Presidentja e Kosovës, Vjosa Osmani, më 7 shtator do të takohet me shefin e NATO’s, Jens Stoltenberg.
Agjenda në fjalë është kumtuar nga faqja e NATO’s.
“Të enjten, më 7 shtator 2023, sekretari i përgjithshëm i NATO-s, Jens Stoltenberg, do ta presë znj. Vjosa Osmani-Sadriu. Sekretari i përgjithshëm dhe znj. Osmani do të mbajnë konferencë të përbashkët për media në seli të NATO-s pas takimit të tyre”, thuhet në njoftimin e NATO’s.
Blerja e librave e teksteve shkollore veçse ka filluar. Ekonomia Online të mërkurën ka qëndruar në njërën prej librarive në Kryeqytet, për të parë nga afër procesin e blerjes së librave nga prindërit.
Për t’u pajisur me libra ishte edhe Albana Bajrami, nënë e tre fëmijëve, dy prej të cilëve akoma i ka në shkollë fillore.
Ajo për Ekonomia Online tha se për momentin i ka marrë vetëm disa nga librat për njërin fëmijë, ngase akoma nuk e di se cilët libra do i duhen për fëmijën tjetër.
Ajo nuk ishte në dijeni për koston e këtyre librave, teksa tregoi edhe për vështirësitë për aplikim për rimbursim.
“Unë deri tani i bleva një palë libra, jo të gjitha, për klasën e dytë. I kam dy fëmijë në shkollën fillore. Të njërit fëmijë nuk i kam blerë ende librat, pasi presim nga kujdestarët e klasave që të na dërgojnë listën se në cilat shtëpi botuese do t’i blejnë ndërsa për klasën e dytë deri tani janë bërë 35.52 euro, që do të thotë që do të blejnë libra të tjerë në një shtëpi tjetër botuese deri tani i bleva në atë ‘Dukagjini’, në shtëpinë ‘Albas’ do t’i blej të tjerat, nuk e di sa do të kushtojnë që t’i kompletoj të gjithë librat për klasën e dytë”, u shpreh ajo.
“Si çmime deri tani nuk e di çfarë të them se ngaqë i kemi marrë gjithmonë falas nuk mund ta di se si do të jenë të tjerat, por po shpresoj që t’i mbuloj edhe kostoja që thuhet se do t’i dërgoj Ministria e Arsimit. E bëra aplikimin, ende nuk kam ndonjë përgjigje por si aplikim e kam bërë për njërin fëmijë, për tjetrin nuk kam mundur ta bëjë”, u shpreh ajo.
Sa i përket aplikimit, Bajrami tha se aplikimi në platformën “E-Kosova” nuk ka qenë edhe aq i shpejt e që për të kryer një aplikim të plotë i ishte dashur të hynte disa herë.
Shkaku i vështirësive në këtë platformë, Bajrami tha se nuk ka arritur të rimbursohet.
“Më është kthyer përgjigjja se keni bërë një aplikim, prisni edhe pak, se kur duhet ta bëjë tjetrin, të shohim njëherë, duhet të provoj. Nuk është shumë vështirë për të aplikuar por ishte pak si proces i ngadalshëm, ndoshta rrjeti i dobët, u desh dy, tre herë të futesh në proces për të bërë një aplikim të plotë”, tha Bajrami.
E një nxënëse prishtinase e cila është në shkollë fillore, tha se akoma nuk i ka blerë dy libra duke shtuar se viteve të tjera librat i kanë marrë në shkollë.
“Në këtë vit i kemi blerë librat vetë. Kam nevojë t’i blej edhe dy libra, ato janë art figurativ dhe edukatë fizike. Viteve të tjera i kemi marrë në shkollë”.
Ekonomia Online ka biseduar me menaxherin shtëpisë botuese “Dukagjini”, Blerim Muhaxhiri. Ai tha se si shtëpi botuese kanë furnizim të mjaftueshëm për të gjitha libraritë dhe se një gjë të tillë e kanë bërë, sa i përket furnizimit me tekste shkollore të cilat i boton kjo shtëpi botuese.
