ATV

Category: LAJME

  • Shënohet 52-vjetori i Ditës Botërore të Romëve, Kryeministri Kurti ua uron komunitetit rom

    Shënohet 52-vjetori i Ditës Botërore të Romëve, Kryeministri Kurti ua uron komunitetit rom

    Kryeministri i Republikës së Kosovës, Albin Kurti, mbrëmë ishte i ftuar në manifestimin e organizuar nga OJQ “Romani Baht” në bashkëpunim me Partinë Përparimtare Rome, të drejtuar nga deputeti Erxhan Galushi, në shënim të 8 Prillit, Ditës Botërore të Romëve.

    Në pamundësi për të marrë pjesë në këtë ngjarje, kryeministri Kurti përcolli një letër përshëndetëse te të pranishmit që u lexua nga këshilltarja e tij, Nurie Shala.

    Më poshtë gjeni, letër përshëndetjen dhe urimin e plotë:

    Të nderuar anëtarë të Partisë Përparimtare Rome,

    I nderuar kryetar Erxhan Galushi,

    Të nderuar të pranishëm, zonja dhe zotërinj,

    Në pamundësi që të jem sot i pranishëm në festën tuaj, më lejoni që përzemërsisht të ju uroj Ditën Ndërkombëtare të Romëve.

    Qeveria jonë është e përkushtuar që të gjithë qytetarët e Kosovës të trajtohen pa diskriminim. Prandaj kemi punuar dhe angazhohemi vazhdimisht bashkërisht për të drejta të barabarta individuale dhe kolektive të përfaqësuesve të të gjitha komuniteteve. Me këtë synim së bashku kemi hartuar Strategjinë për Avancimin e të Drejtave të Komunitetit Rom dhe Ashkali 2022-2026, si dhe kemi lansuar Platformën Kombëtare për Raportimin e Rasteve të Diskriminimit ndaj komunitetit rom, ashkali dhe egjiptian.

    Kemi themeluar Ekipin Ndërinstitucional për nxitjen dhe promovimin e punësimit për komunitetet rom, ashkali dhe egjiptian, ndërsa 100 të rinjve, me prioritet atyre nga komunitetet joshumicë, iu është dhënë mundësia për praktikë 6 mujore me pagesë në institucionet qeveritare. Kemi filluar edhe zbatimin e Skemës së Punësimit të Garantuar për të Rinjtë, Superpuna, andaj i inkurajoj të gjitha të rejat dhe të rinjtë nga komuniteti rom, që të aplikojnë në këtë platformë.

    Në dy vitet e fundit, qeveria jonë ka mbështetur të gjitha komunitetet përmes masave të zbatuara dhe granteve të ndara. Kemi mbështetur fëmijët, studentët, nënat lehona, pensionistët dhe kategoritë e ndryshme sociale.

    Për krijimin e mundësive të barabarta në arsim kemi ndarë 500 bursa në vlerë 300 mijë euro për nxënësit e shkollave të mesme nga komuniteti rom, ashkali dhe egjiptian. Arsimi i lartë ofrohet pa pagesë për të gjithë studentët. Por për të mbështetur edukimin, kemi ndarë 100 bursa shtesë për studentët e këtyre komuniteteve në universitetet publike. Kështu ata do të mund fokusohen në ngritjen e tyre profesionale dhe akademike, pa pasur barrën e anës financiare. Po ashtu, kemi ndarë 200 mijë euro për qendrat mësimore të fëmijëve rom, ashkali dhe egjiptian, ndërsa 104 romë, ashkali dhe egjiptianë kanë përfituar trajnim profesional, një rritje domethënëse nga vetëm 34 aq sa ishin në vitin paraprak. Të mërkurën pata kënaqësi të veçantë të marr pjesë në hapjen e minibibliotekës me tituj në gjuhën rome. Shpresoj dhe uroj që kjo dhe bibliotekat tjera të pasurohen edhe më shumë dhe të avancohet sa më shumë gjuha dhe kultura rome.

