ATV

Category: Lajme

  • ​IKD: Qeveria në kundërshtim me aktgjykimin e Kushtetueses për pensionet kontributdhënëse

    ​IKD: Qeveria në kundërshtim me aktgjykimin e Kushtetueses për pensionet kontributdhënëse

    Instituti i Kosovës për Drejtësi (IKD) vlerëson se Qeveria në kundërshtim me afatet e Aktgjykimit të Gjykatës Kushtetuese, ka vendosur për Projektligjin për Skemat Pensionale. Sipas IKD-së, në këtë mënyrë rrezikohen të drejtat e mijëra pensionistëve

    IKD ka shkruar se Gjykata ka urdhëruar Kuvendin dhe Qeverinë, që jo më larg se data 15 korrik 2023, të ndërmarrin veprimet e nevojshme për plotësimin dhe ndryshimin e këtij ligji.

    “Në të njëjtën kohë, këto dispozita do të shfuqizohen me 15 korrik 2023. Në rastin kur Qeveria nuk respekton këtë datë, do të jenë qytetarët ata që do të pësojnë më së shumti. Ata do të detyrohen të paguajnë avokatë për të ngritur padi në Gjykatat Themelore për të gëzuar të drejtën e pensionit kontributdhënës sipas vendimit të Gjykatës Kushtetuese. Për shkak se do të gjenerohen shpenzime procedurale, kjo situatë mund të dëmtojë edhe buxhetin e Republikës së Kosovës”, thuhet në komunikatën e IKD-së.

    Sipas IKD-së, Qeveria po tregohet e papërgjegjshme duke mos zbatuar kërkesat e plota që dalin nga aktgjykimi.

    “Por, Qeveria ka planifikuar që projektligjin që synon të adresojë kërkesat e Gjykatës Kushtetuese, vetëm në Qeveri, ta miratoj me 30 korrik 2023. Afati i përcaktuar nga Qeveria është në kundërshtim me kërkesat e aktgjykimit të Gjykatës Kushtetuese. Në sistemin kushtetues të Kosovës, aktgjykimet e Gjykatës Kushtetuese janë ekuivalente me normën kushtetuese. Kështu, ky veprim i Qeverisë është në kundërshtim me Kushtetutën e Republikës së Kosovës”, thuhet nga IKD.

    IKD ka shkruar se veprimet e nevojshme për adresimin e kërkesave në bazë të aktgjykimit nënkuptojnë hyrjen në fuqi të projektligjit të ri për skemat pensionale me 15 korrik 2023 dhe jo miratimin e projektligjit në Qeveri me 15 ditë vonesë.

    Instituti ka theksuar se Kuvendi i Kosovës shkon në pushim në fund të muajit korrik dhe fillimi i punës së Kuvendit nis të hënën e dytë të muajit shtator, që sipas tyre, miratimi final i projektligjit do të bëhet me vonesë prej disa muajve.

    “IKD shpreh shqetësimin e thellë për papërgjegjshmërinë e Qeverisë së Kosovës në lidhje me mos zbatimin e kërkesave të plota që dalin nga Aktgjykimi në rastin nr. KO190/19. Vonesat në miratimin e këtij projektligji nga Qeveria shkelin të drejtat e mijëra pensionistëve të Kosovës dhe paraqesin mos zbatim të aktgjykimit të Gjykatës Kushtetuese”, thuhet në komunikatë.

    IKD kërkon që me rastin e miratimit të projektligjit në Qeveri, të respektohen standardet minimale të pjesëmarrjes së publikut në konsultime publike me qytetarë dhe grupeve të interesit dhe më pas një projektligj i tillë të miratohet me procedurë të përshpejtuar në Kuvendin e Kosovës, në mënyrë që ky ligj të hyj në fuqi jo më vonë se data 15 korrik 2023.

    Në dhjetor të vitit të kaluar, Gjykata Kushtetuese ka shfuqizuar paragrafin 2 të nenit 8 te Ligjit për skemat pensionale, sepse është përfunduar që në mënyrë diskriminuese përmes këtij neni mijëra qytetarë duke mos e përmbushur kriterin e përvojës prej 15 viteve pune para janarit të viti 1999, nuk e kanë gëzuar pensionin kontributdhënës, por vetëm atë të moshës.

