Ministria e Mbrojtjes ka treguar se Forcat e Sigurisë së Kosovës (FSK), për dy vjet kanë 1 mijë e 836 ushtarë më shumë.
Kjo ministri ka publikuar një video ku tregon për rekrutimet në ushtri.
Në këtë video FSK-ja quhet ushtria e Adem Jasharit.
Po ashtu, ministria që udhëhiqet nga Armend Mehaj vazhdimisht krenohet se kanë rritur buxhetin për ushtri.
Së fundmi janë krenuar edhe me blerjen e dronëve “bayraktar” nga ana e Turqisë.
Një sherr me thika ka ndodhur mbrëmjen e të enjtes në Kune të Shëngjinit.
Një 50-vjeçar i identifikuar si Selim Bllaca me origjinë nga Kosova ka mbetur i plagosur nga një person tjetër H. B. 66 vjeç, po nga Kosova, i cili është arrestuar.
I plagosuri ka marrë plagë në zemër dhe ka marrë ndihmën e parë mjekësore në spitalin e Lezhës, ndërsa mësohet se gjendja e tij është rënduar.
Thika është sekuestruar, ndërsa vijojnë veprimet nga grupi hetimor për zbardhjen e plotë të rrethanave të ngjarjes dhe dokumentimin ligjor të saj.
Gjatë natës së sotme ka ndodhur një ngjarje tronditëse, ku një 18-vjeçare dyshohet se ka rënë nga lartësia e një objekti, dhe si pasojë ka ndërruar jetë.
Zëdhënësi i Policisë së Kosovës në rajonin e Prishtinës, Agron Borovci ka bërë të ditur për Insajderin se ngjarja ka ndodhur në rrugën “Sali Nivica”, dhe se vdekjen e viktimës e ka konstatuar mjekët emergjent.
“Rreth orës 20:30, është raportuar se në rrugën “Sali Nivica” në Prishtinë, një person ka rënë nga lartësia e një objekti. Policia menjëherë ka dalë në vendin e ngjarjes ku ka ftuar edhe mjekët emergjent të cilët kanë konstatuar se personi, femër, rreth 18 vjeç, është pa shenja jete.” – ka bërë të ditur Borovci
Ai tutje ka njoftuat se policia ka nisur hetimet për të zbardhur rastin.
“Aktualisht policia ka nisur punën për zbardhjen e plotë të të gjitha rrethanave që karakterizojnë ngjarjen.” – ka përfunduar Borovci.
Për një injeksion, qytetarët nganjëherë udhëzohen në Emergjencën e QKU-së.
“Ç’ka s’pi bojn në QKMF po duhet këtu me ardh me i bo. Me udhëzim ma kan dhënë , e kom ardhë e kom marr injeksionin”, thotë një pacient.
Por, janë mbi 350 pacientë të tjerë të cilët vetë, brenda një dite kërkojnë trajtim mjekësor në Emergjencë.
Përpos motit të nxehtë, sipas drejtorit të Klinikës, Naser Syla, në shtimin e numrit të pacientëve ndikuan edhe rastet jourgjente, të cilat po referohen nga Qendra Kryesore e Mjekësisë Familjare në Prishtinë.
“Është e vërtetë që gjatë sezonit kemi rritje të fluksit të pacientëve. Gjatë qershorit dhe korrikut, numri është rritur pasi brenda një dite kemi mbi 350 raste e më shumë. Ndërkohë, kemi vetëm 20 shtretër, jo që jemi të ngarkum por jemi të stërngarkuar. Çka është më shqetësuese është se nga kujdesi primar po vijnë shumë raste, mundemi me thënë që prej rasteve rreth 40% janë raste jourgjente. Është një çështje që duhet të diskutohet nga MSh-ja e SHSKUK-ja, me drejtorinë e mjekësisë primare”, tha drejtori i Klinikës së Emergjencës në QKUK, Naser Syla.
Por, kryeshefi i mjekësisë familjare në QKMF thotë se përqindja e pacientëve të cilët referohen në Emergjencë është shumë e ulët.
“Sipas hulumtimit tonë të realizuar për përqindjen e referimit në kujdesin tretësor, ne referojmë vetëm 12,8 % derisa e kemi të lejuar në 20%. Numri i rasteve që shkojnë në emergjencë mund të jetë nga ata të cilët shkojnë nga shtëpitë e tyre, pa udhëzim të mjekut familjar. Gjithashtu numri që rezulton nga Prishtina në QKUK në klinikën emergjente është si pasojë e mungesës së spitalit regjional në Prishtinë”, thuhet në përgjigjen e kryeshefit të Mjekësisë Familjare të QKMF-së në Prishtinë, Valdet Hashani.
Vetëm brenda 6 muajve të këtij viti në Klinikën e emergjencës, trajtim mjekësor kanë marrë rreth 50 mijë pacientë, ndërkohë aty punojnë vetëm 5 specialistë të mjekësisë. /atvlive.tv
Edicionin Qendror të lajmeve në ATV e gjeni në videon më poshtë:
Gjykata Kushtetuese i ka shpallur të pranueshme ankesat e deputetëve të PDK-së dhe të LDK-së për Ligjin për Zyrtarët Publikë, teksa ka konstatuar se është pjesërisht antikushtetues.
“Në lidhje me përmbajtjen e Ligjit të kontestuar, Gjykata njëzëri ka vendosur që (i) kriteri “i përshtatshmërisë’ i përcaktuar në paragrafët 2 dhe 5 të nenit 9 (Kriteret e përgjithshme për pranimin në detyrë të zyrtares/it publik) nuk është në përputhshmëri me paragrafin 1 të nenit 3 [Barazia para Ligjit] dhe paragrafin 1 të nenit 7 [Vlerat] të Kushtetutës”, thuhet në vendimin e Gjykatës Kushtetuese.
Megjithatë, organi më i lartë juridik në vend, i hapi rrugë dekretimit të këtij ligji.
“Bazuar në konstatimet e mësipërme, Gjykata gjithashtu vendosi: (i) të konstatojë që në bazë të nenit 43 (Afati) të Ligjit për Gjykatën Kushtetuese, Ligji i kontestuar i dërgohet presidentes së Republikës së Kosovës për shpallje, pa dispozitat e konstatuara në kundërshtim me Kushtetutën dhe sipas specifikave të përcaktuara në Aktgjykimin e Gjykatës”, thuhet në vendimin e Gjykatës Kushtetuese.
Reagimi i opozitës në lidhje me vendimin e Gjykatës Kushtetuese që i menjëhershëm, duke e cilësuar fitore të demokracisë.
“Ky aktgjykim i Gjykatës Kushtetuese, për të shtatën herë me radhë konfirmon veprimtarinë dhe aktivitetin antikushtetues të kësaj qeverie dhe paraqet në të njëjtën kohë, goditje të drejtpërdrejtë të tendencave dhe përpjekjeve të pushtetit autokratik të Albin Kurtit për të kapur dhe nënshtruar administratën shtetërore dhe ta kthejë në çerdhe të militantëve, familjarëve dhe partisë së tij”, thuhet në reagimin e PDK-së.
“Për tri vjet qeverisje, partia në pushtet ka shkelur 4 herë Kushtetutën, derisa janë edhe disa ligje që janë në pritje të vendimit nga Gjykata Kushtetuese. Këto shkelje tregojnë më së miri mospërkushtimin e kësaj Qeverie për shtetin e së drejtës”, thuhet në reagimin e LDK-së.
Ligji për Zyrtarët Publikë nga Qeveria u pa si pika kyçe për reformën e administratës publike dhe rrjedhimisht adresimin e nevojave të shoqërisë.
Ndryshe më parë, Kushtetuesja kishte konstatuar se ministrja e Arsimit, Arbërie Nagavci, kishte ndërhyrë në kompetencat e Komunës së Kamenicës për reformën në arsim, derisa Ligji për Këshillin Prokurorial ishte rrëzuar.
Ndërkohë, në shqyrtim, kjo Gjykatë e ka edhe Ligjin për Pagën Minimale, pas dërgimit nga Aleanca për Ardhmërinë e Kosovës. /atvlive.tv
Edicionin Qendror të lajmeve në ATV e gjeni në videon më poshtë:
Sinisa Jevtic, ish-ushtar i Serbisë, pjesëmarrës në betejën e Koshares, i cili u arrestua në maj në veri, pasi iu bashkua protestave të dhunshme, nuk do të ketë të drejtë të hyjë më në Kosovë.
Ai, bashkë me policin Ivan Sekuliq, janë shpallur fajtorë të enjten nga Gjykata Themelore e Prishtinës, një ditë pasi kishin pranuar fajësinë për akuzat për huliganizëm dhe armëmbajtje pa leje.
Pranimi i fajësisë është vlerësuar si rrethanë lehtësuese nga gjykata dhe dënimi në pajtim me të akuzuarit iu është zëvendësuar me gjobë.
Ivan Sekuliqit iu shqiptua dënimi unik me gjobë prej 9.000 eurosh, teksa gjyqtari tregoi edhe çfarë i është konfiskuar. Ndërkaq, mbrojtja u shpreh e gatshme të paguajë dënimin menjëherë.
Sinisha Jevtiq e Ivan Sekuliq, shtetas të Serbisë, ishin arrestuar më 30 maj në pikën kufitare në Jarinjë.
Gati dy muaj pas, Prokuroria Speciale ngriti aktakuzë, sipas së cilës Jevtiq e Sekuliq
në Leposaviq, të armatosur u ishin bashkangjitur protestave të dhunshme që u organizuan kundër kryetarëve të zgjedhur në katër komunat veriore.
Në atë protestë, siç edhe përshkruhet në aktakuzë, ishin lënduar së paku 30 pjesëtarë të KFOR-it dhe ishin djegur vetura të gazetarëve.
Ndërkohë, siç kishte raportuar edhe ATV-ja, Sinisa Jevtic para nisjes për Kosovë, kishte shpërndarë mesazhe përkrahëse të sulmeve ndaj KFOR-it dhe Policisë.
Gjithashtu, ai kishte shpërndarë njoftime që bëjnë thirrje për mobilizim të veteranëve të ushtrisë serbe, për, siç thuhet, “çlirimin përfundimtar të tokës së shenjtë” – referuar Kosovës.
Por ishte arrestuar vetëm pak orë pasi kishte hyrë në territorin e Kosovës. /atvlive.tv
Edicionin Qendror të lajmeve në ATV e gjeni në videon më poshtë:
“I uniformuar, e ndalon Besim Muhaxherin dhe i drejtohet me fjalët: ku po i dërgon këto cigare? UÇK-së a? Tash të tregoj unë”.
Kështu përshkruhet në aktakuzën e Prokurorisë Speciale se iu drejtua Besim Muhaxherit, duke e kërcënuar edhe me jetë, ish-polici, tani i akuzuar për krime lufte, Zlatan Arsiq.
Sipas aktit akuzues, Arsiq nuk u ndalua me kaq dhe në bashkëkryerje me pjesëtarë të tjerë të policisë serbe dhe grupeve paramilitare, mori pjesë në dëbimin dhe torturimin e civilëve shqiptarë në Kamenicë dhe në qytetet në rrethinë.
Por, 42-vjeçari në shqyrtimin fillestar që u mbajt të enjten në Gjykatën Themelore të Prishtinës, ka mohuar se mori pjesë në keqtrajtimin e shqiptarëve gjatë muajve shkurt – mars të vitit 1999.
Arsiq i cili u arrestua në mars të këtij viti, punonte në Policinë e Kosovës që nga viti 2006 dhe jetonte në Ajnovc të Kamenicës.
Ndërkohë, mbrojtja ka kërkuar zbutjen e masës së paraburgimit me arsyetimin se vajza e tij është në gjendje të rëndë shëndetësore.
Megjithatë, sipas Prokurorisë, kjo nuk duhet të pranohet nga Gjykata për shkak të peshës së veprës penale dhe mosbashkëpunimit juridik me Serbinë, pasi i akuzuari ka nënshtetësinë edhe të Serbisë dhe ekziston rreziku që ai të arratiset.
Rasti, sipas Prokurorisë, ka qenë duke u hetuar nga viti 2015, kur EULEX-i kishte në kompetencë hetimin e krimeve të luftës. /atvlive.tv
Edicionin Qendror të lajmeve në ATV e gjeni në videon më poshtë:
Korrupsion, krizë me aleatët e kriza të brendshme janë akuzat që Partia Demokratike e Kosovës pati në drejtim të Qeverisë. Madje, për të gjitha këto, partia më e madhe opozitare ka kërkuar hetime.
Sipas nënkryetares së PDK-së, Vlora Çitaku, kryeministri Kurti po i shkel të gjitha parimet e dhëna nga vetë ai.
“E vetmja gjë që ka prodhuar kryeministri Kurti tani pothuajse tri vjet në pushtet, është një cikël i pafund i krizave, të cilat kanë rezultuar në polarizime të brendshme dhe në acarimet e skajshme me aleatët tanë. Kjo vetëm Kosovës nuk i konvenon, vetëm interesit publik nuk i konvenon dhe nuk po flas këtu vetëm për dëmin politik, po flas edhe për dëmin në fushën e ekonomisë, frikën që ka ndjellë kjo qeveri tek investitorët, frikën që kemi ndjellë tek aleatët si partnerë kredibilë dhe të besueshëm. E vetmja gjë konsistente te kryeministri Kurti ka qenë mungesa e konsistencës, sot e thotë një gjë, i rendit 10 parime, nesër i shkel ato”, tha Çitaku.
Sipas Çitakut, të vetmit që po vuajnë pasojat nga keqmenaxhimi janë qytetarët.
“Çdo ditë e më shumë, po rrënohet aura e epërsisë morale, të cilën LV-ja ia kishte veshur vetes, si parti me duar të pastra. Faktet po tregojnë që këto kanë qenë vetëm fraza boshe. Audio-incizimet po tregojnë edhe për presionin e madh që po u bëhet administratës publike dhe shërbyesve civilë, jo për ta respektuar ligjin, por për ta shkelur atë. Derisa aferat po shtohen, keqpërdorimet e detyrës zyrtare po prekin të gjitha institucionet e kësaj Qeverie, fatkeqësisht, janë qytetarët të cilët po i vuajnë pasojat. Rritja e çmimeve, papunësia dhe varfëria, janë tri problemet më të mëdha me të cilat po ballafaqohen qytetarët tanë sot! Në vend të zgjidhjeve, kjo Qeveri ka ofruar vetëm cikle të pafundme të krizave dhe skandaleve. Edhe një herë, po e ripërsëris thirrjen për institucionet e hetuesisë dhe drejtësisë që të veprojnë”, tha Çitaku.
Në konferencën e Çitakut ishte shpallur edhe një pllakat me, siç i quajti ajo, skandalet e Qeverisë, ndërsa nënkryetarja e PDK-së u shpreh se janë edhe tri pika meqë nuk ka pllakat që i zë të gjitha skandalet e ekzekutivit. /atvlive.tv
Edicionin Qendror të lajmeve në ATV e gjeni në videon më poshtë:
Në këto kafaze vend zunë mikrofonat e kamerat. Në këtë mënyrë, Partia Socialdemokrate paraqiti lirinë e medias në Kosovë.
“Pushteti, është e vërtetë që i do mediat, por i do në kafaz. Albin Kurti i dëshiron mediat e kontrolluara, të nënshtruara, të varura dhe po ashtu pa asnjë lloj kritike. Andaj kafazi siç jemi munduar me shpreh në mënyrë simbolike, është vendi adekuat që ia ka nda hapësirën kryeministri për me i vendos ato aty. Sulmi ndaj mediave është me paramendim, ne e dimë se caqet apo objektivat që i ka ky pushtet aktual gjithmonë marrin me vete çfarëdo që i del përpara, pa marrë parasysh arsyetimet dhe pasojat që i shkaktojnë. Kësaj mënyre si funksionon qeveria nuk kanë mundur t’i shpëtojnë as mediat, siç s’kanë mundur me i shpëtu as sindikatat, mësimdhënësit dhe as temat mbi UÇK-në”, tha Sonila Pllashniku, aktiviste e PSD-së.
Sipas kësaj partie, është një rend autoritar i qeverisë që tenton përmes çështjeve teknike të arrijë caqe politike.
“Është një lloj rendi autoritar, ku tenton që çështjet teknike me qenë edhe çështje politike, jo thjesht me qenë një rend ku shiten si veprime të duhura, por prapa saj duhet me ditë që është një veprim politik me këtë cakun ose objektivin që e ka si synim ky pushtet aktual… Rreziku është permanent për një pushtet autoritar, por ne gjithmonë e kemi guximin për me bë aksione të tilla dhe me ngritë zërin tonë” tha Pllashniku.
Aksioni i PSD-së është pjesë e kundërshtimeve të Ministrisë së Industrisë, Ndërmarrësisë dhe Tregtisë për t’ia pezulluar certifikatën e biznesit, televizionit Klan Kosova. /atvlive.tv
Edicionin Qendror të lajmeve në ATV e gjeni në videon më poshtë:
Nëntë persona me aftësi të kufizuara, mendore e fizike, jetojnë në një shtëpi-strehë në qytetin e Shtimes. Ata janë pa përkujdesje familjare që nga fëmijëria, por personeli i shtëpisë kujdeset për ta. Shtëpia, e hapur në vitin 2002, u ndërtua si strehë për fëmijët me nevoja të veçanta nga e gjithë Kosova.
U.D i drejtorit të SHFAKM, Jeton Ademaj, ka thënë për Radion Evropa e Lirë se aty ofrohen shërbime 24 orë dhe fëmijët e strehuar gëzojnë përkujdesje mjekësore, ushqim, veshmbathje e shumë shërbime tjera.
“Këtu ofrohen shërbime 24 orë, të gjithë fëmijët që janë të strehuar në këtë shtëpi gëzojnë përkujdesje mjekësore, marrje të ushqimit, përkujdesje në mirëmbajtjen e higjienës personale, veshmbathje dhe shumë e shumë shërbime tjera”, ka thënë ai.
Aty është e paraparë të jetojnë vetëm personat e mitur me aftësi të kufizuara. Por asnjëri nga ta nuk është nën moshën 18 vjeçare. Dy banorët e parë jetojnë aty tash e 21 vjet, ata ishin 12 dhe 15 vjeç kur u dërguan aty nga Instituti Special i Shtimes dhe tashmë i kanë kaluar të tridhjetat.
“Shtëpia është e paraparë deri në moshën 18-vjeçare. Por ne këtu ofrojmë vetëm shërbime kurse për largimin në ndonjë institucion tjetër, familje apo qëndrimi në këtë shtëpi, kujdestar ligjorë janë qendrat për punë sociale”, ka thënë Ademaj për REL.
Avokati i Popullit u ka rekomanduar autoriteteve që të gjendet një zgjidhje për ta, në mënyrë që të lirohen hapësirat për fëmijët në nevojë. REL nuk ka marrë përgjigje nga institucionet përkatëse, se pse ata vazhdojnë të mbesin në këtë qendër, edhe pse kanë arritur moshën madhore.
Sipas të dhënave zyrtare, në Kosovë jetojnë mbi 77.000 persona me aftësi të kufizuara.