    Jemi falënderues e mirënjohës për kontributin dhe angazhimin e komunitetit rom në ndërtimin e vendit tonë. Shpresoj për thellim të mëtejmë të bashkëpunimit, për realizimin e synimeve të përbashkëta, për më shumë barazi edhe më shumë mirëqenie.

    Edhe njëherë: Urime Dita e Romëve!

    Bahtalo Romano Dive!

  • ​Aplikimi për anëtarësim në BE, Bislimi këtë muaj në Suedi

    ​Aplikimi për anëtarësim në BE, Bislimi këtë muaj në Suedi

    Zëvendëskryeministri i parë për Integrim Evropian, Zhvillim dhe Dialog, Besnik Bislimi do të ketë një vizitë gjatë këtij muaji në Suedi për të diskutuar për shqyrtimin e aplikimit të Kosovës për anëtarësim në Bashkimin Evropian, gjatë presidencës suedeze të Këshillit të BE-së.

    Nga zyra e Bislimit thonë se aplikimi i Kosovës për marrjen e statusit vend kandidat për anëtarësim në BE ka marrë mbështetje të gjerë të shteteve anëtare dhe institucioneve të BE-së, për çka janë të kontakt të vazhdueshëm me shtetet partnere, veçmas me Suedinë, e cila mban presidencën e Këshillit të BE-së deri në qershor. Përkitazi me këtë, shprehën optimist se do të ketë zhvillime pozitive brenda këtij viti për pranimin e aplikimit të Kosovës për anëtarësim në BE.

    Mirëpo, ndryshe këtë proces e shohin dy partitë opozitare, PDK dhe LDK dhe njohësit e proceseve integruese të BE-së, të cilën konsiderojnë se rruga e Kosovës në Bashkim Evropian varet nga dialogu Kosovë-Serbi dhe pesë vendet mosnjohëse të Kosovës.

    ”Aplikimi i Kosovës me 15 dhjetor për anëtarësim në BE, ka marrë mbështetje të gjerë në mesin e institucioneve të Bashkimit Evropian dhe shteteve anëtare. Qeveria e Republikës së Kosovës mbetet e përkushtuar dhe është në kontakt të vazhdueshëm me shtetet partnere e posaçërisht Suedinë, e cila mban dhe Presidencën e Këshillit të BE-së. Gjatë këtij muaji, pritet që zëvendëskryeministri Bislimi të ketë dhe një vizitë në kryeqendrën suedeze, për të forcuar bashkëpunimin tonë dhe rrugën përpara të Kosovës në proceset e integrimit evropian. Hapat përpara dhe rruga tutje në integrimin e Kosovës drejt BE-së, janë biseduar edhe në takimin e fundit me Komisionerin Varhelyi. Ne jemi optimist e presim që të ketë zhvillime pozitive brenda këtij viti dhe të vazhdojmë të bëjmë në vijim hapa të rëndësishëm në rrugëtimin tonë drejt Bashkimit Evropian”, thotë Klisman Kadiu, këshilltar i zëvendëskryeministrit Bislimi në një përgjigje me shkrim për KosovaPress.

    Deputetja e PDK-së, Ariana Musliu-Shoshi, thotë për KosovaPress se aplikimi për anëtarësim në BE është bërë vetëm sa për foto në rrjete sociale, pasi shqyrtimi dhe pranimi i aplikacionit nuk është i mundur pa pesë vendet mosnjohëse të BE-së ndaj Kosovës.

    Ajo shton se institucionet kosovare nuk kanë bërë asnjë hap përpara me asnjërën prej këtyre pesë vendeve, rrjedhimisht ato do të jenë kategorike kundër pranimit të aplikacionit të Kosovës për statusin vend kandidat për anëtarësim në BE.

