Category: Lajme

Ukraina përdori sisteme interceptuese për të rrëzuar më shumë se 33 mijë dronë rusë të llojeve të ndryshme në mars, një shifër rekord mujore që kur Moska nisi pushtimin e saj të plotë më shumë se katër vjet më parë, pohoi ministri i mbrojtjes i Ukrainës.

Ndërkohë, dronët sulmues me rreze të gjatë veprimi të zhvilluar në vend të Ukrainës goditën një rafineri nafte dhe terminal rus në Detin e Zi për herë të tretë në më pak se dy javë, duke shkaktuar evakuimin e banorëve vendas si një masë paraprake, raporton Reuters

Ukraina ka zhvilluar teknologji të përparuar dhe të testuar në betejë të dronëve që ka rezultuar thelbësore në frenimin e ushtrisë më të madhe të Rusisë dhe ka tërhequr interes ushtarak nga e gjithë bota.

Dronët interceptues si pjesë e një sistemi gjithëpërfshirës të mbrojtjes ajrore tani po kërkohen nga vendet e Lindjes së Mesme dhe të Gjirit, mes luftës në Iran, sipas zyrtarëve ukrainas.

Vullnet Bugaqku nga KDI ka bërë të ditur se vendi me automatizëm do të shkojë në zgjedhje të jashtëzakonshme, nëse sot nuk arrihet zgjedhja e presidentit.

Bugaqku tha se nuk është e nevojshme as ndonjë dekret nga ushtruesja e detyrës së presidentes, Albulena Haxhiu.

“Nuk ka nevojë të ketë dekret. Nëse sot, deri në ora 00:00, nuk ka vendim të Kuvendit për të zgjedhur presidentin në mënyrë legjitime, në mënyrë Kushtetuese, atëherë me automatizëm ne shkojmë në zgjedhje, dhe duhet nga nesër e tutje të caktohet vetëm data e zgjedhjeve, dhe ato data mund të jenë ose 31 marsi, ose 7 qershori”, u shpreh ai

Kujtojmë se shkuarja direkt në zgjedhje në qoftë se dështon zgjedhja e shefit të shtetit, është paraparë edhe në aktgjykimin e Gjykatës Kushtetuese.

Një vajzë 15-vjeçare është sulmuar mëngjesin e sotëm nga qentë në Prishtinë.

Ngjarja ka ndodhur rreth orës 07:20, te hyrja e Ortopedisë në Qendrën Klinike Universitare të Kosovës (QKUK).

E mitura është dërguar për trajtim në Qendrën Emergjente, ndërsa Telegrafi ka kontaktuar me Drejtorin e Qendrës së Klinikës Emergjente në QKUK, Naser Syla, i cili ka bërë të ditur se ajo është liruar për në shtëpi në gjendje stabile.

“Vajza është lëshuar në gjendje stabile. Janë vërejtur plagë të lehta në trup dhe është trajtuar me terapi përcjellëse”, ka deklaruar Syla për Telegrafi.

Lidhur me situatën e qenve endacakë në këtë zonë, Telegrafi ka kontaktuar edhe me Habib Qorrin, udhëheqës i Sektorit për Shërbime Publike në Komunën e Prishtinës, i cili ka thënë se zona e QKUK-së vazhdon të mbetet ndër pikat më problematike për menaxhim.

“Zona e QKUK-së vazhdon të jetë një pikë kritike për t’u menaxhuar nga qentë endacak, pasi në vazhdimësi ka pasur sulme të tyre ndaj qytetarëve”, ka thënë Qorri.

Ai ka bërë të ditur se komuna ka ndërhyrë në disa raste, duke larguar një numër të konsiderueshëm qenësh nga kjo hapësirë.

“Ne kemi intervenuar në largimin e tyre në disa raste, që janë larguar rreth 100”, ka theksuar Qorri.

Sipas tij, një problem shtesë mbetet edhe fakti se në Prishtinë sillen qen nga pjesë të tjera të Kosovës, çka e vështirëson menaxhimin dhe kontrollin.

“Po ashtu një problematikë tjetër është që ka edhe qen që sillen nga pjesë tjera të Kosovës në Prishtinë… kjo mbetet një sfidë më e madhe për Komunën e Prishtinës për shkak të mekanizmave hulumtues dhe identifikimin e personave që i lëshojnë në mënyrë të fshehtë”, ka thënë ai.

Qorri ka vlerësuar se problemi kërkon trajtim në nivel qendror dhe se pa ndërhyrje institucionale nga shteti, situata do të vazhdojë të përsëritet.

“Andaj ky problem vazhdon të jetë në nivel qendror dhe pa ndërhyrje nga shteti, do të vazhdojë kjo problematikë… pasi komuna i largon, prap sillen qen të rinj”, ka deklaruar Qorri, duke shtuar se “qytetarët e vuajnë më së shumti”.