  • Ashton: Kosova dhe Serbia të ulen në tavolinë dhe të gjejnë përgjigje

    Ashton: Kosova dhe Serbia të ulen në tavolinë dhe të gjejnë përgjigje

    Ish-përfaqësuesja e Lartë e Bashkimit Evropian për Punë të Jashtme, Catherine Ashton u ka bërë thirrje Kosovës dhe Serbisë që të gjejnë zgjidhje për mospajtimet që kanë.

    Ajo ka potencuar se ardhmja e Kosovës dhe Serbisë varet pjesërisht nga marrëdhëniet që i ndërtojnë me Bashkimin Evropian.

    “Secila palë e di se e ardhmja e tyre varet pjesërisht nga marrëdhëniet që i ndërtojnë me Bashkimin Evropian dhe pjesërisht nga marrëdhëniet që i krijojnë brenda rajonit të tyre. Dhe, kjo nënkupton gjetjen e një rruge për të krijuar një të ardhme që ofron paqe, siguri dhe sukses ekonomik për të dyja palët. Nuk ka qenë kurrë e lehtë – Marrëveshja e Brukselit ka qenë vetëm fillimi – mirëpo u bëj thirrje të dyja palëve që të ulen në tavolinë dhe të gjejnë përgjigje.”, ka thënë Ashton në një intervistë për Rel.

    Ish-përfaqësuesja e Lartë e Bashkimit Evropian për Punë të Jashtme ka folur edhe për pjesën e vështirë për t’i afruar palët deri te nënshkrimi i Marrëveshjes së Brukselit.

    Ajo, ndër të tjera, ka thënë se sfidë ka qenë njohja e së kaluarës, humbjet dhe dhimbjet e shumë personave.

    “Imagjinojeni këtë skenë: Dy kryeministra, në moshë të njëjtë, nga rajoni i njëjtë, që nuk janë takuar kurrë, dhe të cilët bartin shpresat dhe aspiratat e popujve të tyre, të përziera me historinë dhe traumën e së kaluarës. Ka qenë gjë e guximshme vetëm pjesëmarrja në dhomë të njëjtë. Sfidë ka qenë njohja e së kaluarës, humbjet dhe dhimbjet e shumë personave, si dhe krijimi i një vizioni, për të siguruar që të rinjtë në Kosovë dhe Serbi, mund të shikojnë përpara drejt së ardhmes në BE.”, ka thënë ajo.

    Ashton ka folur edhe për ndikimin rus dhe atë kinez në rajon. Ajo është shprehur se gjithmonë kanë qenë të vetëdijshëm për ndikimin e Rusisë dhe angazhimin në Ballkanin Perëndimor.

    “Ngjarjet në Ukrainë, e kanë vënë më shumë në pah këtë fakt.”, ka shtuar ajo.

  • ​Osmani thekson shkeljet e Serbisë në marrëveshjet e Brukselit

    ​Osmani thekson shkeljet e Serbisë në marrëveshjet e Brukselit

    Presidentja e vendit, Vjosa Osmani, ka pritur në takim ministrin e Punëve të Jashtme të Maqedonisë së Veriut, Bujar Osmani, që aktualisht është në krye të OSBE-së. Në këtë takim, presidentja ka theksuar shkeljet e vazhdueshme të Serbisë sa i përket marrëveshjeve të Brukselit.

    E para e shtetit ka përmendur edhe angazhimin e Kosovës për paqe dhe stabilitet në rajon.

    “Presidentja Osmani dhe ministri i Jashtëm i Maqedonisë së Veriut Osmani kanë folur edhe për dialogun me Serbinë, me ç’rast, Presidentja Osmani ka theksuar shkeljet e vazhdueshme të Serbisë karshi marrëveshjeve të Brukselit, ndërsa ka përmendur angazhimin e Kosovës për paqe dhe stabilitet afatgjatë në rajon”, ka bërë të ditur Presidenca, përmes një komunikate për media.

    Sipas njoftimit, në këtë takim është diskutuar edhe për bashkëpunimin e Kosovës me OSBE-në ku presidentja është informuar për prioritetet e Maqedonisë së Veriut si kryesuese e këtij misioni.

    “Presidentja Osmani ka përmendur vazhdimin e bashkëpunimit për fuqizimin e vajzave, grave dhe rinisë, me theks të veçantë në Agjendën për Gratë, Paqen dhe Sigurinë. Presidentja Osmani ka theksuar se Kosova vazhdon të jetë në ballë të progresit në rajon dhe më gjerë sa i përket forcimit të sundimit të ligjit dhe demokracisë, si dhe promovimit të të drejtave të njeriut, të cilat tanimë po njihen ndëkombëtarisht”, ka njoftuar Presidenca.

