Deputeti i PDK-së, Xhavit Haliti, në emisionin CONTEXT në ATV, tha se nuk do të ketë më luftë, por beteja për Kosovën tani ëhstë qysh me i rregullu raportet me Serbinë dhe qysh me hy në BE.
“Unë dua të ju them juve dhe të gjithë ata që dojnë me dëgju dhe janë realist, s’ka më luftë. Ka përfunduar lufta për Kosovën. S’janë më luftë. U kry lufta në Kosovë. Tash beteja është qysh me i rregullu raportet me Serbinë dhe qysh me hy në BE”, tha Haliti.
Ai tha se beson që marrëveshja mes këtyre dy vendeve, nuk do ta kënaqë asnjërën palë.
“Tani beteja si dhe qysh do të përfundojë marrëveshja, a do të kënaqemi ne a Serbia, apo nuk do të kënaqemi asnjëra, unë besoj se asnjëra nuk do të kënaqen, por do të jetë një marrëveshje, e cila në proces, do t’i ndihmojë të dyja palët”, tha Haliti. /atvlive.tv
Deputeti i PDK-së, Xhavit Haliti, në emisionin CONTEXT në ATV, tha se sulmuesit e KFOR-it kanë qenë një grup prej 20 persoanave, të cilët kanë qenë këtu me miratimin e Vuçiqit, dhe të njëjtit janë larguar nga Kosova pas sulmeve që kanë shkaktuar.
“Janë 20 veta që janë tërhekë sonte ose mbramë nuk e di saktë, janë tërheqë përmes një ndërmarrësi i cili merret me metale në atje në veri diku në Zveçan apo merret se s’jam i sigurt, ai e ka e ka bo për transportin dhe i ka çu për Rashkë”, tha Haliti.
Sipas tij, këta persona me maska, nuk kanë marrë urdhëra nga këtu, por nga Beogradi.
“Nuk përjashtohet mundësia me pasë gjithçka veçanërisht ata që janë me masëka me kapuça, por dihet që në krye të saj ekziston një urdhër, ekziston një miratim dhe miratimi nuk është dhanë këtu. Miratimi është dhanë nga Vuçiqi në Beograd, sepse ai ka ka caktu dhe ka paracaktu data kur do të ketë përleshje në ose ngjarje tepër të rëndësishme në veri, tepër të rrezikshme dhe jo rastësisht afër kufirit ika vendosë forcat e ushtrisë”, tha Haliti.
Ai tha se nuk e beson që Vuçiqi ka pasurt guxim me dërgu forca legale pa garanci që mund të tërhiqen.
“Shërbimet serbe janë prezente aty, është e ditur atëherë sa s’ka naj sekret ashtu siç janë edhe shërbimet e Kosovës aty dhe nuk do të çuditesha mos me qenë shërbimet e tjera, unë po besoj që edhe ato që janë në Kosovë janë prezente, sepse edhe rusët janë prezentë në Kosovë, e kanë një përfaqësi tyre këtu, kanë ndonjë përfaqësues të OKB-së, me kompetencat që i kanë marrë në OKB edhe në UNMIK janë në veri të vendosur, dihet që ata janë pjesëtarë të shërbimeve të zbulimit rus, por unë nuk e besoj që forca ruse kanë hy në Mitrovicë, ashtu siç nuk e besoj që ka pasë guxim Vuçiqi me do me dërgu forca legale të legalizuara në serbi si forca speciale pa garanci që mund të tërhiqen”, tha Haliti. /atvlive.tv
Deputeti i PDK-së, Xhavit Haliti, në emisionin CONTEXT në ATV, tha se veprimi i kryeministrit Kurti në veri dhe rënia e këtij të fundit në grackën e Vuçiqit, janë shqetësuese.
