ATV

Category: Lajme

  • Rafuna: Çmimet do të stabilizohen, pagat e sektorit privat janë ngritur

    Rafuna: Çmimet do të stabilizohen, pagat e sektorit privat janë ngritur

    Kryetari i Odës Ekonomike të Kosovës (OEK), Lulzim Rafuna, në një intervistë për Ekonomia Online, ka thënë se ka indikacione të mira nga tregu evropian, por edhe ai global, për stabilizimin e inflacionit dhe ekonomisë në përgjithësi.

    Mirëpo, sipas Rafunës çmimet nuk do të kthehen në nivelin të cilin ishin para pandemisë.

    Teksa ka përmendur disa sfida aktuale të bizneseve kosovare, kryetari i OEK-ut ka treguar se, përkundër atyre sfidave, ka edhe rritje të pagave në sektorin privat.

    “Ka qenë një periudhë sfiduese për bizneset. Pas pandemisë, pati një shpresë se do të hapej tregu, mirëpo nuk u arrit që zinxhiri i furnizimit të stabilizohej. Menjëherë pas kësaj pasoi lufta Ukrainë-Rusi, prapë u çrregullua tregu, inflacioni. Ishte edhe pasiguria rreth energjisë elektrike, se a do të ketë furnizim, a do të shtrenjtohet”.

    Siç sqaroi Rafuna, rënia e çmimit të derivateve, çmimit të gazit dhe e shpenzimeve të transportit ndërkombëtar janë indikacione të mira për stabilizimin e çmimeve.

    “Indikacionet që na vijnë prej tregut evropian, prej të cilit dihet se jemi së pari të varur e më pas edhe nga ai global, na tregojnë se inflacioni ka filluar pak të bie. Kur marrim parasysh se çmimi i derivateve ka rënë, çmimi i gazit po ashtu, shpenzimet e transportit ndërkombëtar janë ulur – këto janë indikacione të mira që do të kemi një stabilizim të çmimeve, një rënie të lehtë. Por, duhet të jemi të vetëdijshëm që çmimet nuk do të kthehen në masën e para pandemisë”.

    Ndërsa, rritjen e pagave të sektorit privat ai e ka mirëpritur edhe pse “nuk janë pagat më të mëdha të mundshme”.

    “Jam shumë i lumtur që sektori privat ka lëvizur me pagat. Nuk janë pagat më të mëdha të mundshme. Varësisht mundësive, bizneset kanë lëvizur me një rritje të mirë të pagave. Këtë e them nga terreni që i vizitoj bizneset, nuk kam hasur në asnjë punëtor që është ankuar për pagën e vogël”.

    I pyetur nga EO për moszgjedhjen e bordeve të Bankës Qendrore dhe TRUSTI-t, Rafuna ka thënë se është e pafalshme nga Qeveria, si nga ana e qytetarëve ashtu edhe nga ajo e bankave të cilat nuk kanë kujt t’i drejtohen.

    “Nuk është mirë kjo që po ndodh, sidomos kur kemi një tronditje në sistemet financiare të Amerikës, Gjermanisë, tani së fundi edhe Zvicrës. Kosova ka qenë për lakmi dhe ka pasur një sistem shumë të mirë financiar, të qëndrueshëm. Sipas raportit të Bankës Qendrore, bankat vendore qëndrojnë mjaft mirë. Mirëpo të jetë Banka Qendrore pa bord, TRUST-i pa bord, sidomos TRUST-i kur ato janë para private të qytetarëve dhe punëtoreve, nuk është e falshme. Me urgjencë duhet të kompletohen bordet që të krijohet siguri. Bankat kanë shumë problem në kuptimin e sigurisë kur e dinë që s’ka bord as guvernator në Bankën Qendrore, nuk kanë kujt t’i drejtohen dhe as me kë të konsultohen”, është shprehur ai.

  • 24 vjet nga masakra në Lagjen e Boshnjakëve

    24 vjet nga masakra në Lagjen e Boshnjakëve

    Sot bëhen 24 vjet që kur dora e kriminelëve serbë mori jetën e 23 civilëve të pafajshëm në Lagjen e Boshnjakëve në Mitrovicë.

    Forcat serbe më 15 prill të vitit 1999, pasi kishin mbledhur rreth 80 persona në shtëpinë e Mustafë Sahitit, kishin nisur torturimin e tyre dhe vranë 23 shqiptarë në të gjithë lagjen.

