Category: LAJME

Çmimi për një ton miell ka rënë për 30 për qind, nga 550 euro sa ishte toni, tani është 420 euro.

Megjithatë, rënie nuk ka pësuar edhe çmimi i bukës. Buka aktualisht në furrat e Kosovës kushton 0.50 euro, por ky çmim nuk do të jetë për shumë kohë, pasi që çmimi i bukës pritet të rritet së shpejti edhe më shumë.

Shtrenjtimi i bukës pritet të ndodhë pas vendimit të Zyrës së Rregullatorit për Energji, e cila rriti çmimin e energjisë elektrike në masë prej 15.4 për qind nga 1 prilli.

Për rritjen e tarifave të rrymës, kryetari i Shoqatës së Mullisëve, Bashkim Zejnullahu thotë se do të ketë një ndikim negativ tek furrtarët, ngase sipas tij kjo ndikon në koston e përpunimit dhe sjellë efekte negative.

Ndërsa, Zjenullahu shton se pas zbritjes së çmimit të miellit, duhet të reflektojnë çmimet edhe në rënien e çmimit të bukës.

“Produktet e grurit kanë pësuar rënie kohëve te fundit, rënie e cila ka reflektuar edhe në çmimin e miellit (çmimi aktual nga 420-460€) për ton, ndërsa vendi ynë ka një qëndrueshmëri të sasive të grurit….Nuk mendoj që do rritet, përkundrazi presim një rënie te çmimit të bukës duke pasur parasysh çmimin e miellit i cili ka pësuar rënie prej afro 30%, ky çmim duhet te reflektojë edhe në rënie të çmimit të bukës”, është përgjigjur Zejnullahu.

E vendimin për rritje të çmimit të bukës, nuk e mirëpriten as qytetarët. Ata thanë se në krizën financiare në të cilën janë, nuk duhet të ndodhë një rritje e tillë.

Qytetari Vesel Veseli, thotë se një vendim i tillë për rritje të çmimit të bukës është i papërshtatshëm, marrë parasysh buxhetin e familjeve, gjersa shton se Qeveria duhet të marrë masa parandaluese për një rritje të tillë.

“Ky është vendim i papërshtatshëm për shumicën e popullatës tonë, duke marrë parasysh se çfarë buxheti familjarë kanë, andaj Qeveria duhet të marrë masa që t’i shtojnë ndihmat sociale, pensionet, pagat e punëtorëve që janë duke punuar, shërbyeseve civilë dhe jo vetëm të ngritën çmimet e artikujve ushqimorë dhe pagat të mos rriten, nuk është e arsyeshme…Furrtarëve po i’u kushton rryma, që i pjekun ato (bukët) dhe ndikon që ata ta ngrisin çmimin…Sikur mos të kishte qenë rryma me çmim të lartë dhe ata krahas miellit, do ta kishin bërë dhe çmimin e bukës… Mua nuk më pengon, sepse kam të hyra financiare, mirëpo bazohen në shumicën e popullatës, se në çfarë gjendje janë”, u shpreh ai.

Ilmi Beqiri, thotë se kjo rritje e çmimit është interes i furrtarëve, gjersa shton se një ngritje e çmimit të bukës, është e papërballueshme.

“Nuk mundemi ta përballojmë, jo vetëm ne por askush. Po flitet që do të rritet çmimi i bukës dhe i gjërave ushqimore. Nuk e di si do ta përballojë populli, këta janë duke luajtur me popull… Sigurisht kanë diçka interesa të tyre”, tha ai.

Me pagat e dobëta, rritja e çmimeve është e papërballueshme për qytetarët, tha vet qytetari, Bislim Ademi.

“Nuk është e arsyeshme. Pensionet dhe pagat, të gjitha të dobëta…Është e papërballueshme, jo vetëm buka por edhe shumë artikuj ushqimorë”, theksoi ai.

Situata me ngritjen e çmimeve, i duket normale, qytetarit Hashim Thaqi. I kanë shtrenjtuar të gjitha edhe bukën ta ngrisin, veç edhe shpirtin të na marrin dhe nuk ka tjetër, tha ai.

“Tash çdo gjë po më duket normale. I kanë shtrenjtuar të gjitha edhe bukën ta ngrisin, veç edhe shpirtin të na marrin dhe nuk ka tjetër. Shumë normale është kjo për ne, për Kosovën. Çfarë të na bën Qeveria, ashtu është. Këtë qeveri e kemi kërkuar, 51% e kemi votuar dhe duhet të bëjmë siç thonë”, u shpreh ai.

