ATV

Category: Lajme

  • Të premten protestë para Gjykatës në Ferizaj, kërkohet “Drejtësi për Marigonën”

    Të premten protestë para Gjykatës në Ferizaj, kërkohet “Drejtësi për Marigonën”

    Kolektivi për Mendim dhe Veprim Feminist ka paralajmëruar organizim për të premten para Gjykatës Themelore në Ferizaj për të kërkuar “drejtësi për Marigonën”, në ditën e shpalljes së aktgjykimit ndaj vrasësve të saj.

    Të premten mbahet seanca përfundimtare ndaj Dardan Krivaqës dhe Arbër Sejdiut, të akuzuar për vrasjen e Marigona Osmanit, raporton “Betimi për Drejtësi”.

    “Për t’u siguruar që kërkesa jonë për drejtësi të jehojë edhe të premtën para Gjykatës Themelore në Ferizaj, ne mblidhemi nga ora 10:30 para dyerve të Gjykatës për të kërkuar drejtësi për Marigonën dhe ndëshkim maksimal për vrasësit”, thuhet në njoftim.

    Kjo organizatë në njoftim e ka përshkruar  aktakuzën e Prokurorisë ndaj Krivaqës dhe Sejdiut, duke shtuar se vrasjen nuk mund ta harrojë për shkak të dhunës mizore që u ushtrua ndaj viktimës.

    “Dhuna mizore të cilën e ushtroi Krivaqa me ndihmën e Sejdiut ndaj Marigonës deri kur e vrau dhe humbja e saj na e bën të pamundur të harrojmë. Ne nuk mund të harrojmë që Marigona do të mund të ishte gjallë sot nëse shteti do ta mbronte me kohë atë. Të indinjuar/a e me shumë dhimbje, ne mblidhemi këtë të premte dhe thërrasim në drejtësi për Marigonën”, thuhet tutje në njoftimin e organizatës, të cilët kanë paralajmëruar udhëtim të organizuar nga Prishtina.

    Ndryshe, të martën në Gjykatën Themelore të Ferizajt është dhënë fjala përfundimtare, me ç’rast Prokuroria dhe mbrojtja e palës së dëmtuar, kanë kërkuar dënimin e Dardan Krivaqës dhe Arbër Sejdiut, të akuzuar për dhunimin dhe vrasjen e Marigona Osmanit.

    Në seancën e 24 janarit 2023, gjyqtari i çështjes Sahit Krasniqi, ka aprovuar propozimin e avokatit mbrojtës, Admir Salihu, që të bëhej një ekzaminim psikiatrik ndaj Dardan Krivaqës. Ndërsa, në raportin e ekzaminimit psikiatrik të Institutit të Forenzikës, të cilin e ka pranuar gjykata në fjalë, është konstatuar se i akuzuari për vrasjen e 18-vjeçares, nuk ka ndonjë çrregullim apo sëmundje mendore të karakterit psikotik.

    Gjyqtari i çështjes, Sahit Krasniqi më 2 shtator 2022,  ka marrë aktvendim në bazë të së cilit i ka refuzuar kërkesat për hudhje të aktakuzës dhe kundërshtimet e provave, të parashtruara nga mbrojtja e të akuzuarve, ndërsa të akuzuarve Krivaqa dhe Sejdiu, iu konfirmua aktakuza.

    Kurse, më 23 gusht 2022, “Betimi për Drejtësi” ka raportuar se mbrojtësit e të akuzuarve Dardan Krivaqa dhe Arbër Sejdiu, të cilët ngarkohen për vrasjen e 18-vjeçares Marigona Osmani në gusht të vitit 2021, kanë kërkuar hudhjen e aktakuzës.

    Ndryshe, më 14 korrik 2022, është mbajtur seanca fillestare ku Dardan Krivaqa ka shfrytëzuar të drejtën të mbrohet në heshtje, kurse Arbër Sejdiu, është deklaruar i pafajshëm.

    Krivaqën prokuroria e ngarkon me veprën penale vrasje e rëndë dhe dhunim, kurse Sejdiu po akuzohet për veprën penale vrasje e rëndë dhe ndihmë në kryerjen e dhunimit.

    Sipas aktakuzës, i pandehuri Dardan Krivaqa më 21 gusht 2021, rreth orës 10:14, në banesën e tij në rrugën “Ramadan Rexhepi”, në Ferizaj, pa pëlqimin e tani të ndjerës Marigona Osmani, e kishte detyruar të njëjtën për të kryer marrëdhënie seksuale, e cila siç thuhet në aktakuzë përcillet me tortura.

    Gjithnjë sipas aktakuzës, aty thuhet se i pandehuri Krivaqa fillimisht pa dëshirën e tani të ndjerës ka kryer marrëdhënie seksuale në sallon, pas kryerjes së aktit seksual të njëjtën të zhveshur e kishte dërguar në banjo, nga aty me dhunë e kishte dërguar në dhomën e gjumit, mirëpo me kalimin e kohës për shkak të gjendjes së rëndë shëndetësore tani e ndjera Marigona Osmani si pasojë e dhunës së ushtruar kishte humbur aftësinë për të rezistuar, e ku në dy raste në mbrëmje kishin kryer marrëdhënie seksuale, pastaj i pandehuri Dardan të zhveshur e kishte dërguar në banjë, e ku i vërehen edhe lëndimet në trup.

    Me këtë, akuzohet se ka kryer veprën penale “Dhunimi” nga neni 227, par. 4, nënpar 4.1, lidhur me par.1 të Kodit Penal.

    Sipas dispozitivit të dytë të kësaj aktakuze, i pandehuri Arbër Sejdiu më 21 gusht 2021, në banesën e të pandehurit të parë në rrugën “Ramadan Rexhepi”, në Ferizaj, me dashje i kishte ndihmuar të pandehurit Dardan Krivaqa në kryerjen e veprës penale të dhunimit.

    Sipas aktit akuzues thuhet se fillimisht dy të pandehurit kishin kontaktuar përmes telefonit dhe ishin takuar në qytet, pastaj së bashku ishin kthyer në banesë, ku i pandehuri Arbër posa kishte arritur, duke qenë në dijeni se i pandehuri Dardan është duke e dhunuar tani të ndjerën Marigona Osmani, me dashje kishte marrë veprime me të cilat lehtësohet kryerja e dhunimit.

    Tutje thuhet se dy të pandehurit së bashku kishin hyrë në dhomën ku kryhet dhunimi, e ku e ndjera ishte e zhveshur, e të cilin veprim gjatë qëndrimit në banesë e merr disa herë, po ashtu dhe gjatë asaj kohe kishte përcjellë gjendjen nëse ndonjë nga banorët është duke lëvizur aty pari.

    Siç e përshkruan aktakuza, i pandehuri Arbër Sejdiu po ashtu edhe disa herë kishte dalë nga banesa për të blerë gjëra ushqimore, ndërsa gjatë gjithë kohës dy të pandehurit kishin biseduar mes vete, kështu tutje, të pandehurit Dardan Krivaqa i kishte dhënë telefonin për të thirrë kompaninë e cila menaxhon kamerën, që ishte e vendosur në korridorin e banesës me qëllim që të fshihen video-incizimet, gjegjësisht provat e veprës penale.

    Me këtë, Sejdiu akuzohet se ka kryer veprën penale “Ndihmë në kryerjen e dhunimit” nga neni 227, par 4, nënpar. 4.1, lidhur me par. 1 dhe nenin 33 të Kodit Penal.

    Kjo aktakuzë në dispozitivin e III-të, dy të pandehurit Dardan Krivaqa dhe Arbër Sejdiu i ngarkon për veprën penale të vrasjes së rëndë në bashkëkryerje.

    Aty thuhet se më 22 gusht 2021, në banesën e të pandehurit Dardan Krivaqa, në rrugën “Ramadan “Rexhepi”, në Ferizaj, me dashje dhe në bashkëkryerje, me qëllim të fshehjes së veprës penale dhunimi e kanë privuar nga jeta tani të ndjerën Marigona Osmani, me të cilën i pandehuri i parë ishte në bashkësi jashtëmartesore.

    Tutje, sipas aktakuzës, përshkruhet se në intervale kohore nga ora 10:56 deri në orën 14:43, i pandehuri i parë kishte marrë një shkop, e së bashku me të pandehurin e dytë kishin hyrë në dhomë dhe kishin filluar ta godasin tani të ndjerën në pjesë të ndryshme të trupit, me ç’rast të njëjtës i kanë shkaktuar dhimbje të mëdha fizike dhe psiqike, ku nga goditjet e njëjta ka pësuar politrauma-lëndime të shumëfishta, ku vdekja shkaktohet drejtpërdrejt nga asfiksia mekanike, si dhe shoku hemorragjik dhe traumatik, të cilat janë pasojë e gjakderdhjes së jashtme dhe gjakderdhjes së brendshme, nga thyerja e ashtit të nofullës së poshtme, thyerja e brinjëve, klavikulës së majtë, unazave të qafës, gjakderdhjes epidurale dhe subdurale në pjesën e pasme të trurit të madh dhe në trurin e vogël, këputje parciale të palcës së kurrit në qafë, të njëjtën e dërgojnë në Spitalin e Përgjithshëm – Qendrën Emergjente në Ferizaj dhe largohen nga aty.

    Me këtë, akuzohen se në bashkëkryerje kanë kryer veprën penale “Vrasja e rëndë” nga neni 173, par. 1, nënpar. 1.3, 1.4 dhe 1.7, lidhur me nenin 31 të Kodit Penal.

    Ndryshe, dosja e plotë e Prokurorisë, të cilën e ka siguruar “Betimi për Drejtësi”, tregon në detaje se si ka ndodhur i gjithë rasti.

  • ​“Rinia largohet, Rozeta pasurohet”, të rinjtë e PDK-së kërkojnë dorëheqjen e Hajdarit

    ​“Rinia largohet, Rozeta pasurohet”, të rinjtë e PDK-së kërkojnë dorëheqjen e Hajdarit

    Të rinjtë e Partisë Demokratike të Kosovës, sot (e mërkurë) përmes një aksioni simbolik para Ministrisë së Industrisë, Ndërmarrësisë dhe Tregtisë kanë kërkuar dorëheqjen e ministres Rozeta Hajdari e përfshirë në disa incizime si e dyshuar që qëndron mbrapa disa keqpërdorimeve në lidhje me rezervat shtetërore.

    “Vaji dhe Polonia, si Rozeta e hajnia!”; “Rinia largohet, Rozeta pasurohet”; “Ju me zemër, na pa bukë!” – ishin disa nga parullat e aksionit të sotëm të RDK-së.

    Kryetarja e Rinisë Demokratike të Kosovës, Arbnora Salihu tha se MINT në krye me ministren Rozeta Hajdari deri tani ka shpërfaqur vetëm keqmenaxhim e abuzim të parasë publike.

    “Përgjimet që lidhen specifikisht me vajin e sheqerin dëshmojnë se kjo ministri ka blerë vaj e sheqer mbi 300 mijë euro prej një kompanie polake, paret i kanë dhënë por vaji, sheqeri e gruri nuk janë kurrkund. Ne po i zhvillojmë këtë aksion simbolik sepse kjo ministri në krye me Rozetën nuk ka treguar rezultat deri më tani por ka treguar vetëm keqmenaxhim e abuzim të parasë publike”, tha Salihu.

    Të rinjtë e PDK-së kërkuan dorëheqjen e menjëhershme të Rozeta Hajdarit dhe nga organet e rendit t’i hetojnë ato që i quajti si skandale korruptive.

    “Po shihet qartë që Qeveria Kurti me skandale të njëpasnjëshme nuk është duke pasur kohë e as nuk e ka prioritet rininë. Andaj, ne kërkojmë dorëheqjen e menjëhershme të Rozeta Hajdarit dhe kërkojmë nga organet e rendit të hetojnë mbi këto skandale korruptive”, tha Salihu.

    Të rinjtë më pas janë larguar paqësisht nga shkallët e Ministrisë së Industrisë ndërsa aty lanë parullat me të cilët protestuan ndaj ministres Hajdari. /kp

  • Polonia thotë se Bjellorusia e shkeli hapësirën e saj ajrore, çon më shumë ushtarë në kufi

    Polonia thotë se Bjellorusia e shkeli hapësirën e saj ajrore, çon më shumë ushtarë në kufi

    Ministria e Mbrojtjes e Polonisë ka thënë se helikopterët luftarakë të Bjellorusisë që kryen ushtrime ushtarake afër kufirit, e kanë shkelur hapësirën ajrore të Polonisë më 1 gusht.

    Ministria tha në një komunikatë se i ngarkuari me punë i Bjellorusisë do të thirret në Ministrinë e Jashtme të Polonisë për t’i shpjeguar rrethanat e incidentit.

    Në komunikatë thuhej se helikopterët bjellorusë kaluan në hapësirën ajrore polake në një lartësi shumë të ulët, duke e bërë të vështirë detektimin e tyre.

    Ministri i Mbrojtjes i Polonisë, Mariusz Blaszczak, e mblodhi në një takim Komitetin e Sigurisë Kombëtare dhe Mbrojtjes, për të biseduar për këtë çështje, ku edhe urdhëroi rritjen e numrit të ushtarëve në kufi, përfshirë edhe helikopterët luftarakë.

    Polonia tha se NATO-ja është njoftuar për këtë incident.

    Ministria e Mbrojtjes e Bjellorusisë tha se akuzat për shkelje të hapësirës ajrore nga dy helikopterë të ushtrisë bjelloruse “janë të fabrikuara”.

    Kjo Ministri tha në Telegram se ato u shpikën nga lidershipi politiko-ushtarak i Polonisë “për ta arsyetuar shtimin e forcave dhe resurseve afër kufirit me Bjellorusinë”.

    Polonia, Lituania dhe vendet e tjera në pjesën lindore të NATO-s, kanë shprehur shqetësimin e tyre për një kërcënim të mundshëm nga Bjellorusia, e cila tani strehon mijëra trupa të grupit mercenar, Wagner.

    Mijëra mercenarë të Wagner-it kanë mbërritur në Bjellorusi që nga rebelimi jetëshkurtër i këtij grupi në qershor.

    Kryeministri i Polonisë, Mateusz Morawiecki, tha më 29 korrik se një grup prej “100 mercenarëve të Wagner-it” në Bjellorusi janë zhvendosur më afër kufirit polak, duke e quajtur këtë “hap tjetër drejt sulmit hibrid në territorit polak”. /rel

  • ​Peticioni për largimin e kryetarëve, Krasniqi: Një muaj kohë për Udhëzimin administrativ

    ​Peticioni për largimin e kryetarëve, Krasniqi: Një muaj kohë për Udhëzimin administrativ

    Ministri i Administrimit të Pushtetit Lokal, Elbert Krasniqi deklaroi sot se grupi punues ka një muaj kohë për të hartuar udhëzimin administrativ, për nisjen e peticionit të qytetarëve për largimin e kryetarëve nga komunat. Sipas tij, ky udhëzim administrativ nuk është për veriun e Kosovës dhe se nuk është i përpiluar në atë formë për largimin e kryetarëve nga zyrat. Kështu u shpreh ai pas vizitës në dy salla sportive ne Lipjan.

    Ai tha se Ligji për Vetëqeverisje Lokale ka shumë mangësi dhe hapësirë të korrigjohet, por për plotësim-ndryshim nevojiten edhe 2/3 e votave të komuniteteve. Sipas tij, së fundmi kanë filluar udhëzimin administrativ mbi procedurat se si organizohet një peticion në komuna, ku ka kërkesë nga qytetarët për largim nga komunat.

    Krasniqi shtoi se grupi punues ka kohë një muaj për draftimin e udhëzimit administrativ, ku qytetarët do të kenë mundësi hartimin e peticionit.

    “Kemi formuar një grup punues profesional nga akterët e përfshirë në qeverisjen lokale edhe të shohim se cila do të jetë puna e tyre…Grupi punues ka afat një muaj që ta bëjë draftin e këtij udhëzimi administrativ, faktikisht të përfundojë edhe konsultimet publike dhe mandej të jetë nga 1 shtatori si udhëzim administrativ, në të cilën mund të referohen qytetarët, të cilët kanë për qëllim organizimin e peticioneve apo largimin e kryetarëve. Mirëpo, çka është shumë e rëndësishme të përmendet, ky nuk është një udhëzim administrativ për veriun e Kosovës, është një udhëzim administrativ, i cili buron prej Ligjit për Vetëqeverisje Lokale dhe një gjë të tillë nesër qytetarët edhe të komunës së Lipjanit mund ta shfrytëzojnë për pakënqësinë e tyre në raport me kryetarin e komunës dhe largimin e kryetarit të komunës përmes një peticioni”, deklaroi ai.

    Më tej, ministri u shpreh se udhëzimi administrativ e përcakton rregullin se si organizohet peticioni.

    “Udhëzimi administrativ përcakton rregullin se si organizohet peticioni, se si një peticion i inicuar nga qytetarët është i pranueshëm. Mirëpo, përpilimi i peticionit nuk është largimi i kryetarëve nga zyret, për shkak se pas kësaj ka edhe procedura tjera…Ne kemi kryetarë të komunave në zyre, kjo është me rëndësi…peticioni është shprehje e vullnetit të 20 për qind të trupës votuese të një komune. Nëse në një komunë të caktuar qytetarët e asaj komune arrijnë të kenë 20 për qind të trupës votuese me kërkesën që të largohet kryetari i komunës, atëherë do të trajtohet si kërkesë. Nëse nuk do të ketë, atëherë kjo do të mbetet aty dhe kryetarët vazhdojnë të punojnë”, tha ai.

    Sa i përket largimit të kryetarëve të komunave, Krasniqi shtoi se të njëjtit kanë fituar mandat dhe dorëheqja e tyre është kërkesë e Serbisë.

    “Unë nuk mund të flas për Listën Serbe, por çfarë mund të them për situatën aktuale është që çkado që ata veprojnë dhe mendojnë, asnjëherë nuk është për të mirën e Republikës së Kosovës. Ne kemi zgjedhje legale të organizuar në veriun e Kosovës, bazuar në kushtetutën dhe ligjet aplikative. Ne e dimë që këto zgjedhje kanë prodhuar kryetarët komune me mbështetje të vogël të qytetarëve, por prapë se prapë këta janë kryetarë të komunave, të cilët burojnë nga vota e lirë. Pengesa që të marrin pjesë qytetarët e veriut të Kosovës në zgjedhje është nga Serbia. Dhe kjo Serbi dhe këto instirucionet e saj që i ka në dispozicion për të penguar zhvillimin demokratik të Kosovës, do të vazhdojnë gjithmonë. Për ata na duhet të fokusohemi në punën tonë, në demokracinë e shtetit tonë dhe forcimin e shtetit tonë. Udhëzimi administrativ do të parasheh disa procedura, mirëpo udhëzimi administrativ nuk është një diçka që definon secilin pozicion përtej asaj që është kompetencë e vetëqeverisjes lokale”, u shpreh ai.

    Kryetari i Lipjanit, Imri Ahmeti tha se duhet të krijohet një zgjidhje në veri të Kosovës, e cila sipas tij, është çështje politike e jo ligjore.

    “Nuk besoj që ky mekanizmi i peticionit është mjet adekuat për të zgjidhur problemet politike. Për shkak se kjo mund të riciklohet pas tre muajve të mbahen zgjedhjet, pas tre muajve prapë peticion tjetër. Derisa nuk ka një peticion, i cili do të provon me i zgjidh këto situata është vështirë për të komentuar…Ne nuk kemi parë një udhëzim administrativ, i cili do të ketë parasysh për të qenë në kuadër të rregullativës ligjore shtetërore. Çështja e veriut është çështje politike, nuk është çështje e legjislacioneve”, deklaroi ai./KP

  • ​AGK: Vetëvendosje të mos bëjë presion ndaj gazetarëve të mediumit publik

    ​AGK: Vetëvendosje të mos bëjë presion ndaj gazetarëve të mediumit publik

    Asociacioni i Gazetarëve të Kosovës, përmes një komunikate për media, tha se ka ndjekur me shqetësim presionin publik që deputetë të Vetëvendosjes kanë bërë ndaj gazetares së RTK-së, Edona Podvorica, e cila e ka bojkotuar konferencën për shtyp të ministres së MINT, Rozeta Hajdari, bashkë me shumicën e kolegëve të mediave të tjera.

    Deputeti Valon Ramadani ka shkruar se “si duket, ky institucion i qenka shmangur obligimit ligjor, duke mos qëndruar në konferencën e Ministres Rozeta Hajdari”. Në vijë të njëjtë ka shkruar edhe deputeti tjetër i Vetëvendosjes, Enver Dugolli, kurse të tjerë eksponentë të partisë në pushtet i kanë bërë jehonë këtyre qëndrimeve duke kërkuar largimin nga puna të gazetares.

    AGK-ja, e konsideron bojkotin e së martës, si formë legjitime të protestës së gazetarëve dhe mediave, dhe fton partinë në pushtet të mos bëjë presion ndaj gazetarëve të mediumit publik.

    Gjithashtu, AGK-ja e fton menaxhmentin e RTK-së të mos ndikohet nga presioni i pushtetit në raportim me veprimin e ekipit të vet në terren.

  • ​Opozita pasive në Kuvend, adresoi vetëm 68 pyetje parlamentare

    ​Opozita pasive në Kuvend, adresoi vetëm 68 pyetje parlamentare

    Kuvendi i Kosovës ka përmbushur vetëm 13 për qind të agjendës legjislative të vitit 2023, thuhet në raportin e publikuar sot nga Instituti Demokratik i Kosovës(KDI).

    Sipas këtij raporti Kuvendi gjatë këtij gjysmë viti miratoi 44 ligje, mirëpo pjesa dërmuese e tyre ishin të bartura nga viti i kaluar.

    Në bazë të gjetjeve të KDI-së del se opozita nuk ka qenë mjaft aktive gjatë këtij sesioni pranveror, pasi deputetët e tyre kryesojnë sa i përket mungesave në seanca plenare, ndërkaq nga 171 pyetje parlamentare vetëm 68 sosh janë bërë nga opozita ndaj ekzekutivit.

    Hulumtuesi në KDI, Arbër Thaçi, në publikimin e këtij raporti të mërkurën, tha se sesioni pranveror i Kuvendit është karakterizuar nga shumë të papritura, me përmbajtje të llojllojshme dhe shumë sfida.

    “Shumë prej tyre nuk janë projektligje që i takojnë agjendës legjislative të vitit 2023. Vetëm 17 nga këto janë projektligje apo marrëveshje ndërkombëtarë që janë të përfshira në agjendën e këtij viti, të tjerat i takojnë viteve paraprake. Prandaj mund të themi se në përqindje diku vetëm 13 për qind e planit legjislativ të vitit 2023 është përmbushur gjatë këtij sesioni. Një nga problemet të cilën duhet të evidentojmë ka qenë mungesa e deputetëve, e cila ka shkaktuar vazhdimisht problemin e mungesës së kuorumit. Në bazë të gjetjeve tona mesatarisht në secilën seancë 22.5 për qind e deputetëve kanë munguar. Trendet janë varësisht prej partive politike, në këtë rast partitë opozitare tregojnë shifra më të larta të mungesave. LDK ka diku 22 për qind të deputetëve që i mungojnë, PDK ka rreth 19 për qind, LVV ka nëntë për qind”, tha ai.

    Ndërkaq, hulumtuesja tjetër në KDI, Violeta Haxholli tha se Kuvendi ka dështuar edhe në rolin mbikëqyrës ndaj Qeverisë së Kosovës.

    “Sa i përket rolit mbikëqyrës të Kuvendit, fatkeqësisht nuk ka qenë shumë i kënaqshëm aktiviteti i deputetëve gjatë këtij sesioni. Në përgjithësi deputetët i kanë parashtruar ndaj ekzekutivit 171 pyetje parlamentare, por këtu hynë edhe pyetje të cilat janë përsëritur disa herë për shkak të mungesës së ministrave në seanca. Deputetët e partisë në pushtet kanë parashtruar më shumë pyetje. Kjo në vetvete paraqet problematik, pasi tregon se deputetët e opozitës nuk kanë qenë shumë aktiv në parashtrimin e pyetjeve parlamentare gjatë ekzekutivit. Kështu PDK-ja ka parashtruar 45 pyetje, LDK ka parashtruar 10 pyetje dhe AAK 13 pyetje. Të gjitha pyetjet parlamentare i kanë parashtruar vetëm 38 deputetë të Kuvendit, ndërsa 82 deputetë nuk kanë parashtruar fare pyetje që është shqetësuese”, tha ai.

    Më korrekti në përgjigjen e pyetjeve sipas KDI-së ka qenë kryeministri Albin Kurti, duke iu përgjigjur të gjithave, ndërkaq më të papërgjegjshëm del të jenë ministri Punëve të Brendshme dhe Administratës Publike, Xhelal Sveçla që nuk i është përgjigjur asnjë pyetje dhe ministrja e Punëve të Jashtme dhe Diasporës, Donika Gërvalla.

    Në raportin e KDI-së për punën e Kuvendit evidentohet edhe gjuha joparlamentare, ku kërkohet nga kryetari i Kuvendit, Glauk Konjufca të jetë më rigoroz në dënimin e deputetëve.

    Po ashtu u shprehën shqetësime lidhur me mungesën e transparencës së Kuvendit ndaj publikut, përfshirë mungesën e votimit elektronik, mos publikimin e votave me dorë, dhe mos publikimin e rregullt të procesverbaleve të mbledhjeve të komisioneve parlamentare dhe atyre Ad-Hoc.

    Në fund, KDI ofroi disa rekomandime për Kuvendin dhe deputetët, duke theksuar nevojën për planifikim të mirëfilltë të seancave, pjesëmarrje të rregullt të deputetëve në punimet e Kuvendit, zgjerim të konsensusit dhe gjithëpërfshirjes për Reformën në Drejtësi, rritje të mbikëqyrjes ndaj ekzekutivit, adresimin e gjuhës jo parlamentare dhe garantimin e transparencës së Kuvendit ndaj publikut./kp

  • KDI: Kuvendi përmbushi vetëm 13% të agjendës legjislative të vitit 2023

    KDI: Kuvendi përmbushi vetëm 13% të agjendës legjislative të vitit 2023

    Kuvendi i Kosovës ka përmbushur vetëm 13 për qind të agjendës legjislative të vitit 2023, thuhet në raportin e Institutit Demokratik të Kosovës (KDI).

    Sipas KDI-së, pjesa dërrmuese e 44 ligjeve të miratuara gjatë sesionit pranveror kanë qenë të agjendës së vitit të kaluar.

    Violeta Haxholli nga KDI, në një konferencë për medie sot tha se legjislativin gjatë këtij sesioni e ka karakterizuar mungesa e kourumit dhe gjuha joparlamentare./KP

  • Tentim vrasje në Podujevë, një burrë sulmohet me armë sa ishte duke lëvizur me veturë

    Tentim vrasje në Podujevë, një burrë sulmohet me armë sa ishte duke lëvizur me veturë

    Një tentim vrasje ka ndodhur dje në Podujevë. Policia ka njoftuar se një burrë është sulmuar me armë zjarri gjatë kohës sa ishte në lëvizje me veturën e tij, nga persona deri më tani të panjohur.

    “Podujevë 01.08.2023 – 05:20. Ankuesi mashkull kosovar ka raportuar se deri sa ka qenë në lëvizje me veturën e tij, nga i/të dyshuar deri më tani  të panjohur është gjuajtur me armë në drejtim te veturës së tij”, thuhet në raportin e Policisë.

    Tutje, Policia njoftoi se në vendin e ngjarjes nga njësitë policore janë gjetur katër gëzhoja të cilat janë konfiskuar si dhe kanë vërejtur se vetura e ankuesit ishte goditur me dy predha. Vetura është sekuestruar për ekzaminim te mëtutjeshëm.

    LEXONI EDHE:

    Vritet një shtetase argjentinase në Fushë-Kosovë, arrestohet i dyshuari zviceran

  • Vritet një shtetase argjentinase në Fushë-Kosovë, arrestohet i dyshuari zviceran

    Vritet një shtetase argjentinase në Fushë-Kosovë, arrestohet i dyshuari zviceran

    Ka ndërruar jetë në Qendrën Klinike Universitare të Kosovës (QKUK), një shtetase e Argjentinës, e cila ishte dyshohet se ka rënë nga lartësia e një objekti, në Fushë-Kosovë.

    Ky rast nga Policia e Kosovës është cilësuar si vrasje, derisa për këtë është arrestuar një shtetas zviceran.

    “Nga QKUK-ja është raportuar se ka ndërruar jeta viktima femër shtetase e Argjentinës si pasojë e lëndimeve të marra, që dyshohet se ka rënë nga një lartësi e objektit ku ka qenë duke qëndruar së bashku me te dyshuarin mashkull shtetas Zvicran”, thuhet në raportin e Policisë.

    Tutje, bëhet e ditur se me vendim të prokurorit kujdestar, trupi i pa jetë i viktimës është dërguar në Institutin e Mjekësisë Ligjore, për obduksion, ndërsa i dyshuari është arrestuar dhe dërguar në mbajtje.

    Policia njoftoi se rasti është në procedurë hetimore.

  • Pritje deri në një orë te Dheu i Bardhë dhe në Merdarë

    Pritje deri në një orë te Dheu i Bardhë dhe në Merdarë

    Pika kufitare mes Kosovës dhe Serbisë, Dheu i Bardhë dhe Merdarë, vazhdon të jetë e ngarkuar nga fluksi i madh i bashkatdhetarëve që po kalojnë përmes kësaj pike kufitare, e cila ua mundëson hyrjen dhe daljen në territorin e Kosovës.

    Kështu bëhet e ditur në të dhënat e publikuara nga Qendra Kombëtare për Menaxhim Kufitar.

    Pritjet për në hyrje te Dheu i Bardhë zgjasin 30 minuta, ndërkaq në dalje prej 45 deri në 60 minuta.

    Ndërsa, sa i përket pikë kalimit kufitar në Merdarë, pritjet për hyrje zgjasin 15 deri 20 minuta, ndërkaq për të dal nga kjo pikë kufitare pritjet zgjasin 45 deri 60 minuta.

    Kolona në hyrje të kësaj pike raportohet të jetë tek Dheu i Bardhë nga 100 metra për hyrje, po ashtu edhe për dalje.

    Kolona për hyrje në Kosovë përmes pikës kufitare në Merdarë arrijnë deri në 100 metra kolonë, ndërsa për dalje 150 deri në 200 metra kolonë.

    Ndërsa, në vendkalimet e tjera kufitare, nuk ka probleme të pritjeve të gjata, bashkatdhetarët hyjnë dhe dalin nga Kosova me pritje të shkurtër prej 3 deri në 5 minuta.