    “Këto aplikime për anëtarësime bëhen sa për foto në rrjete sociale. Asnjë anëtarësim i Republikës sonë nuk mund të bëhet nëse kemi një dritë të gjelbër nga shtetet që janë me fuqi botërore dhe shumë prej tyre janë shtete mike me Kosovën. Vlerësoj se edhe për aplikim në Bashkim Evropian është e njëjta storje si me Këshill të Evropës, pasi ke pesë vende mosnjohëse të pavarësisë së Kosovës, nuk e ke asnjë hap që e ke bërë përpara që e ke bërë me asnjërën prej tyre dhe e dorëzon një aplikim, kur e din që po të pestat do të votojnë kundër”, thotë ajo.

    Skeptike për shqyrtim të aplikacionit të Kosovës gjatë këtij viti është edhe deputetja e LDK-së, njëherësh edhe kryetare e Komisionit parlamentar për integrime Evropiane, Rrezarta Krasniqi.

    Ajo thotë për KosovaPress se proceset integruese të Kosovës janë lidhur ngushtë me dialogun me Serbinë.

    “Të gjitha proceset integruese janë të lidhura me marrëveshjen e (Brukselit) dhe Ohrit që pa implementimin e asaj marrëveshjeje nuk do të ketë hapa të tjerë, siç janë anëtarësimi në Bashkimin Evropian dhe Këshill të Evropës. E pamë edhe me liberalizimin e vizave, që tani ka mbetur vetëm të votohet në Parlamentin Evropian dhe presim që të përfundojë shpejtë ky proces. Mirëpo proceset të tjera janë të lidhura ngushtë me procesin e dialogut”, deklaron Krasniqi.

    Në anën tjetër, njohësi i integrimeve evropiane, Dorajet Imeri, thotë për KosovaPress se aplikimi i Kosovës për anëtarësim në BE më shumë ka qenë strategjik, për të treguar orientimin properëndimor, pasi, sipas tij, realisht është ditur se aplikacioni i Kosovës nuk do të merret parasysh për një kohë.

    “Trajtimi i aplikacionit të Kosovës me gjasë nuk do të merret parasysh edhe për një kohë. Fakti që Kosova ka aplikuar ka qenë strategjik, tregues i orientimit sesa realisht një pritshmëri që të merret në trajtim kërkesa e saj. Pra më shumë ka qenë për të treguar orientimin, pozicionin se Kosova është palë konstruktive”, thotë Imeri.

    Më 15 dhjetor të vitit të kaluar, Kosova ka dorëzuar aplikacionin për anëtarësim në Bashkimin Evropian nën presidencën çeke.

    Prej 1 janarit deri më 30 qershor të këtij viti Presidencën e Këshillit të BE-së e mban Suedia, kurse në gjysmën e dytë të vitit presidencën e BE-së do të ketë Spanja.

  • Peci-gastronomëve: Nëse ka rezistencë kundër ligjit për duhan, do të ketë masa të ashpra

    Peci-gastronomëve: Nëse ka rezistencë kundër ligjit për duhan, do të ketë masa të ashpra

    Ministri i Bujqësisë, Faton Peci, i ka paralajmëruar të gjithë qytetarët dhe gastronomët që ligji kundër duhanit s’ka kthim prapa.

    Ai tha se synimi i tyre është që të përqafojnë vlerat e avancuara të vendeve të BE-së, atje ku sipas tij, Kosova synon të integrohet.

    “Kështu që në këtë drejtim, ne s’e mendojmë në asnjë mënyrë zmbrapsjen karshi imponimit të zbatueshmërisë së këtij ligji”, tha ai në Klan Kosova.

    Përveç kësaj, ai tha se nëse sheh rezistencë për moszbatimin e këtij ligji, do të ketë masa të ashpra.

    “Nëse shoh në lokalitete të caktuara se ka rezistencë për mos-zbatimin e këtij ligji, unë do të shqyrtojë mundësinë e përdorimit të mekanizmave që janë më të ashprit për shkak se s’guxojmë të kthehemi mbrapa karshi një ligji të cilin e ka aprovuar kuvendi”, tha Peci.