    Shtëpia në të cilën ndodhi masakra tashmë është shndërruar në muze.

  • Presidetja Osmani pret sot Abavoviqin, kryeministri malazez e mbyll vizitën në Pejë

    Presidetja Osmani pret sot Abavoviqin, kryeministri malazez e mbyll vizitën në Pejë

    Presidentja e vendit, Vjosa Osmani sot (e shtunë) do të presë në takim kryeministrin në detyrë të Malit të Zi, Dritan Abazoviq.

    Sipas njoftimit të presidencës, takimi pritet të nisë në ora 10:00.

    Mediat fillimisht mund të marrin pamje nga pritja para ndërtesës së Kuvendit, dhe më pas pamje do të ketë edhe në fillim të takimit.

    Abazoviq është duke qëndruar për vizitë në Kosovë ndërsa sot pritet ta mbyllë të njëjtën në qytetin e Pejës.

    Kryetari i komunës së Pejës, Gazmend Muhaxheri do të presë në takim Abazoviqin në ora 15:40.

    Pas takimit në zyrë së bashku do të vizitojnë projektin IPA ndërmjet Malit të Zi dhe Republikës së Kosovës, si dhe në ora 16:15 do të vizitojnë Muzeun e Pejës.

    Gjatë së premtes, Abazoviq pati takim me kryeministrin Albin Kurti ku u nënshkrua edhe një marrëveshje për shërbime ajrore mes dy vendeve.

    Gjithashtu Abazoviq pati takime me krerët e partive opozitare si dhe vizitoi disa universitete e shoqata biznesesh private.

  • BQK paralajmëron rënie të kamatave të kredive me ngadalësimin e inflacionit

    BQK paralajmëron rënie të kamatave të kredive me ngadalësimin e inflacionit

    Banka Qendrore e Kosovës (BQK) paralajmëron se me ngadalësimin e shkallës së inflacionit dhe stabilizimin e çmimeve, do të fillojnë të bien edhe normat e interesit në kredi.

    “Me rënien e inflacionit, bankat pritet të fillojnë gradualisht t’i lehtësojnë politikat monetare – gjë që do të ndikojë në uljen e normave reale të interesit”, thuhet në një deklaratë me shkrim të BQK-së dërguar Radios Evropa e Lirë.

    BQK-ja, megjithatë, nuk jep detaje se në çfarë përqindjeje mund të bien normat e interesit në kredi, të cilat kanë kaluar tashmë 6-përqindëshin. Ky institucion nuk specifikon as kur mund të bjerë inflacioni, ndonëse më herët është përmendur gjysma e dytë e vitit 2023.

    Normat e interesit në kredi kanë nisur të rriten gjetiu në botë në muajt e fundit të vitit të kaluar. Kjo ka ndodhur si rezultat i shtrëngimit të politikave monetare nga bankat qendrore, për shkak të shkallës së lartë të inflacionit.

    Kosova e ka përmbyllur vitin 2022 me normë mesatare të inflacionit gati 12 për qind.
    Normat mesatare të interesit në kredi, sipas BQK-së, janë rritur nga 5.8% sa kanë qenë në shkurt të vitit të kaluar, në 6.5% në periudhën e njëjtë të këtij viti.

    Përkundër kësaj, të dhënat e këtij institucioni konfirmojnë se në sektorin bankar ka rritje të kredive familjare.

    Në Kosovë veprojnë aktualisht 12 banka komerciale dhe vlera e kredive në to ka arritur në mbi 4 miliardë euro.

    Në bazë të ligjeve dhe rregulloreve në fuqi, bankat komerciale në Kosovë i përcaktojnë individualisht normat e interesit, bazuar në politikat e tyre afariste, dhe BQK-ja nuk mund të ndërhyjë te to.

    Inflacioni vështirëson pagesën e këstit mujor

    Bardhyl Krasniqi, qytetar nga Prishtina, tregon për Radion Evropa e Lirë se në janar të vitit të kaluar ka marrë kredi në vlerë prej 40 mijë eurosh për blerjen e një banese.

    Për tetë vjet rresht, ai duhet t’i paguajë bankës kreditore një këst mujor prej më shumë se 500 eurosh, me normë interesi rreth 5%.

