Category: Lajme

Në shenjë mbështetjeje për serbët në Kosovë, disa qindra qytetarë u mblodhën mbrëmjen e së mërkurës para një kishe në Podgoricë të Malit të Zi.

Në tubim nuk pati fjalime, ndërsa pjesëmarrësit brohorisnin “Kosova është zemra e Serbisë” dhe mesazhe të tjera.

Ata kishin veshur bluza me mesazhet “Vëllai për vëllain, nuk ka dorëzim”, “Kosova është Serbi”, “Mali i Zi – Rusi”, si dhe me imazhin e presidentit rus, Vladimir Putin.

Ftesa për tubim është shpërndarë në rrjetet sociale dhe thuhet se është organizuar nga një grup qytetarësh.

Pjesëmarrës ishin edhe disa deputetë të partive më të vogla pro-serbe, si Bogdan Bozhoviq nga Partia Popullore Socialiste dhe Marko Millaçiq nga Mali i Zi i Vërtetë, si dhe bartësi i listës zgjedhore të Koalicionit Popullor, Dejan Vukshiq.

Në qytetin e Nikshiqit sot pritet të mbahet një tubim i ngjashëm.

Rreth një e treta e banorëve të Malit të Zi identifikohen si serbë dhe rreth dy të tretat i takojnë një dege lokale të Kishës Ortodokse Serbe.

Tensionet me Beogradin janë zbutur ndjeshëm nga koha kur Mali i Zi e shpalli pavarësinë në vitin 2006, por çështjet e identitetit kombëtar malazez dhe kulturës së përbashkët shkaktojnë ende dilema. /REL

Berat Buzhala, Bekim Kabashi dhe Lavdim Hamidi, janë bërë cak i foto-montazheve, të cilat po shpërndahen në rrjete sociale këtë pasdite.

Foto-montazha e Buzhalës është krijuar në atë formë që të duket gjoja se presidenti i Serbisë, Aleksandar Vuçiq, e ka ripostuar një cicërimë të Buzhalës, duke thënë se është njëri nga gazetarët më të mirë kosovarë.

Ndërsa, Kabashit dhe Hamidit, u janë vendosur flamuj të Serbisë në ballë me mbishkrimet: “Zagarët e Vuciqit”, si dhe “Bravo vëlla” (duke aluduar se kështu po iu drejtohet presidenti Serb dy gazetarëve).

Një fushatë e tillë, është shumë e rrezikshme dhe vë në cak të sulmeve online si gazetarët, ashtu edhe familjet e tyre.

Asociacioni i Gazetarëve të Kosovës bën thirrje që fushatat e tilla denigruese të ndalen, në mënyrë që mediet të kenë mundësi të ushtrojnë profesionin e tyre pa u penguar.

Në tre komunat veriore të vendit, Zveçan, Leposaviq dhe Zubin Potok, ku serbët po protestojnë për katër ditë kundër prezencës së Policisë së Kosovës dhe kryetarëve shqiptarë të këtyre komunave, nata ka kaluar e qetë.

Pjesëtarë të KFOR-it dhe të Policisë së Kosovës të cilët po kujdesen për ruajtjen e rendit, po vazhdojnë të qëndrojnë pranë dhe brenda ndërtesave të këtyre komunave.

Serbët kanë paralajmëruar edhe për sot protesta në këto komuna nga ora 7:00 e mëngjesit.

Ndërsa dje në Zveçan situata herë pas here është tensionuar, ndërsa nuk kanë munguar sulmet ndaj ekipeve të gazetarëve.

Ndryshe, serbët në veri kanë filluar protestën të premten (26 maj). Protestuesit me maska e edhe ata pa maska kanë ushtruar dhunë ndaj pjesëtarëve të KFOR-it, Policisë së Kosovës dhe gazetarëve.

Ata kanë hedhur gjësende të ndryshme në drejtim të paqeruajtësve, derisa kanë dëmtuar vetura të mediave, duke e djegur tërësisht veturën e një televizioni.

Si pasojë e protestave të dhunshme, janë plagosur 30 ushtarë të KFOR-it, ndërkohë që serbët kanë sulmuar edhe Policinë e Kosovës dhe gazetarët.

Shtetet e Bashkuara kanë kritikuar Kosovën për përshkallëzimin e tensioneve me Serbinë, derisa anuluan edhe pjesëmarrjen e vendit në një stërvitje ushtarake të NATO-s “Defender 23”, pasi Prishtina refuzoi t’i tërheqë kryetarët e komunave dhe forcat e saj policore nga veriu i vendit.

Christian Schmidt ka dhënë një intervistë për televizionin gjerman “Phoenix TV”, ku mes tjerash ka folur edhe për konfliktin ndërmjet grupeve etnike në Kosovë.

Përfaqësuesi i Lartë i Kombeve të Bashkuara për Bosnje dhe Hercegovinën e konsideron të pamundur përshkallëzimin mes Kosovës dhe Serbisë pas trazirave të fundit nga militantët serb në veri të Kosovës.

Kur u pyet nëse mund të ketë një luftë mes Kosovës dhe Serbisë, Schmidt u përgjigj:

“Jo, nuk kam shqetësime të tilla. Sepse forcat e arsyes mbizotërojnë. Bëhet fjalë për argumente taktike, fatkeqësisht të dhunshme që mund të instrumentalizohen dhe që nuk pasqyrojnë ndonjë zemërim spontan të asnjë populli”.

