Category: Lajme

Komisioni Qendror i Zgjedhjeve është mbledhur të enjten në mesditë, por ky institucion nuk ka diskutuar për zgjedhjet e mundshme që po përmenden se duhet të mbahen në katër komunat e veriut të Kosovës. Ky institucion vetëm para pak kohësh ka përmbyllur procesin zgjedhor në këto komuna, por ngjarjet e fundit në këtë pjesë të Kosovës dhe ngritja e tensioneve, kanë rikthyer çështjen e zgjedhjeve të reja në këto komuna.

Ditë më parë, Zëdhënësi i KQZ-së, Valmir Elezi, ka thënë se “KQZ-ja si institucion i përhershëm kushtetues, e ka për detyrë kryesore organizimin e zgjedhjeve kurdo që ato shpallen. Si çdoherë, ashtu siç kemi thënë edhe në të kaluarën, KQZ-ja është e gatshme për të përmbushur detyrat që dalin nga Kushtetuta dhe ligjet në fuqi”.

Ndërkohë, po në këtë mbledhje, KQZ-ja diskutoi shkurt edhe për plotësimin dhe ndryshimit e ligjit për zgjedhjet e përgjithshme. Anëtarët e KQZ-së e panë të nevojshme që pas aprovimit të ligjit duhet të ndryshohen edhe rregulloret zgjedhore si legjislacion sekondar.

Nënkryetari i Kuvendit, deputeti i PDK-së, Enver Hoxhaj e ka mirëpritur propozimin e kryeministrit Edi Rama mbi një draft të Asociacionit të Komunave me shumicë serbe, raporton Ekonomia Online.

Ai madje thotë se këtë draft e ka parë, megjithatë, të njëjtin ka refuzuar t’a komentojë.

Këtë hap të Ramës, Hoxhaj e ka cilësuar si “të rëndësishëm dhe të mirë”.

Ai tha se shpreson se këtë dokument do ta arrijë në Kuvendin e Kosovës për diskutim të mëtutjeshëm.

Hoxhaj se pret nga Kurti që t’i pranoj kërkesat e ndërkombëtarëve. Ai tha se e çmon kontributin e shteti shqiptarë, e që sipas tij, iniciativa e kryeministri Rama duhet ta ketë mbështetje në Kosovë.

“Në si PDK jemi jashtëzakonisht të shqetësuar. Së dyti mendoj që Kurti do të duhej të ju thotë po këtyre tri kërkesave që i kanë partneret tanë amerikanë, ky është qëndrimi im, nuk flas në emër të PDK, flas si nënkryetar Kuvendi”, tha ai.

“Së pari unë e përshëndes dhe e çmoj shumë kontributin e kryeministrit Rama dhe Shqipëria natyrisht që ka pasur rol në të kaluarën dhe duhet të ketë edhe sot në tejkalimi e situatës. Së dyti Asociacion nuk është një shpikje e kryeministrit Rama është një obligim nga viti 2013 për të cilin unë km qenë edhe në atë kohë që të krijohet. Nëse do të krijohen në 2013 në 2023 nuk do t’i kishin këto problem që i kemi sot. Kurti e ka pranuar Asociacion në pikën e shtatë me një paketim të ri vetëmenaxhim. Dhe në pikëpamjen time si nënkryetar i Kuvendit mendoj që iniciativa e kryeministri Rama duhet ta ketë mbështetje në Kosovë”.

“Ajo se çfarë do të  do të duhej që ka një procedurë të qartë nga marrëveshja e viti 2013 dhe 2015 se si do të duhej të hartohej statusi i Asociacionit të komunave. Unë mendoj që Rama me propozimin e tij po bënë përpjeke që t’i mbush interesat e shteti të Kosovës në një kohë që është kritike dhe assesi që t’i dëmtoj këto interesa. Frika ime është që mënyra se si Kurti është duke menaxhuar situatën në veri të vendit ne mund të lëvizim drejtë një protektorati të plotë i cili si produkt mund të ketë një autonomi territoriale”, tha ai.

