Category: Lajme

Në Viti janë arrestuar dy të dyshuar kosovarë për arsye se nuk u i ishin ndaluar zyrtarëve policorë në një pikë kontrolli.

Pas ndjekjes policia ka rritur ta ndalojë kamionin me të cilin po lëviznin të dyshuarit dhe njëri prej tyre e kishte sulmuar një zyrtar policor.

“Gjatë kontrollit në kamionin e të dyshuarve janë gjetur 11 krerë gjedhe që dyshohet se i kishin futur ilegalisht nga Maqedonia e Veriut. Me vendim të prokurorit kamioni dhe kafshët janë dërguar doganës, ndërsa të dyshuarit pas intervistimit janë dërguar në mbajtje”, thuhet në raportin e fundit të Policisë së Kosovës.

Këshilli Prokurorial i Kosovës (KPK), përmes një komunikate për media, ka kundërshtuar fuqishëm dhe ka shprehur indinjatën e thellë ndaj deklaratave të deputetëve dhe përfaqësuesve të lartë të Lëvizjes Vetëvendosje, të cilët, sipas tyre, kanë përdorur gjuhë të papranueshme dhe tendencioze lidhur me punën e kryeprokurorit të Prokurorisë Speciale të Republikës së Kosovës (PSRK), Blerim Isufaj.

Pas arrestimit të drejtorit të Korporatës së Energjisë së Kosovës (KEK), Nagip Krasniqi, nën dyshimin për veprat penale “Keqpërdorimi i pozitës apo autoritetit zyrtar” , “Ushtrimi i ndikimit” dhe “Konflikti i interesit”, deputetët Halil Thaçi,Arbër Rexhaje Adnan Rrustemi, në deklarimet publike i dolën ën mbrojtje drejtorit të arrestuar të KEK-ut.

Mirëpo, KPK-ja konstaton se disa zyrtarë të lartë shtetërorë po tentojnë të ndikojnë sistematikisht në punët e sistemit prokurorial dhe po përçojnë mesazhe tendencioze politike, sikurse thonë se që kanë bërë edhe kësaj radhe, duke përdorur gjuhë denigruese kundër personalitetit të Blerim Isufajt, kandidatit për kryeprokuror të shtetit.

Për KPK-në kjo gjuhë është në kundërshtim me të gjitha normat etike, ligjore dhe kushtetuese.

“Këshilli Prokurorial vlerëson se, deklaratat e tilla, siç ishte ishin ato të djeshmet, janë në kundërshtim të plotë me ndarjen e pushteteve dhe përbëjnë ndërhyrje flagrante dhe të drejtpërdrejtë në punën e gjyqësorit, përkatësisht të institucionit të Prokurorit të Shtetit, ngaqë puna dhe angazhimi i të gjithave, përfshirë edhe PSRK-në , burojnë nga Kushtetuta dhe ligjet e vendit, e jo nga vullnetet politike, grupet e interesit dhe individët e caktuar”, thuhet në komunikatë.

Me këtë rast, Këshilli Prokurorial i Kosovës, thekson se qëndron plotësisht prapa punës së mirëfilltë dhe shumë profesionale të Prokurorisë Speciale të Republikës së Kosovës dhe prapa punës dhe angazhimit të prokurorëve të PSRK-së dhe në asnjë rast nuk do të tolerojë denigrimet dhe atakimet qëllimkëqija ndaj angazhimeve dhe përkushtimit të bartësve të sistemit prokurorial.

Në përmbyllje të reagimit, KPK-ja ia risjellë në vëmendje kujtdo që tenton të cenojë punën e kësaj prokurorie dhe Kryeprokurorit Blerim Isufaj, si dhe përgjithësisht punën e institucionit të Prokurorit të Shtetit se, pushteti gjyqësor dhe prokurorial është i veçantë, me institucione kushtetuese, të pavarura dhe të paanshme, të cilat kryejnë detyrën e tyre në përputhje me mandatin kushtetues dhe ligjor, duke u bazuar gjithnjë në prova dhe fakte.

Komisioni për Shëndetësi dhe Mirëqenie Sociale është takuar me përfaqësues të e grupit avokues të prindërve me fëmijë me aftësi të kufizuara në Handikos, raporton Ekonomia Online.

Avokuesit e prindërve me fëmijë me aftësi të kufizuara në Handikos, patën ankesa në lidhje me mungesën e shërbimeve shëndetësore, sociale, qasje në institucionet shëndetësore e po ashtu edhe për ligjet që i prekin këtë persona.

Kryetarja e Komisionit Fatmire Kollçaku, tha se shoqata Handikos, që nga themelimi ka bërë punë të mëdha për personat me aftësi të kufizuar, duke shtuar se janë në komunikim me Ministrinë e Drejtësisë sa u përket ligjeve.

