Category: Lajme

Ministrja e Industrisë, Mimoza Kusari-Lila ka pritur në takim ministrin e Tregtisë së Turqisë, Omer Bolat, në vizitën e tij të parë zyrtare gjatë këtij mandati.

Gjatë takimit, palët vlerësuan marrëdhëniet e mira ndërmjet dy vendeve dhe theksuan rëndësinë e thellimit të bashkëpunimit strategjik.

“Kosova dhe Turqia janë dy vende mike dhe bashkëpunimi ynë strategjik në fushën e sigurisë, diplomacisë, ekonomisë dhe shumë fusha tjera, po zgjerohet dhe forcohet me bashkëpunime të reja”, ka deklaruar ministrja.

Ajo theksoi se shkëmbimet tregtare kanë shënuar rritje, sidomos në eksportet nga Kosova, por mbetet sfidë niveli më i lartë i importeve nga Turqia.

“Kemi ende punë për të bërë pasi importet vazhdojnë të jenë në masë më të larta. Ky deficit nga ana e Kosovës kërkon qasje të re dhe më shumë fokus në zhvillimin e prodhimit dhe tërheqjen e investimeve turke në sektorin e prodhimit”, thuhet në njoftim.

Një ndër temat kryesore ishte edhe zgjerimi i Marrëveshjes së Tregtisë së Lirë, për të përfshirë sektorin e shërbimeve.

“Duke e marrë parasysh se shkëmbimi tregtar në shërbime ka rritje eksponenciale për Kosovën, u dakorduam që kjo marrëveshje të zgjerohet duke përfshirë edhe tregtinë e lirë në shërbime”, ka theksuar ajo.

Po ashtu, u diskutua për avancimin e bashkëpunimit përmes komisionit të përbashkët ekonomik JETCO dhe për mundësitë në teknologji dhe parqe industriale.

“Kosova ka potencial të madh, sidomos në kapitalin njerëzor. Prandaj, bashkëpunimi ynë duhet të zgjerohet edhe në shërbime, inovacion dhe investime strategjike”, ka përfunduar Kusari-Lila.

Kryetari i Prishtinës, Perparim Rama, ka bërë të ditur se në Ditën e Tokës është realizuar mbjellja e rreth 100 kurorave të reja në rrugën “Tirana”, si pjesë e përpjekjeve për zgjerimin e hapësirave të gjelbra në qytet.

“Mbjellja e rreth 100 kurorave të reja në rrugën ‘Tirana’, në Ditën e Tokës, shënon një hap konkret drejt gjelbërimit të hapësirave urbane”, ka shkruar Rama.

Sipas tij, kjo ndërhyrje synon të përmirësojë cilësinë e ajrit dhe të kontribuojë në transformimin gradual të zonës në një hapësirë më të jetueshme për qytetarët.

“Kjo ndërhyrje synon përmirësimin e cilësisë së ajrit dhe transformimin gradual të zonës në një hapësirë më të jetueshme për qytetarët”, thotë tutje ai.

Kryetari i Lidhjes Demokratike të Kosovës, Lumir Abdixhiku, ka pritur në takim shefen në detyrë të Bashkimit Evropian në Kosovë, Eva Palatova.

Sipas njoftimit të LDK-së, gjatë takimit u diskutua për zhvillimet e fundit politike në vend, me theks të veçantë në proceset negociuese dhe situatën aktuale institucional.

Abdixhiku theksoi se, përkundër angazhimit maksimal dhe qëndrimeve të qarta të LDK-së në mbrojtje të parimeve demokratike, këto procese nuk kanë prodhuar rezultat.

“Në këtë kontekst kryetari Abdixhiku nënvizoi nevojën urgjente për stabilitet institucional, përgjegjësi politike dhe ndërtimin e një alternative të qëndrueshme, që i përgjigjet pritjeve të qytetarëve për zhvillim dhe mirëqenie. Kryetari Abdixhiku shprehu mirënjohje për mbështetjen e vazhdueshme që Bashkimi Evropian i ka dhënë Kosovës, duke vlerësuar rolin e BE-së si të rëndësishëm në forcimin e demokracisë, sundimit të ligjit dhe avancimin e agjendës evropiane të vendit”, thuhet në njoftim.

Endrit Thaçi, djali i ish-presidentit Hashim Thaçi, ka publikuar një fotografi të babait të tij.

Në këtë fotografi, Thaçi shihet krah komandantit legjendar Adem Jashari.

Ky mesazh i Endritit erdhi pas deklarimit të djeshëm të deputetit të VV-së, Fatos Geci.

Anëtari i PSD-së Nol Nushi ka komentuar deklaratat politike dhe mënyrën e reagimit të kryeministrit Albin Kurti lidhur me deklaratën e deputetit Fatos Geci në Kuvendin e Kosovës.