Kosova është përballur me rritje të çmimeve të produkteve dhe shërbimeve nga fundi i vitit të kaluar, kryesisht për shkak të çrregullimeve në furnizime që ka shkaktuar pandemia Covid-19 dhe invazioni rus në Ukrainë. /kp

Qytetarët nga Komuna e Malishevës dhe ajo e Klinës kanë protestuar të enjten para Qeverisë, kundër devijimit të autostradës Prishtinë-Pejë.

Kërkesa e këtyre banorëve, kryesisht të fshatrave Stapanicë, Rixhevë e Gllarevë, kanë dalë për të shprehur pakënaqësitë e tyre për devijimin te segmenti Kijevë-Dollc.

Ndërkaq, disa nga përfaqësuesit e protestës, janë pritur në qeveri nga sekretari i Zyrës së Kryeministrit, Arben Kransiqi për të diskutuar në lidhje me këtë çështje.

Mirëpo, të njëjtit pas këtij takimi deklaruan që sekretari nuk ishte në dijeni për këtë problem, dhe pas kësaj i ka adresuar për një takim me ministrin e infrastrukturës, Liburn Aliu.

Një nga organizatorët e kësaj proteste, Sheremet Pantina, tha nuk kanë marrë ndonjë përgjigje nga sekretari nëse kryeministri, Albin Kurti i ka shqyrtuar kërkesat e tyre për kundërshtimin e devijimit të rrugës.

“Ne ishim pesë përfaqësues te kësaj proteste tek sekretari i kryeministrit, Arben Krasniqi. Biseduam me të, mirëpo është një çudi e veçantë që sekretari nuk ka njohuri për punën që kemi ardhur na dhe për rrugën ka do të shkojë. Disa kërkesa që janë bërë më herët i ka dërguar tek kryeministri dhe nuk ka përgjigje nëse i ka marrë për shqyrtim ose jo. Na beri një takim me ministrin e infrastrukturës dhe po shkojmë atje që të na tregojnë detajisht për rrugën ka do të shkojë. Pasi ne insistuam të kemi takim me atë që e njohin problemin dhe na mundësuan”, tha Pantina.

Ardian Zogaj, përfaqësues i bizneseve nw atw anw, thotë se nëse nuk merren parasysh kërkesat e tyre nuk do të ndalen së protestuari.

“Jemi dalë kundër devijimit të rrugës, sepse na kanë premtuar se nuk do të ketë devijim…Kemi dërguar ankesa para dy jave e përditë, por nuk i merr askush parasysh…Nëse nuk merren parasysh këto, ne do të vazhdojmë me protesta në fshat çdo ditë, derisa të bëhet diçka”, tha

Fadil Morina, banor nga fshati Rixhevë thotë se nëse nuk merren parasysh kërkesat e tyre, nuk mbetet zgjidhje tjetër veçse ta braktisë Kosovën.

“Kemi dalë këtu për devijimin e rrugës, kalon tre apo katër fshatra dhe i merr tokat e punës dhe na mbyll bizneset. Si punëtor nuk e di ka të ja mbaj nëse mbyllen këto biznese, jo që nuk kam ku të shkoj por kam bërë disa vjet dhe nuk kam ku të shkoj diku tjetër, pasi punoj tek disa të afërm…Nëse nuk merren parasysh, e kam qit një djalë 6 mijë euro e më pas edhe vet e kam nijet me dalë”, tha Morina.

Banori, Isuf Morina thotë se nëse nuk merren parasysh kërkesat e tyre, me të gjitha mundësitë që kanë do e bllokojnë rrugën.

“Arsyeja pse kemi ardhur të protestojmë është devijimi i rrugës…Kemi dalë në protesta që tre apo katër herë, kemi dorëzuar peticion dhe dokumentet që na kanë kërkuar në ministrinë përkatëse. Para dhjetë ditëve kemi ardhur të dorëzojmë një kërkesë tek kryeministri dhe na ka prit sekretari i tij dhe na ka thënë se do të na njoftojnë ose do të na thërrasin, mirëpo nuk ka pas kurrfar lajmërimi…Nëse edhe këtë herë nuk merren parasysh kërkesat tona, prej Gjergjoviku deri në Stapanicë do ta bllokojmë rrugën, tjetër zgjidhje nuk ka mbetet neve”, theksoi ai.

