ATV

Category: Lajme

  • ​Këshilli i Ambasadorëve Shqiptarë mirëpret vendimin për liberalizimin e vizave

    ​Këshilli i Ambasadorëve Shqiptarë mirëpret vendimin për liberalizimin e vizave

    Këshilli i Ambasadorëve Shqiptarë ka mirëpritur vendimin e Parlamentit Evropian ku u miratua liberalizimi i vizave për Kosovën.

    Në një komunikatë të Këshillit të Ambasadorëve Shqiptarë (KASh) thuhet se “ky vendim, në të vërtetë i vonuar i Bashkimit Evropian, është një arritje historike e shtetit të Kosovës, institucioneve dhe popullit të saj, që kanë bërë të mundur plotësimin e të gjitha kushteve teknike e politike të vendosura nga Komisioni Evropian”,

    KASh shfrytëzon rastin të përgëzojë të gjitha institucionet në Republikën e Kosovës të përfshira në këtë proces për punën e tyre të palodhshme dhe profesionale në përmbushjen e kritereve dhe standardeve të kërkuara.

    “Një falënderim i veçantë shkon për znj. Viola Von Cramon, Raportuese për Kosovën në Parlamentin e BE-së, për punën dhe përkushtimin e palodhur në arritjen e këtij qëllimi, i cili është i rëndësishëm, si për Kosovën ashtu edhe për BE-në”.

    “AAC shpreh besimin se liria e lëvizjes, si e drejtë themelore dhe më se e merituar e qytetarëve të Kosovës, shkëmbimet dhe kontaktet e drejtpërdrejta ndërmjet qytetarëve, njerëzve të biznesit, shkencëtarëve, letrarëve dhe kulturës do t’i shërbejnë konsolidimit socio-ekonomik të Kosovës, promovimi i mëtutjeshëm i arsimit, shkencës dhe kulturës, imazhit dhe promovimit të Kosovës në Evropë dhe më gjerë. Rrjedhimisht, do t’i shërbente edhe forcimit të paqes, stabilitetit dhe sigurisë në rajonin tonë. I urojmë suksese të mëtejshme Kosovës në rrugën e saj të integrimeve euroatlantike!”, përfundon shkrimi i KASh-it.

  • “Qeveria u thotë “jo” 45 milionë eurove”, dje shfuqizoi vendimin për dhënien e statusit “investitor strategjik” për një kompani

    “Qeveria u thotë “jo” 45 milionë eurove”, dje shfuqizoi vendimin për dhënien e statusit “investitor strategjik” për një kompani

    Një ditë para se ta merrte përfundimisht statusin e investitorit strategjik, Qeveria e shfuqizoi vendimin që i hap rrugë investimit 45 milionësh të kompanisë ““MOXICO LUMA KOSOVA MINING” në disa fshatra të Vushtrrisë e Mitrovicës.

    Për këtë vendim ndaj kompanisë të cilës fillimisht drita e gjelbër iu dha në qeverisjen e Avdullah Hotit dhe u rikualifikua si investitor strategjik në dhjetor të viti të kaluar, nga Qeveria thonë se në projektin investues kishe të dhëna të pavërteta.

    “Veprimi i Qeverisë është mbështetur në Ligjin Nr. 05/L – 079 për Investimet Strategjike në Republikën e Kosovës. Ky Ligj i mundëson Qeverisë se në rast se gjatë përgatitjeve dhe zbatimit të projektit investues strategjik, Komisioni merr dëshmi të reja në bazë të të cilave konstaton dhe vërteton se në projektin investues, ka të dhëna të pavërteta apo ndryshim të të dhënave, mbi bazën e të cilave nuk do të ishte vendosur për dhënien e statusit të investimit strategjik, Qeveria e revokon vendimin për dhënien e statusit investim strategjik”, thuhet në njoftimin e Qeverisë.

    Por veç saj sot në Kuvend deputetët do të duhej të votonin edhe për ligjin e ri për investime strategjike, por në mungesë kuorumi nuk u arrit as të diskutohej.

