ATV

Category: Lajme

  • Aksidenti fatal në Bllacë, 48 orë paraburgim për të dyshuarin që shkaktoi aksidentin

    Aksidenti fatal në Bllacë, 48 orë paraburgim për të dyshuarin që shkaktoi aksidentin

    Prokurori publik nga Prokuroria Themelore Publike Shkup sot ka vazhduar këqyrjen e vendit të aksidentit të rëndë trafiku që ndodhi dje në rrugën Shkup-Bllacë.

    Pas nxjerrjes së veturës BMW me targa të Kosovës dhe tre trupave të pasagjerëve të ndjerë nga ujërat e lumit Lepenc, do të urdhërohet autopsi, ndërsa prokurori publik do të koordinojë të gjitha veprimet për sigurimin e provave për zbardhjen e ngjarjes.

    Deri në zbardhjen e plotë të të gjitha rrethanave dhe përcaktimin e shkakut të aksidentit në komunikacion, prokurori publik sonte në Gjykatën Themelore Penale të Shkupit ka dorëzuar propozim për caktimin e masës së paraburgimit në kohëzgjatje prej 48 orësh për personin që është paraburgosur pas mbrëmjes së aksidentit.

    Bëhet fjalë për një 64-vjeçar banues të Shkupit i cili drejtonte veturën “Volkswagen Touran” me targa të Shkupit dhe i cili në momentin kritik ka parakaluar kolonën e automjeteve në të cilën ndodhej edhe vetura kosovare.

    Propozimi për caktimin e paraburgimit afatshkurtër është dorëzuar për shkak se ekzistojnë rrethana që tregojnë rrezik për arratisje.

    Lidhur me aksidentin dhe humbjen e jetës së tre qytetarëve të Kosovës, ka reaguar edhe kryetari i Partisë Demokratike të Kosovës, Memli Krasniqi.

    “Lajmi për humbjen e tre anëtarëve të familjes Pacolli në aksidentin e ndodhur mbrëmë afër Shkupit, na ka mërzitur shumë të gjithëve. Në këto momente të rënda, u shpreh ngushëllimet më të thella familjeve Pacolli dhe Visoka, posaçërisht Shkëlqimit, i cili pati fatin t’i shpëtojë kësaj tragjedie, në të cilën humbi prindërit dhe vëllaun e tij. Mirënjohje dhe respekt të gjitha organeve, kosovare dhe maqedonase, të cilat u angazhuan pandalur për gjetjen dhe nxjerrjen e viktimave nga lumi Lepenc”, ka shkruar ai në Facebook.

  • Vazhdon edhe sot gjykimi ndaj ish-krerëve të UÇK-së

    Vazhdon edhe sot gjykimi ndaj ish-krerëve të UÇK-së

    Dhomat e Specializuara kanë bërë të ditur se gjykimi ndaj ish-krerëve të Ushtrisë Çlirimtare të Kosovës, Hashim Thaçi, Jakup Krasniqi, Kadri Veseli dhe Rexhep Selimi do të vazhdojë edhe sot.

    Në faqen zyrtare të DHSK-së bëhet e ditur se gjykimi do të nisë nga ora 09:00.

    Ndryshe ky proces gjyqësor nisi dy vjet e gjysmë më vonë, pas mbajtjes në paraburgim në Hagë, të katër krerëve të UÇK-së, Hashim Thaçit, Kadri Veselit, Rexhep Selimit dhe Jakup Krasniqit.

    Aktakuza e ZPS-së, e ngritur më 30 shtator të vitit 2022, i ngarkon Thaçin, Krasniqin, Veselin e Selimin me akuzat për ndërmarrje të përbashkët kriminele, vepër kjo që, sipas prokurorisë, e kishte “qëllimin e përbashkët për të siguruar dhe ushtruar kontroll mbi të gjithë Kosovën, nëpërmjet metodave që përfshinin frikësimin, keqtrajtimin, ushtrimin e dhunës dhe eliminimin e paligjshëm të atyre që konsideroheshin si kundërshtarë”, në periudhën midis marsit të vitit 1998 e shtatorit të vitit 1999, në vende të ndryshme të Kosovës.

  • Arrestohet personi që sulmoi ekipin e RTK-së

    Arrestohet personi që sulmoi ekipin e RTK-së

    Është arrestuar personi që dyshohet se e ka sulmuar kameramanin e RTK-së, Bardh Bekteshi, njoftoi Policia e Kosovës.

    “Sot, në orët e hershme të mëngjesit është arrestuar i dyshuari i radhës mashkull serb U.V., me vendbanim në një fshat të komunës së Leposaviqit, i dyshuar për përfshirje në një rast sulm ndaj mediave/gazetarëve. Arrestimi i tij dhe shoqërimi në stacion policor është kryer si rezultat i hetimeve intensive dhe i sigurimit të dëshmive, se i njëjti është përfshirë në sulm ndaj mediave/gazetarëve me datë 16 qershor 2023. Të gjitha veprimet e mëtejme do të ndërmerren në bashkëpunim dhe koordinim me organet e drejtësisë”, thuhet në komunikatën e Policisë.