    Ndërsa në temën e raporteve bilaterale me Maqedoninë së Veriut, presidentja ka vlerësuar rritjen e bashkëpunimit në mes të dy vendeve si dhe përkushtimin e ndërsjellë për thellimin e mëtejmë të tyre.

  • Situata në veri, Musliu: Ndërkombëtarët të kontrollojnë situatën, ne të kryejmë detyrat

    Situata në veri, Musliu: Ndërkombëtarët të kontrollojnë situatën, ne të kryejmë detyrat

    Eksperti i çështjeve të sigurisë, Agim Musliu ka reaguar pas situatës së krijuar sot në Zveçan, ku janë djegur vetura të Policisë.

    Ai ka theksuar se është përgjegjësi e Perëndimit, Bashkimit Evropian dhe SHBA-së që ta kontrollojë situatën.

    Ai ka shkruar se është përgjegjësi e vendit që t’i kryejë detyrat sipas ligjit.

    “Popujt që kanë liderë si këta (Putin, Millosh e Vuçiq), janë përgjegjës për dëmet që ua shkaktojnë popujve të tjerë – paqes e demokracisë. Dhe, meqë paqja në Evropë po rrezikohet nga një njeri si Putini, i cili tashmë e ka ndezur një luftë, Perëndimi e ka të obligueshme ta sigurojë atë edhe te ne. Nuk na kanë lejuar që të ecim me hapa të lirë, duke na “mbikëqyrur”, duke na këshilluar se si duhet të sillemi me proksit e Putinit dhe na kanë kushtëzuar në shtetndërtim! Është përgjegjësi e Perëndimit, Bashkimit Evropian dhe SHBA-së që ta kontrollojë situatën!. Është përgjegjësi e jona që t’i kryejmë, sipas ligjit, detyrat tona, pa na kapur as euforia e as paniku!”, ka shkruar Musliu në Facebook.

    Të shtëna armësh janë dëgjuar në Zveçan, ndërsa janë djegur vetura të Policisë.

    Policia e Kosovës ka përdorur gaz lotsjellës për t’i shpërndarë qytetarët e mbledhur para objektit të Komunës së Zveçanit.

    Gjatë ditës, Policia e Kosovës ka njoftuar se po asiston kryetarët e zgjedhur për të hyrë në objektet komunale.

    Kryetari i Zveçanit, ai i Leposaviqit dhe kryetari i Zubin Potokut, të dalë nga zgjedhjet e 23 prillit, kanë kryer betimin të enjten (25 maj). Asnjëri prej tyre nuk është betuar në objektin e komunës përkatëse, përveç kryetarit të veriut të Mitrovicës.

    Zgjedhjet në veri janë bojkotuar nga partia më e madhe e serbëve në Kosovë, Lista Serbe, me mbështetjen e Beogradit zyrtar.

    Kryetarët paraprakë nga kjo parti, kanë dhënë dorëheqje nëntorin e vitit të kaluar. Ata janë larguar nga institucionet në shenjë pakënaqësie me vendimin e Qeverisë së Kosovës që ka obliguar qytetarët t’i kthejnë targat e veturave nga ilegale në ato të Republikës së Kosovës./KosovaPress

  • ​Kryetari i ri Zveçanit gjendet në objektin e komunës

    ​Kryetari i ri Zveçanit gjendet në objektin e komunës

    Kryetari i ri i Komunës së Zveçanit, Ilir Peci gjendet në vendin e tij të punës në Komunën e Zveçanit, ku po ruhet nga Policia e Kosovës.

    Policia ka vendosur një perimetrit të sigurisë në një distancë prej 150 metrave për rreth komunës, ku askush nuk po lejohet të ofrohet.

    Siç raporton ekipi i KosovaPress-it, shihen dhjetëra protestues serbë por edhe zyrtarët e policisë.

    Aktualisht gjithçka është qetë, ndërkohë më herët kishte të shtëna me armë dhe serbët dëgjoheshin duke thënë vrite, vrite. Aty ka reaguar policia duke shpërndarë protestuesit serbë me gaz-gotësjellës dhe shok-bombë.

    Serbët me molotov kanë djegur veturat e policisë, por shihet edhe një veturë tjetër e demoluar.