  • Hovenier uron për Ditën e Romëve: Mbetet punë për qasjen në edukim dhe punësim

    Hovenier uron për Ditën e Romëve: Mbetet punë për qasjen në edukim dhe punësim

    Ambasadori i ShBA-së në Kosovë, Jeffrey Hovenier, duke uruar për Ditën Ndërkombëtare të Romëve, ka thënë se kremtohet trashëgimia e pasur e komunitetit rom megjithëse dihen sfidat dhe diskriminimi me të cilin ata përballen.

    “Mbetet më shumë punë për t’u bërë që romëve të Kosovës t’u mundësohet qasje e barabartë në edukim, punësim dhe shërbime qeveritare”, është shprehur Hovenie.

  • ​Shtrenjtimi i energjisë, bizneset e vogla rrezikojnë falimentimin

    ​Shtrenjtimi i energjisë, bizneset e vogla rrezikojnë falimentimin

    Shtrenjtimi i energjisë elektrike në masën 15.4 për qind rrezikon që shumë biznese të falimentojnë në vend, sidomos ndërmarrjet e vogla. Këto biznese nuk përjashtojnë mundësinë e falimentimit në rast se qeveria nuk merr ndonjë masë për lehtësimin e faturave me energji. Ndërkohë, të njëjtit paralajmërojnë edhe shtrenjtimin e çmimeve për produktet e tyre.

    Kurse, zyrtarët të Qeverisë së Kosovës kanë thënë për KosovaPress do t’i subvencionojnë familjet dhe bizneset e vogla për të ulur konsumin e energjisë duke blerë pajisje efiçiente.

    Menaxheri i njërës nga bizneset në Prishtinë, Hysni Gashi thekson për KosovaPress se ky vendim për shtrenjtimin e rrymës është në një kohë të gabuar. Sipas tij, në rast se nuk reagon qeveria, do të falimentojnë si biznes.

    “Qeveria nuk e di a e ka studiuar këtë vendim, veç është shumë i gabuar, sidomos në këtë kohë post pandemisë. Jemi ballafaquar mjaftë në pandemi me kriza të mëdha dhe tash edhe shtrenjtimi i energjisë, inflacioni, punëtor nuk ka, nuk e di se qysh mbijetojnë bizneset… Duhet të reagojë qeveria nëse ja ka mësyrë kësaj pune, duhet të bëjë pako më shumë t’ju ndihmojë bizneseve… Përndryshe do të falimentojmë”, tha Gashi.

    Edhe pronarja e një biznesi tjetër në kryeqytet, Anita Samahodaj pohon se shtrenjtimi i rrymës po e vështirëson veprimtarinë e biznesit të tyre.

    Samahodaj thekson po ashtu se me rritjen e energjisë elektrike e kanë të detyrueshme t’i rrisin edhe çmimet e produkteve.

    “Shtrenjtimi i rrymës na ka vështirësuar punën edhe neve si biznes që jemi. Patjetër po duhet t’i rrisim çmimet, përndryshe edhe falimentojmë… Kërkojmë edhe prej qeverise që me marrë masa pak që të na ndihmojë”, tha Samahodaj.

    Ndërkaq për pronarin e njërës nga bizneset e mëdha në vend, Shaqir Palushi më e rëndësishme se çmimi është furnizimi i rregullt me energji elektrike. Sipas tij, në rast se nuk ka energji elektrike, bizneset e mëdha do të pësojnë më shumë humbje.

    “Për neve si prodhues më e rëndësishme se çmimi është furnizimi i rregullt sepse çdo ndërprerje e energjisë elektrike, sidomos tek sektori prodhues shkakton humbje të mëdha të cilat janë shumë më të larta sesa humbjet që shkaktohen nga kjo rritje prej 15.4 për qind të energjisë elektrike”, tha Palushi.

    Palushi mes tjerash tha se qeveria duhet të ketë një plan strategjik si të ndihmohen bizneset në këto raste, sidomos ato që janë më të vogla.

