ATV

Category: Lajme

  • Tahiri: Kjo Qeveri krijon shpenzime në kurriz të qytetarëve, do të bëjmë çmos ta rrëzojmë

    Tahiri: Kjo Qeveri krijon shpenzime në kurriz të qytetarëve, do të bëjmë çmos ta rrëzojmë

    Shefi i deputetëve të PDK-së, Abelard Tahiri, ka thënë se vendimi i fundit i Qeverisë për librat ka qenë goditja e fundit për arsimin në Kosovë, raporton EO.

    Ai ka thënë se do të bëjnë çmos që ta rrezojnë këtë qeveri, sepse ajo “krijon shpenzime në kurriz të qytetarëve dhe nuk bën asnjë punë të mirë”.

    Tahiri ka pasur kritika edhe për mungesën e mazhorancës në seancën e jashtëzakonshme, ku pritej të diskutohej për furnizimin me tekste shkollore për nxënësit e nivelit të arsimit fillor dhe të mesëm të ulët.

    Siç tha ai në një konferencë për medie, sesioni vjeshtor është dashur të fillojë me diskutimin për tekstet shkollore, por kjo nuk ndodhi për fajin e VV-së.

    “Besoj që nuk ka gjë më të arsyeshme sesa sot të hapej sesioni vjeshtor për një çështje e që e prek ardhmërinë e vendit tonë dhe që prek rreth 210 mijë nxënës. Pra janë e ardhmja jonë dhe ju po e shihni që tani e tutje nuk ka asnjë gjë të vetme që kjo legjislaturë të vazhdojë punën. Janë duke e degraduar punën në çdo rrafsh”.

    “Goditja e fundit është goditja që i dhanë arsimit, dhe ata nuk u turpëruan nga ne që nuk erdhën në seancë por u turpëruan nga prindërit e nxënësit sepse kjo ishte e tmerrshme atë që e dëgjuam në konferencë për medie. Ne do të bëjmë çmos që këtë legjislaturë ta dërgojmë në shtëpi sepse kjo legjislaturë krijon shpenzime në kurriz të qytetarëve dhe nuk bën asnjë punë të mirë”, u shpreh Tahiri.

  • ​Dëshmitari kundër Thaçit dhe të tjerëve: Gjatë luftës përkrahnim LDK-në, sot e adhuroj Kurtin

    ​Dëshmitari kundër Thaçit dhe të tjerëve: Gjatë luftës përkrahnim LDK-në, sot e adhuroj Kurtin

    Dëshmitari i njëzetë i Zyrës së Prokurorit të Specializuar në gjykimin kundër Thaçit dhe të tjerëve, ka folur për një familjar të zhdukur e për të cilin pretendon se ishte marrë nga anëtarë të UÇK-së. Arsyet për këtë, në gjykatore u tha se kishin të bënin me xhelozinë në fshat si dhe faktin që ai ishte përkrahës i Lidhjes Demokratike të Kosovës.

    Dëshmitari i mbrojtur i cili mban kodin 4368, ka thënë se ai dhe familja e tij gjatë periudhës së luftës kishin përkrahur hapur LDK-në.

    Por sot, derisa është përgjigjur në pyetjet e avokatit të Rexhep Selimit, Eric Tully, ka thënë se nuk është mbështetës i kësaj partie por i kryeministrit Albin Kurti.

    Avokati Tully: Ju po ashtu keni thënë se mbase ky inati që ka ekzistuar në fshat mbase ishte për shkak të mbështetjes së LDK-së, mbase mbështetja e LDK-së ka bërë që të arrestohej i afërmi 1. Në deklaratën e dhënë për ZPS-në, në pyetjen pse beson që donin ta likuidonin, ju keni thënë ‘Kishte ca gjëra që ishin bërë bashkë, për shembull fakti që ishte me LDK-në, kishte edhe një inat nga njerëzit në fshat kundër tij’.

    Dëshmitari: Sot nuk jam i LDK-së, jam i Vetëvendosjes, i Albin Kurtit, sepse ka ardhur një njëri prej qielli, ka ardhur një njëri shumë i zgjuar, Vjosa Osmani, jam përkrah këtyre, nuk jam më për LDK-në.

    Ndërsa në pyetjet e avokatit të ish-presidentit Thaçi, Gregory Kehoe, dëshmitari është përgjigjur edhe për një rast kur sipas tij kishte shkuar për të takuar Adem Demaçin, por i njëjti sipas tij nuk i kishte pranuar.

    Ai ka thënë se aty kishte parë edhe Albin Kurtin.

    Avokati Kehoe: Pra shkuat të takoni Demaçin së bashku me personin 2, shkuat për të folur me Demaçin dhe Kurtin, ju keni folur edhe me Kurtin i cili ishte asistent i Demaçit, kështu ka qenë?