Në të kaluarën, ai ka përjetuar konflikte shumë më dramatike, por konflikti aktual mund të jetë “i kufizuar”, tha Schmidt.

Megjithatë, një parakusht për një afrim është “që të ekzistojë një strukturë e orientuar drejt rregullave që u jep të dyjave – në këtë rast Kosovës dhe Serbisë – mundësinë e ekzistencës paralele”.

Një problem në Ballkan është se konfliktet nuk mund të kufizohen në rajone, thotë ai.

“Ballkani është në vetvete një rajon lehtësisht i ndezshëm në të cilin ne të gjithë duhet të bëjmë çmos për të mbështetur qetësinë, paqen dhe mungesën e dhunës”, tha Schmidt.

Për këtë arsye, përpjekjet ndërmjetësuese të Bashkimit Evropian janë “të domosdoshme”.

Schmidt tha gjithashtu se është e nevojshme të gjendet “një mënyrë e bashkëpunimit të ndërsjellë” dhe “njohjes së pavarësisë së vendeve përkatëse”.

Presidenti i Serbisë, Aleksandar Vuçiq, i ka bërë thirrje mbrëmë komunitetit ndërkombëtar që të ndërmarrë veprime të vendosura kundër, siç tha ai, atyre që janë kokëfortë dhe përgjegjës për përshkallëzimin e situatës në Kosovë, “duke rrezikuar kështu paqen dhe sigurinë e gjithë rajonit”.

Vuçiq, në një deklaratë për mediumin amerikan CNN, u bëri thirrje serbëve që të protestojnë në mënyrë paqësore dhe të ruajnë maturinë.

Reagimi i tij vjen pasi Qeveria e Kosovës mori qortime nga ShBA-të, rreth zhvillimeve në veri, ku serbët po kundërshtojnë kryetarët veriorë.

Ai e ka mohuar akuzën e Kurtit se ai i ka shantazhuar serbët që të mos marrin pjesë në zgjedhjet lokale në Kosovë, teksa shtoi se Serbia është e kënaqur me deklaratat e bëra nga Sekretari amerikan i Shtetit, Antony Blinken dhe presidenti i Francës, Emmanuel Macron, rreth krizës në Kosovë.

Sekretari Blinken ka deklaruar se i dënon fuqishëm veprimet e Qeverisë së Kosovës, të cilat siç ka thënë ai, po e përshkallëzojnë tensionet në veri dhe po shtojnë jostabilitetin. Nga ana tjetër, Macron ka thënë se Kosova është përgjegjëse për trazirat e shkaktuara.

Sipas tij, Serbia nuk e ka shkelur asnjë marrëveshje ndërkombëtare, në reagimin e saj ndaj krizës.

“Unë e di që këta njerëz janë të vendosur të luftojnë në mënyrë paqësore për të drejtat e tyre elementare. Ata duan të mbijetojnë, të ruajnë emrin dhe mbiemrin, fenë e tyre dhe të kenë të drejtën të jetojnë atje ku kanë jetuar gjithmonë. Këshilla ime dhe kërkesa është që gjithmonë ta bëjmë atë në mënyrë paqësore dhe të qëndrojmë të kthjellët. Dhe i bëj thirrje komunitetit ndërkombëtar që të ndërmarrë veprime vendimtare kundër atyre që janë kokëfortë dhe që e përshkallëzojnë situatën në terren, duke rrezikuar kështu paqen dhe sigurinë e të gjithë rajonit”, theksoi Vuçiq i pyetur se cili ishte mesazhi i tij për njerëzit që po protestojnë në veri të Kosovës.

“Ne e kemi respektuar Marrëveshjen e Kumanovës dhe Rezolutën 1244 të OKB-së. Ne nuk e kemi hyrë në Kosovë me ushtarë. Deri më tani ne kemi pasur bashkëpunim profesional me trupat e NATO-s në Kosovë dhe jam i bindur se ky bashkëpunim do të vazhdojë”.

Ai theksoi se janë dy gjëra kyçe, “se Serbia i ka zbatuar të gjitha obligimet e saj nga marrëveshja e parë, nga prilli 2013, dhe Prishtina nuk e ka zbatuar të vetmen – formimin e Asociacionit të Komunave me Shumicë serbe”, transmeton Paparaci.

“Nuk e kanë bërë, as nuk duan ta bëjnë”, tha ai. Ai po ashtu ka deklaruar se zgjedhjet lokale në veri të Kosovës janë mbajtur me pjesëmarrje prej 3.4 për qind. Për këtë arsye nuk janë legjitime dhe si të tilla janë zgjedhje të rreme, tha Vuçiq.

“A do të quheshin legjitime diku tjetër zgjedhjet me një pjesëmarrje kaq të ulët?”, pyeti ai. Ai gjithashtu theksoi se kryeministri i Kosovës, Albin Kurti, i quan fashistë, ultranacionalistë apo kriminelë 97 për qind të qytetarëve në veri.

“Nuk mund të bëni pa 97 për qind të njerëzve dhe vetëm me tre për qind. Serbët duan siguri dhe siguri për veten dhe familjet e tyre”.