    “Qeveria duhet të ketë plan strategjik se si të ndihmohen bizneset, në radhë të parë ato të vogla në mënyrë që ato të përballojnë më lehtë krizën për të cilën po kalojnë këto biznese dhe përgjithësisht vendi dhe duke i stimuluar në forma të ndryshme, ose duke i liruar nga tatimi, ose duke subvencionuar energjinë elektrike deri në një masë ashtu siç ka bërë për qytetarët të cilët kanë kursyer energji. Por, në këtë rast te prodhuesit do të ishte e dëmshme nëse kursehet energjia elektrike, pasi kjo do të thotë se ne do të prodhonim më pak”, tha mes tjerash Palushi.

    Zëdhënësi i Qeverisë së Kosovës, Përparim Kryeziu ka thënë për KosovaPress se si rrjedhojë e vendimit të ri të ZRrE, Qeveria do t’i subvencionojë familjet për konsum deri në 800 kWh, dhe po ashtu do t’i mbështes familjet dhe bizneset e vogla për të ulur konsumin e energjisë duke blerë pajisje efiçiente.

    “Si përgjigje ndaj vendimit të ri të ZRrE, ne do t’i subvencionojmë familjet për konsum deri në 800 kWh. Do t’i subvencionojmë familjet dhe bizneset e vogla për të ulur konsumin e energjisë duke blerë pajisje efiçiente. Për më tepër, do të subvencionojmë edhe pajisje tjera shtëpiake, jo vetëm për ngrohje. Gjithashtu, për herë të parë do të subvencionojmë bizneset e vogla për të blerë pajisje efiçente. Pra, në vend që të subvencionojmë importin e shtrenjtë, do të ndihmojmë familjet e bizneset për të ulur shpenzimet e energjisë”, thuhet në përgjigjen me shkrim.

    Kryeziu po ashtu ka thënë se do të mbështesin edhe grupet e cenueshme, siç janë përfituesit e ndihmës sociale në lidhje me energjinë.

    Tarifat e reja të energjisë elektrike kanë hyrë në fuqi nga data 1 prill dhe do të jenë të vlefshme deri më 31 mars të vitit 2024.

    Sipas vendimit të Zyrës së Rregullatorit për Energji (ZRrE), për konsumatorët që shpenzojnë deri në 300 kilovatë në orë, rritja do të jetë 2 euro e 88 centë, deri në 450 kilovatë në orë, rritja do të jetë 4 euro e 18 centë, deri në 600 kilovatë në orë, rritja do të jetë 5 euro e 49 centë, deri në 800 kilovatë në orë rritja do të jetë 7 euro e 23 centë. Ndërsa, ata që harxhojnë deri në 1000 kilovatë në orë rritja do të jetë 10 euro e 51 centë, ndërsa për ata që shpenzojnë 1200 kilovatë në orë, rritja do të jetë 13 euro e 80 centë./kp

  • Kurti për marrëveshjen 56.2 milionëshe: Do të rrisë kapacitetin e prodhimit për 30 MW dhe jetëgjatësinë e “Kosova B”

    Kurti për marrëveshjen 56.2 milionëshe: Do të rrisë kapacitetin e prodhimit për 30 MW dhe jetëgjatësinë e “Kosova B”

    Kryeministri Albin Kurti ka shkruar lidhur me marrëveshjen 56.2 milionëshe, që është nënshkruar dje mes KEK’ut dhe kompanisë amerikane General Electric, për modernizimin e turbinave me avull të Termocentralit Kosova B.

    Përmes një postimi në Facebook, Kurti ka thënë se ky investim do të rrisë kapacitetin e prodhimit për 30 MË dhe jetëgjatësinë e TC Kosova B, raporton Express.

    Madje, e ka cilësuar këtë një nga ngjarjet më të rëndësishme në sektorin e energjisë.

    “Kompania amerikane General Electric (GE) që 40 vjet më parë kishte dizajnuar teknologjinë e turbinave të termocentralit Kosova B, katër dekada pas kthehet për t’i modernizuar ato përmes një marrëveshjeje me vlerë 56.2 milionë euro që nënshkruan me Korporatën e Energjisë Elektrike (KEK).

