Një shpërthim në afërsi të stacionit të Policisë së Kosovës në veri të vendit ka ndodhur rreth orës 03:00 të mëngjesit.
Lajmin e ka konfirmuar zëdhënësi i policisë për rajonin e veriut, Veton Elshani.
“Si pasojë është dëmtuar një veturë dhe një shtyllë elektrike. Policia është duke e trajtuar rastin si ‘shkaktim i rrezikut të përgjithshëm’”, është shprehur Elshani.
Kuvendi i të Rinjve të Ferizajt dhe shoqëria civile kanë organizuar një aktivitet të veçantë për të nderuar dhe përkujtuar 1432 viktimat e luftës së fundit në Kosovë.
Në këtë aktivitet që u mbajt në sheshin qendror të Komunës së Ferizajt, janë ndezur qirinjtë për t’i nderuar viktimat dhe për t’i dhënë një mesazh të fortë për paqen dhe stabilitetin në Kosovë.
“Ky aktivitet ka si qëllim të ndikojë në ngritjen e vetëdijes së qytetarëve për rëndësinë e paqes dhe stabilitetit në Kosovë dhe për të nderuar dhe respektuar të gjithë ata që kanë humbur jetën gjatë kohërave të vështira dhe të dhimbshme për Kosovën dhe popullin tonë”, thuhet në njoftimin e bërë nga Komuna e Ferizajt.
Organizatorët e këtij aktiviteti, së bashku me pjesëmarrësit e tjerë, kanë bërë thirrje për të gjithë qytetarët për të ndërgjegjësuar dhe mobilizuar në mbrojtjen dhe promovimin e vlerave të lirisë, demokracisë dhe paqes në Kosovë.
Në këtë aktivitet ishin prezentë përfaqësues të Kuvendit të të Rinjve të Ferizajt, shoqërisë civile dhe të rinjtë nga Ferizaj. Ky aktivitet është një tregues i vazhdueshëm i përkushtimit të shoqërisë civile dhe të rinisë për të ndërtuar një Kosovë të qëndrueshme, të ndershme dhe të bashkuar, duke përkujtuar 1432 viktimat e luftës së fundit në Kosovë.
Organizatorët dhe pjesëmarrësit e këtij aktiviteti kanë dëshiruar të theksojnë se rinia e Kosovës nuk do t’i harrojë viktimat e luftës dhe se ata vazhdojnë të angazhohen në veprimtaritë e tyre për të ndihmuar në ndërtimin e një Kosove paqësore, demokratike dhe të qëndrueshme.
Më shumë se 2.200 të ftuar, përfshirë krerë shtetesh, emra të famshëm dhe organizata humanitare nga 203 vende si dhe anëtarë të familjes mbretërore, do të marrin pjesë në ceremoninë e kurorëzimit të mbretit të Britanisë së Madhe, Charles III.
Mbreti Charles dhe gruaja e tij Camilla do të kurorëzohen sot në Westminster Abbey në Londër. Në kurorëzimin e Mbretëreshës Elizabeth II në vitin 1953 morën pjesë më shumë se 8.200 të ftuar.
Princi William dhe gruaja e tij Kate, si dhe motra dhe vëllai i mbretit Charles, Princesha Anne dhe Princi Edward, do të marrin pjesë në ceremoni.
Princi Harry ka konfirmuar se do të marrë pjesë në ceremoni, por jo edhe gruaja e tij Meghan. Në mesin e të ftuarve që do të marrin pjesë në ceremoninë e kurorëzimit do të jenë edhe liderë botërorë dhe figura të rëndësishme politike.
Përveç kryeministrit britanik Rishi Sunak, në ceremoni do të marrin pjesë ministra dhe anëtarë të Dhomës së Lordëve si dhe ish-kryeministrat britanikë si Liz Truss dhe Tony Blair si dhe kryeministri skocez Hamza Yusuf.
Në mesin e figurave politike që do të marrin pjesë në ceremoninë që do të mbahet në Londër janë presidenti francez Emmanuel Macron, kryeministri australian Anthony Albanese, kryeministri i Zelandës së Re Chris Hipkins dhe presidentja e Komisionit të Bashkimit Evropian (BE) Ursula von der Leyen.
