e dini që ne kemi ofruar edhe pozitën e Kryetarit të Kuvendit, sepse çka na duhet pozita e Kryetarit të Kuvendit nëse dikush e kërkon këtë dhe nëse kjo e parandalon zgjedhjet e jashtëzakonshme?”, ka deklaruar ajo.
Ajo ka thënë se refuzimi i propozimeve të Kurtit nga PDK e LDK nuk i bën mire vendit.
“Unë kam dëgjuar së pari partitë politike që kanë thënë që nuk bën një subjekt politik t’i ketë tri pozitat: ta ketë Kryetarin e Kuvendit, ta ketë Qeverinë, pra Kryeministrinë, dhe në anën tjetër Presidencën. Prandaj kanë thënë që një nga pozitat e larta është pozita e Kryetarit të Kuvendit, le ta marrin.Kjo nuk është pozita ime. Domethënë nuk është pozita ime, nuk e kam me tapi. Njerëzit vijnë e shkojnë dhe mendoj që këtu duhet të dëshmojmë që e kemi për vendin dhe jo për interesat personale.”, ka thënë ajo.
Komandantin e KFOR-it, Gjeneral Major Ozkan Ulutash thekson se situata e sigurisë në Kosovë aktualisht është stabile. Ai tha se në mandatin e tij të parë në krye të misionit të KFOR-it ndodhi menjëherë pas incidenteve serioze të sigurisë që u shënuan në veri të Kosovës në vitin 2023 dhe rritjes së mëvonshme të pranisë së KFOR-it në terren.
“Nuk kemi parë përsëritje të të njëjtit nivel të dhunës. Por ne mbetemi vigjilentë dhe të përgatitur mirë. KFOR-i vazhdon të monitorojë situatën në mbarë Kosovën për të siguruar ruajtjen e një mjedisi të sigurt për të gjithë njerëzit që jetojnë në Kosovë dhe lirinë e lëvizjes, në përputhje me mandatin tonë afatgjatë, të bazuar në Rezolutën 1244 të Këshillit të Sigurimit të OKB-së të vitit 1999”, citohet Ulutash në njoftimin e KFOR-it të ketë thënë për TV Most.
Ai po ashtu ka thënë se situata e sigurisë në veri të Kosovës gjithashtu është aktualisht e qetë. Megjithatë, sipas ttij, nuk është plotësisht e qëndrueshme.
“Nga këndvështrimi ynë, procesi i tranzicionit nga kryetarët e komunave që po largohen tek ata që po vijnë është zhvilluar në mënyrë të qetë. KFOR-i vazhdon të luajë rolin e tij, duke ofruar një kornizë sigurie dhe hapësirë që dialogu politik të ecë përpara. Kjo është thelbësore për arritjen e zgjidhjeve të qëndrueshme që i sjellin përfitim të gjitha komuniteteve. Rruga drejt stabilitetit afatgjatë është politike. Stabiliteti në Kosovë dhe në rajon varet nga fakti nëse palët zgjedhin diplomacinë në vend të dhunës”, tha ai.
Sipas tij, KFOR-i vazhdon të zbatojë plotësisht dhe në mënyrë të paanshme mandatin e tij të OKB-së për të siguruar një mjedis të sigurt për të gjithë njerëzit në Kosovë, përfshirë komunitetin serb.
Ai tha se ky është gjithmonë fokusi i tyre.
“Angazhimi ynë ndaj misionit është i palëkundur. Në përgjigje të dhunës së pajustifikuar të vitit 2023, ne kemi rritur numrin e aktiviteteve dhe patrullave në veri të Kosovës. Kemi një prani të rregullt atje dhe mbajmë kontakte me të gjithë bashkëbiseduesit tanë për të siguruar shkëmbim të shpejtë informacioni dhe transparencë të ndërsjellë. Në përgjithësi, kemi një prani të dukshme dhe fleksibile në të gjithë Kosovën”, tha ai.
