Category: Lajme

Administrata Tatimore e Kosovës ka informuar sot se ka lancuar projektin më të ri për përmbushje tatimore “Personat e pasur”.

Projekti ka për qëllim identifikimin e personave të pasur duke përdorur bazë të të dhënave në formë sistemi/platforme, e cila mundëson ndërlidhjen me institucione qeveritare, joqeveritare, financiare me qëllim të trajtimit tatimor të kësaj kategorie, rritjen e numrit të deklarimeve dhe pagesës së tatimit nga kjo kategori e tatimpaguesve, si dhe zvogëlimin e hendekut tatimor si rezultat i mosdeklarimit të të ardhurave nga personat me të ardhura të larta.

Ky projekt ka qëllim të qartë dhe të rëndësishëm: të sigurojë që personat e pasur kontribuojnë në mënyrë adekuate dhe të drejtë për financat e shtetit. Fushëveprimi i këtij projekti do të jetë i shtrirë në kategorinë e personave si në vijim:

Kategoria I – Personi, pasuria e të cilit është mbi 1 milion euro deri në 5 milionë euro;

Kategoria II – Personi, pasuria e të cilit është mbi 5 milionë euro deri në 10 milionë euro;

Kategoria III – Personi, pasuria e të cilit është mbi 10 milionë euro deri në 20 milionë euro; dhe

Kategoria IV – Personi, pasuria e të cilit është mbi 20 milionë euro.

“Përmes këtij projekti synohet që të reduktohet evazioni tatimor dhe të përmirësohet efikasiteti i sistemit të tatimeve për personat e pasur. Ky projekt do të sjellë transparencë, drejtësi dhe njëkohësisht do të krijojë një bazë më të qëndrueshme të burimeve për të investuar në sektorë kyç të zhvillimit ekonomik dhe social të vendit.”, është bërë e ditur në komunikatë.

ProjektI do të siguroj që të gjithë qytetarët e Kosovës të trajtohen barabartë para ligjit dhe të ndiejnë një angazhim të përbashkët për të kontribuar në mirëqenien e vendit.

Liman Bytyçi, ish-drejtor i shkollës fillore të mesme të ulët “Flamuri i Arbërit”, është ulur në bankën e të akuzuarve për t’u ballafaquar me aktakuzën e Prokurorisë që rëndon ndaj tij.

Bytyçi po ngarkohet për veprën penale, shkelja e statusit të barabartë të shtetasve dhe banorëve të Republikës së Kosovës.

Sipas Prokurorisë i pandehuri në gusht të vitit 2022, kishte vendosur që mësueses së lëndës së matematikës, Remize Lezi t’ia ndalojë ushtrimin e detyrës dhe t’ia mohojë nënshkrimin në listën e arsimtarëve prezent.

Megjithëse, për shumë vite përcolli breza të nxënësve, mësueses iu pamundësua hyrja në shkollë kur vendosi të barte shaminë.

Përball kësaj akuze, drejtori Bytyçi u deklarua i pafajshëm.

“Nuk e pranoj fajësinë, pasi aktakuza është e pabazuar”- tha ai.

Muhamet Mujaj, avokat i cili përfaqëson mësuesen Lezi, ka deklaruar se qëndron prapa ndjekjes penale dhe pranë kërkesës pasurore juridike.

Pas kësaj gjykata ka udhëzuar të akuzuarin që në afatin prej 30 ditësh të parashtrojë kërkesë për hedhjen e aktakuzës dhe kundërshtimin e provave.

Sipas aktakuzës më datë 30 gusht 2022, në fshatin Reshtan, Komuna e Suharekës, në shkollën fillore të mesme të ulët “Flamuri i Arbërit i pandehuri në cilësinë e personit zyrtar, si drejtor i shkollës duke keqpërdorur pozitën apo autorizimet e tij ia mohon ose ia kufizon të drejtën për shprehje të lirë të identitetit të saj ose për të gëzuar autonominë e saj fetare të dëmtuarës, Remzije Lezi.