Kreu i PDK-së, Bedri Hamza, ka reaguar në profilin e tij në ‘facebook’ pak para nisjes së seancës së dytë të cilën kryetarja e Kuvendit, Albulena Haxhiu, e ka caktuar për në orën 14:00.

Hamza ka thënë se Kosova sot gjendet përballë një akti të rrezikshëm për të ardhmen e vendit.

“Sot jemi përballë një akti të rrezikshëm për të ardhmen e shtetit tonë. Përpjekja për zgjedhjen e Presidentit në mënyrë të njëanshme dhe me shkelje flagrante të Kushtetutës është sulm ndaj shtetit të së drejtës, që minon rendin tonë demokratik”, ka shkruar Hamza.

Ehat Miftaraj nga IKD-ja ka thënë se kryetarja e Kuvendit të Kosovës, Albulena Haxhiu është duke bërë përpjekje për të krijuar kuorum artificial dhe të pabazuar në Kushtetutë dhe praktika të Gjykatës Kushtetuese për zgjedhjen e presidentit.

Sipas tij, këto janë pretendime të bazuara në interesa puro partiake.

“Pretendimet e bazuara ne interesa puro partiake për një detyrim kushtetues të deputetëve që të qëndrojnë në seancë plenare gjatë procedurës së zgjedhjes së Presidentit janë fiktive dhe të pabazuara”, ka thënë Miftaraj.

“Mandati i deputetit është i lirë. Nuk mundet Albulena Haxhiu e as LVV qe te kushtezoj apo imponoj kërkesa për “leje” nga Kryetari i Kuvendit per te munguar nga seanca ne Kuvend”, ka thënë ai.

“Kjo eshte e tejkaluar dhe nuk ka baze kushtetuese. Çdo përpjekje për ta paraqitur mungesën e deputetit si shkelje procedurale që ndikon në vlefshmërinë e procesit përbën interpretim të pabazuar të kompetencave parlamentare. Kjo nuk I hap në asnjë rrethanë rruge Albilena Haxhiut apo LVV zgjedhjen e Presidentit pa 80 vota ne kutine e votimit ne roundin e pare dhe te dyte”, ka sqaruar Miftaraj.

Sipas tij, procedura për zgjedhjen e Presidentit duhet të respektojë jo vetëm tekstin, por edhe frymën e Kushtetutës, siç është interpretuar nga Gjykata Kushtetuese e Kosovës. Ndërsa Kushtetuta parasheh që në raundin e tretë Presidenti mund të zgjidhet me shumicë të thjeshtë prej 61 votash.

“Çdo skenar që synon të prodhojë kuorum artificial apo të instrumentalizojë mungesën e opozitës për të justifikuar një zgjedhje me shumicë te thjeshte ne rundin e pare cenon rendin kushtetues per interesa puro partiake me qellim qe rasti te shkoj ne Gjykate Kushtetuese dhe shtyrjen e dates se zgjedhjeve sipas interesave te LVV dhe kur ata e shohin te arsyeshme dhe kur ata mendojne se mund ta kapitalizojnë vullnetin e votuesit ne vote per VV”, ka thënë ai.

Shoqata për parandalimin e duhanit propozon gjoba deri në 500 franga dhe rregulla më të qarta në stacionet hekurudhore

Në stacionet hekurudhore të Zvicrës, pirja e duhanit dhe përdorimi i cigareve elektronike lejohet vetëm në zona të caktuara pranë hiriçeve, brenda një rrezeje prej dy metrash. Megjithatë, përdorimi i vape-it jashtë këtyre hapësirave po shkakton gjithnjë e më shumë ankesa nga pasagjerët, përcjell albinfo.ch.

Shoqata Zvicerane për Parandalimin e Duhanit ka kërkuar që kompania hekurudhore SBB të ashpërsojë masat ndaj shkeljeve, duke përfshirë edhe ndalimin e përdorimit të cigareve elektronike në pjesë të tjera të platformave dhe madje edhe brenda trenave.

Drejtori i shoqatës, Luciano Ruggia, ka propozuar që për shkeljet e ndalimit të vendoset një gjobë prej 500 frangash, duke e cilësuar këtë masë si të arsyeshme dhe të nevojshme për zbatimin e rregullave.

Po ashtu, ai ka kërkuar që sinjalistika në stacione të jetë më e qartë, duke përfshirë shenja që tregojnë si cigaret tradicionale ashtu edhe ato elektronike, si dhe shënime në dysheme për të identifikuar zonat e lejuara për pirje duhani.

Sipas tij, mungesa e qartësisë aktuale po çon në mosrespektim të rregullave dhe përdorim të pakontrolluar të produkteve të duhanit në hapësira publike.

Deputeti i Kuvendit të Republikës së Kosovës dhe ish-kryeministri, Avdullah Hoti, ka reaguar publikisht përmes një statusi në Facebook, ka reaguar për situatën e fundit të krijuar në Kuvendin e Kosovës, pas seancës së mbrëmshme, ku të pranishëm ishin 64 deputetë e ë tentuan ta zgjedhin presidentin.

