ATV

Category: Lajme

  • Katër vrasje për 10 ditë – Rexhepi: Po ballafaqohemi me pasojat e posttraumës, plagët e luftës janë të freskëta

    Katër vrasje për 10 ditë – Rexhepi: Po ballafaqohemi me pasojat e posttraumës, plagët e luftës janë të freskëta

    Neuropsikiatri, Sami Rexhepi i tha Ekonomia Online, se si pasojë e luftës dhe e pandemisë është rritur ankthi dhe për rrjedhojë edhe mundësia për konflikte është më e madhe shkak i uljes së pragut të durimit.

    Ai thotë se plagët e luftës ende janë të freskëta dhe se pandemia pa shkaktuar izolim total dhe se tash po ballafaqohemi me pasojat të posttraumës. Rexhepi theksoi se ndonëse të rinjtë janë gjeneratë e pasluftës, janë rritur me traumat që ka lënë si pasojë kjo e fundit.

    Por sipas tij, si shoqëri, e poashtu mediumet është mirë të krijojnë një platformë debati ku fokus të jetë ofrimi i asaj se çka popullata ka nevojë e jo se çka profesionistët duan të ofrojnë.

    “Po flasim për një shoqëri e cila i ka ende plagët e freskëta të një lufte shumë të dhunshme, me pasoja shumë të mëdha. Po flasim për një shoqëri e cila sa ka dal prej një pandemie e cila ka shkaktuar një izolim të plotë dhe jemi duke u ballafaquar me pasojat të posttraumës”.

    “Një pjesë e madhe e të rinjve janë gjeneratë e pasluftës, mirëpo pasojat e luftës dhe të traumës janë ende në familje, dhe janë rritur këta fëmijë me këto pasoja. E dyta; jemi duke folur për një periudhë kohore kur shumë prej bashkatdhetarëve tanë kthehen në shtëpi, por ata të rinj të cilët janë të rritur me një vend tjetër, me një kulturë tjetër, të cilëve u kanë thënë se tradita dhe kultura jonë është e prapambetur dhe të cilët duan të ikin nga ky sistem i prapambetur, por ata ende nuk e kanë marrë një kulturë apo traditë të një vendi tjetër, dhe çka ndodhë është se është larguar një sistem i vlerave i cili nuk është i mirë dhe i përshtatshëm, nuk është marrë tjetri dhe defacto ne kemi mbetur pa sistem të vlerave”.

    Rexhepi përmendi edhe ardhjen e mërgimtarëve duke theksuar vrasjen e argjentinases, të cilën dyshohet se e hodhi nga kati i gjashtë, i dashuri i saj nga Drenasi, e i cili jeton në Zvicër.

    Ai tha se tek bashkatdhetarët tanë ka dyzim të kulturave ku nganjëherë mospërshtatshmëria apo konflikti midis kulturave i lë pa ndonjë sistem vlerash fare.

    “Apo t’i marrim të rinjtë të cilët janë këtu; me një shkallë shumë të lartë të papunësisë, me një shkallë shumë të lartë të varfërisë, me një shkallë ku promovohet vlera se dikush vjen vetëm nëse ka një ekzistencë shumë të mirë ekonomike, apo nëse është i pasur, dhe vlera e tij llogaritet në euro apo në dollarë dhe e kemi humbur një sistem të vlerave të cilin ne e kemi e që është më e madhja; familja. Nuk e kemi humbur ende, është në zbehje e sipër e që do të ketë pasoja. Nuk është dhuna tek ne më shumë se në vendet e tjera, nëse e marrim me e krahasuar me sport, ne kemi sportistë individualë që kanë arritur rezultate kulmore, dhe kemi një qëndrueshmëri në ato sporte”.

    “Cilin sport kolektiv ne e kemi të mirë? Ne si individë funksionojmë por jo si kolektivitet. Nuk mund të flasim për shëndetin mendor duke akuzuar vetëm profesionistët e shëndetit mendor, tash kemi shumë më shumë psikologë, numri i psikiatërve nuk është rritur dhe do të jetë në rënie për një kohë. Por për një mirëqenie të mirë, për një shëndet mendor të mirë, posaçërisht po flas për të rinjtë, nuk është vetëm çështje e policisë se a po funksionon siç duhet, ose vetëm e gjyqësisë, apo e arsimit. Problemi është se nuk ka një interaksion të këtyre profileve që do të ofronin një siguri më të madhe”.

    Ai pohon se shoqëria jonë funksionon shumë më mirë individualisht se kolektivisht dhe se fajin nuk e hedh tek një sferë e vetme. Sipas tij, ka mungesë të bashkëpunimit me qëllim ofrimin e sigurisë më të madhe për të gjithë.

    Gjithashtu neuropsikiatri Rexhepi tha se e sheh të arsyeshme që për individët që kanë interaksion të punohet me ta, si dhe se të organizohen aktivitete e turne ku të rinjtë të munden të lirojnë energjinë e tyre, raporton EO.