“Tani ë unë shpresoj shumë që kryeministri i Kosovës, po them kryeministri i Kosovës dhe jo Albin Kurti sepse Albini dhe kryeministri janë dy persona, për mua, do ta gjejë mënyrën se si të kërkoj falje për veprimet në veri dhe për rënien në grackën e Vuçiqit për të provokuar dhe për të justifikuar veprimet e Serbisë, të forcave speciale të Serbisë që erdhën ilegalisht në Mitrovicë dhe u kthyen mbrëmë natën përmes rrugëve dytësore nga veriu i Kosovës për në Rashkë dhe situata që është kriju, deklarata e ambasadorit, dy deklaratat e sekretarit të Shtetit zotit Blinken, deklaratat e sotme e Kris Hill në Beograd ambasador i Shteteve të Bashkuara, janë shqetësues dhe duhet të na shqetësojnë të gjithëve”, tha Haliti.
Ai tha se kjo situatë që është krijuar ka lëkundur marrëdhëniet e Kosovës me SHBA-në, perëndimin dhe NATO-n.
“Nuk është shqetësimi vetëm për Albinin, mendoj që nuk është as situata që neve ta shfrytëzojmë këtë për veprime opozitareske vetëm sa përbërë diçka me qëllim që të rrëzohet kjo qeveri, por kjo situatë ka lëkundur shumë marrëdhëniet Kosovë-Amerikë Kosovë-Perëndim, Kosovë-NATO”, tha Haliti.
Ai përmendi edhe sulmin që i ishte bërë atëherë ambasadores Tracey Ann Jacobson, për të cilin thotë se janë përpjekur ta cilësojnë si individual, ndërsa tani sipas Halitit, si Qeveri, ka bërë veprime të ngutshme duke mos pasur parasysh pasojat që do të ndodhin.
“Goditja e ambasadores së Shteteve të Bashkuara të Amerikës, për të cilën ne e kemi jemi përpjekur që t’i qartësojmë që ka qenë veprim individual dhe nuk ka qenë veprim se as sot nuk e besoj që ka qenë veprimi menduar mirë, por kjo e fundit nga ne për nga një Qeveri e cila ka ardhë me vota në pushtet, në kushtet në të cilat ka mësu po besoj diçka se cilat janë raportet e Kosovës me Amerikën dhe cilat janë raportet e Kosovës me perëndimin në përgjithësi, atëherë mendoj që veprimi ka qenë i ngushtëshëm, i pamenduar dhe i pamenduar për pasojat që do të ndodhin”, tha Haliti. /atvlive.tv
Ligji për Personat e Zhdukur gjatë luftës në Kosovës, sipas kryesuesit të Komisionit qeveritar për personat e zhdukur, është afër finalizimit.
Andin Hoti, në Komisionin për të drejtat e njeriut, tha se termi “personat e zhdukur me forcë”, i vendosur në deklaratën për personat e zhdukur, të dakorduar në Bruksel, ka qëllim trajtimin e dinjitetshëm të tyre.
“Ligji për Personat e Zhdukur është në plotësim-ndryshim qe shumë vite, është shumë e vërtetë që është shumë e dhimbshme. Ne jemi afër finalizimit të tij, mirëpo nuk kemi arritur të gjejmë një pajtueshmëri, një dakordim për t’i involvuar kërkesat e familjarëve të personave të zhdukur. Termi ‘personat e zhdukur me forcë’ nuk ka ekzistuar askund. Nuk po them që nuk e kemi ditur se çfarë është, por nuk ka ekzistuar askund. Termin ‘personat e zhdukur me forcë’ e kemi futur në deklaratën e përbashkët të Brukselit. Ky term është refuzuar prej Serbisë prej shtatorit 2021 deri në prill, kur e kemi pasur takimin e fundit, për shkak se Serbia frikësohej se përmes këtij termi ne do të kërkojmë përgjegjësi juridike dhe do të akuzojmë direkt për krimet e luftës”, tha Hoti.
Por pikërisht për termin “personat e zhdukur me forcë”, deputetja e PDK-së, Ariana Musliu – Shoshi, kërkoi sqarime nga zëvendëskryeministri i Bisnik Bislimi, i cili nuk ishte fare prezent në mbledhjen e komisionit.