“Mund të themi se jo vetëm në rajonin e Prishtinës por në të gjithë Republikën e Kosovës të gjitha libraritë ku ndodhen i kemi furnizuar me të gjitha tekstet e shtëpisë botuese ‘Dukagjini’ dhe asnjë librari ose edhe ne si shtëpi botuese nuk kemi asnjë mungesë të asnjë teksti, përpos kësaj si librari, këtu në qendër në sheshin ‘Nëna Terezë’, te ‘Dukagjini Center’ ku e kemi hapur një pikë ambulative për t’u shërbyer sa më shpejt prindërit me tekste shkollore, tek pika tjetër në ‘Prishtina Mall’, në të gjitha pikat nuk ka asnjë mungesë të teksteve shkollore sa i përket shtëpisë botuese ‘Dukagjini’, ndërsa kemi bërë ftesë edhe prej shtëpive të tjera botuese edhe për të na furnizuar tre pika të librarisë ‘Dukagjini’ me të gjitha tekstet, disa kanë sjellur furnizim por të paktë”, u shpreh ai.
Ministrja e Arsimit, Shkencës, Teknologjisë dhe Inovacionit, Arbërie Nagavci, ka thënë janë në proces të aspekteve teknike për transferimin e mjeteve në xhirollogaritë e atyre që kanë aplikuar për subvencionim të teksteve shkollore.
Ajo ka thënë se deri tani janë 92 mijë aplikime, derisa ka shtuar se janë duke i shqyrtuar të gjitha ankesat e pranuara deri tani.
Ndërsa lidhur me rastet kur nxënësit janë 5 vjeç, ajo ka thënë se pagesa do të bëhet pas verifikimit të rasteve.
Ajo ka shtuar se mundësia për të aplikuar do të jetë e hapur deri në fund të muajit shtator “me qëllim që asnjë nxënës të mos mbetet pa u pajisur me tekste shkollore”.
“Deri tash në këtë platformë kanë aplikuar gjithsej 92 mijë prindër. Për të gjithë ata që kanë aplikuar, ju informoj se jemi në proces të aspekteve teknike për transferim të mjeteve në xhirrollogaritë tuaja. Po ashtu, ju siguroj se të gjitha ankesat që i kemi pranuar deri tash janë duke u shqyrtuar”, ka shkruar ajo.
Qeveria e koalicionit të majtë-liberal të Gjermanisë nuk arriti të merrte një vendim për subvencionimin e energjisë elektrike gjatë dy ditëve të takimeve në Meseberg.
Një propozim nga Ministria e Ekonomisë dhe Klimës e udhëhequr nga të Gjelbrit për të kufizuar çmimet në 6 cent për kilovat-orë për industri të caktuara nuk mund të fitonte mbështetjen e kancelarit Olaf Scholz.
Duke folur me gazetarët të mërkurën, kancelari Scholz tha se qeveria ka ndërmarrë tashmë përpjekje serioze për të siguruar një furnizim të qëndrueshëm dhe të përballueshëm me energji.
“Fakti që vepruam kaq herët na ndihmoi të kalonim dimrin dhe nuk bëri ftohtë në shtëpitë dhe fabrikat tona, dhe ekonomia ishte në gjendje të vazhdonte të funksiononte,” tha ai, duke iu referuar masave të qeverisë për të zëvendësuar importet ruse të energjisë dhe për të nxitur alternativat e rinovueshme.
“Dhe ne shpenzuam shumë para për ta subvencionuar këtë, shumë miliarda, pasi rritja e çmimit ishte e dukshme kudo gjatë asaj kohe. Tani po shohim që çmimet po bien sërish”, shtoi ai.
Socialdemokrati Olaf Scholz nënvizoi se çmimet e importit të Gjermanisë panë një rënie të ndjeshme në korrik, duke treguar se rënia e çmimeve të energjisë ka një ndikim pozitiv tek kompanitë.
“Kostot e përgjithshme të importit për Gjermaninë po bien dhe ky është rezultat i strategjisë që kemi zhvilluar. Dhe strategjia jonë synon të sigurojë kosto të ulëta të energjisë elektrike në Gjermani duke zgjeruar energjitë e rinovueshme me një ritëm edhe më të shpejtë”, tha ai.
Më parë, ministri i financave Christian Lindner nga partia liberale FDP hodhi poshtë planet e të Gjelbërve për të subvencionuar energjinë elektrike të përdorur nga kompanitë industriale. Ai argumentoi se një masë e tillë do të binte ndesh me parimet e ekonomisë sociale të tregut dhe do të ishte veprim “ekonomikisht jo i mençur”./AA/
Dëshmitari i nëntëmbëdhjetë i Zyrës së Prokurorit të Specializuar e ka përfunduar dëshminë e tij në gjykimin kundër ish-krerëve të Ushtrisë Çlirimtare të Kosovës.
E tërë dëshmia e tij është dëgjuar në seancë të mbyllur për publikun ndërsa prokurori Matt Halling e ka bërë një përmbledhje të shkurtë të dëshmisë së tij.
Në seancën e së martës, prokurori ka thënë se kjo dëshmi ka të bëjë me ndalimin dhe zhdukjen e pretenduar të një familjari të 04566.
Derisa e ka lexuar përmbledhjen në gjykatore, ai ka thënë se ngjarja ka ndodhur në fshatin Drenoc.
Pas përfundimit të dëshmisë së tij, gjykata ka bërë te ditur se seancat në këtë proces gjyqësor do të vazhdojnë të hënën e 4 shtatorit.
Nga 19 dëshmitarë të prokurorisë, vetëm tre prej tyre kanë dëshmuar pa masa mbrojtëse dhe në seanca të hapura për publikun.
Gjykimi ndaj Thaçit dhe të tjerëve ka nisur me 3 prill me deklaratat hyrëse ku të gjithë janë deklaruar të pafajshëm për akuzat për krime të pretenduara të luftës.
Hashim Thaçi, Kadri Veseli, Jakup Krasniqi e Rexhep Selimi ndodhen në qendrën e paraburgimit në Hagë prej nëntorit të vitit 2020./KP
Presidenti i Serbisë, Aleksandar Vuçiq, ka biseduar me përfaqësuesin special të Bashkimit Evropian për dialogun ndërmjet Kosovës dhe Serbisë dhe çështje të tjera rajonale të Ballkanit Perëndimor, Miroslav Lajçak, dhe i ka përcjellë shqetësimin e tij për zhvillimet në Kosovë.
Pas bisedës dy orëshe, Vuçiq ka thënë në Instagram se Lajçakut ia ka përcjellë shqetësimin e tij lidhur me planin e Kurtit për pushtimin e veriut të Kosovës dhe dëbimin e serbëve.
“Jam shumë i shqetësuar për zhvillimin e ngjarjeve në Kosovë dhe planin e Kurtit për të pushtuar me dhunë veriun e krahinës dhe për të dëbuar serbët nga vatrat e tyre shekullore. Këtë ia kam përcjellë përfaqësuesit special të Bashkimit Evropian për dialogun ndërmjet Beogradit dhe Prishtinës dhe çështjeve tjera rajonale të Ballkanit Perëndimor, Miroslav Lajçak”, tha Vuçiq.
Të paktën dy persona humbën jetën në një aksident zinxhiror mes kamionit dhe disa mjeteve tjera motorike, në afërsi të qytetit gjerman Magdeburg.
Incidenti ndodhi rreth orës 12:15, kur shoferi i kamionit që transportonte materie të rrezikshme goditi tre kamionë tjerë, e më pas kamionin e pestë i ngarkuar me kontejner me azot, transmeton Telegrafi.
Pas përplasjes ka ndodhur një aksident zinxhiror, ku nga përplasja e fuqishme kamionët u përfshinë nga zjarri dhe u zgjerua deri te ai që transportonte materie të rrezikshme.
Bombolat me gaz që ishin ngarkuar kanë filluar të shpërthejnë njëra pas tjetrës, e një re tymi të zi u ngrit në qiell, derisa shoferët vraponin për t’i shpëtuar më të keqes.
Disa vetura që ishin afër u dëmtuan, kurse Bild raporton se policia nuk ka mundur për disa minuta t’i afrohej vendit të ngjarjes për shkak të rrezikut të madh.
Të paktën dy shoferë kamioni humbën jetën, kurse një tjetër ka pësuar lëndime të rënda. Nga policia bëjnë të ditur se kanë frikë se do të gjejnë edhe trupa tjerë të pajetë.
Udhëzimi administrativ që iu mundëson qytetarëve të komunave në veri shkarkimin e kryetarëve përmes një peticioni do të jetë gati më 1 shtator. I njëjti sipas zyrtarëve të Ministrisë së Administrimit të Pushtetit Lokal do të jenë në dëgjim publik edhe nesër më 31 gusht, mirëpo njohës të proceseve ligjore konsiderojnë se MAPL është vonuar në hartimin e këtij drafti, pasi ka edhe procedura të tjera derisa ai të hyjë në fuqi.
Nga zyra e kabinetit të ministrit të MAPL-së, Elbert Krasniqi, thonë për KosovaPress se ende nuk është përfunduar në tërësi drafti, pasi sot dhe nesër janë në fazën e pranimit të komenteve nga institucione të tjera.
“Udhëzimi Administrativ nuk ka përfunduar ende pasi jemi në fazën e komenteve nga institucione të tjera. Besoj se do të miratohet deri më 1 shtator kur është edhe afati për përfundimin e tij nga grupi punues”, thuhet në përgjigjen e tyre.
Por profesori universitar, Mazllum Baraliu thotë për KosovaPress se është shumë skeptik se udhëzimi administrativ do të ofrojë zgjidhje konkrete për deeskalimin e plotë të situatës në veri dhe shpalljen shpejt të zgjedhjeve të parakohshme atje.
Ai shton se të njëjtin e sheh më shumë si një metodë për të blerë kohë sesa për të organizuar zgjedhjet në veri.
“Administrata jonë shtetërore dhe institucionet e saja qeverisëse edhe më herët dhe tani me këtë qeverisje nuk është se janë shquar shumë në ndonjë efikasitet dhe efektivitet në punë. Përkundrazi më shumë se vonesa, zvarritje dhe burokraci kemi pasur sesa të themi efikasitet në çdo çështje. E dyta, lidhur me këtë çështje si rrjedhojë e obligimeve nga Bratislava, qeveria jonë, ashtu sikurse edhe BE-ja dhe Serbia, po përpiqen me metoda dhe mjete të caktuara të zvarrisin çështjet për të blerë kohë dhe për të parë si po reagohet ndaj palës tjetër dhe nga pala tjetër. Mund të konsiderojmë si një lloj taktike të qeverisë sonë dhe ministrisë përkatëse sa i përket këtij udhëzimi administrativ”, thotë ai.
Sipas tij, pas nënshkrimit nga ana e ministrit Krasniqi të udhëzimit administrativ, i njëjti do të hyjë në fuqi pas publikimit në gazetën zyrtare.
Ai shtoi në udhëzim duhet të sqarohet edhe ecuria tutje si duhet të vazhdohet pas nisjes së peticionit për shkarkimin e kryetarëve në veri.
“Qytetarët do të duhej ashtu siç parasheh neni 72 i ligjit për vetëqeverisje lokale që përmes kërkesave të tyre, që dikush po e quan peticion 20 për qindëshi i trupës elektorale, qytetarëve mbi 18 vjeç që kanë të drejtë vote të vënë nënshkrimet e tyre drejt Asamblesë Komunale dhe pastaj udhëzimi administrativ të përpunojë ecurinë e mëtejme procedurale në mënyrë që të realizohet kjo kërkesë dhe të shkarkohen këta kryetar komunash. Të hapet rruga dhe mundësia kushtetuese që presidentja e vendit t’i shpallë zgjedhjet”, deklaron Baraliu.
Megjithatë, Baraliu thotë se zgjidhja më e mirë për shpalljen e zgjedhjeve të reja në veri është dorëheqja e kryetarëve aktual.
“Do të ishte më mirë të aplikohej modeli apo mundësia tjetër ligjore e krijimit të kushteve të zgjedhjeve të reja në komunat veriore përmes dorëheqjeve të kryetarëve të tanishëm aktual, të cilët janë edhe legal dhe legjitim nga zgjedhjet e fundit”, shton Baraliu.
Më 10 korrik, Kosova ka arritur marrëveshje me BE-në për ulje të tensioneve, dhe në të është përfshirë edhe mbajtja e zgjedhjeve të reja në veri.