    Bekteshi u sulmua të premten në Leposaviq nga persona të maskuar.

    Të premten pati tensione pas vizitës së ministrit të Administrimit të Pushtetit Lokal, Elbert Krasniqi, te kryetari i Leposaviqit, Lulzim Hetemi.

    Pas këtij sulmi, ka reaguar Asociacioni i Gazetarëve të Kosovës, duke kërkuar me urgjencë që t’u ofrohet siguri gazetarëve që po raportojnë nga atje.

    Rasti i sulmit ndaj kameramanit nuk ishte i vetmi, pasi pati edhe gazetarë të tjerë që u sulmuan nga persona të maskuar.

     

  • Rafuna: Kriza në veri barrë për shtetin, askush s’fol për ekonomi, shëndetësi e sundim të ligjit

    Rafuna: Kriza në veri barrë për shtetin, askush s’fol për ekonomi, shëndetësi e sundim të ligjit

    Kryetari i Odës Ekonomike të Kosovës (OEK), Lulzim Rafuna, konsideron se ndalimi i përkohshëm i importit të mallrave nga Republika e Serbisë, ka dëmtuar ekonominë vendëse, pasi sipas tij bizneset nuk kanë qenë të informuara më herët.

    Rafuna thotë se ndalimi i importit nga ky shtet, ka pasur kosto shtesë te bizneset, pasi malli është paguar e nuk është lejuar të hyjë brenda territorit të Kosovës.

    Ai ka adresuar kritika në drejtim të Qeverisë për mungesë dialogu me sektorin privat.

    “Bizneset nuk kanë qenë të informuar dhe kjo është një kërkesë që ka dalë nga Oda Ekonomike e Kosovës që para se të merret një vendim i tillë, të konsultohen bizneset për shkak se neve është duke na munguar një dialog publiko-privat me Qeverinë e Kosovës që nga fillimi. Së paku të njoftohemi paraprakisht, të kemi mundësinë që të përgatitemi për të mirën e biznesit por edhe për të mirën e qytetarëve”, thotë Rafuna për EO.

    “Kjo ka ndikuar në kosto shtesë për biznesin, për arsye se ka ndodh që mauna ka arrit 10 minuta pasi që është vendosur masa dhe nuk lejohet, për kundër që mauna është me tabela të Kosovës e malli me prejardhje të Serbisë, kështu që ka ndikuar për shkak se malli është paguar, nuk pranohet të kthehet mbrapa e me një far forme ka mbetur në kufi”, thotë tutje ai.

    E vendosja e këtyre masave, sipas Rafunës nuk është pasqyrë e mirë për Kosovën, pasi sipas tij i jep mesazh të keq për investitorët e huaj potencial.

    “Ne kemi shumë nevojë dhe jemi të etur për të pasur investime kualitative të huaja por edhe me i rrit investimet vendore. Ne duhet me fillu prej investitorëve tonë që i kemi brenda e me kalu te investitorë të huaj por pasqyra, dhuna e ushtruar nda ushtarëve të KFOR-it nuk janë pasqyrë e mirë për me ardh një investitorë me investu në Kosovë. Vendosja e këtyre masave që e prek drejtpërdrejt biznesin, nuk është një mesazh i mirë për me ardh me investua në Kosovë”, thotë ai.

    Teksa ka folur për dialogun Kosovë-Serbi, e krizat e njëpasnjëshme në veri të vendit, Rafuna e quan barrë të rëndë për shtetin. Thotë se Kosova për kaq vite nuk flet askush për zhvillim ekonomik.

    Ai ka kërkuar që sa më shpejt të mbyllen këto tema, në mënyrë që shteti të koncentrohet në zhvillim ekonomik.

    “Nuk është imazh i mirë, ne duhet me pas sa më shumë imazhe të mira, duhet me pas sa më shumë storie të suksesit të Kosovës. Ne temat e hapura që i kemi me Serbinë duhet me i mbyll sa më shpejt që është e mundur, duhet me u liru prej kësaj barre e me u koncentru në zhvillim ekonomik të vendit. Kjo tema e hapur, ky dialogu me Serbinë është duke na mbajt peng, jemi duke humbur kohë dhe që dy vite askush nuk fol për ekonomi, për shëndetësi e për sundim të ligjit. Jemi koncentruar në dialog, kështu që ky status që është Kosova, më së paku i konvenon Kosovës. Duhet sa më shpejt me u mbyll e me pas një zhvillim sa më të madh ekonomik, për t’u anëtarësuar në të gjitha organizatat ndërkombëtare që i jep frymë e lehtësim biznesit tonë për me depërtua jashtë”.