    Dëshmitari: Demaçi nuk ka dalë prej zyrës vetëm….Kurtin e adhuroj sot se është kryeministër shumë i mirë por nuk kam pasur muhabete me Kurtin, as me Thaçin, Demaçi nuk na ka pranuar, se e diti situatën ku është dhe nuk na ka pranuar.

    Avokati Kehoe: Por me Kurtin u takuat, çfarë marrëdhënie kishit me Kurtin.

    Prokurorja Hackler: kundërshtojmë i nderuar gjykatës sepse tha që nuk u takua me Kurtin.

    Avokati Kehoe: E patë Kurtin kur ishit aty?

    Dëshmitari: E pash por pa biseduar, nuk biseduam.

    Avokati Kehoe: Çfarë marrëdhëniesh kishit me Kurtin?

    Dëshmitari … (Përmbajtje e redaktuar)

    Derisa është përgjigjur në pyetjet e mbrojtjes, dëshmitari ka thënë se shtëpia e tij ishte garantuar nga forcat serbe.

    Pjesë të mëdha të dëshmisë së tij gjykata i ka transmetuar me përmbajtje të redaktuar apo janë dhënë në seancë private.

    Gjithashtu seanca është mbyllur sa herë që pyetjet kanë pasur të bëjnë me emra të personave të tjerë.

    Gjatë intervistimit nga avokati Kehoe, në gjykatore është shfaqur një dokument i cili nuk është dhënë edhe për publikun.

    Ndërsa ai i ka papërmendur dëshmitarit deklaratat e tij të dhëna më parë.

    Avokati Kehoe: Thuhet që kidnapimi dyshohet që është bërë nga xhelozia, thuhet i afërmi 1, një shqiptar i Kosovës dhe disa djem që punojnë jashtë vendit, kurr nuk kanë pasur ndonjë interes në politikë dhe këtë e ka thënë hapur, ai nuk di të lexojë dhe as të shkruajë por kishte shumë influencë në fshatin e tij. A është fakt ky, a ja keni thënë këtij institucioni këtë gjë, që ai nuk kishte fare interes në politikë dhe këtë e ka pas thënë hapur?

    Dëshmitari: Unë jo, nuk e di kush e ka thënë këtë.

    Pas kësaj seanca ka vijuar e mbyllur, për t’u hapur pastaj me pyetjet e avokatit Kehoe lidhur me kidnapimin që pretendohet se i është bërë familjarit të tij.

    Dëshmitari ka thënë se të afërmit e tij, “numri 1” dhe “numri 2” u kishin dhënë para serbëve për të mos e futur në burg “numrin 2”.

    Ai gjithashtu ka thënë se “numri 1” është përfshirë edhe në rastet me fshatarë të tjerë për të kuptuar se sa para donin serbët.

    Dëshmitari: (Numri 2) Ky ka qenë azil politik në Francë, kur është kthyer prej Francës, donin me mbyll në burg serbët me numrin 2, ai ka qenë azil politik, e kemi ble një traktor për me shpëtu këtë prej burgut… Kanë ardhur të shtëpia na kanë bastisë, për numrin dy që ka ardhur prej Francës, e gjetën një aparat të madh e morën serbët atë aparatin. Ne u kemi dhënë para serbëve, nuk u kemi dhënë shqiptarëve në atë kohë.

    Ndërsa avokati Tully ka përmendur deklaratat e dëshmitarit, të dhëna ditë më parë në konferencën përgatitore me ZPS-në, por për të njëjtat ai ka thënë se nuk i kujtohen.

    Avokati Eric: Ju përshkruani gjendjen pas arrestimit të të afërmit 1. Ju thoni si më poshtë: Jam i interesuar veçanërisht sa i takon terrorit që ekzistonte tek vendasit. Kur u pyet sa i takon pjesës së raportit që thotë që kidnapimi kishte si qëllim të vinte një shembull për të tjerët dhe për të nxitur pak terrorin ndërmjet vendasve, 4368 tha që ai nuk mendon që kidnapimi çoi në frikë, megjithëse disa fshatarë ishin të shqetësuar lidhur me këtë dhe thanë ‘o Zot, mund të më vijë edhe mua radha ndonjëherë’. Pastaj në fund fare thuhet që 4368 tha që ne nuk ishim një familje që mburreshim, dhe qëllimi i tyre ishte t’i ulnin kokën atyre personave si puna jonë. Pyetja ime është kjo, a ju kujtohet të keni thënë këtë?

    Dëshmitari: Nuk e kam thënë këtë gjë, nuk më kujtohet.