“Është dashur që Besnik Bislimi të jetë në këtë tavolinë, sepse ai është personi që është i ngarkuar nga Qeveria që të bëjë pazare me Brukselin dhe me palët e tjera. Prandaj, për të gjitha ato që i ka negociuar dhe po i mban të fshehura, është dashur që të jetë sot këtu dhe të raportojë për atë çfarë ne kemi kërkuar”, tha Musliu – Shoshi.
Deklarata për personat e zhdukur ka përplasur verbalisht deputetët e PDK-së dhe Lëvizjes Vetëvendosje.
Kollçaku-Mulhaxha – Musliu-Shoshit: Mos i përsërit fjalët 100 herë.
Kollçaku-Mulhaxha: Të lutem mos i përsërit fjalët 100 herë.
Musliu-Shoshi: E di që po ju dhemb se ju ishit kundër Besnik Bislimit.
Kollçaku-Mulhaxha: Të lutem mos na i humb kohën të gjithë këta deputetë.
Musliu-Shoshi: Kërkoj prej deputetëve të LV-së të mbajnë tensionin e ulët, të gjithë kemi të drejtë me fol në këtë kuvend, e kemi të drejtë ligjore.
Diskutimi ka shkuar edhe më tej kur Musliu-Shoshi u është drejtuar me “trushpëlarë” deputetëve të LV-së.
Kollçaku-Mullhaxha: “Kryetare e ke obligim që deputetes me ia tërheq vërejtjen. Kush është trushpëlarë këtu. Ne duhet me u ngritë prej komisionit, kur deputetja përdor ‘trushpëlarë’. Ose ta tërheqë fjalën ose ne po dalim prej komisionit”.
Më 2 maj në Bruksel, kryeministri Albin Kurti dhe presidenti i Serbisë, Aleksandër Vuçiq, u pajtuan për ta miratuar një deklaratë të përbashkët për personat e zhdukur gjatë luftës në Kosovë, nëpërmjet së cilës zotohen për “zbatimin e plotë të detyrimeve” për ndriçimin e fatit të të zhdukurve. /atvlive.tv
Edicionin Qendror të lajmeve në ATV e gjeni në videon më poshtë:
31 maji ishte afati i fundit që kompania Rajonale e Ujësjellësit “Prishtina”, e ka vendosur për plotësim të kushteve teknike nga disa ndërtesa banesore në Prishtinë.
Ani pse njoftimet nga ana e KRU-së ishin të shpeshta, investitorët e ndërtesave kolektive nuk janë paraqitur as edhe një herë.
“Këtyre konsumatorëve ne u kemi dërguar disa herë kërkesë, në mënyrë që të vijnë në ujësjellës. I kemi përfillur të gjitha procedurat ligjore, por nuk kemi marrë përgjigje, andaj që nga sot janë pa ujë të pijshëm, fillimisht pusetat nuk janë në rregull, nuk kanë matje gjeodezike, andaj pa i pasur këto, ata nuk do të mund të kyçen”, tha Arjeta Mjeku nga KRU “PRISHTINA” .
Nga ana tjetër, Mjeku paralajmëroi shkyçje edhe ndaj bizneseve që nuk kanë paguar borxhet.
“Në të njëjtën kohë jemi duke planifikuar shkyçje edhe ndaj atyre që nuk i paguajnë borxhet, apo tentojnë të kyçen ilegalisht në sistemin publik të ujësjellësit”, tha Mjeku.
Përveç Lagjes së Spitalit dhe Matiçanit, aksione të tilla pritet të mbahen edhe në pjesë tjera të kryeqytetit, ku shuma e borxheve ndaj ujësjellësit arrin në mbi 45 milionë euro. /atvlive.tv
Edicionin Qendror të lajmeve në ATV e gjeni në videon më poshtë:
Anulimi i pjesëmarrjes së Kosovës në stërvitjet “Defender Europe 2023”, ishte pasoja e parë për Qeverinë, për moskoordinim të veprimeve në veri me SHBA-në.