    Ata pas një alarmi të sotëm të strukturave ilegale kanë dal para objekteve në Zveçan, Zubim Potok dhe Leposaviq për të kundërshtuar vendosjen e kryetarëve të rinj në objektet e komunave. Madje, kanë bllokuar me zhavorr dhe kamion rrugët në hyrje dalje të Leposaviqit.

  • ​Bllokohen rrugët në hyrje-dalje të Leposaviqit

    ​Bllokohen rrugët në hyrje-dalje të Leposaviqit

    Disa kamionë janë të parkuar në mes të rrugëve në hyrje dhe dalje të Leposaviqit.

    Strukturat ilegale kanë lëshuar alarm në orën 12:00. I cili është ndërprerë pas 30 minutave. KosovaPress mëson se dhjetëra serbë janë mbledhur edhe para kësaj komune për të kundërshtuar ardhjen e kryetarit të ri në objektin e komunës.

    Situata më e tensionuar është në Zveçan, ku serbët kanë djegur disa vetura të policisë. Kurse, Policia ka ndërhyrë me gaz-lotësjellës, pasi serbët tentonin të hynë në objektin e komunës.

  • Në momentin kur u lëshua alarmi, në veri u bllokuan edhe sinjalet e telefonit

    Në momentin kur u lëshua alarmi, në veri u bllokuan edhe sinjalet e telefonit

    Sekretari shtetëror në ministrinë e mbrojtjes serbe, Nemanja Staroviq, ka thënë se “njësitet speciale të Policisë së Kosovës kanë shkuar tek ndërtesat komunale në veri të Kosovës me qëllim të vendosjes së kryetarëve të rinj të zgjedhur për qind të votave në zgjedhjet e 23 prillit”.

    “Sinjalet e telefonave mobilë janë fikur në pjesë të rajonit, sirenat tingëllojnë ndërsa qytetarët e shqetësuar mblidhen për të mbrojtur në “mënyrë paqësore” të drejtat e tyre themelore njerëzore dhe politike”, ka shkruar Staroviq në Twitter

  • Tensionet në veri, Serbia ngre gatishmërinë luftarake

    Tensionet në veri, Serbia ngre gatishmërinë luftarake

    Policia e Kosovës përdori gaz lotsjellës dhe shok-bomba për t’i shpërndarë qytetarët e tubuar para objektit komunal në Zveçan – komunë e banuar me shumicë serbe në pjesën veriore të vendit.

    Paraprakisht, policia njoftoi se po asistonte kryetarët e rinj të komunave veriore: Zveçan, Leposaviq dhe Zubin Potok, për të hyrë në objektet zyrtare të komunave përkatëse.

    Autoritetet e Kosovës fajësuan “strukturat kriminale dhe ilegale” të Serbisë për përshkallzimin e situatës.

    “Dhuna nuk do të mbizotërojë. Serbia mban përgjegjësi të plotë për përshkallëzimin”, shkroi në Twitter Blerim Vela, shef i stafit të presidentes Vjosa Osmani.

    I menjëhershëm ishte reagimi i Beogradit zyrtar, ku presidenti serb, Aleksandar Vuçiq, dha urdhër për ngritjen e gatishmërisë luftarake të ushtrisë serbe në nivelin më të lartë.

    Ky vendim u mor për shkak të situatës në Kosovë, transmeton Shërbimi i Ballkanit i Radios Evropa e Lirë.

    Radio-Televizioni i Serbisë raportoi se ushtria serbe ka marrë urdhër që “të lëvizë urgjentisht” drejt kufirit me Kosovën.

    REL-i nuk ka mundur ta konfirmojë në mënyrë të pavarur këtë informacion.

    Sipas informacioneve të siguruara nga gazetarët në terren, Policia e Kosovës ka hyrë tashmë në objektin e Komunës së Zveçanit.

    Në Zubin Potok, situata aktualisht është e qetë, konfirmoi për REL-in ish-këshilltari i Kuvendit Komunal atje, Millija Bishevac.

    Ngjashëm raportohet edhe për situatën në Leposaviq.

    Kryetarët e tri komunave me shumicë serbe – që të gjithë shqiptarë – u betuan një ditë më herët në ndërtesa publike, si shkollat, për shkaqe të sigurisë.

    Ndonëse thanë se, së shpejti, do të nisin punën nga objektet komunale, nuk ishte e qartë se kur do të ndërmerrej një hap i tillë.

    Në të katër komunat me shumicë serbe në veri u dëgjuan fillimisht sirena alarmi, ndërkohë që para objekteve komunale në Zubin Potok, Zveçan dhe Leposaviq u mblodhën edhe qytetarë.