    “Norma e interesit është e lartë, por këto norma janë në të gjitha bankat në Kosovë. Për të blerë banesë apo diçka tjetër në vlera më të mëdha, nuk arrin pa kredi. Jemi të detyruar ta marrim edhe me këto norma të interesit”, thotë Bardhyli, i cili punon në një kompani të sektorit privat.

    Paga mesatare ne Kosovë është më pak se 500 euro, minimalja sillet nga 130 deri në 170 euro, ndërsa pensionet janë nga 100 deri në 265 euro.

    Bardhyli thotë se ka “pagë të mirë”, gjë që i ka mundësuar të marrë edhe kredi. Por, shton ai, rritja e vazhdueshme e inflacionit ia ka vështirësuar pagesën e këstit mujor.

    “Unë kam pagë mbi mesataren e pagave në Kosovë, bashkëshortja dhe djali po ashtu punojnë. Pagesa e këstit është e menaxhueshme, por jo edhe shumë e lehtë për ta përballuar, pas ngritjes së çmimeve të konsumit. Çmimet janë të larta – më të larta sesa inflacioni që po jepet zyrtarisht”, thotë Bardhyli.

    Rritjes së inflacionit gjetkë në botë i kanë kontribuar në masë të madhe pandemia e koronaviursit dhe lufta e Rusisë në Ukrainë.

    Guvernatori i Bankës Qendrore të Kosovës, Fehmi Mehmeti, ka paralajmëruar në një intervistë dhënë Radios Evropa e Lirë në muajin janar, se inflacioni do të bjerë në pjesën e dytë të këtij viti.

    Ngjashëm presin edhe ekspertët e çështjeve financiare, të cilët thonë se me rënien e inflacionit, do të bien edhe normat e interesit në kredi.

    “Interesat e larta e ngadalësojnë marrjen e kredive. Me ngadalësimin e kredisë ngadalësohet edhe zhvillimi ekonomik”, thotë Milazim Abazi, ish-kryesues i Komitetit të Financave në Oden Ekonomike Amerikane, për Radion Evropa e Lirë.

    Përveç bankave komerciale, në Kosovë funksionojnë edhe 30 institucione mikrofinanciare, të cilat po ashtu ofrojnë kredi për qytetarët. Ndonëse me më pak kritere, normat e tyre të interesit janë më të larta – afro 20%.

    Të dhënat e institucioneve financiare në rajon, të cilat ka arritur t’i sigurojë Radio Evropa e Lirë, tregojnë se normat mesatare të interesit në kredi variojnë – diku më të larta, diku më të ulëta.

    Fondi Monetar Ndërkombëtar, i cili monitoron sistemin monetar ndërkombëtar dhe zhvillimet ekonomike globale, ka paralajmëruar po ashtu rënie të normave të interesit në ekonomitë e mëdha. Në një raport të publikuar më 11 prill thuhet se këto norma pritet të bien në nivelet para pandemisë së koronavirusit, përkatësisht para vitit 2020.

  • Dokumentet e Pentagonit: Kina pranoi të armatoste fshehurazi Rusinë

    Dokumentet e Pentagonit: Kina pranoi të armatoste fshehurazi Rusinë

    Kina miratoi dhënien e ndihmës vdekjeprurëse për Rusinë për luftën e saj në Ukrainë, por donte që çdo dërgesë të mbetej sekret, sipas dokumenteve të qeverisë amerikane të zbuluara.

    Një përmbledhje e fshehtë e inteligjencës e datës 23 shkurt thotë se Pekini kishte miratuar furnizimin në rritje të Moskës me armë, të cilat do t’i maskonte si sende civile, sipas një raporti në Washington Post.

    Përgjimi i inteligjencës ruse tregon se Pekini dëshironte të maskonte ndihmat vdekjeprurëse si objekte civile, thuhet aty.

    Inteligjenca u mblodh nga agjentë amerikanë që përgjonin diskutimet e shërbimit sekret rus, raportoi gazeta. Rusët thanë se komisioni qendror ushtarak i Kinës donte që dërgesat të mbeten sekrete.

    Një dosje e veçantë e inteligjencës në grumbullin e dokumenteve të zbuluara tha se Pekini do të konsideronte një sulm “të rëndësishëm” ukrainas me armë të SHBA ose NATO në territorin rus si një përshkallëzim të konfliktit që do të meritonte dërgimin e armëve në Rusi.