“Për ne është më rëndësi ta dëgjojmë zërin e qytetarëve, kemi vizituar shoqatën e juaj dhe shoqatat e tjera. Unë mendoj se Handikosi ka kryer disa punë më shumë se shteti që është dashtë me i kryer. Ne jemi edhe në komunikim me ministrin për ligjet. Ne si ndërmjetësues tuaj në këto faza mund të insistojmë sa më shumë në grupe punuese”, tha ajo.

Afërdita Gashi, kryesuese e Grupit avokues nga Handikosi, tha se shumë kërkesa të tyre nuk janë marrë parasysh.

Sipas saj, ligji i cili i vlerëson personat me aftësi të kufizuar nuk po gjen zbatimin e duhur. Ajo pati ankesa për komisionet që vlerësojnë këta persona.

“Ky grup është formuar prej viti 2012, shqetësimet e prindërve, sfidat normal që janë sfidat shëndetësore e sociale. Janë sfida që edhe në nuk dimë me i përshkruar. Në takimet me nivelin qendror i kemi paraqit këto sfida dhe nuk janë marr parasysh. Ne kemi ankesa për ligji për personat paraplegjik dhe tetraplegjik dhe për ligjin invalidor. Ky ligj nuk po e vlerëson si duhet një person me parapligji. Kjo është një pikë e parë që duhet të diskutohet për vlerësimin për këta persona. Ne po kërkojmë që të bëhet institucionalizimin e shërbimeve sociale, kjo është një sfide po ashtu për ne”, tha ajo.

Mimoz Rrahmani, nga Handikos, tha se janë duke u përballur me mungesë të shërbimeve shëndetësore.

Ndonëse tha se ligjet nuk mungojë, ato nuk po zbatohen sa duhet, raporton EO.

“Shërbimet shëndetësore janë primare në rehabilitimin e tyre, në qasje e tyre. Kur përmendet ligji që është aktual, e kam shikuar si një prind që ballafaqohet me sfidat e kam analizuar përderisa nuk janë shërbimet sociale është problem. Një sfidë është edhe shërbimi i stomatologjisë, shërbimet nuk po ofrohen, ne kemi raste që është dashtë me shkuar në Shkup për t’u trajtuar. Nuk mund të themi se nuk kemi bazë ligjore. Edhe pjesëmarrje në shkolle nuk mundet me qenë, kur ka mungesa në aspektin e shërbimeve shëndetësore”, tha ajo.

Lirie Sadria, nga Handikos, e cila po ashtu është person me aftësi të kufizuar tha se, kjo kategori shoqërore është duke u përballur edhe me pengesa në qasje në institucionet shëndetësore.

“Një prej sfidave që edhe në përballim është qasja. Ka shumë pengesa në qasje ne institucione shëndetësore. Këto shqetësime i kemi ngritur. Unë jam ballafaquar me këtë problem”.

“Mos qasja është diskriminim është jo e drejtë. Një prej tyre është edhe koha e caktuara e vizitave që bëhet nëpër spitale. Ne duhet me prit 2,3 deri në 4 orë. Kemi edhe probleme në qasje në WC. Edhe WC që janë të mbyllura, ata në pamjen fizike ma caktojnë se a kam të drejtë a jo të përdori”, tha ajo.

Kandidati i Partisë Demokratike të Kosovës për kryetar të Komunës së Zubin Potokut, Izmir Zeqiri, në një intervistë për KosovaPress, ka thënë se nëse del i pari në zgjedhjet e 23 prillit do të sjellë jetën institucionale për të gjithë qytetarët e kësaj komune.

Ai konsideron se dëshira për punë ekipore nga ana e tij, si dhe qasja e deritashme e komunikimit me qytetarët, do të bëjnë që qytetarët e këtushëm t’ia besojnë vendin e të parit të qytetit, të cilin synon ta udhëheqë.

Duke folur për vakumin e deritashëm institucional në komunat veriore, ai premtoi se do të jetë fuqishëm i angazhuar për të sjellë më në fund jetën institucionale në Zubin Potok.

“E dinë qytetarët të cilët më njohin se unë jam këtu akter i hershëm politik, ushtarak, por edhe punoj në zyrën komunale për komunitete dhe kam pasur shumë përvoja me njerëz, edhe ata me mua. E dinë njerëzit se unë jam tejet i vendosur në realizimin e atyre planeve që ne i planifikojmë. Jam njeri i cili kam dëshirë të punoj jo vetëm, por me qytetarët në ekip dhe së bashku… Arsyeja pse duhet qytetarët të më votojnë mua është pikërisht kjo, e dinë njerëzit besueshmërinë, guximin dhe profesionalizmin tim, si dhe qasjen e komunikimit me qytetarët… Tanimë veç është e njohur në tërë Kosovën vakumi institucional së fundmi në komunat veriore… Kur ka vakum institucional, natyrisht që nuk është mirë për asnjë qytetar, komunitet, asnjë grupacion… Do të jemi fuqishëm të angazhuar për ta sjellë jetën institucionale në këtë trevë”, ka thënë Zeqiri.