Ndonëse, thotë se nuk frikësohet nga sanksionet, kryeministri Albin Kurti megjithatë është i brengosur.
Por, acarimi i raporteve me bashkësinë ndërkombëtare, posaçërisht me SHBA-në, sipas njohësve mund të ketë pasoja edhe më të rënda, duke filluar nga mosanëtarësimi në organizata ndërkombëtare e deri tek pezullimi i liberalizimit të vizave.
“Kosova është duke zhvilluar një proces të dialogut me Serbinë në Bruksel, e kemi marrëveshjen e Ohrit, e cila ka për qëllim forcimin e subjektivitetit ndërkombëtar të Kosovës, që është pranimi i Kosovës në Këshill të Evropës dhe në organizma të tjerë, pa ndihmën e partnerëve ndërkombëtarë Kosova do të mbetet një vend vetë numri dhe do të jetë e zymtë”, tha Ehat Miftaraj nga IKD.
“Nëse kryeministri Kurti ngrin kokën, sanksionet do të vazhdojnë nga SHBA-ja e Bashkimi Evropian. Do të kemi izolim total në arenën ndërkombëtare, do të kemi stopim të të gjitha fondeve financiare”, tha analisti Artan Behrami.
Pas tensioneve të krijuara në veri, bashkësia ndërkombëtare ka kritikuar ashpër autoritetet në Prishtinë. Madje, sipas SHBA-së, nëse Qeveria nuk reagon mund të përballet edhe me pasoja të tjera. /atvlive.tv
Edicionin Qendror të lajmeve në ATV e gjeni në videon më poshtë:
Tërheqja e bandave nga veriu fillimisht, pastaj ulja e numrit të policisë dhe paralelisht avancimi i marrëveshjes së Brukselit sipas kryeministrit Albin Kurti, janë veprimet që mund t’i ulin tensionet në Leposaviq, Zvecan dhe Zubin Potok.
Këtë rrugëdalje për krizën në veri, kryeministri Albin Kurti e propozoi gjatë fjalimit në konferencën për sigurinë globale, Globsec që po mbahet në Bratislavë.
“Po përpiqemi të gjejmë zgjidhje dhe zgjidhja nuk do të duhej të ishte rrugë me kthesa por hekurudhë me dy binarë. E para për të dalë nga kriza në veri që nënkupton sundim të ligjit, bandat kriminale ose të kthehen në Serbi ose në burg në Kosovë pastaj ulje të pranisë së policisë para objekteve të komunave dhe normalizim të situatës. E dyta zbatim i shpejtë, i plotë, pa shtyrje dhe i pakushtëzuar i marrëveshjes së Brukselit”, tha Kurti.
Megjithatë, kryeministri Kurti nuk do t’i urdhërojë kryetarët e rinj shqiptarë të komunave me shumicë serbe, të kalojnë në zyra të tjera, jashtë objekteve komunale për të shmangur krijimin e strukturave paralele në atë pjesë.
“Po t’i urdhëroja kështu, do të ishte sikur po nxis krijimin e strukturave paralele për struktura paralele. Pra të kopjoj metodat e tyre. Do t’u bashkohesha ilegalitetit të tyre. S’mund ta bëj këtë. Demokracia është që ligji të jetë mbi politikën”, tha Kurti.
Teksa tregoi për takimin që pati me përfaqësuesit e BE-së në Bratislavë të mërkurën, kryeministri Albin Kurti theksoi se është gati t’i dëgjojë serbet nëse protestat janë paqësore.
“Kam diskutuar me Borellin dhe Lajcak duke u thënë se nëse do të ishin protesta paqësore për zgjedhje të jashtëzakonshme do të kuptoja, por jo banda me shkronjën Z, që sulmojnë KFOR-in e policinë dhe të cilët bërtasin vrisni-vrisni. Para këtyre bandave unë nuk e dorëzoj republikën demokratike, por të ishin prapë protesta paqësore atëherë kanë një kryeministër që gjithë jetën e tij ishte aktivist politik dhe është më së i gatshëm t’i dëgjoj e ndoshta edhe të pajtohem me ta”, tha Kurti.