Geci në seancë kishte krahasuar gjykimin e ish-presidentit Hashim Thaçi dhe të tjerëve në Gjykata Speciale me rastin e Naim Murseli, duke lënë të kuptohet se mund të ketë të njëjtin rezultat me dënim të përjetshëm.

Në një paraqitje në emisionin Kosova Live në T7, Nushi kritikoi mënyrën se si kryeministri Kurti është distancuar nga deklarata, duke theksuar se deputeti Geci është pjesë e Lista Guxo dhe jo e Lëvizja Vetëvendosje.

Ai u shpreh:

“Ai po don me mbajt gjallë këtë urrejtje dhe e ka gjetë një vegël që është Lista Guxo, ku krejt ata që kanë qëndrime të ashpra ndaj UÇK-së, ndaj komandantëve dhe ndaj luftës në përgjithësi, regjistrohen dhe anëtarësohen në Guxo dhe bëhen deputetë përmes kësaj partie. Pastaj Kurti del lehtë dhe thotë: ‘këta s’janë në partinë time’.”

Nushi shtoi se, sipas tij, kryeministri Kurti po tenton të mbajë gjallë një narrativë të tillë përmes bashkëpunimeve politike, përfshirë edhe me Lidhja Demokratike e Kosovës.

“Mundet nesër, masnesër me u themelu një parti anti-UÇK, le të regjistrohen këta njerëz në atë parti dhe e dimë të gjithë. Mirëpo Kurti po don me mbajt gjallë këtë urrejtje ndaj krahut të luftës. Sepse siç po shihet, Kurti është zgjeruar duke u lidhë me LDK-në, që është, si të them, pjesa përballë krahut të luftës”, tha ai.

Deputetja e Partisë Demokratike të Kosovës (PDK), Ganimete Musliu, ka reaguar ndaj deputeti të Grupit Parlamentar të Lëvizjes Vetëvendosje Fatos Geci, pasi përdori gjuhë seksiste ndaj Vlora Çitakut.

Musliu tha se Çitaku nuk ofendohet e as nuk frikësohet, duke thënë se zëri i tyre do të jetë gjithmonë më i fortë sesa çdo tentativë për ta shuar atë.

“Sa herë më kanë ofenduar, më kanë paragjykuar, bullizuar e më kanë kërcënuar, asnjëherë nuk jam viktimizuar dhe nuk kam kërkuar mbështetje apo mbrojtje nga askush. Ama kam reaguar fuqishëm dhe me zë të lartë kundër tendencës që sharjet, fyerjet e kërcënimet të bëhen normë, të bëhen standard në vendin tonë”.

“Edhe sot e dënoj ashpër gjuhën që u përdor ndaj Nënkryetares së Kuvendit, Vlora Çitaku. Jo pse Vlora ndjehet e ofenduar as që ja ka frikën dikujt por për t’i treguar secilit që merr guximin të ofendojë, linçojë apo kërcënojë një grua, se rruga jonë është rrugë e trasuar nga gra që kanë sfiduar mentalitete kanë thyer barriera kanë mposhtur aqrmiq dhe nuk janë zmbrapsur asnjëherë para padrejtësisë nga kushdo që ka ardhë. Prandaj, kushdo që mendon se mund të na heshtë me fyerje apo kërcënime, gabon rëndë. Ne nuk tërhiqemi, nuk frikësohemi dhe nuk ndalemi. Zëri ynë do të jetë gjithmonë më i fortë se çdo tentativë për ta shuar atë”, ka shkruar Musliu në Facebook.

Sundimi i ligjit, garanci e forcimit të shtetit ligjor dhe e barazisë para ligjit. Kështu ka thënë zëvendëskryeministrja dhe ministrja e Drejtësisë, Donika Gërvalla pas takimi që ka zhvilluar me kryesuesin e Komisionit për Çështje Juridike në Parlamentin Evropian, Ilhan Kyuchyuk.

Ajo ka thënë se në këtë takim folën për zhvillimet në fushën e drejtësisë dhe sfidat që lidhen me forcimin e sundimit të ligjit, luftimin e korrupsionit dhe krimit të organizuar.

“Theksi u vu në çështjet që prekin integritetin dhe funksionalitetin e sistemit, përfshirë procesin e Vetingut, funksionalizimin e Byrosë Shtetërore për Verifikimin dhe Konfiskimin e Pasurisë së Pajustifikueshme, si dhe paketën e pesë projektligjeve që synojnë konsolidimin e kornizës ligjore dhe institucionale”, ka shkruar Gërvalla në Facebook.

Tutje ajo ka thënë se reformat në drejtësi nuk janë opsion, por parakusht për shtet funksional.

“Kosova do t’i çojë përpara me vendosmëri, përmes një sistemi që garanton drejtësi reale, lufton korrupsionin dhe krimin e organizuar në mënyrë efektive, dhe e bën të pakthyeshme rrugën tonë evropiane”, ka shkruar tutje Gërvalla.

Gjatë ditës së nesërme pritet të mbahet seanca e radhës e Kuvendit.

Sipas njoftimit për media, seanca pritet të mbahet duke nisur nga ora 10:00.

Po ashtu në njoftim është bërë i ditur edhe rendi i ditës:

1. Shqyrtimi i dytë i Projektligjit nr.10/L-030 për Masat e Përkohshme të Produkteve Themelore në Raste të Veçanta të Destabilizimit në Treg,
2. Shqyrtimi i dytë i Projektligjit nr.10/L-028 për Sigurimin e Detyrueshëm të Kujdesit Shëndetësor,
3. Shqyrtimi i dytë i Projektligjit nr.10/L-025 për ndryshimin dhe plotësimin e Ligjit nr.06/L-032 për Kontabilitet, Raportim Financiar dhe Auditim,
4. Shqyrtimi i dytë i Projektligjit nr.10/L-026 për Shërbimet e Pagesave,
5. Shqyrtimi i dytë i Projektligjit nr.10/L-027 për Lojërat Mesdhetare XXI Prishtina 2030,
6. Shqyrtimi i dytë i Projektligjit nr.10/L-021 për Financimin e Menaxhimit të Resurseve Ujore,
7. Shqyrtimi i dytë ë iProjektligjit nr.10/L-022 për Banim Social dhe të Përballueshëm,
8. Shqyrtimi i dytë i Projektligjit nr.10/L-023 për Shtetësinë e Kosovës,
9. Shqyrtimi i dytë i Projektligjit nr.10/L-024 për Lëndët Plasëse,
10. Shqyrtimi i dytë i Projektligjit nr.10/L-029 për Provimin e Maturës Shtetërore.

Numri i imigrantëve që jetojnë në Bashkimin Evropian është rritur në një rekord prej 64,2 milionë në vitin 2025, që është rreth 2,1 milionë më shumë se një vit më parë, sipas një raporti të publikuar nga Qendra për Kërkime dhe Analizë të Migracionit.

Para 16 vitesh, pra në vitin 2010, numri i imigrantëve ishte 40 milionë, thuhet në raport, duke u bazuar në të dhënat e Eurostat-it dhe Agjencisë së Kombeve të Bashkuara për Refugjatët.

Gjermania vazhdon të jetë vendi më i madh në BE për nga numri i personave të lindur jashtë vendit, me gati 18 milionë, nga të cilët 72 për qind janë në moshë pune, ndërsa Spanja ka shënuar rritjen më të shpejtë së fundmi, duke shtuar rreth 700 mijë persona, çka e ka çuar numrin e banorëve të lindur jashtë vendit në 9,5 milionë.

“Gjermania mbetet destinacioni kryesor për migrantët në Evropë, si në shifra absolute, ashtu edhe në mënyrë të konsiderueshme në raport me popullsinë e saj”, tha Tommaso Frattini, një nga autorët e raportit, shkruajnë mediat.

Studimi thekson se modelet e migracionit janë të pabarabarta në gjithë bllokun, ku Luksemburgu, Malta dhe Qipro kanë një përqindje më të lartë të imigrantëve në raport me madhësinë e popullsisë së tyre.

Kërkesat për azil gjithashtu janë të përqendruara në disa vende, ku Spanja, Italia, Franca dhe Gjermania përbëjnë gati tre të katërtat e të gjitha kërkesave për azil. Gjermania ka pasur gjithashtu numrin më të madh të përgjithshëm të refugjatëve, me 2,7 milionë. /Telegrafi/

Iranianët thonë se do të vazhdojnë bisedimet në Islamabad për sa kohë që SHBA-të heqin bllokadën.

Pra, zgjatja e armëpushimit është një sinjal pozitiv, por ende nuk po merren sinjale pozitive dhe as sinjale negative nga Teherani për zhvillimin e negociatave ne SHBA-në.

Situata mund të karakterizohet nga tre faktorë, së pari, paqartësia. Koha po kalon dhe tani ka një zgjatje, por mundësia e një raundi tjetër konfrontimi mbetet ende i paqartë.

Së dyti, thyeshmëria. Të gjithë presin të papriturën dhe e vetmja pikë e sigurt tani për tani është pasiguria.

Së treti, kompleksiteti. Po flasim për zgjatjen e armëpushimit dhe angazhimin e mundshëm diplomatik, ndërkohë që e dimë se ka shumë pika ngërçi. Ngushtica e Hormuzit, dosja bërthamore, lehtësimi i sanksioneve, asetet e ngrira, raketat balistike të Iranit, dëmshpërblimet e luftës dhe marrëdhëniet rajonale të Iranit. Qëndrimet e të dy palëve janë shumë të ndryshme për këto çështje.

Burimet thonë se nuk është më thjesht mosbesim, por dyshim në lidhje me çdo afrim me SHBA-në.