Edhe pse situata aktuale e sigurisë në këtë komunë është e brishtë, ai tha se beson tek organet e sigurisë dhe nuk parasheh incidente ditën e zgjedhjeve.

“Situata aktuale është problematike për faktin se shumica e banorëve serbë në këto komuna po shihet sjellja dhe mendësia e tyre antishtetërore, antiinstitucionale. Kjo përbën rreziqe, demotivim të njerëzve, jo vetëm për qytetarët e etnisë shqiptare, por edhe për serbët… Nuk ishte dashur të ketë incidente, besoj në Policinë e Kosovës… Edhe në qoftë se eventualisht do të shfaqet ndonjë problem, do të evitohet”, ka thënë ai.

Zeqiri iu ka bërë thirrje qytetarëve që të dalin ditën e zgjedhjeve në numër sa më të madh për të votuar, ndërsa ka garantuar se do të qëndrojë prapa të gjitha premtimeve të dhëna ndaj tyre.

“Mesazhi im për qytetarët kishte me qenë që të dalin dhe të votojnë për kandidatët që janë në garë… Kurse për qytetarët e Kosovës unë kisha bërë thirrje të jemi unik në këto procese, Kosova nuk është krejt në gjendje të mirë, i duhet unitet këtij populli, për ta sfiduar çdo sfidë me të cilën ballafaqohet edhe shteti’, theksoi Zeqiri.

Në zgjedhjet e jashtëzakonshme për kryetar të katër komunave në veri të vendit, kanë të drejtë vote gjithsej 45 mijë e 95 qytetarë, prej të cilëve 6 mijë e 661 votojnë në Komunën e Zubin Potokut.

Deputeti i LDK-së, Avdullah Hoti, ka kritikuar reagimet e deputetëve të partisë në pushtet, Lëvizjes Vetëvendosje, për arrestimin e kryeshefit ekzekutiv të Korporatës Energjetike të Kosovës (KEK), Nagip Krasniqi.

Ish-kryeministri Hoti ka thënë se reagimet e tyre do të kenë pasojë në rrugëtimin e Kosovës drejt anëtarësimit në Këshillin e Evropës (KiE) dhe në Bashkimin Evropian (BE).

“Reagimi i pushtetit për arrestimet e ditës së djeshme në KEK, duke e kritikuar dhe kërcënuar organin e akuzës, e jo duke e mbështetur atë dhe kërkuar drejtësi efektive, do të ketë pasoja në rrugëtimin e Kosovës drejt anëtarësimit të sivjetmë në Këshillin e Evropës e nesër në Bashkimin Evropian”, ka shkruar Hoti në Facebook.

Ish-ministri i Financave, Hoti ka thënë se kjo do të evidentohet edhe në raportin e BE-së për vendin.

“Jam i sigurt se raporti për vendin i BE-së dhe raporte të tjera të rëndësishme ndërkombëtare do të evidentojnë me notë shumë negative këtë sjellje të mazhorancës në Kosovë ndaj arrestimeve të lidhura me afera të mundshme korrupsioni. Këto reagime duhet thënë se janë të paprecedent”, shkruan Hoti.

Ish-ministri I Financave, ka shtuar edhe disa pyetje për zyrtarët që kanë reaguar.

“Pse gjithë kjo frikë nga hetimi i aferave të mundshme korruptive? Pse sulmohet organi i akuzës nga Prishtina e nga Tirana, e nuk dënohet akti i mundshëm korruptiv dhe nuk kërkohet drejtësi? A mos janë këto afera të mundshme korruptive të lidhura me persona më larg dhe më lart? Kjo sjellje vë në pikëpyetje ‘gjoja’ reformën në drejtësi. Me këtë sjellje kjo mazhorancë e ka humbur besueshmërinë për çfarëdo reforme që tenton të bëjë në drejtësi”, ka shkuar Hoti.

Sipas Hotit një pushtet që tenton të pengojnë drejtësinë e minon demokracinë.

“Të gjithë ne duhet të tregojmë respektin dhe përkrahjen tonë për zyrtarët e drejtësisë për veprimin e tyre në ndalimin e akteve të mundshme joligjore në KEK. Me këtë veprim po tregohet se drejtësia në Kosovë është funksionale, e pandikueshme dhe e guximshme. Sigurisht se secili është i pafajshëm derisa të provohet ndryshe. Respekti i politikës ndaj drejtësisë tregohet me përkrahje dhe me kërkesë për drejtësi. Respekti tregohet edhe duke mbajtur gojën mbyllur”, ka shkruar ai.