    Dosjet ishin pjesë e një grupi të madh dokumentesh të klasifikuara të zbuluara që u shfaqën në platformën online Discord muajin e kaluar.

    Të premten, Jack Teixeira, 21-vjeçari i akuzuar për nxjerrjen e dokumenteve, doli në gjykatë në Boston. Zyrtarët amerikanë kanë thënë se dokumentet janë autentike dhe përmbajnë informacione shumë të ndjeshme, edhe pse disa duket se janë përpunuar.

    Sipas dokumenteve të zbuluara, forcat speciale të Rusisë janë shkatërruar nga lufta në Ukrainë. Washington Post citoi një raport të inteligjencës që thoshte se një njësi elitare, Brigada 346 Spetsnaz ka vetëm 125 trupa të mbetura nga 900 të dislokuara.

    “Nuk ishte e qartë se kur u bë ai vlerësim, por përputhet me vlerësimet e analistëve për vështirësitë e Rusisë në Ukrainë.”

    Të premten, ministri i Jashtëm i Kinës, Qin Gang, tha se vendi i tij nuk do të sigurojë armë për asnjërën palë të konfliktit dhe gjithashtu do të kufizojë eksportin e teknologjisë me përdorim të dyfishtë.

  • Bideni i emocionuar përkujton Beaun, djalin që shërbeu në Kosovë

    Bideni i emocionuar përkujton Beaun, djalin që shërbeu në Kosovë

    Presidenti i Shteteve të Bashkuara të Amerikës, Joe Biden, gjatë vizitës në Mayo të Irlandës, pati shansin të takonte priftin i cili kishte udhëhequr ceremoninë e varrimit të djalit të tij, Beau, i cili vdiq nga kanceri në tru.

    Beau Biden ka shërbyer në Kosovë pas përfundimit të luftës, përkatësisht më 2001 në trajnimin e gjykatësve dhe prokurorëve vendorë.

    Presidenti amerikan ka vizituar kishën në Mayo dhe ka folur për familjen e tij, besimin dhe djalin e tij, Beau.

    “Ishte spontane. Bideni qau, vërtetë e preku atë dhe më pas u lutëm bashkë për familjen e tij”, ka thënë prifti.

    Bideni ka nisur një seri vizitash në vendet ku ka lidhje familjare dhe në Mayo ai ka lidhje përmes stërgjyshit të tij.

  • Këshilli Kushtetues francez miraton reformën e pensioneve

    Këshilli Kushtetues francez miraton reformën e pensioneve

    Pavarësisht kundërshtimit të gjerë të opinionit në sondazhe, autoriteti më i lartë kushtetues i Francës mbështeti reformën e diskutueshme të pensioneve nga presidenti Emmanuel Macron.

    Këshilli Kushtetues francez përfundoi shqyrtimin e propozim-ligjit të reformës, i cili përfshin rritjen e moshës së pensionit nga 62 në 64 deri në vitin 2030, shkruan Anadolu.

    Këshilli hodhi poshtë kërkesën e deputetëve të krahut të majtë që të organizohet referendum në lidhje me reformën.

    Qeveria zbuloi propozimin për reformat në janar dhe u hap debat parlamentar muajin e ardhshëm, edhe pse miliona njerëz dolën në rrugë për të kundërshtuar reformat.

    Gjithashtu, punëtorët dhe sindikatat kundërshtojnë fuqishëm reformat.

    Trazirat u intensifikuan kur kryeministrja Elisabeth Borne, pas konsultimit me presidentin francez Macron, vendosi të përdorë kompetenca të veçanta kushtetuese për të miratuar propozim-ligjin pa miratimin e parlamentit më 16 mars.

    Vendimi u nxit nga frika se deputetët do të mund të bllokonin reformat pasi qeverisë i mungon një shumicë absolute në parlament.

    Mes muajsh protestash, policia franceze u akuzua për arrestime arbitrare dhe përdorimin e forcës së tepruar kundër demonstruesve.

  • Joseph: Në marrëveshjen e Ohrit ka detaje të paspeficikuara

    Joseph: Në marrëveshjen e Ohrit ka detaje të paspeficikuara

    Instituti Kosovar për Kërkime dhe Zhvillim të Politikave, në bashkëpunim me Universitetin “Johns Hopkins”, kanë organizuar tryezën me diskutimin për marrëveshjen mes Kosovës e Serbisë ku u tha se aneksi i marrëveshjes ka paqartësi dhe se diskursi politik nuk ka ndryshuar.