Sipas tij, NATO vazhdon të mbështesë fuqishëm Dialogun e lehtësuar nga BE-ja si kornizën e vetme për zgjidhjen e çështjeve të mbetura dhe arritjen e marrëveshjeve që respektojnë të drejtat e të gjithë njerëzve. Ndërsa KFOR-i jep kontribut të rëndësishëm ushtarak për të mbajtur një mjedis të sigurt, rruga drejt stabilitetit afatgjatë është në fund të fundit politike. Është thelbësore që si Beogradi ashtu edhe Prishtina të angazhohen me mirëbesim dhe të zbatojnë marrëveshjet ekzistuese. NATO vazhdon të mbështesë fuqishëm Dialogun e udhëhequr nga BE-ja për normalizimin e marrëdhënieve ndërmjet Beogradit dhe Prishtinës, dhe KFOR-i do të vazhdojë të japë kontributin e tij në këtë proces të rëndësishëm. Në të njëjtën kohë, është me rëndësi që të dyja palët të angazhohen plotësisht dhe në mënyrë konstruktive në këtë kuadër.
“Sa i përket pranisë së bazave të policisë me pika vëzhgimi përgjatë rrugëve kryesore në veri të Kosovës, ne e monitorojmë situatën vazhdimisht dhe mbajmë komunikim të rregullt me të gjithë bashkëbiseduesit për të shmangur keqkuptimet. Kjo përfshin përfaqësues të institucioneve të sigurisë në Kosovë dhe të Forcave të Armatosura të Serbisë. KFOR-i është i pozicionuar mirë për t’u përgjigjur çdo zhvillimi që mund të rrezikojë sigurinë lokale. Ne veprojmë në koordinim të ngushtë me Policinë e Kosovës dhe misionin e BE-së për sundimin e ligjit (EULEX), në rolet e tyre përkatëse si përgjegjës për sigurinë. Transparenca dhe koordinimi i ngushtë janë me rëndësi të madhe për ne”, tha ai.
KFOR-i vazhdon të përmbushë mandatin e tij afatgjatë të OKB-së, të bazuar në Rezolutën 1244 të vitit 1999, në mënyrë të paanshme dhe në çdo kohë.
“Sa i përket FSK-së, që nga viti 2016, Ekipi Këshillues dhe Ndërlidhës i NATO-s – i cili është i ndarë nga KFOR-i – ka mbështetur zhvillimin e saj nën mandatin e saj fillestar civil të mbrojtjes përmes ndërtimit të kapaciteteve dhe trajnimeve. Vendimet për prokurime ushtarake ose marrëveshje bashkëpunimi dypalëshe janë rezultat i marrëveshjeve ndërmjet institucioneve në Kosovë dhe vendeve individuale; këto çështje nuk bien në mandatin e KFOR-it”, tha ai.
“Nga këndvështrimi i përgjithshëm i sigurisë, KFOR-i ende ka prani të vazhdueshme në Manastirin e Deçanit të Shenjtë, i cili është pjesë e Trashëgimisë Botërore të UNESCO-s. Ky është i vetmi vend fetar ortodoks në Kosovë, siguria e të cilit ende nuk i është dorëzuar Policisë së Kosovës. Në përgjithësi, forcat tona janë të dislokuara në mënyrë fleksibile në të gjithë Kosovën. Patrullat dhe pikat tona të vëzhgimit janë të vendosura në mënyrë strategjike për të siguruar sigurinë e të gjithë njerëzve, përfshirë komunitetin serb. Ne jemi gjithmonë të gatshëm të përshtasim pozicionin tonë sipas nevojës për të vazhduar zbatimin e plotë të mandatit tonë të OKB-së”, ka thënë Ulutash mes tjerash.
Në Spitalin e Përgjithshëm “Dr. Sami Haxhibeqiri” në Mitrovicë ka nisur për herë të parë procesi i skriningut neonatal për foshnjat e porsalindura, duke shënuar një hap të rëndësishëm në përmirësimin e shërbimeve shëndetësore.
Ky projekt po realizohet në bashkëpunim me Shërbimin Spitalor Klinik dhe Universitar të Kosovës dhe Klinikën e Neonatologjisë, me qëllim zbulimin e hershëm të sëmundjeve të lindura metabolike dhe gjenetike.
Skriningu neonatal përfshin marrjen e disa pikave të gjakut nga foshnja, zakonisht nga thembra, menjëherë pas lindjes. Përmes këtij testimi mundësohet identifikimi i hershëm i sëmundjeve, para shfaqjes së simptomave, duke mundësuar trajtim të menjëhershëm dhe parandalimin e komplikimeve serioze apo dëmtimeve të përhershme.