    Avokati: Dëshmitar, kjo ka ndodhur dy ditë më parë, ka dhënë një shënim përgatitor për këtë seancë, prokuroria, dhe kjo është ajo çfarë thuhet në shënimin përgatitore të prokurorisë.

    Kjo seancë po karakterizohet me redaktime të shumta si dhe mbyllje për publikun.

    Gjithashtu, disa pjesë të dëshmisë së dëshmitarit nuk janë kuptuar për shkak të modifikimit të tepërt të zërit./KosovaPress

  • ​Begaj: Në Asamblenë e OKB-së do të kem në fokus çështjet e njohjes së Kosovës

    ​Begaj: Në Asamblenë e OKB-së do të kem në fokus çështjet e njohjes së Kosovës

    Presidenti i Shqipërisë, Bajram Begaj deklaroi sot (e hënë) se askush nuk mund të çuditet pse Kosova është prioritet kombëtar dhe se në të gjitha takimet e tij ka kërkuar njohjen e Kosovës. Ai u shpreh se Kosova duhet të ketë koordinim të ngushtë dhe më të mirë me Shtetet e Bashkuara të Amerikës dhe Bashkimin Evropian, shkruan KosovaPress.

    Pas takimit me presidenten Vjosa Osmani, Begaj theksoi se pjesëmarrja e tij në Asamblenë e OKB-së do të ketë në fokus çështjet e njohjes së Kosovës.

    “Vlerësova se pavarësisht provokimeve për të tensionuar situatën në komunat me shumicë serbe në veriun e Kosovës, si dhe ndërhyrjeve hibride nga aktorë të tretë dashakeqës, duhet një koordinim më i ngushtë dhe më i mirë me partnerët tanë kryesor, Shtetet e Bashkuara të Amerikës dhe Bashkimi Evropian, për të gjitha veprimet e ndërmarra. Askush nuk mund të vërë në pikëpyetje sovranitetin dhe integritetin territorial të Kosovës si dhe të drejtën për të zbatuar ligjet dhe kushtetutën e vendit. Por, koordinimin me partnerët është i domosdoshëm. Në këtë aspekt vlerësova edhe e fundit të ndërmarra nga Qeveria e Kosovës për deeskalimin e situatës. Gjithashtu nënvizova se dialogu i ndërmjetësuar nga Bashkimi Evropian dhe i mbështetur fuqimisht nga Shtetet e Bashkuara të Amerikës rruga e vetme drejt paqes, normalizimit të marrëdhënieve si dhe anëtarësimit të Kosovës në organizata rajonale dhe ndërkombëtare, përfshirë edhe atë të Organizatës së Kombeve të Bashkuara”, deklaroi Begaj.

    Sa i përket procesit të njohjes së Kosovës, ai shtoi se është i nevojshëm një koordinim dhe bashkërendim më i mirë i punës i institucioneve të të dyja vendeve. Ai theksoi se është detyrë e Shqipërisë që të kërkojë njohje të reja dhe mbështetje për Kosovën.

    “Pjesëmarrja ime në Asamblenë e OKB-së do të ketë në fokus çështjet e njohjes së Kosovës. Vëmendje i kushtuam edhe bashkëpunimit në kuadër të procesit të integrimit evropian dhe integrimit euroatlantik, ku ndër të tjera shpreha besimin për përmbylljen së shpejti të procesit të liberalizimit të vizave nga BE për qytetarët e Kosovës. Ky është një veprim i vonuar por me shumë rëndësi praktike por edhe morale për gjithë qytetarët e Kosovës”, shtoi ai.

    Në takimin e sotëm me homologen nga Kosova, Begaj shtoi se janë përqendruar në çështjet më të rëndësishme të interesit ndërshtetëror, por edhe nevojës të një koordinimi më të mirë.

    I pari i Shqipërisë theksoi se askush nuk ka pse “çuditet” pse Kosova është prioritet kombëtar i tyre.

    “Theksova gjithashtu se askush nuk ka pse çuditet se përse Kosova është një prioritet kombëtar i Shqipërisë. Kjo ka qenë dhe mbetet devizë e çdo qytetari në Shqipëri, ndaj dhe rikonfirmova edhe një herë mbështetjen time dhe të shtetit shqiptar për Kosovën kudo, në çdo forum rajonal e ndërkombëtar. Një vëmendje të shtuar i kushtuam nevojës së nxitjes së mëtejshme të bashkëpunimit ekonomik të të dy vendeve. Shpreha kënaqësinë që gradualisht dhe në mënyrë të natyrshme Kosova është bërë një partner mjaft i rëndësishëm për Shqipërinë. Kosova përfaqëson sot realisht tregun e dytë më të rëndësishëm për eksportet shqiptare të mallrave dhe shërbimeve. Gjithashtu shpreha kënaqësinë se sot Kosova renditet si investuesi i tretë më i rëndësishëm ndër vendet e Gadishullit Ballkanik në Shqipëri me një stok investimesh të kënaqshme”, shtoi Begaj.