    “Ne i kemi të rinjtë me plot energji, qysh kur unë kam qenë student, që është më shumë se 40 ose 45 vite, ne atëherë kemi pasur gara, turnine të ndryshme, qysh prej gjimnazit. Këto aktivitete sot mungojnë. Ata të rinj duhet diku ta zbrazin atë energji. Nuk mund ta fajësojmë gastronominë, merreni me mend nëse ju shkoni në një lokal të pini kafe, dhe duke hy brenda dikush ju bastisë, si do të ndiheni. Kështuqë nuk mund ta fajësojmë gastronominë, ata i kanë truprojat, rojat aty, por edhe ata e kanë të kufizuar qasjen me mysafirë. Ka rënë pragu i durimit shumë, ne nuk kemi problem vetëm në lokalet apo klubet e natës, ne i kemi të njëjtat probleme në semaforë, ku ndalemi të presim, ne i kemi të njëjtat probleme në parkingje, poashtu në markete e në qendrat për blerje. Kudo që ka më tepër njerëz. Më pas i kemi personat të cilët shërbejnë. Thjesht nuk janë të interesuar se ata do të kenë punë dhe do ballafaqohen me njerëz me prag të ndryshëm të durimit. Nuk është sikurse dikush ta ofron një kafe me një buzëqeshje e sikur kur vetëm ta lëshon në tavolinë”.

    “Ne si shoqëri duhet të punojmë për ta parandaluar ose minimizuar dhunën në familje. Si pasojë e luftës dhe e pandemisë është rritur niveli i ankthit, është ulur pragu i durimit dhe mundësia për konflike është shumë më e madhe për shkak se shumë shpesh vjen në shprehje imulsiviteti i individit dhe nuk duhet shumë për të arritur tek një konflikt. Kjo është ajo ku ne si shoqëri, ju si medie, do ta krijoni mundësinë e debateve të ndryshme ku do të shkëmbehen mendime edhe të profesionistëve por edhe të popullatës. Sepse nuk duhet popullatës t’i ofrojmë atë çka ne kemi ose atë çka ne mundemi, ne thjesht duhet të ndërgjegjësohemi që popullatës t’i ofrohet ajo për çka ka nevojë jo ajo që ofrojmë ne”.

    Përgjatë këtyre ditëve, kanë ndodhur katër vrasje një grua dhe tre burra. Për vrasjen e argjentinases është arrestuar i dyshuari, mirëpo për tri rastet tjera, ka ende të dyshuar në arrati. Për rastin në Klinë është Tush Frroku, ndërsa për atë në “Bon Vivant” është Dukagjin Nikollaj dhe një i dyshuar tjetër nuk është identifikuar.

    Të paidentifikuar janë edhe dy persona tjerë që dyshohet se e kanë vrarë sot një person dhe kanë plagosur tre të tjerë në Skenderaj.

    Tashmë është bërë i ditur edhe identiteti i të vrarit dhe i të plagosurve. Si pasojë e të shtënave me armë zjarri ka mbetur i vrarë Negjmedin Loshi, 39 vjeç, ndërkaq janë plagosur Qëndrim Januzi 26 vjeç, Fidan Januzi 41 vjeç dhe Muhamet Ramadani 35 vjeç. Akoma nuk dihen motivet e vrasjes.

  • Spajiq shpallet mandatar për formim të Qeverisë në Mal të Zi

    Spajiq shpallet mandatar për formim të Qeverisë në Mal të Zi

    Presidenti i Malit të Zi, Jakov Millatoviq e ka zgjedhur liderin e partisë Evropa Tani, Millojko Spajiq si mandatar për kryeministër dhe formim të Qeverisë së re.

    Ai e ka marrë këtë vendim dy muaj pas mbajtjes së zgjedhjeve të përgjithshme në këtë shtet.

    Spajiq i ka tani 90 ditë për të formuar koalicion dhe për ta formuar Qeverinë.

    “Pres përgjegjësi dhe përshtatshmëri nga Spajiq, dhe të gjithë aktorët politikë që marrin pjesë në negociatat për formim të Qeverisë”, ka thënë Millatoviq.

    “Besoj se në këtë moment, Mali i Zi ka nevojë për Qeveri stabile, të pandarë nga profili evropian”.

    Partia Evropa Tani ka dalë e para në zgjedhjet parlamentare të qershorit.

    Përbërja e Qeverisë në ardhje do të ofrojë një pasqyrë të asaj se kah do të drejtohet ky vend, ndonëse vazhdimisht përmendet synimi për anëtarësim në Bashkimin Evropian.

    Zgjedhjet e qershorit janë mbajtur vetëm disa muaj pasi udhëheqësia politike e Malit të Zi është goditur nga humbja e ish-presidentit Millo Gjukanoviq në rundin e dytë të zgjedhjeve presidenciale të prillit.

    Prej formimit të saj më 2022, partia Evropa Tani është zotuar për të çuar përpara platformën pro evropiane dhe është zotuar për rritje të pagave e kryerje të reformave.