    Radio Evropa e Lirë mësoi se disa kamionë janë të parkuar në mes të rrugëve në hyrje dhe dalje të Leposaviqit, ndërsa mbi Zveçan u pa edhe një helikopter i misionit të NATO-s, KFOR.

    Ministri i Pushtetit Lokal në Kosovë, Elbert Krasniqi, tha se kryetarët e rinj të komunave në veri duhet ta kryejnë punën “nga zyrat e komunave bashkë me shërbyesit civilë”.

    “Ata janë zotuar se do t’iu shërbejnë të gjithë qytetarëve pa dallim. E, si institucione qendrore, e kemi obligim që t’ua sigurojmë dhe mundësojmë përmbushjen e këtyre obligimeve. Komuna është e qytetarëve. Qytetarët nuk mund të mbeten pa komunë”, shkroi Krasniqi në Facebook.

    Ambasadori amerikan në Kosovë, Jeffrey Hovenier, tha më 18 maj se nuk duhet përdorur forcën për të fituar qasje në ndërtesat komunale në veri të Kosovës.

    Kryetarët e rinj të komunave të Zveçanit, Leposaviqit dhe Zubin Potokut – që të gjithë shqiptarë – bënë betimin më 25 maj, duke marrë kështu pushtetin lokal në këto tri komuna me shumicë serbe në veri të Kosovës.

    Ceremonitë e betimit u mbajtën në objekte publike, sepse në objektet e komunave ka organe të përkohshme komunale, të cilat punojnë në sistemin e Serbisë.

    Vetëm në Mitrovicë të Veriut ekziston një ndërtesë komunale që funksionon sipas sistemit të Kosovës. Kryetari i ri, Erden Atiq, u betua atje më 19 maj.

    Zgjedhjet lokale në veri të Kosovës u mbajtën më 23 prill, pas dorëheqjes së kryetarëve të komunave nga radhët e Listës Serbe – partisë më të madhe të serbëve të Kosovës. Kjo parti e kundërshtoi vendimin e Qeverisë së Kosovës për të kryer procesin e riregjistrimit të makinave me targa ilegale serbe.

    Zgjedhjet u bojkotuan nga popullata shumicë serbe në atë zonë, e cila tani nuk i pranon rezultatet, përkatësisht kryetarët e rinj.

    Pjesëmarrja në zgjedhjet e prillit ishte 3.47 për qind e numrit të përgjithshëm të votuesve të regjistruar.

  • Tensionet në Zveçan, Krasniqi: E kemi obligim t’ua sigurojmë kryetarëve kryerjen e obligimeve

    Tensionet në Zveçan, Krasniqi: E kemi obligim t’ua sigurojmë kryetarëve kryerjen e obligimeve

    Para objekteve komunale të komunave të veriut janë mbledhur qytetarë serbë për të penguar nisjen e punës së kryetarëve të rinj të zgjedhur. Në Zveçan, është tensionuar situata.

    Ministri i Administrimit të Pushtetit Lokal, Elbert Krasniqi, ka reaguar para pak minutash, duke thënë se është obligim i institucioneve qëndrore që t’ua mundësojnë kryetarëve të rinj të katër komunave veriore, që të kryejnë detyrat e tyre.

    “Dje u betuan edhe kryetarët e komunës së Zveçanit, Zubin Potokut dhe Leposaviqit. Për ta sot është dita e parë e punës. Punë dhe shërbim të cilin duhet ta kryejnë nga zyret e Komunave bashkë me shërbyesit civilë”, ka shkruar Krasniqi.

    Turmat para objekteve komunale kanë nisur të bëhen, pasi në Zveçan, Leposaviq, Mitrovicë të Veriut dhe Zubin Potok, u dëgjuan sirena. Derisa në Zveçan janë dëgjuar krisma dhe është hedhur gaz lotsjellës, në komunat e tjera nuk është raportuar për tensionim të situatës.

    Reagimi i plotë i ministrit:

    Pas mbajtjes së zgjedhjeve të datës 23 prill, janë mbajtur seancat konstituive në Mitrovicën Veriore, Zveçan, Zubin Potok dhe Leposaviq.

    Dje u betuan edhe kryetarët e komunës së Zveçanit, Zubin Potokut dhe Leposaviqit. Për ta sot është dita e parë e punës. Punë dhe shërbim të cilin duhet ta kryejnë nga zyret e Komunave bashkë me shërbyesit civilë.

