Category: Lajme

Kryetari i Partisë Demokratike të Kosovës, Bedri Hamza, ka bërë të ditur se lista zgjedhore e PDK-së për zgjedhjet e jashtëzakonshme të 7 qershorit do të përfshijë emra dhe figura të reja.

Hamza foli para mediave pasi u pyet nëse pjesë e listës do të jetë edhe Fatmir Limaj me bashkëpunëtorët e tij nga Nisma Socialdemokrate.

“PDK-ja do të garojë në zgjedhje si PDK dhe me listën e saj. Brenda listës sigurisht që do të ketë risi, emra dhe figura të tjera”, deklaroi ai.

Pas takimit me ushtruesen e detyrës së presidentes, Albulena Haxhiu, ku u diskutua për datën e zgjedhjeve, Hamza tha se PDK-ja është e gatshme për procesin zgjedhor, pavarësisht nëse ai mbahet më 31 maj apo më 7 qershor.

“Sipas nesh, çdo datë brenda afateve kushtetuese është e pranueshme, qoftë 31 maji apo 7 qershori. Ne jemi të përgatitur për zgjedhje. Shumica e partive politike në takim kanë qenë të përcaktuara për datën 7 qershor, por duhet marrë parasysh edhe puna dhe përgatitjet e KQZ-së. Prandaj jemi fleksibilë për cilëndo nga këto data”, u shpreh Hamza.

Kosova do t’i mbajë zgjedhjet parlamentare për herë të tretë në më pak se një vit e gjysmë. U.D presidentja e vendit, njëherësh edhe kryetare e Kuvendit, Albulena Haxhiu, ka caktuar 7 qershorin si datë e zgjedhjeve të parakohshme parlamentare. Nesër, KQZ pritet të për të marrë vendimet e para me qëllim të organizimit të këtyre zgjedhjeve.

Këtë informacion e konfirmoi për Gazetën Express, zëdhënësi i KQZ-së, Valmir Elezi.

“Pas shpalljes të datës 7 qershor 2026 për mbajtjen e zgjedhjeve të parakohshme për Kuvendin e Kosovës, mund t’iu konfirmoj se gjatë ditës së nesërme (e premte, 1 maj 2026), KQZ do të mbajë mbledhje për të marrë vendimet e para me qëllim të organizimit të këtyre zgjedhjeve”, tha Elezi për Gazetën Express.

Lidhur me zgjedhjet e reja, Elezi tha se “meqenëse këto janë zgjedhje të parakohshme, organizimi i tyre bëhet me afate të shkurtëra kohore dhe një nga vendimet e para të KQZ-së për këtë proces zgjedhor do të jetë shkurtimi i afateve kohore të aktiviteteve zgjedhore apo përshtatja e tyre sipas nevojës dhe në pajtim me rrathanat. Ligji për Zgjedhjet e Përgjithshme ia jep të drejtën KQZ-së që afatet kohore të aktiviteteve zgjedhore të përshtaten me ditët në dispozicion të KQZ-së për organizimin e këtyre zgjedhjeve”.

Tutje, ai shtoi se “me planin e aktiviteteve, KQZ rregullon çështjet mbi të cilat ndërtohet i gjithë procesi zgjedhor dhe që kanë të bëjnë me votuesit, subjektet politike dhe vëzhguesit. Pra, këtu përcaktohen afati për partitë politike për të formuar koalicione dhe deklaruar mospjesëmarrjen në zgjedhje; afatin për subjektet politike për t’u certifikuar e për të dorëzuar listën e kanidatëve për deputetë; dhe periudhën e fushatës zgjedhore. Po ashtu, me anë të këtij plani, KQZ cakton edhe kohën për regjistrimin e votuesve jashtë Kosovës, votimin përmes postës dhe në përfaqësi diplomatike, si dhe regjistrimin e votuesve me nevoja të veçanta. Pjesë e këtij plani është edhe vendosja e afateve për akreditimin e vëzhguesve dhe mediave”.

Ai tha se KQZ do të miratojë edhe planifikimin e buxhetit të nevojshëm për organizimin e zgjedhjeve të parakohshme për Kuvendin e Kosovës.

“Viti 2026 nuk është një vit zgjedhor dhe kjo do të thotë se në buxhetin vjetor të KQZ-së të ndarë me ligjin e buxhetit, nuk ka mjete të planifikuara për zgjedhje të parakohshme. Në rrethana të tilla, ashtu siç është vepruar në të kaluarën, KQZ i drejtohet Qeverisë së Kosovës me kërkesë për mjetet që janë të nevojshme për mbulimin e shpenzimeve”, përfundoi Elezi.

Sipas asaj që është thënë publikisht, zgjedhjet e reja pritet t’i kushtojnë Kosovës 10 milionë euro.

Eugen Cakolli nga Instituti Demokratik i Kosovës (KDI) i ftuar në emisionin “DPT Te Fidani” tha se në zgjedhjet e reja parlamentare pritet të ketë dalje më të ulët të qytetarëve në votime, krahasuar me zgjedhjet e kaluara.

Cakolli tha se në rezultatin e zgjedhjeve përveç përqindjes së daljes së qyetarëve, përcaktues në rezultatin zgjedhor mund të jetë edhe përçarja e ish-presidentes Osmani me kryeministrin në detyrë, Albin Kurti, raporton KlanKosova.tv.

“Përçarja e kryeministrit në detyrë me ish-presidenten Osmani padyshim që do të ketë impakt në rezultatin zgjedhor. Dy tre palë zgjedhjet e fundit na ka treguar që mundemi mos me qëllu (rezultatin e zgjedhjeve), pasi në radhë të parë misioni i monitorimit jo me domosdoshmërisht kërkon të bësh prognoza dhe e dyta ajo që ka ndodhur në vitin 2025, cikli i bllokadave të njëpasnjëshme, pamundësia e zgjedhjes së kryetarit, pastaj problemet me zgjedhjen e kryeministrit dhe ajo çka ndodhi tash, besoj që rrezikon të ketë impakt të drejtpërdrejt në daljen e votuesve. Dalja e votuesve di të jetë përcaktuese, pasi që sa më e vogël është dalja e votuesve, potenciali për të ndikuar në rezultat është më i vogël. Zakonisht në rastin e partive opozitare, i bie që duhet të ketë dalje më të lartë në zgjedhje që me parametrat matës duken të mangët”, tha Cakolli.

Aktualisht është duke u zhvilluar një takim në mes kryetarit të LDK-së, Lumir Abdixhiku dhe ish-presidentes Vjosa Osmani.

Kështu i ka thënë burimet Gazetës Express, të afërm me Abdixhikun dhe Osmanin pa dhënë më shumë detaje.

Abdixhiku tashmë i ka bërë publike qëndrimet për kthimin e Osmanit në LDK, ndërkohë që Osmani që tashmë i ka intensifikuar takimet me qytetarë ende s’ka bërë deklaratë eksplicite për të ardhmen politike pas krisjes së raporteve me Kurtin. Mbetet të shihet nëse Osmani do t’i bashkohet listës së LDK-së për zgjedhjet e 7 qershorit dhe cila do të jetë marrëveshja mes tyre.

U.D e presidentes, Albulena Haxhiu pas shkarkimit të ambsadorit në Vatikan, Vehbi Miftari ka thënë se s’do ta quante të tillë, pasi siç tha ajo “çdo kthim nga misioni diplomatik nuk është shkarkim”.

Sipas Haxhiut, procedura për lirimin e Miftarit nga pozita ka filluar qysh në vitin 2025.

Ajo theksoi se nga lëndët e trashëguara nga ish-presidentja Vjosa Osmani, janë bërë tetë emërime, tri lirime dhe dy riorganizime të misioneve konsullore.

“Nuk do ta quaja shkarkim, çdo kthim nga misioni diplomatik nuk është shkarkim. Në diplomaci ka emërime, kthime, rotacion dhe ka nevojë që shërbimi i jashtëm të funksionojë sipas ligjit dhe nevojave të shtetit. Sa i përket Miftarit, procedura për lirimin e tij ka filluar në vitin 2025, unë kam trashëguar një numër të madh lëndësh në raport me këto çështje, ato lëndë i kam trashëguar nga Osmani. dhe Aty ku gjithçka është në rregull, në raport me procedurat do t’i shtyejë përpara. Në këtë drejtim jam bërë tetë emërime, tri lirime dhe dy riorganizime të misioneve konsullore”, tha Haxhiu.

U.D e presidentes, Albulena Haxhiu, e pyetur për emërimin e anëtarit të fundit të KQZ’së, për të cilin, edhe VV’ja edhe PDK’ja, argumentojnë se u takon atyre, ka thënë se, ‘’do të veprojë’’ atëherë kur ajo e ‘’konsideron se duhet të veprojë’’.

Haxhiu, ka thënë se, procesi i zgjedhor nuk rrezikohet sepse KQZ’ja, ka 10 anëtarë.

‘’Sa i përket anëtarit të fundit në KQZ, siç jeni në dijeni përbërja është prej 11 anëtarëve. Përfshirë edhe kryesuesin që vjen nga Gjykata Supreme. Për momentin janë 10 anëtarë. Unë jam e interesuar që në qoftë se kjo përbën problem për KQZ’në, dje dëgjova që thanë që do të kontestohet procesi zgjedhori për shkak të një anëtari. Unë ju kam, njoftuar se i kam dy kërkesa, të PDK dhe VV’së, unë për këtë çështje kam pasur mendim edhe më herët, fuqia politike, propercionaliteti, përfaqësimi, janë parime që nuk duhet t’i mohojë askush. Duke qenë se kanë kaluar të gjitha afatet, jam në trajtim të kësaj çështjeje, dhe do të veprojë në përputhje me përgjegjësitë, të jeni të sigurt se me 10 anëtarë në KQZ, asgjë nuk rrezikohet, as certifikimi i partive, as ai rezultateve të zgjedhjeve. Pra do të veprojë atëherë kur e konsiderojë se duhet të veprojë.

Presidenti amerikan Donald Trump ka kritikuar ashpër kancelarin gjerman Friedrich Merz, duke i kërkuar të fokusohet në problemet e brendshme të vendit të tij.

Sipas Trump, Merz po neglizhon çështjet si emigracioni dhe kriza energjetike, ndërsa është përfshirë në çështje ndërkombëtare, përfshirë luftën në Ukrainë dhe situatën me Iranin.

Ai ka deklaruar se kancelari gjerman po tregohet “joefektiv” në menaxhimin e situatave globale dhe se prioritet duhet të jenë sfidat e brendshme të Gjermanisë.

Deklaratat e tij kanë nxitur reagime në opinionin ndërkombëtar, ndërsa tensionet mes dy figurave politike duket se po vazhdojnë të rriten.

Ardian Gjini do të jetë kandidat i AAK-së për kryeministër në zgjedhjet e reja parlamentare.

Kryetari i komunës së Gjakovës, Ardian Gjini do të jetë kandidat për kryeministër dhe bartës i listës së AAK-së.

Kështu ka konfirmuar sot nënkryetari i partisë, Pal Lekaj.

‘Ardian Gjini do të jetë bartës i listës dhe kandidat për kryeministër”, tha Lekaj për gazeta Blic.

Kosova do të shkojnë në zgjedhje të parakohshme parlamentare pas dështimit të zgjedhjes së presidentit brenda afatit të përcaktuar nga Kushtetuesja. Data e zgjedhjeve pritet të caktohet së shpejti.

Ish-deputeti i LVV’së, Enver Dugolli, ka reaguar ndaj një ngjarje që ka ndodhur gjatë vizitës së Albin Kurtit në Drenicë, ku një qytetar nuk ka pranuar që t’ia japë dorën.

Dugolli është kapur me mediat që kanë raportuar për këtë gjë, duke thënë se “ e paskan “zbuluar” një person të porositur për të krijuar “lajm”’.

Ai ka shkruar se personi në fjalë “nuk e përfaqëson nderin e drenicasve”.

“Personi me duar në xhepa nuk e përfaqëson nderin, mikëpritjen dhe dhimbjen e drenicasve”, ka shkruar Dugolli.

Reagimi i plotë:

Titull “bombastik”, por që në fakt nxjerr në pah një tjetër dimension të së vërtetës.

Në mesin e shumë drenicasve që kishin dalë për të pritur Kryeministrin, Kryeparlamentaren dhe ushtruesen e detyrës së Presidentes, paskan “zbuluar” një person të porositur për të krijuar “lajm”.

Unë, si drenicas, dhe në emër të shumë të tjerëve, e falënderojmë Kryeministrin Kurti, i cili jo vetëm tani, por në çdo përvjetor, nderon heronjtë, dëshmorët dhe viktimat civile të Drenicës. Madje, në vende ku nuk ka shkelur këmba e asnjë udhëheqësi që nga paslufta, ishte pikërisht Kryeministri Kurti ai që i nderoi me vizita dhe homazhe.

Personi me duar në xhepa nuk e përfaqëson nderin, mikëpritjen dhe dhimbjen e drenicasve