Fillimi i këtij procesi në Repartin e Neonatologjisë është përcjellë nga drejtori ekzekutiv i spitalit, Gëzim Berisha, dhe ushtruesi i detyrës së drejtorit mjekësor, Dr. Qenan Çabra, të cilët janë njoftuar nga shefi i shërbimit të Neonatologjisë, Dr. Agim Sherifi, se mostrat e para tashmë janë marrë nga disa foshnje dhe se zbatimi i projektit ka nisur me sukses.
Menaxhmenti i spitalit ka falënderuar ShSKUK-në dhe Klinikën e Neonatologjisë për mbështetjen në realizimin e këtij projekti, përfshirë edhe furnizimin me reagensët e nevojshëm.
Sipas drejtuesve të institucionit, ky zhvillim përbën një arritje të rëndësishme në rritjen e cilësisë së kujdesit shëndetësor për të porsalindurit në rajonin e Mitrovicës.
Instituti i Kosovës për Drejtësi, ka thënë se nuk do të marrin pjesë në konsultimet ‘’formale’’ për Projektligjin për Byronë.
Nga IKD, thuhet se, mënyra se si po zhvillohet ky proces dëshmon se po tentohet të procedohet me nguti, pa dhënë kohën e nevojshme për një konsultim real, serioz dhe meritor të përmbajtjes së Projektligjit në fjalë, përcjell Gazeta Express.
”Po ashtu, zhvillimi i këtij dëgjimi publik në rrethana të tilla, kur vendi ndodhet vetëm pak ditë para një afati kur pritet të shpërndahet Kuvendi, shton përshtypjen se qëllimi kryesor nuk është zhvillimi i konsultimeve meritore dhe gjithëpërfshirëse, por procedimi sa më i shpejtë i Projektligjit. Një ligj i tillë nuk duhet të trajtohet me nguti dhe as të shtyhet përpara përmes konsultimeve të organizuara në mënyrë të tillë që e bëjnë të pamundur pjesëmarrjen substanciale të shoqërisë civile dhe akterëve të tjerë relevantë”, thuhet mes tjerash në komunikatë.
Komunikata:
IKD: Nuk marrim pjesë në konsultime formale për Projektligjin për Byronë
Prishtinë, 22 prill 2026 – Instituti i Kosovës për Drejtësi (IKD) reagon ndaj mënyrës se si Komisioni për Legjislacion, Mandate, Imunitete, Rregulloren e Kuvendit dhe mbikëqyrjen e Agjencisë kundër Korrupsionit ka thirrur dëgjimin publik për Projektligjin Nr.10/L-019 për Byronë Shtetërore për verifikimin dhe konfiskimin e pasurisë së pajustifikueshme. Përkundër faktit se tentativa për shmangie nga procedurat e rregullta parlamentare nuk është miratuar në seancë plenare, mënyra se si po zhvillohet tash ky proces dëshmon se po tentohet që një projektligj i një rëndësie të madhe që afekton të drejtat e njeriut të procedohet me nguti, pa dhënë kohën e nevojshme për një konsultim real, serioz dhe meritor të përmbajtjes së Projektligjit në fjalë.
Ftesa për pjesëmarrje në dëgjimin publik është publikuar vetëm më pak se 24 orë përpara takimit. Një qasje e tillë nuk mund të konsiderohet serioze dhe as në përputhje me standardet minimale të një konsultimi ku kërkohet kontribut përmbajtësor dhe profesional për një projektligj kaq të ndjeshëm. Me një afat kaq të shkurtër, pjesëmarrja e akterëve relevantë reduktohet në formalitet dhe jo në mundësi reale për të dhënë kontribut meritor në këtë proces.
Në rastin konkret, duke qenë se Projektligji është duke u trajtuar sipas procedurës së rregullt, afati i përcaktuar për thirrjen e dëgjimit publik është në kundërshtim me Nenin 38, paragrafi 7 të Rregullores së Kuvendit, i cili përcakton se ftesa për seancë dëgjimore duhet të shpallet në ueb-faqen e Kuvendit të paktën pesë (5) ditë para takimit, së bashku me agjendën, projektligjin që do të diskutohet dhe materialet përcjellëse.
