Category: Lajme

Para katër muajsh ka filluar vendosja e pajisjeve për matjen e zhurmës në hapësirat e gastronomisë, derisa projekti i komunës së Prishtinës ka filluar të zbatohet nga 1 gushti.

Sekretari i Përgjithshëm i Shoqatës së Gastronomëve të Kosovës, Arian Vranica, tha se deri më tani rreth 380 lokale të gastronomisë e kanë vendosur këtë pajisje.

“Deri më tani, rreth 380 lokale të gastronomisë janë bërë pjesë e kësaj rregulle. Dhe kanë vendosur akustikat. Është diçka e re, ne kemi qenë që e kemi propozuar këtë projekt, i cili ka shumë të mira”, tha Vranica.

Për vonesën në zbatimin e këtij projekti, ka arsyetim.

“Kemi pasë problemeve me vendosjen e sensorëve në fillim. Problemi ka qenë te kompania e cila ka fitu tenderin për vendosjen e tyre. Megjithatë, pas shumë takimeve që kemi pasur me Komunën e Prishtinës, jemi dakorduar që zbatimi të fillojë nga 1 gusht, i cili ka filluar nga dje”, tha Vranica.

Nga ana tjetër, drejtori i Shërbimeve Publike në Komunën e Prishtinës, Ilirik Musliu, tha se nuk do të mungojnë as gjobat për ata që nuk e respektojnë këtë rregull.

“Nga fillimi i këtij muaji, pra nga tani do të fillojmë me gjobat. Drejtoria e Inspeksionit do të gjobisë ata që bëjnë shkelje dhe njëkohësisht për ata të cilët ende nuk kanë aplikuar për vendosjen e matësve”, tha drejtori i Shërbimeve Publike në Prishtinë, Ilirik Musliu.

Në prill të këtij viti, komuna kishte ndarë 180 mijë euro për blerje të sensorëve akustikë për matje të zhurmës në qytet.

Ndryshe, bizneset në rast të mosvendosjes së këtyre pajisjeve mund të gjobiten deri në 5 mijë euro. /atvlive.tv

Edicionin Qendror të lajmeve në ATV e gjeni një videon më poshtë:

Nxënësit shkuan në pushim por për shkollën vazhdon të përkujdeset Xhevahire Bojniku.

Tash e një vit Bojniku është e angazhuar si punëtore teknike në shkollën fillore “Emin Duraku”. Meqë pagën e kishte vetëm 220 euro, miratimi i Ligjit për Pagën Minimale prej 250 eurosh, ju gëzua shumë.

Por, Bojniku nuk e di se kur do ta marrë pagën me rritje pasi Kuvendi nuk ia doli të rishikojë buxhetin për vitin 2023, gjë e cila do t’i mundësonte më shumë para.

Më rishikimin e buxhetit për vitin 2023 ishte paraparë edhe rritja e pagave për punëtorët e sektorit publik.

Rishikimi i buxhetit rëndom bëhet në gjysmëvjetorin e dytë të vitit, respektivisht në muajin qershor.

Vlera e buxhetit e miratuar për vitin 2023 është 3 miliardë e 212 milionë euro. /atvlive.tv

Edicionin Qendror të lajmeve në ATV e gjeni një videon më poshtë:

Opozita u konsiderua fajtore që plani legjislativ për sesionin pranveror të Kuvendit, u përmbush vetëm 13%. Sipas të dhënave të publikuara nga Instituti Demokratik i Kosovës, kjo ndodhi për shkak të mospjesëmarrjes së deputetëve opozitarë, si rrjedhojë as pyetje parlamentare nuk u bënë sa duhet.

Nga 178 pyetje opozita adresoi vetëm 68 karshi ekzekutivit.

Në përgjithësi deputetët i kanë parashtruar ndaj ekzekutivit 171 pyetje parlamentare, por këtu hynë edhe pyetje të cilat janë përsëritur disa herë, për shkak të mungesës së ministrave në seanca. Deputetët e partisë në pushtet kanë parashtruar më shumë pyetje. Kjo në vetvete paraqet problematikë, pasi tregon se deputetët e opozitës nuk kanë qenë shumë aktiv në parashtrimin e pyetjeve parlamentare gjatë ekzekutivit. Kështu, PDK-ja ka parashtruar 45 pyetje, LDK-ja ka parashtruar 10 pyetje dhe AAK-ja 13 pyetje. Të gjitha pyetjet parlamentare i kanë parashtruar vetëm 38 deputetë të Kuvendit, ndërsa 82 deputetë nuk kanë parashtruar fare pyetje që është shqetësuese”, tha Violeta Haxholli, hulumtuese në KDI.

Sesioni pranveror i Kuvendit vlerësohet se u karakterizua me shumë të papritura.

Vetëm 17 nga këto, janë projektligje apo marrëveshje ndërkombëtare, që janë të përfshira në agjendën e këtij viti, të tjerat u takojnë viteve paraprake. Nga problemet të cilat duhet t’i evidentojmë ka qenë mungesa e deputetëve, e cila ka shkaktuar vazhdimisht problemin e mungesës së kuorumit. Në bazë të gjetjeve tona, mesatarisht në secilën seancë 22,5 për qind e deputetëve kanë munguar. Trendet janë varësisht prej partive politike, në këtë rast partitë opozitare tregojnë shifra më të larta të mungesave. LDK-ja ka diku 22 për qind të deputetëve që i mungojnë, PDK-ja ka rreth 19 për qind, LV-ja ka nëntë për qind”, tha Arbër Thaçi, hulumtues në KDI.

Në raportin e KDI-së për punën e Kuvendit evidentohet edhe gjuha joparlamentare. Rrjedhimisht kryetarit të Kuvendit, Glauk Konjufca, iu kërkua të jetë më rigoroz.

Po ashtu, u shprehën shqetësime lidhur me mungesën e transparencës së Kuvendit ndaj publikut, përfshirë mungesën e votimit elektronik, mospublikimin e votave me dorë, dhe mospublikimin e rregullt të procesverbaleve të mbledhjeve të komisioneve parlamentare dhe atyre Ad-Hoc. /atvlive.tv

Edicionin Qendror të lajmeve në ATV e gjeni një videon më poshtë:

Zyrtarë nga Komuna e Prishtinës, përmes një komunikate kanë njoftuar se të enjten, nga ora 11:15 deri në 12:45, Drejtoria për Siguri dhe Emergjenca do të organizojë një ushtrim praktik në objektin e vjetër të komunës me qëllim testimin e gatishmërisë reaguese të pjesëtarëve të personelit komunal dhe qytetarëve.

Kjo do të bëhet për të testuar ata që gjenden brenda, në rast të zjarrit dhe fatkeqësive tjera natyrore, si dhe koordinimin e institucioneve për reagim në zjarre dhe fatkeqësi tjera natyrore për: shuarjen e zjarrit, kërkim shpëtimin, evakuimin e personelit dhe qytetarëve.

”Për shkak të ushtrimit, në koordinim me policinë është marrë vendimi që një pjesë e rrugës “UÇK” (ku gjendet komuna) të mbyllet për qarkullimin e veturave për dy orë”, thuhet në njoftim.

Dyshohet se për shkak të një mosmarrëveshje kosovari E.N., nga komuna e Drenasit me shtetësi të Zvicrës e ka hedhur nga dritarja e dhomës së hotelit të katit të gjashtë në Fushë Kosovë shtetasen argjentinase M.K.U. Viktima 27-vjeçe ka pësuar lëndime trupore dhe përkundër trajtimit në QKUK e njëjta ka vdekur.

Këto detaje i ka dhënë Gjykata Themelore e Prishtinës në njoftimin dërguar mediave, në të cilin bëhet e ditur se ndaj E.N., është caktuar masa e paraburgimit prej 1 muaji në drejtim të veprës penale “vrasje”.

“Ekziston dyshimi i bazuar se i pandehuri E.N me datë 01.08.2023 rreth orës 01:59 minuta në rrugën “ Nënë Terezë” në Fushë Kosovë, pas një mosmarrveshje paraprake me të dëmtuarën – tani të ndjerën M.K.U, të njëjtën e privoj nga jeta duke e hudhur nga dritarja e dhomës së hotelit, nga kati gjashtë, me ç’rast e ndjera kishte pësuar lëndime trupore, e që edhe përkundër trajtimit mjekësor e njëjta kishte ndërruar jetë në Qendrën Klinike Universitare të Kosovës ( QKUK)”, njofton gjykata, transmeton Gazeta Express.

Gjykata Themelore në Prishtinë – Departamenti për Krime të Rënda ka vendosur lidhur me kërkesën e Prokurorisë Themelore në Prshtinë, për caktimin e masës së paraburgimit kundër të pandehurit E.N, i dyshuar për veprën penale Vrasje nga neni 172 të Kodit Penal të Republikës së Kosovës.

“Gjyqtari i procedurës paraprake ka aprovuar si të bazuar kërkesën e Prokurorisë Themelore në Prishtinë për caktimin e masës së paraburgimit kundër të pandehurit E.N dhe të njëjtit i ka caktuar masën e paraburgimit në kohëzgjatje prej 1 (një) muaji”, njofton gjyakata.

Në njoftim thuhet se gjyqtari i procedurës paraprake ka analizuar të gjitha arsyet mbi caktimin e paraburgimit kundër të pandehurit E.N dhe ka vlerësuar se është përmbushur kriteri nga neni nenit 184 paragrafi 1 nënparagrafi 1.1 dhe 1.2, pika 1.2.1, 1.2.2 dhe 1.2.3 të Kodit Penal të Republikës së Kosovës, si kusht i veçantë për caktimin e paraburgimit.

“Nngase ekzistojnë rrethana të cilat tregojnë rrezikun e ikjes së të pandehurit, pasi që i njëjti është shtetas i Zvicrës dhe nëse i pandehuri gjendet në liri i njëjti do të mund të ik me qëllim të fshehjes dhe ikjes nga përgjegjësia penale dhe do të ishte i paarritshëm për organet e ndjekjes, e në këtë mënyrë do të pengohej rrjedha e procedurës penale, andaj konstatoi së masa e paraburgimit në këtë fazë të procedurës penale është e vetmja masë për rrjedhjen e pa penguar të procedurës penale në këtë çështje juridiko – penale”.

Kundër këtij aktvendimi, palët e pakënaqura kanë të drejtë ankese në Gjykatën e Apelit, përmes Gjykatës Themelore në Prishtinë.

Kryeministri Rishi Sunak këmbënguli sot se Mbretëria e Bashkuar duhet “t’i përmbahet planit” për të ulur inflacionin edhe nëse kjo do të thotë pagesa më të larta të hipotekave për pronarët e shtëpive.

Sunak këmbënguli se kishte “dritë në fund të tunelit” për familjet në vështirësi, ndërsa ai u qortua në një transmetim të drejtpërdrejtë në radio. Kryeministri milioner u kap nga “Jack”, një baba i katër fëmijëve në fillim të të 30-ave nga Guildford, Surrey. Ai tha se po përballet me një rritje prej 87 për qind në pagesat e tij të hipotekës nga 1,500 £ në 2,800 £ kur norma e tij fikse dyvjeçare skadon në fund të vitit.

Ai pyeti: “Si një person që punon shtatë ditë në javë dhe ka paguar në sistemin e taksave që nga përfundimi i shkollës pa marrë asnjë qindarkë nga ajo, pse ndihem sikur po ndëshkohem padrejtësisht dhe çfarë mund të bëni për të më ndihmuar?”

Ajo vjen përpara një rritjeje të re të pritshme të normave të interesit që do ndodhë nesër, me Bankën e Anglisë që pritet t’i rrisë ato me një çerek përqindjeje në 5.25 për qind, shkruan DailyMail, përcjell KosovaPress

Sunak tha se ishte e “dhimbshme” dhe i sugjeroi telefonuesit ‘të fliste me bankën e vet’ dhe të diskutonte zgjatjen e afatit ose kalimin vetëm në interes. Ai sugjeroi që Jack kishte një hipotekë “jashtëzakonisht të madhe”.

Për inflacionin ai tha gjithashtu: Unë e di që familjet po luftojnë me koston e jetesës dhe kjo është arsyeja pse e vendosa si prioritetin tim të parë përgjysmimin e inflacionit dhe ne po bëjmë përparim.

Policia e Kosovës, në dy raste të ndara, ka arrestuar një person dhe ka konfiskuar sasi të substancave narkotike.

Sipas Policisë, rasti i parë ka ndodhur me datë 31 korrik në orët e hershme të mëngjesit kur Njësia Patrulluese në Gjilan, gjatë punës operative, ka konfiskuar një çantë krahu në të cilën janë gjetur dhe konfiskuar në cilësi të provave materiale.

“Një qese substancë narkotike e dyshuar për marihunë në peshë prej 703.3 gr (shtatëqind e tre pikë tre gramë), 2 (dy )peshore elektrike për matjen e substancës narkotike, 3 pako me substancë të dyshuar të llojit kokainë në peshë prej 5.2 gr (pesë pikë dy gramë), 1 pako mbështjellës për substanca narkotike, 94 qese plasmani të papërdorur (të zbrazura)”, ka njoftuar Policia e Kosovës.

Ndërsa lidhur me rastin e dytë, Policia ka bërë të ditur se sot në Prizren, njësiti i antidrogës [përmes realizimit të një urdhër kontrolli nga gjykata kompetente, ka arritur të ndalohet personi i dyshuar me iniciale A.D.

Gjatë zbatimit të urdhër kontrollit janë gjetur dhe sekuestruar disa provat materiale.

Një (1) kavanoz qelqi brenda të cilit ishin 13 doza me substancë narkotike që dyshohet të jetë e llojit heroinë, me peshё të përgjithshme 78.80 gramë, ku vlera e tregut në të holla është rreth 1800 euro, një sasi e substancës narkotike që dyshohet të jetë e llojit marihuanë me peshё 0.98 gram, të holla të gatshme në vlerë dymijë (2000) euro dhe një (1) telefon mobil”, ka njoftuar Policia.

I dyshuari në këtë rast është ndaluar për 48 orë ndërsa për rastin e pare, njësitet policore janë duke kryer veprime operativo-hetimore intensive, me qellim te arrestimit te personit te dyshuar./kp

Kosova sivjet nga sezoni i korrje-shirjeve nuk do të mund t’i plotësojë nevojat e saj për grurë. Për më tepër, kjo kulturë bujqësore këtë vit nuk ka as cilësi të mirë.

Fermeri Korab Sejdiu nga komuna e Podujevës ka korrur mbi 150 hektarë sipërfaqe të mbjellë me grurë.

Por, këtë vit sasia e grurit që ka siguruar ka qenë më e vogël.

“Deri 3.000 kilogramë grurë për një hektar të kultivuar kemi arritur të sigurojmë sivjet – gjysmën e sasisë krahasuar me vitin e kaluar”, thotë për Radion Evropa e Lirë fermeri Korab Sejdiu.

Për shkak të sasisë më të vogël të grurit të korrur, Sejdiu thotë se “sivjet nuk ka bukë dhe kualiteti është i dobët”.

Për këtë gjendje, fermeri ua lë fajin kushteve klimatike që këtë vit kanë qenë të pafavorshme për bujqit.

“Ka pasur shumë reshje shiu, mjegull, brymë mëngjesi”, thotë ai, duke sqaruar se kjo ka bërë që gruri të mos fryhet aq sa duhet.

Për shkak të kushteve jo të favorshme atmosferike, këtë vit fushata e korrje-shirjeve ka nisur më 15 korrik, teksa rëndom nis në fillim të po këtij muaji. Sipas ministrit të Bujqësisë, Pylltarisë dhe Zhvillimit Rural, Faton Peci, këtë vit kanë qenë të mbjellë me grurë rreth 67.000 hektarë tokë.

Ndërkaq, fermeri Valon Vehapi nga komuna e Lipjanit thotë se sasia më e vogël e rendimenteve të grurit këtë vit është shkaktuar edhe nga mostrajtimi i duhur i kësaj kulture bujqësore.

Ai tashmë ka korrur mbi 100 hektarë tokë me grurë.

Edhe Vehapi, sikurse Sejdiu sivjet ka siguruar më pak grurë sesa ka pritur, pasi ai ka synuar 7.000 kilogramë për një hektar, por ka siguruar deri në 5.000.

“Kushtet klimatike nuk kanë qenë ideale për bujqësi, as për kulturën e grurit e as për të misrit. Kjo për arsye se muajt maj dhe qershor kanë qenë të ftohtë dhe të lagësht. Për shkak të lagështisë së madhe janë shfaqur shumë sëmundje që i kanë bërë dëm bimës së grurit. Kjo ka ndikuar edhe në tokën time, pasi siç e kam punuar tokën dhe e kam trajtuar bimën duke punuar 12 orë në ditë kam pritur deri në 7.000 kilogramë për hektar, por kam dalë me pak më shumë se 5.000 kilogramë”, thotë ai për Radion Evropa e Lirë.

Nga Federata Sindikale e Bujqve të Kosovës thonë se temperaturat e ulëta gjatë pranverës ulën pritjet për prodhim të bollshëm të grurit. Kreu i kësaj federate, Tahir Tahiri, thotë se mesatarja e prodhimit për hektar, këtë vit do të jetë më e ulët krahasuar me vitet e kaluara.

Megjithatë, ai nuk tregon se sa për qind të nevojave të saj për grurë do të arrijë t’i sigurojë Kosova këtë vit.

“Kam frikë se do të jetë viti më i dobët dhe më i vështirë sa i përket prodhimtarisë vendore. Unë nuk mbaj mend që në 40 vjet të ketë pasur lagështi nga muaji mars, prill, maj dhe qershor. Kemi pasur vërshime, breshër… Por, më e rënda ka qenë lagështia e stërzgjatur, e cila ka krijuar kushte për paraqitjen e sëmundjeve të ndryshme”, thotë ai.

Disa zona në Kosovë gjatë këtij viti janë përballur me vërshime. Në janar, komuna e Skenderajt, ajo e Mitrovicës së Jugut, Klinës dhe Istogut u goditën nga vërshimet. Ndërkaq, në qershor, komuna e Pejës u përball me vërshime.

Zejnullahu: Gruri nuk plotëson kriteret për prodhim të miellit

Përveç sasisë së pamjaftueshme të grurit që Kosova ka siguruar sivjet, cilësia e tij nuk është e duhur, thotë udhëheqësi i Shoqatës së Mullisëve të Kosovës, Bashkim Zejnullahu.

Ai shpjegon se cilësia e kësaj kulture bujqësore varet nga rajonet ku mbillet. Rrafshi i Kosovës, ku gjendet edhe komuna e Lipjanit, sipas tij, ka pasur rendiment dhe cilësi të mirë. Por, cilësia e grurit në rajonet e tjera, sipas Zejnullahut, nuk garanton se ai mund të përpunohet dhe të prodhohet miell.

“Gruri duhet të ketë një cilësi minimale për përpunim të miellit. Gruri i këtij viti ka pasur një kualitet aq të dobët, sa nuk ka mundësi që të prodhohet miell. Ky grurë, i këtij kualiteti, mund të përpunohet si ushqim për kafshë, por jo si ushqim për njerëzit”, thekson ai.

Gruri është lënda e parë për prodhimin e miellit dhe si i tillë konsiderohet produkt strategjik për sigurinë kombëtare.

Radio Evropa e Lirë ka pyetur edhe Ministrinë e Bujqësisë, Pylltarisë dhe Zhvillimit Rural për sasinë dhe cilësinë e grurit, por deri në publikimin e këtij teksti, ky institucion nuk ka kthyer përgjigje.

Sipas të dhënave zyrtare të vitit 2021, konsumi mesatar i grurit për kokë banori, duke përfshirë edhe produktet me përmbajtje gruri, janë 207 kilogramë, ose mbi 410.000 tonë grurë.

Por, prodhimi vendor ndër vite ka qenë rreth 300.000 tonë grurë.

Kjo ka bërë që Kosova t’i përmbushë nevojat me këtë produkt përmes importit.

Në vitin 2021, nga fermerët e Kosovës kishin prodhuar 280.000 tonë grurë. Sipas të dhënave të Doganave të Kosovës për atë vit, 115.000 tonë lloje të grurit dhe miellit janë importuar nga shtete të ndryshme të Evropës.