Category: Lajme

Një helikopter u rrëzua në Siberi të Rusisë më 27 korrik, duke lënë gjashtë persona të vrarë dhe shtatë të tjerë të plagosur, njoftuan zyrtarët rusë të emergjencës.

Helikopteri i llojit Mi-8 në Republikën Altai në Siberinë jugore mori flakë teksa po ateronte dhe u përplas me një linjë elektrike, tha dega e Ministrisë së Emergjencave të Rusisë në Altai. Kjo zyrë publikoi një deklaratë në internet, ku shihej një foto e rrënojave të helikopterit të vënë në zjarr.

Agjencia shtetërore ruse e lajmeve RIA Novosti raportoi, duke cituar rregullatorin e aviacionit civil të vendit, se helikopteri i përkiste një kompanie private dhe po transportonte një grup turistësh.

Ende nuk dihet saktësisht numri i njerëzve që ishin në atë helikopter para se të ndodhte aksidenti.

Sipas RIA Novosti, në bord ndodheshin gjithsej 12 pasagjerë dhe tre anëtarë të ekuipazhit, por Ministria e Emergjencave tha se numri i përgjithshëm në bord ishte 13.

Agjencia e lajmeve AP nuk ka mundur ta verifikojë numrin e pasagjerëve.

Mi-8 është një helikopter me dy motorë, i cili ishte projektuar në vitet 1960. Ai është përdorur gjerësisht në Rusi, ku përplasjet kanë qenë të shpeshta, në vendet fqinje dhe në shumë vende të tjera./REL/

Deputetët e Partisë Demokratike Kosovës e kanë lëshuar sallën e Kuvendit të Kosovës ku po mbahet seanca plenare.

Ata e lëshuan sallën gjatë kohës sa nisi votimi për dy anëtarë të Bordit të RTK-së, përcjell KP.

Në këtë seancë pa pjesëmarrjen në votim të deputetëve të kësaj partie u votuan disa pika të papërfunduara nga seancat e kaluara të Kuvendit të Kosovës.

Në seancën plenare të Kuvendit të Kosovës janë votuar disa pika të papërfunduara nga seancat e kaluara. Por, njëra projekt-rezolutë e propozua nga LDK u hoq nga rendi i ditës, ndërsa ajo e AAK-së nuk mori votat e mjaftueshme, transmeton KP.

E në votimin e pikave që u miratuan nuk mori pjesë Partia Demokratike e Kosovës dhe Aleanca për Ardhmërinë e Kosovës.

Në Kuvendin e Kosovës me 64 vota për, asnjë kundër dhe asnjë abstenim është votuar në lexim të dytë plotësim-ndryshimi i Ligjit për trajtimin e ndërtimeve pa leje. Ky projektligj u përkrah edhe nga LDK.

Kurse, 62 deputetë ia dhanë mbështetjen rekomandimeve lidhur me raportin e auditimit të performancës menaxhimi i projektit “Bashkimi i qytetit të Ferizajt”.

Kuvendi i Kosovës në seancën e sotme plenare ka votuar Hamit Bashollin dhe Selvete Gagicën anëtarë të Bordit Mbikëqyrës të Agjencisë Kosovare për Krahasim dhe Verifikim të Pronës.

Këta dy emra janë propozuara nga Qeveria e Kosovës, dhe në Parlamentin e Kosovës morën 63 vota.

Mandati i këtyre dy anëtarëve është 3 vjeçar.

Ndërsa, Kuvendi nuk e ka votuar Projekt-rezolutën nga interpelanca me ministrin e Financave, Punës dhe Transfereve, Hekuran Murati për çështjen: “Rishikimi i buxhetit të Republikës së Kosovës dhe rritja e pagave në sektorin publik”.

Kjo projekt-rezolutë e propozuar nga Aleanca për Ardhmërinë e Kosovës nuk mori mbështetjen e 58 ligjvënësve të Kosovës që ishin nga mazhoranca, derisa 14 votuan pro, e 4 ishin abstenime.

