Category: Lajme

Analisti Bleron Baraliu ka thënë se shefja e Grupit Parlamentar të Lëvizjes Vetëvendosje, Mimoza Kusari Lila do të duhej të jepte dorëheqje pas publikimit të bisedave me Sllavko Simiqin e Listës Serbe.

Ai në një postim në Facebook ka thënë se kjo është dashur të ndodhte një minutë pas daljes së incizimit në publik.

“Në secilën demokraci normale Mimoza Kusari do të duhej të jepte dorëheqje një orë pas takimit të tillë me Sllavkon, e nëse jo atëherë, atëherë një minut pas daljes së inçizimit në publik. Kaq e thjeshtë është kjo. Nuk ka rëndësi që ‘gazetari’ ‘zbulues’ po e interpreton e keqinterpretpn secilën germë e fjalë të inçizimit, as kur po mundohet me na bindë se nuk e ka marrë inçizimin direkt prej Sllavkos (gati i mbet n’fyt diçka tuj ‘qartësu’ këtë). Në inçizim ka mjaft çaste të hipokrizisë e marrëzisë që nuk i përkasin një deputeti, aq më pak një udhëheqëse të grupit më të madh parlamentar në Kuvendin e Kosovës”, ka thënë Baraliu.

Avokati kosovar, Besnik Berisha, është shoqëruar në stacion policor mëngjesin e sotëm.

Berisha aktualisht është duke dhënë intervistë në Departamentin e Krimeve të Rënda, mirëpo nuk dihet ende arsyeja e shoqërimit të tij në Polici, raporton Sinjali.

Krejt çka dihet deri më tani është se e gjithë kjo lidhet me punën e tij si avokat dhe ligjshmëria e veprimeve do të shqyrtohet nga Gjykata.

Në Dhomat e Specializuara të Kosovës (DhSK), në Hagë, në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit, dëshmitari Rrustem Mustafa, ish-komandant i Ushtrisë Çlirimtare të Kosovës (UÇK) në Zonën Operative të Llapit, po vazhdon dëshminë e tij.

Dëshmitari Mustafa është dëshmitari i 13-të me radhë në këtë çështje gjyqësore, raporton “Betimi për Drejtësi”.

Seanca e sotme është dita e tretë me radhë që Mustafa po përgjigjet në pyetjet e Zyrës së Prokurorit të Specializuar, konkretisht prokurores speciale Clare Lawson.

Mustafa ka filluar dëshminë e tij në seancën e së martës dhe e vazhdoi edhe të mërkurën.

Seanca është duke vazhduar në sesion publik.

Ndërkaq, të pranishëm në sallën e gjyqit gjatë kësaj seance janë të gjithë të akuzuarit.

Ndryshe, gjatë muajit prill ka filluar gjykimi derisa në seancën e 3 prillit, Zyra e Prokurorit të Specializuar (ZPS) dhe mbrojtësi i viktimave kanë paraqitur deklarimet hyrëse dhe pas leximit të aktakuzës së ndryshuar nga ana e ZPS-së, ish-presidenti Hashim Thaçi, ish-kryeparlamentarët Kadri Veseli dhe Jakup Krasniqi, si dhe ish-deputeti Rexhep Selimi, u deklaruan të pafajshëm për veprat penale që iu vihen barrë.

Më 4 prill mbrojtja e Thaçit, Veselit dhe Selimit kanë dhënë fjalën hyrëse derisa më 5 prill mbrojtja e Krasniqit ka dhënë fjalën hyrëse.

Më 11 prill ka filluar paraqitja e provave të Prokurorisë ku dëshmitarja e parë e mbrojtur e Prokurorisë, ka dhënë dëshminë e saj më 11 prill, 12 prill, 13 prill dhe më 17 prill.

Më 17 prill ka filluar dëgjimi i dëshmitarit të dytë, po ashtu i mbrojtur, i cili ka vazhduar dhënien e dëshmisë edhe më 18 prill, 19 prill dhe 20 prill, ku ka përfunduar dhënien e dëshmisë edhe dëshmitari i tretë, kurse më 10 maj ka filluar dhënien e dëshmisë dëshmitari i katërt, dëshmia e të cilit përfundoi më 17 maj.

Tutje, dëshmitari i pestë ka filluar dëshminë më 17 maj dhe e përfundoi më 22 maj, ku filloi dëshminë dëshmitari i gjashtë i cili përfundoi dëshminë më 23 maj, në të njëjtën ditë me dëshmitarin e shtatë.