    Ata janë zotuar që do t’i shërbejnë të gjithë qytetarëve pa dallim. Si ministri dhe institucione qendrore japim mbështetjen tonë të plotë në përmbushjen e obligimeve kushtetuese dhe ligjore të kryetarëve të rinj. E si institucione qendrore e kemi obligim që t’ua sigurojmë dhe mundësojmë përmbushjen e këtyre obligimeve.

    Komuna është e qytetarëve. Qytetarët nuk mund të mbeten pa komunë.

  • Shoqëria civile e shqetësuar me prolongimin e emërimit të guvernatorit në BQK

    Shoqëria civile e shqetësuar me prolongimin e emërimit të guvernatorit në BQK

    Shoqëria civile në vend shprehet e shqetësuar me prolongimin e emërimit të guvernatorit të ri në Bankën Qendrore të Kosovës (BQK).

    Konsorciumi i organizatave të shoqërisë civile i përberë nga Grupi për Studime Juridike dhe Politike (GLPS), Instituti GAP dhe Instituti për Politika Zhvillimore (INDEP), në kuadër të projektit: “Mbështetje për Shoqërinë Civile për të Rritur Mbikëqyrjen Publike dhe Llogaridhënien e Institucioneve Publike të Kosovës”, nëpër mjete një njoftimi kanë shprehur shqetësimin e thellë lidhur me prolongimin e emërimit të Guvernatorit/es të Bankës Qendrore të Republikës së Kosovës(BQK) në pajtim me ligjin.

    Sipas këtij njoftimi, konkursi të kthehet në pikën zero, pa dhënë asnjë arsyetim ligjor për këtë.

    Shoqëria civilie konsideron se përderisa kishte një proces të ligjshëm dhe transparent i cili ka prodhuar një listë me emrat e kandidatëve të cilët i janë dorëzuar Kuvendit të Republikës së Kosovës, i njëjti të vendos sa më parë në pajtim me rregullat ligjore dhe të marrë vendim në lidhje me pozitën e Guvernatorit të BQK-së.

    “Thënë këtë, konsiderojmë që përderisa kishte një proces të ligjshëm dhe transparent i cili ka prodhuar një listë me emrat e kandidatëve të cilët i janë dorëzuar Kuvendit të Republikës së Kosovës, i njëjti të vendos sa më parë në pajtim me rregullat ligjore dhe të marrë vendim në lidhje me pozitën e Guvernatorit të BQK-së”, thuhet në njoftim.

    Që nga nëntori i vitit 2022, BQK, kishte publikuar shpalljen për plotësimin e pozitës së Guvernatorit. Pas mbajtjes së intervistave në janar të vitit 2023 nga komisioni përzgjedhës të njëjtit kishin njoftuar më pas se katër (4) kandidatë kishin hyrë në listën e ngushtë.

    “Lista me emrat e kandidatëve e rekomanduar ishte prezantuar në Komisionin për Buxhet, Punë dhe Transfere në mbledhjen e datës 07.04.2023. Anëtarët e Komisionit me shumicë votash i kanë rekomanduar Kuvendit të Republikës së Kosovës se konkursi për guvernator të BQK-së, nuk i ka përmbushur kriteret ligjore respektivisht nenet 38 dhe 40 të Ligjit për Bankës Qendrore të Republikës së Kosovës. Rrjedhimisht kanë kërkuar që konkursi të kthehet në pikën zero. Ndonëse të njejtit nuk kanë dhënë asnjë arsyetim ligjor për këtë”, thuhet në njoftim.

    Po ashtu, neni 38, paragrafi 6 i Ligjit për Bankës Qendrore të Republikës së Kosovës, thekson se “Procedurat e emërimit të referuara në paragrafët 1 deri 5 të këtij neni përfundojnë brenda dyzetepesë (45) ditëve kalendarike para përfundimit të mandatit të anëtarit përkatës të Bordit të Bankës Qendrore apo Bordit Ekzekutiv”.

    Ky konkurs ka qenë i hapur që nga nëntori i vitit 2022 dhe mandati i guvernatorit ka përfunduar afërsisht që dy muaj. Vlen të theksohet se detyrat dhe kompetencat e guvernatorit janë të rëndësisë së lartë pasi që i njëjti është përgjegjës për drejtimin dhe kontrollin e administrimit dhe operacioneve të Bankës Qendrore.