  • Lajçak do të niset për ShBA për të diskutuar për veriun

    Lajçak do të niset për ShBA për të diskutuar për veriun

    Emisari i Bashkimit Evropian për dialogun, Miroslav Lajçak, ka thënë se do të shkojë në Shtetet e Bashkuara të Amerikës për vizitë për të biseduar për zhvillimet e javëve të fundit në veri të Kosovës.

    Ai, me anë të një postimi në rrjetin social Facebook, ka deklaruar se kjo vizitë e tij vjen mes ftesë të Washingtonit zyrtar.

    “Më pas do të shkoj në Washington me ftesë të partnerëve të mi amerikanë. Ne do të kemi diskutime intensive për rrugën para dhe hapat e ardhshëm të menjëhershëm”, ka thënë Lajçak.

  • Kidnapimi nga forcat serbe, Kamberi thotë se dyshohet se u ushtrua dhunë ndaj policëve

    Kidnapimi nga forcat serbe, Kamberi thotë se dyshohet se u ushtrua dhunë ndaj policëve

    Deputeti shqiptar në Serbi, Shaip Kamberi, ka thënë në Euronews të dielën se ndaj tre policëve të Kosovës të rrëmbyer nga forcat serbe, dyshohet se është ushtruar dhunë.

    Kjo, sipas tij pasi duket që Serbia po kërkon kohë për rikuperim të policëve që të vijnë në gjendje më të mirë.

    “Ndaj tre policëve dyshohet se është ushtruar dhunë, pasi duket që Serbia po kërkon kohë për rikuperim të policëve që të vijnë në gjendje më të mirë. Kjo nga për përvoja që kam me forcat speciale serbe në Preshevë kur arrestonin të rinjtë. Fakti që DASH kërkon lirimin e tyre pa kushte do të thotë se ka të dhënat që i ka KFOR por për arsye politike po mbahet e heshtur e vërteta”, ka deklaruar ai.

    Policët kosovarë u kidnapuan nga trupat serbe të mërkurën (14 qershor).

  • Dodik: Unë e mbështes Vuçiqin në luftën për mbijetesën e serbëve në Kosovë

    Dodik: Unë e mbështes Vuçiqin në luftën për mbijetesën e serbëve në Kosovë

    Presidenti i Republikës Srpska Milorad Dodik ka mbështetur sot presidentin e Serbisë Aleksandar Vuçiq në luftën e tij për mbijetesën e popullit serb në Kosovë.

    Ai tha se ata që e sulmojnë atë vetëm sa do të rrisin popullaritetin e tij dhe mbështetjen që gëzon në mesin e popullit të Serbisë.

    “Në këtë moment shumë të rëndësishëm për Serbinë dhe serbët, veçanërisht në Kosovë është shumë e rëndësishme që të mblidhemi rreth negociatorëve tanë kryesorë dhe të mbështesim absolutisht presidentin Aleksandar Vuçiq në këtë drejtim, për të cilin jam absolutisht i sigurt se po lufton sinqerisht’’, tha Dodik.

    Ai vlerësoi se sulmet ndaj Vuçiqit do t’i bashkojnë edhe më tej njerëzit në luftën për mbijetesën e popullit serb në Kosovë dhe Republikën Srpska dhe do të mbledhin rreth të gjitha ideve të përbashkëta.

  • Kusari-Lila: Mediat e lira janë provokim për Vuçiqin

    Kusari-Lila: Mediat e lira janë provokim për Vuçiqin

    Shefja e Grupit Parlamentar të Lëvizjes Vetëvendosje, Mimoza Kusari-Lila, i ka reaguar presidentit serb, Aleksandar Vuçiq, i cili duke komentuar sulmet ndaj gazetarëve të Kosovës në veri ka thënë se ata “po dërgohen atje për të provokuar”.

    Teksa e ka quajtur president despotik, Kusari-Lila ka thënë se Vuçiqit i pengojnë mediat e lira dhe të hapura.

    Ndaj siç ka thënë ajo, për t’i luftuar mediat dhe gazetarët, Vuçiqi përdor njerëz të maskuar e të armatosur që janë në autoritetin e tij.

    “Presidenti despotik i Serbisë, Aleksandar Vuçiq pohoi se gazetarët e Kosovës në veri dërgohen për të provokuar. E vërteta është se media e lirë dhe e hapur është një provokim për Vuçiqin, kështu që për t’i luftuar ata, ai përdor njerëz të maskuar dhe të armatosur. Gjithashtu, e vërteta është se njerëzit e maskuar janë nën autoritetin e tij”, ka shkruar shefja e deputetëve të LVV-së në Twitter.

  • Shtatë orë e gjysmë bisedime, për çfarë u dakordua Blinken me homologun kinez?

