Koordinim me aleatët ndërkombëtar për shtensionimin e situatës në veri po kërkojnë njohësit e zhvillimeve politike në Kosovë. Sipas tyre, megjithëse është e drejtë e kryetarëve të zgjedhur të ushtrojnë detyrat e tyre në objektet komunale, duhet të arrihet një zgjidhje për të mos përshkallëzuar situatën tutje.
Ndërkaq, kërkohet nga bashkësia ndërkombëtare që t’i bëjnë trysni Serbisë që të ndikojë tek strukturat paralele në veri të mos bëjnë rezistencë ndaj institucioneve lokale atje.
Analisti politik, Shqiprim Pula, thotë për KosovaPress, se institucionet shtetërore po e bëjnë punën e tyre në veri, por duhet kujdes që situata mos të dalë nga kontrolli.
“Situata ditëve të fundit është rrjedhojë e pakënaqësive të qytetarëve pakicë serb të cilët me vullnet janë tërhequr nga procesi politik dhe zgjedhor. Tani si duket pakënaqësitë e tyre janë reflektime edhe në dalje në rrugë, por ajo çka është shumë e rëndësishme është se institucionet shtetërore po e bëjnë punën e tyre, por natyrisht se ndërkombëtarët nga frika e përshkallëzime kemi pa që edhe forcat e KFOR-it janë sot atje. Natyrisht, me qetësi dhe maturi duhet të menaxhohet ajo situatë, e cila është një situatë e afektit politik që mund të nxisë reagime nga më të ndryshmet, kryesisht nga struktura para shtetërore serbe, duke qenë të mbështetur nga formacioni politik, Lista Serbe”, thotë ai.
Por, më kritik ndaj Qeverisë së Kosovës është profesori Blerim Canaj, i cili thotë se insistimi që kryetarët e zgjedhur në veri të hynë me forcë në objektet komunale është një veprim i pamenduar mirë.
“Një koordinim i plot me partnerët tanë strategjik do të mund të sillte disa hapa më pozitiv për Kosovën dhe jo të veprojmë pa menduar sikur në rastin e fundit, ku kryetarët e komunave të zgjedhur me 113 vota nuk e takojnë përfaqësuesin diplomatik të shtetit tonë mik, i cili tek e fundit është garantues i shtetësisë dhe sigurisë sonë. Mendoj se fundi duhet të jetë i tillë që në koordinim me kokat më të mençura të shtetit tonë, por edhe me partnerët tanë strategjik të kërkohet zgjidhja”, deklaron Canaj.
Në anën tjetër, analisti Pula e sheh edhe të befasishëm reagimin ndërkombëtar ndaj institucioneve të Kosovës për situatën në veri.
Ai thotë se aleatët ndërkombëtar duhet t’i mbështesin katër kryetarët e komunave veriore që t’i ushtrojnë detyrat e tyre.
“Gjatë vitit të kaluar pas ishte vet Lista Serbe që vendosi vullnetarisht të tërhiqet nga institucionet dhe ishte po ky faktor ndërkombëtar që i kërkoi qeverisë që zgjedhjet mos të mbaheshin në dhjetor, por që të shtyheshin. Një gjë e tillë ndodhi dhe zgjedhjet u mbajtën në prill dhe rezultati ka prodhuar këtë gjendje që e kemi, prandaj tani faktori ndërkombëtar duke pranuar rezultatin do të duhej t’i mbështesin këta kryetarë që funksionet e tyre politike t’i jetësonin deri në kohën e zgjedhjeve të rregullta të radhës kur do të jenë. Prandaj është paksa befasi për institucionet dhe qytetarët se pse nuk ka një mbështetje dhe një trysni mbi Serbin zyrtare dhe Listën Serbe në Kosovë që mos të paraqesin rezidence kundrejt institucionet lokale atje, në mënyrë që mbarëvajtja e konsolidimin të institucioneve lokale atje të shkojë në mënyrë të qetë dhe të rregullt”, thekson ai.
Disa serbë në Zveçan, Zubin Potok dhe Leposaviq, po protestojnë duke kundërshtuar hyrjen e kryetarëve të rinj shqiptarë në objektet komunale.
Policia e Kosovës dhe pjesëtarët e KFOR-it kanë shtuar praninë, ndërkohë që serbët në Zveçan kanë hedhur gaz lotsjellës në drejtim të Policisë.
Situata në këto komuna është tensionuar të premten e 26 majit kur kryetarët e betuar u detyruan të futën në zyrat e tyre të punës nën asistencën e Policisë së Kosovës.
Ky veprim u dënua nga vendet e QUNIT-it dhe veçanërisht nga Shtetet e Bashkuara të Amerikës.
Pesë policisë mbetën të lënduar ndërsa katër vetura u dëmtuan, si pasojë veprimeve të protestuesve./KP