Kurse, më 12 qershor ka filluar dëshminë e tij dëshmitari i tetë, i cili përfundoi dëshminë e tij më 14 qershor, ndërkaq me 15 qershor ka përfunduar dëshmia e dëshmitarit i nëntë.

Më 19 qershor ka përfunduar dëshminë dëshmitari i dhjetë, në ditën ku ka filluar dëshminë dëshmitari i njëmbëdhjetë i cili e ka përfunduar dëshminë e tij më 20 qershor. E më 10 korrik ka filluar dëshminë dëshmitari i dymbëdhjetë, i cili ka përfunduar dëshminë më 11 korrik, në seancën ku ka filluar dëshminë Rrustem Mustafa, ish-komandat i zonës operative të Llapit.

Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020./BetimipërDrejtësi

“Pas katër vjetëve të persekutimit politik dhe juridik dhe maltretimeve të anëtarit të Kryesisë së Listës Serbe, Ivan Todosijeviq dhe familjes së tij, Gjykata Supreme e Kosovës më në fund konfirmoi atë që të gjithë e dimë dhe atë që pretendojmë që nga viti 2019, kur filloi kjo procedurë monstruoze, se Ivani është i pafajshëm, dhe se nuk ka kryer asnjë vepër penale, dhe se si çdo njeri i lirë, ka të drejtën e mendimit dhe qëndrimit të tij”, ka kumtuar Lista Serbe pas vendimit lirues.

“Vendimi i sotëm konfirmoi të vërtetën që të gjithë e dinim që në fillim, por nuk duhet harruar se kjo e vërtetë u prit për katër vjet, ndërsa Ivani dhe familja e tij, si dhe mbarë populli serb, ishin të shqetësuar sepse ishte vendosur rregulli që i akuzuari serb është gjithmonë i detyruar të dëshmojë pafajësinë e tij”, pretendohet në deklaratë.

Siç pretendohet në kumtesë, “problemet e persekutimit të pabazë nuk kanë mbaruar”, sepse, theksojnë ata, ende ka serbë “të pafajshëm” nëpër burgjet e Kosovës.

“Prandaj u bëjmë thirrje përfaqësuesve ndërkombëtarë që të bëjnë presion mbi Prishtinën dhe të lirojnë serbët e pafajshëm, të gjithë ata dhe familjet e tyre nuk e kanë problem të vazhdojnë procedurat, sepse duhet hequr njolla nga emrat e tyre, por mbajtja ata në paraburgim me vite pa prova në paraburgim është një dënim në vetvete pa aktgjykim”, përfundon deklarata.

Ministrja e Jashtme e Shqipërisë, Olta Xhaçka, ka thënë se në Samitin e NATO-s që u mbajt në Vilnius të Lituanisë, u bisedua për rolin vendimtar të BE-së dhe NATO-s për sigurinë dhe stabilitetin në Kosovë, dhe shtetet tjera ballkanike.

Ajo, me anë të një postimi në rrjetin social Facebook, ka theksuar se e kanë konfirmuar edhe njëherë mbështetjen për Ukrainën në luftën e saj me Rusinë.

“Rikonfirmuam angazhimin tonë për të rritur më tej mbështetjen politike dhe praktike për Ukrainën ndërsa ajo vazhdon të mbrojë pavarësinë, sovranitetin dhe integritetin territorial të saj. Vendosëm të themelojmë Këshillin NATO-Ukrainë, një organ i ri i përbashkët ku Aleatët dhe Ukraina do të ulen si anëtarë të barabartë për të çuar përpara dialogun politik, angazhimin, bashkëpunimin dhe aspiratat e Ukrainës për anëtarësim në NATO”.

“Me Ministrat e Jashtëm të NATO-s theksuam rolin vendimtar të bashkëpunimit mes Bashkimit Evropian dhe NATO për sigurinë dhe stabilitetin e Ballkanit Perëndimor, në veçanti për Kosovën dhe Bosnje Hercegovinën.  Gjithashtu theksova mbështetjen e palëkundur të Shqipërisë për partnerët tanë si Bosnja Hercegovina, Gjeorgjia dhe Moldavia, të prekur nga situata aktuale e sigurisë”, ka shkruar Xhaçka në Facebook.

Çmimet e konsumit në Kosovë janë ngritur për 2,8%. Kështu thuhet në raportin e fundit të Agjencisë së Statistikave të Kosovës që publikuan Indeksin e Harmonizuar të Çmimeve të Konsumit.

Indeksi i tërësishëm i harmonizuar i çmimeve të konsumit është më i lartë në një mesatare prej 2,8% në muajin qershor 2023, krahasuar me muajin qershor 2022.