Edhe qytetari, Zenel Balaj ka shprehur pakënaqësi në lidhje me devijimin e rrugës. Sipas tij, nuk ka mbetur asgjë tjetër për rininë veçse ta lëshojë Kosovën.

“Donë me na marr tokën e bukës e me na mbyll, na veç kem me lëshua Kosovën se nuk e dimë ku të shkojmë. Bizneset që janë t’u punua, rinia, ata duhet ta ndërprenë atë punë dhe ta kapin strajcën të dalin jashtë. Ne po themi që rinia të qëndrojnë e të punojnë këtu, por po na mbyllni. Ata që e kanë bërë atë projekt, është fajtor i madh, sepse rruga kryesore që ka qenë është e paguar, tash pse të paguajë shteti arat edhe njëherë, nuk është nevoja. Nuk do të ndalemi deri të kryhet kjo”, tha Balaj./KP

Të gjitha qytetet ukrainase dhe Krimeja duhet që sërish të jenë pjesë e Ukrainës dhe paqe të vërtetë mund të ketë pasi të rivendosen kufijtë e shtetit, tha ministri i Jashtëm ukrainas, Dmytro Kuleba.

“Pa dallim… çdo qytet ukrainas, të gjithë duhet të jenë sërish pjesë e Ukrainës”, tha ai gjatë fjalimit përmes video-lidhjes në konferencën për sigurinë në Detin e Zi të mbajtur në Bukuresht.

Rusia ka nisur pushtimin e Ukrainës më 24 shkurt të vitit të kaluar me urdhër të presidentit rus, Vladimir Putin. Ndërkaq, Moska kishte aneksuar paligjshëm gadishullin ukrainas të Krimesë më 2014 dhe që atëherë kishte mbështetur grupe separatiste që luftonin me forcat qeveritare ukrainase në rajonin lindor të Donbasit.

Presidenti ukrainas, Volodymyr Zelensky, vazhdimisht ka theksuar se territori i shtetit të tij nuk do të jetë subjekt i asnjë marrëveshjeje eventuale të paqes me Moskën.

Që kur ka nisur lufta, shtetet perëndimore kanë vendosur një sërë rundesh të sanksioneve ndaj entiteteve dhe individëve rusë që ndihmojnë makinerinë ushtarake të Moskës. Ndërkaq, shtetet e NATO-s dhe shtetet e tjera vazhdimisht dërgojnë ndihma ushtarake dhe ndihmë tjetër për Ukrainën, në mënyrë që ajo të mund të përballet me forcat ruse.

Aktualisht, forcat e Moskës kanë përqendruar luftën e tyre në lindje të Ukrainës, përkatësisht luftime disamujore po zhvillohen për kontrollin e qytetit të Bahmutit, që gjendet në rajonin e Donjeckut.

Pavarësisht se beteja për Bahmutin po konsiderohet si një prej më të ashprave që nga nisja e pushtimit, Ukraina ka thënë se situata në Bahmut është nën kontroll./REL/

Kryetari i AAK-së, Ramush Haradinaj, ka kërkuar nga Qeveria, presidentja dhe institucionet e vendit që të marrin një vendim lidhur me gjendjen në Veri.

Ai shtoi se beson që ky vendim duhet të jetë shtyrja e zgjedhjeve.

“Ne duhet të kemi guxim politik t’i trajtojme tëmat në të vërtetën e vet, së paku të mos fshihemi nga temat që i ka vendi përpara. Nuk besoj që përfiton Kosova nëse ne e heshtim gjendjen në veri të vendit. E dini se zgjedhjet e shpallura herën e parë nuk arritëm t’i mbajmë dhe poashtu e dini se procesi për të mbajtur zgjedhje tash në veri nuk është i qëndrueshëm. Mund të shtrohet pyetja pse jemi në këtë gjendje, kuptohet e dimë mirë agjednën e Serbisë dhe Listës Serbe kushtëzimet e tyre, por edhe presionet që i ushtrojnë mbi qytetarët e vendit në veri. Por a e dimë ne si Kosovë dhe a e din qeveria jonë rrugën deri te suksesi, mesa e shoh unë dhe me analizën dhe informatat që i kam gjendja e sotme nuk na dërgon te suksesi, procesi i tashëm i zgjedhjeve nuk na dërgon te suksesi”.