E shqyrtimi i propozim-rezolutës për shpenzimet e parasë publike për dy vite mandat të Qeverisë së Republikës së Kosovës, e propozuar nga 8 deputetë të Kuvendit të Kosovës është shtyrë për sesionin vjeshtor të Kuvendit të Kosovës.

Aktualisht, në seancë po zhvillohet procesi i përzgjedhjes së dy anëtarëve të Bordit të Radiotelevizionit të Kosovës.

Policia e Shtetit infirmoi se ka ekzekutuar 14 masa sigurie për shtetas të implikuar në veprimtarinë kriminale në fushën e mashtrimeve kompjuterike.

Policia bëri të ditur se janë sekuestruar pajisje të ndryshme kompjuterike, aparate celulare, USB dhe pajisje të tjera për prodhimin e bitcoin, të gjetura gjatë kontrolleve të ushtruara në disa banesa.

Gjatë operacionit janë angazhuar 60 forca Policore të DVP Tiranë, të komisariateve në varësi të saj dhe të DVP Fier.

Në kuadër të procedimit penal nr.121/2021 të Prokurorisë Kundër Korupsionit dhe Krimit të Organizuar, Drejtoria Vendore e Policisë Tiranë është përfshirë në hetime në bazë të autorizimeve të Prokurorisë, ku gjatë këtyre hetimeve janë aplikuar metoda speciale të hetimit.

Nga veprimet hetimore të kryera është bërë i mundur identifikimi i plotë i të gjitha subjekteve të hetimit.

Më konkretisht, më datë 25 tetor 2022 është bërë identifikimi i subjektit dhe pas autorizimit të marrë për lejimin e ushtrimit të kontrolleve të vendit, së bashku me Njësinë “C” të Krimit Kibernetik të Drejtorisë së Përgjithshme të Policisë së Shtetit dhe partnerët e Policisë italiane, është ndërhyrë në subjektin call center, në rrugën “Dritan Hoxha”, ku janë kryer të gjitha veprimet hetimore procedurale.

Në vijimësi të këtij procedimi, pas ekpertimit të pajisjeve elektronike të sekuestruara, ka rezultuar se në këtë veprimtari kriminale janë të implikuar disa shtetas.

Më datë 26.07.2023, nga Seksioni për Hetimin e Krimeve Ekonomiko-Fiananciare, në bashkëpunim me Prokurorinë e Posaçme Kundër Korrupsionit dhe Krimit të Organizuar, në funksion të vendimit nr. 92 të datës 21.07.2023 të Gjykatës së Shkallës së Parë për Korrupsion dhe Krimin e Organizuar, janë ekzekutuar 9 masa sigurie, nga të cilat 5 “Arrest në burg”, dhe 4 “Arrest në shtëpi”.

“Janë ekzekutuar masat e sigurimit personal “Arrest në burg”, për shtetasit Hamit Dobi, Erion Kastrati, Aldo Pasku, Gjin Shelnishta, dhe Mojsi Zuna. Janë ekzekutuar masat e sigurimit personal “Arrest në shtëpi”, për shtetasit Greta Gjoci, Olta Toci, Rezarta Ibrahimi dhe Silvana Veliu.”, bëri të ditur Policia.

Gjithashtu, janë shpallur në kërkim shtetasit B. Ç., O. C., B. GJ., A. M., dhe F. B., shkruan Atsh. Nga verifikimet e kryera ka rezultuar se shtetasi B. Ç., ka dalë jashtë territorit të Republikës së Shqipërisë më datë 23.07.2023 nga Pika e Kalimit Kufitar Kakavijë, ndërsa shtetasja A. M., më datë 27.10.2022, nga Pika e Kalimit Kufitar Rinas.

Sipas Policisë, në kuadër të këtij procedimi janë kontrolluar 12 banesa dhe janë sekuestruar pajisje të ndryshme kompjuterike (telefona, laptopë, USB dhe pajisje për prodhimin e Bitcoin), të cilat kanë kaluar për ekspertim kompjuterik në laboratorin pranë Sektorit të Ekzaminimeve Kompjuterike në Prokurorinë e Posaçme.

Francezja “L’Alsace” zbulon për lexuesit Shqipërinë turistike, ndërsa i kushtoi një artikull bukurive natyrore të vendit dhe monumenteve të trashëgimisë kulturore dhe historike.