Kryeministri, Albin Kurti ka treguar gatishmëri për takim më presidentin e Serbisë Aleksandar Vuçiq, derisa një takim brenda kësaj jave me dy liderët e presin edhe Presidenti i Francës, Emmanuel Macron dhe kancelari gjerman Olaf Scholz. /atvlive.tv
Edicionin Qendror të lajmeve në ATV e gjeni në videon më poshtë:
Derisa protestat e serbëve lokalë vazhdojnë në Leposaviq, Zveçan dhe Zubin-Potok, kryetari i Kuvendit, Glauk Konjufca, tha se SHBA-ja nuk po e kupton drejt pozicionin e Kosovës.
Sipas tij, në veri grupet e armatosura po e sfidojnë shtetin dhe po i sulmojnë zyrtarët policorë.
“Kryefjala e gjithë procesit është aftësia jonë, kapaciteti ynë për t’i kryer detyrat tona shtetërore, edhe policia, edhe institucionet e sigurisë, në mënyrë që të garantojnë siguri dhe qetësi në atë pjesë të vendit. Siç po shihet atje problemi po fillon edhe po përfundon me grupet e armatosura të rrezikshme, të paligjshme, të cilat e sfidojnë shtetin dhe sulmojnë zyrtarë policorë”, tha Konjufca.
Pas kritikave të ashpra që SHBA-ja pati ndaj Qeverisë së Kosovës për situatën në veri, Konjufca shtoi se zgjedhjet janë mbajtur në koordinim me SHBA-në. Por, qortimet, sipas kryekuvendarit, nuk janë të parat.
“Për t’u mirëkuptuar duhen natyrisht takime edhe më intensive, takime më të thella se Qeveria po shkon në atë rrugë për arsye se ashtu i ka lexuar porositë e Shteteve të Bashkuara të Amerikës… Kur nuk mori pjesë në zgjedhje Lista Serbe, Shtetet e Bashkuara të Amerikës nuk i kam dëgjuar duke thënë se këto zgjedhje duhen anuluar, nuk e kam dëgjuar duke thënë, d.m.th. tash qysh e kupton një politikan këtë çështje ose një zyrtar publik, kur thonë që SHBA-ja nuk duhet të anulojnë zgjedhje, i bie që kemi të drejtë me marrë pjesë, tash kur keni të drejtë me marrë pjesë ligjet e Kosovës nuk shohin prag sa duhet me marr pjesë”, tha Konjufca.
Ndërkaq, Konjufca tha se ndërkombëtarët nuk kanë vija të kuqe për Serbinë.
“E kemi pa që bashkësinë ndërkombëtare që ia tregon disa vija të kuqe Serbisë, unë s’po shoh që bashkësia ndërkombëtare ka vija të kuqe për Serbinë, por ka qysh definon Serbia provokim, Serbia e çon ushtrinë, është rrezik, Kosova duhet të zmbrapset, kështu është situata”, tha Konjufca.
Serbët në veri, që nga e premtja janë duke protestuar kundër punës së kryetarëve të rinj shqiptarë. Dhunë protestuesit kanë ushtruar edhe ndaj pjesëtarëve të KFOR-it, Policisë dhe gazetarëve. /atvlive.tv
Edicionin Qendror të lajmeve në ATV e gjeni në videon më poshtë:
Sanksionet e Shteteve të Bashkuara karshi Kosovës pas situatës së tensionuar në veri të vendit, partitë opozitare po i vlerësojnë si jashtëzakonisht të rrezikshme për Kosovën.
Për këtë po e akuzojnë kryeministrin Albin Kurti se po e shkatërron aleancën me aleatët ndërkombëtarë e veçmas me ShBA-në.
“Sot Albin Kurti ka zgjedhur të luftojë me aleatët ndërkombëtarë, kjo është e rrezikshme dhe nuk e ndihmon Kosovën”, tha kryetari i LDK-së, Lumir Abdixhiku.
Për këtë ata kërkuan që sa më parë kryeministri të raportojë në Kuvend.