    E presidentja Vjosa Osmani i ka konsideruar të shkëlqyera raportet mes Kosovës dhe Shqipërisë. Ajo derisa tha se Serbia po e cenon integritetin territorial të Kosovës, theksoi nevojën që ka vendi për përkrahjen e Shqipërisë.

  • Jasharaj: Eksperimenti i ministres Nagavci për rimbursimin e teksteve shkollore, doli të jetë i gabuar

    Jasharaj: Eksperimenti i ministres Nagavci për rimbursimin e teksteve shkollore, doli të jetë i gabuar

    Kryetari i SBASHK-ut, Rrahman Jasharaj, në një lidhje të drejtpërdrejt në emisionin A LIVE në ATV, tha se eksperimenti i Qeverisë për rimbursimin e teksteve shkollore doli të jetë i gabuar dhe po e cënon fillimin e mbartë të vitit shkollor.

    “Kam qenë nga njerëzit më të lumtur kur kam marrë raporte nga komunat se kolegët e mi, pra punëtorët e arsimit, nuk kanë kërkesa për ndonjë veprim sindikal dhe kemi shpresuar se vitin shkollor 2023/2024 më në fund do ta fillojmë mirë e mbarë, por dy konferenca me mediat e zonjës Nagavci treguan se kjo nuk do të ndodhë. E kam fjalën te eksperimenti i gabuar për tekstet shkollore, ngase buxheti i Kosovës duhet ndarë me kohë për libra dhe na ishte thënë fillimisht se do të kemi nëpër shkolla libra 1-5 dhe mësimdhënësit do të gjenden disi me tekstet e vitit të kaluar 6-9.Ky eksperiment doli të jetë i gabuar dhe po e cënon fillimin e mbartë të vitit shkollor”, u shpreh Jasharaj.

    Ai thotë se ka edhe informacione nga terreni se libraritë janë të mbushura me plot prindër, për shkak se në qyteza të vogla nuk ka librari dhe për blerjen e librave, prindërve iu është dashur të drejtohen nëpër qytete të mëdha.

    “Kjo ka mund të mos ndodhë dhe arsyetimi se po ruhet buxheti e po bëhet transparencë nuk qëndron ngase po bëhet rimbursimi, siç është thënë, dhe prindërit janë në dy halle. Halli i parë për të parë a po bëhet rimbursimi për të shkuar atje nëse dinë të aplikojnë për të shkuar te bankomatet për të pritur, pastaj për të shkuar në librari dhe kemi mijëra prindër që janë në gjendje tepër të vështirë ekonomike, kemi prindër që nuk kanë fare xhirollogari, lexova në media se paska edhe raste që i kanë xhirollogaritë e bllokuara fatkeqësisht, por edhe ata që nuk kanë fare xhirollogari dhe tani sidomos këta që punojnë në sektorin privat, po edhe në publik do ta kenë vështirë të shkojnë nga komuna apo qyteza e tyre për të pritur në radhë për të marrë libra, aq më keq zonja Nagavci ka deklaruar se prindërit duhet të komunikojnë me mësimdhënësit për të parë se shkolla e caktuar për të cilat libra është orientuar dhe pra e kemi një vit shkollor që fillon me vështirësi”, tha Jasharaj.

    Sipas tij, problemi më i madh qëndron në mungesën e gatishmërisë së ministres Nagavci për t’u takuar e komunikuar me SHBASHK-un.

    “Unë e di se mësimdhënësit e di se edhe DKA-të, shkolla përgjegjësi kanë bërë gjithë përgatitjet teknike brenda mundësive të veta dhe ky eksperiment nuk është dashur të ndodhë dhe po nëse kanë menduar ta bëjnë është dashur të dihet që në maj, por atë që po e them në emër të SBASHK-ut, problemi më i madh qëndron në mungesën e mirëkuptimit, gjegjësisht mungesën e gatishmërisë së zonjës Nagavci për t’u takuar, për të komunikuar me SBASHK-un që janë përfaqësues të tërë mësimdhënësve dhe punëtorëve tjerë”, u shpreh Jasharaj. /atvlive.tv

    Më shumë detaje rreth kësaj çështje i gjeni në emisionin “A LIVE”, të cilin e gjeni në videon më poshtë:

  • ​Osmani: Serbia po na e sfidon integritetin territorial, kemi nevojë për Shqipërinë

    ​Osmani: Serbia po na e sfidon integritetin territorial, kemi nevojë për Shqipërinë

    Të shkëlqyera i ka konsideruar presidentja Vjosa Osmani, raportet mes Kosovës dhe Shqipërisë. Ajo deklaroi se angazhohet për tejkalimin e çdo lloj mospajtimi të momentit mes kryeministrit Kurti dhe Rama. Kështu u shpreh ajo pas takimit me presidentin e Shqipërisë, Bajram Begaj, për çka tha se kryefjala e kësaj vizite është bashkërendimi për një strategji dhe veprim të unifikuar të politikës së jashtme. E presidenti i Shqipërisë, Bajram Begaj deklaroi se askush nuk mund të çuditet pse Kosova është prioritet kombëtar dhe se në të gjitha takimet e tij ka kërkuar njohjen e Kosovës. Ai u shpreh se Kosova duhet të ketë koordinim të ngushtë dhe më të mirë me Shtetet e Bashkuara të Amerikës dhe Bashkimin Evropian.

    Presidentja Vjosa Osmani tha se Kosova ka nevojë për mbështetjen e Shqipërisë, qw të bëhet zë në të gjitha instancat ndërkombëtare, raporton KosovaPress.

    “Kryefjala e vizitës sime është bashkërendimi për një strategji dhe veprim të unifikuar të politikës së jashtme. Siç e dini, dy muaj më parë, shtetet tona nënshkruan edhe 13 marrëveshje në fusha të ndryshme nga siguria, drejtësia, arsimi, kultura e bujqësia. Në dy vitet e fundit janë nënshkruar 41 marrëveshje qeveritare, ndërministrore, ndërinstitucionale. Ato synojnë fuqizimin e shteteve tona dhe njëkohësisht lehtësimin e jetës së qytetarëve në dy shtetet. Bashkëpunimi ekonomik është i një rëndësie të madhe për qytetarët tanë. Prandaj edhe duhet dhe mund ta krijojmë një shkëmbim edhe më dinamik, nga i cili përfitojnë edhe bizneset por edhe qytetarët”, deklaroi Osmani.

    Kryetarja e shtetit shtoi se janë të vendosur për të kontribuar në funksion të paqes dhe stabilitetit, të cilat siç tha ajo, po rrezikohen nga Rusia dhe satelitët e saj në rajon. Osmani deklaroi se Kosova sot përballet me sfidimin më të madh të sigurisë në 25 vjetët e fundit.

    “Përderisa politika shtetërore e Serbisë vazhdimisht po e sfidon integritetin territorial të Kosovës dhe angazhohet në agresion institucional kundër Kosovës në baza të rregullta, ne do të kemi nevojë për përkrahjen e Shqipërisë, e po ashtu për përkrahjen e aleatëve dhe partnerëve euroatlantikë dhe natyrisht që pajtohem me presidentin Begaj që koordinimi me miqtë dhe aleatët tanë është parakusht për suksesin tonë kudo e kurdo. Dialogu me Serbinë është duke vazhduar por natyrisht që rruga e vetme që sjell paqen, stabilitetin afatgjatë në gjithë rajonin tonë është atëherë kur rezultati përfundimtar është njohja reciproke dhe ruajtja e integritetit territorial, sovranitetit, rendit kushtetues dhe funksionalitetit të brendshëm të Republikës së Kosovës”, shtoi presidentja e vendit.

    Në konferencë për media, Osmani theksoi se synim shtetëror dhe strategjik mbetet anëtarësimi në NATO dhe Bashkim Evropian, si dhe në të gjitha organizatat tjera ndërkombëtare.

    Tutje, ajo komentoi edhe raportet mes kryeministrave të të dyjave vende, ku tha se relacionet mes të dyja vendeve janë “mes motrash”.

    “Relacionet mes Kosovës dhe Shqipërisë janë të shkëlqyera. Ne herë i quajmë vëllazërore, por mua më pëlqen t’i quaj relacione mes motrash. Sepse është relacioni më i sinqertë që ekziston. Relacionet mes Kosovës dhe Shqipërisë mund të fuqizohen edhe më tej, mund dhe do ta rrisim koordinimin mes nesh. Sepse është në interes të të dyja shteteve, në interes të kombit tonë, por në interes edhe të paqes dhe stabilitetit afatgjatë…Nuk është situata në veri ajo që ka acaruar dialogun Kosovë-Serbi, është Serbia ajo që gjithnjë acaron situatën në rajonin tonë nëpërmjet sulmeve të njëpasnjëshme ndaj Kosovës. Nuk ka javë që kalon që dikush nga Serbia nuk gjuan me armë policët e Kosovës që janë në territorin e Republikës së Kosovës”, theksoi ajo.

    Megjithatë, ajo komentoi edhe raportet e kreyminstrave Albin Kurti dhe Edi Rama, pwr çka shtoi se çdo diskutim i momentit që mund të ketë involvuar mospajtime është tejkaluar.

    “Si presidente angazhohem që të tejkalojmë çdo lloj mospajtimi të momentit që ekziston, por nuk e shoh as si tragjike, as diçka që na pengon të ecim përpara në këtë qëllim të përbashkët, atë që ju e përmendet si diskutime apo acarim”, u shpreh ajo.

    Edhe presidenti i Shqipërisë, Bajram Begaj tha se nuk kanë rëndësi mosmarrëveshjet e momentit.

    “Nuk ka rëndësi mosmarrëveshjet e momentit. Vizita e presidentes Osmani sot në Shqipëri tregon që ne jemi bashkë për çështje të rëndësishme të interesit ndërshtetëror, por gjithashtu jemi bashkë për të përçuar atë që si komb kemi, frymën evropiane dhe euroatlantike. Rrugëtimi ynë është në një kah, ky rrugëtim është i sigurtë, është i ndryshëm nga Serbia. Nuk mund të vazhdojmë më të mendojmë që jemi në lindje, ne do të vazhdojmë të jemi një në rrugëtimin tonë drejt perëndimit. Nuk mendoj që ka vend për tu shqetësuar, absolutisht ka vend për të përmirësuar këtë koordinim ndërinstitucional që zëri i Kosovës të dëgjohet në çdo forum, në çdo organizëm”, tha ai në konferencë për media.

    Ai shtoi se karakteri strategjik i marrëdhënieve mes të dyja vendeve ka një rol unik për stabilitetin, sigurinë, zhvillimin e qëndrueshëm dhe perspektivën euroatlantike.

    Presidentja Vjosa Osmani sot dhe nesër do të qëndrojë për vizitë në Shqipëri. Ajo u prit me ceremoni shtetërore në ambientet e Presidencës së Shqipërisë. Ajo do të takohet edhe me kryeparlamentaren Lindita Nikolla dhe me kryeministrin Edi Rama. Po ashtu, do t’ia dorëzojë dekretin e nënshtetësisë së Kosovës, shkrimtarit me famë botërore, Ismail Kadare. /KP

  • ​Marrëveshja për grurin, Erdogan takon Putinin në Rusi

    ​Marrëveshja për grurin, Erdogan takon Putinin në Rusi

    Presidenti turk Rexhep Tajip Erdogan të hënën u nis për në qytetin bregdetar rus të Soçit për të takuar presidentin e Rusisë, Vladimir Putin.

    Gjatë vizitës së tij njëditore të punës, Erdogan do të diskutojë çështje aktuale rajonale dhe globale, si dhe marrëdhëniet Turqi-Rusi me Putinin, shkruan AA, transmeton KosovaPress.

    Rikthimi i marrëveshjes historike të grurit të vitit të kaluar në Detin e Zi që ndihmoi në lehtësimin e krizës globale të ushqimit do të jetë gjithashtu në agjendën e tyre, të cilët do të mbajnë konferencë të përbashkët shtypi më vonë.

    Pasi Rusia pezulloi pjesëmarrjen e saj në marrëveshjen e eksportit të grurit në Ukrainë, të ndërmjetësuar nga Turqia dhe OKB-ja, Ankaraja vazhdon përpjekjet e saj për rifillimin e marrëveshjes.

    Moska është ankuar se Perëndimi nuk i ka përmbushur detyrimet e veta në lidhje me eksportet e drithërave të Rusisë dhe se drithi i mjaftueshëm ukrainas po shkonte në shtetet në nevojë. Ai thotë se kufizimet në pagesa, logjistikë dhe sigurime kanë qenë një pengesë për dërgesat e saj.

    Duke konfirmuar rëndësinë e përmbushjes së kërkesave të Rusisë për eksportin e drithit, Turqia thotë se nuk ka alternativë ndaj kësaj nisme.

    Ankaraja ka kryer përpjekje intensive diplomatike për rivendosjen e marrëveshjes së korrikut 2022 dhe gjithashtu i ka bërë thirrje Kievit dhe Moskës që t’i japin fund luftës përmes negociatave.

    Në korrik, Erdogan u takua gjithashtu me homologun e tij ukrainas Volodymyr Zelenskyy në Stamboll për të diskutuar çështjet.

  • Krasniqi: Kostoja e librave është trefishuar, pabarazi fundamentale mes nxënësve

    Krasniqi: Kostoja e librave është trefishuar, pabarazi fundamentale mes nxënësve

    Në mungesë kuorumi, seanca e jashtëzakonshme për librat në Kuvendin e Kosovës nuk ka filluar, raporton EO.