Por nga ana tjetër, reagime të ashpra ka pasur edhe nga Lëvizja Vetëvendosje, të cilët akuzojnë organet e drejtësisë për arrestime të urdhëruara

Deputeti i LVV-së, Adnan Rrustemi ka pretenduar se arrestimi i kryeshefit ekzekutiv të KEK-ut, Nagip Krasniqi, është bërë me porosi.

“Asnjë aktakuzë e arrestim për një muaj me 16 barrikada në veri, asnjë aktakuzë për qindra dosje të dorëzuara, e mos të flasim që deri para dy viteve ishin aty ku janë si prokurorë për të mbrojtur korrupsionin përmes aktakuzave qëllimisht të dobëta, por ju hodh sipër kryeshefit të KEK-ut nga LVV. Me porosi atëherë, me porosi gjithmonë, me porositës të njëjtë!”, shkroi Rrustemi në Facebook.

Ndërsa, të mërkurën, Policia e Kosovës në bashkëpunim me organet tjera institucionale nisi një aksion të gjerë duke bastisur Zyrat e Korporatës Energjetike të Kosovës (KEK) dhe dy banesa private që rezultuan të jenë në pronësi të kryeshefit ekzekutiv të KEK-ut, Nagip Krasniqi.

Pas aksionit, Prokuroria Speciale njoftoi se është arrestuar Nagip Krasniqi nën dyshimet për tri vepra penale.

Sipas Prokurorisë, drejtori i KEK-ut dyshohet për veprat penale: Keqpërdorimi i pozitës apo autoritetit zyrtar, ushtrim i ndikimit dhe konflikt interesi.

Liderët e partive opozitare, PDK, LDK dhe AAK, kanë thënë se kjo është dëshmi e abuzimit të Qeverisë në sektorin e energjisë.

Kandidati për kryetar të Komunës së Leposaviqit nga Lëvizja Vetëvendosje, Lulzim Hetemi, ka folur lidhur me kandidimin e tij dhe arsyen pse qytetarët duhet ta votojnë në zgjedhjet e jashtëzakonshme të 23 prillit që do të mbahen në veri. Me të në krye, ai tha se do të lindë dielli për të gjithë banorët e kësaj komune.

Në një intervistë për KosovaPress, Hetemi ka përmendur problemet e shumta me të cilat ballafaqohen qytetarët e Komunës së Leposaviqit, me theks fshatrat shqiptare Bistricë, Cerajë dhe Koshtovë, ndërsa potencoi nevojën e rindërtimit të shtëpive atje.

‘Ne ofrojmë rend dhe ligj, qeveria na ka përkrahur… Neve na duhet siguria, institucionet dhe komunën ta funksionalizojmë për qytetarët, pa marrë parasysh shqiptarë, serbë etj… Problemet janë të shumta… shtëpitë nuk janë rindërtuar atje, nuk janë meremetuar, njerëzit nuk kanë mundësi për të investuar… Janë edhe disa probleme tjera ku qeveria na ka premtuar se do të na ndihmojë dhe do të ecim përpara’, ka thënë Hetemi.

Ai ka deklaruar se gjendja e sigurisë në atë komunë, sidomos në tre fshatrat shqiptare, nuk ka qenë më e mirë asnjëherë dhe se incidente ndëretnike nuk ka pasur kurrë.

Hetemi tha se ka kushte për mbajtjen e zgjedhjeve të dielën dhe se nuk beson se do të ketë incidente në veri ditët në vijim.

“Siguria nuk ka qenë më në nivel asnjëherë. Unë kam shkuar në Leposaviq, Leshak, janë disa incidente, por ato ndodhin çdo vend, janë disa incidente mes tyre… Incidente ndëretnike nuk ka pasur kurrë… Duke analizuar situatën muajt e fundit, nuk besoj se do të ketë incidente. ka me shku gjithcka në rregull… Ka (kushte për mbajtjen e zgjedhjeve), edhe MPB-ja na ka ofruar siguri dhe ma merr mendja se kjo do të funksionojë dhe do të ketë rregull deri sa të kalojnë zgjedhjet”, tha ai.

Kandidati i Lëvizjes Vetëvendosje për kryetar të Komunës së Leposaviqit apelon qyetetarët, shqiptarë dhe serbë, që më 23 prill të ushtrojnë të drejtën e tyre për të votuar.

“Dilni votoni të dielën qytetarë shqiptarë të fshatrave Bistricë, Cerajë dhe Koshtovë. Por, ftoj edhe qytetarët serbë të dalin në komunën e tyre, në të cilën do të lindë dielli pas sa viteve, në mënyrë që ta kemi një komunë demokratike, pa dhunë dhe incidente”, apeloi ai.

Zgjedhjet e jashtëzakonshme në katër komunat veriore do të mbahen këtë të diel. Në Komunë e Leposaviqit janë 13 mijë e 318 qytetarë me të drejtë vote.