Nën titullin ”Shqipëria, perla e panjohur e Ballkanit, “L’Alsace” rendit disa nga vendet më të bukura, duke nisur me Ksamilin.

“Shqipëria befason me bukurinë e plazheve të saj, me rërë të pastër dhe ujë të kristaltë. Mes tyre edhe Ksamili në jug të vendit. Por në fakt, i gjithë bregdeti është plot me vende të shkëlqyera për t’u larë, të cilat nuk kanë përse t’i kenë aspak zili Greqisë fqinje”, shkruhet në artikull.

“Një vend i vogël që ndodhet në veri të Greqisë, Shqipëria shfaqet absolutisht madhështore. Deti i bruztë nuk është kurrë larg maleve apo qendrave kryesore kulturore. Por, kjo ende nuk dihet gjerësisht! Prandaj, është koha e duhur për të zbuluar këtë destinacion origjinal dhe të lirë. Aty ku ndjenja e mikëpritjes ndriçon buzëqeshjet”, vijon artikulli.

Si surprizë tjetër, “L’Alsace” rendit faktin se Shqipëria është një vend malor (70% e sipërfaqes së saj përbëhet nga male). Alpet dinarike në veri të vendit, arrijnë 2700 metra mbi nivelin e detit. Ato janë ende të egra dhe pak të frekuentuara, pavarësisht nga shtigjet që përshkojnë këto peizazhe madhështore. Një domosdoshmëri për amatoret e shtigjeve te pashkelura.

Qyteti i Beratit është i denjë për reputacioni që ka si një thesar historik. Me një kështjellë mesjetare me kulla me bedena. Një lagje historike e ngjitur pas shpatit, ku xhamitë osmane, një katedrale dhe kishat bizantine rrinë pranë e pranë. Pa harruar Muzeun Etnografik dhe Muzeun kombëtar të ikonave.

Shkodra ndodhet në veri të Shqipërisë. Në brigjet e liqenit me të njëjtin emër (më i madhi në Ballkan që shënon kufirin me Malin e Zi. Të tjera bukuri të tij: Kalaja madhështore Rozafa, e cila shpalos një panoramë të gjerë të qytetit dhe maleve. Por, edhe qendra historike me shtëpitë e shekullit të 19-të dhe xhaminë e shkëlqyer të plumbit.

Parku Kombëtar i Thethit është një nga vendet që duhet parë në vend. Me malet e tij krenare, kanionet e tij, ujëvarat e tij, shpellat e tij. Dhe fshatrat e tij tradicionale si ai i Thethit, një thesar i vërtetë arkitekturor. Një rajon mikpritës, edhe pse mjaft i thellë, ku mund të strehoheni te vendasit ose në një kamping.

Një tjetër qytet me rëndësi historike. Gjirokastër. Me një kështjellë të madhe që dominon luginën. Një qytet i vjetër në stilin otoman, me shtëpi të lyera me të bardhë dhe rrugica mesjetare që ngjiten thikë. Një pazar piktoresk. Një kishë e shekullit të 11-të, me dekorime të bukura të brendshme.

Korça është mbiquajtur “Parisi i vogël shqiptar” për ngjashmërinë e saj me Francën. Për të vizituar: një muze të jashtëzakonshëm arkeologjik, xhaminë më të vjetër në Shqipëri, një katedrale të bukur ortodokse, një pazar të mbushur me dyqane të vogla, ku lulëzon tradita e kuzhinës lokale…

Në zemër të Alpeve Shqiptare (por, i aksesueshëm me rruge automobilistike), liqeni i Komanit ju fton të bëni një ekskursion, me traget ose kajak, mes shkëmbinjve të lartë që i japin gjithë relievin. Në shoqërinë e zogjve të tillë si çafka gri apo pulëbardha kokëzezë.