“Mosshqyrtimi i kësaj gjendje me kujdes, mostrajtimi i kësaj gjendje me seriozitet dhe me aleatët tonë mund t’i thellojë pasojat për Kosovën në Veri. E cilat kishin me qenë këto pasoja, nëse Kosova qëndron në vendimin e vet për mbajtjen e zgjedhjeve dhe vjen dita e zgjedhjeve dhe qytetarët e veriut do të shkojnë të votojnë në stacione policore. Duhet t’i bëjmë analizë kësaj situate, a është në interesin tonë të arrijmë te kjo ditë, çka do të fitojmë në këtë ditë. Nuk besoj se duhet ta heshtim këtë gjendje, më mirë me pranua një çerek humbje sot, një gjysmë humbje nesër, sesa një humbje të plotë në ditën e zgjedhjeve. Nuk e shoh cili është interesi ynë me vazhdua me mbajt Policinë e Kosovës në situatën çfarë janë atje dhe me insistua ose me harru që kemi përgjegjësi për situatën atje”.

“Unë i bëj thirrje qeverisë, presidentes, institucioneve të vendit që ta marrin me seriozitet gjendjen në Veri dhe ta marrin një vendim në lidhje me këtë situatë. Cili do të ishte ky vendim, unë besoj shumë që do të ishte shtyrja e zgjedhjeve. E di se plot prej jush mendoni me bindjen tuaja, analizën tuaj dhe keni argumente që i bazoni në të drejtën kushtetuese dhe ligjore, mirëpo mos harroni, terreni është pikënisja e suksesit. Nëse gjendjen në terren e ki çfarë e ki, atëherë mos e lejoni me shku ditën e fundit dhe pastaj me pranu humbjen. Është ma mirë me u ndal me kohë, me gjet një formulë më ec përpara sesa me vazhdu me fshehjen totale. Të vetmit që mbajnë sot kujdesin institucional atje janë njësitë policore, e katër prej tyre janë në burg. Mos lejoni me shku kësaj rruge”, tha Haradinaj.

Prokurori i Shtetit ju njofton se nga prokuroritë themelore janë ngritur njëzetenëntë (29) aktakuza kundër tridhjetepesë (35) personave, për vepra të ndryshme penale.

Po ashtu, me urdhër të Prokurorit të Shtetit janë ndaluar tridhjetepesë (35) persona dhe janë paraqitur katër (4) kërkesa për caktimin e masës së paraburgimit ndaj shtatë (7) personave, të dyshuar se kanë kryer vepra të ndryshme penale.

Prokuroria Speciale e Republikës së Kosovës (PSRK), gjatë 24 orëve të fundit ka ndaluar tre (3) persona.
Prokuroria Themelore në Prishtinë, gjatë 24 orëve të fundit, me urdhër të prokurorit ka ndaluar njëzetedy (22) persona dhe ka ngritur nëntë (9) aktakuza kundër pesëmbëdhjetë (15) personave, për vepra të ndryshme penale.

Prokuroria Themelore në Prizren, gjatë 24 orëve të fundit, me urdhër të prokurorit ka ndaluar dy (2) persona të dyshuar, si dhe pranë gjykatës kompetente ka parashtruar dy (2) kërkesa për caktim të paraburgimit kundër dy (2) personave.

Ndërsa, nga kjo prokurori janë ngritur gjashtë (6) aktakuza kundër gjashtë (6) personave, për vepra të ndryshme penale.

Prokuroria Themelore në Pejë, gjatë 24 orëve të fundit, me urdhër të prokurorit ka ndaluar një (1) person të dyshuar dhe ka ngritur një (1) aktakuzë kundër një (1) personi.

Prokuroria Themelore në Gjilan, me urdhër të prokurorit, në tri raste të ndara ka ndaluar tre (3) persona të dyshuar dhe ka ngritur tetë (8) aktakuza kundër tetë (8) personave.

Prokuroria Themelore në Gjakovë, gjatë 24 orëve të fundit, me urdhër të prokurorit kujdestar, ka ndaluar dy (2) persona, për vepra të ndryshme penale.

Prokuroria Themelore në Mitrovicë, gjatë 24 orëve të fundit, ka ndaluar një (1) person, ka paraqitur dy (2) kërkesa për caktimin e paraburgimit për pesë (5) persona, si dhe ka ngritur dy (2) aktakuza kundër dy (2) personave, për vepra penale të ndryshme.

Prokuroria Themelore në Ferizaj, gjatë 24 orëve të fundit, ka ndaluar një (1) person të dyshuar dhe ka ngritur tre (3) aktakuza kundër tre (3) personave, për vepra të ndryshme penale.