Ndërsa, inflacioni mujor ishte 0,0% në muajin qershor 2023.

Sipas ASK-së, çmimi i perimeve është ngritur për 22,5%,, mallrat shtëpiake jo të qëndrueshme për 17,8%; energjia elektrike 15,0%; pemët 11,5%; qumështi, djathi dhe vezët 10,8%; shërbimet për transport 10,0%; buka dhe drithërat 9,2%; mishi 7,7%; mobiliet dhe orenditë 5,7%; shërbimet hoteliere 5,0%; dhe kafja, çaji dhe kakao (4,0%)

Për një ditë në Kosovë janë raportuar pesë raste të dhunës në familje.

Në Gjilan është arrestuar një person nën dyshimin për sulm fizik ndaj gruas. Ai është dërguar në mbajtje me vendim të prokurorit.

“Gjilan 08.07.2023 – 18:00. Është arrestuar i dyshuari mashkull kosovar nën dyshimin se pas një mosmarrëveshje ka sulmuar fizikisht viktimën femër kosovare me ç’rast i ka shkaktuar lëndime trupore. Viktima  nuk ka pranuar tretman mjekësor dhe sipas saj i dyshuari vazhdimisht i shkakton dhunë fizike dhe psikike. Me  vendim të prokurorit i dyshuari pas intervistimit është dërguar në mbajtje”, thuhet në raportin 24 orësh të PK-së.

Ndërkaq, në Suharekë një grua e ka lajmëruar burrin e saj që jeton jashtë vendit. Se po ushtron vazhdimisht dhunë psikike ndaj saj.

“Suharekë 12.07.2023 – 17:40. Viktima femër kosovare ka raportuar se bashkëshorti i saj, i dyshuari mashkull  kosovar, i cili jeton jashtë shtetit, në vazhdimësi ka ushtruar dhunë psikike ndaj saj. I dyshuari me datë 12.07.2023 e ka telefonuar viktimën dhe ka kërkuar nga ajo që të dalë nga shtëpia dhe po ashtu e ka kanosur. Viktima së bashku me dy fëmijët e saj ka shkuar tek prindërit e saj. Në lidhje me rastin është konsultuar prokurori i shtetit, rasti vazhdon të hetohet”, thuhet në njoftimin e policisë.

Ndërsa në Prizren është arrestuar një i mitur për dhunë ndaj nënës dhe dy motrave të tij.

“Prizren  12.07.2023 – 18:00. Është arrestuar i dyshuari i mitur mashkull  kosovar për shkak se kishte ushtruar dhunë ndaj nënës  dhe dy motrave të tij, viktimave femra kosovare. Me  vendim të prokurorit i dyshuari pas intervistimit është dërguar në mbajtje”, njofton tutje policia.

E në Gjakovë është arrestuar një person pasi i kanosi dhe tentoi t’i sulmojë fizikisht vëllain dhe kunatën e tij.

“Gjakovë 12.07.2023 – 14:00. Është arrestuar i dyshuari mashkull  kosovar pasi i njëjti kishte kanosur dhe tentuar që t’i sulmojë fizikisht vëllain dhe kunatën e tij. Me vendim të prokurorit i dyshuari është dërguar në mbajtje”, thuhet në raportin e policisë.

Ndërsa në Skenderaj është arrestuar një persin nën dyshimin se ka kanosur gruan dhe djalin e tij.

“Skenderaj 12.07.2023 – 17:00. Është arrestuar i dyshuari mashkull kosovar nën dyshimin se pas një mosmarrëveshje ka kanosur bashkëshorten dhe djalin e tij. Në lidhje me rastin është konsultuar prokurori i shtetit i cili ka rekomanduar që pas intervistimit i dyshuari të lirohet dhe rasti të procedohet në procedurë të rregullt”, thuhet tutje në njoftim.

Një aksident trafiku me gjashtë të lënduar ka ndodhur dje në Mitrovicë.

Sipas policisë në këtë aksident kanë qenë të përfshira tri vetura, derisa të lënduarit pas pranimit të tretmanit mjekësore janë liruar.

“Fsh. Shupkovc, Mitrovicë 12.07.2023 – 14:40. Tri vetura civile me drejtues meshkuj  kosovarë janë përfshirë në aksident trafiku në mes veti. Si pasojë e aksidentit lëndime trupore kanë pësuar 4 femra dhe 2 meshkuj kosovarë. Të lënduarit pas pranimit të tretmanit mjekësore janë liruar”, thuhet në njoftimin e policisë.