    Mirëpo, kryetari i Kuvendit, Glauk Konjufca, ka bërë një përjashtim duke i lejuar kryetarët e partive të flasin.

    “Nuk ka numra që të fillojmë me seancë të jashtëzakonshme. Mirëpo, po e bëjmë një përjashtim. Le të flasin vetëm kryetarët e grupeve parlamentare”, ka thënë Konfjuca.

    I pari fjalën e mori kryetari i PDK-së, Memli Krasniqi, i cili e ka quajtur të turpshëm dhe të jashtëligjshëm vendimin e Ministrisë për librat. Ai ka pyetur ministren Nagavci nëse ka përfitime personale nga trefishimi i kostos së librave.

    Krasniqi, po ashtu ka thënë se për herë të parë, pas shpalljes së Pavarësisë, qeveria i ka lënë fëmijët e Kosovës pa libra shkollorë.

    “Është për keqardhje që po na imponohet për shkak të papërgjegjësisë së kësaj shumice paralametnare që cdo sesion parlamentar ta fillojmë me seancë të jashtëzakonshme sepse gabimet, veprimet e vendimet e kësaj qeverie po e sjellin situatën të jashtëzakonshme.

    “Sot do të duhej të diskutonim për reformën në arsim, në një situatë normale, për mundësitë e reja që i ka krijuar kjo qeveri për nxënësit tonë, por si opozitë e kemi thirrur këtë seancë për diçka që askush s’e kishte paramenduar, që për herë të parë, pas shpalljes së Pavarësisë, kjo qeveri i ka lënë fëmijët e Kosovës pa libra shkollorë”.

    “Kjo është e turpshme, e për më tepër është shkelje e ligjit. Përtej përgjegjësisë politike, këta njerëz e kjo ministre ka përgjegjësi penale. E kanë shkelur ligjin, e kanë trefishuar koston e librave duke u thirrur në kursime. Në vend se t’iu kushtonte 4.8 milionë, sot po i shpenzojnë 12 milionë euro”, është shprehur ai.

    Ai shtroi pyetje për ministren Nagavci dhe për qeverinë se çfarë plani kanë që t’i kompensojnë humbjet e orëve që I kanë shkaktuar.

    “Do ta imponojnë humbjen e kohës, humbjen e orës për vitin e dytë me radhë. Vitin e kaluar i kanë fajësuar mësimdhënësit, duke i quajtur të paaftë e po prodhojnë analfabetë funksionalë, e sivjet prindërve ua kanë qit edhe një barrë të re, të vrapojnë poshtë e lart që t’i blejnë librat. A di kjo ministre të na tregojë se a ka interesa personale, financiare apo tjerë, që prej 4.8 milionë euro e ka bërë koston 12 milionë euro, që t’iu japë pikërisht atyre që i kritikonte, shtëpive botuese”.

    “A mund të na tregojë kjo ministre e kjo qeveri se çfarë plani ka që t’i kompensojë humbjet e orëve që e kanë shkaktuar tashmë. A mund të na tregojë se si do ta trajtojnë pabaraziën fundamentale që po e krijojnë për herë të parë në Kosovë duke i bërë disa nxënës pa libra e disa nxënës me libra. Dhe, a mund të na tregojë se kush po aplikon tek e-Kosova, sa kanë aplikuar dhe a janë krejt të Kosovës apo edhe ka të tjerë që s’janë rezidentë fare këtu”.

    “100 pyetje është dashur të bëhen në këtë seancë, unë e di që asnjë përgjigje s’e kishim marrë prej këtyre njerëzve, por a ka diçka më të turpshme sesa ikja e shumicës. Nuk jeni duke ikur prej nesh, por prej qytetarëve”.

    “Turp ju qoftë”, ka përfunduar ai.

    Në seancë nuk ka marrë pjesë asnjë deputet i Vetëvendosjes, ndërsa nga kabineti, prezente ka qenë vetëm ministrja e Arsimit, Arbërie Nagavci.

  • VV-ja s’del në seancë të jashtëzakonshme por thërret konferencë për media

    VV-ja s’del në seancë të jashtëzakonshme por thërret konferencë për media

    Grupi parlamentar i Lëvizjes Vetëvendosje ka thirrur konferencë për media nga ora 13:00, ndonëse një seancë e jashtëzakonshme për çështjen e teksteve shkollore është thirrur nga ora 12:00.

    Seanca e jashtëzakonshme aktualisht nuk ka nisur, pasi asnjë deputet i Vetëvendosjes nuk është në sallë, ndërsa nga kabineti, prezente është vetëm ministrja e Arsimit, Arbërie Nagavci.

    Në sallë tashmë kanë mbërritur vetëm disa deputetë të opozitës, gjë që nuk ua mundëson kuorumin për të nisur seancën.

    Deputetët e Vetëvendosjes as përkundër thirrjes së kryetarit të kuvendit, Glauk Konjufca, që të gjitha grupet parlamentare të marrin pjesë në seancë, nuk i janë përgjigjur ftesës së të tij.

  • Deputetja e LDK-së: Sot Qeveria e popullit nuk është në Kuvend, po ikin e s’po ballafaqohen me argumentet tona

    Deputetja e LDK-së: Sot Qeveria e popullit nuk është në Kuvend, po ikin e s’po ballafaqohen me argumentet tona

    Deputetja e Lidhjes Demokratike të Kosovës (LDK), Hykmete Bajrami, ka hedhur akuza në drejtim të mazhorancës për mospjesëmarrje në seancën e jashtëzakonshme, ku po diskutohet për furnizimin me teksteve shkollore, raporton EO.

    Bajrami ka marrë si shembull mungesën e bibliotekës në Kaçanik, e që prindërve detyrohen të shkojnë në Ferizaj për të blerë tekste shkollore.

    Sipas Bajramit, ka prindër që i kanë vizituar disa librari për t’i kompletuar librat e fëmijëve.

    “Qeveria e majtë e vrau elementin e barazisë të nxënësve në shkolla. Ata çdo 1 shtator kanë nisur mësimin me libra në banka…Sot Qeveria nuk është në kuvend. Nuk po e dimë prej kujt po ikni. Nëse e keni me të drejtë këtë veprimin e juaj që është antiligjor, nga kush po ikni? Kemi parë prindër që i kanë shëtitur deri në 5 librari për t’i kompletuar librat”, është shprehur ajo.

    Deputetja e partisë opozitare ka theksuar se do të ketë nxënës që nuk do të mund t’i kenë të gjitha tekstet shkollore deri në fund të vitit shkollor.

    Bajrami, lëshoi edhe kritika për mazhorancën dhe ministren e Arsimit, Arbërie Nagavci.

    “Me 1 qershor këtë vit ministrja Nagavci ka thënë se nxënësit do t’i kenë librat, tash ndryshoi vendimi dhe nga klasa 6 deri 9, nxënësit t’i marrin librat e vjetër. Sot qeveria e 51% nuk është në Kuvend. Nuk e dimë prej kujt po ikni, në qoftë se e keni me të drejtë, atëherë pse sot nuk i keni deputetët e mazhorancës në Kuvend të përballen me kritikat tona”, u shpreh ajo.

    Bajrami, ka thënë se do të ketë nxënës që deri në fund të vitit shkollor, “nuk do t’i kenë librat në bankë”.

  • Hoti: Kundërshtuesit e Marrëveshjes së Washingtonit po i bartin sot pasojat

    Hoti: Kundërshtuesit e Marrëveshjes së Washingtonit po i bartin sot pasojat

    Ish-kryeministri i Kosovës, njëherit deputet i Lidhjes Demokratike të Kosovës, Avdullah Hoti, ka shkruar se Marrëveshja e Washingtonit, e nënshkruar tri vjet më parë mes Kosovës dhe Serbisë në Shtëpinë e Bardhë, ishte kundërshtuar nga populistët që sot janë në pushtet.

    Ai ka deklaruar në Facebook të hënën se për këtë Marrëveshje, që e kishte nënshkruar sa ishte kryeministër, ishte ofenduar e sharë, derisa ka shtuar se ajo është marrëveshja më e rëndësishme për Kosovën që nga shpallja e pavarësisë.

    “Janë thënë shumë të pavërteta për Marrëveshjen e Uashingtonit nga opozita e atëhershme. Cilësimi i një marrëveshje që është arritur në Shtëpinë e Bardhë si e dëmshme dhe e rrezikshme për Kosovën ishte gabim strategjik. Pasojat po i bartin çdo ditë. Unë personalisht jam fyer e sharë nga opozita e atëhershme. Ata populistë sot janë në Kuvend, Qeveri dhe Presidencë. Sot, është e qartë se ato epitete i meritojnë ata, jo unë. Sot, është e qartë se ata persona: ose janë mashtrues, ose janë naivë në marrëdhëniet ndërkombëtare, ose kanë tjetër orientim për Kosovën. E di secili prej tyre se në cilën kategori bien. E di edhe unë”, ka shkruar Hoti.

    Deputeti i partisë opozitare ka shtuar se pas arritjes së kësaj marrëveshjeje me Serbinë në Shtetet e Bashkuara të Amerikës, kishte nisur dialogu në Bruksel për njohje reciproke, “bazuar në parimin se nuk bisedohet për territore dhe as për organizimin kushtetues të shtetit”.