    Analisti amerikan dhe ligjëruesi në Universitetin “Johns Hopkins”, Edward Joseph tha se marrëveshja e Ohrit është ligjërisht e obligueshme dhe se fokusi duhet të jetë në zbatim.

    Po ashtu, ai theksoi se në këtë marrëveshje ka shumë boshllëqe dhe detaje të paspecifikuara.

    “Tani, këtu qëndrojmë formalisht, realiteti joformal dhe kontekstual, i njohur nga të gjithë në këtë sallë, dhe nga miqtë dhe kolegët tanë gjetkë në Kosovë dhe në Beograd, të gjithë i dinë sfidat e mëdha. Numër një, paqartësia e vetë marrëveshjes. Fakti që ka boshllëqe, ka elementë që nuk specifikohen, detaje të paspecifikuara, paqartësi që krijojnë pikëpyetje, ky është numri një”.

    “Numri dy është, natyrisht, statusi i marrëveshjes, fakti që ajo nuk u nënshkrua, fakti që nuk pati shtrëngim duarsh mes palëve dhe kontekstualisht, fakti që dëgjojmë një rrjedhë negativiteti për marrëveshjen, që sigurisht nuk është inkurajuese, dhe jo ajo që është standarde në çdo negociatë të suksesshme ndërkombëtare”, ka shtuar ai.

    Në anën tjetër, drejtori i Institutit Kosovar për Kërkime dhe Zhvillim të Politikave, Lulzim Peci theksoi se shpreson se për 100 ditë, të dyja vendet do të kompletojnë obligimet e tyre.

    Për normalizimin e marrëdhënieve dhe marrëveshjen finale ka folur edhe Sonja Biserko nga Komiteti i Helsinkut për të drejtat e njeriut në Serbi.

    “Sa i përket Serbisë, do të thosha, meqë u përmend pajtimi, problemi është se kemi nacionalizëm dhe kujtesë kulturore… Nuk mendoj se do të ketë konflikt, edhe pse ka potencial për një gjë të tillë… Ne jemi në një lloj okupimi nga mediat e Vuçiqit dhe OJQ-të e tij”, ka deklaruar ajo.

  • Halimi e LDK-së për rastin tragjik në Pejë: Alarm për institucionet

    Halimi e LDK-së për rastin tragjik në Pejë: Alarm për institucionet

    Zëdhënësja politike e Lidhjes Demokratike të Kosovës, Sibel Halimi, ka reaguar ndaj rastit tragjik në Pejë ku dyshohet se djali ka vrarë nënën e tij.

    Halimi vlerëson se shoqëria kosovare përditë po tronditet nga dhuna e vrasjet teksa shton se nuk ndërmerret asnjë hap drejt ndryshimit të mendësisë dhe politikave ndëshkimore.

    “Shoqëria kosovare përditë po tronditet nga dhuna e vrasjet, ndërsa nuk ndërmerret asnjë hap drejt ndryshimit të mendësisë dhe politikave ndëshkimore. Institucionet e shtetit, urgjentisht duhet të mendojnë për një qasje shumë dimensionale për luftimin dhe parandalimin e dhunës në familje. Tashmë nuk kemi të bëjmë me raste të izoluara, por për një plagë shoqërore thellësisht strukturore të dhunës së fshehur brenda psikologjisë shoqërore”, ka thënë Halimi.

    Mes tjerash, ajo tha se ky rast tragjik duhet të jetë alarm për institucionet.

    “Rasti i vrasjes së gruas në Pejë, të dridh në shpirt; alarm për këtë shoqëri e këto institucione, që të lëvizin nga parimi i dënimit verbal të rasteve në rrjete sociale e media. Në të kundërtën dhuna dhe vrasjet kanë filluar të shndërrohen në përditshmëri deri në normalizim” ka thënë Halimi në Facebook.

  • Nëna u vra nga djali i saj: Gjithçka që dihet deri më tani për krimin makabër në Pejë

    Nëna u vra nga djali i saj: Gjithçka që dihet deri më tani për krimin makabër në Pejë

    Një ngjarje e rëndë ka goditur dje qytetin e Pejës. Një grua rreth moshës 60 vjeçare u bë viktimë e djalit të saj dhe u vra brenda shtëpisë.