  • ​Kurti: Peticioni mënyra e duhur për zgjedhjet në veri, BE t’i largojë masat sa më parë

    ​Kurti: Peticioni mënyra e duhur për zgjedhjet në veri, BE t’i largojë masat sa më parë

    Mënyra më e duhur për shpalljen e zgjedhjeve të parakohshme në katër komunat në veri është peticioni, thotë kryeministri Albin Kurti. Ai për KosovaPress thekson se vetëm kur 20 për qind e trupit elektoral shprehin vullnetin për t’ia ndërprerë mandatin kryetarëve aktual jepen dëshmi se nuk mund të ketë bojkot të pjesëmarrjes në zgjedhje, qoftë si votim apo kandidim.

    Në anën tjetër, kreu qeveritar, thotë se deeskalimi në veri në masë të madhe ka ndodhur, derisa kërkon nga Bashkimi Evropian që sa më parë t’i largojë masat ndëshkuese dhe të përmirësojë qëndrimin ndaj Kosovës.

    Kurti për KosovaPress thotë se po punojnë që sa më shpejtë të bëhet rregullimi i çështjeve teknike dhe administrative për zgjedhjet e reja në veri.

    “Sa i përket zgjedhjeve të reja të parakohshme, ne qysh nga fillimi kemi thënë se nuk jemi të kënaqur me daljen e qytetarëve në zgjedhjet më 23 prill të këtij viti dhe me ato çfarë mësuan si përqindje me 24 prill të nesërmen. Andaj kemi ofruar mundësinë që të kemi zgjedhje të parakohshme, por natyrisht dëshirojmë të mos na përsëritet situata, në të cilën sërish do të kemi bojkot të pjesëmarrjes në zgjedhje, qoftë si votim apo si kandidim. Ne mendojmë se mënyra e duhur për këtë është duke shfrytëzuar nenin 72 të Ligjit për vetëqeverisje lokale, i cili parasheh mundësinë e 20 për qind të trupit elektoral që të dalin dhe shprehin vullnetin e tyre për t’i ndërprerë mandatin e kryetarëve aktual. Jemi të hapur për këtë. Është krijuar edhe një grup punues që do të bëjë rregullimin e çështjeve teknike administrative të dispozitave të këtij neni dhe këtij ligji. Tash ta presim punën e tyre, sa më shpejtë aq më mirë, por edhe një herë po e them nuk besoj se ka arsye më që të ketë ndokush dyshime se Kosova nuk është palë konstruktive. Përkundrazi ne jemi palë konstruktive që është dëshmuar me ide kreative dhe përkushtim për të gjetur zgjidhje”, thotë Kurti.

    Ai shton se Kosova është e interesuar për deeskalim të plotë në veri, mirëpo sipas tij duhet të jenë të kujdesshëm nga mundësia e rieskalimit të situatës atje.

    “Ne e kemi një grup punues tash që e bënë vlerësimin e gjendjes së sigurisë, ku Policia e Kosovës konsultohet edhe me EULEX-in edhe me KFOR-in. Si rezultat i këtyre vlerësimeve të këtij grupi profesional ne dy herë nga 25 për qind e kemi zvogëluar praninë e policisë sonë në tri ndërtesat në tri komunat veriore të Kosovës. Jemi të interesuar për deeskalim të mëtutjeshëm, ndonëse është konstatim i përgjithshëm se në masë të madhe deeskalimi tashmë ka ndodhur. Nuk kemi protesta të dhunshme, s’kemi incidente veçse duhet të jemi të kujdesshëm nga potencialiteti i rieskalimit. Dihet që adresa për këtë nuk ndodhet në Republikën e Kosovës, por në kryeqytetin e fqinjit tonë verior”, deklaron kryeministri Kurti.

    Duke folur për masat ndëshkuese të Bashkimit Evropian ndaj Kosovës, kryeministri Kurti thotë se të njëjtat nuk janë fer dhe duhet të hiqen sa më parë.

    Sipas tij BE-ja të përmirësojë qëndrimin ndaj Kosovës.

    “Sa i përket masave që janë marrë ndaj nesh, ne konsiderojmë se nuk janë ferë. Janë pjesë e asimetrisë në raporte dhe sa më parë që të përfundojnë aq më mirë. Ne po bëjmë krejt çfarë mundemi dhe dimë, por do të duhej që edhe partnerët dhe aleatët tanë evropian sa më parë të përmirësojnë qëndrimin e tyre ndaj Kosovës. Pasi një Republikë demokratike dhe progresiste siç është Kosova meriton të ndihmohet me krejt çka munden ata dhe jo të ketë masa ndëshkuese”, thotë ai.

    Në anën tjetër, Kurti e mirëpret edhe letrën e ligjvënësve evropianë dhe amerikanë, ku kërkohet mbështetje më e madhe ndaj Kosovës dhe qasje më e ashpër ndaj Serbisë.