Qeveria e Kosovës e ka mbështetjen e Aleancës për Ardhmërinë e Kosovës për të mbrojtur sovranitetin e vendit, por jo për të reduktuar subjektivitetin shtetëror dhe për konflikt me partnerët ndërkombëtar.

Kështu tha shefi i Grupit Parlamentar të Aleancës për Ardhmërinë e Kosovës, Besnik Tahiri, i cili theksoi se mbrojtja e sovranitetit nuk ka qenë ndonjëherë më në rrezik.

“Nuk duhet të e tejkalojmë me qetësi dhe normalitet faktin që sovraniteti i Kosovës është reduktuar në një oborr dhe në një kopsht e zyre të një kryetari që kryeministri e quan herë me k të madhe e herë me k të vogël. Është reduktuar sovraniteti tek njësitë tona të cilat po e mbrojnë një pjesë dhe një zyre e cila e ka shumë të diskutueshëm legjitimitetin demokratik. E ka edhe tash në mbrojtjen e pikës 1 dhe 31 në mbrojtje të doganave, e ka mbështetjen në mbrojtjen e sovranitetit dhe vendosjes së njësive speciale policore elite në pikat që kanë vendin e vetë, por nuk e ka mbështetjen tonë dhe nuk do ta ketë në qoftë se këtë pjesë të rëndësishme të subjektivitetit tonë shtetëror dhe kombëtar e ka reduktuar në një konflikt të hapur mes Kosovës dhe vendeve që na kanë qenë krah në shpalljen, njohjen e anëtarësimin”, tha ai.

Pas situatës tensionuese në veri të Kosovës, Aleanca për Ardhmërinë e Kosovës ka propozuar inicimin e një mocioni mosbesimi për rrëzimin e Qeverisë Kurti.

Ish-kryeministri i Shqipërisë, Salih Berisha ka reaguar pas propozimit të draftit të kryeministrit Edi Rama për Asocicionin e komunave me shumicë serbe në Kosovë. Sipas tij, teksti i këtij drafti është shkruar në Beograd.

Berisha para mediave tha se Rama me këtë veprim shpalosi veten si “një vasal i shpifur i Aleksandër Vuçiqit”.

“Argati i Vuçiqit, në detyrim ekstrem, shpalosi veten si një vasal i shpifur i doktrinarit dhe njërit prej autorëve të gjenocidit serb në Bosnje dhe Kosovë, njeriut që me politikën e tij etno-nacionaliste, politikën e tij të Serbisë së Madhe, është faktor destabilizimi kryesor në Ballkan, dhe pas Putinit të Madh edhe në Evropë, Aleksandër Vuçiq. Sot, Edi Rama me detyrim doli dhe informoi shqiptarët se ka hartuar dhe dorëzuar tekstin e marrëveshjes së Asociacionit të komunave me shumicë serbe në Kosovë. Natyrisht vetëkuptohet se teksti është shkruar në Beograd dhe pastaj rishkruar në Tiranë”, ka thënë Berisha.

Derisa ka kritikuar kryeministrin aktual shqiptar, Berisha ka folur edhe për Qeverinë e Kosovës, duke thënë se kjo e fundit e ka për detyrë të bahskëpunojë me faktorin ndërkombëtar.

“Ky akt përbën një ndërhyrje flagrante në punët e brendshme të Kosovës në emër të Beogradit, përbën aktin më të shëmtuar në historinë e marrëdhënieve mes dy vendeve, përbën një akt që nxit dhe nuk qetëson konfliktin, përbën një akt kur Edi Rrama përpiqet të zgjidhë problemin e tij të tmerrshëm me McGonigal, për të cilin e ka vendin në burg në çdo drejtësi të botës… Prandaj në këtë kontekst mendoj se Qeveria e Kosovës e ka një detyrim që të bashkëpunojë me faktorin ndërkombëtar”, ka thënë ai.

Ai ka përsëritur se mbështet Asociacionin e komunave me shumicë serbe në Kosovë, porse kurrë jashtë prerogativave kushtetuese të Republikës së Kosovës.