    “Sot Qeveria e ka sjellë në Kuvend një ligj tjetër, me një emërim tjetër për investime të qëndrueshme që në një farë formë e abrogon komplet metodologjinë e investitorëve strategjikë dhe e centralizon pranë zyrës së kryeministrit dhe e shuan agjencinë KIESA”, tha kryetari i Komisonit për Ekonomi, Ferat Shala.

    Sipas tij, nëse investitorët lënë Kosovën do të jetë dëm i madh për ekonominë e vendit.

    “T’i thuhet “jo” një investitori që sot vjen në këtë krizë ekonomike, të investojë 45 milionë euro në Vushtrri e Mitrovicë, pa asnjë bazë për teke personale, është dëm i madh për Kosovën, dëm ekonomik, dëm politik dhe largim ekstrem i investitorëve ndërkombëtarë”, tha Shala.

    Gjatë dy viteve të Qeverisjes Kurti është vetëm një kompani që e ka marrë statusin si “investitor strategjik” derisa 10 të tjera janë në pritje. /atvlive.tv

  • Vazhdon tradita, 5 mijë suharekas pastrojnë qytetin e fshatrat

    Vazhdon tradita, 5 mijë suharekas pastrojnë qytetin e fshatrat

    Nxënës e mësimdhënës të shkollave të mesme e fillore të komunës së Suharekës, ditën e filluan me aksion për pastrim në zonën e njohur si “Çafa e Dulës”. Por pastrimi i ambientit po bëhet në të njëjtën kohë edhe në 41 fshatrat e tjera.

    Ky është viti i gjashtë që organizohet një aktivitet i tillë, derisa kësaj radhe numri i qytetarëve që morën pjesë shkoi në 5 mijë.

    Nxënësit thonë se gjithmonë janë të gatshëm të kontribuojnë në pastrimin e ambientit.

    “Është e dyta herë që unë marr pjesë në këso aktivitete. Është shumë ndjenjë e mirë se mundemi me bë punë vullnetare e me i ndihmu ambientit”, thotë Olsa Elshani, nxënëse.

    “Këto aktivitete shkollore ose komunale janë shumë të mira për komunën e për ambientin, e kjo na bën me u ndje mirë kur rinia kontribuon shumë”, thotë Lirik Ramshaj, nxënës.

    Së bashku me nxënësit, ishte edhe i pari i kësaj komune, Bali Muharremaj, i cili tha se qëllimi i aksionit është vetëdijesimi i qytetarëve.

    “Qëllimi është të mos hidhen mbeturina. Të shohin të rinjtë e të rejat se nuk duhet të hidhet bërlloku në tokë. Ne kemi vendosur edhe kamera nëpër deponi ilegale, me qëllim të ndalohet ndotja e ambientit”, tha kryetari i komunës së Suharekës, Bali Muharremaj.

    Që aksioni të kalojë pa ndonjë incident, në terren doli edhe policia.

    “Me policë të mjaftueshëm sot i jemi bashkëngjitë aksionit, me rreth 25 policë, sa jemi caktuar vetëm për këtë aksion”, tha Afrim Syla, komandant policie.
    Ndërkaq, pavarësisht se nuk ndajnë të njëjtat bindje politike, komuna Suharekës, me atë të Shtimes, çdo vit bashkohen në aktivitete të tilla. Por, këtë vit Komuna e Shtimes, aksionin do ta mbajë pas festës së Fitër Bajramit. /atvlive.tv

  • S’mund të udhëtojnë nëse nuk e kanë pasaportën kosovare, çfarë thonë serbët e Kosovës për liberalizimin e vizave

    S’mund të udhëtojnë nëse nuk e kanë pasaportën kosovare, çfarë thonë serbët e Kosovës për liberalizimin e vizave

    Serbët e Kosovës nuk do të mundë të udhëtojnë pa viza, pavarësisht liberalizimit.

    Nëse nuk janë të pajisur me pasaporta të Kosovës, pasaportat e tyre të lëshuara nga Serbia nuk u vlejnë.

    Këtë e konfirmoi edhe raportuesi i vizave për Kosovën në Parlamentin Evropian, Thjis Reuten.