    Ky investim do të rrisë kapacitetin e prodhimit për 30 MW dhe jetëgjatësinë e TC Kosova B, pa rritur emetimin e gazrave ndotës dhe nevojën për remonte të shpeshta. Më shumë prodhim, do të thotë më shumë pavarësi energjetike dhe më pak varësi ndaj importeve, më shumë siguri të furnizimit me rrymë dhe më pak shpenzime të buxhetit të shtetit”, ka shkruar Kurti.

  • ​James Rubin rikthehet në Ballkan, shmang Kosovën dhe Serbinë

    ​James Rubin rikthehet në Ballkan, shmang Kosovën dhe Serbinë

    I dërguari special dhe koordinatori për Qendrën Globale të Angazhimit James P. Rubin do të vizitojë për 4 ditë Shqipërinë, Malin e Zi dhe Maqedoninë e Veriut. Megjithatë, ai nuk do të ndalet në Kosovë dhe Serbi.

    Departamenti i Shtetit njofton se ai do të udhëtojë nga data 10-14 prill në Podgoricë, Shkup, dhe Tiranë.

    “Në Podgoricë dhe Shkup, i dërguari i posaçëm Rubin do të takohet me zyrtarë qeveritarë për të forcuar mbështetjen për nismat kundër dezinformimit. Ai do të diskutojë përpjekjet e Rusisë, Republikës Popullore të Kinës dhe aktorëve të tjerë keqdashës që përdorin dezinformata për të minuar demokracinë dhe sigurinë kombëtare në mbarë globin, dhe se si kombet tona mund t’i kundërshtojnë së bashku kërcënimet në hapësirën e informacionit”, thuhet në deklaratë.

    Gjatë qëndrimit në Tiranë, i dërguari i posaçëm Rubin do të marrë pjesë në takime me ambasadorët amerikanë nga Ballkani Perëndimor.

    Kujtojmë se James P. Rubin është emëruar në dhjetor të vitit të kaluar në këtë detyrë nga sekretari i Shtetit Anthony Blinken.

    Rubin është një emër i lidhur ngushtë me historinë e çlirimit të Kosovës. Në periudhën Ai shërbeu si Ndihmës Sekretar i Shtetit për Çështjet Publike dhe zëdhënës kryesor i Sekretares së Shtetit, Madeleine Albright. Në vitin 1999 ishte negociator special për të siguruar demobilizimin e Ushtrisë Çlirimtare të Kosovës.

    Rubin shërbeu gjithashtu si Këshilltar i Lartë dhe Zëdhënës i Përfaqësueses së SHBA-së në Kombet e Bashkuara Madeleine Albright.

    Ai është nderuar me Medaljen Presidenciale të Meritave nga presidentja Atifete Jahjaga vite më parë. /kp

  • Tahiri: Kosova s’heq dorë nga njohja e Serbisë për shkak të dështimit të Osmanit dhe Kurtit

    Tahiri: Kosova s’heq dorë nga njohja e Serbisë për shkak të dështimit të Osmanit dhe Kurtit

    Shefi i grupit parlamentar të PDK-së, Abelard Tahiri, ka thënë se Kosova nuk heq dorë nga njohja e njohja e Serbisë, ndonëse këtë, sipas tij, e kanë bërë kryeministri Albin Kurti dhe presidentja Vjosa Osmani, raporton Ekonomia Online.

    Tahiri, pas mbledhjes së kryesisë së Kuvendit, ka thënë se qytetarëve serb në Kosovë po u imponohet vullneti i Beogradit, mirëpo se “Kushtetutshëmeria e Kosovës është ajo që duhet të ketë rëndësi”.

    “Është krejt e parëndësishme çka thotë Vuçiqi për Kosovën. Është shumë e rëndësishme Kushtetutshëmeria e Kosovës. Te ne nuk mund të imponohet vullneti i Beogradit”.

    “Qytetarët që jetojnë në Kosovës janë peng i politikave të Beogradit, ata nuk guxojnë të jetojnë në shoqëri multietnike, ata janë të frikësuar nga politikat e Beogradit, qoftë në mos marrjen e targave kosovare, pastaj frika për t’u integruar në shoqëri multietnike”, tha Tahiri.