Presidentja e Kosovës, Vjosa Osmani si dhe presidenti i Shqipërisë, Bajram Begaj gjithashtu do të jenë të pranishëm në këtë ceremoni.
Presidenti i SHBA-së, Joe Biden nuk do të marrë pjesë në ceremoninë e kurorëzimit, por gruaja e tij Jill Biden do të jetë e pranishme në emër të vendit të tij. Gjithashtu në ceremoni pritet të marrin pjesë edhe udhëheqësit fetarë dhe përfaqësuesit e Komonuelthit të Kombeve.
Ndër anëtarët e familjeve mbretërore të vendeve të tjera, të cilët janë në Londër për të marrë pjesë në ceremoninë e kurorëzimit, do të jenë Princi Albert i Monakos dhe gruaja e tij Princesha Charlene, Mbreti i Spanjës Felipe dhe gruaja e tij Mbretëresha Letizia, Princi i Kurorës së Japonisë Akishino dhe gruaja e tij Princesha Kiko.
Mbreti Charles dhe gruaja e tij Camilla ftuan 850 përfaqësues të komunitetit në ceremoninë e kurorëzimit për shkak të punës së tyre humanitare.
Sot, në Prishtinë do të bëhet testimi i radhës i sistemit të alarmit publik.
Siç ka informuar Komuna e Prishtinës, testimi i sistemit të alarmit publik do të bëhet nga ora 12:05, me zë të njëtrajtshëm, dy herë nga 30 sekonda.
“Ju njoftojmë se ditën e shtunë, me datë 06 maj 2023, duke filluar nga ora 12:05 do të bëhet testimi i radhës i Sistemit të Alarmit Publik më zë të njëtrajtshëm dy herë nga 30 sekonda”, është bërë e ditur në njoftim.
Sot, bëhen 24 vjet nga vrasja e nënkryetarit shumëvjeçar të LDK-së dhe deputetit të Kuvendit të Republikës së Kosovës, Fehmi Aganit.
Agani është vrarë me 6 maj të vitit 1999, nga forcat pushtuese serbe.
Figura e Aganit ka lënë gjurmë të pashlyeshme në historinë e pavarësisë së Kosovës, fushën e arsimit dhe mendimit shkencor. Fehmi Agani ka qenë njëri nga themeluesit dhe udhëheqësit e Lidhjes Demokratike.
Më 6 maj 1999, Agani, së bashku me familjen e tij, ai ka tentuar të linte Kosovën me tren. Në kufirin me Maqedoninë, treni është kthyer mbrapsht. Diku afër Fushë-Kosovës, policia ka ndaluar trenin dhe ka urdhëruar të zbrisnin të gjithë. Dëshmi të ndryshme të botuara në shtyp, kanë bërë të ditur se Agani është marrë ose në një autobus së bashku me burra të tjerë shqiptarë, ose i vetëm me policët brenda një makine private. Kufoma e tij është gjetur të nesërmen buzë një rruge gjithë baltë, pranë Lipjanit.
Për nder të profesor Aganit, vite më parë është ngritur përmendorja e tij në oborrin e Fakultetit të Filologjisë në Prishtinë.
Që nga vitet 60-ta kur ishte paraqitur me argumentim e së drejtës së Republikës së Kosovës e deri me vrasjen e tij, Agani e kishte vënë gjithë krijimtarinë e tij në shërbim të projektimit, të argumentimit dhe të realizimit të këtij qëllimi.
“Gratë, të drejtat e grave dhe studimet gjinore” ishte tema që u trajtua në konferencën e organizuar nga Kolegji AAB, ku ndër të ftuarat ishte edhe Minsitrja e Drejtësisë, Albulena Haxhiu. Në prezantimin e saj në ditën e parë të kësaj konferenca dy ditore, Haxhiu foli për dy nga aspektet e diskriminimit të grave në procesin e zbatimit të ligjit.