    Sipas hetimeve fillestare të policisë dhe Prokurorisë – që tani e ka në dorë procesin e hetimit të rastit bëhet fjalë për një ngjarje të rëndë e cila ka tronditur edhe organet e rendit, shkruan Paparaci.com.

    Nga Prokuroria e Pejës kanë bërë të ditur se dyshimet e para thonë se i biri ka privuar nga jeta të ëmën, ndërsa i njëjti është arrestuar.

    “Sot jam para jush dhe bashkëqytetarëve të Pejës lidhur me një rast tragjik dhe të dhimbshëm që ka ndodhur në Pejë dhe familjes i shprehim ngushëllime. Sot rreth orës 16:00 jemi njoftuar se ka ndodhur një vrasje në qytetin e Pejës ku dyshohet se i biri ka privuar nga jeta të ëmën. Duke iu falënderuar reagimit të shpejt të Policisë është arritur që i njëjti të arrestohet në mënyrë që të mos i shkaktojë dikujt tjetër ndonjë dëm ose vetës.”, ka thënë dje para gazetarëve Prokuroria .

    Prokuroria e Pejës gjithashtu ka bërë të ditur se në vendin e ngjarjes janë mbledhur të gjitha provat dhe është urdhëruar autopsia e së ndjerës.

    Lidhur me rastin e rëndë janë siguruar edhe dëshmitarë okularë. Sipas Prokurorisë, i dyshuari nuk ka qenë në gjendje të merret në pyetje, ndërsa kjo do të ndodh nesër në prani të psikologut dhe avokatit mbrojtës.

    Përveç kësaj, Prokuroria ka bërë të ditur se të dyshuarit do t’i bëhet edhe ekzaminim në Institutin e Psikiatrisë.

    “Kemi dalur së bashku me njësitin e forenzikës në vendin e ngjarjes ku janë mbledhur të gjitha provat, kemi urdhëruar autopsinë e të ndjerës. Kemi siguruar dëshmitarë okularë. I dyshuari nuk ka qenë në gjendje të merret në pyetje, kemi urdhëruar që nesër në prezencë të psikologut dhe avokatit mbrojtës të merret nëpyetje. Po ashtu do të vazhdojmë me hetime. Në bazë të të gjitha rrethanave, do të urdhërojmë edhe ekzaminimin në Institutin e Psikiatrisë të të dyshuarit.”, tha Prokurorja e rastit.

    Detaje lidhur me rastin ka dhënë edhe komandanti i Policisë në Pejë, Nue Nikolla i cili ka thënë se policia ka dalë menjëherë në vendngjarje dhe i dyshuari është arrestuar dhe prangosur nga patrulla e parë në vendngjarje.

    Më tej, Nikolla ka bërë të ditur se vendit të ngjarjes i janë përgjigjur të gjitha njësitet relevante të policisë së Kosovës, përfshirë forenzikën që kanë bërë mbledhjen e provave.

    I pyetur për detaje lidhur me krimin makabër, Nikolla është treguar i rezervuar marrë parasysh se bëhet fjalë për krim në familje.

    “Menjëherë në vend të ngjarjes kanë konstatuar se bëhej fjalë për një vrasje të rëndë dhe kanë arrestuar dhe prangosur kryerësin e rastit. Arrestimi është kryer nga patrulla policore. Është bërë sigurimi i vendit të ngjarjes, pastaj vendit të ngjarjes i janë përgjigjur të gjitha njësitet. Jemi në fazën e hetimeve dhe meqë kemi të bëjmë me rast brenda familjes, këto janë të gjitha informacionet që mund të japim për momentin.”, tha Nikolla.

    I pyetur lidhur me motivet e ngjarjes, Nikolla tha se ende nuk janë zbardhur të gjitha motivet.

    “Ende nuk janë sqaruar të gjitha motivet, por jemi në fazë fillestare dhe ditët e orët në vijim do të bëhen të ditura.”, tha Nikolla.

    Ai ka thënë se i dyshuari nuk ka pasur precedent penal më herët.

    “Unë si komandant stacioni nuk kemi pranuar informacion se kemi pasur të bëjmë me ndonjë rast të raportuar më herët në stacionin e Pejës.”, tha Nikolla.