    “Kosova nuk ka hequr dorë nga njohja, por ka hequr dorë kryeministri Albin Kurti. Ne nuk do të heqim dorë nga dështimet e liderëve, siç është Albin Kurti dhe Vjosa Osmani. Ne nuk heqim dorë nga një njohje e tillë që pastaj do t’i hapë rrugën në anëtarësim në organizata ndërkombëtare”, tha Tahiri.

    Ai ka informuar edhe për punën e komisionit ad-hoc, ku është edhe kryetar, për reformën zgjedhore.

    “Dje përfundimisht ka votuar komisioni për reformën zgjedhore. Gjatë gjithë kohës zgjedhjet në Kosovës janë monitoruar nga vëzhgues të Bashkimit Evropian dhe duhet të adresohen të gjitha rekomandimet. Ka pasur edhe propozime të partive politike të cilat të gjitha bashkë janë drejtuar në mënyrë unanime. Gjatë këtij procesi kemi pasur bashkëpunim të mirë me zyrën e Bashkimit Evropian, Ambasadën Amerikane, Ambasadën e Mbretërive të Bashkuara”.

  • Osmani: Nuk ka asnjë autonomi për komunat serbe, nuk e lejoj të shkelet Kushtetuta

    Osmani: Nuk ka asnjë autonomi për komunat serbe, nuk e lejoj të shkelet Kushtetuta

    Presidentja, Vjosa Osmani, ka thënë se nuk ka rrezik për autonomi për komunat me shumicë serbe me anë të marrëveshjes së arritur në Ohër ku parashihet edhe themelimi i asociacionit. Presidentja Osmani tha se edhe nëse do të kishte tendenca të tilla një gjë të tillë nuk do ta lejonte.

    “Nuk ka asnjë autonomi. Çka do që do të dilte jashtë Kushtetutës së Kosovës do të duhej të ratifikohej në Kuvendin e Kosovës, pra në fund do të ju takoj atyre deputetëve të vendosin për diçka të tillë. Por, si presidente e republikës në asnjë moment nuk do të lejoja që të shkohet përtej kushtetutës, apo edhe përtej vendimeve të gjykatës kushtetuese që kanë përcaktuar parametrat edhe sa i përket të drejtave të serbëve dhe organizimit të tyre në republikën e Kosovës. Natyrisht që delegacioni i Kosovës po punon që të përcaktohen edhe detajet sa i përket nenit 7 por të gjitha këto të prira nga parimet që tashmë janë vendosur. Pari i parë është Kushtetuta e Kosovës, pra nuk mund të shkohet përtej saj, sikur të ishte autonomi do të shkohet përtej kushtetutës së Kosovës gjë që assesi nuk e lejojmë. Parimi i dytë është vendimi i Gjykatës Kushtetuese i vitit 2015 dhe parimet e tjera të përcaktuara nga Kuvendi edhe në legjislaturat paraprake që kanë të bëjnë me ruajten e integritetit dhe sovranitetin e vendit, pastaj funksionalitetin e brendshëm që njihet si parimi i unitaritetit, dhe po ashtu më duhet ta përmend pozicionin amerikan i cili është i vendosur edhe me shkrim, i cili ndër të tjera është edhe parim shtesë udhërrëfyes në hapat përpara. Ka garanca shteti ynë që të mos të lejohet që të mëso tejkalohet kushtetuta dhe dhe të gjitha këto garanca ne do t’i shfrytëzojmë për ta mbrojtur interesin e shtetit”, deklaroi Osmani.

    Osmani, duke komentuar edhe përplasjet e fundit Kosovë-Serbi për çështjen e të pagjeturve dhe termin që është vendosur në marrëveshjen e Ohrit, i tha RTV21 se në dokument që i është dorëzuar nga Bashkimi Evropian thuhet: “persona të zhdukur me dhunë’’ dhe ashtu siç pretendon Serbia.