“Gjendja në praktikë të zbatimit te ligjeve është e rëndë. Edhe sa i përket ndarjes se tokës e trashëgimisë se pastaj nuk i flet vllau ose baba. Një prej fenomeneve me së shumti qe përballet është dhuna në familje, dhuna në baza gjinore këto janë fenomene qe po përballemi shumë. Ka një emancipim shoqëror për raportim të dhunës, por, ende një numër i vogël raportojnë dhunën sepse besojnë se s’ka besim ne institucione dhe në anen tjetër mungesa e pavarësisë ekonomike”, tha Haxhiu.
Nga ana e tij Zëvendës-rektori i Kolegjit AAB, Shemsedin Vehapi, tha se për këtë institucion, tema të tilla, trajtohen shpesh me qëllim vetëdijesimit të shoqërisë.
“TemaT me barazi gjinore janë tema qe trajtohen me seriozitet duke qene institucion serioz dëshira është të i ngrisim sa më shumë këto tema”, tha Vehapi.
Edhe organizatorja e kësaj konference Uranela Demaj, njëherësh profesoreshë e këtij Kolegji tha se konferenca të tilla janë të një rëndësie të madhe.
Konferencën e sotme e vlerësuan edhe studentët e Kolegjit AAB, që morën pjesë.
Pabarazia në punë në dëm të grave u përmend si tjetër aspekt i shkeljes së të drejtave të tyre. /atvlive.tv
Për vrasjen e tre personave në mbrëmjen e 26 nëntorit të 2021, prokuroria themelore e Pejës ngriti aktakuzë tk pas afro një viti e gjysmë.
Më 26 nëntor të vitit 2021, rreth orës 19:00, autobusi i linjës Gjakovë – Deçan u sulmua me kallashnikov. Në sulm u vranë shoferi Gani Gjokaj dhe nxënësit Ledion Hamzaj e Gentiana Mustafaj.
Provat e dëshmitë e mbledhura gjatë kësaj periudhe, sipas prokurores Sahide Gashi, janë mjaft bindëse për t’i akuzuar tre anëtarët e familjes Mehmetaj, të cilët ishin arrestuar disa ditë pas rastit.
“Kemi ngritur aktakuzë ndaj Kastriot Mehmetajt dhe Kreshnik Mehmetajt për bashkëkryerje të veprës së rëndë. Ndërsa, ndaj Halil Mehmetajt për shtytje në veprën e rëndë”, tha Gashi.
Ndaj një anëtarit tjetër të familjes Mehmetaj, hetimet ishin ndalur meqë nuk u gjetën prova se ishte i përfshirë.
Opsioni për sulm terrorist është eliminuar, megjithatë plani për vrasjet, sipas prokurorisë, ishte i organizuar mirë.
“Targeti i sulmit ishte shoferi i autobusit, se kemi të bëjmë me një sulm mirë të planifikuar. Kryerësi e ka ditur itinerarin e shoferit të autobusit mirë. Ka aktruar si i dehur, për ta ulur shpejtësinë e autobusit. Ikja e kriminelit pa asnjë gjurmë, është tregues i mirë se ai e ka ditur terrenin, ose ka bashkëpunuar me persona që e kanë ditur mirë”, tha Gashi.
Deri te ngritja e aktakuzës, Prokuroria hetoi e intervistoi shumë persona, madje disa prova i dërgoi edhe jashtë shtetit për ekzaminim.
“Kemi proceduar mbi 80 persona. Kemi analizuar 41 video. Ku kemi përcjellë ecjen e autobusit. 10 lokacione janë sekuestruar. Provat janë dërguar edhe në laboratorë jashtë shtetit”, tha Gashi.
Në rastin në Gllogjan përveç tre të vrarëve, një udhëtar tjetër në autobus, ishte plagosur. /atvlive.tv
Rron Gjinovci, tash e disa vjet drejton Organizatën për Rritjen e Cilësisë në Arsim (ORCA), dhe në vazhdimësi merret me aktivitete të ndryshme (edhe) për sa i takon fushës së arsimit.
Të premten, ai ishte i ftuar në emisionin “LIBERO”, dhe tha se po ta kishte mundësinë, Shkëlzen Gashin do ta bënte Ministër të Arsimit.
“…E di që nuk do të pranonte, por Shkëlzen Gashin do ta bëja ministër të arsimit pa asnjë dyshim…”, tha ndër tjerash Gjinovci.