Në aktakuzë thuhet se pasi e dëmtuara kishte vendosur mbulesë fetare dhe për herë të parë ishte paraqitur me mbulesë në shkollën ku punonte si mësimdhënëse e matematikës, i pandehuri si drejtor i shkollës ia ndalon hyrjen në objekt.

Prokuroria thotë se e dëmtuara edhe përkundër ndalesës ka shkuar në shkollë dhe ka qëndruar aty aq sa ka qenë e paraparë të rri por që nuk është lejuar të nënshkruaj listën e prezencës në detyrë e as listën e sindikatës meqë ishin në grevë.

Ditën kritike i pandehuri ia ofron të dëmtuarës vendimin e Këshillit Drejtues të shkollës nr.31 datë 29 gusht 2022, në bazë të së cilit nuk i lejohet ushtrimi i profesionit të mësueses në atë shkollë dhe pas këtij vendimi e njëjta dy ditë nuk shkon në shkoll por pasi dëgjon në lajme kryetarin e komunës së Suharekës, se ai vendim është i pavlefshëm të nesërmen shkon në shkollë por përsëri i pandehuri i kërkon që të largohet dhe po ashtu ia mohon të drejtën e nënshkrimit në listën e arsimtarëve prezent në shkollë.

Me këtë sipas Prokurorisë i pandehuri akuzohet se ka kryer veprën penale shkelja e statusit të barabartë të shtetsve dhe banorëve të Republikës së Kosovës.

Komuna e Dragashit ka bërë të ditur se në territorin e komunës është konfirmuar murtaja afrikane e derrit.

Në një njoftim zyrtar, komuna bën të ditur se sëmundja në fjalë nuk transmetohet as te njeriu e as te kafshët tjera.

Megjithatë, kujdesi duhet të jetë maksimal.

Komuna bën të ditur gjithashtu se janë duke u ndërmarrë të gjitha hapat e nevojshëm për eliminimin e kësaj sëmundjeje.

Ky është njoftimi i plotë:

NJOFTIM

Të dashur qytetarë të Komunës së Dragashit,

Ju informojmë se në territorin e Komunës sonë tashmë edhe zyrtarisht është konfirmuar MURTAJA AFRIKANE e derrit. Shoqata e Gjahtarëve “Dhia e Egër”, së bashku me Drejtorinë e Bujqësisë dhe Pylltarisë në Dragash, si dhe institucionet relevante qeveritare, janë duke ndërmarrë të gjitha hapat e nevojshëm për eliminimin e kësaj sëmundje.

Kjo sëmundje nuk transmetohet te kafshët tjera, as te njeriu, mirëpo kujdesi duhet të jetë maksimal, pasi më herët nuk kemi pasur raste të tilla.

Në një takim të përzemërt dhe lamtumirës, Kryeministri i Republikës së Kosovës, Albin Kurti e falënderoi ambasadorin Weidinger për bashkëpunimin dhe angazhimin në avancimin e marrëdhënieve ndërmjet Republikës së Kosovës dhe Austrisë.

Duke vlerësuar raportet e shkëlqyera ndërmjet dy vendeve, kryeministri Kurti e falënderoi ambasadorin Weidinger për kontributin në vizitat e shumta zyrtare e shtetërore, rritjen e bashkëpunimit ekonomik, mbështetjen për arsimin, të rinjtë dhe gratë dhe për mbështetjen e vazhdueshme për anëtarësim në organizata ndërkombëtare.

Ambasadori Weidinger veçoi raportet e shkëlqyera që gëzojnë dy shtetet tona, ngrohtësinë dhe mikpritjen e njerëzve në Kosovë dhe lidhjet e shumta njerëzore mes Austrisë dhe Kosovës, të cilat tha se janë të gjata dhe të vazhdueshme.

Të dy kujtuan bisedat e shumta për tema të ndryshme e përtej politikës – për artin e kulturën, muzikën e filmin.

Në takim u bisedua edhe për zhvillimet aktuale në vend. Kryeministri i uroi suksese në angazhimet e radhës.

 

Në Gjykatën Themelore në Prishtinë, të enjten, dëshmitari Valdrin Rexha, ka deklaruar se viktimën e kishte dërguar në emergjencë pasi askush tjetër se kishte dërguar, në rastin ku Shkumbin Kryeziu po akuzohet për vrasje të rëndë.

I pandehuri Kryeziu po akuzohet se së bashku me të miturin A.K pas mosmarrëveshjeve të mëhershme me të ndjerin V.Xh, me dashje që ta privoj nga jeta në oborrin e shkollës në Hajvali e kishin therur me thika në trup e që si pasojë e plagëve të marra Xh., kishte ndërruar jetë në QKUK, raporton “Betimi për Drejtësi”.

Dëshmitari Rexha duke u përgjigjur pyetjeve të prokurores Besa Limani, tha se ditën kritike kishte qenë në rrugë afër shkollës në Hajvali ku kishte ndodhur ngjarja dhe aty kishte takuar viktimën dhe një grup njerëzish afërsisht dhjetë persona të cilët nuk i kishte njohur.

Tutje, dëshmitari Rexha tha se, me të arritur tek vendi i ngjarjes kishte gjetur viktimën në tokë ku kishte menduar se e kishte shkelur ndonjë veturë.

“M’kanë thanë a pe merr viktimën sepse nuk po e merr askush edhe i kam thanë unë e kam pasur makinën pikap dhe ju kam thënë që ta fusni në bagazh”, tha dëshmitari Rexha.

Ai tha se, me ta marr viktimën, me dajën apo nipin pasi nuk e njihte por e dinte që ishte dikush nga familja e viktimës, kishin vazhduar për në emergjencë, ndërsa gjatë rrugës të njëjtit kishin thënë se ishte në gjendje shumë të rëndë dhe nuk mund të fliste.

Ndërsa, i pyetur nga gjykatësi Kushtrim Shyti se gjatë kohës sa ishin duke e transportuar viktimën për në emergjencë a kishte biseduar me dajën apo nipin e viktimës.

Dëshmitari Rexha tha se kishte biseduar me nipin/dajën e viktimës lidhur me atë se çfarë kishte ndodhur, ndërsa ai i kishte thënë se viktimën e kishin therur me thikë, ndërsa më tepër nuk e kishin zgjatur pasi ai dëshironte që të mbërrinin sa ma shpejt në emergjencë.

Ai tha se, viktima nuk kishte pasur vetëdije të plotë, por që i njëjti kohë pas kohe hapte sytë dhe përcillte dritën e veturës e cila gjendej mbrapa.

Tutje dëshmitari Rexha deklaroi se të akuzuarin Kujtim Pacolli nuk e njihte.

Në këtë rast ishte paraparë që të dëgjohej edhe dëshmitari Mirsad Haxholli, për të cilin gjykatësi Shyti tha se gjendet në paraburgim në Dubravë.

Sipas gjykatësit Shyti, nga zyrtarë e Burgut të Dubravës kishin marr përgjigje me 24 korrik 2023, se e kanë pranuar urdhëresën, mirëpo të njëjtit nuk e kanë sjellë dëshmitarin.

“Gjykata kontaktoi tash në telefon me zyrtarin përgjegjës të cilët njoftuan gjykatën se ju ka ikur si gabim teknik duke mëndur se behet fjalë vetëm për të pandehurin Shkumbin Kryeziu por jo edhe për dëshmitarin Haxholli”, ka sqaruar gjykatësi Shyti.

Paraprakisht, mbrojtësi i të akuzuarit Kryeziu, avokati Florent Latifja, propozoi që të ftohet eksperti i mjekësisë ligjore Arsim Gerxhaliu, i cili ishte hartues i raportit të autopsisë dhe e kishte kryer autopsinë ku, sipas tij, i njëjti do të përgjigjet lidhur me natyrën e plagëve e sa plagë i ka marr.

Një propozim i tillë nuk u kundërshtua nga i akuzuari Kryeziu, prokurorja Limani, i dëmtuari Petrit Xhemshiti, kurse mbrojtësi i viktimave tha se ia lë në diskrecion gjykatës.

Më pas, trupi gjykues përmes aktvendimit miratoi propozimin e avokatit Latifaj për dëgjimin e ekspertit mjeko-ligjor, Arsim Gërxheliu.

Bazuar në këto rrethana seanca e sotme u shty, ndërsa e radhës u caktua më datë 6 shtator 2023.

Po ashtu u vendos që me thirrje do të ftohet eksperti i mjekësisë ligjore, Arsim Gërxhaliu, ndërsa gjykata do të lëshoj urdhëresë për të pandehurin Kryeziu dhe dëshmitari Haxholli.

Ndryshe, i Kryeziu akuzohej edhe për veprën penale mbajtje në pronësi të paautorizuar të armëve, vepër për të cilën kishte pranuar fajësinë me 16 janar 2023 gjatë shqyrtimit fillestar.

Kurse, për të miturin A.K. është zhvilluar një procedurë tjetër dhe i njëjti është dënuar tashmë.

Sipas aktakuzës së ngritur me 29 dhjetor të vitit 2022, thuhet se me 10 dhjetor 2021, rreth orës 21:25, në rrugën “Tom Lantosh” në fshatin Hajvali, Komuna e Prishtinës, dyshohet se i akuzuari Shkumbin Kryeziu me të miturin A.K në bashkëkryerje kanë kryer veprën penale vrasje e rënd dhe mbajtje në pronësi, kontroll dhe posedim të paautorizuar të armëve.

Sipas aktakuzës pasi kanë zbritur nga autobusi dëshmitari Kujtim Pacolli me tani të ndjerin V.Xh, në të cilin autobus ishte edhe i pandehuri Shkumbin Kryeziu, tani i ndjeri V.Xh dhe dëshmitari Kujtim Pacolli janë nisur në drejtim të shtëpisë së tyre duke i rënë rrugës më të shkurtë në oborrin e shkollës “Afrim Gashi” në Hajvali, ku te oborri i shkollës ishin i mituri A.K., dëshmitarët Gojart Sejdiu dhe Mirsad Haxholli, ku i mituri A.K. i drejtohet tani të ndjerit V.Xh me falët “çka po më kqyr”.

Ndërsa tani i ndjeri V.Xh ia kthen duke e sharë nga distanca prej rreth 3 metra, dhe të njëjtin moment i mituri A. nxjerr thikën nga xhepi i djathtë, derisa dëshmitari Kujtim ka reaguar menjëherë duke i thënë tani të ndjerit V.Xh “ik se ka thikë” dhe në ato momente ka arritur i pandehuri Shkumbin Kryeziu, i cili me thikë në dorë së bashku më të miturin A.K e kanë ndjekur tani të ndjerin V. me të cilin në ikje ishte dëshmitari Kujtim Pacolli, ku i njëjti është rrëzuar, ndërsa i pandehuri Shkumbin me të miturin A. kanë vazhduar ta ndjekin tani të ndjerin V. që të dy me thika në duar dhe nga hakmarrja për shkak të mosmarrëveshjeve të mëhershme që kishte i pandehuri Shkumbin Kryeziu me të ndjerin V.XH me dashje që ta privojë nga jeta.

Tutje sipas aktakuzës i pandehuri Shkumbi dhe i mituri A. e godasin me thika në trup tani të ndjerin V. mirëpo ata kanë vazhduar që ta ndjekin dhe derisa ishte duke shkuar dëshmitari Kujtim në drejtim të tani të ndjerit V.Xh i pandehuri dhe i mitur i janë vërsulur me thika në dorë dëshmitarit Kujtim duke i thënë “Ik se ta bajna ma zi se atina”.

Sipas aktakuzës dëshmitari Kujtim ka vazhduar në drejtim të tani të ndjerit V. i cili në ato momente ishte ende duke ikur kur përnjëherë ishte rrëzuar për toke dhe ka qenë i tërë i mbuluar me gjak, duke iu drejtuar dëshmitarit Kujtim me fjalët “thirre emergjencën” e pas kësaj nuk ka qenë në gjendje të flasë , ndërsa rreth orës 23:25 ka ndërruar jetë në QKUK, si pasojë e plagëve të marra.

Me këtë i pandehuri Shkumbin Kryeziu ne bashkëkryerje me të miturin A.K ka kryer veprën penale “Vrasje e rëndë” nga neni 173 par. 1 pika 1.8 lidhur me nenin 31 të KPRK-së.

Sipas dispozitivit të dytë , në vendin, kohën dhe ditën e njëjtë si në dispozitivin I të kësaj aktakuze, i pandehuri Shkumbin Kryeziu në kundërshtim me ligjin e zbatueshëm për armë, ka mbajtur në pronësi armë, përkatësisht një thikë me gjatësi 6 cm, me mbishkrim “Leatherman Sidekick” të cilën e ka përdorur për ta kryer veprën penale si ne dispozitivin nën 1 të aktakuzës dhe të cilën policia e kanë gjetur dhe sekuestruar nga pandehuri Shkumbin Kryeziu. gjate arrestimit te tij.

Me këtë i pandehuri Shkumbin Kryeziu, ka kryer veprën penale Mbajtje në pronësi kontroll dhe posedim të paautorizuar të armeve nga neni 366 par. 1 të KPRK –Së./BetimipërDrejtësi

Policia e Kosovës ka bërë edhe një sqarim pas qarkullimit të disa emaileve me dokumente të falsifikuara me pretendimin që janë lëshuar nga zyrtarë të lartë brenda policisë. PK sqaron se dokumentet e tilla nuk janë lëshuar nga ky institucion.

Policia ka bërë publike këto emaile me qëllim të sqarimit të opinionit derisa ka bërë të ditur se ka filluar hetimet intensive lidhur me këtë rast.

“Policia e Kosovës si institucion i zbatimit të ligjit, në bashkëpunim dhe koordinim me organet e drejtësisë, pas sigurimit të informacioneve rreth qarkullimit të e-mailave/dokumenteve të tilla, dhe vazhdimin e shpërndarjes së tyre, me kohë ka filluar hetimet intensive duke angazhuar njësitet kompetente policore, me qëllim të hetimit, verifikimit dhe zbulimit të kryerësve të kësaj vepre penale”, ka bërë të ditur Policia e Kosovës.

Lidhur me shpërndarjen e emaileve false, Policia e Kosovës kishte reaguar edhe me 17 korrik duke sqaruar se të njëjtat nuk janë dokumente zyrtare.

Në këto dokumente, sipas policisë, ka pasur logo të PK-së, logo qeveritare, vula të ndryshme e mbishkrim të EUROPOL-it, dhe kinse janë lëshuar me qëllim të njoftimit të palës së caktuar për urdhër gjykate.

“Siç e kemi theksuar në sqarimin e parë, tani edhe në sqarimin e dytë e ri-theksojmë se, në e-mailin dhe dokumentin e falsifikuar, janë përdorur emrat e zyrtarëve të lartë të PK-së dhe logot e ndryshme, por se ri potencojmë se nuk janë dokumente zyrtare, nuk përmbajnë formatin dhe shkrimin zyrtar të PK-së, si dhe nuk janë lëshuar nga adresat zyrtare të Policisë së Kosovës”, është theksuar në njoftimin e Policisë.