Siç dihet, ky Projektligj është rrëzuar dy herë në Gjykatën Kushtetuese, një herë për meritat e tij dhe një herë për procedurën e ndjekur. Derisa trajtohet për herë të tretë në Kuvend, në dy (2) raste Qeveria nuk ka zhvilluar fare konsultime publike derisa në rastin tjetër ka shkurtuar në mënyrë arbitrare afatin e konsultimeve publike. Në këto rrethana, duke pasur parasysh këto aspekte dhe rëndësinë e këtij projtligji, çdo veprim që reflekton nguti, formatitetit apo përfshirje vetëm sa për të përmbushur një kërkesë procedurale, cenon seriozisht besueshmërinë e procesit dhe përmbajtjen e Projektligjit në fjalë.
Po ashtu, zhvillimi i këtij dëgjimi publik në rrethana të tilla, kur vendi ndodhet vetëm pak ditë para një afati kur pritet të shpërndahet Kuvendi, shton përshtypjen se qëllimi kryesor nuk është zhvillimi i konsultimeve meritore dhe gjithëpërfshirëse, por procedimi sa më i shpejtë i Projektligjit. Një ligj i tillë nuk duhet të trajtohet me nguti dhe as të shtyhet përpara përmes konsultimeve të organizuara në mënyrë të tillë që e bëjnë të pamundur pjesëmarrjen substanciale të shoqërisë civile dhe akterëve të tjerë relevantë.
Për këto arsye, IKD vlerëson se pjesëmarrja në këtë dëgjim publik do të nënkuptonte vetëm validim të një tendence për procedim të përshpejtuar, jo adekuat dhe përfshirje vetëm formale në konsultime publike. Prandaj, IKD njofton publikisht se nuk do të marrë pjesë në këtë takim.
IKD deri më tani ka dhënë kontribut të vazhdueshëm për këtë Projektligj, që nga koha e inicimit të tij. Kjo duke marrë pjesë në të gjitha takimet e mbajtura, duke publikuar analiza, dërguar komente dhe marrë pjesë në takimet e Komisionit të Venecias përkitazi me këtë Projektligj. IKD mbetet e përkushtuar që të kontribuojë tutje në çdo proces serioz, të rregullt dhe gjithëpërfshirës të konsultimit publik, ku koha, forma dhe mënyra e organizimit të mundësojnë trajtim meritor të çështjeve të ngritura. Megjithatë, pjesëmarrja në procese të organizuara në mënyrë të ngutshme dhe formale nuk i shërben cilësisë së legjislacionit dhe interesit publik.
Kryetari i Lidhjes Demokratike të Kosovës, Lumir Abdixhiku, ka njoftuar se ka mbajtur një takim virtual me të gjitha 88 nëndegët e kësaj partie në mërgatë.
Përmes një postimi në Facebook, ai thotë se i ka njoftuar për rrjedhën e proceseve negociuese, të cilat, sipas tij, fatkeqësisht kanë dështuar, përkundër vullnetit maksimal dhe kërkesave minimale të partisë.
Ndër të tjera, Abdixhiku njofton se është dakorduar për mobilizim të plotë dhe nisjen e menjëhershme të përgatitjeve për tubime e takime në mërgatë.
Postimi:
Në vijim të zhvillimeve të fundit, dhe në përgatitje për hapat e ardhshëm, mbajtëm një takim virtual me të gjitha 88 nëndegët e LDK-së në mërgatë.
I njoftova për rrjedhën e proceseve negociuese, të cilat fatkeqësisht dështuan, përkundër vullnetit tonë maksimal dhe kërkesave tona minimale – veç demokraci. Por ky dështim nuk është fund; është moment kthese. Dhe atë kthesë e madhe per Lidhjen.
Folëm hapur për momentin politik dhe për domosdoshmërinë e bashkimit të së djathtës brenda LDK-së; si rruga e vetme për ta kthyer drejtimin e vendit dhe për të ndërtuar një alternativë të denjë për qytetarët.
U dakorduam për mobilizim të plotë dhe nisjen e menjëhershme të përgatitjeve për tubime e takime në mërgatë. Mërgata jonë nuk është vetëm mbështetje; është pjesë vendimtare e kthesës që po ndërtojmë.
Koha për pritje ka përfunduar.
Koha për veprim ka nisur.
Ushtruesja e detyrës së presidentes, Albulena Haxhiu në një takim me Kryesuesin e Këshillit Prokurorial, Arian Gashi kanë folur rreth përmbylljes sa më të shpejtë të procesit për zgjedhjen e Kryeprokurorit të Shtetit.
Ajo përmes një njoftimi në rrjetet sociale bëri me dije se me Gashin diskutuan edhe për arritjet dhe sfidat me të cilat përballet sistemi prokurorial në vend.
“Folëm për reformat në drejtësi dhe domosdoshmërinë e përmbylljes sa më të shpejtë të procesit për zgjedhjen e Kryeprokurorit të Shtetit.Po ashtu folëm edhe për nevojat buxhetore, infrastrukturën, si dhe nevoja për më shumë prokurorë dhe staf mbështetës, çështje që ndikojnë në efikasitetin institucional.
Riafirmova përkushtimin për pavarësinë institucionale dhe forcimin e sundimit të ligjit në Republikën e Kosovës”, tha Haxhiu.
Ukraina i ka kërkuar Turqisë të ndihmojë në organizimin e një takimi të mundshëm mes presidentit ukrainas Volodymyr Zelensky dhe homologut të tij rus Vladimir Putin, në përpjekje për të ringjallur bisedimet e paqes, ka thënë ministri i Jashtëm ukrainas Andriy Sibiha.
Sibiha ka deklaruar se kërkesa i është bërë jo vetëm Turqisë, por edhe disa kryeqyteteve të tjera, duke theksuar se Ukraina është e gatshme të shqyrtojë çdo vend si mikpritës të mundshëm, përveç Rusisë dhe Bjellorusisë.
Sipas tij, Bjellorusia nuk është një opsion për shkak të rolit të saj si aleate e Rusisë dhe përdorimit të territorit të saj në fillimin e pushtimit të Ukrainës në vitin 2022. Ai shtoi se Ukraina do të pranonte çdo vend neutral që mund të lehtësojë dialogun.
Nga ana tjetër, Kremlini ka deklaruar se është i gatshëm që Zelensky të zhvillojë takim në Moskë, por presidenti ukrainas e ka përjashtuar këtë mundësi.
Ministri Sibiha nuk ka dhënë detaje mbi përgjigjen e Turqisë ndaj kërkesës, por ka theksuar se Kievi mbetet i hapur për çdo iniciativë ndërkombëtare që mund të çojë drejt një zgjidhjeje të luftës që vijon prej më shumë se katër vitesh.
Mosrespektimi i rregullave të komunikacionit është një ndër arsyet e aksidenteve të shumta që po ndodhin çdo ditë. E një prej mënyrave të zakonshme për parandalimin e këtyre aksidenteve, është gjobitja e atyre që shkelin rregullat në trafik, shkruan Gazeta Sinjali.
Statistikat tregojnë se mijëra gjoba shqiptohen çdo ditë në vendin tonë.
Vetëm në 24-orëshin e fundit janë shënuar 1,795 gjoba trafiku të shqiptuara nga Policia e Kosovës.
Siç bëhet e ditur në raportin policor, gjatë ditës së djeshme nuk është shënuar asnjë aksident trafiku me fatalitet, 27 aksidente trafiku me persona të lënduar, si dhe 36 aksidente me dëme materiale.
Sa i përket sigurisë publike, janë arrestuar 13 persona, ndërsa 10 persona janë dërguar në mbajtje. Gjatë kësaj periudhe nuk është raportuar asnjë rast i ndalimit policor.
Kryetari i Lidhjes Demokratike të Kosovës, Lumir Abdixhiku, ka mbajtur takim virtual me 88 nëndegët e LDK’së në mërgatë, pas zhvillimeve të fundit ku dështuan bisedimet rreth një marrëveshje për president.
Abdixhiku ka thënë se janë dakorduar për mobilizim të plotë dhe nisjen e menjëhershme të përgatitjeve për tubime e takime në mërgatë, shkruan Reporteri.net.
“Mërgata jonë nuk është vetëm mbështetje; është pjesë vendimtare e kthesës që po ndërtojmë”, ka shkruar Abdixhiku.
Ai ka thënë se koha për pritje ka përfunduar dhe se ka nisur ajo për veprim.
“I njoftova për rrjedhën e proceseve negociuese, të cilat fatkeqësisht dështuan, përkundër vullnetit tonë maksimal dhe kërkesave tona minimale – veç demokraci. Por ky dështim nuk është fund; është moment kthese. Dhe atë kthesë e madhe per Lidhjen. Folëm hapur për momentin politik dhe për domosdoshmërinë e bashkimit të së djathtës brenda LDK-së; si rruga e vetme për ta kthyer drejtimin e vendit dhe për të ndërtuar një alternativë të denjë për qytetarët”, ka shkruar Abdixhiku.