    “Nëpër parlamentet e shteteve të perëndimit demokratik, Bashkimit Evropian dhe Shteteve të Bashkuara të Amerikës gjithnjë e më shumë ka ligjvënës, përfaqësues të popujve liridashës dhe demokratik të cilët dëshirojnë që qasja ndaj Kosovës të përmirësohet dhe ndaj Serbisë të ashpërsohet. Ne mendojmë se një iniciativë e tillë është e drejtë dhe dobishme”, përfundon Kurti.

  • Për 10 ditë katër vrasje, ende të dyshuar në arrati e persona të paidentifikuar

    Për 10 ditë katër vrasje, ende të dyshuar në arrati e persona të paidentifikuar

    Sot është dita e dhjetë e muajit gusht. Përgjatë këtyre ditëve, Kosova nuk ka gjetur qetësi pasi kanë ndodhur katër vrasje – një grua dhe tre burra. Për vrasjen e argjentinases është arrestuar i dyshuari, mirëpo për tri rastet tjera, ka ende të dyshuar në arrati. Për rastin në Klinë është Tush Frroku, ndërsa për atë në “Bon Vivant” është Dukagjin Nikollaj dhe një i dyshuar tjetër nuk është identifikuar. Të paidentifikuar janë edhe dy persona tjerë që dyshohet se e kanë vrarë sot një person dhe kanë plagosur tre të tjerë në Skenderaj.

    Në orët e para të 1 gushtit në Fushë Kosovë, Endrit Nikaj dyshohet se e ka gjuajtur nga kati i gjashtë të dashurën e tij, shtetase të Argjentinës, Maria Clara Urdangaray. Ajo u dërgua në QKUK, mirëpo nuk arriti t’iu bëjë ballë lëndimeve që kishte pësuar.

    “VRASJE: Fushë Kosovë 01.08.2023 – 01:59. Nga QKUK-ja është raportuar se ka ndërruar jeta viktima femër shtetase e Argjentinës si pasojë e lëndimeve të marra, që dyshohet se ka rënë nga një lartësi e objektit ku ka qenë duke qëndruar së bashku me te dyshuarin mashkull shtetas Zvicran. Me vendim të prokurorit kujdestar, trupi i pa jetë i viktimës është dërguar në IML për obduksion, ndërsa i dyshuari është arrestuar dhe dërguar në mbajtje. Rasti ne procedure hetimore”, thuhej në raportin 24 orësh të Policisë.

    Për këtë rast kanë raportuar mediat në Argjentinë e Zvicër, ndërkaq babai i të ndjerës ishte i bindur se vrasja e bijës së tij është femicid.

    “Vajza ime kishte folur me mamanë e saj dhe e kishte përshkruar të dashurin si një femëror dhe shumë xheloz. Është një femicide, jam i bindur,” tha Facundo Urdangaray, babai i Maria Clara.

    Endrit Nika është arrestuar dhe tani ndodhet në paraburgim.

    Gazeta zvicerane “Blick” ka raportuar se 32 vjeçari e kishte futur ilegalisht të dashurën e tij në Kosovë, duke e fshehur në bagazh të veturës. Express ka dërguar pyetje në Polici dhe MPJD, mirëpo të njëjtit nuk kanë kthyer përgjigje.

    Një tjetër krim goditi Prishtinën mbrëmjen e 4 gushtit. Një përleshje që nisi në një tavolinë të kafiterisë “Bon Vivant” përfundoi me një të vrarë e rreth 17 të plagosur.

    Për këtë rast janë arrestuar Andi Pajaziti i njohur si “Italiani”, Gëzim Zakuti dhe Hisni Gecaj. Atyre u është caktuar masa e paraburgimit prej 1 muaji, mirëpo “Italiani” ende është duke u trajtuar në Klinikën e Ortopedisë për shkak të lëndimeve.

    Mirëpo, një tjetër person është në arrati për këtë rast. Bëhet fjalë për Dukagjin Nikollajn, i njohur me nofkën “Duka”. Ai ishte i kërkuar nga FBI, dhe qysh prej natës tragjike, ai nuk është kapur ende nga Policia e Kosovës. Bazuar në fletëkërkimin e FBI-së, bëhet e ditur se 40-vjeçari ishte i përfshirë në trafikim të marihuanës në periudhën e viteve 2003-2007.

    I vrarë nga përleshja e armatosur ka mbetur Kastriot Ramadani nga fshati Zabel i Ulët i Drenasit. Ai u varros ditën e nesërme. Mirëpo sipas dosjes së Prokurorisë, Kastrioti ishte ai i cili e nisi përleshjen, pasi fillimisht e nxori armën nga brezi e më pas e goditi me shishe në kokë “Italianin”.