    Shtatë orë e gjysmë bisedime, për çfarë u dakordua Blinken me homologun kinez?

    Sekretari amerikan i Shtetit Antony Blinken dhe ministri i jashtëm kinez Qin Gang zhvilluan bisedime “të sinqerta” dhe “të drejtpërdrejta” në Pekin të dielën, tha Departamenti i Shtetit, ndërsa Shtetet e Bashkuara dhe Kina kërkojnë të stabilizojnë marrëdhëniet dypalëshe mes tensioneve në rritje.

    Gjatë takimit shtatë orë e gjysmë në vilën qeveritare Diaoyutai, në Pekin, zoti Qin pranoi ftesën për të vizituar Shtetet e Bashkuara.

    Po ashtu u ra dakord për më shumë vizita të përfaqësuesve të dy vendeve.

    Përveç kësaj, të dyja palët do të vazhdojnë të punojnë për disa çështje “në nivel grupi pune”, tha një zyrtar i lartë i Departamentit të Shtetit.

    Pas takimeve kokë më kokë të zotit Blinken me zotin Qin, ata patën një darkë pune të dielën në vilën qeveritare Diaoyutai.

    “Sekretari e bëri të qartë se Shtetet e Bashkuara gjithmonë do të mbrojnë interesat dhe vlerat e popullit amerikan dhe do të punojnë me aleatët dhe partnerët për të çuar përpara vizionin tonë për një botë që është e lirë, e hapur dhe që mbështet zbatimin e rregullave të pranuara ndërkombëtarisht”, tha zëdhënësi i Departamentit të Shtetit, Matthew Miller në një deklaratë.

    Sekretari amerikan i Shtetit Antony Blinken është kryediplomati i parë amerikan që viziton Kinën që nga viti 2018, për takime me ministrin e jashtëm kinez Qin Gang, kryediplomatin kinez Wang Yi, dhe ndoshta edhe me Presidentin kinez Xi Jinping.

    Zyrtarë amerikanë, duke folur me gazetarët amerikanë pas takimeve të së dielës, nuk pranuan të thoshin nëse përfundimisht do të kishte takim të zotit Blinken me presidentin Xi apo se kur pritet të vijë në Uashington ministri Qin.

    Në shkurt, zoti Blinken anuloi udhëtimin e tij në Pekin pasi një balonë spiune kineze hyri në hapësirën ajrore të SHBA-së.

    Ndihmës ministri i jashtëm kinez, i cili mori pjesë në takim, ndërsa postoi në Twitter një foto të takimit të dy zyrtarëve shkruajti se shpresonte që ky takim t’i rikthente marrëdhëniet mes dy vendeve në pikën që ranë dakord dy presidentët kur u takuan në Bali.

    Zëdhënësi i DASH tha se “Sekretari amerikan nënvizoi rëndësinë e diplomacisë për mbajtjen hapur të kanaleve të komunikimit për të reduktuar rrezikun për keqkuptime dhe gjykime të gabuara”.

    Sipas zyrtarëve të lartë amerikanë, çështjet kryesore në agjendë gjatë takimeve të zotit Blinken në Pekin të dielën dhe të hënën përfshijnë sigurinë rajonale, luftën ndaj përdorimit dhe trafikut të drogës, ndryshimet klimatike, stabilitetin makroekonomik global, amerikanët e arrestuar në mënyrë të paligjshme në Kinë, si dhe shkëmbimet midis popullit amerikan dhe kinez. /VOA

  • Presidentja Osmani shpreh ngushëllime për humbjen e jetës së tre anëtarëve të familjeve Pacolli e Visoka

    Presidentja Osmani shpreh ngushëllime për humbjen e jetës së tre anëtarëve të familjeve Pacolli e Visoka

    Presidentja e Republikës së Kosovës, Vjosa Osmani, pas nxjerrjes nga lumi Lepenc të tre trupave të pajetë, ka ngushëlluar familjet Pacolli e Visoka, të cilat pësuan nga aksidenti tragjik.

    “Me dhimbje të thellë pranova lajmin për vdekjen tragjike të tre anëtarëve të familjeve tuaja. Në këto çaste të rënda për familjet tuaja, bashkëndjej me ju dhe ju inkurajoj që të gjeni forcë për përballimin e dhimbjes. I përhershëm qoftë kujtimi për ta!”, thuhet në mesazhin ngushëllues të Presidentes Osmani.

    Presidentja Osmani, gjithashtu i ka uruar shërim të shpejtë, Shkëlqimit, të vetmit të mbijetuar nga ky aksident dhe ka falënderuar ekipet e Forcës së Sigurisë së Kosovës, Policisë së Kosovës, Shoqatës së Kosovës për Kërkim-Shpëtim, si dhe ekipin e kërkim-shpëtimit nga Maqedonia e Veriut për angazhimin e tyre.