    “Legjislacioni është i qartë – pasaportat që lëshohen nga autoritetet kosovare. Dhe për ata që jetojnë në Serbi, ata tashmë kanë viza. Vendimi është formuluar mjaft me kujdes. Qytetarët e Kosovës me dokumente të Kosovës do të mund të udhëtojnë lirshëm”, tha Reuten.

    Serbët që jetojnë në Kosovës vazhdimisht kanë refuzuar të pajisen me dokumente të lëshuara nga shteti i Kosovës.

    Megjithatë, e mirëpresin liberalizimin e vizave.

    “I kam bërë disa vjet, andaj nuk konsideroj të udhëtoj. Por për të rinjtë them se kjo ka rëndësi. Për fat të keq, kjo nuk vlen edhe për të rinjtë në veri. Them se njerëzit do të marrin pasaportën e Kosovës, por mua s’më duhet”, thotë një qytetar serb.

    “Mirë që njerëzit mund të udhëtojnë. Unë tashmë kam pasaportë me të cilën mund të udhëtoj, kështu që s’më duhet ndonjë tjetër”, thotë një tjetër qytetar serb.

    Por, ka edhe nga ata që ende e refuzojnë pasaportën kosovare.

    Ndonëse, Serbia ka fituar liberalizimin e vizave në vitin 2009, serbët të cilët jetojnë në Kosovë, janë pajisur me një pasaportë të dorës së dytë, me të cilën u pamundësohet udhëtimi pa viza.

    Për analistin Branslav Kërstiq, e gjithë kjo është rezultat i politikës së Beogradit.

    Ditë më parë presidenti i Serbisë, Aleksandër Vuçiç, tha se është duke punuar për liberalizimin e vizave për serbët që jetojnë në Kosovë. Sipas tij, kjo po diskutohet në kuadër të procesit të dialogut. /atvlive.tv

  • Familja Maqastena që jeton në kushte të rënda: Shtëpia ku jetojmë është e shkatërruar

    Familja Maqastena që jeton në kushte të rënda: Shtëpia ku jetojmë është e shkatërruar

    Tavani në dhomën e gjumit iu shemb, e fëmijën nëntë vjeç të familjes Maqastena nga Prishtina, e zuri në gjumë.

    “Nuk kam mundur të vij shpejt. E kam çu djalin e madh. Ai tha: nënë po bie tavani. Thashë: vraponi, hiqeni djalin se është në gjumë. Kur kemi mbërri, e gjetëm përfundi këtyre”, thotë Fedaije Maqastena.

    Nëna që rastin e bëri publik në emisionin “N’frekuencë me Robin” në ATV, tregon se djali i shpëtoi me disa lëndime, por tavani i shembur, është vetëm një barrë më shumë për familjen pesanëtarëshe.

    “Shpia tejet e rrënume. Kjo nuk është për jetesë. As s’kam rrymë, vetëm disa kabllo që i kemi zgjatë… Plloça është gjysma e thyme. Kur e ndezi shporetin, muaji janar, me qenë duke vdekur nga ftohti, duhet t’i hapim dritaret, si me djegë goma brenda. Po m’vjen turp m’i dërgu fëmijët në shkollë, sepse era, po qeshin me ta”, shprehet ajo.

    Madje, ajo nuk ka as vend se ku t’i pastrojë fëmijët e saj.

    Me vetëm 100 euro të ardhura mujore, shumicën e kohës zonja e shtëpisë ushqimin e siguron nga bamirësit. Por, ka raste kur vizitorë të paftuar ia hanë ushqimin.

    “Kam dalë në dy-tre dyqane për ta gjetur më lirë atë gjellë. E kam lanë në kuzhinë të ftohet. Kam shku te shkolla m’i marrë fëmijët, e kur jam kthyer miu e kishte hangër më shumë se gjysmën. Kam shkuar prapë e kam marrë hua, që të kemi ushqim”, rrëfen Fedaije Maqastena.

    Problemet shëndetësore me këmbë e bëjnë atë të paaftë për punë, ndërsa bashkëshorti i saj, me punë krahu e duke mbledhur kanaçe, mundohet të sigurojë të holla për familjen.

    Krejt çfarë Fedaija kërkon, është një banesë ku ajo mund t’i rrisë fëmijët e saj të sigurt e të shëndetshëm. /atvlive.tv

  • Nënshkruhet akti ligjor për liberalizim të vizave, Reuten: Padrejtësisë ndaj Kosovës i ka ardhur fundi

    Nënshkruhet akti ligjor për liberalizim të vizave, Reuten: Padrejtësisë ndaj Kosovës i ka ardhur fundi

    Pas vendimit, radha ishte për një akt tjetër të rëndësishëm drejt liberalizmit të vizave. Në Strasburg, Kosova nënshkroi aktin ligjor që i hap rrugë lëvizjes së lirë të kosovarëve.

    Zëvendëskryeministri i Kosovës, Besnik Bislimi, teksa dha firmën në dokument, tha se nga janari nuk do të ketë “mijëra mundësi të humbura” për shtetasit e Kosovës.

    “Ky ka qenë një proces i gjatë, i vështirë, me shumë pengesa rrugës dhe ka marrë 11 vjet kohë për ta përmbyllur. Liberalizimi i vizave do të mundësojë kontakte midis njerëzve, të përforcojë lidhjet tona me BE-në, të konfirmojë përkushtimin e BE-së për rajonin dhe të rrisë aktivitetet biznesore, arsimore dhe kulturore për qytetarët tanë”, tha Bislimi.

    Pas ceremonisë së nënshkrimit, raportuesi i Parlamentit Evropian për vizat për Kosovën, Thijs Reuten, ritheksoi se më së largu nga 1 janari i vitit 2024, shtetasit që kanë pasaporta të Kosovës do të mundë të udhëtojnë pa viza në Schengen.

    “Ky vendim nuk është kuptimplotë vetëm për Kosovën, për shkak se të gjithë shtetasit e tjerë të rajonit kanë mundur të udhëtojnë, përveç Kosovës. Ishte i padrejtë, i paarsyeshëm dhe kësaj situate tashmë i ka ardhur fundi. Kosova ka punuar shumë për t’i plotësuar të gjitha kushtet dhe për t’i përmbushur ato para shumë vjetësh dhe tashmë po shpërblehet për këtë gjë. Por, nuk është vetëm moment i rëndësisë së madhe për Kosovën, por është me rëndësi edhe për ne, pasi BE-ja përfundimisht e përmbushi premtimin e vet”, tha Reuten.

    Pas nënshkrimit të vendimit, hapi i fundit mbetet botimi i vendimit në Gazetën Zyrtare, që pritet të ndodhë pas 20 ditësh.

    Kosova, aktualisht, është vendi i vetëm në Ballkanin Perëndimor, qytetarët e të cilit nuk mund të lëvizin lirshëm në zonën Schengen. /atvlive.tv

  • Davenport kërkon të mos “prishen” zgjedhjet në veri

    Davenport kërkon të mos “prishen” zgjedhjet në veri

    Organizata për Bashkëpunim dhe Siguri në Evropë – OSBE bëri thirrje për zgjedhje paqësore dhe demokratike, për kryetarë dhe asamble, në katër komunat me shumicë serbe në veri të Kosovës, të dielën.

    Në një intervistë për ATV-në, ambasadori Michael Davenport tha se është shumë e rëndësishme të shmanget çfarëdo incidenti i dhunshëm dhe të mos ketë përpjekje për të prishur procesin demokratik zgjedhor.

    “Mendoj se është e rëndësishme që votuesve t’u jepet mundësia ta hedhin votën e tyre dhe ajo të bëhet në mënyrë paqësore, të zakonshme, qetësisht. Shpresoj që procesi të ecë pa probleme. Siç thashë, i dëshiroj KQZ-së sukses në drejtimin e këtyre zgjedhjeve dhe që ato të mos pengohen në asnjë mënyrë, të jenë të zakonshme dhe paqësore. Mendoj se ky është prioriteti kryesor”, tha Davenport.

    Ambasadori Davenport foli edhe për mospjesëmarrjen e Listës Serbe në zgjedhjet e 23 Prillit.

    “Do të ishte e preferueshme që të gjitha komunitetet të merrnin pjesë plotësisht. Të dyja, si kandidatët për zgjedhje, ashtu dhe votuesit, por kjo është zgjedhja që është bërë. Do të jetë e rëndësishme teksa shkohet përpara, që megjithatë interesat dhe pikëpamjet e të gjitha komuniteteve po merren parasysh dhe po merren nën të drejtën e të gjithëve të mbrohen dhe kjo është fondamentale. Një demokraci funksionale, po, ka të bëjë me zgjedhjet demokratike, por është gjithashtu edhe për atë se si shoqëria funksionon dhe si të drejtat e të gjithëve respektohen, po ashtu, ndërmjet zgjedhjeve”, theksoi Davenport.

    OSBE-ja do të ketë vetëm rol monitorues, dhe jo vëzhgues, në zgjedhjet e jashtëzakonshme lokale në Mitrovicë të Veriut, Zveçan, Leposaviq dhe Zubin Potok. /atvlive.tv

  • Shërbimet sociale, QPS-të me mungesë personeli e pajisje për punë

    Shërbimet sociale, QPS-të me mungesë personeli e pajisje për punë

    Vetëm tre deri në katër punëtorë punojnë mesatarisht në shërbime sociale në të gjitha komunat e Kosovës. Por disa nga Qendrat për Punë Sociale operojnë me vetëm një veturë, pa pajisje adekuate të punës e me infrastrukturë jo të duhur.

    Drejtuesit e QPS-ve, që i bëri bashkë në Prishtinë prezantimi i një analize nga Ministria e Drejtësisë, theksuan se duan fuqizim dhe investime.

    “Ne po e shohim një qasje që realisht ajo do vetëm fuqizim, është funksionale, organi i kujdestarisë është funksional, dhe mundet me pasë shkëputje në sistem, e me mungu ndonjë profil, por është i rregulluam”, tha drejtoresha e QPS-së në Lipjan.

    “Ekspertët i kanë paraqitur saktë punëtorët që ne i kemi thanë. Ka pak lëshime teknike, por i rregullojmë. Por mu ba në kaq pak ditë pune analiza pa e parë në terren punën, nuk kam pritë që ka me dalë diçka ma shumë”, tha drejtori i QPS-së në Prishtinë, Vebi Mujku.

    Analiza ndër të tjera ka identifikuar mosharmonizim të ligjeve që rregullojnë shërbimet sociale.

    E vetëdijshme për gjendjen në të cilën ndodhen QPS-të, ministrja e Drejtësisë, Albulena Haxhiu, tha se duhet një koordinim institucional për fuqizimin e tyre.

    “Në kuadër të reformës institucionale, departamenti i politikave të shërbimeve familjare, i cili ka për nevoja sociale dhe familjare, hartimin e rregullores së kësaj fushe, si dhe inspektimin dhe monitorimin e institucioneve dhe individëve të cilët ofrojnë shërbime sociale e familjare, qasja jonë ka qenë e hapur dhe me gjithë akterët institucionalë dhe të shoqërisë civile, në mënyrë ta realizojmë në mënyrë efektive reformën që po e synojmë si Qeveri”, tha Haxhiu.

    Shërbimet sociale kaluan nën kompetencë të Ministrisë së Drejtësisë nga janari i këtij viti, derisa ishin nën përgjegjësinë e Ministrisë së Punës dhe Mirëqenies Sociale, e cila u bashkua me atë të Financave.

    Për të parë se si do të menaxhohen tash e tutje, MD-ja fillimisht ka thënë se i duhet një analizë që pasqyron gjendjen reale të rreth 40 QPS-ve që janë aktualisht në vend. /atvlive.tv

  • Escobar: Me apo pa pjesëmarrjen e serbëve, ShBA do ta njohë rezultatin e zgjedhjeve në veri

    Escobar: Me apo pa pjesëmarrjen e serbëve, ShBA do ta njohë rezultatin e zgjedhjeve në veri

    I dërguari i ShBA-ve për Ballkanin Perëndimor, Gabriel Escobar, ka komentuar vendimin e Listës Serbe për të mos marrë pjesë në zgjedhjet e 23 prillit për kryetarë të katër komunave veriore.

