Category: Lajme

Ikja e qytetarëve në vendet evropiane është shumë shqetësuese, sepse pjesa më e madhe e personave që po largohen nga Kosova janë profesionistë. Kështu ka thënë Enver Haliti nga Lëvizja Vetëvendosje.

Ai tha se duhet të merret parasysh se sa shumë mund dhe investim duhet, që të prodhohet një kuadër i tillë. “Ndërsa po ua ofrojmë të gatshëm shteteve të zhvilluara”, tha ai.

Kurse Pleurat Sejdiu tha se shifrat e fundit flasin se janë 104 mjekë të cilët kanë marrë dokumentacionin për të lidhur kontratë në shtetet e Bashkimit Evropian.

Ai tha se kjo shifër e tejkalon shifrën e vitit të kaluar.

“Në vitin e kaluar kemi pasur 212 për 11 muaj, kurse këtë vit për katër muaj e gjysmë janë 104 dhe është për t’u shqetësuar”, tha Sejdiu.

Ai shtoi se kriza do të ndjehet dhe do të thellohet pas tri viteve në sektorin e shëndetësisë.

Ndërsa Lulzim Rafuna nga Oda Ekonomike e Kosovës tha se biznesi është duke u përballë me mungesën e fuqisë punëtore si rezultat i migrimit.

Por ai tha se kjo po ndodhë edhe si rrjedhojë e mos lidhjes së arsimit me kërkesat e tregut.

“Ne kemi bërë thirrje prej ditës së parë që të shpejtohet reforma në arsim, që të lidhen kualifikimet me kërkesat e tregut të punës”, tha Rafuna.

E Jusuf Azemi nga sindikata e sektorit privat tha se për 7-8 vite jashtë vendit ka ikur një e pesta e popullsisë.

Azemi shtoi se injorimi më i madh i punëtorëve të sektorit privat të Kosovës është bërë n’kohën e pandemisë dhe pas pandemisë, sepse doli qeveria e Kosovës me luftimin e inflacionit duke i stimuluar të gjithë punëtorët e sektorit publikë kurse sektorit privat iu tha “dil qiteni dorën dhe lypeni pronarëve të kompanisë, nëse iu jep ai ju jap edhe unë”, u shpreh Azemi.

Arian Vranica nga Shoqata e Gastronomëve, tha se janë para një situate mjaftë shqetësuese sepse sipas statistikave kemi 1323 biznese më pak dhe 22332 punëtorë më shumë dhe nuk është projeksion real.

“Në aspektin pozitiv ka rritje të formalitetit, por nuk do të thotë që kjo reflektohet me rritje të punësimit, sepse ne po shohim se bizneset dita ditës po përballen me sfida të tilla që po edhe e transformojnë ndoshta edhe shërbimin ë tyre, në mënyrë që të jetojnë dhe të mund të koabitojnë në këtë ekosistemin e ri i cili është krijuar duke u kthyer edhe nga aspekti i shërbimit në vetëshërbim”, tha Vranica. /rtk

Ish i burgosuri Bislim Zogaj, në emisionin CONTEXT në ATV, si i dëshmitarë i mbijetuar i ngjarjes, ka rrëfyer tmerrin që ka përjetuar në masakrën e Dubravës.

Ai ka tretuar se masakra ka zgjatur për pesë ditë rresht, dhe ajo çfarë ka ndodhur brenda asaj kohe, mendja e shëndoshë e njeriut nuk mund ta konceptojë.

“Në Kosovë kemi mbi 200 masakra, por masakra e Dubravës dallon prej masakrave të tjera për dy arsye kryesore. E para, masakra e Dubravës është se kemi qenë brenda burgut, në asnjë formë nuk kemi qenë në rrezik për dikën, derisa për masakrat e tjera munden me u arsyetu ushtria serbe se kanë mundur me qenë të rrezikum. Gardianët dhe ushtria serbe apsolutisht nuk ka pasur mundësi me qenë të rrezikuar nga ne, sepse kemi qenë të paarmatosur, as lidhëse të këpucëve nuk kemi pasur. Dhe e dyta që është e rëndësishme është se ka qenë masakër që ka zgjatë pesë ditë, nga 19-24. Çdo masakër ka mundur me zgjat 2-3 orë ose brenda ditës, por kjo ka zgjatë pesë ditë. Mendja e shëndoshë e njeriut nuk mund ta konceptojë atë çfarë ka ndodh”, tha Zogaj.

Ai tha se ka dëshmitarë të mjaftueshëm të kësaj masakre.

“Mendja e shëndoshë e njeriut nuk mundet me e konceptu që qysh për katër ditë, me gjakftohtësi maksimale hyjnë gardianët, ushtarët serbë dhe vrasin njerëz dhe dalin, sikur të mbysnin ndonjë pulë e jo njëri”, tregon Zogaj.

Ai thotë se i ka ndodhur që t’i mbesin trutë e një viktime në duar, në kohën kur kishte shkuar për t’i dhënë ndihmën.

“Ka pasur raste kur kanë hyrë brenda kur e kanë ekzekutuar vëllain para vëllait tjetër që ka qenë i fshehur dhe nuk ka guxuar të ofshajë, por është dashur të rrijë pa frymë e të paktën ai të shpëtojë. E mos të flasim për të tjerat kur kanë gju granata për shakta, kur unë e kam pasur rastin kur më kanë mbetur trutë e njeriut në dorë, kur kam shku me ia dhënë ndihmën, kur kam pa organet që i kanë dalë nga shpina jashtë”, rrëfen Zogaj. /atvlive.tv

25 kërkesat që ia dërguan kryeministrit Albin Kurti për takim, i kanë vendosur në një mur.

Përfaqësues të Sindikatës së Punëtorëve të sektorit Privat nuk morën asnjë përgjigje nga Qeveria, për t’u takuar e për të diskutuar rreth projektligjit për pagën minimale.

Zvarritjet për futjen e këtij ligji në fuqi, sindikalistët po i konsiderojnë të qëllimshme nga na e Qeverisë.

“Nuk e kanë parë të arsyeshme të takohen me neve, që në njëfarë forme neve na kanë lënë duart e lira, por qëndrimi i Federatës Sindikale është gjithçka që është nën 450 euro, ata këtë pagë mund ta mbajnë për vete, por jo edhe për neve”, tha Azemi.

Ani pse në muajin e ardhshëm bëhet 1 vit prej kur në Kuvend është votuar në parim projektligji i cili i hap rrugë rritjes së pagës minimale, që nga atëherë nuk ka pasur ndonjë hap konkret për miratimin e tij.

Për këtë opozita kërkon bashkëpunim, por thotë se paga prej 250 eurosh do të kundërshtohet edhe nga ta.

“Lufta imagjinare e kësaj Qeverie me kategori të caktuara të kësaj shoqërisë tonë, me sindikata me kategori të caktuara të dala nga lufta, duhet të kalohet, nuk ka njeri normal që kishte me thanë që është e merituar paga minimale 250 euro”, tha deputeti i PDK-së, Ferat Shala.

Paga minimale në Kosovë nga 170 sa është aktualisht, me ligjin e ri të propozuar nga Qeveria parashihet të bëhet 264 euro bruto, apo 250 euro neto.

Në këtë ligj nuk është paraparë përfshirja e veteranëve, të cilët përmes protestave kanë kërkuan përfshirje në Projektligjin për Pagën Minimale. /atvlive.tv

Kërkesat e ministrit të Bujqësisë, Faton Peci, për lirimin e hapësirave të uzurpuara në qendër të Prishtinës, kanë filluar të merren parasysh nga institucionet kompetente.

Prokuroria Themelore ka nisur hetimet për një pjesë të objektit që gjendet në rrugën “Dëshmorët e Kombit” të kryeqytetit.
Për ATV-në, kjo u konfirmua nga zëdhënësja e prokurorisë, Laureta Ulaj.

“Ju njoftojmë se Prokuroria Themelore në Prishtinë ka autorizuar Policinë për grumbullimin e informatave dhe provave lidhur me këtë çështje, andaj në bazë të gjetjeve do të veprojë tutje”, tha Ulaj.

Në hulumtimin e Ministrisë së Bujqësisë, të siguruar nga ATV-ja, është evidentuar se subjekti tregtar “ALBI MARKET” ushtron veprimtarinë në katin përdhese dhe sipas deklaratës së menaxheres, për hapësirën paguhet qira, por jo Ministrisë së
Bujqësisë, e cila është pronare e objektit.

Në raportin që e posedon televizioni, është konstatuar se në oborrin e objektit skaj rrugës “Henri Dunan” me sipërfaqe prej 600m² është ndërtuar edhe një objekt tjetër i cili shfrytëzohet si depo. Ndërsa, në katin e parë tashmë është hapur edhe një kafene.

Në kuadër të kësaj ndërtese janë të privatizuara edhe dy njësi banesore, të cilat janë shndërruar në lokale afariste, duke u zgjeruar edhe në pjesën tjetër të objektit ekzistues me sipërfaqe prej 160m².

Për lirimin e hapësirës në fjalë, ministri Faton Peci ka kërkuar ndihmë edhe nga kryetari i Prishtinës.

“Në vazhdimësi në tre muajt e fundit, ne kemi kërkuar, madje kemi pasë edhe një dakordim me kryetarin Përparim Rama, që të ndërhyjë përmes inspektoratit, por siç duket niveli i shërbyesve civilë i Komunës së Prishtinës është thellë i përfshirë në këtë rast, kjo për faktin se edhe në kërkimin e materialeve që e kërkojmë, thjesht ata ofrojnë dokumente jorelevante dhe të pjesshme”, ka thënë Peci.

Por, sipas nënkryetarit të Prishtinës, kjo nuk është çështje vetëm e inspektortatit të komunës.

“Ky është një raport që u është dorëzu prokurorisë dhe organeve të tjera. Inspektoratit i duhen dokumente më të kompletuara. Prokuroria por edhe policia duhet t’i ndihmojnë komunës”, ka thënë nënkryetari i Prishtinës, Alban Zogaj.

Ndërkohë, Prokuroria Themelore në Pejë, ditë më parë, ka ngritur aktakuzë për ndërtimet në pronën e Institutit për Hulumtime Bujqësore, në fshatin Stankaj të Rugovës. /atvlive.tv