    “Në atë moment me të vërejtur që në lokal kanë hyrë të pandehurit Andi Pajaziti dhe Gëzim Zakuti,, në atë moment i ndjeri Kastriot Ramadani e ka nxjerrë armën e zjarrit nga brezi kurse i pandehuri Dukagjin Nikollaj e ka nxjerrë armën e zjarrit nga një çantë e dorës, ashtu që për një moment fillojnë të përleshen fizikisht fillimisht Andi Pajaziti me të pandehurin Dukagjin Nikollaj, më pas Kastriot Ramadani e godet me një shishe qelqi në kokë disa herë Andi Pajazitin, në atë moment Andi Pajaziti nxjerr armën e zjarrit nga brezi dhe shkrepë në drejtim të Kastriot Ramadanit, kurse i pandehuri Dukagjin shkrep me armë zjarri në drejtim të Andi Pajazitit si dhe i ndjeri Kastriot Ramadani shkrep në drejtim të Andi Pajazitit e me ç’rast kanë rrezikuar edhe jetën e personave tjerë”, përshkruante Prokuroria.

    Për këtë rast është edhe një i dyshuar, që ende nuk është identifikuar.

    Ndërsa tri ditë më vonë, një krim tjetër ndodhi në një kafiteri tjetër. Por kësaj here në qytetin e Klinës.

    Atje Tush Frroku hyri në një kafiteri dhe shtiu shtatë herë mbi tashmë të ndjerin, Anton Prela, të cilin e kishte dhëndërr.

    Frroku pas kryerjes së krimit ka ikur nga vendi i ngjarjes dhe akoma nuk është kapur nga organet e sigurisë. Madje për gjetjen e tij, Prokuroria Themelore ka aktivizuar dronë dhe Policia e ka shpallur në kërkim, duke ia publikuar edhe fotografinë e të dhënat.

    Zëdhënësi i Prokurorisë, Shkodran Nikçi, ka thënë për Express se fillimisht i dyshuari e ka ftuar viktimën jashtë lokalit e më pas viktima është futur brenda.

    Sipas tij, viktima dhe i dyshuari ishin familjarë mes vete.

    “Viktima ishte i martuar me motrën e të akuzuarit. Ndërsa edhe ky i fundit, ishte i martuar me motrën e viktimës”, tha ai.

    Ndërkaq sot zëdhënësi i Policisë për rajonin e Mitrovicës, Avni Zahiti, ka bërë të ditur se një person ka mbetur i vrarë e tre të tjerë janë plagosur pasi dy persona të maskuar kanë hyrë brenda në një kafiteri në fshatin Runik të Skënderajt dhe kanë gjuajtur me armë zjarri.

    Të dyshuarit më pas kanë ikur nga vendi i ngjarjes.

    “Rreth orës 01:21, të datës 10 gusht 2023, policia ka marrë informatën për të shtëna me armë zjarri në një kafiteri në fshatin Runikë të Skenderajt. Menjëherë në vendin e ngjarjes kanë dalë njësitet e nevojshme policore dhe ekipi mjekësor. Bazuar në hetimet fillestare, nga arma e zjarrit lëndime kanë pësuar katër persona, njëri nga të lënduarit viktima N. L., 39 vjeçar, ka ndërruar jetë në vendngjarje, ndërsa, tre persona të tjerë të lënduar ( po ashtu nga arma e zjarrit ) janë dërguar për tretman mjekësor në QKUK. Nga hetimet e para dhe këqyrja e vendit të ngjarjes, dyshohet se dy persona të dyshuar e të maskuar kanë hyrë brenda në kafiteri kanë shtënë me armë dhe janë larguar në drejtim të panjohur. Në cilësi të provave materiale në vendin e ngjarjes janë gjetur dhe konfiskuar disa gëzhoja”, ka thënë Zahiti për Express.

    Ai ka thënë se hetuesit janë duke punuar për identifikimit dhe arrestimin e të dyshuarve.

    “Hetuesit e Sektorit Rajonal, janë duke punuar intensivisht për identifikimin dhe arrestimin e kryesit/ve të veprës si dhe zbardhjen e kësaj vepre penale.”

    Ndërsa, zëdhënësja e QKUK-së, Mirlindja Qyqalla për Gazetën Express tha se njëri nga të lënduarit është në gjendje të rëndë ndërsa dy tjerët janë jashtë rrezikut për jetë.

    “Nga Qendra Emergjente e QKUK-së jemi njoftuar që tre presona kanë kërkuar ndihmë mjekësore, të lënduar me armë zjarri. Sipas ekipit mjekësor, aktualisht, njëri nga të lënduarit është në gjendje pak më të rënduar, ndërsa dy të tjerë janë jashtë rrezikut për jetë”, ka thënë Qyqalla.

    Tashmë është bërë i ditur edhe identiteti i të vrarit dhe i të plagosurve. Si pasojë e të shtënave me armë zjarri ka mbetur i vrarë Negjmedin Loshi, 39 vjeç, ndërkaq janë plagosur Qëndrim Januzi 26 vjeç, Fidan Januzi 41 vjeç dhe Muhamet Ramadani 35 vjeç.

    Akoma nuk dihen motivet e vrasjes.

    Pra për vrasjen në Klinë dhe Skënderaj ende nuk ka të arrestuar, ndërsa për vrasjen në Bon Vivant një i dyshuar është ende në arrati. Pavarësisht kësaj, ministri i Punëve të Brendshme, Xhelal Sveçla, po shijon pushimet në Plazhin e Gjeneralit.

  • ​Rritet numri i pacientëve shkaku i ndryshimit të temperaturave

    ​Rritet numri i pacientëve shkaku i ndryshimit të temperaturave

    Në Qendrën Kryesore të Mjekësisë Familjare në Prishtinë, është rritur numri i qytetarëve që kërkojnë mjekim nga stafi shëndetësor, si pasojë e ndryshimit të temperaturave. Fëmijët deri në moshën pesëvjeçare, personat me probleme kronike si dhe ata në moshë të shtyrë janë më të prekurit nga simptomat, të cilat vijnë si pasojë e ndryshimeve të motit. Simptoma këto, të cilat manifestohen me kokëdhimbje, temperaturë, vjellje dhe diarre. Nga QKMF-ja thonë se është rritur për 10 apo 20 përqind dhënia e infuzioneve si shkak i rritjes së numrit të pacientëve pas ndryshimit të temperaturave.

    Kryeshefi i Qendrës Kryesore të Mjekësisë Familjare në Prishtinë, Valdet Hashani, për Kosovapress tha se ndryshimi i temperaturave ka ndikuar që të ketë rritje të numrit të dhënies së infuzioneve tek pacientët.

    “Për shkak të ndryshimit të këtyre temperaturave, ngritjes dhe ules së temperaturave të përnjëhershme, kemi shumëzimin ose ndryshimin e infeksioneve qoftë bakteriale ose virale, me çka u rrit edhe numri i pacientëve, të cilët kërkonin ndihmë shëndetësore. Me këtë u rrit edhe dhënia e infuzioneve, në qendrën tonë, ku QKMF-ja në bashkëpunim me Drejtorinë Komunale të Shëndetësisë, kanë shpenzuar një sasi të mjaftueshme të mjeteve pikërisht për shkak të infuzioneve ose terapisë parainterale për rehidrimin e pacientëve… Në këto ditë ku është freskët vërehet që është rritë numri i gastroenteriteve, meqë edhe dhënia e infuzioneve në qendrat tona është rritur për 10 ose 20 përqind”, tha Hashani.

    Tutje, Hashani për KosovaPress tha se fluksi i madh i pacientëve përveç verës së vonshme, erdhi edhe si shkak i ardhjes së bashkatdhetarëve.

    “Fillimisht ju e dini që vera erdhi me pak vonesë, dhe temperaturat ishin shumë të ulëta, për një moment të caktuar, brenda dy-tri javëve të fundit, patëm një fluks, një temperaturë të madhe, pra ngritje të temperaturave, të cilat i arrijnë 40 gradëshin, të cilat ishin shumë të vështira për pacientët, sidomos tek ata të cilët ishin me sëmundje kronike, dhe fëmijët. Por, jo vetëm ata, ishte faktikisht rraskapitëse edhe për të gjithë popullatën… Rritja e këtij fluksi u ngrit edhe me ardhjen e bashkatdhetareve tanë, edhe me rritjen e gastroenteriteve”, u shpreh Hashani.

    Tutje, Hashani tregon se kush po pëson më shumë nga ky problem dhe se cilat janë simptomat me të cilat po ballafaqohen pacientët.

    “Pikërisht ndryshimi i temperaturave, ashtu si edhe parashihet më të ndjeshmit në këtë janë fëmijët sidomos ata të pesëvjeçarit të parë të jetës, por edhe personat që kanë probleme kronike, qofshin ato gastrointestinale, qofshin ato kardiovaskulare, endokrine e kështu me radhë. Pra, personat që janë me sëmundje kronike dhe me moshë të shtyrë, kanë pasur probleme më të mëdha…03:59 Kemi vjelljen, kemi kokëdhimbjen, kemi diarrenë, kemi temperatura që nënkupton se mund të jenë infeksione qofshin ato virale apo bakteriale edhe konform këtyre simptomave ne e kemi edhe terapinë nga stafi ynë të cilët janë jashtëzakonisht profesionalë”, u shpreh i pari i QKMF-së.

    Hashani potencoi se ky fluks i madh i pacientëve që kërkojnë mjekim është sfidues për ta, për shkak se një pjesë e stafit është në pushime, duke theksuar se ofrojnë shërbime për mbi 700 mijë qytetarë, që dallon sipas tij prej asaj se çfarë thuhet në regjistrimin UNMIK-ut, që janë rreth 200 mijë banorë.

    “Gjithashtu është mirë të ceket se këto kohën e pushimeve faktikisht meqë jemi në fazën e pushimeve, edhe numri i stafit tonë të cilët gjenden tani disa në pushim e kanë vështirësuar pak organizmin e punës, por jo pengimin në asnjë mënyrë të saj, meqë janë ekipet të cilat shërbejnë qoftë 24 orë në katër qendra që i kemi apo këto të cilat janë me orar 12 orësh, ose tetë orësh, e kryejnë punën e vet por me shumë vështirësi, marrë parasysh se Prishtina ka staf shëndetësor për, sipas regjistrimit të UNMIK-ut me 200 mijë banorë, ndërsa ne realisht ofrojmë shërbime për 700 mijë banorë ose edhe më tepër, meqë edhe ju e dini se në Prishtinë si kryeqytet, gravitojnë edhe të gjithë ata punëtorë të cilët vijnë, qoftë në administratën shtetërore ose private, dhe të gjithë ata kërkojnë shërbime shëndetësore” tha Hashani për KosovaPress.

    Kryeshefi i QKMF-së tha se prej javës së ardhshme, pritet që të ketë rritje edhe më të madhe të pacientëve që do të kërkojnë ndihmë nga stafi shëndetësor, sepse sipas tij do të ketë rritje të temperaturave./KP

  • Dyshime për shkelje të ligjit- Ministria e Mjedisit dërgon dy raste në Prokurorinë Speciale

    Dyshime për shkelje të ligjit- Ministria e Mjedisit dërgon dy raste në Prokurorinë Speciale

    Zëvendësministri i Mjedisit, Avni Zogiani, ka bërë të ditur se MMPHI ka dërguar në Prokurorinë Speciale dy raste të dyshimit për shkelje të rënda të ligjit.

    Zogiani ka thënë se rasti i parë ka të bërë me hapjen e procedurës për trajtimin termik të mbeturinave, ndërsa rasti i dytë ka të bëjë me dyshime për keqpërdorime në punët në fushën e ujërave.

    “Rasti i parë ka të bëjë me hapjen e procedurës për trajtimin termik të mbeturinave, për të cilin grupet e ekspertëve të MMPHI kanë gjetur shkelje serioze dhe dyshime për manipulim të të dhënave e dokumenteve. Rasti i dytë po ashtu ka të bëjë me dyshime për keqpërdorime serioze në punët në fushën e ujërave, të cilat punë sipas Raportit të bërë nga Grupi i ekspertëve janë bërë pa kritere, me shkelje serioze të ligjit deri në masën që ka dyshime se punët janë paguar pa u vënë kurrë në praktikë!”, ka shkruar Zogiani.

     

  • Haradinaj: Qeveria do të mbahet përgjegjëse për përkeqësimin e gjendjes së sigurisë në vend

    Haradinaj: Qeveria do të mbahet përgjegjëse për përkeqësimin e gjendjes së sigurisë në vend

    Kryetari i AAK-së Ramush Haradinaj ka reaguar pas vrasjeve që tronditën Kosovën në ditët e fundit.

    Ai tha se vendi është duke u përballur me sfida të shumta të sigurisë, duke përmendur veriun, vrasjet, lëndimet e rënda trupore, armët pa leje e prezencën e narkotikëve.

    Ai ka shkruar se siguria publike është duke u sfiduar nga banda të armatosura të cilat nuk zgjedhin as cak e as vend për të terrorizuar qytetarët.

    “Fatkeqësisht siguria publike ne vend, tashmë është duke u sfiduar nga banda të armatosura të cilat nuk zgjedhin as cak e as vend për të terrorizuar qytetarët. Vrasjet e ditëve të fundit, përfshirë edhe vrasjen e një shtetasi të huaj, janë treguesi më i mirë për pasigurinë dhe kërcënimin që ju kanoset qytetarëve si në rrugë, ashtu dhe në ambiente publike, lokale hoteliere e gjetiu”, ka shkruar Haradinaj.

    Haradinaj ka thënë se “mungesa e vizionit dhe përkushtimit të Qeverisë dhe MPB-së ngrit dyshime se niveli i lartë i cenimit të sigurisë publike dhe neglizhenca institucionale për të parandaluar këto lloje të krimeve nga të cilat çdo ditë është duke u tronditur vendi, ka për qëllim zhvendosjen e vëmendjes së opinionit nga skandalet dhe aferat e shumta korruptive të qeverisë, ku së fundmi u mësua edhe për planifikim të kontrabandës ndërkombëtare me armë nga ana e sekserëve të afërt me qeverinë”.

    Haradinaj ka shkruar se qytetari ka mbetur i pa mbrojtur, i pa përkujdesur nga kjo qeveri e cila ka mungesë të madhe profesionale për të trajtuar çështje komplekse siç është siguria

    Në fund ai ka thënë se kjo Qeveri do të mbahet përgjegjëse për përkeqësimin e gjendjes së sigurisë në vend.

  • Aysu Turkoglu bëhet gruaja e parë turke që noton përgjatë Kanalit të Veriut

    Aysu Turkoglu bëhet gruaja e parë turke që noton përgjatë Kanalit të Veriut

    Aysu Turkoglu, një notare 22-vjeçare, u bë gruaja e parë turke që kaloi me not Kanalin e Veriut të mërkurën.

    Turkoglu, e cila ishte gjithashtu atletja më e re turke që notoi nga Irlanda e Veriut në Skoci, duke përfunduar një udhëtim pothuajse 40 kilometra (24 milje) në Kanalin e Veriut në 11 orë, 48 minuta dhe 19 sekonda, shkruan AA.

    Në vitin 2022, Turkoglu notoi Kanalin Anglez për 16 orë e 28 minuta duke u bërë notarja më e re turke që ka bërë ndonjëherë këtë kalim, transmeton KosovaPress.

    Të mërkurën, ajo filloi të notonte në orën 04:45 GMT në Bangor të Irlandës së Veriut, derisa delfinët në Kanalin e Veriut e shoqëronin.

    Turkoglu krenare shfaqi një flamur turk kur përfundoi kalimin e saj. Temperatura e ujit në Kanalin e Veriut është rreth 12-14C (54-57F) – shumë më e ftohtë se në Kanalin Anglez.

    Pas kalimit të saj në Kanalin e Veriut, Turkoglu dëshiron të thyejë rekordin Guinness duke përfunduar kanalet “7 Oqeanet” brenda pesë viteve.

    Sfida e notit maratonë “O7” përfshin kanalin Catalina në SHBA, kanalin Molokai në Hawaii, Ngushticën Cook në Zelandën e Re, Ngushticën e Gjibraltarit midis Spanjës dhe Marokut, ngushticën Tsugaru në Japoni, Kanalin e Veriut midis Irlandës dhe Skocisë dhe Kanalin anglez midis MB dhe Francës.

  • Vrasjet e fundit në Kosovë, deputeti Berisha kërkon orë policore

    Vrasjet e fundit në Kosovë, deputeti Berisha kërkon orë policore

    Ngjarjet e fundit në Kosovë që kanë përfunduar me vrasje, kanë ngritur shqetësimin e qytetarëve.

    E me këtë rast ka reaguar deputeti nga radhët e Aleancës për Ardhmërinë e Kosovës Bekë Berisha.

    Berisha për të parandaluar këto ngjarje ka kërkuar aplikimin e “Orës Policore”.

    “Para se të gjejmë fajtorin dhe të flasim për fenomenin apo për defektet të mos efikasitetit të sistemit të sigurisë, rendit dhe drejtësisë në vendin tonë. I bëj thirrje drejtorit të policisë të dal me plan konkret, duke ndërmarrë veprimet e duhura, që kjo gjendje të stabilizohet”, tha Berisha.

    Vetëm gjatë dy javëve të fundit në Kosovë kanë ndodhur tri vrasje.

    Të premten e kaluar, në lokalin “Bon Vivant” u vra një person dhe u plagosën 17 të tjerë.

    Ndërkaq të hënën, në Klinë u vra një person.

    Gjithashtu në mesnatën e së mërkurës, në një kafene në Runik të Skenderajt u vra një person dhe u plagosën tre të tjerë.

  • ATK-ja verifikon mallrat pa origjinë

    ATK-ja verifikon mallrat pa origjinë

    Administrata Tatimore e Kosovës, ua ka rikujtuar të gjithë tatimpaguesit se në bazë të Ligjit për Administratën Tatimore dhe Procedurat, kërkohet dokumentimi i origjinës së mallit.

    Sipas njoftimit, “aktivitetet e ATK-së, në vazhdimësi do të përqendrohen pikërisht te tatimpaguesit, të cilët posedojnë mallra pa origjinë”.

    “Secili tatimpagues duhet të ofrojë dokumentacionin mbështetës, i cili arsyeton prejardhjen e mallit si në vendndodhjen, apo vendndodhjet e tatimpaguesit, ashtu edhe për mallrat në qarkullim jashtë vendndodhjes së tatimpaguesit”, thuhet në njoftimin e ATK-së.

    “Po ashtu, secili tatimpagues duhet të dokumentojë të gjitha mallrat nga koha e pranimit (qoftë përmes importimit, blerjes, shkëmbimit apo mënyrave tjera) deri sa ato të jenë shitur apo ndryshe të jenë sistemuar, përfshirë dokumentacionin e shitjes apo sistemim tjetër”.

    Kësisoj, ATK ka inkurajuar të gjithë tatimpaguesit që t’i përgjigjen në mënyrë të saktë detyrimeve tatimore, në të kundërtën “ATK, do të detyrohet që të ndërmarrë masat ndëshkuese sipas legjislacionit tatimor”.

    “Me kryerjen e detyrimeve tuaja tatimore, ju do të kontribuoni direkt në financimin e programeve qeveritare siç janë: ofrimi i shërbimeve publike, arsimim me standarde të larta, mirëqenies shëndetësore dhe sociale, mbrojtje ligjore dhe siguri, si dhe infrastrukturë të përgjithshme për një mirëqenie më të mirë ekonomike dhe shoqërore”.