Ndryshe, kryeministri i Shqipërisë, Edi Rama, ka deklaruar se e ka dorëzuar një draft të Asociacionit të komunave me shumicë serbe, te presidenti francez Emmanuel Macron, dhe kancelari gjerman, Olaf Scholz. Për këtë dokument, ai ka thënë se i ka vënë në dijeni edhe presidentin e Këshillit Evropian dhe amerikanët.

Policia e Kosovës ka arrestuar tre persona të dyshuar për shpërndarjen e parave të falsifikuara. Rasti ka ndodhur të mërkurën në Vushtrri dhe nga personat e njëjtë janë konfiskuar monedha metalike nga 2 euro.

Policia ka bërë të ditur se personave të dyshuar u janë konfiskuar edhe një automjet dhe katër telefona.

Përveç këtij rasti, për falsifikim të parave është raportuar edhe më herët gjatë ditës së mërkurë në Vushtrri.

Një person ka informuar se janë pranuar 200 euro para të falsifikuara, të cilët më pas janë konfiskuar nga Policia dhe rasti është duke u hetuar.

Ndërsa një tjetër rast është raportuar në Graçanicë ku një femër ka hasur në një kartëmonedhë prej 50 euro e cila dyshohet të jetë e falsifikuar.

Gjithashtu, në raportin 24 orësh të Policisë së Kosovës, bëhet e ditur një person në Pejë ka informuar se ka hasur në një kartëmonedhë prej 50 euro e cila dyshohet të jetë e falsifikuar.

Sipas Policisë, ato janë konfiskuar ndërsa rastet janë duke u hetuar.

Kryeministri i Republikës së Kosovës, Albin Kurti, ka pritur sot në takim veprimtarin dhe aktivistin e njohur për çështjet shqiptare, Naser Nika.

Në këtë takim shumë miqësor, kryeministri Kurti falënderoi Nika për kontributin dhe punën e tij të madhe që ndërlidhet me vendin e popullin tonë, duke qenë zë i fortë i mërgatës sonë shqiptare në SHBA.

Nika i dhuroi kryeministrit Kurti një certifikatë mirënjohjeje nga kongresmenja Nicole Malliotakis, përfaqësuese e distriktit të 11-të të New York-ut.

Aktivisti Naser Nika njihet po ashtu për iniciativën e tij që një rrugë në Staten Island në New York, ka marrë emrin e një nga personaliteteve më të shquara të kombit shqiptar, Ismail Qemali, rrugë kjo e cila u inaugurua ditë më parë.

Deputeti i Lëvizjes Vetëvendosje, Armend Muja ka reaguar lidhur deklaratën e kryeministrit të Shqipërisë, Edi Rama, i cili ka thënë sot e ka dorëzuar një draft të Asociacionit të komunave me shumicë serbe, te presidenti francez, Emmanuel Macron dhe te kancelari gjerman, Olaf Scholz.

Muja ka potencuar se duke dërguar statut për ‘Asociacionin’ në Berlin e Paris, Rama vetëm sa po e shpërfaq dhe forcon Asociacionin e tij me Vuçiqin.

“Fort i kapur diku për krim e korrupsion duhet të jetë Edi Rama gjersa detyrohet t’ia bëjë këtë mënyrë vetes publikisht para gjithë kombit shqiptar.”, ka shkruar Muja në Facebook.

Ndryshe, kryeministri shqiptar, Edi Rama ka deklaruar se e ka dorëzuar një draft të Asociacionit të komunave me shumicë serbe, te presidenti francez Emmanuel Macron, dhe kancelari gjerman, Olaf Scholz. Për këtë dokument, ai ka thënë se i ka vënë në dijeni edhe presidentin e Këshillit Evropian dhe amerikanët.

Rama ka thënë se drafti është i punuar nga ekspertë dhe sipas tij pret që i njëjti të vlejë për të çuar në një nivel tjetër dialogun Kosovë-Serbi.