BE-ja ka bërë thirrje që zgjedhjet në veri të mbahen në një afat sa më të shkurtër kohor, derisa ka paralajmëruar se një takim i nivelit të lartë në dialog do të mbahet në shtator./KosovaPress/
Kryetari i Kuvendit, Glauk Konjufca, ka pritur në takim ambasadorin e ri jorezident të Kuvajtit në Kosovë, Faisal Al-Musaileem. Ata kanë diskutuar mundësitë e zgjerimit të bashkëpunimit në fusha të ndryshme.
Sipas njoftimit të Kuvendit, aty është theksuar gatishmëria për thellimin e bashkëpunimit të ndërsjellë, sidomos sa i përket hapësirës për zhvillim të mëtejshëm në investime dhe shkëmbime tregtare.
“Kryetari Konjufca uroi ambasadorin Al-Musaileem për detyrën e re dhe i shprehu mirënjohje për mbështetjen e Kuvajtit ndaj Republikës së Kosovës, për qasjen kontribuuese në sferën e politikës së jashtme, në veçanti për përkrahjen e aspiratave të shtetit tonë për anëtarësim në organizatat ndërkombëtare. Ambasadori Al-Musaileem e falënderoi Kryetarin Konjufca për pritjen dhe tha se marrëdhëniet mes Kosovës dhe Kuvajtit duhet të zhvillohen në të gjitha sferat, përfshirë edhe fushën parlamentare”, është theksuar në njoftim.
Bashkimi Evropian (BE) i ka përsëritur kërkesat ndaj Kosovës dhe Serbisë për ndërmarrjen e hapave që u është kërkuar atyre për t’i krijuar kushtet për vazhdimin e dialogut, por nuk ka dashur të përmendë afate kohore se kur mund të ndodhë një takimi i nivelit të lartë në Bruksel.
Këto qëndrime i ka shprehur për Radion Evropa e Lirë Peter Stano, zëdhënës i BE-së për çështje të jashtme dhe të sigurisë.
“Puna në dialog po vazhdon. Ne e kemi përsëritur vazhdimisht javëve të fundit se ka një pritje të qartë nga ana e BE-së që palët t’i ndërmarrin hapat e definuar shumë qartë për deeskalim, dhe t’i krijojnë kushtet për vazhdimin e dialogut”, tha Stano.
Më 10 korrik, Kosova dhe Bashkimi Evropian u pajtuan për disa hapa për shtensionimin e situatës në veri të Kosovës, përfshirë zvogëlimin e pranisë policore dhe organizimin e zgjedhjeve të reja në katër komunat veriore.
Policia e Kosovës njoftoi më 4 gusht për zvogëlimin për 25 për qind të prezencës së oficerëve të vet në dhe rreth objekteve komunale në veri të Kosovës.
Ndërkohë, i dërguari i posaçëm i BE-së për dialog Miroslav Lajçak, po i vazhdon takimet me përfaqësues të Kosovës dhe Serbisë për të përgatitur takimin e radhës në kuadër të dialogut. Ai e ka përmendur muajin shtator si afat kur mund të ndodhë takimi i radhës, por jo edhe ndonjë datë të saktë.
Stano, po ashtu, ka refuzuar të përmend data duke thënë se “do të shpallim datën për çfarëdo takimi të radhës të udhëhequr nga Përfaqësuesi i lartë kur të jetë e përshtatshme”.
Zëdhënësi i Bashkimit Evropian ka përsëritur edhe thirrjet për implementimin e shpejtë dhe pa vonesa të marrëveshjeve që kanë dalë nga dialogu.
“Ne, po ashtu, kemi thënë shumë qartë se është e domosdoshme që dialogu i lehtësuar nga përfaqësuesi i lartë dhe implementimi i shpejtë i marrëveshjes për normalizimin e raporteve dhe aneksit për implementim, të bëhen pa ndonjë vonesë të re” theksoi ai.
Për një periudhë të gjatë nuk ka pasur takime në nivelin e lartë në kuadër të dialogut.
Herën e fundit kur Kryeministri i Kosovës Albin Kurti dhe Presidenti i Serbisë Aleksandar Vuçiq ishin në Bruksel ishte 22 qershori, por as atëherë ata nuk patën takim mes vete.
Në BE pohojnë se synojnë që tash situate të normalizohet në veri dhe që palët të evitojnë çdo veprim i cili mund të shkaktojë tensione të reja dhe në këtë mënyrë të ndikojë negativisht edhe në procesin e dialogut.