Policia ka ftuar qytetarët që të mos bien pre e dezinformatave dhe nëse dikush pranon emaile të tilla, ta adresojë çështjen në adresën zyrtare të PK-së: [email protected].

Dhoma e Përfaqësuesve mblodhi të mërkurën një panel mbi fenomenin anormal të paidentifikuar të njohur më shumë si UFO, me arsyen se pamjet misterioze meritojnë shqyrtim në nivelet më të larta të qeverisë.

Gjatë dy orëve të seancës, tre dëshmitarë treguan rreth takimeve të tyre me objektet e paidentifikuara dhe treguan rreth pilotëve, të cilët ishin të frikësuar të flasin. Të gjithë pranuan se fenomenet anormale ishin një kërcënim potencial për sigurinë kombëtare.

Komandanti në pension i Marinës amerikane, David Fravor rrëfeu edhe një herë takimin e tij me një UFO në vitin 2004, i cili lëvizi në një mënyrë që i hutoi aviatorët, pamjet e të cilave janë publikuar në vitin 2017 dhe janë verifikuar publikisht nga Marina e SHBA dy vjet më vonë.

“Teknologjia me të cilën u përballëm ishte shumë më e lartë se çdo gjë që kishim, kemi sot, ose që po kërkojmë të zhvillojmë në 10+ vitet e ardhshme”, tha Fravor.

David Grusch, ish-oficer i inteligjencës së Forcave Ajrore, la të kuptohej se zyrtarët qeveritarë kishin fshehur informacionin dhe kishin ndëshkuar informuesit, por pretendoi se ai nuk mund të fliste më tepër në publik për shkak të ligjit.

Nancy Mace, një republikane e Karolinës së Jugut, i kërkoi Gruschit të shtjellonte atë që dinte për trupat jotokësorë.

A ishin njerëz apo jo? Pyeti Mace.

“Jo-njerëzore,” u përgjigj Grusch. Gjatë një linje tjetër të marrjes në pyetje, ai konfirmoi se kurrë nuk kishte parë personalisht një alien.

Dëshmitarët kërkuan gjithashtu një proces raportimi zyrtar për personelin ushtarak ose anëtarët e publikut që të raportojnë pamjet e pashpjegueshme

“Ne kemi nevojë për një sistem ku pilotët mund të raportojnë pa humbur punën e tyre”, tha Ryan Graves, drejtor ekzekutiv i Americans for Safe Aerospace.

Ndërsa, ligjvënësit republikanë dhe demokratë i morën seriozisht çështjet, disa shprehën skepticizëm se aktiviteti jashtëtokësor po ndodhte.

Hetimi i UFO-ve, i njohur tani për shumë si UAP, është bërë një çështje e rrallë dypartiake në Kongres. Ligjvënësit e të dyja palëve kanë kërkuar hetime dhe transparencë ushtarake. Në vitin 2022, Komiteti i Inteligjencës i Dhomës së Përfaqësuesve mbajti një seancë dëgjimore për programin sekret të Pentagonit. NASA mbajti një seancë publike për këtë çështje në qershor.

Të dy ish-presidentët Barack Obama, një demokrat dhe Donald Trump, një republikan e trajtuan këtë çështje në intervista publike, shkruan BBC, përcjell KosovaPress

Zëdhënësi i Këshillit të Sigurisë Kombëtare John Kirby tha se ai ishte mendjehapur.

“Ajo që ne besojmë është se ka fenomene ajrore të pashpjegueshme që janë cituar dhe raportuar nga pilotët – Marina dhe Forcat Ajrore”, tha Kirby. “Nuk i kemi përgjigjet se cilat janë këto dukuri”.

Një gjë e rrallë për një seancë dëgjimore të Kongresit të transmetuar në televizion, pothuajse të gjithë ligjvënësit i përqendruan pyetjet e tyre në temën në fjalë të mërkurën.