​Rama i dorëzon presidentit francez dhe kancelarit gjerman një draft të Asociacionit

Sekretari i përgjithshëm i NATO-s, Jens Stoltenberg, dhe ambasadorja e SHBA-së në NATO, Julianne Smith, thanë më 7 qershor se financimi i aleancës ushtarake do të jetë një nga temat kryesore të samitit të ardhshëm në Vilnius, së bashku me zgjerimin e aleancës dhe garancitë për siguri.

Smith dhe Stoltenberg, që morën pjesë në një konferencë virtuale të sponsorizuar nga Qendra për Sigurinë e Re Amerikane, thanë se anëtarët do ta diskutojnë pragun për shpenzimin e të paktën 2 për qind të bruto prodhimit të brendshëm të vendeve anëtare të NATO-s në mbrojtje, shkruan REL.

Smith u zotua se SHBA-ja do të vazhdojë të bëjë presion për t’u siguruar që anëtarët të shpenzojnë të paktën 2 për qind të bruto prodhimit të brendshëm të tyre në mbrojtje, siç është rënë dakord në Premtimin e Investimeve të Mbrojtjes (DIP) të vitit 2014, i cili kërkon që vendet ta përmbushin pragun prej 2 për qind deri në vitin 2024.

Përveç kësaj, Smith tha se 2 përqindëshi “është një prag, jo një tavan” dhe se planet e ardhshme të NATO-s mund të kërkojnë rritje të mëtejshme të këtij pragu.

Shtetet e Bashkuara të Amerikës “po planifikojnë të sjellin një DIP 2.0” në samit, tha Smith, duke shtyrë aleatët e NATO-s ta përmbushin dhe kapërcejnë pragun prej 2 për qind brenda viteve të ardhshme.

Udhëheqësit e 31 vendeve të NATO-s, të cilët do të mblidhen më 11 dhe 12 korrik në kryeqytetin lituanez, pritet të zhvillojnë gjithashtu biseda kritike për të ardhmen e NATO-s, lidhur me një zgjerim të mundshëm.

Presidenti i Ukrainës, Volodymyr Zelensky, i cili i ka bërë presion NATO-s për ta lejuar anëtarësimin e vendit të tij, pritet të marrë pjesë në samit. Ai tha në fillim të kësaj jave se Ukraina është “gati për t’u anëtarësuar” dhe se aleanca duhet ta marrë një vendim për anëtarësimin e Ukrainës në këtë samit.

Lidhur me zgjerimin e mundshëm të NATO-s, Smith dhe Stoltenberg e bënë të qartë se ekziston një gamë e gjerë modelesh potenciale për kontributin e vazhdueshëm të NATO-s në Ukrainë, por se zgjidhja ka të ngjarë të jetë një kompromis midis opinioneve të ndryshme të aleatëve të NATO-s.

“Ne po shikojmë një sërë opsionesh për të sinjalizuar se Ukraina po përparon në marrëdhëniet e saj me NATO-n”, tha Smith.

Ministri i Punëve të Brendshme, Xhelal Sveçla ka thënë se përkushtimi për sundim të ligjit e bën Kosovën partner serioz e të besueshëm edhe për institucionet e sigurisë të aleatëve të saj.

Përmes një postimi në Facebook, ai ka shkruar se ditët e fundit kanë arritur konfiskimin e një veture e cila ishte në kërkim nga autoritetet gjermane, ku dhe është arrestuar një person i kërkuar nga Mali i zi.

“Puna e Policisë së Kosovës dhe përkushtimi për sundim të ligjit, na bën partner serioz e të besueshëm edhe për institucionet e sigurisë të vendeve tona aleate e mike.

Në fund ai ka lavdëruar Policinë e Kosovës për profesionalizimin e treguar, gjë e cila siç thotë ai nuk mungon në asnjë rast.

“Këto raste janë dëshmi e profesionalizmit të Policisë së Kosovës, i cili nuk mungon asnjëherë, në asnjë rast”, ka shkruar Ministri Sveçla.