Në deklaratën e tij, Hoti ka nënvizuar se rendi kushtetues duhet të qëndrojë mbi çdo interes politik, partiak apo individual, duke e cilësuar atë si themel të funksionimit demokratik të shtetit.

Ai ka paralajmëruar se cenimi i këtij rendi nuk duhet të lejohet në asnjë rrethanë.

“Rendi kushtetues është mbi çdo politikë, mbi çdo parti, mbi çdo individ. Cenimi i këtij rendi nuk lejohet në asnjë rrethanë”, ka shkruar Hoti.

Elisa Spiropali ka reaguar sërish publikisht përmes një postimi në rrjetet sociale, duke vijuar përplasjen verbale me Edi Rama dhe Partia Socialiste e Shqipërisë.

Në reagimin e saj, Spiropali thekson se debatet e brendshme nuk duhet të kthehen në “spektakël ndëshkimor publik”, duke paralajmëruar se një qasje e tillë tregon frikë nga mendimi ndryshe.

Ajo shprehet e vendosur se nuk do të tërhiqet nga kritikat e saj ndaj mënyrës së funksionimit të partisë, qeverisë dhe shtetit.

Sipas Spiropalit, problemi nuk qëndron te zëri kritik, por te një sistem që nuk e toleron atë. Ajo thekson se nuk ka sulmuar Partinë Socialiste, por ka ngritur shqetësime për modele që, sipas saj, po e dëmtojnë atë.

Spiropali thekson se mospajtimi nuk është tradhti, por forma më e lartë e besnikërisë në politikë. Ajo kundërshton idenë e bindjes së verbër dhe paralajmëron për rrezikun e një modeli që kërkon nënshtrim në vend të debatit.

Në fund të reagimit, ajo rikthen edhe një herë sfidën e saj të drejtpërdrejtë: “Nëse nuk respektohet e drejta për të folur, zgjidhja është një: më përjashto.”

Njësitet policore në rajonin e Mitrovicës së Jugut, gjatë dy ditëve të fundit në kohë dhe lokacione të ndryshme, kanë konfiskuar tri armë.

Në njoftim thuhet se një armë e gjatë është konfiskuar në zonën e Mitrovicës, ku arma ishte gjetur në automjetin e personit të dyshuar.

Një armë tjetër e gjatë është konfiskuar në zonën e Vushtrrisë, pasi që personi i dyshuar kishte publikuar një video incizim duke shtënë me armë zjarri.

“Policia ka identifikuar personin dhe lokacionin dhe pas reagimit të policisë, është konfiskuar arma me të cilën i dyshuari kishte shtënë gjatë një ahengu familjar”, thuhet në njoftim.

Arma e tretë është konfiskuar në zonën e Skenderajt, pasi që ishte pranuar informata se ishin dëgjuar të shtëna në një rrugë malore.

“Policia ka intervenuar dhe kanë hasur personin e dyshuar dhe pas kontrollit i kishin gjetur një armë e shkurtër në brez. Armët janë konfiskuar dhe janë proceduar në cilësinë e provave material”, njoftoi policia.

Në njoftim thuhet gjithashtu se tre personat e dyshuar, pas intervistimit dhe procedurave tjera, me udhëzim të prokurorit, janë liruar në procedurë të rregullt.

Ndaj të treve janë iniciuar raste penale për armëmbajtje pa leje dhe përdorim të armës./

Ministri i Bujqësisë, Pylltarisë dhe Zhvillimit Rural, Armend Muja, ka njoftuar për vendosjen e masave të reja për kategorizimin e produkteve të qumështit në tregun e Kosovës, raporton Ekonomia Online.

Në një konferencë për media, Muja bëri të ditur se qëllimi kryesor është mbrojtja e konsumatorit dhe prodhuesve vendas.

Ministri theksoi se nga tani e tutje, secili produkt i qumështit duhet të kategorizohet drejt dhe nuk do të lejohet më përzierja e qumështit të freskët me produkte që përmbajnë pluhur apo vaj palme.

“Zbatimi i masave: Agjencia e Ushqimit dhe Veterinarisë (AUV) është autorizuar që t’i zbatojë këto masa në mënyrë të rreptë dhe proporcionale.

Afati kohor: Këto masa do të jenë në fuqi për një periudhë fillestare prej 90 ditësh, me mundësi vazhdimi.

Sipas Mujës, këto vendime janë në interes të mbrojtjes së qumështit të freskët dhe ekonomive familjare në Kosovë”.

Ministri Muja u ka bërë thirrje të gjithë operatorëve ekonomikë në të gjithë territorin e Kosovës që t’i përmbahen me përpikëri dispozitave të reja.

Ai gjithashtu falënderoi mediat për ngritjen e kësaj çështjeje, duke kërkuar ndihmën e tyre në shpërndarjen e këtij mesazhi te qytetarët.

“Është në interes të mbrojtjes së konsumatorit dhe qumështit të freskët,” përfundoi Muja.