Category: Lajme

Prokuroria Themelore në Prizren ka kërkuar caktimin e masës së paraburgimit prej 30 ditësh ndaj Bardh Dushit, i dyshuar për veprën penale “Vrasja e rëndë”.

Sipas Prokurorisë, ngjarja ka ndodhur më 26 gusht 2026, rreth orës 00:05, në shtëpinë e të dyshuarit në Prizren.

I dyshuari pas një fjalosjeje me bashkëshorten e tij, viktimën me inicialet L.D., dyshohet se e ka sulmuar fizikisht atë dhe e ka goditur e përplasur disa herë kokën e saj në tokë. Si pasojë e lëndimeve të marra, gruaja ka vdekur në vendin e ngjarjes.

“Po ashtu, pas ngjarjes B.D., ka tentuar të fshijë gjurmët e ngjarjes, dhe më pas ka njoftuar familjarët për rastin.Prokuroria Themelore në Prizren mbetet e përkushtuar në luftimin e kriminalitetit, forcimin e sundimit të ligjit dhe sigurimin që secili person i dyshuar për kryerjen e veprave penale të përgjigjet para organeve të drejtësisë”, thuhet në njoftim.

Ushtruesja e detyrës së shefes së Zyrës së BE-së, Eva Palatova, ka zhvilluar sot takimin e saj lamtumirës me u.d të Presidentes, Albulena Haxhiu.

Palatova ka thënë se është krenare që ka ndihmuar Kosovën në avancimin drejt rrugës për BE.

Ajo ka thënë se Kosova duhet të ketë unitetin politik, për ta bërë anëtarësimin në BE synim të përbashkët.

Palatova në takim lamtumirës me Kurtin, përsërit thirrjen e BE-së për formimin e institucioneve

Policia e Kosovës ka bërë të ditur se një rast të të shtënave me armë në Prishtinë.

Rasti ka ndodhur të enjten, në ora 00:10.

“Njësitë relevante të policisë pas pranimit të informatave për të shtëna me armë zjarri në oborrin e shtëpisë së të dyshuarit mashkull Kosovar, kanë gjetur dhe konfiskuar katër gëzhoja të armës së zjarrit”, thuhet në raport.

I dyshuari nuk është hasur në shtëpi, sipas familjarëve ai ishte dehur dhe ishte larguar nga shtëpia.

Lidhur me rastin është njoftuar prokurori, i cili ka kërkuar inicimin e rastit. /Telegrafi/

Partia Demokratike e Kosovës(PDK) dorëzon sot në Prokurorinë Speciale të Republikës së Kosovës kallëzim penal ndaj deputetit Avni Dehari, në cilësinë e drejtuesit të përkohshëm të seancës konstituive të Kuvendit, raporton Ekonomia Online.

Në një konferencë për media, deputeti i PDK-së, Përparim Gruda, bëri të ditur se kallëzimi do të dorëzohet nën dyshimin për kryerjen e veprës penale “keqpërdorimi i pozitës apo autoritetit zyrtar”, sipas nenit 414 të Kodit Penal të Kosovës.

Sipas kallëzimit të PDK-së, Dehari, në cilësinë e deputetit më të vjetër në moshë dhe kryesuesit të seancës konstituive të Legjislaturës XI, dyshohet se nga 8 gushti 2026 e në vazhdim nuk e ka përmbushur detyrën e tij për vazhdimin e seancës konstituive brenda afatit prej 48 orësh.

PDK vlerëson se Dehari ka tejkaluar kompetencat e rolit të tij procedural duke e kushtëzuar vazhdimin e seancës me arritjen e një “marrëveshjeje politike”, pavarësisht kërkesave të përsëritura me shkrim nga grupet parlamentare opozitare.

Në kallëzim përmenden kërkesat e opozitës të datave 13, 17, 19 dhe 23 gusht, përmes të cilave është kërkuar vazhdimi i seancës konstituive.

PDK vlerëson se mosvazhdimi i seancës ka pamundësuar konstituimin e Kuvendit dhe ushtrimin e kontrollit parlamentar ndaj Qeverisë në dorëheqje, ndërsa veprimet e Deharit i kanë shërbyer kësaj agjende.

Deputeti Përparim Gruda tha se PDK pret nga Prokuroria Speciale trajtimin e kallëzimit në përputhje me ligjin dhe zbardhjen e përgjegjësisë së mundshme penale lidhur me bllokimin e procesit të konstituimit të Kuvendit.

“Partia Demokratike e Kosovës sot do të depozitojë një kallëzim penal në Prokurorinë Speciale ndaj deputetit Avni Dehari, i cili, siç e dini, për shkak të moshës është drejtues i seancës konstituive, ose kryesues i saj, dhe detyrë të cilën ai nuk po e ushtron në përputhje me Rregulloren e Punës së Kuvendit të Kosovës dhe me Kushtetutën e Kosovës. Siç e dini, Rregullorja e Kuvendit të Kosovës kërkon që Kuvendi të mblidhet çdo 48 orë. Avni Dehari, si kryesues i kësaj seance, duhet ta mbledhë Kuvendin çdo 48 orë që të vazhdonte seancën konstituive. Përkundër se ne kemi dërguar disa letra, nuk, nuk ka reflektuar dhe nuk e ka thirrur seancën, vazhdimin e seancës konstituive. Prandaj, ne do të paraqesim kallëzim penal për shpërdorim të detyrës zyrtare në përputhje me nenin 414 të Kodit Penal të Republikës së Kosovës”, tha ai.

Deputetja e LDK-së, Jehona Lushaku-Sadriu, ka kritikuar Ministrinë e Arsimit dhe Shkencës për vonesat në sigurimin e teksteve shkollore, pak ditë para fillimit të vitit të ri shkollor.

Lushaku-Sadriu ka thënë se rreth 200 mijë nxënës të klasave 1–9 ende nuk e dinë se kur do t’i kenë tekstet shkollore, ndërsa prindërit, sipas saj, presin subvencionet për blerjen e librave.

Përmes një postimi në Facebook, deputetja e LDK-së ka deklaruar se edhe ky vit shkollor po nis me vonesa dhe pasiguri, duke ia atribuar përgjegjësinë Ministrisë së Arsimit.

“Edhe një vit shkollor po fillon me rrëmujë, vonesa, ankth të prindërve, për shkak të papërgjegjësisë së Ministrisë së Arsimit dhe Shkencës. Rreth 200 mijë nxënës të klasave 1–9, vetëm katër ditë para fillimit të mësimit, ende nuk e dinë kur do t’i kenë tekstet shkollore. Prindërit presin subvencionet, libraritë presin prindërit, ndërsa fëmijët rrezikojnë të ulen përsëri në bankat shkollore pa libra. E Ministria e arsimit, sot, më 27 gusht, ende nuk e ka caktuar as shumën e subvencionimit për librat!”, ka shkruar ajo, duke dhënë detaje tjera.

Ajo ka kritikuar gjithashtu mënyrën e organizimit të procesit, duke thënë se Ministria ka pasur kohë të mjaftueshme për përgatitjet.

“Data e fillimit të vitit shkollor dihej botërisht. Ministria ka pasur muaj të tërë për t’u përgatitur, jo ta lë organizimin, kur zilja e parë është gati të bjerë. Kjo qasje është poshtëruese ndaj nxënësve, prindërve dhe mësimdhënësve dhe dëshmi e një Ministrie që nuk arrin ta organizojë me kohë as procesin më elementar të fillimit të vitit shkollor. Tash e pesë vite e njëjta skenë: vendime në minutën e fundit, prindër që vrapojnë pas librave, vonesa në furnizim dhe nxënës që e fillojnë shkollën pa kushtet më bazike për mësim. Fëmijët dhe familjet tona po e paguajnë çmimin e paaftësisë së një të ashtuquajture Qeveri në detyrë, që veç në detyrë nuk është!”, ka shkruar Lushaku-Sadriu.

Këshilli Gjyqësor i Kosovës (KGJK) ka refuzuar kërkesat për tërheqjen e dorëheqjeve dhe rikthimin në sistemin gjyqësor të gjyqtarëve dhe stafit administrativ serb në veri të Kosovës, të cilët kishin dhënë dorëheqje në vitin 2022, raporton Ekonomia Online.

Vendimi është marrë me 9 vota për, një kundër dhe një abstenim. Gjatë diskutimit, anëtarët e KGJK-së kanë shprehur qëndrime të ndryshme lidhur me mundësinë e rikthimit të tyre në sistemin gjyqësor.

Anëtari i KGJK-së, Artan Abazi, ka kundërshtuar rikthimin e gjyqtarëve dhe stafit administrativ, duke theksuar se dorëheqjet e tyre në vitin 2022 kanë qenë të parevokueshme dhe se gjatë katër viteve ka pasur ndryshime në ligje dhe praktika.

“Duke pasur parasysh që në vitin 2022, këta gjyqtarë me vullnetin e tyre kanë dhënë dorëheqje të parevokueshme, kjo është për me pasur parasysh. Duke pasur parasysh këtë gjendje unë konsideroj që gjyqtarët edhe stafi administrativ duke pasur parasysh që 4 vite nuk janë, ata kanë humbur edhe aftësinë profesionale për ta ushtruar pozitën e gjyqtarit dhe pozitat administrative. Konsideroj se absolutisht nuk janë të aftë të ushtrojnë pozitën sepse kanë ndryshuar ligji, praktikat, në aspektin profesional së pari. Unë konsideroj që për disa janë të përfshirë edhe në aktivitete politike, ata që janë të përfshirë në aktivitete politike nuk kanë vend sistemin gjyqësor të Kosovës. Ne nuk e din që ndonjëri nga ta mund të ketë kryer edhe vepër penale. Propozoj që të mos aprovohet kërkesa për revokimin e dorëheqjes”, tha ai.

Në anën tjetër, anëtarja e KGJK-së, Ivana Milenkoviq, ka mbështetur kthimin e tyre në sistem, duke argumentuar se me pranimin e tërheqjes së dorëheqjeve do të përmbushej garancia kushtetuese ndaj qytetarëve.

“Me pranimin e tërheqjes së dorëheqjeve, ne nuk po u bëjmë koncesione gjyqtarëve, por po përmbushim garancinë kushtetuese ndaj qytetarëve. Heqja e mandatit të gjyqtarëve dhe menaxhimi i statusit të dorëheqjeve janë në kompetencën ekskluzive të Këshillit Gjyqësor të Kosovës. Me refuzimin e kërkesave për tërheqjen e dorëheqjeve, do të krijonim një vakum juridik dhe institucional, i cili, sipas ligjit në fuqi për gjykatat, është i pamundur të plotësohet shpejt pa cenuar vetë rrjedhën e kornizës ligjore. Gjyqtarët dhe stafi ndihmës, në kuadër të procedurave ligjore, kanë paraqitur kërkesën për tërheqjen e dorëheqjeve. Me këtë, është rivendosur vullneti juridik i bartësve të funksioneve gjyqësore për të vepruar me kapacitet të plotë brenda Kosovës. Me këtë hap do t’u mundësojmë gjyqtarëve që të kthehen në detyrat e tyre, do ta mbrojmë rendin kushtetues dhe do ta rikthejmë sigurinë juridike për qytetarët”, tha ajo.

Ndërkaq, anëtari i KGJK-së, Bashkim Hyseni, ka thënë se zgjidhja do të duhej të ishte lirimi i këtyre zyrtarëve nga detyra dhe hapja e një konkursi të ri.

“Mendoj se zgjidhja do të duhej që këta zyrtarë të lirohen nga detyra dhe të hapet konkursi. Nëse ne do të pranojmë këtë pas 4 vitesh do të krijohet një precedent i rrezikshëm. Nëse partnerët tanë kërkojnë që të shkelet kushtetuta, mendoj që është jo korrekte sepse nuk do ta bënin ata në vendin e tyre. Mandati i gjyqtarit nuk fillon nga emërimi por nga betimi, dorëheqja nuk ka qenë individuale, por ka qenë e orkestruar dhe kolektive”, tha ai.

Edhe anëtari tjetër i KGJK-së, Ahmet Imami, ka votuar kundër rikthimit të tyre në sistemin gjyqësor.

“Unë do të votoj kundër që ata të kthehen në sistemin gjyqësor pas katër viteve sepse dorëheqja e tyre ka qenë vullnetare”, tha ai.

Gjatë punimeve në një rrugë në Gjilan janë hasur disa mjete të pashpërthyera, përfshirë fishekë, karikatorë, armë të gjata, granata dore dhe një uniformë ushtarake, që dyshohet se kanë mbetur nga periudha e luftës.

Sipas raportit të Policisë së Kosovës, rasti është raportuar më 26 gusht, rreth orës 10:40.

Njësia policore ka siguruar vendin e ngjarjes, ndërsa më pas kanë dalë njësitë për deminim të KFOR-it dhe Forcës së Sigurisë së Kosovës.

Pas ndërhyrjes së ekipeve kompetente, mjetet e dyshimta janë tërhequr pa ndonjë incident.

Në mungesë të ish-deputetit Pal Lekaj i cili ndodhej jashtë vendit dhe mbrojtësit të tij, avokatit Musa Damati, ka dështuar të mbahet seanca e së enjtes në Gjykatën Themelore në Prishtinë, në rastin ku Lekaj ngarkohet për hedhje të gazit lotsjellës në hollin e Kuvendit të Kosovës më 30 nëntor 2015.

Lekaj po akuzohet se më 30 nëntor 2015 në hollin e Kuvendit, me qëllim të pengimit të punës së deputetëve, ka hedhur gazin lotsjellës, me ç’rast për disa minuta është ndërprerë puna dhe deputetët e të pranishmit e tjerë, janë detyruar të largohen nga holli dhe salla e Kuvendit, raporton “Betimi për Drejtësi“.

Gjyqtarja e rastit, Edita Çanta, deklaroi se mbrojtësi i të akuzuarit Lekaj, avokati Musa Damati, me anë të parashtresës e ka njoftuar Gjykatën se Lekaj nuk mund të jetë prezent në seancën e së enjtes, andaj ka kërkuar që të shtyhet për një datë tjetër.

“Mungon i pandehuri Pal Lekaj me avokatin e tij i cili me anë të parashtresës e ka njoftuar gjykatën që nuk mund të prezantojnë në seancë pasi që i pandehuri gjendet jashtë shtetit për arsye objektive të agjendës së tij private”, tha gjyqtarja Çanta.

Andaj, në mungesë të kushteve ligjore seanca u shty për një datë tjetër.

Prezent në shqyrtim gjyqësor ishte vetëm prokurori Dardan Çela.

Në seancën e mbajtur më 30 prill 2025, Lekaj ishte deklaruar i pafajshëm për hedhjen e gazit lotsjellës në hollin e Kuvendit.

Ndryshe, Prokuroria Themelore në Prishtinë, më 1 qershor 2017 ka ngritur aktakuzë kundër Pal Lekajt, të cilin e ngarkon me veprën penale “Përdorim i armës apo mjetit të rrezikshëm”.

Sipas aktakuzës, i pandehuri më 30 nëntor 2015, në hollin e Kuvendit të Republikës së Kosovës me qëllim të pengimit të punës së deputetëve, ka përdorur armën-gazin lotsjellës.

Aktakuza thotë se si pasojë e kësaj, për disa minuta është ndërprerë puna në Kuvend për shkak të kontaminimit të ambientit dhe se deputetët e të pranishmit e tjerë janë detyruar të largohen nga holli dhe salla e Kuvendit.

Me këtë, Lekaj po akuzohet se ka kryer veprën penale “Përdorim i armës apo mjetit të rrezikshëm” nga neni 375, par.2 të Kodit Penal, ku kryerësi dënohet me gjobë deri në 10 mijë euro dhe me burgim prej një deri në 10 vjet.

Gjykata Themelore në Prishtinë ka caktuar seancën e parë gjyqësore ndaj Fatmir Shehollit, i cili po përballet me aktakuzë për veprat penale “spiunazh” dhe “shantazh”.

Për Telegrafin, Gjykata Themelore ka konfirmuar se seanca e parë do të mbahet më 7 shtator në ora 09:30.

Sipas aktakuzës së Prokurorisë Speciale, të siguruar nga Telegrafi, Sheholli akuzohet se ka vepruar në ndihmë të Agjencisë së Inteligjencës dhe Sigurisë së Serbisë (BIA), në koordinim me zyrtarin e saj, Bojan Dimiq.

Prokuroria pretendon se Sheholli ka mbledhur dhe përcjellë informacione e materiale lidhur me aktivitetet politike, gjendjen e sigurisë dhe funksionimin e institucioneve të Kosovës.

Një prej episodeve kryesore të përshkruara në aktakuzë lidhet me 26 shtatorin 2025, kur, sipas Prokurorisë, Sheholli kishte marrë në Mitrovicën e Veriut një dosje me materiale audio dhe transkripte, si dhe 5 mijë euro.

Sipas aktakuzës, këto materiale më pas i janë dorëzuar gazetarit Milaim Zeka, bashkë me 1 mijë euro me qëllim të publikimit të tyre.

Prokuroria pretendon gjithashtu se në telefonin e Shehollit janë gjetur komunikime me numrin që i atribuohet Bojan Dimiqit, ndërsa një pjesë e materialeve të sekuestruara përfshijnë dokumente të cilat Prokuroria i konsideron të lidhura me aktivitetet e shërbimeve serbe.

Në aktakuzë përmendet edhe një dokument i titulluar “Top Secret 2”, për të cilin Prokuroria pretendon se përmban një plan për krijimin e perceptimit të Kosovës si vend i radikalizuar dhe për destabilizimin e saj.

Përveç akuzës për spiunazh, Sheholli akuzohet edhe për shantazh ndaj një biznesmenit. Sipas Prokurorisë, nga viti 2022 deri në dhjetor 2025, ai dyshohet se i ka shkaktuar biznismenit Jetullahu dëm që tejkalon 13 mijë euro, duke përdorur si presion kërcënimin për publikimin e materialeve komprometuese.

Sheholli, sipas aktakuzës, i ka pranuar kontaktet me Dimiqin dhe marrjen e disa materialeve e parave, por ka mohuar se ka punuar për BIA-n ose se ka vepruar kundër interesave të Kosovës. Ai është deklaruar i pafajshëm për akuzën e spiunazhit.

Edhe për akuzën e shantazhit, Sheholli e ka mohuar versionin e Prokurorisë, duke deklaruar se pagesat nga Jetullahu ishin bërë vullnetarisht dhe nuk ishin të lidhura me kërcënime.

Prokuroria Speciale ka kërkuar vazhdimin e paraburgimit ndaj Shehollit, ndërsa provat e paraqitura në aktakuzë përfshijnë përgjime telefonike, komunikime nga telefoni i tij, video-incizime, pamje nga kamerat e sigurisë, dokumente të sekuestruara, dëshmi të dëshmitarëve dhe raporte financiare.

Fatmir Sheholli prezumohet i pafajshëm deri në një vendim përfundimtar të gjykatës. /Telegrafi/