Gjithashtu, ai tha se po të kishte mundësinë tri intervenimet e para që do t’i bënte në Kosovë janë në fushën e arsimit, shëndetësisë dhe artit.
“…Në art do t’i jepja shumë më shumë rëndësi arteve dhe muzikës klasike…”, u shpreh ai.
Vlen të potencohet se Shkëlzen Gashi ishte këshilltar politik i Albin Kurtit. Ai u shkarkua nga Kurti, pas deklaratave mbi krimet e luftës dhe UÇK-në që kishin shkaktuar shumë reagime.
Për ta shikuar intervistën e plotë të Rronit, klikoni në linkun e mëposhtëm:
Inxhinieri i teknologjisë, Ermal Sadiku ishte i ftuar të premten në “LIBERO”, ku ndau informacione të shumta për sa i takon avancimit të teknologjisë, të mirat dhe të këqijat e këtij përparimi teknologjik.
Një frikë që mund ta kemi secili prej nesh është se ‘A përgjohemi nga kamera e telefonit, a po e kompjuterit tonë?’, e pikërisht për këtë dilemë foli edhe Ermal Sadiku, duke thënë se me të vërtetë mund të përgjohemi.
“Teknikisht po, është e mundur me të pa prej kamerës…”, tha Sadiku.
Por, ai nuk e la anash dhe faktin që kjo mënyrë e përgjimit është e pa nevojshme për shumicën prej nesh.
“Praktikisht është e pa nevojshme….Që të ketë dikush arsye me e bo atë punë, duhet të ketë interes…”, shtoi ai.
Mes tjerash, me Ermalin u diskutua dhe për rrezikun që po sjell Inteligjenca Artificiale për njerëzimin.
“…Përmes Inteligjencës Artificiale po mundemi me përdorë aplikacione, me kriju muzikë, art, po na ndihmon në shkencë, në laboratore, të shkruajmë ese…Ka filluar me u dukë e rrezikshme…Investime më të mëdha në botë po bëhen në IA, ende ka mangësi por mendoj për 20-30 vite ka me qenë një moment shumë interesant për njerëzimin, ku do të duhet të vendosin se a dëshirojnë të vazhdojnë me i fuqizu makinat apo me i ndalë, sepse po bëhet tepër”, deklaroi Sadiku.
Kujtojmë se fakti më interesant rreth Inteligjencës Artificiale është se, deri më 2045, pritet të tejkalojë plotësisht inteligjencën njerëzore, sipas “Valuer-Gjeneruese për hartimin e mundësive dhe vështrimet strategjike të Inteligjencës Artificiale”.
Për ta shikuar emisionin e plotë, klikoni në linkun më poshtë:
Aktivisti i shoqërisë civile Rron Gjinovci, i cili njëkohësisht është bashkëthemelues i Organizatës për Rritjen e Cilësisë në Arsim (ORCA), ishte i ftuar në një intervistë ekskluzive të premten në “LIBERO”.
Rroni ishte një ndër personat e paktë që doli kundër banorit të “Big Brother Vip Albania” Luiz Ejlli.
“O po keq po knojka Luizi. Tmerr. Zero talent!”, kishte shkruar Rroni në një status në faqen e tij zyrtare në Facebook. Mirëpo, nuk kanë munguar as replikat nga faqja e Luizit duke i thënë se “garant të paska paguar mirë burri i Oltës”.
Por, ai mori edhe një koment epik nga tezja e tij.
“Këndoi tepër keq edhe njerëzit nuk e thoshin këtë… E di që Luizi është një emër që si për shembull kur dëshiron me të lavdëru tezja, ta bon ‘enklocopedia e tezës si Luizi je bo’. Nuk e di a të ndihem mirë apo keq se nuk e njoh shumë mirë… Por, mundem me thanë me plotë përgjegjësi që Luiz Ejlli nuk di me këndu …”, tha ai, duke i qëndruar mendimit të tij se Luizi nuk ka talent për të kënduar.
Kujtojmë, se Rron Gjinovci ka punuar edhe si gazetar investigativ, si dhe ka udhëhequr edhe një emision në KTV.
Për të shikuar emisionin e plotë, klikoni në linkun më poshtë: