Category: Lajme

Sonte do të bëhet varrimi i djalit që ka vdekur dje në Suharekë pasi i kishin zënë dyert e shtëpisë.

Bashkë me fëmijën ishte edhe motra e tij, e cila sipas informacioneve të familjarëve është jashtë rrezikut për jetë.

Rasti ka ndodhur në dyert e fqinjëve që u rrëzuan mbi të vegjlit.

Sipas fqinjit, i cili edhe i largoi dyert nga fëmijët, gjendja e djalit ka qenë e rëndë, derisa vajza e cila po trajtohet në QKUK ka qenë me vetëdije.

Organizata evropiane që monitoron klimën e ka bërë zyrtare konstatimin: Korriku i vitit 2023 ishte muaji më i nxehtë në Tokë i regjistruar ndonjëherë.

Temperatura mesatare botërore në muajin korrik prej 16.95 gradë Celsius, por këtë vit ishte një e treta e gradës më e lartë sesa rekordi paraprak i regjistruar më 2019, tha Shërbimi për Ndryshime Klimatike, një degë e programit hapësinor të Bashkimit Evropian. Thyerja e rekordeve të temperaturave globale zakonisht bëhet me të qindrat ose me të dhjetat e një grade, prandaj diferenca aktuale është e pazakontë.

“Këto rekorde kanë pasoja të rënda për njerëzit dhe planetin që po ekspozohen gjithnjë e më shpesh ndaj ngjarjeve ekstreme dhe intensive”, tha drejtoresha e këtij shërbimi, Samantha Burgess.

Valë vdekjeprurëse të të nxehtit kanë goditur jugperëndimin e Shteteve të Bashkuara, Meksikën, Evropën dhe Azinë. Disa studime kanë fajësuar ndryshimet klimatike të shkaktuara nga njeriu, sikurse djegia e qymyrit, përdorimi i naftës dhe i gazit natyror.

Ditët gjatë korrikut ishin më të nxehtat që janë regjistruar ndonjëherë. Temperaturat ishin aq të larta sa që Shërbimi i BE-së dhe Organizata Botërore e Meteorologjisë bënë një njoftim të mëhershëm se korriku pritej të ishte më i nxehti në histori, para se muaji të përfundonte. Njoftimi i 8 gushtit vetëm ka konfirmuar këto konstatime.

Korriku i këtij viti ishte 1.5 gradë Celsius më i nxehtë se në kohët paraindustriale. Më 2015, shtetet e botës u pajtuan që të parandalonin ngrohjen afatgjatë që është 1.5 gradë më e nxehtë sesa në epokën paraindustriale.

Korriku i këtij viti ishte 0.7 gradë Celsius më i nxehtë sesa mesatarja e regjistruar në këtë muaj në periudhën 1991-2020, tha Shërbimi i BE-së.

Oqeanet e botës, ndërkaq janë për gjysmë gradë më të nxehtë sesa në 30 vjetët paraprak dhe temperatura në Atlantikun e Veriut ishte 1.05 gradë më e nxehtë sesa është mesatarisht.

Ndërkaq, Antarktiku këtë vit ka shënuar nivelin më të ulët të akullit, 15 për qind më pak se mesatarja që regjistron zakonisht në këtë periudhë të vitit./REL/

Në letrën e dërguar nga parlamentarët perëndimorë krerëve diplomatikë të SHBA, Britanisë së Madhe, BE-së, por edhe të dërguarve specialë Lajçak, Escobar dhe Peach, kërkohet ndryshim i kursit ndaj Serbisë në zgjidhjen e problemit me Kosovën, ka thënë kryetari i partisë Qendra Serbe, Zdravko Ponosh për televizionin serb “TV Nova S”.

“Letra është shumë e pafavorshme për Serbinë, përdor retorikë shumë të ashpër dhe kërkon ndryshim kursi ndaj Serbisë, që nënkupton aplikimin e politikës së parandalimit, dhe ky është termi që është përdorur në lidhje me ish-BRSS”, ka thënë Ponosh, theksohet në kumtesën e partisë Qendra e Serbisë, transmeton Paparaci.

Ai ka thënë se “nuk ka dyshim se një letër e tillë është rezultat i lobimit të suksesshëm shqiptar” dhe pyeti se çfarë ka bërë ndërkohë Beogradi zyrtar.

“Duket se Vuçiq e kaloi kohën e tij duke lobuar për Pink (media në shërbim të regjimit të Vuçiqit, i angazhuar për propagandën e tij për konsum të brendshëm), te Porfirije (kreu i Kishës Ortodokse Serbe) dhe Dodiku (kreu i enklavës serbe në Bosnje dhe Hercegovinë), duke marrë parasysh perceptimin e votuesve të tij dhe jo situatën reale”, ka thënë Ponosh dhe ka shtuar se derisa publiku po anesteziohet nga reklamimi i orientimit drejt Perëndimit nga pronari i Pink-ut dhe me ndihmën e ambasadorit amerikan, në drejtimin tonë po vjen një tren i shpejtë”.

“Janë disa zyra në perëndim ku më nuk po lajmërohen në telefon kur të telefonojë Vuçiq. Ne mund të lavdërojmë Vuçiqin, por kjo nuk është mirë për këtë vend. Nëse vazhdojmë me një politikë të jashtme që nuk merr parasysh interesat kombëtare, por vetëm trupin votues të Partisë Përparimtare Serbe, do të arrijmë atje ku ishim 30 vjet më parë”, ka theksuar Ponosh.

Nënkryetarja e Partisë Demokratike të Kosovës, Vlora Çitaku deklaroi se shumë ministra të Qeverisë Kurti nuk duhet të kenë as komoditetin e dorëheqjes. Sipas saj, shumë nga anëtarët e kabinetit qeveritar janë nën hetime dhe janë të përfshirë në afera të shumta. Pas dorëheqjes së ministrit të Mbrojtjes, Armend Mehaj, ajo tha se i njëjti duhet të përgjigjet në disa pyetje, ku pretendohet se ka pasur mospajtime deri në përplasje fizike.

Në konferencë për media, Çitaku u shpreh se ish-ministri i Mbrojtjes duhet të tregojë se çfarë ka ndodhur me mjetet e Fondit të Sigurisë.

“Kryeministri ka shumë ministra që janë nën hetime, që kanë shkelur kushtetutën, që janë të përfshirë në afera të shumta, të cilët ai do duhej shkarkuar. E të cilëve nuk do të duhej dhënë as komoditeti i dorëheqjes. Për ministrin Mehaj nuk i dimë detajet, mirëpo ai ka nevojë që të jap disa përgjigje para se të largohet. Çfarë ka ndodhur me Fondin e Sigurisë, ku kanë shkuar ato mjete, cila është arsyeja e vërtetë e largimit të tij, a janë të vërteta pretendimet se ka pasur mospajtime deri në përplasje fizike brenda ambienteve të Ministrisë së Mbrojtjes. Ka shumë pyetje të cilave ministri Mehaj do duhej dhënë përgjigje në letrën e tij të dorëheqjes”, deklaroi ajo.

Kryeministri i Kosovës, Albin Kuurti ka njoftuar se ka emëruar kolonelin e FSK-së, Ejup Maqedonci në pozitën e ministrit të Mbrojtjes. Ai ka thënë se pranuar dorëheqjen e ministrit të deritanishëm Armend Mehaj, e cila sipas tij është bërë për shkaqe familjare. /KP

Zëvendëskryeministri, Besnik Bislimi ka reaguar pas dorëheqjes së ministrit të Mbrojtjes, Armend Mehaj.

Bislimi ka falënderuar Mehajn për kontributin, teksa ka thënë se kanë pasur bashkëpunim të shkëlqyeshëm.

“Falenderim dhe mirënjohje e veçantë për bashkëpunimin e shkëlqyeshëm. I uroj shumë suksese në angazhimet e tij të ardhshme Armendit, me shpresën që përsëri do na kryqëzohen rrugët e bashkëpunimit”, ka shkruar Bisliomi në një postim në “Facebook”.

Kryeministri Albin Kurti ka pranuar dorëheqjen e ministrit Mehaj, i cili ka kërkuar lirimin nga detyra.

Mehaj ka ofruar dorëheqje për arsye familjare.

Ministri i deritashëm i Mbrojtjes, Armend Mehaj, do të zëvendësohet nga koloneli i Forcës së Sigurisë së Kosovës, Ejup Maqedonci.

Maqedonci është ushtarak i karrierës.

Kolonel Maqedonci ka përfunduar dy Kolegje ushtarake dhe dy programe master në Shtetet e Bashkuara të Amerikës.

Para se të bëhej pjesë e FSK-së, Ejup Maqedonci kur i kishte 19 vjet iu bashkua Ushtrisë Çlirimtare të Kosovës, për t’i shërbyer edhe atëkohë atdheut të tij.

Gjatë asaj kohe, ka shërbyer si Komandant i Batalionit të Parë të Brigadës 153 të Zonës Operative të Llapit në UÇK.

Koloneli i Forcës së Sigurisë së Kosovës, Ejup Maqedonci, i cili një trajnim në vitin 2010 në Japoni e kishte përfunduar me lëndim të rëndë, dhe kishte refuzuar 30 mijë dollarë për shërim, vetëm që të mos dëmtohet imazhi i ushtrisë së Kosovës.

“Gjatë atij trajnimi, fatkeqësisht unë u lëndova. Nga zyrtarja e Ministrisë së Punëve të Jashtme të Japonisë u ftova që të diskutojë rreth ndërprerjes së trajnimit dhe kthimit në Kosovë, si dhe tërheqjes së shumës prej 30 mijë dollarëve që ka qenë në kontratë. Unë as që e kam menduar punën e 30 mijë dollarëshit. Kam pasur shqetësim se nuk do të mund të vazhdojë punën e trajnimit. Ditën e nesërme kam kërkuar nga japonezët që të vazhdojë trajnimin edhe me një këmbë”, deklaroi Ejup Maqedonci.

Pas këtij veprimi, nga autoritet japoneze, Maqedonci ishte caktuar përgjegjës i ushtarëve të 8 shteteve pjesëmarrëse nga e gjithë bota.

“Jam caktuar përgjegjës për ushtarët e tetë shteteve që kanë marrë pjesë në trajnim. Pos tjerash kam qenë edhe planifikues i skenarëve që janë bërë për ato ushtrime. Në fund kam qenë përgjegjës për fjalën përfundimtare nga ana e studentëve në ceremoninë e diplomimit”, deklaroi më tej Ejup Maqedonci.

Në tri ditët e fundit të gushtit Bashkimi Evropian, mban takime informale të ministrave të punëve të jashtme e atyre të mbrojtjes. Me këto aktivitete përfundon pushimi veror i institucioneve të BE-së.

Një eurodeputet nga Holanda, po pret që qysh në shtator unioni që ka 27 vende anëtare të lëviz drejt heqjes së masave ndëshkuese që i vendosi ndaj Kosovës, në qershor.

Thijs Reuten, konsideron se Brukseli veproi gabim ndaj Prishtinës zyrtare , kur vendosi masa ndëshkuese si pasojë e mos deeskalimit të situatës në veri.

Ndërkohë si pasojë e ujdisë së 10 korrikut BE-Kosovë, tashmë deeskalimi ka nisur në teren. Në dy turne 50% e policisë u tërhoq nga dhe rreth godinave komunale në tri komuna.

“Bashkimi Evropian, ka ndërmarrë qasje izoluese e jo të balancuar, në atë se çka ndodhi në fund të majit. Duke harruar krejt çka ndodhi para dhe pas kësaj. Ne nuk pamë një reagim kaq të fortë kur tre polic u kidnapuan në territorin e Kosovës nga Serbia. Këta polic edhe pse janë liruar ende po ndiqen penalisht”, tha Reuten për Klan Kosova.

Ligjvënësi holandez në Parlamentin Evropian (PE) është njëri nga nënshkruesit e letrës së politikanëve evropianë e amerikanë dërguar në qendrat vendimmarrëse që kërkon veprime konkrete sidomos në dialogun Kosovë-Serbi.

“Presim koordinim të qartë mes BE-së, SHBA-ve , Britanisë së Madhe dhe aleatët tjerë në komunitetit ndërkombëtar. Sepse ne duhet të vijmë te linja e qartë, kur vije puna që të flasim për përgjegjësinë e presidentit Vuçiq, në gjithë procesin. Dhe ta bëjmë të qartë se po kthehemi te dialogu i lehtësuar nga BE-ja, drejt normalizimit, sa më shpejt që është e mundur”, shtoi ai.

Ardita Sinani, këshilltarja e kryeministrit Albin Kurti për Luginën e Preshevës, ka thënë se është ndaluar edhe mbrëmë në Muçibabë nga policia kufitare serbe.

Ajo, me anë të një postimi në rrjetin social Facebook, ka deklaruar se edhe herën e dytë është ndaluar pa ndonjë arsye.

“Mbrëmë rreth orës 21:00 në vendkalimin e njëjtë kufitar me Republikën e Kosovës, Muçibabë, përsëri u ndalova nga policia kufitare serbe. Për herë të dytë brenda të njëjtës ditë. Jo vetëm duke e lëshuar Serbinë, por edhe duke hyrë. Këtë herë periudha kohore ishte më e shkurtër se në orët e mëngjesit të djeshëm”.

“Edhe kësaj radhe pa asnjë sqarim e arsyetim! Thjeshtë ndalesë! Kjo është Serbia me të cilën si shqiptarë të Luginës së Preshevës ballafaqohemi çdo ditë. Kjo është Serbia për pakicat kombëtare”, ka thënë Sinani.

Në Gjykatën Themelore në Prishtinë, të martën pas përfundimit të seancës fillestare, i akuzuari Reshat Sadiku u afrua pranë deputetit Avdullah Hoti dhe i kërkoi falje për kanosjen që ia kishte bërë në rrjetin social “Facebook”.

“Për shkak se edhe vetë kam pasur kanosje, internetin nuk e përdori shumë edhe nuk e kam fshi komentin. Për kanosjen, kërkoj falje publike me gjithë zemër, nëse ka diçka për ndihmë nga ana ime, jam i gatshëm. Kërkoj falje…”, tha ai.

I njëjti tha se nuk është person që bën të tilla veprime.

“Kam kontribuar shumë, tash më ndodhi kjo. Me të vërtetë gjunjëzohem para jush, se nuk jam njeri i tillë, kurrë në gjyq s’jam kanë as kurrë këso probleme s’kam pas”, tha i akuzuari.

Ndërsa, edhe deputeti Hoti i tha se ai është i pari që e ka sjellë në gjykatore.

“Ti ke qenë i pari që më ke sjellë këtu, kurrë s’kam qenë këtu”, tha Hoti.

I akuzuari sërish i kërkoi falje, duke i thënë se qëllimi i tij nuk ka qenë të bënte dëm diçka, raporton Betimi për Drejtësi.