Category: Lajme

Policia e Kosovës ka njoftuar se dje në Leposaviq u sulmuan nëntë gazetarë e kameramanë. Ata janë sulmuar nga një grup i protestuesve derisa ishin duke kryer detyrën gjatë vizitës së Ministrit Elbert Krasniqi në Komunën e Leposaviqit.

Sipas Policisë, viktimat kanë pësuar lëndime trupore dhe kanë pranuar trajtim mjekësor në stacionin policor në Leposaviq.

“Njëri nga viktimat dyshohet të ketë lëndime të rënda (frakturë në dorë) është udhëzuar për trajtim të mëtutjeshëm”, ka njoftuar Policia.

Përveç sulmit, të dyshuarit kanë marrë edhe një telefon celular nga një gazetare dhe një kamerë të RTK’së.

Rasti është cilësuar si “LËNDIM I RËNDË TRUPOR /ASGJËSIM APO DËMTIM I PASURISË /SULM NDAJ PERSONIT ZYRTAR”.

“Rruga APJ, Leposaviç 16.06.2023 – 14:24. Nëntë persona (pesë meshkuj dhe katër femra) gazetarë e kameraman janë sulmuar fizikisht nga një grup i protestuesve derisa ishin duke kryer detyrën gjatë vizitës së një ministri të qeverisë në komunën e Leposaviçit. Viktimat kanë pësuar lëndime trupore dhe të njëjtit kanë pranuar trajtim nga ekipi mjekësor në stacionin policor në Leposaviç. Njëri nga viktimat dyshohet të ketë lëndime të rënda (frakturë në dorë) dhe i njëjti është udhëzuar për trajtim të mëtutjeshëm. Përveç sulmit të dyshuarit kanë marrë nga një gazetare një telefon celular dhe një kamerë të RTK-së. Rasti është iniciuar në konsultim me prokurorin dhe mbetet në hetime të mëtutjeshme”, thuhet në raportin 24 orësh të Policisë.

Asociacioni i Gazetarëve të Kosovës (AGK), ka njoftuar se ekipet e gazetarëve nga Prishtina “kanë qenë cak i një sulmit brutal” nga protestuesit në Leposaviq, derisa ata po kryenin punën e tyre.

Sipas AGK-së, kameramani i shërbyesit publik, Radio Televizionit të Kosovës, Bardh Bekteshi është sulmuar fizikisht dhe ka marrë lëndime të rënda në kokë e trup.

“Përveç sulmit fizik, Bekteshit i është thyer edhe kamera e xhirimit”, thuhet në njoftimin e AGK-së.

Ky asociacion ka publikuar dhe një video ku shihet sulmi ndaj gazetarëve në Leposaviq.

Sipas një deklarate për AGK-në, gazetarja Venera Xhoxhaj, ka treguar se protestuesit i kanë gjuajtur me gurë ekipet e mediave, Tëvë1, RTV Dukagjini, RTK, Klan Kosova dhe KTV.

“Na kanë gjuajtur me gurë, disa kolegë derisa kanë qenë duke u larguar, janë rrëzuar, dhe kameramanit tonë, Bardh Bekteshi, e kanë shtyrë duke e rrëzuar pastaj edhe sulmuar fizikisht duke i shkaktuar lëndime në kokë dhe trup””, ka thënë Xhoxhaj për AGK-në.

“Asociacioni i Gazetarëve të Kosovës, i bënë thirrje urgjente Policisë së Kosovës, dhe prezencës ndërkombëtare në këtë komunë, që t’u ofrojnë siguri gazetarëve dhe kameramanëve të cilët janë duke qëndruar në atë komunë”, thuhet në reagimin e AGK-së, e cila e ka dënuar ashpër sulmin.

AGK-ja ka njoftuar se lëndime trupore ka marrë edhe Albin Rrahmani, kameraman i Tëvë1.

“Në mesin e gazetarëve të lënduar është edhe kameramani Albin Rrahmani, i cili ka pësuar lëndime në këmbë. Aktualisht, ekipi është duke dhënë deklaratë në Policinë e Kosovës”, ka thënë AGK -ja.

Ky asociacion ka njoftuar se në mesin e të lënduarve është edhe gazetari i Arbresh.info, Pleurat Salihu, të cilit sulmuesit ia kanë thyer krahun. Ndërkaq, gazetarja e RTV Dukagjinit, Dorentina Thaqi, është sulmuar me gurë në kokë.

Gazetarët e lënduar, sipas AGK-së, kanë marrë ndihmën e parë mjekësore sapo kanë arritur të dalin nga, siç e kanë quajtur “zona e rrezikut”.

Në njoftimin e saj, AGK-ja gjithashtu ka theksuar se sulmi ndaj gazetarëve në Leposaviq, ka ndodhur , në prani të trupave të misionit paqeruajtës të NATO-s në Kosovë, KFOR.

“…të njëjtit nuk kanë reaguar, por i kanë penguar gazetarët të ikin”, ka thënë AGK-ja, duke shtuar se kërkon nga KFOR-i që të mos i pengojnë gazetarët gjatë raportimit, “meqë siguri nuk po ju ofrojnë”.

AGK-ka ka thënë se për të gjitha sulmet ndaj gazetarëve, të cilat kanë ndodhur gjatë raportimeve të tyre nga veriu i vendit, do t’i informohen organizatat ndërkombëtare që merren me sigurinë e gazetarëve dhe lirinë e medias.

Tifozët e Rumanisë janë dëbuar nga fusha e “Fadil Vokrrit” para përfundimit, ndërsa janë zbuluar edhe arsyet e dëbimit.

Përfaqësuesja e Kosovës barazoi 0-0 me Rumaninë në ndeshjen e zhvilluar në “Fadil Vokrri”, në kuadër të Grupit I të “Euro 2024”.

Një grup prej rreth 50 tifozësh kishin udhëtuar nga Rumania drejt Prishtinës për këtë ndeshje, por ata u dëbuan nga tribuna para mbylljes së takimit.

Sipas mediumit rumun Gsp.ro, tifozët ultras në numër prej 15-20 sosh nga grupi “Uniti Sub Tricolor” kanë brohoritur thirrje të ndaluara si “Kosova është Serbi”.

Tifozët që njihen si ultranacionalist u përplasen fizikisht edhe sigurimin e stadiumit “Fadil Vokrri”, ndërsa kishin futur në stadium edhe mjete piroteknike.

Sipas Gsp.ro, këto dyja ishin shkak edhe që tifozët u dëbuan nga stadiumi.

Pas incidenteve, Federata e Futbollit e Rumanisë tani rrezikon të përballet me dënime nga UEFA, pasi njihen si recidivistë.

Mediumi rumun shton se slogani nuk i pëlqen FIFA-s, ndaj rreziku që fusha të pezullohet për ndeshjet e ardhshme është mjaft i lartë.

Ndeshja e radhës e tyre në shtëpi është planifikuar për 9 shtator, kundër Izraelit, në Arenën Kombëtare.

Gjithashtu vlen të theksohet edhe shteti i Rumanisë nuk e njeh pavarësinë e shtetit të Kosovës.

Kryetari i Suharekës, Bali Muharremaj dhe ai i Lipjanit, Imri Ahmeti, i janë gëzuar miratimit të Projektligjit për plotësimin e Ligjit mbi Ndarjet Buxhetore për Buxhetin e Kosovës për vitin 2023, që do të mundësojë zhbllokimin e mjeteve vetanake të komunave.

Me projektbuxhetin i vitit 2023, të propozuar nga Qeveria Kurti, parashihej që mjetet vetanake të kalonin në arkën e shtetit.

Muharremaj e Ahmeti e quajnë të padrejtë bllokimin e këtyre mjeteve, pasi konsiderojnë se të hyrat vetanake u takojnë ekskluzivisht komunave.

Kryetari i Suharekës, Bali Muharremaj, thotë për Ekonomia Online se të bllokuara kanë qenë 380 mijë euro dhe se ato mjete kanë qenë të destinuara për investime kapitale.

“Më vjen mirë që Qeveria e ka marrë një vendim të mirë. Ato mjete u takojnë komunave. Vlera në Suharekë që kanë qenë të bllokuara është 380 mijë euro, janë projekte që janë të destinuara për investime kapitale, por më në fund besoj se është bërë një gjest i mirë, për arsye se Qeveria duhet të na kuptojë se komuna nuk i ka opozitë, ne jemi kryetarë komunash dhe çdo kryetarë mendon me dërgu komunën e tij përpara, me pas zhvillim ekonomik e mirëqenie sociale të mirë”, thotë Muharremaj.

Ndonëse vitin e kaluar nuk ka pasur bartje buxhetore për shkak të shfrytëzimit të buxhetit në tërësi, Muharremaj thotë se mjetet e bllokuara kanë qenë të vitit 2021.

“Ato projekte janë të planifikuar, të hyrat janë nga prej vitit 2021 se ne të vitit 2022 nuk kemi pas bartje dhe kështu që janë të planifikuar në projekte afatgjate, mirëpo tani do ta kemi të lehtë se në momentin që kalon Ligji në lexim të dytë, atëherë ne i planifikojmë dhe i dërgojmë në Asamble Komunale dhe vazhdon kështu”, u shpreh ai.

Muharremaj ka folur edhe për projektet që kanë prioritet këtë vit. Ai përmend ndërtimin e shtëpisë së kulturës e “unazën e djathtë”.

“Është shtëpia e kulturës me rëndësi, ‘unaza e djathtë’ shumë me rëndësi, rruga që e zhvillon turizmin e që e lidh komunën tonë me Shtërpcën edhe kemi afër 5 milionë euro investime në zhvillimin e turizmit në Komunën e Suharekës, që pretendojmë ta kemi një shteg të ecjes prej Ferizajt… kjo do të bëhet çdo herë për zhvillimin e turizmit dhe kemi nevojë që diaspora të investojë në Suharekë. Presim të fillojmë me një zonë të re industruiale, ku kemi përfunduar zonën që është me standarde evropiane por pretendojmë të fillojmë edhe me një zonë të re”, thotë Muharremaj.

Zhbllokimi i këtyre mjete, është mirëpritur edhe nga kryetari i Lipjanit, Imri Ahmeti. Ai thotë se mjetet e bllokuara kanë qenë të planifikuara për investime kapitale.

“Pa dyshim se është i vështirë. Tani destinimi i tyre ka ndodh me vendim të Kuvendit, janë investime kapitale, në fakt ende të gjitha komunat në procedura sepse akoma nuk janë të alokuara këto mjete, pritet të alokohen dhe të shohim deri në fund se si po shkon ky proces”, u shpreh Ahmeti, teksa e quan të padrejtë bllokimin e tyre.

Ai thotë se të hyrat vetanake janë burim i vetëm për investime kapitale.

“Pa dyshim që mund të ketë impakt reagimi i komunave por në fakt ka qenë i padrejtë që të hyrat vetanake të një komune të merren dhe të ridestinohen për një komunë krejt tjetër, sepse komunat në planifikimet e tyre buxhetore, investimet kapitale i kanë kryesisht prej të hyrave të veta vetanake dhe prej grantit që vijnë nga Qeveria, prandaj mendoj se është mirë që më në fund të jemi dakorduar që të hyrat vetanake”.

Në Gjakovë janë duke vazhduar kërkimet për gruan që ditën e premte është hedhur nga ura e Fshajt.

Policia bën të ditur se gruaja ka rënë nga ura e Fshajt rreth orës 10:03.

“Fshati Fshaj, Gjakovë 16.06.2023 – 10:03. Dëshmitari mashkull kosovar, ka njoftuar se një femër është hedhur nga Ura e Fshajt në lumë, trupin e viktimës e ka rrëmbyer uji dhe akoma nuk është gjetur”, bën të ditur Policia.

Lidhur me rastin janë njoftuar të gjitha njësitë relevante policore, zjarrfikësit, njësiti për kërkim-shpëtim dhe prokurori.

Në njoftimin e bërë për media thuhet se rasti është duke u hetuar.

Gjatë periudhës janar-maj, linja e Ballkanit Perëndimor, mbetet rruga e dytë më aktive për kalimin e migrantëve të parregullt në Europë.

Sipas Raportit të Agjencisë Evropiane të Ruajtjes së Kufijve, Frontex, publikuar të premten mbi 30700 migrantë janë evidentuar në vendet e Ballkanit Perëndimo, përfshirë Shqipërinë, në synimin për të kaluar drejt kufijve europianë.

Sipas Frontex-it të dhënat flasin për një rënie me 25% në krahasim me të njëjtën periudhë të vitit të kaluar.

Këtë vit, Mesdheu Qendror mbetet rruga më aktive e migrantëve të parregullt ku janë evidentuar më shumë se 50300 raste nga janari në maj. Kjo rrugë përbënte gati gjysmën e hyrjeve të parregullta në Bashkimin Evropian në vitin 2023.

Mbërritjet e migrantëve të parregullt në rrugën e Mesdheut Qendror çuan një rritje prej 12% të të gjitha hyrjeve në Bashkimin Evropian , pasi mbërritjet në të gjitha rrugët e tjera migratore shënuan rënie që varionte nga 6% në Mesdheun Perëndimor deri në 47% në rrugën e Afrikës Perëndimore.

“Rënia në këto rrugë kalimi të migrantëve të parregullt lidhej kryesisht me periudha të gjata kushtesh të këqija atmosferike, gjë që i bënte edhe më të rrezikshme udhëtimet me varkat e palundrueshme. Megjithatë, presioni migrator në rajon mbetet i lartë dhe mund të presim një rritje të aktivitetit të kontrabandistëve në rajon në muajt në vijim “, vlerëson raporti.

Frontex-i tha se më shumë se 2700 oficerë të trupave këmbësore dhe staf janë të përfshirë në operacione të ndryshme që mbështesin shtetet anëtare dhe vendet fqinje në mbrojtjen e kufijve të jashtëm të Bashkimit Europian dhe luftimin e krimit.

Siaps Frontex-it në pesë muajt e parë të vitit, numri i kalimeve të parregullta në kufijtë e jashtëm të BE-së arriti në 102,000, 12% më shumë se një vit më parë, sipas përllogaritjeve paraprake.

Mesdheu Qendror mbetet rruga kryesore e migrimit në Bashkimin Evropian ku në pesë muajt e parë të ketij viti, numri i evidentimeve është më shumë se dyfishuar (160%) krahasuar me të njëjtën periudhë të vitit 2022 dhe është numri më i lartë i migrantëve të parregullt të regjistruar që nga viti 2017.

Të paktën 79 persona humbën jetën dhe më shumë se 104 u shpëtuan pasi një anije e mbushur me emigrantë, u fundos në brigjet e Greqisë jugore.

Qeveria greke tha se ngjarja përbënte një nga tragjeditë më të rënda me emigrantë në Greqi dhe shpalli tre ditë zie.

Anija u fundos rreth 80 km në jug-perëndim të Pylos, ndërkohë që sipas rojës bregdetare greke ekuipazhi i anijes së tejmbushur me emigrantë kishte refuzuar ndihmën./VOA

Jens Stoltenberg pritet t’i kërkohet të qëndrojë si sekretar i përgjithshëm i NATO-s edhe për një vit, raporton reuters, duke cituar burime të paidentifikuara, pasi aleanca ushtarake nuk po arrin t’i bie dakord për pasardhësin e norvegjezit përpara një samiti në mes të korrikut në Lituani.

Stoltenberg, një norvegjez që kaloi nëntë vjet në këtë post dhe do të largohet në fund të shtatorit, ka mbështetje të gjerë në aleancë dhe vazhdon të jetë një udhëheqës efektiv, tha një burim për Reuters në kushte anonimiteti.

“Administrata (Biden) po e konsideron mundësinë që Stoltenbergut t’i zgjatet mandati edhe për një vit”, tha zyrtari amerikan, i cili gjithashtu foli në kushte anonimiteti. “Nuk duket se ka një konsensus brenda aleancës tani për zëvendësimin e tij”.

Perspektiva që Stoltenberg t’i kërkohet të zgjasë mandatin për herë të katërt është rritur me afrimin e samitit të Vilnius, me aleatët që kanë frikë nga një shfaqje e përçarjes ndërsa NATO vazhdon t’i përgjigjet luftës së Rusisë në Ukrainë.

Kushdo që është në atë rol përballet me sfidat e dyfishta të mbajtjes së aleatëve së bashku në mbështetje të Ukrainës, ndërkohë që ruhet kundër çdo përshkallëzimi që do të tërhiqte NATO-n drejtpërdrejt në luftë me Rusinë.

Sekretari britanik i Mbrojtjes, Ben Wallace tha javën e kaluar se i gatshëm ta pasojë kreun aktual të aleancës më të fuqishme ushtarake në botë.

Me disa qeveri që shtyjnë për sekretaren e parë të përgjithshme femër të NATO-s, kryeministrja daneze, Mette Frederiksen po shfaqet si një pretendente serioze.

Frederiksen u takua me presidentin e SHBA-së, Joe Biden në Uashington në fillim të këtij muaji, përpara se Stoltenberg të vizitonte Shtëpinë e Bardhë këtë javë për bisedime me liderin amerikan.

Zyrtarët amerikanë besojnë se ka një numër kandidatësh të ndryshëm dhe se Biden ka një opinion të lartë për të gjithë ata, përfshirë kryeministrin danez, tha burimi. Biden beson se Stoltenberg ka bërë një punë të shkëlqyer në një kohë sfiduese dhe shumë aleatë të tjerë ndajnë këtë pikëpamje, shtoi burimi.

Përveç qendrës së Podujevës edhe disa fshatra të kësaj komune u bënë me lumë.

Uji në rrugët e fshatit Llugë arriti disa centimetra lartësi, saqë pamundësohej qarkullimi.

Të shqetësuar nga përmbytjet ishin banorët të cilëve uji iu shkoi deri në prag të shtëpive, duke dëmtuar krejt çfarë patën në oborr.

Përmbytjeve nuk iu shpëtoi as Daut Zeneli nga Sibovci. Pavarësisht se u përpoq për të gjetur zgjidhje, uji hyri në bodrum.

Për të parë gjendjen në terren doli drejtori për Shërbime Publike i kësaj komune. Sipas tij, përmbytjet ndodhën për shkak të rritjes së nivelit të ujit të lumit Dumnica.

“Lumi Dumnica ka pasë një rritje shumë të madhe, për shkak të reshjeve dhe gjithë fshatrat që kanë përshkuar përgjatë këtij lumi, janë pothuajse në këtë gjendje…” , drejtori i Shërbimeve Publike në Komunën e Podujevës, Bahri Selimi.

Derisa sa thotë se mbrëmë ndihmuan në evakuimin e 6 familjeve, ai shtoi se materialisht është e pamundur t’u dalin në ndihmë qytetarëve.

Tash e disa ditë, si pasojë e reshjeve të vazhdueshme të shiut shumë fshatra të Kosovës janë përmbytur, ndërkaq shi, por me intensitet me të ulët, do të ketë edhe ditët në vazhdim. /atvlive.tv

Edicionin Qendror të lajmeve në ATV e gjeni në videon më poshtë: