ATV

Category: Lajme

  • Ministria e Tregtisë paralajmëron padi pas aferave të fundit: Po tentohet denigrimi i figurës së Hajdarit

    Ministria e Tregtisë paralajmëron padi pas aferave të fundit: Po tentohet denigrimi i figurës së Hajdarit

    Ministrja e Industrisë, Ndërmarrësisë dhe Tregtisë, Rozeta Hajdari, ka reaguar pas publikimit të aferës “Vaji” dhe aferës “Gruri”, ku hedhën dyshime për keqpërdorime për blerjen e mallrave në rezervat shtetërore.

    Në një reagim në Facebook, MINT-i i ka quajtur “fryerje” dhe “shpifje” audioincizimet e publikuara nga Nacionale, gjatë ditëve të fundit.

    Sipas MINT, audio-incizimet e transmetuara janë tendencioze dhe të pavërteta. Kjo ministri thotë se po tentohet denigrimi i figurës së ministres Hajdari.

    “Ministria e Industrisë, Ndërmarrësisë dhe Tregtisë njofton opinion publik se, të gjitha procedurat në lidhje me furnizimin me mallra për rezervë shtetërore janë zhvilluar dhe vazhdojnë të trajtohen bazuar në legjislacionin në fuqi, duke përfshirë Ligjin Për Rezervën Shtetërore të Republikës së Kosovës, Ligjin mbi Ndarjet Buxhetore për Buxhetin e Republikёs sё Kosovёs pёr vitin 2022, Ligjin për Mbrojtjen e Informacionit të Klasifikuar dhe Vendimin e Qeverisë së Republikës së Kosovës nr.01/65 të datës 26.02.2022”, thuhet në reagimin e MINT-it.

    Po ashtu, MINT teksa ka mohuar keqpërdorimet, ka paralajmëruar se “ka ndërmarrë të gjitha veprimet ligjore për denoncimin e shpifjeve dhe fyerjeve tek organet e Drejtësisë dhe njëherit ofron bashkëpunimin e plotë me të gjitha institucionet kompetente për çështjen në fjalë”.

    Njoftimi i plotë i MINT:

    Sqarim për publikun:

    SHPIFJET NË DËM TË SIGURISË KOMBËTARE DO TË DENONCOHEN DHE PËRBALLEN ME DREJTËSINË

    Ministria e Industrisë, Ndërmarrësisë dhe Tregtisë, reagon lidhur me shpifjet dhe fyerjet e publikuara në një nga portalet mediatike, përmes përgjimeve të orkestruara dhe të transmetuara gjatë ditëve të fundit.

    Ministria e Industrisë, Ndërmarrësisë dhe Tregtisë (MINT) sqaron opinionin publik se, thashethemet e përdorura në audio-incizimet e transmetuara janë tendencioze dhe të pavërteta, duke aluduar për keqpërdorim të Rezervës Shtetërore dhe duke i shërbyer një kauze politike me qëllim të dëmtimit të procesit më të ndjeshëm për mbrojtje dhe siguri shtetërore dhe më qëllim denigrimin e figurës së Ministres Rozeta Hajdari, uljen e reputacionit dhe imazhin publik të saj.

    Ministria e Industrisë, Ndërmarrësisë dhe Tregtisë njofton opinion publik se, të gjitha procedurat në lidhje me furnizimin me mallra për rezervë shtetërore janë zhvilluar dhe vazhdojnë të trajtohen bazuar në legjislacionin në fuqi, duke përfshirë Ligjin Për Rezervën Shtetërore të Republikës së Kosovës, Ligjin mbi Ndarjet Buxhetore për Buxhetin e Republikёs sё Kosovёs pёr vitin 2022, Ligjin për Mbrojtjen e Informacionit të Klasifikuar dhe Vendimin e Qeverisë së Republikës së Kosovës nr.01/65 të datës 26.02.2022.
    Në vitin 2021, MINT ka shpallur tri herë procedurat e prokurimit për të blerë një sasi të Rezervës Shtetërore, nga të cilat një procedurë e prokurimit ka përfunduar me sukses, ndërsa dy procedura të prokurimit kanë dështuar, për shkak të mos ofertimit nga operatorët ekonomik.

    Në tremujorin e parë të vitit 2022, furnizimi me mallra të Rezervës Shtetërore, bazike për jetën e qytetarëve, është trajtuar si çështje e sigurisë kombëtare, në kohën kur filloi lufta në Ukrainë dhe kur gjendja e furnizimit të Rezervës Shtetërore në vendin tonë gjendej në sasi më të vogël, të nevojshme për jetesën dhe mbrojtjen e popullsisë, në rast të ndonjë krize për furnizim.

    Gjersa lufta në Ukrainë, solli ndërprerje të zinxhirëve të furnizimit dhe mungesë të mallrave bazike, për shkak të ndalesës së eksporteve nga shumë vende, rritjes së inflacionit global dhe çmimeve, Qeveria e Republikës së Kosovës, me kërkesë të MINT, rriti buxhetin për Rezervën Shtetërore dhe mori vendim për përjashtimin nga procedurat e prokurimit për furnizim me produkte të Rezervës Shtetërore të Mallrave, sipas legjislacionit të lartëpërmendur në fuqi.

    Rezervat shtetërore të mallrave krijohen për të ndërhyrë në mënyrë operative për mbrojtjen e popullsisë, ekonomisë në rast të çrregullimit të tregut, mbrojtjes së vendit dhe situatave tjera të përcaktuara në nenin 2 të Ligjit nr. 03/l-244 për rezervat shtetërore të mallrave.

    Përkundër ndikimit të luftës në Ukrainë me ndalesa të eksporteve dhe ndërprerje të zinxhirëve të furnizimit të mallrave bazike për jetesë, MINT, përmes Departamentit të Rezervave Shtetërore dhe Mallrave-DRSHM, ka rritur sasinë e rezervave për 30 fish më shumë, duke rritur kështu sigurinë kombëtare.

    MINT siguron se procesi i furnizimit me mallra për Rezervën Shtetërore, me standarde dhe parametra të përcaktuara të cilësisë, është duke u trajtuar dhe monitoruar sipas legjislacionit në fuqi dhe se nuk ka asnjë keqpërdorim të parasë publike. Kontratat e rezervës shtetërore janë të klasifikuara në nivelin sekret, sipas legjislacionit përkatës në fuqi.

    Ministria është e përkushtuar të vazhdojë me rritjen e Rezervës Shtetërore edhe në këtë vit, sipas Ligjit mbi Ndarjet Buxhetore për Buxhetin e Republikёs sё Kosovёs pёr vitin 2023, me qëllim që të sigurojë qytetarët që në rrethana të jashtëzakonshme të kenë përkrahjen shtetërore në tejkalimin e situatave eventuale të krizës.

    Ministria e Industrisë, Ndërmarrësisë dhe Tregtisë ka ndërmarrë të gjitha veprimet ligjore për denoncimin e shpifjeve dhe fyerjeve tek organet e Drejtësisë dhe njëherit ofron bashkëpunimin e plotë me të gjitha institucionet kompetente për çështjen në fjalë.

  • Rashiq i tregon pritjet e tij nëse serbët mund t’i “rrëzojnë” kryetarët veriorë në peticion

    Rashiq i tregon pritjet e tij nëse serbët mund t’i “rrëzojnë” kryetarët veriorë në peticion

    Pjesëmarrja e serbëve në peticion dhe zgjedhje, raportet me kryetarët e katër komunave veriore dhe opsioni i dorëheqjes së tyre për t’i hapur rrugë zgjedhjeve të parakohshme në Veri, janë disa nga çështjet për të cilat ka folur ministri për Komunitete dhe Kthim, Nenad Rashiq.

    Rreth 20 ditë më parë, Kryenegociatori Besnik Bislimi dhe lehtësuesi i dialogut Miroslav Lajçak u dakorduan për shtensionimin e situatës në Veri. Në njërën prej pikave ata u morën vesh për shpalljen e zgjedhjeve në Veri që do të mbahen pas “stinës së verës”. Pas kritikave të ndërkombëtarëve se nuk po bën lëvizje për të hapur rrugën drejt zgjedhjeve, Qeveria Kurti ka vendosur për hartimin e udhëzimit administrativ për t’i larguar kryetarët e komunave.

    Përderisa Kosova e ka mbështetur peticionin për shpalljen e zgjedhjeve të reja, BE ka thënë se mënyra më e lehtë do të ishte nëse kryetarët japin dorëheqje, gjë të cilën Kurti ka thënë se nuk do e kërkojë.

    Për opsionin e peticionit, ministri për Komunitet dhe Kthim, Nenad Rashiq, tha se në “këtë moment” nuk ka interes të posaçëm nga ana e qytetarëve serbë për të marrë pjesë në peticionin për shkarkimin e kryetarëve të Mitrovicës së Veriut, Zubin Potokut, Leposaviqit dhe Zveçanit. Kjo për shkak se është kohë pushimesh dhe nuk ka vullnet maksimal.

    Pjesëmarrja e serbëve në peticion, sipas ministrit Rashiq, varet “fatkeqësisht nga një vullnet pozitiv i Beogradit”.

    “Sa e di unë nuk ka interes të posaçëm për këtë peticion në këtë moment tash, por kjo nuk do të thotë që kur të përgatitet ajo si peticion, ndoshta deri në atë kohë ndryshohet me dijeni të qytetarëve atje dhe ndoshta marrin pjesë në peticion. Tash për momentin, po ta kishim organizuar peticionin kish dështu, sepse është koha e pushimeve, vullneti nuk është në nivelin maksimal. Prandaj varet prej momentumit. Fatkeqësisht varet nga një vullnet pozitiv ose të gatishmërisë nga ana e Beogradit që prapë nuk shkon gjithqysh në favor të, qoftë pajtimit mes popujve, qoftë në dizajnimin e politikës autoktone të serbëve të Kosovës. Andaj, fatkeqësisht procesi po komplikohet pa arsye dhe në këtë aspekt, unë absolutisht përkrah, siç ka thënë ministri Krasniqi sot që kjo vjen kur organizohet një udhëzim administrativ i tillë, kjo vjen pastaj për më shumë kohë. Por nga ana tjetër, momentumi tash për tash, nuk është i pjekur për një gjë të tillë, prandaj nuk mund të parashikoj se çfarë mund të ndodh për shembull nëse ndodh në fillim të shtatorit, në këtë moment nuk mund të vlerësoj se a do të marrin serbët pjesë a jo”, ka thënë Rashiq për Express.

    Ministri i emëruar nga Kurti pas dorëheqjes së Rakiqit, është deklaruar edhe për daljen e serbëve në zgjedhjet e parakohshme në Veri. Ai tha se “gjithqysh” do të ketë një nivel të interesimit që ata të marrin pjesë në zgjedhje.

    Ai vlerëson se janë krijuar disa kushte normale që të ketë pjesëmarrje eventuale të serbëve në zgjedhje.

    “Gjithqysh kemi me pasë një nivel të interesimit që të marrin pjesë, nuk mund të them që do të jetë 100 për qind por me siguri që do të ketë organizata politike ose grupacione formale ose joformale që të marrin pjesë në zgjedhje sepse e dimë që në këtë moment janë krijuar disa kushte normale dhe kështu që në disa komuna do të ketë pjesëmarrje eventuale të serbëve. Por prapë, po ritheksoj, që në këtë moment, vullneti ose gatishmëria është e ulët, por kjo nuk do të thotë që do të kemi për një muaj një interes më të madh”, është shprehur Rashiq.

    Rashiq thotë se ka komunikim të mirë me kabinetet e dy komunave në Veri, që udhëhiqen nga kryetaret nga VV, Erden Atiq në Mitrovicë të Veriut dhe Lulzim Hetemi në Leposaviq. Mirëpo, njëjtë nuk mund të thuhet për kryetarët e dy komunave tjera, Izmir Zeqiri në Zubin Potok dhe Ilir Peci në Zveçan, që vijnë nga PDK.

    Ai deklaroi se nuk ka pasur komunikime zyrtare me ta, por shprehu gatishmërinë që të komunikojë me ta.

    “Në Leposaviq kemi qenë pjesë e disa rekomandimeve të emërimit të personave në kabinetin e kryetarit, kemi komunikim të mirë edhe me kabinetin e kryetarit të Mitrovicës së Veriut… Jo nuk kemi pasur komunikime zyrtare, por normalisht që jam i gatshëm që të komunikoj në çdo formë apo në çdo nivel të komunikimit. Unë jam aty që të bashkëpunoj, jo vetëm me komunitetet serbë, por edhe me komunitetet tjera që janë aty”, deklaroi ai.

    Rashiq është pyetur edhe për opsionin favorit të BE-së për shpalljen e zgjedhjeve të parakohshme – dorëheqja e kryetarëve. Këtë opsion, ai e konsideroi si një veprim strategjik.

    “Unë kisha konsideruar si një veprim strategjik nëse kryetarët mund të ofrojnë dorëheqje se atë opsion ne e kemi një iniciativë, ose më mirë të them, institucionet e Kosovës nëse e kemi për qëllim integrimin e serbëve në veri, po të kishin dhënë dorëheqje kryetarët, ne do të kishim pas iniciativë të dizajnimit të skenës politike në Veri”, tha ai.

    Dje u bë publike se Ministria e Administrimit të Pushtetit Lokal si përgjegjëse e çështjeve të pushtetit lokal ka filluar me përgatitjen e procedurave që do të mundësonin largimin e kryetarëve nga komunat veriore.

    Kjo ministri tashmë ka caktuar grupin punues për hartimin e Udhëzimit Administrativ për caktimin e procedurave për iniciativën e qytetarëve për largimin e kryetarëve të komunave.

    Sipas vendimit të nënshkruar nga ministri, Elbert Krasniqi, ky grup duhet ta finalizojë projekt udhëzimin administrativ deri më 1 shtator 2023.

  • Zelensky shpreson që në vjeshtë të mbahet samiti për paqe

    Zelensky shpreson që në vjeshtë të mbahet samiti për paqe

    Presidenti i Ukrainës, Volodymyr Zelensky, tha se shpreson që një “samit i paqes” i Ukrainës mund të mbahet gjatë vjeshtës së këtij viti, duke shtuar se bisedimet që do të mbahen gjatë kësaj në Arabinë Saudite do të jenë një hap i rëndësishëm drejt arritjes së këtij qëllimi.

    Zelensky u tha diplomatëve ukrainas, sipas një fjalimi të publikuar në ueb-faqen e Presidencës të Ukrainës, se pothuajse 40 shtete do të marrin pjesë në takimin në Xhedah që do të mbahet më 5 dhe 6 gusht.

    “Po punojmë që samiti të mund të mbahet gjatë vjeshtës”, tha ai.

    “Vjeshta është shumë afër, por ende ka kohë për t’u përgatitur për samitin dhe për të përfshirë në të shumicën e shteteve të botës”.

    Zelensky dhe ekipi i tij po punojnë me aleatët për të ndërtuar një mbështetje më të gjerë për “samitin për paqe” në të cilin do të miratoheshin parimet për të mbështetur një zgjidhje për t’i dhënë fund pushtimit të plotë të nisur nga Rusia pothuajse 18 muaj më parë.

    Samiti është paraparë të bazohet në planin 10-pikësh të prezantuar nga Kievi vjeshtën e kaluar, plan që është promovuar në mënyrë aktive nga Zelensky.

    Vizioni i tij për paqe kërkon rivendosjen e plotë të integritetit territorial të Ukrainës dhe tërheqjen e plotë të trupave ruse, mbrojtjen e sigurisë së ushqimit dhe energjisë, sigurinë bërthamore dhe lirimin e të gjithë të burgosurve.

    Ende nuk ka pajtim se ku do të mund të mbahej ky samit.

    Zyrtarët ukrainas dhe perëndimorë kanë thënë se Rusia nuk do të përfshihet në këtë samit. /rel

  • Policia amerikane thotë se nuk kishte sulmues në Kongres

    Policia amerikane thotë se nuk kishte sulmues në Kongres

    Policia amerikane nuk ka gjetur asnjë sulmues dhe asnjë person nuk është lënduar pas raportimeve se mund të ketë pasur një sulmues aktiv në kompleksin e Kongresit amerikan.

    Policia nisi hetimet dhe doli në vendin e ngjarjes pas një telefonate të pranuar më 2 gusht.

    “Na erdhi një telefonatë për një sulmues aktiv. Duket se ishte informacion i rremë. Nuk ka të lënduar dhe asnjë sulmues nuk është lokalizuar”, tha zëdhënësi i policisë në Uashington, Hugh Carew.

    Senati amerikan është në pushim veror dhe shumica e ligjvënësve nuk gjenden në Uashington. Megjithatë, në zyrat e Kongresit ka staf.

    Po ashtu, dhjetëra punonjës në kafiteritë dhe pikat e kontrollit në Senat punojnë gjatë verës, sikurse edhe punonjësit e mirëmbajtjes. Kjo ndërtesë po ashtu vizitohet edhe nga turistë.

    Më herët, policia u bëri thirrje personave që gjendeshin brenda zyrave të Senatit që të mos dilnin.

    “Nëse jeni brenda ndërtesës së Senatit, të gjithë që gjenden brenda duhet të qëndrojnë brenda pasi ka raportim për një sulmues të mundshëm aktiv. Theksojmë se nuk kemi asnjë raport të konfirmuar për të shtëna”, tha policia e Kapitolit përmes një postimi në rrjetet sociale.

    Më herët, një këshilltar i policisë së Kongresit amerikan u bëri thirrje personave që gjenden brenda zyrave të qëndrojnë brenda dhe të pajisjen me pajisje për emergjenca. Po ashtu, ai kërkoi që ata të ndalin zërin e pajisjeve elektronike.

    Jashtë ndërtesës së Kongresit amerikan u pa prani e madhe e forcave policore.

  • Si po zhduken gjurmët e luftës?

    Si po zhduken gjurmët e luftës?

    Rreth 100 metra larg varreve të dy djemve të saj, në fshatin Mejë të Gjakovës, në jugperëndim të Kosovës, guri përkujtimor i Pashke Markajt – nënës e cila e dogji veten me benzinë në vitin 2003, katër ditë pasi i varrosi dy djemtë e saj – mbeti i përmbysur.

    Gjevalin dhe Milan Markaj ishin në mesin e 376 civilëve shqiptarë, të vrarë nga forcat serbe, në masakrën e Mejës, në prillin e vitit 1999.

    Trupat e tyre u gjetën në varrezën masive në Batajnicë, në afërsi të Beogradit, në Serbi, në vitin 2001, bashkë me më shumë se 700 trupa të kosovarëve të vrarë nga forcat serbe, gjatë luftës së viteve 1998-’99.

    Në vitin 2004, një vit pasi Pashke Markaj dogji veten, familjarët, në pajtim me pronarin e një toke private në fshatin Korenicë të Gjakovës, vendosën një gur përkujtimor, në vendin ku ajo u vetëflijua.

    Ky gur përkujtimor qëndroi në këtë tokë deri më 21 korrik 2023, kur pronari i tokës vendosi ta largonte atë.

    “Asnjë shenjë nuk ka qenë aty. Vetëm guri. Është vizituar nga njerëzit që e kanë ditur historinë”, thotë nipi i Pashkes, Liridon Marku, për Radion Evropa e Lirë.

    Në mungesë të përkujdesjes institucionale, ky monument, që familjarët thonë se për ta përfaqëson dhimbje e mërzi, u hodh skaj rrugës, pranë një grumbulli mbeturinash, në dalje të fshatit Mejë.

    Pronari i tokës ku ishte i vendosur guri – e me të cilin Radio Evropa e Lirë nuk arriti të kontaktonte – nuk i bëri publike arsyet se pse vendosi ta largonte gurin përkujtimor pas 19 vjetësh.

    Pasi largimi i gurit bëri bujë në media, Agjencia për Menaxhimin e Monumenteve dhe Komplekseve Memoriale në Kosovë e mori nën përkujdesje këtë monument, dhe e dërgoi atë përkohësisht në kompleksin e martirëve, në Mejë.

    Aty, edhe sot, guri rri i përmbysur.

    U mor në mbrojtje, por u la i përmbysur në Mejë
    Derisa familja Marku mendon se guri përkujtimor i Pashkes do të “peshonte” më së miri në vendin ku ajo vrau veten, Ministria e Kulturës, Rinisë dhe Sportit (MKRS) në Kosovë tha se guri përkujtimor do të qëndrojë përkohësisht në Kompleksin Memorial “27 Prilli”, në Mejë, deri në një zgjidhje të përhershme.

    Agjencia për Menaxhimin e Monumenteve dhe Komplekseve Memoriale, e cila vepron në kuadër të kësaj ministrie, është zotuar se “do të sigurohet që, në pajtim me ligjin, të ndërmarrë të gjithë hapat e nevojshëm për ofrimin e zgjidhjes së duhur, duke ruajtur vlerat shpirtërore, historike”.

    Memorialet, pa përkujdesje dhe pa informacione për vizitorët
    Guri përkujtimor i Pashke Markajt nuk është monumenti i vetëm pa përkujdesje institucionale në Kosovë.

    Janë edhe dhjetëra objekte dhe monumente të tjera, të lidhura me ngjarjet e luftës së viteve 1998-’99, që nuk gëzojnë kurrfarë përkujdesje.

    Fondi për të Drejtën Humanitare i Kosovës, në një studim të publikuar në vitin 2022, kishte identifikuar 12 vende të krimit, të cilat nuk janë të shënjuara askund, dhe që janë pak të njohura për publikun.

    Aty përmenden: Burgu i Smerkonicës në Vushtrri, Spitali i Prishtinës, Ura e Lluzhanit, Xhamia e Krushës së Madhe, Varrezat masive, Stacioni i autobusëve, Stacioni i trenit në Fushë-Kosovë, Kufiri me Shqipërinë, si dhe disa lokacione të tjera.

    Asnjë nga këto vende, në të cilat janë kryer krime të luftës, si dhe në të cilat janë vrarë civilë, kryesisht shqiptarë, nuk janë të shënuara si monumente që i takojnë trashëgimisë së luftës së fundit.

    Drejtori i Fondit për të Drejtën Humanitare të Kosovës, Bekim Blakaj, thotë se shënimi dhe mbrojtja e këtyre objekteve dhe monumenteve do të ndihmonte në pasurimin dhe ruajtjen e kujtesës kolektive.

    Blakaj sugjeron formimin e një komisioni profesional, që do të duhej t’i vlerësonte të gjitha memorialet që janë ngritur pas luftës.

    “Secili memorial që i plotëson kriteret bazike pastaj do të duhej të merrej në përkujdesje të shtetit”, vlerëson Blakaj.

    Profesori i Departamentit të Historisë në Universitetin e Prishtinës “Hasan Prishtina”, Durim Abdullahu, thotë se shoqëria në Kosovë jeton e rrethuar nga trashëgimia e luftës së fundit, por “duke qenë se ajo është pothuajse e kudondodhur, ka ngelur e patrajtuar”.

    Abdullahu e cilëson të rëndësishëm ndërtimin e mekanizmave institucionalë shtetërorë, përmes të cilëve do të mbrohej trashëgimia e luftës, pasi që, siç thotë ai, në shumë pak raste janë shënuar vendet ku kanë ndodhur vrasje e masakra gjatë luftës së viteve 1998-’99.

    “Shteti i Kosovës duhet të krijojë një hartë me të gjitha vendet e masakrave dhe të projektojë një program të integruar të shënimit të vendeve të masakrave dhe të luftimeve”, konsideron Abdullahu.

    Në shumë vende ku kanë ndodhur krime, dhe ku ka memoriale në Kosovë, nuk ka shënime adekuate për ngjarjen.

    Mungojnë tabela me tekst apo versione digjitale, përmes së cilave do të mund të shpjegohej historia e masakrave, viktimave dhe vetë historia e luftës.

    Zhdukja graduale e trashëgimisë së luftës
    Lufta në Kosovë zyrtarisht ka përfunduar në qershor të vitit 1999. Por, që nga kjo kohë, Kosova nuk ka krijuar një bazë të dhënash të sakta të personave të vrarë.

    Bazë të dhënash nuk ka as për shtëpitë e djegura, as për vendet ku janë kryer krimet, e as për dëmet e tjera të luftës.

    Në muajin korrik, Kuvendi i Kosovës miratoi Projektligjin për Institutin e krimeve të kryera gjatë luftës në Kosovë. Përmes këtij vendimi, Kosova, për herë të parë, do të themelojë një institut të tillë, i cili ka për qëllim dokumentimin e krimeve të kryera gjatë luftës në Kosovë, nga 1 janari i vitit 1998 deri më 20 qershor të vitit 2000.

    Dokumentimin e krimeve të luftës, ky institut pritet ta bëjë nga aspekti historik, ushtarak, ekonomik, juridik, ekologjik, kulturor, mjeko–ligjor dhe sociologjik.

    Gjatë luftës në Kosovë, në periudhën 1998-’99, llogaritet se janë vrarë më shumë se 13.500 njerëz.

    Në tërë territorin e Kosovës llogaritet të kenë ndodhur rreth 400 masakra./rel

  • Zgjedhjet përmes iniciativës së qytetarëve, si test dhe arsyetim te votuesit

    Zgjedhjet përmes iniciativës së qytetarëve, si test dhe arsyetim te votuesit

    Situata me kryetarët e zgjedhur më 23 Prill në Mitrovicë të Veriut, Zveçan, Leposaviq dhe Zubin Potok, u bë shkak që Qeveria të themelojë grupin për hartimin e udhëzimit administrativ për procedurat për largimin e kryetarëve të komunave.

    Por, vendimin për hartimin e këtij akti nënligjor të lidhur me Ligjin për Vetëqeverisje Lokale – opinionistët e shohin nga pikë-vështrime të ndryshme.

    Pasi shkaktimin e zgjedhjeve përmes mbledhjes së nënshkrimeve të qytetarëve dhe votimit për shkarkim të kryetarëve, e vlerësoi si rrugën më të logjikshme,
    profesori Seb Bytyçi theksoi se një dorëheqje mund të ndryshojë rrjedhën.

    Mbledhja e nënshkrimeve, sipas tij, do të ishte provë për Listën Serbe.

    Teksa vendimin e vlerësoi si iniciativë të pasinqertë të kryeministrit për arsyetim para votuesve, opinionisti Fidan Ukaj tha se barrikadimi nuk i solli Kosovës rezultate pozitive, por masa ndëshkuese.

    Në vend të iniciativës, Ukaj theksoi se kryeministri është dashur t’i inkurajojë kryetarët të japin dorëheqje, për t’i përmbushur kërkesat e SHBA-së dhe BE-së.

    Javën e kaluar, kryeministri Albin Kurti tha se do të punojnë për sigurimin e bazës ligjore për shkaktimin e zgjedhjeve të reja në veri, përmes iniciativës së qytetareve – në pajtim me ligjin. /atvlive.tv

    Edicionin Qendror të lajmeve në ATV e gjeni një videon më poshtë:

  • Vrasja e Oliver Ivanoviq, Prokuroria e mbrojtja s’pajtohen për mënyrën e shikimit të video incizimeve

    Vrasja e Oliver Ivanoviq, Prokuroria e mbrojtja s’pajtohen për mënyrën e shikimit të video incizimeve

    Hard-diskun me 63 GB xhirime, nga kamerat e sigurisë që ishin të vendosura në Mitrovicë të Veriut, prokurori special Burim Qerkini ia dorëzon trupit gjykues që po e shqyrton gjykimin për vrasjen e Oliver Ivanoviqit.

    Janë më shumë se 400 GB video-incizime, përfshirë ato në ditën kritike, kur u gjet i vrarë ish-politikani serb para selisë së tij. Por për të kursyer kohën në këtë proces që është afër përfundimit, prokurori tha se kanë ndarë vetëm sekuencat më të rëndësishme.

    Por, me Prokurorinë nuk u pajtuan të akuzuarit, përveç avokati i Rade Basara, Tomë Gashi, i cili tha se ato nuk janë relevante për klientin e tij.

    Megjithatë, Prokuroria Speciale insistoi se këto prova mbrojtja i ka poseduar qysh në fillim të këtij procesi, gjë që u pohua nga një koleg i tyre.

    Rreth shikimit të materialit, Gjykata i ofroi mbrojtjes dy mundësi.

    Kështu u vendos që deri në tetor, kur edhe do të mbahen seancat e radhës, mbrojtja do të analizojë materialin, i cili më pas do të administrohet. Pas kësaj faze pritet fjala përfundimtare, e më pas edhe shpallja e aktgjykimit.

    Gjykimi për vrasjen e Ivanovicit kishte filluar në vitin 2020. Ivanoviq ishte gjetur i vdekur para selisë së partisë që e drejtonte, në janar të 2018-ës. /atvlive.tv

    Edicionin Qendror të lajmeve në ATV e gjeni një videon më poshtë:

  • Udhëzimi administrativ për zgjedhjet në veri vlen për të gjitha komunat

    Udhëzimi administrativ për zgjedhjet në veri vlen për të gjitha komunat

    Procedura ligjore për organizimin e zgjedhjeve, përmes iniciativës qytetare do të vlejë për të gjitha komunat e Kosovës. Ministri i Administrimit të Pushtetit Lokal, Elbert Krasniqi, një ditë pasi Ministria që ai drejton, njoftoi për themelimin e grupit punues që do ta hartojë udhëzimin administrativ, tha se ka shumë hapësirë për korrigjimin e Ligjit për Vetëqeverisje Lokale.

    Sipas ministrit, dorëheqja e kryetarëve nuk mund të kërkohet, por duhet ndjekur procedurat ligjore, sikurse peticioni.

    “Kemi formuar një grup punues profesional nga akterët e përfshirë në qeverisjen lokale edhe të shohim se cila do të jetë puna e tyre… Grupi punues ka afat një muaj që ta bëjë draftin e këtij udhëzimi administrativ, faktikisht të përfundojë edhe konsultimet publike dhe mandej të jetë nga 1 shtatori si udhëzim administrativ, në të cilin mund të referohen qytetarët, të cilët kanë për qëllim organizimin e peticioneve apo largimin e kryetarëve”, tha Krasniqi..

    Ai ka theksuar se për shkak të mosplotësimit të kushteve për votim për ndryshimin e ligjit, Ministria ka gjetur udhëzime administrative që mund t’i fusë në funksion.

    “Udhëzimi administrativ përcakton rregullin se si organizohet peticioni, se si një peticion i iniciuar nga qytetarët është i pranueshëm. Mirëpo, përpilimi i peticionit nuk është largimi i kryetarëve nga zyrat, për shkak se pas kësaj ka edhe procedura të tjera… Ne kemi kryetarë të komunave në zyrë, kjo është me rëndësi… peticioni është shprehje e vullnetit të 20 për qind të trupës votuese të një komune”, tha Krasniqi.

    Ministria e Administrimit të Pushtetit Lokal, të martën, njoftoi për themelimin e Grupit Punues për hartimin e Udhëzimit Administrativ, për caktimin e procedurave për largimin e kryetarëve të komunave.

    Ky Udhëzim Administrativ shtron rrugën për zgjedhjet e reja lokale në katër komunat e veriut, kërkesë kjo e bashkësisë ndërkombëtare dhe obligim që rrjedh nga marrëveshja mes zëvendëskryeministrit Besnik Bislimi dhe emisarit për dialogun Kosovë-Serbi, Mirosllav Lajçak, për shtensionimin e situatës në veri. /atvlive.tv

    Edicionin Qendror të lajmeve në ATV e gjeni një videon më poshtë:

  • Të rinjtë e Partisë Demokratike të Kosovës kanë mbajtur një aksion simbolik

    Të rinjtë e Partisë Demokratike të Kosovës kanë mbajtur një aksion simbolik

    Pasi disa incizime në të cilat punëtorët e Ministrisë së Tregtisë dëgjohen duke folur për pagesa prej 200 mijë eurosh, që Ministria i ka bërë nga buxheti i rezervave shtetërore, për vaj, grurë e sheqer, të rinjtë e PDK-së mbajtën një aksion protestues.

    “Përgjimet që lidhen specifikisht me vajin e sheqerin, dëshmojnë se kjo ministri ka blerë vaj e sheqer mbi 300 mijë euro prej një kompanie polake, paret i kanë dhënë por vaji, sheqeri e gruri nuk janë kurrkund. Ne po e zhvillojmë këtë aksion simbolik, sepse kjo ministri në krye me Rozetën nuk ka treguar rezultat deri më tani, por ka treguar vetëm keqmenaxhim e abuzim të parasë publike”, tha Arbnora Salihu nga RDK.

    Këta të rinj kërkuan edhe dorëheqjen e ministres Rozeta Hajdari.

    “Po shihet qartë që Qeveria Kurti me skandale të njëpasnjëshme nuk është duke pasur kohë e as nuk e ka prioritet rininë. Andaj, ne kërkojmë dorëheqjen e menjëhershme të Rozeta Hajdarit dhe kërkojmë nga organet e rendit të hetojnë mbi këto skandale korruptive”, tha Salihu.

    Protesta e organizuar para Ministrisë përfundoi e qetë, por qetësinë dikush ia prishi kryetares së të rinjve të PDK-së, Arbnora Salihu.

    Salihut derisa po merrte pjesë në këtë aksion, dikush ia theu xhamin e veturës dhe i vodhi gjësende personale të saj e të aktivistëve të tjerë. /atvlive.tv

    Edicionin Qendror të lajmeve në ATV e gjeni një videon më poshtë:

  • Shitësit përfitojnë nga 30 centë nga shtrenjtimi i naftës

    Shitësit përfitojnë nga 30 centë nga shtrenjtimi i naftës

    Ani pse Ministria e Industrisë, Ndërmarrësisë dhe Tregtisë ditë më parë ka marrë vendim për vendosjen e çmimit tavan për produktet e naftës, vendimi nuk po zbatohet as dy ditë pas publikimit në gazetën zyrtare.

    Kësisoj naftëtarët po shesin naftë deri në 30 centë më shtrenjtë derisa blihet me më pak se 1 euro e 16 centë. Nëpër disa pika të karburantit, çmimi i naftës gjatë ditës ishte 1 euro e 43 centë për litër.

    Shoqata e naftëtarëve, në një përgjigje të shkurtër për ATV-në, tha se janë ankuar në Ministrinë përkatëse.

    “Ne kemi bërë ankesë në MINT dhe për më tutje do të vendosë kuvendi i Shoqatës së Naftëtarëve”, tha kryetari i Shoqatës së Naftëtarëve, Fadil Berjani.

    Sidoqoftë, një rritje e tillë në çmimin e naftës përkundër se nuk ka rritje në bursë, sipas ekspertëve të ekonomisë, është e papranueshme, pasi naftëtarët fitojnë shumë duke dëmtuar qytetarët.

    Andaj, sipas tij, gjendja dëshmon se ka mungesë të kontrolleve dhe se shfrytëzohet diaspora.

    Ndryshe, në vetëm një muaj, çmimi i naftës është rritur mbi 20 centë. /atvlive.tv

    Edicionin Qendror të lajmeve në ATV e gjeni një videon më poshtë: