Category: Lajme

Në fshatin Banjskë të Komunës së Zveçanit as sot në mëngjes nuk mund të hyhet e as të dilet.

Të gjitha lëvizjet janë të bllokuara nga njësitet policore dhe nuk dihet ende se kur do të zhbllokohen.

Të tria qasjet për në fshatin Banjskë, nga drejtimi i Zveçanit, Zubin Potok dhe nga rruga kryesore Mitrovicë-Leposaviq, janë të bllokuara.

Vendkalimet kufitare në Jarinje dhe Bërnjak janë ende të mbyllura për qarkullim.

Situata në vendkalimet administrative Jarinje dhe Bërnjak nuk ka ndryshuar, kështu qytetarët mund të largohen nga Kosova, si dje gjatë gjithë ditës, por në Kosovë nuk mund të hyjnë veturat e pasagjerëve dhe madje as këmbësorët.

Policia e Kosovës ka marrë mbështetje të madhe pas aksionit të djeshëm kundër terroristëve serbë në Banjskë të Zveçanit, ku fatkeqësisht mbeti i vdekur polici, Afrim Bunjaku nga Samadrexha e Vushtrrisë.

Mesazhe falënderuese për Policinë e Kosovës kanë ardhur edhe nga New York-u.

Në Times Square, në zemër të New York’ut janë shfaqur billboarda falënderues për Policinë e Kosovës.

Të vdesësh për atdhe është sikur të rilindësh përsëri -Afrim Bunjaku”, “Faleminderit heronjve tanë Policisë të Kosovës”, janë mesazhet që janë shfaqur në Times Square.

Këto billboarde janë vendosur nga Platforma e patundshmërive, kompania shqiptaro-amerikane Tafingo, tashmë e njohur në komunitetin shqiptarë që gjithmonë për festen e Pavarësisë mbush sheshin e New Yorkut si dhe billlboarda të tjera nëpër Amerike me flamuj të Kosovës.

Ambasada e Kosovës në Emiratet e Bashkuara Arabe, ka ulur flamurin në gjysmështizë për t’u solidarizuar me Kosovën e cila sot është në zi për vdekjen e policit Afrim Bunjaku.

“Kosova sot mban zi për vrasjen e një polici, i cili u vra në krye të detyrës gjatë një sulmi terrorist të kryer nga grupet kriminale të Serbisë në komunën e Zveçanit të Kosovës”, ka shkruar në një postim në X, Xhabir Hamiti, ambasador i Kosovës në këtë vend.

Ambasada e Kosovës në Emiratet e Bashkuara Arabe e ka ulur flamurin e Kosovës në gjysmështizë.

Prokuroria Speciale e Kosovës ka njoftuar se janë ndaluar gjashtë persona për sulmin ndaj Policisë. Ata dyshohen për katër vepra penale, pas sulmit në fshatin Banjskë të Zveçanit e njëra nga to është për vepra terroriste.

Avokati, Arbër Jashri, i tha Ekonomia Online se veprat penale kundër rendit Kushtetues dhe sigurisë së Republikës së Kosovës, janë veprat më të rënda që parashihen në Kodin Penal.

Ai ka sqaruar se legjislacioni ka paraparë dënime, nëse të arrestuarit shpallen fajtor më së paku 10 vjet burgim e deri me burgim të përjetshëm.

“Veprat penale kundër rendit Kushtetues dhe sigurisë së Republikës së Kosovës, janë prej veprave më të rënda penale që i ka paraparë legjislacioni jonë penal, janë ato që e hapin Kodin Penal dhe për to janë paraparë dënime shumë të rënda”.

“Personat që janë arrestuar po dyshohen për katër vepra penale, sulm ndaj rendit Kushtetues, vepra të rënda penale kundër rendit Kushtetues, përgatitja e veprave penale terroriste dhe vepra penale për armë mbajtje pa leje”.

“Tek këto vepra të rënda kundër rendit Kushtetues, legjislacioni ka paraparë dënime të cilat vepra rezulton me vdekjen e ndonjë personi siç ka ndodhur dje, atëherë personat përgjegjës nëse shpallen fajtor do të dënohen ose mund të dënohet më së paku 10 vjet burgim e deri me burgim të përjetshëm”.

Po ashtu, Prokuroria ka thënë se nga aksioni i Policisë janë sekuestruar automjete të mbushura me sasi të konsiderueshme të armatimit të llojeve të ndryshme.

Të ndaluarit janë dërguar në mbajtje për 48 orë.

Policia e ka në kontroll gjithë perimetrin edhe të Manastirit në Banjskë të Zveçanit por edhe të gjithë fshatit për shkak të pranisë së madhe të saj.

Një grup i disa makinave të blinduara të EULEX-it ka shkuar atje, ndërkaq grupet e forenzikës janë duke e kryer punën e tyre,

Për më tepër, një grup i pelegrinëve kanë ngelur gjatë gjithë kohës në manastir dhe ende janë aty.

Ish-ministri i jashtëm i Kosovës, Enver Hoxhaj, ka nisur mëngjesin e sotëm duke shpërndarë një fotografi të emblemës së Policisë së Kosovës, në nderim të policit Afrim Bunjaku. 

Përmes një statusi në rrjetin social Facebook, nënkryetari i Kuvendit të Kosovës, Enver Hoxhaj, ka shkruar përulje dhe nderim për policin Afrim Bunjaku.

“Përulje dhe nderim përgjithmonë për Afrim Bunjakun!”, ka shkruar Hoxhaj derisa ka publikuar edhe një fotografi të emblemës së Policisë së Kosovës.

Sot, dijmë që në Kosovë është shpallur ditë zie nga Presidentja e Kosovës Vjosa Osmani, në nderim të policit të vrarë dje nga bandat terroriste serbe në veri të Mitrovicës, Afrim Bunjakut.

Kryeministri i Shqipërisë, Edi Rama, ditën e sotme e ka nisur me një postim në Facebook.

Ai ka nderuar me përulje policin e vrarë dje në Veri, Afrim Bunjaku.

“Mirëmëngjes me përuljen me nderim për efektivin e Policisë së Kosovës, Afrim Bunjaku, i cili dha jetën në krye të detyrës”, ka shkruar ai.

Polici i Kosovës, Afrim Bunjaku, i cili u vra dje në veri të vendit, do të varroset sot nga ora 16:00.

Ai do të varroset në varrezat e fshatit Samadrexhë, sipas faqes jozyrtare të këtij fshati në Facebook.

“Nesër nga ora 16:00 bëhet varrimi i policit të rënë në detyrë, Heroit, Afrim Bunjaku. I njoftojmë të gjithë bashkëvendësit dhe të gjithë popullin e Kosovës se nesër, ditë e hënë, nga ora, 16:00, në varrezat e fshatit Samadrexhë, me nderime shtetërore, do të bëhet varrimi i policit të rënë në detyrë, bashkëvendësi ynë, Heroi, Afrim Bunjaku”, thotë njoftimi në këtë faqe.