Tirana, kryeqyteti, mban gjurmë të së shkuarës komuniste të vendit, edhe pse ajo është në ringjallje të plotë. Vende që duhet t’i shihni patjetër: pazari i ri, me mijëra aroma dhe ngjyra. Sheshi i madh Skënderbej, zemra e qytetit. Piramida e Tiranës, Pallati i Kulturës…

Artikulli mbyllet me Butrintin, i cili përshkruhet si një vend kyç arkeologjik në Shqipëri, shkruan Atsh. “Ai mban brenda tij gërmadha të jashtëzakonshme. Si një tempull i madh romak i stolisur me statuja mermeri. Një portë e madhe hyrëse në qytet, e quajtur “porta e luanit”. Një bazilikë e shekullit të IV-të, e përbërë nga tre nefet”, shkruhet tutje në artikull.

Policia e Kosovës ka njoftuar se vetëm në 24 orët e fundit janë raportuar shtatë ratë të dhunës në familje. Prej tyre, katër në rajonin e Prishtinës, një në Ferizaj, dhe nga një rast në Prizren dhe Gjakovë.

Lidhur me këto raste, deri tani janë arrestuar gjashtë persona.

Sipas njoftimit të Policisë, një person i gjinisë mashkullore në Prishtinë, ka raportuar se në vazhdimësi është duke u kanosur nga vëllai i tij.

Pas intervistimit të palëve, i dyshuar është arrestuar dhe dërguar në mbajtje.

Derisa në Podujevë raportimi është bërë nga dy vajza të mitura.

“Dy viktimat femra kosovare të mitura, kanë raportuar se nëna e tyre e dyshuara femër kosovare nga dita kur është ndarë nga babai i tyre është duke iu bërë presion të vazhdueshëm psikik dhe duke iu shënuar në rrjetet sociale. E dyshuara është intervistuar dhe me vendim të prokurorit është liruar”, ka njoftuar Policia e Kosovës.

Në raportin 24 orësh të Policisë bëhet e ditur gjithashtu se një person që është arrestuar në Graçanicë pasi i njëjti ka sulmuar fizikisht viktimën femër kosovare.

Pas vendimit të prokurorit, i dyshuari është dërguar në mbajtje.

Ndërsa në Obiliq një person është arrestuar pasi e ka kanosur vëllain e tij.

Policia e Kosovës ka njoftuar edhe për një rast të dhunës në familje në Ferizaj.

“Viktima femër kosovare ka raportuar se përmes telefonit është kanosur nga bashkëshorti i saj i dyshuari mashkull kosovari cili gjendet jashtë vendit. Gjatë kontrollit në shtëpinë e të dyshuarit janë gjetur dhe janë konfiskuar një kallashnikov me 39 copë fishekë dhe një pistoletë me 6 copë fishekë. Rasti në procedurë hetimore”, është bërë e ditur në raportin 24 orësh të Policisë.

Ndërsa në Gjakovë ëstë raportuar për një mosmarrëveshje të disa anëtarëve të familjes.

Lidhur me këtë rast janë arrestuar tre persona ndërsa lëndime kanë mësuar dy viktima.

Policia ka njoftuar edhe për një rast në Prizren ku një person ka raportuar se djali i tij, dike mos respektuar urdhrin mbrojtës është duke ju afruar dhe penguar atë në punë.

I dyshuari është liruar pas intervistimit./KP

Çmimet e naftës u rritën të enjten me rritjen e kërkesës në Shtete të Bashkuara të Amerikës, konsumatori më i madh i naftës në botë, megjithëse fitimet u frenuan nga rritja e normave të interesit të Fed (Sistemi i Rezervës Federale) të SHBA.

Standardi ndërkombëtar i naftës së papërpunuar tregtohej me 83,04 dollarë për fuçi në orën 9:36 të mëngjesit me orën lokale, një rritje prej 0,58% nga çmimi prej 82,56 dollarë për fuçi gjatë seancës së mëparshme të mërkurën, shkruan AA, transmeton KosovaPress.

Standardi amerikan West Texas Intermediate (WTI) tregtohej në të njëjtën kohë me 79,39 dollarë për fuçi, 0,77% më shumë nga 78,78 dollarë për fuçi që ishte të mërkurën.

Të dhënat e publikuara nga Administrata e Informacionit të Energjisë (EIA) të mërkurën treguan se rënia e rezervave tregtare të naftës së papërpunuar në SHBA ishte e papritur nga tregu.

Rënia e inventarit tregon një rritje të kërkesës për naftë, gjë që ka mbështetur rritjen e çmimeve.

Nesër në Presheve do te mbahet Konferenca Ekonomike me moton: “Ekonomia shpëton Luginën e Preshevës”, nën organizimin e Unionit të Afaristëve “Vizioni”- Preshevë, Medvegje dhe Bujanoc, njofton gazeta zvicerane në shqip Le Canton27.ch.

Në këtë konferencë të pare të këtij lloji do të marrë pjese edhe humanisti dhe filantropi i njohur ndërkombëtar z.Lazim Destani, i cili ka shprehur gatishmërinë për ta ndihmuar Luginën e Preshevës me qëllim të zhvillimit ekonomik dhe biznesit për të hapur vende të lira pune, për ta parandaluar eksodin.

«Në Luginë kemi angazhuar ekipet tona, tre menaxherë të Ecologut do të lidhin bashkëpunim me kompanitë në rajon për qellim që t’i kontribuojnë proceseve ekonomike dhe zhvillimore në Luginën e Preshevës” ka thënë Destani për gazetën zvicerane Le Canton27.ch.

Konferenca Ekonomia ka për qëllim krijimin dhe promovimin e rrjetit të prodhuesve vendorë me ata ndërkombëtarë si dhe sensibilizimin e gjendjes ekonomike në Luginën e Preshevës.

Vlen të theksohet se në kuadër të kësaj Konference, panelistë do të jenë ekspert të fushës së bujqësisë, mysafirë të Rrjeteve dhe Odave Ekonomike si nga Kosova, Shqipëria, Maqedonia Veriore, Mali i Zi, Zvicra, Gjermania, Austria, si dhe prodhuesit vendorë.

Bizneset e diasporës që janë të interesuara për pjesëmarrje në këtë konferencë mund të lajmërohen në kontakt tel 063522666 ose në e-mailin: [email protected].

Konferenca Ekonomike do të mbahet më datë 28.07.2023, ditën e premte në ora 14:00. Lokacioni: Shtëpia e Kulturës “Abdulla Krashnica”, Rruga 15 Nëntori, Nr: 90 në Preshevë.

Në Komisionin për Administratë Publike, Pushtet Lokal, Media dhe Zhvillim Rajonal po raporton Komisioni i Pavarur për Media dhe Agjencia për Regjistrim të Bizneseve.

Ushtruesja e detyrës së drejtoreshës së ARBK-së, Nebibe Haliti tregoi për vendimin e anuluar të 21 qershorit, të drejtoreshës së kaluar.

“Vendimin me 14 qershor e ka vendosur drejtoresha e kaluar, por më 21 qershor pa një kërkesë të Klan Kosovës, drejtoresha e ka shfuqizuar vendimin me arsyetim se në sportelat e ARBK-së e ka parashtruar kërkesën për ndryshim. Ky vendim është anuluar nga ana ime, me arsyetimin që nuk ka pasur kërkesë për shfuqizim të vendimit. Tani jemi në pritje për nxjerrjen e dy vendimeve”, tha ajo.

Ajo shtoi se ndryshimet e fundit që janë tentuar të bëhen, janë ndaluar nga ana e saj.

Po ashtu, theksoi se ka pasur mungesë të dokumentacioneve gjatë vitit 2008 dhe tha se ka adresuar këto probleme.

“Konsideroj që është e qëllimshme. Unë ndër të tjera, kam iniciuar procedurë edhe ndaj zyrtarëve për mungesë të përgjegjësisë”, shtoi ajo.

Deputeti i Lidhjes Demokratike të Kosovës, Agim Veliu tha se mendon që ky rast ka probleme politike.

Për këtë ka reaguar ushtruesja e detyrës së drejtoreshës së ARBK-së, për çka mohoi që ka ndikime politike.

Anëtarja e KPM-së, Luljeta Aliu theksoi se janë duke diskutuar që në të ardhmen të ketë kujdes gjatë licencimit të mediumeve, që të mos trajtohen si biznese të rëndomta.