    Escobar tha se serbët duhet marrë pjesë në zgjedhje, mirëpo edhe nëse përfundimisht nuk marrin pjesë, ShBA prapëseprapë do t’i njohë rezultatet e zgjedhjeve.

    “I kam bërë apel serbëve që të marrin pjesë në zgjedhje. Kuptojmë shumë gjëra që ata i shohin si problematike, por sigurisht që duhet të marrin pjesë. Nëse ata nuk do të merrnin pjesë, kjo nuk do të thotë se ne nuk i mbështesim zgjedhjet. Qeveria e Kosovës ka obligim kushtetues. Do të ketë zgjedhje dhe ne do t’i njohim rezultatet dhe shpresojmë që serbët të kthehen në një moment”, tha Escobar për agjencinë serbe të lajmeve “Tanjug”, përcjell “Euronews.sr”.

    Ai tha se SHBA-të po kërkojnë që serbët të kthehen në departamentet e policisë, sepse nuk mund të ketë një komunitet që nuk ka shërbime komunale dhe që nuk ka forcë policore.

    “Kemi kërkuar që serbët të kthehen në institucione që të mos ketë arsye që shqiptarët etnikë të jenë të pranishëm atje. Kjo është një pyetje vërtet komplekse. Do të duhet një kompromis nga të dyja palët për të gjetur një zgjidhje”.

    Emisari Escobar po ashtu ka dënuar veprimet e ndryshme kriminale që kërcënojnë sigurinë në rajon, përfshirë këtu djegjen e veturave në veri.

    “Djegia e automjeteve, pasurisë së paluajtshme dhe kërcënimet ndaj njerëzve që duan të integrohen nuk vijnë nga shqiptarët etnikë, por nga serbët, kështu që mendoj se kërcënimet ndaj komunitetit serb në Kosovë duhet të ndalen nga të gjitha anët”, tha Escobar.

  • Sërish konkurs për policë në veri të Kosovës

    Sërish konkurs për policë në veri të Kosovës

    Boshllëkun që lanë 500 policët e dorëhequr në Stacionin e Mitrovicës së Veriut, Policia e Kosovës ende nuk e ka mbushur.

    Për t’i zëvendësuar, Policia të martën mbrëma hapi një konkurs, i cili vlen vetëm për minoritetet, nga mosha 18 deri në 30 vjeç.

    Por, Ministria e Punëve të Brendshme nuk ka treguar se sa është numri i zyrtarëve policorë që do të pranohen. Megjithatë, shprehet e sigurt se momentalisht ka mjaftueshëm kapacitete.

    “PK-ja ka kapacitete policore dhe në vazhdimësi veprimet e saj i ndërmerr konform autorizimeve ligjore dhe kushtetuese, konform zhvillimeve dhe vlerësimeve operacionale, me qëllim të ofrimit të sigurisë dhe shërbimit ndaj qytetarëve në të gjitha rastet që paraqiten”, thuhet në përgjigjen e MPB-së.

    Angazhimin e policëve të rinj po e konsiderojnë të nevojshëm edhe njohësit e çështjeve të sigurisë. Por, sipas tyre, zëvendësimi i plotë i policëve të dorëhequr, shihet i vështirë pa ndonjë marrëveshje mes palëve.

    “Dihet që largimi i policëve të Kosovës është bërë me një marrëveshje politike. Është e qartë se zëvendësimi i tyre nuk mund të bëhet pa ndonjë marrëveshje politike”, tha Avni Islami, doktor i shkencave të sigurisë.
    Zëvendësimin e tyre e shohin të nevojshëm edhe politologë që jetojnë në Mitrovicë.

    “Mungesa e policëve në atë pjesë paraqet rrezik për sigurinë dhe stabilitetin në Mitrovicën e veriut”, tha Abdullah Sadiku, politolog.

    Në fakt, Policia e kishte hapur edhe një konkurs në muajin shkurt, por për të aplikuan vetëm 136 syresh. Ata, në mesin e muajit mars iu nënshtruan testimeve fizike, por nuk dihet se sa prej tyre kanë arritur të pranohen. /atvlive.tv