    “Dokumenti që ne e kemi parë dhe që është dorëzuar nga Bashkimit Evropian i referohet të zhdukruve me dhunë, ky është edhe term që përdoret në konventat ndërkombëtare. E dyta, në duhet të jemi të vetëdijshëm se jo gjithçka është sqaruar në takimin e 27 shkurtit dhe në takimin e 18 marsit në Ohër, rrjedhimisht edhe ka nevojë për takime shtesë në të cilat edhe do të determinohet sekuencimi i zbatimit të kësaj marrëveshje. Çka është me rendësi është se të gjitha nenet kanë rendësi të barabartë ashtu siç e thotë edhe vet aneksi dhe mund të interpretohen në mënyrë të pavarur. Ajo që ne insistojmë vazhdimisht është që pavarësisht veprimeve të Serbisë sepse si presidente nuk kam pritje se do ta respektojnë fjalën e dhënë sepse nuk kanë respektuar asnjëherë me apo pa nënshkrim. Mirëpo cka pres është se zotimet e aleatëve tanë që do ta përkrahin Kosovën në rrugën euroatlantike të realizohen dhe kemi besim të plotë në këtë’’.

  • Rizvanolli: 15 milionë euro për subvencionim në efiçencë të energjisë

    Rizvanolli: 15 milionë euro për subvencionim në efiçencë të energjisë

    Ministrja e Ekonomisë, Artane Rizvanolli, ka njoftuar se në kuadër të planit emergjent prej 75 milionë eurove të përkrahur nga Bashkimi Evropian, Ministria e Ekonomisë që nga ky vit do të fillojë zbatimin e masave të efiçencës së energjisë që kapin vlerën prej 15 milionë eurove, raporton Ekonomia Online.

    Në takimin ku u diskutua për masat e pakos emergjente 75 milionëshe nga Bashkimi Evropian për përballje me krizën energjetike evropiane dhe masat e efiçencës së energjisë për ndërtesat shumë-banesore të destinuara për banim social (në pronësi komunale), Rizvanolli tha se target-grup kanë sektorin rezidencial dhe ndërmarrjet mikro, të vogla dhe të mesme.

    “Për sektorin rezidencial, pra për familjet, do t’i subvencionojmë pajisjet ngrohëse efiçente siç kemi bërë edhe vitin e kaluar, duke përfshirë këtu klimat, kaldajat, stufat dhe pajisje të tjera shtëpiake që kanë potencial për kursim të energjisë që janë frigoriferët dhe të tjera. Kemi pasur biseda edhe me Ministrin e Mjedisit dhe Planifikimit Hapësinor dhe kam adresuar tek ai kërkesën për të ndërmarrë hapat për të standardizuar dhe harmonizuar legjislacionin sekondar i cili ka të bëjë me instalimin e sistemeve solare fotovoltaike për vetëkonsum që ka qenë edhe një ndër kërkesat e juaja në takimin e kaluar dhe ministri na ka premtuar se do t’i ndërmarrin hapat me prioritet që nga java e ardhshme, shpresoj”, u shpreh Rizvanolli në një takim me qëllim të bashkëpunimit dhe koordinimit ndërinstitucional ndërmjet të Qeverisë dhe Komunave.

    Në takimin me kryetarët e komunave, ku mori pjesë edhe kryeministri Albin Kurti e ministri i Financave, Hekuran Murati, Rizvanolli tutje tha se sivjet për herë të parë do të subvencionohen ndërmarrjet mikro, të vogla dhe të mesme për pajisje ngrohëse efiçente dhe pajisje teknologji efiçente.

    “Hartimi i këtyre masave është bërë me ndihmën e ekspertëve të fushës, të donatorëve dhe shoqërisë civile, dhe i falënderoj pafundësisht për vlerësimin e nevojave të qytetarëve dhe bizneseve. Bashkëpunimi me komunat është tejet i rëndësishëm që ju të angazhoheni që qytetarët e komunave të jenë të informuar dhe të kenë përkrahjen e duhur gjatë procesit të aplikimit për qytetarët që kanë nevojë për një ndihmë të tillë”, tha Rizvanolli.