“Kjo është e dëmshme, e papranueshme dhe karshi kësaj situate, ne nuk mund të qëndrojmë duarkryq. Prandaj, t’i marrim përgjegjësitë në duart tona dhe angazhimin, në mënyrë që të arrijmë të sanojmë dëmin të cilin e ka shkaktuar kjo qeveri dhe kryeministri Kurti”, tha shefi i GP të PDK-së, Abelard Tahiri.
Por veç kësaj, Kurtit po i kërkohet edhe dorëheqja.
Aleanca për Ardhmërinë e Kosovës po kërkon mocion mosbesimit për qeverinë Kurti.
“E kemi përgjegjësi politike, shtetërore, institucionale me i thanë qeverisë Kurti, me i thënë popullit të Kosovës se kjo është rrugë qorre dhe sa më shpejt që të ndalet, sa më shpejt që e forcon lidhjen me aleatët tanë, bashkërisht do të jetë më mirë”, tha shefi i GP të AAK-së, Besnik Tahiri.
Këto deklarime u dhanë pas një mbledhje të shkurtër të Kryesisë, e cila dështoi të mbahet për mungesë kuorumi. /atvlive.tv
Edicionin Qendror të lajmeve në ATV e gjeni në videon më poshtë:
Sinisa Jevtic, ish-ushtar i Serbisë në luftën në Kosovë, pjesëmarrës në aksionin në Koshare, i dekoruar nga Slobodan Milosevic, u arrestua mbrëmë në veri, pak orë pasi hyri në Kosovë për t’iu bashkuar protestave të dhunshme.
Deri në kufirin në Jarinje, ai u shoqërua nga një deputet ultra-nacionalist, pro-rus. Jevtic iu përgjigj thirrjeve të grupeve të veteranëve të ushtrisë serbe, për, siç thuhet, “çlirimin e tokës së shenjtë”.
Vetëm pak orë pasi nga Serbia hyri në territorin e Kosovës për t’iu bashkuar protestave të dhunshme në veri, veterani i ushtrisë serbe, Sinisa Jevtic, u arrestua.
ATV-ja merr vesh se ai u arrestua në mbrëmjen ndërmjet të martës dhe të mërkurës në veri të vendit.
Deri në kufi atë e përcolli deputeti ultra-nacionalist në parlamentin e Serbisë, Erac Strahinja, nga partia rusofile e ekstremit të djathtë.
Jevtic ka shërbyer në ushtrinë serbe gjatë luftës së fundit në Kosovë dhe mes tjerash ka luftuar në Koshare kundër UÇK-së.
Ai mban me krenari në profilin e tij në Facebook dekoratën hero dhe medaljen e ndarë nga kasapi i Ballkanit, Slobodan Milosevic.
Para se të nisej për në Kosovë, Jevtic kishte shpërndarë njoftime që bëjnë thirrje për mobilizim të veteranëve të ushtrisë serbe, për, siç thuhet, “çlirimin përfundimtar të tokës së shenjtë” – referuar Kosovës.
Në mbrëmjen e së dielës, 47-vjeçari nga Kryshevci shihet në disa video me një grup njerëzish, përfshirë deputetin Strahinja, teksa këndojnë këngë nacionaliste serbe – që shpërfaqin pretendimet territoriale mbi Kosovën.
Në postimet ndër vite Jevtic e konsideron veten serb dhe rus, teksa shpreh haptas përkrahjen për agresionin e Rusisë ndaj Ukrainës, përmes simbolit Z.
Ky simbol u vizatua në mjetet e Policisë së Kosovës, KFOR-it dhe mediave që përcollën ngjarjet e dhunshme në veri.
Para nisjes për Kosovë, Jevtic kishte shpërndarë mesazhe përkrahëse të sulmeve ndaj KFOR-it dhe Policisë.
Të mërkurën, ATV-ja kërkoi informacione nga Prokuroria, nëse ai është i dyshuar ose i akuzuar për krime lufte, por nuk mori përgjigje.
